1 Ճշմարիտ, այսպես է Տերն ասում քեզ, իմ ծառա՛ Թոմաս. Ես լսել եմ քո աղոթքները. և քո ողորմությունները բարձրացել են իմ առաջ՝ հիշատակի համար, ի նպաստ քո այն եղբայրների, ովքեր ընտրվել են վկայելու իմ անվան համար, և ուղարկելու այն ամենուրեք՝ բոլոր ազգերի, ցեղերի, լեզուների և ժողովուրդների մեջ, և կարգվել են իմ ծառաների միջոցով:

2 Ճշմարիտ ասում եմ քեզ. Մի քանի բաներ են եղել քո սրտում և քեզ մոտ, որոնք ես՝ Տերս, չեմ հավանել:

3 Այնուամենայնիվ, որքան որ դու խոնարհեցրել ես քեզ, դու պիտի բարձրացվես. հետևաբար, քո բոլոր մեղքերը ներված են քեզ:

4 Թող սիրտդ քաջանա իմ երեսի առաջ. և դու պետք է վկայես իմ անվան մասին, ոչ միայն հեթանոսներին, այլ նաև հրեաներին. և դու պետք է առաջ ուղարկես իմ խոսքը մինչև աշխարհի ծայրերը:

5 Ուստի, պայքարիր առավոտից-առավոտ. և թող քո զգուշացնող ձայնն առաջ գնա օրեցօր. և երբ գիշերը գալիս է, մի թող որ երկրի բնակիչները քուն մտնեն քո խոսքի պատճառով:

6 Թող քո բնակության վայրն իմանան Սիոնում, և մի տեղափոխիր քո տունը. քանզի, ես՝ Տերս, մեծ աշխատանք ունեմ քեզ համար, որ անես, իմ անունը մարդկանց զավակների մեջ հրատարակելու գործում:

7 Հետևաբար, գոտեպնդիր մեջքդ աշխատանքի համար: Թող նաև կոշիկներդ ոտքերիդ մնան, քանզի դու ընտրված ես, և քո ճանապարհն ընկած է լեռների միջով և շատ ազգերի միջով:

8 Եվ քո խոսքի միջոցով շատ բարձրացածներ պիտի ցածրացվեն, և քո խոսքի միջոցով շատ ցածրացածներ պիտի բարձրացվեն:

9 Քո ձայնը պիտի կշտամբանք լինի օրինազանցի համար. և քո կշտամբանքից թող զրպարտչի լեզուն դադարի խոտորախոսել:

10 Եղիր խոնարհ. և Տերը՝ քո Աստվածը, ձեռքդ բռնած կառաջնորդի քեզ և կպատասխանի քո աղոթքներին:

11 Ես գիտեմ քո սիրտը և լսել եմ աղոթքներդ քո եղբայրների վերաբերյալ: Կողմնակալ մի եղիր, սիրելով նրանց առավել, քան շատ ուրիշների, այլ քո սերը նրանց հանդեպ թող լինի, ինչպես քո հանդեպ է. և թող քո սերն առատ լինի բոլոր մարդկանց հանդեպ, և բոլոր նրանց հանդեպ, ովքեր սիրում են իմ անունը:

12 Եվ աղոթիր Տասներկուսի քո եղբայրների համար: Խստորեն խրատիր նրանց՝ հանուն իմ անվան, և թող նրանք խրատվեն իրենց բոլոր մեղքերի համար, և հավատարիմ եղիր իմ առաջ՝ իմ անվան համար:

13 Եվ նրանց գայթակղություններից և շատ նեղությունից հետո, ահա, ես՝ Տերս, կփնտրեմ նրանց, և եթե նրանք կարծրացրած չլինեն իրենց սրտերը և խստացրած չլինեն իրենց պարանոցներն իմ դեմ, նրանք դարձի կգան, և ես կբժշկեմ նրանց:

14 Արդ, ես ասում եմ քեզ, և այն ինչ քեզ եմ ասում, ասում եմ բոլոր Տասներկուսին. Վեր կացեք ու գոտեպնդեք ձեր մեջքը, վերցրեք ձեր խաչը, հետևեք ինձ, և արածեցրեք իմ ոչխարները:

15 Մի բարձրացրեք ձեզ. մի ապստամբեք իմ ծառա Ջոզեֆի դեմ. քանզի ճշմարիտ ասում եմ ձեզ, որ ես նրա հետ եմ, և իմ ձեռքը պիտի լինի նրա վրա. և բանալիները, որոնք ես տվել եմ նրան, և նաև ձեզ, նրանից չեն վերցվի, մինչև ես չգամ:

16 Ճշմարիտ ասում եմ քեզ, իմ ծառա՛ Թոմաս. Դու ես այն մարդը, ում ես ընտրել եմ՝ կրելու իմ արքայության բանալիները, ինչ վերաբերում է Տասներկուսին, ամենուրեք՝ բոլոր ազգերի մեջ,–

17 Որպեսզի դու լինես իմ ծառան՝ բացելու արքայության դռները բոլոր այն վայրերում, ուր իմ ծառա Ջոզեֆը և իմ ծառա Սիդնին և իմ ծառա Հայրումը չեն կարող գալ.

18 Քանզի միառժամանակ ես նրանց վրա եմ դրել բոլոր եկեղեցիների բեռը:

19 Ուստի, որտեղ էլ նրանք ուղարկեն քեզ, դու գնա, և ես քեզ հետ կլինեմ. և որտեղ էլ դու հռչակես իմ անունը, արդյունավետ դուռ պիտի բացվի քո առաջ, որպեսզի նրանք կարողանան ընդունել իմ խոսքը:

20 Ով ընդունում է իմ խոսքը, ընդունում է ինձ, և ով ընդունում է ինձ, ընդունում է նրանց՝ Առաջին Նախագահությանը, որոնց ես ուղարկել եմ, որոնց ես խորհրդատուներ եմ դարձրել ձեզ համար՝ հանուն իմ անվան:

21 Եվ բացի այդ, ես ասում եմ ձեզ, որ ում որ դուք ուղարկեք իմ անունով, ձեր եղբայրների՝ Տասներկուսի ձայնով, ձեր կողմից պատշաճ կերպով երաշխավորված և լիազորված, նրանք զորություն կունենան՝ բացելու իմ արքայության դուռը, որ ազգի համար էլ որ դուք նրանց ուղարկած լինեք,–

22 Որքան որ նրանք կխոնարհեցնեն իրենց իմ առաջ, և կմնան իմ խոսքի մեջ, և ականջ կդնեն իմ Հոգու ձայնին:

23 Ճշմարիտ, ճշմարիտ ասում եմ ձեզ. Խավարը պատել է երկիրը, և թանձր խավարը՝ մարդկանց միտքը, և ամեն մարմին ապականվել է իմ երեսի առաջ:

24 Ահա, սրընթաց վրեժխնդրություն է գալիս երկրի բնակիչների վրա՝ ցասման օր, այրման օր, ամայացման, լացի, սգո և ողբի օր. և, ինչպես մի պտուտահողմ, այն պիտի անցնի ողջ երկրի երեսով, ասում է Տերը:

25 Եվ իմ տան վրա պիտի սկսի այն, և իմ տնից առաջ կգնա այն, ասում է Տերը.

26 Առաջինը՝ ձեզանից նրանց մեջ, ասում է Տերը, ովքեր խոստովանում են, թե գիտեն իմ անունը, բայց չեն ճանաչել ինձ և հայհոյել են ինձ իմ տան մեջ, ասում է Տերը:

27 Հետևաբար, տեսեք, որ դուք չմտահոգվեք՝ այս վայրում իմ եկեղեցու գործերի վերաբերյալ, ասում է Տերը:

28 Այլ մաքրեք ձեր սրտերն իմ առաջ. և ապա գնացեք աշխարհով մեկ և քարոզեք իմ ավետարանն ամեն արարածի, որը չի ստացել այն.

29 Եվ նա, ով հավատում և մկրտվում է, պիտի փրկվի, իսկ նա, ով չի հավատում, և չի մկրտվում, պիտի նզովվի:

30 Քանզի ձեզ՝ Տասներկուսիդ, և նրանց՝ Առաջին Նախագահությանը, ովքեր ձեզ հետ նշանակվել են՝ լինելու ձեր խորհրդատուներն ու ձեր ղեկավարները, տրված է այս քահանայության զորությունը, վերջին օրերին ու վերջին անգամ, որը ժամանակների լրության տնտեսությունն է:

31 Զորություն, որը դուք կրում եք, բոլոր նրանց հետ միասին, ովքեր ստեղծման սկզբից ինչ-որ ժամանակ տնտեսություն են ստացել.

32 Քանզի ճշմարիտ ասում եմ ձեզ, որ տնտեսության բանալիները, որոնք դուք ստացել եք, եկել են հայրերից, և ի վերջո, ուղարկվել են ձեզ երկնքից:

33 Ճշմարիտ ասում եմ ձեզ. Տեսեք, թե որքան մեծ է ձեր կոչումը: Մաքրեք ձեր սրտերն ու ձեր հանդերձները, որ չլինի թե այս սերնդի արյունը պահանջվի ձեր ձեռքից:

34 Հավատարիմ եղեք, մինչև ես գամ, քանզի ես շուտով գալիս եմ. և իմ վարձքն ինձ հետ է, որ ամեն մարդու հատուցեմ իր գործերի համեմատ: Ես եմ Ալֆան և Օմեգան: Ամեն: