Դաս 126. Վարդապետություն և Ուխտեր 111–114

Վարդապետություն և Ուխտեր 112

«Տերը՝ քո Աստվածը, ձեռքդ բռնած կառաջնորդի քեզ»

Հիսուս Քրիստոսի խոնարհությունն օգնեց Նրան հասկանալ և կատարել Իր Հոր կամքը Իր մահկանացու ծառայության ընթացքում (տես Հովհաննես 5․30): Վարդապետություն և Ուխտեր 112 բաժնում Փրկիչն ուսուցանեց Թոմաս Բ. Մարշին, որ խոնարհությունը կարող է օգնել մեզ ուղղորդում ստանալ մեր Երկնային Հորից։ Այս դասի նպատակն է օգնել ուսանողներին խոնարհաբար փնտրել Երկնային Հոր առաջնորդությունը:

Հնարավոր ուսումնական վարժություններ

Փնտրեք աստվածային առաջնորդություն

Որպեսզի պատրաստեք ուսանողներին՝ սովորելու Երկնային Հորից առաջնորդություն ստանալու մասին, կարող եք ցուցադրել հետևյալ հարցերը և առաջարկել ուսանողներին խորհել իրենց պատասխանների շուրջ: Դուք կարող եք նաև ուսանողներին առաջարկել ընտրել հարցերից մեկը կամ երկուսը՝ իրենց ուսումնական օրագրերում պատասխանելու համար:

• Ձեր կյանքում ինչպիսի՞ առաջնորդության կարիք ունեք Երկնային Հոր կողմից:

• Ի՞նչն է ձեզ օգնում առաջնորդություն ստանալ Երկնային Հորից։

• Ի՞նչն է երբեմն խանգարում առաջնորդություն ստանալ Երկնային Հորից:

Աստվածային առաջնորդություն ստանալու մասին Փրկչի ուսմունքներից մեկը քննարկելիս՝ ուշադրություն դարձրեք, թե Հոգին ինչ է ուսուցանում ձեզ այն մասին, թե ինչպես կարող եք բարելավել Նրա կողմից առաջնորդվելու ձեր կարողությունը:

Խոնարհությունը տանում է դեպի աստվածային առաջնորդություն

Որպեսզի օգնեք ուսանողներին ավելին հասկանալ Վարդապետություն և Ուխտեր 112 բաժնի համատեքստը և այն, թե ինչու էր Թոմաս Բ. Մարշը առաջնորդություն փնտրում Տիրոջից, կարող եք ցուցադրել հետևյալ տեղեկությունները և առաջարկել որևէ ուսանողի կարդալ դրանք։

1837 թվականին Թոմաս Բ. Մարշը ծառայում էր որպես Տասներկու Առաքյալների Քվորումի նախագահ։ Կիրթլենդի որոշ Սրբերի, այդ թվում՝ Տասներկու Առաքյալների Քվորումի որոշ անդամների մեջ ուրացության և սխալներ գտնելու ոգի էր զարգացել։ 1837 թվականի հունվարին Եկեղեցու ղեկավարները կազմավորեցին բանկ, որը կոչվում էր Կիրթլենդի անվտանգության միություն: Դիմակայելով մի շարք մարտահրավերների, այդ թվում՝ համազգային ֆինանսական ճգնաժամին, բանկը, ի վերջո, սնանկացավ, ինչը սաստկացրեց Մարգարե Ջոզեֆ Սմիթի դեմ բողոքը: Մտահոգված լինելով այս պառակտումով՝ Թոմաս Բ. Մարշը թողեց իր տունը Միսսուրիում և մեկնեց Կիրթլենդ։ Նա որոշել էր հանդիպել Տասներկուսի հետ և աջակցություն ցույց տալ Ջոզեֆին: Այնուամենայնիվ, ժամանելուն պես նախագահ Մարշն իմացավ, որ Ջոզեֆը Տասներկուսի երկու անդամներին ուղարկել է Անգլիա՝ միսիաներ ծառայելու։ Որպես քվորումի նախագահ՝ նախագահ Մարշը վրդովված էր, որ Ջոզեֆը նախապես չէր հարցրել իր խորհուրդը: Այնուամենայնիվ, Թոմաս Բ. Մարշն այցելեց Ջոզեֆ Սմիթին՝ Տիրոջ ուղղորդումը փնտրելու համար:

Որոշեք, թե ընթերցանության որ եղանակը լավագույնս կօգնի ձեր ուսանողներին ուսումնասիրել հետևյալ հատվածները: Կարող եք հատվածները բաժանել առանձին ուսանողների կամ ուսանողների խմբերի միջև: Կամ մի քանի ուսանող՝ ցանկության դեպքում կարող են կարդալ հատվածները բարձրաձայն, իսկ դասարանի անդամները կարող են հետևել տեքստին։

Կարդացեք Վարդապետություն և Ուխտեր 112.2–3, 10, 12–15, 20–22, 28, 33–34 հատվածները՝ փնտրելով այն խորհուրդը, որ Տերը տվեց Թոմաս Բ. Մարշին, որը պետք է օգներ նրան առաջնորդություն ստանալ Տիրոջից։

• Ի՞նչ կարևոր բառեր կամ արտահայտություններ գտաք:

• Ի՞նչ սկզբունքներ կարող եք բացահայտել այս հատվածներից:

Ուսանողները կարող են նշել մի քանի սկզբունք իրենց ուսումնասիրությունից: Հետևեք Սուրբ Հոգու հուշումներին՝ լրացուցիչ հարցեր տալու և օգնելու ուսանողներին խորացնել իրենց բացահայտած սկզբունքների ըմբռնումը։ Այս դասի մնացած մասը կկենտրոնանա այն ճշմարտության վրա, որ եթե մենք խոնարհ լինենք, Երկնային Հայրը կուղղորդի մեզ և կպատասխանի մեր աղոթքներին (տես հատված 10)։

Որպեսզի օգնեք ուսանողներին խորացնել այս սկզբունքի իրենց ըմբռնումը, կարող եք ուսանողներին խմբերի բաժանել՝ քննարկելու հետևյալ հարցերը: Այնուհետև նրանք կարող են կարդալ Երեց Սոարեսի խոսքերը և քննարկել հետևյալ հարցը.

• Ինչպե՞ս կսահմանեիք խոնարհությունը։

• Ձեր կարծիքով, ինչպես է խոնարհությունն օգնում մեզ ստանալ մեր աղոթքների պատասխանները:

Տասներկու Առաքյալների Քվորումից երեց Ուլիսես Սոարեսն ուսուցանել է.

Ես հավատում եմ, եղբայրներ և քույրեր, որ միայն նրանք, ովքեր խոնարհ են, ի վիճակի են ըմբռնել և հասկանալ իրենց աղոթքներին տրված Տիրոջ պատասխանները: Խոնարհները ուսուցանվող են, գիտակցում են, թե որքան կախված են Աստծուց, և ցանկանում են ենթարկվել Նրա կամքին: Խոնարհները հեզ են և ունակ են իրենց ազդեցության շնորհիվ ներազդել ուրիշների վրա, որպեսզի նրանք անեն նույնը: Աստծո խոստումը խոնարհներին այն է, որ Նա ձեռքը բռնած կառաջնորդի նրանց: Ես իսկապես հավատում եմ, որ մենք կխուսափենք զարտուղի ճանապարհներից և տխրությունից, եթե քայլենք Տիրոջ ձեռքը բռնած: (Ուլիսես Սոարես «Եղեք հեզ ու սրտով խոնարհ», Լիահոնա, նոյեմբեր 2013, 10)

• Ուրիշ ի՞նչ գտաք, որն օգնում է խորացնել հատված 10-ի ձեր ըմբռնումը:

Դուք կարող եք հնարավորություն տալ մի քանի խմբի՝ հակիրճ կիսվելու, թե ինչ սովորեցին իրենց քննարկումից:

Ինչպե՞ս կարող ենք խոնարհ լինել մեր աղոթքներում

Մտածեք եղանակներ, որոնք կօգնեն ուսանողներին հասկանալ, թե մենք ինչպես կարող ենք խոնարհություն դրսևորել մեր աղոթքներում: Ուսանողները կարող են գրել իրենց գաղափարները գրատախտակին: Նրանք կարող են նաև ուսումնասիրել և քննարկել հետևյալ գաղափարներից մի քանիսը: Ուսանողներին հնարավորություն տվեք կիսվելու, թե ինչ է Հոգին ուսուցանում իրենց:

Ստորև բերված է մի քանի եղանակ, որոնցով մենք կարող ենք խոնարհություն դրսևորել, երբ աղոթում ենք.

• Մենք կարող ենք երախտագիտություն հայտնել (տես Փրկչի օրինակը 3 Նեփի 19․19–20, 27–28 հատվածներում)։

• Մենք կարող ենք ընդունել մեր թուլությունը և Երկնային Հոր զորությունը (տես Հարեդի եղբոր օրինակը Եթեր 3.1–6):

• Մենք կարող ենք ուղղում փնտրել (դիտեք «Ինչպես եմ ես հետևում #ԼսիրՆրան կոչին. Երեց Դեյլ Գ. Ռենլանդ» [2:51] տեսանյութը, որը հասանելի է ChurchofJesusChrist.org կայքում, տես նաև Եբրայեցիս 12․5–9)։

Կարող եք նաև առաջարկել ուսանողներին խորհել այն դեպքերի մասին, երբ Երկնային Հայրը պատասխանել է իրենց աղոթքներին՝ անհրաժեշտ առաջնորդությունն և ուղղորդումը տալու համար։ Մի քանի պատրաստակամ ուսանողներ կարող են կիսվել իրենց փորձառություններով։

Հետևյալը նախատեսված է ուսանողներին հնարավորություն տալու ծրագիր կազմել՝ Երկնային Հոր առաջնորդությունը խոնարհաբար փնտրելու համար։

Լսեք Սուրբ Հոգու հուշումները՝ ձեր ուսումնասիրության օրագրում հետևյալ հարցերին պատասխանելիս։

• Ի՞նչ առաջնորդություն կամ ուղղորդում եք փնտրում Երկնային Հորից:

• Ի՞նչ կարող եք անել՝ Նրա առաջնորդությունը խոնարհաբար փնտրելու համար:

Առաջարկեք ուսանողներին գործել ըստ իրենց ստացած տպավորությունների։ Կարող եք կիսվել Երկնային Հոր առաջնորդությունը ձեր կյանքում ստանալու անձնական փորձառությամբ:

Լրացուցիչ նյութեր

Որտե՞ղ կարող եմ ավելին իմանալ Վարդապետություն և Ուխտեր 112 բաժնի պատմական համատեքստի մասին։

Հետևյալ աղբյուրները լրացուցիչ պատմական համատեքստ են տալիս բաժին 112-ի համար։

• «Յուրաքանչյուր ծուղակ», Սրբեր. Հիսուս Քրիստոսի Եկեղեցու պատմությունը վերջին օրերում, հատոր 1, Ճշմարտության դրոշը, 1815–1846 (2018), 260–73

• «Ճշմարտությունը կհաղթի», Սրբեր, 1․274–83

• Քեյ Դարովսկի «Թոմաս Բ. Մարշի հավատքն ու անկումը», Հայտնություններ համատեքստում (2016), 54

• Եկեղեցու պատմության թեմաներ «Կիրթլենդի անվտանգության միություն», ChurchofJesusChrist.org/study/history/topics

Ի՞նչ է խոնարհությունը։

Լինել խոնարհ նշանակում է երախտագիտությամբ ընդունել ձեր կախվածությունը Տիրոջից, հասկանալ, որ դուք անընդհատ Նրա օգնության կարիքն ունեք: Խոնարհությունը գիտակցումն է այն բանի, որ մեր տաղանդներն ու ունակությունները պարգևներ են Աստծուց։ Դա թուլության, ամաչկոտության կամ վախի նշան չէ, այլ մի դրսևորում, երբ գիտեք, թե որտեղ է գտնվում ձեր իսկական ուժը։ (Թեմաներ և հարցեր, «Խոնարհություն», topics.ChurchofJesusChrist.org)

Ինչո՞ւ է Փրկիչը խոնարհության օրինակ հանդիսանում:

Նախկինում Առաջին նախագահության անդամ Դիտեր Ֆ․ Ուխդորֆն ուսուցանել է.

Բոլոր բաներում Հիսուս Քրիստոսը մեր կատարյալ օրինակն է: Ի տարբերություն Լյուցիֆերի, որը փորձեց փոխել Հոր փրկության ծրագիրը և պատիվն իրեն վերցնել, Փրկիչն ասաց. «Հայր, քո կամքը կատարվի և փառքը քոնը լինի հավիտյան» [Մովսես 4․1–2]. Չնայած Իր զարմանահրաշ կարողություններին և ձեռքբերումներին՝ Փրկիչը միշտ հեզ ու խոնարհ էր: (Դիտեր Ֆ. Ուխդորֆ, «Հպարտությունը և քահանայությունը», Լիահոնա, նոյեմբեր 2010, 57)

Տասներկու Առաքյալների Քվորումից երեց Քվենթին Լ․ Քուքը բացատրել է․

Խոնարհության Փրկչի օրինակն ու ողջ մարդկության համար կատարած զոհաբերությունը պատմության ամենանշանակալից իրադարձությունն է։ Աստվածագլխի անդամ լինելով՝ Փրկիչը պատրաստակամ էր երկիր գալ որպես խոնարհ մանուկ և սկսել երկրային գոյությունը, որը ներառում էր իր եղբայրներին ու քույրերին ուսուցանելն ու բժշկելը և, ի վերջո, աննկարագրելի ցավից տառապելը Գեթսեմանիում ու խաչի վրա, որպեսզի կատարյալ դարձնի Իր Քավությունը։ Սիրո և խոնարհության այս քայլը Քրիստոսի կողմից Նրա բարեհաճության դրսևորումն է։ Նա արեց այդ հանուն յուրաքանչյուր տղամարդու և կնոջ, ում Աստված ստեղծել է կամ ստեղծելու է։ (Քվենթին Լ. Քուք, «Հավերժական ամենօրը», Լիահոնա, նոյեմբեր 2017, 52)

Օժանդակ ուսումնական վարժություններ

«Եթե նրանք չկարծրացնեին իրենց սրտերը»

Որպեսզի օգնեք ուսանողներին հասկանալ, թե ինչ էր կատարվում Օհայո նահանգի Կիրթլենդ քաղաքում 1836 և 1837 թվականներին, կարող եք ցուցադրել «Եթե նրանք չկարծրացնեին իրենց սրտերը» տեսանյութը՝ 0:00-6:12։

Տեսանյութը դիտելուց հետո ուսանողները կարող են կարդալ Վարդապետություն և Ուխտեր 112․2–3, 10, 12–15, 20–22, 28, 33–34 հատվածները՝ փնտրելով ուսմունքներ, որոնք կարող են օգնել Սրբերին խուսափել հպարտությունից և առաջնորդություն ստանալ Տիրոջից: Այնուհետև ուսանողները կարող են կիսվել, թե այս սկզբունքներն ինչպես կարող են օգնել իրենց այսօր խուսափել հպարտությունից:

Այնուհետև դուք կարող եք ցուցադրել տեսանյութի մնացած մասը՝ 6:12-11:21՝ տեսնելու, թե ինչ դժվարություններ ուներ Թոմաս Բ. Մարշը Տիրոջ խորհրդին հետևելու հարցում: Այն նաև ցուցադրում է նրա հաշտեցումը Եկեղեցու հետ՝ տարիներ անց։

Հիմներ

Կարող եք երգել կամ լսել որևէ օրհներգ, որը կարող է օգնել ուսանողներին իմանալ այն օրհնությունները, որոնք գալիս են Տիրոջ առաջնորդությունը խոնարհաբար փնտրելուց: Օրինակ՝ «Եղիր խոնարհ» (Հիմներ, հմր. 130), «Խոնարհ սրտով» (հմր. 171) և «Խոնարհությամբ, մեր Փրկիչ» (հմր. 172)։ Այնուհետև ուսանողները կարող են կիսվել իրենց սիրելի օրհներգի բառերով:

Վարդապետություն և Ուխտեր 112․10 «Քո Աստվածը ձեռքդ բռնած կառաջնորդի քեզ»

Որպեսզի օգնեք ուսանողներին հասկանալ Երկնային Հոր պատկերը, որը մեր ձեռքը բռնած առաջնորդում է մեզ՝ պատասխանելով մեր աղոթքներին, ցուցադրեք երեխայի նկար, որը բռնել է իր ծնողի ձեռքը: Քննարկեք, թե ինչու երեխան կարող է բռնել ծնողի ձեռքը (հարմարավետության, անվտանգության, կայունության, առաջնորդության համար և այլն): Օգնեք ուսանողներին տեսնել, որ ճիշտ այնպես, ինչպես երեխան է ապավինում ծնողի ձեռքին, մենք էլ կարող ենք ապավինել Երկնային Հորը՝ աղոթքի միջոցով: Կարող եք քննարկել, թե Երկնային Հայրը ինչպես կարող է օրհնություններ տալ մեզ, որոնք նման են նրան, ինչ երեխան ստանում է՝ բռնելով իր ծնողի ձեռքը։

Աղոթքի սկզբունքներ

Որպեսզի օգնեք ուսանողներին հասկանալ, թե ինչ կարող է լինել, երբ իրենք խոնարհաբար աղոթում են, կարող եք կարդալ Երիտասարդ տղամարդկանց գերագույն նախագահ Սթիվեն Ջ․ Լանդի հետևյալ խոսքերը․

Ամեն անգամ, երբ աղոթքում ենք, մենք խնդրում ենք Երկնային Հորը միջամտել մեր կյանքին: Յուրաքանչյուր աղոթք ասվում է հրաշքների համար: Նույնիսկ երախտագիտության աղոթքների նպատակն է խորացնել մեր հարաբերությունները աստվածայինի հետ: (Սթիվեն Ջ. Լանդ «Սեմինարիա, ինստիտուտ և այլ գործեր» [Սեմինարիայի և ինստիտուտների տարեկան ուսուցման հեռարձակման ժամանակ արված ուղերձ, հունվար 27, 2023])

Աղոթքի հետևյալ սկզբունքների վերանայումը կարող է օգնել ուսանողներին հասկանալ, թե ինչպես կարող են ավելի մեծ խոնարհությամբ աղոթել.

Իմաստալից դարձնենք մեր աղոթքները

Օգտագործենք այնպիսի բառեր, որոնք արտահայտում են սեր, հարգանք, ակնածանք և մտերմություն:

Միշտ շնորհակալություն հայտնենք Երկնային Հորը:

Փնտրենք Երկնային Հոր առաջնորդությունն ու զորությունը այն ամենում, ինչ անում ենք:

Հիշենք ուրիշների կարիքների մասին, երբ աղոթում ենք:

Փնտրենք Սուրբ Հոգու առաջնորդությունը, որպեսզի իմանանք՝ ինչ ներառել մեր աղոթքներում:

Երբ որևէ բան ենք խնդրում աղոթքի միջոցով, մենք պետք է ամեն ինչ անենք, որպեսզի օգնենք, որ այն կատարվի։ (հարմարեցված է Թեմաներ և հարցեր բաժնի «Աղոթքներ» թեմայից topics.ChurchofJesusChrist.org)

Կարող եք սկզբունքները բաժանել ուսանողների խմբերի միջև: Այնուհետև նրանք կարող են բերել մի քանի օրինակ, թե ինչպես կարող են կիրառել այս սկզբունքները իրենց աղոթքներում:

Առաջին միսիոներներն Անգլիայում

Վարդապետություն և Ուխտեր 112 բաժինը հայտնվել է այն նույն օրը, երբ երեցներ Հեբեր Քիմբալը, Օրսոն Հայդը և Ջոն Գուդսոնը սկսեցին քարոզել Հիսուս Քրիստոսի ավետարանը Անգլիայում: Կարող եք ցուցադրել «Հավերժական ամեն օրը» տեսանյութը 5:51-6:39, որպեսզի օգնեք ուսանողներին ավելին իմանալ այն խոնարհության մասին, որն անհրաժեշտ էր այս միսիոներներին՝ Հյուսիսային Ամերիկայից դուրս առաջին անգամ ավետարանը քարոզելու համար:

Այնուհետև կարող եք ցուցադրել Ռիբլ գետի նկարը և կիսվել ուսանողների հետ հետևյալ տեղեկություններով. Մեկ շաբաթ անց այն բանից հետո, երբ միսիոներները սկսեցին քարոզել, առաջին նորադարձները մկրտվեցին Ռիբլ գետում։ Այդ նորադարձներից երկուսն այնքան ոգևորված էին մկրտվելու համար, որ մրցավազքով սլացան դեպի գետը: Ջորջ Դ. Ուոթը հաղթեց մրցավազքում և դարձավ Անգլիայում մկրտված առաջին նորադարձը: (Տես Սրբեր 1․281–82, Պատմությունն աշխարհի երկրներում, Անգլիա, «Ջորջ Դ. Ուոթը և Journal of Discourses», history.ChurchofJesusChrist.org։)