Դաս 125. Վարդապետություն և Ուխտեր 111–114

Վարդապետություն և Ուխտեր 111

«Ես կպատվիրեմ բոլոր բաները ձեր բարիքի համար»

1836թ-ին Եկեղեցին մեծ պարտքերի մեջ էր։ Մարգարե Ջոզեֆ Սմիթը և Եկեղեցու այլ ղեկավարներ ճամփորդեցին Սալեմ (Մասաչուսետս), որտեղ նրանք հույս ունեին գումար ձեռք բերել՝ Եկեղեցու պարտքերը մարելու համար։ 1836 թ․ օգոստոսի 6-ին Ջոզեֆ Սմիթը հայտնություն ստացավ, որը գրանցված է Վարդապետություն և Ուխտեր 111 բաժնում։ Այս հայտնության մեջ Տերը հավաստիացումներ տվեց նրան՝ Եկեղեցու պարտքի մարման և Սիոնի բարօրության վերաբերյալ: Այս դասը կօգնի ուսանողներին ավելի մեծ վստահություն զգալ Երկնային Հոր և Հիսուս Քրիստոսի հանդեպ:

Հնարավոր ուսումնական վարժություններ

Ինչպե՞ս կկարգավորվեն խնդիրները

Դասը սկսեք՝ առաջարկելով ուսանողներին մտածել այն խնդիրների մասին, որոնց սովորաբար բախվում են դեռահասները, և որոնք կարող են պատճառ դառնալ, որ դեռահասները հուսահատություն կամ վախ զգան, մտածեն, որ խնդիրները բարեհաջող չեն կարգավորվի: Այնուհետև կարող եք գրատախտակին նկարել հետևյալ սանդղակը և առաջարկել ուսանողներին օգտագործել այն՝ ստորև ներկայացված հարցին պատասխանելու համար:

• Ձեր կարծիքով, դեռահասների մեծ մասը որքանո՞վ է վստահ, որ իրադարձությունները հաջող ընթացք կունենան։

Խորհեք, թե ինչպես կգնահատեք ինքներդ ձեզ այս սանդղակով՝ կապված այն խնդիրների կամ դժվարությունների հետ, որոնց դուք այժմ բախվում եք կամ կարող եք բախվել ապագայում:

Դժվար ժամանակներ Ջոզեֆի և մյուսների համար

Կարող եք առաջարկել որևէ ուսանողի կարդալ հետևյալ համատեքստային նախապատմությունը, կամ կարող եք այն ամփոփ ներկայացնել ձեր խոսքերով: Որպես այլընտրանք, կարող եք ուսանողներին առաջարկել կարդալ գլուխ 22-ը՝ Սրբեր. Հիսուս Քրիստոսի Եկեղեցու պատմությունը վերջին օրերում, հատոր 1, Ճշմարտության դրոշը, 1815–1846 ([2018], 258–59) գրքում կամ նվագարկել այդ գլխի աուդիո ձայնագրությունը (հասանելի է saints.ChurchofJesusChrist.org կայքում)՝ 16:14-17:00։ Կարող եք նշել, որ ինչպես մենք ենք մեր կյանքում բախվում խնդիրների, որոնք կարող են հուսահատեցնող լինել, այդպես էլ Ջոզեֆ Սմիթը և Եկեղեցու մյուս ղեկավարները 1836 թվականին բախվեցին խնդիրների, որոնց հետևանքով նրանք մեծ մտաhոգություններ ունեցան Սիոնի ապագայի վերաբերյալ:

1836 թվականին Եկեղեցին մեծ պարտքերի մեջ էր՝ Կիրթլենդի տաճարի կառուցման և Օհայոյում ու Միսսուրիում հողեր գնելու ծախսերի պատճառով: Միևնույն ժամանակ, Միսսուրի նահանգի Քլեյ գավառի Սրբերը ստիպված էին տեղափոխվել: 1836թ. հուլիսի վերջին, երբ այս մտահոգությունները ավելի ծանրացան, Ջոզեֆ և Հայրում Սմիթները, Օլիվեր Քաուդերին և Սիդնի Ռիգդոնը ճամփորդեցին Կիրթլենդից (Օհայո) դեպի Սալեմ (Մասաչուսեթս)՝ անցնելով ավելի քան 600 մղոն (965 կիլոմետր)։ Թեև նրանց ճամփորդության պատճառը հստակ հայտնի չէ, նրանք կարող էին գործել որոշակի տեղեկությունների հիման վրա, որոնք, իրենց կարծիքով, կարող էին օգնել թեթևացնել Եկեղեցու պարտքը: Պատմություններից մեկում ասվում է, որ Եկեղեցու անդամներից մեկը Ջոզեֆ Սմիթին ասել էր, թե Սալեմում գտնվող մի տան մեջ մեծ քանակությամբ դրամ կա թաքցված: (Տես «Հայտնություն, 6 օգոստոսի 1836 [Վ&Ու 111]» բաժնի պատմական ներածությունը, 35, josephsmithpapers.org:)

• Ձեր կարծիքով, որքանո՞վ էր վստահ Ջոզեֆ Սմիթը, որ Եկեղեցու առջև ծառացած խնդիրները բարեհաջող կկարգավորվեն:

Երբ ուսանողներն ուսումնասիրեն Վարդապետություն և Ուխտեր 111 բաժինը, առաջարկեք նրանց հայտնություն փնտրել, թե Տերն ինչպես կարող է օգնել մեզ մեծացնել մեր վստահությունն առ այն, որ մեր խնդիրներն ու դժվարությունները կկարգավորվեն մեր բարիքի համար։

«Չնայած ձեր անմտությանը»

Կարող եք գրատախտակին գրել հետևյալ հատվածների խմբերը։ Դրանք ուսումնասիրելու եղանակներից մեկն է՝ կարդալ հատվածների առաջին խումբը, այնուհետև առաջարկել ուսանողներին թղթի վրա գրել երկու հարցի իրենց պատասխանները և փոխանցել այն դասընկերոջը: Քննարկեք ուսանողների գրածը։ Կրկնեք այս վարժությունը հատվածների մյուս երկու խմբի համար: Այն կօգնի ուսանողներին կիսվել իրենց սովորածով և ուսուցանվել իրենց դասընկերների կողմից:

Անհրաժեշտության դեպքում բացատրեք, որ անխոհեմությունը դատողության սխալն է կամ սխալ դատողությունը:

Կենտրոնացեք Երկնային Հոր և Հիսուս Քրիստոսի վրա․ սրա վերաբերյալ լրացուցիչ ուսուցում ստանալու համար տես «Ուսուցանեք Հիսուս Քրիստոսի տիտղոսների, դերերի և հատկանիշների մասին» դասընթացը՝ Ուսուցիչիի կատարելագործման հմտություններ․ Կենտրոնացեք Հիսուս Քրիստոսի վրա ուսուցողական նյութում։ Կարող եք գործնականում կիրառել հետևյալ հմտությունը․ «Ուսումնասիրության մղող հարցերի ստեղծում, որոնք կօգնեն ուսանողներին բացահայտել Հիսուս Քրիստոսի դերերը, տիտղոսները, խորհրդանիշները, հատկանիշները և բնութագրերը»: Դասընթացը վերանայելուց հետո կարող եք հարմարեցնել կամ լրացնել այն հարցերը, որոնք տալիս եք ուսանողներին սուրբ գրությունների հետևյալ հատվածների վերաբերյալ:

Կարդացեք հատվածների հետևյալ խմբերը և յուրաքանչյուր խմբի համար պատասխանեք ստորև տրված երկու հարցին.

• Վարդապետություն և Ուխտեր 111․1–4

• Վարդապետություն և Ուխտեր 111․5–8

• Վարդապետություն և Ուխտեր 111․9–11

• Ի՞նչ հարցեր ունեք այս հատվածների վերաբերյալ:

• Ի՞նչ ճշմարտություններ եք սովորում Աստծո մասին այս հատվածներից։

Երկրորդ հարցին տրված իրենց պատասխաններում ուսանողները կարող են նշել մի քանի ճշմարտություններ կամ Աստծո հատկանիշներ: Դրանք կարող են ներառել նմանատիպ ճշմարտություններ. Աստված ողորմած է մեր անմտության հանդեպ (տես հատված 1), Աստված հաղորդակցվում է մեզ հետ Իր Հոգու խաղաղության և զորության միջոցով (տես հատված 8), Աստված կարող է պատվիրել բոլոր բաները մեր բարիքի համար (տես հատված 11):

• Ինչպե՞ս կարող էին ձեր նշած ճշմարտությունները օգնել Ջոզեֆ Սմիթին՝ իր ունեցած դժվարություններն ու մտահոգությունները լուծելու համար:

• Դրանք ինչպե՞ս կարող են օգնել ձեզ:

Աստված կարող է պատվիրել բոլոր բաները [մեր] բարիքի համար

Հետևեք Հոգու հուշումներին, թե որ ճշմարտություններն օգտակար կլինեն ուսանողներին՝ ավելի խոր ուսումնասիրության համար: Այս դասի մնացած մասը կկենտրոնանա այն ճշմարտության վրա, որ Աստված կարող է պատվիրել բոլոր բաները մեր բարիքի համար։ Կարող եք գրատախտակին գրել այս ճշմարտությունը և առաջարկել ուսանողներին նշել հատված 11-ի այն բառերը, որոնք ուսուցանում են այն:

Անհրաժեշտության դեպքում օգնեք ուսանողներին հասկանալ, որ այս հատվածում պատվիրել բառը նշանակում է «լուծել»: Կարող եք անդրադառնալ գրատախտակին գրված սանդղակին և առաջարկել ուսանողներին խորհել, թե որքանո՞վ են իրենք վստահ, որ Աստված կարող է պատվիրել «բոլոր բաները» իրենց բարիքի համար:

Ուսանողների հետ քննարկեք, որ եթե նրանք ցանկանում են ավելի վստահորեն հավատալ այս ճշմարտությանը, կարող են աղոթել օգնության համար՝ խորացնելու իրենց հասկացողությունն ու հավատքը Աստծո այս հատկանիշի նկատմամբ:

• Համաձայն հատված 11-ի, ի՞նչ է պահանջվում մեզանից, որպեսզի Աստված բոլոր բաները պատվիրի մեր բարիքի համար:

Անհրաժեշտության դեպքում բացատրեք, որ «օձերի պես իմաստուն, սակայն առանց մեղքի» (հատված 11) լինել նշանակում է այն, որ Փրկչի աշակերտները պետք է համատեղեն իմաստությունը անմեղության ու մաքրության հետ:

Հետևյալ վարժության համար կարող եք ուսանողներին բաժանել երեք հոգանոց խմբերի: Խմբի յուրաքանչյուր ուսանողի խնդրեք կարդալ ստորև բերված հատվածներից մեկը: Երբ ուսանողները կարդան և քննարկեն հատվածները, կարող եք առաջարկել նրանց գալ գրատախտակի մոտ և գրել իրենց գտածը։ Նրանք կարող են գրել այն գրատախտակին գրված ճշմարտության շուրջը՝ դեպի ճշմարտությունը ուղղված սլաքով:

Ուսումնասիրեք հետևյալ հատվածները՝ փնտրելով, թե մենք ինչ պետք է անենք, որպեսզի Աստված պատվիրի բոլոր բաները մեր բարիքի համար: Կարող եք կապել հետևյալ հատվածները Վարդապետություն և Ուխտեր 111․11 հատվածի հետ։

• Հռովմայեցիս 8․28

• Վարդապետություն և Ուխտեր 90․24

• Վարդապետություն և Ուխտեր 100․15

Առաջարկեք ուսանողներին կարդալ Նախագահ Գորդոն Բ. Հինքլիի հետևյալ խոսքերը, այնուհետև գրատախտակին ավելացնել իրենց սովորածը։

Նախագահ Գորդոն Բ. Հինքլին (1910–2008) վկայել է.

Այդ ամենը կկարգավորվի: Մի անհանգստացիր։ Ես ասում եմ ինքս ինձ ամեն առավոտ: Ամեն ինչ կկարգավորվի: Եթե դու անես ամեն հնարավորը, ամեն ինչ կկարգավորվի: Ապավինեք Աստծուն և առաջ շարժվեք՝ ապագայի հանդեպ հավատքով և վստահությամբ: Տերը մեզ չի լքի։ Նա չի լքի մեզ: («Վերջին օրերի խորհուրդ․Հատվածներ Նախագահ Գորդոն Բ. Հինքլիի ելույթներից», Ensign, հոկտեմբեր 2000, 73)

Առաջարկեք ուսանողներին ուսուցանել միմյանց այն մասին, ինչ գրել են գրատախտակին: Նրանք կարող են բացատրել, թե ինչու է դա իրենց համար կարևոր։ Հետևյալ հարցերից մի քանիսը կարող են խթանել քննարկումը.

• Ի՞նչ գտաք, որը կարող է ամրացնել ձեր վստահությունն առ այն, որ Աստված կարող է բոլոր բաները պատվիրել ձեր բարիքի համար։

• Հավերժության հեռանկար ունենալը ինչպե՞ս է օգնում ձեզ վստահ լինել, որ Աստված կարող է պատվիրել բոլոր բաները ձեր բարիքի համար:

• Ե՞րբ կամ ինչպե՞ս է Աստված ի բարին կարգավորել խնդիրները ձեր կյանքում կամ ձեր ծանոթի կյանքում։

Ստորև բերված վարժությունը ուսանողներին ժամանակ է տալիս մտածելու, թե ինչպես կարող է այն, ինչ իրենք սովորեցին և զգացին այսօր, ազդել իրենց կյանքի և Երկնային Հոր հետ հարաբերությունների վրա: Երբ ուսանողներն ավարտեն իրենց օրագրերում գրելը, կարող եք մի քանի ուսանողի առաջարկել կիսվել դասարանի հետ:

Ձեր օրագրում ավարտեք հետևյալ նախադասություններից մեկը կամ մի քանիսը.

• Իմ վստահությունն առ այն, որ Աստված կարող է բոլոր բաները պատվիրել իմ բարիքի համար, ամրացավ այսօր, քանի որ …
  Այն, ինչ ես այսօր սովորեցի, կարող է օգնել ինձ լուծել մի խնդիր, որին ես բախվել եմ, քանի որ …
  Երբ դժվարության բախվեմ ապագայում, ուզում եմ հիշել …

Լրացուցիչ նյութեր

Վարդապետություն և Ուխտեր 111․1։ Ո՞րն էր նրանց անմտությունը։

Ամտությունը դատողության սխալն է կամ սխալ դատողությունը: Ջոզեֆ Սմիթի և նրա ուղեկիցների «անմտությունը» գուցե փող փնտրելն էր և Եկեղեցու ֆինանսական դժվարությունները լուծելու համար սեփական ջանքերին ապավինելը: Այնուամենայնիվ, Վարդապետություն և Ուխտեր 111 բաժնում նկարագրված հայտնության մնացած հատվածում Տերը ողորմածաբար խոստացավ նրանց շարունակական օգնություն և ուղղորդում։

Եկեղեցու այս ղեկավարների սխալներին Տիրոջ՝ ըմբռնումով մոտենալն օգնում է հստակեցնել սխալներ գործելու և մեղք գործելու տարբերությունը: Առաջին Նախագահության Նախագահ Դալլին Հ. Օուքսը խոստովանել է, որ մենք բոլորս սխալներ ենք գործում և ուսուցանել է, որ մեր սխալները կարող են օգնել մեր առաջընթացին։

Սխալներն անխուսափելի են մահկանացու կյանքում աճ և առաջընթաց ունենալու ընթացքում։ Սխալներ գործելու բոլոր հնարավորություններից խուսափելը նշանակում է խուսափել աճի բոլոր հնարավորություններից: Տաղանդների մասին առակում Փրկիչը պատմեց մի ծառայի մասին, որն այնքան էր ցանկանում նվազագույնի հասցնել կորստի ռիսկը սխալ ներդրման դեպքում, որ պահեց իր տաղանդը և չօգտագործեց այն։ Այդ ծառան դատապարտվեց իր տիրոջ կողմից (տես Մատթեոս 25․24–30)։

Եթե մենք պատրաստ ենք ընդունել և ուղղել մեր սխալները, … անմեղ սխալները կարող են լինել աճի և առաջընթացի աղբյուր: (Դալլին Հ. Օուքս, «Մեղքեր և սխալներ», Ensign, հոկտ. 1996, 67)

Վարդապետություն և Ուխտեր 111․8։ Ինչպե՞ս կարող եմ ճանաչել Հոգու ազդեցությունն ու զորությունը:

Առաջին Նախագահությունից Նախագահ Հենրի Բ. Այրինգը տվել է հետևյալ գաղափարները, որոնք կարող են օգնել ուսանողներին ավելի լավ հասկանալ Հոգու ազդեցությունն ու զորությունը իրենց կյանքում.

Դուք զգում եք մի հանգիստ հաստատում ձեր սրտում և մտքում, որ որևէ բան ճշմարիտ է: Եվ դուք գիտեք, որ դա ոգեշնչում է Աստծուց։ Ձեզանից ոմանց համար այն կարող գալ այնպես, ինչպես միսիոներները սովորեցրել են ձեզ մկրտությունից առաջ: Այն կարող է գալ եկեղեցում զրույցի կամ դասի ժամանակ: Հնարավոր է՝ այն արդեն եկել է այս երեկո, երբ որևէ ճշմարիտ բան է ասվել կամ երգվել, ինչպես ես այն զգացի, ինչպես և ձեզանից ոմանք, երբ լսեցի երգեցողությունը։ Սուրբ Հոգին ճշմարտության հոգին է: Դուք խաղաղություն, հույս և ուրախություն եք զգում, երբ այն ձեր սրտին ու մտքին ասում է, որ որևէ բան ճշմարիտ է: Գրեթե միշտ ես ունեցել եմ նաև լույսի զգացողություն։ Ցանկացած խավարի զգացողություն, որ ես կարող էի ունենալ, ցրվում է: Եվ ճշմարիտն անելու ցանկությունը մեծանում է: (Հենրի Բ. Այրինգ, «Հոգու պարգևները դժվարին ժամանակներում» [Բրիգամ Յանգ համալսարանի հոգևոր հավաք, սեպտ. 10, 2006], 2, speeches.byu.edu)

Վարդապետություն և Ուխտեր 111․11: Ի՞նչ է նշանակում լինել «իմաստուն, ինչպես օձերը, սակայն առանց մեղքի»։

Երբ Փրկիչն ուղարկեց Իր աշակերտներին ավետարանը քարոզելու, Նա պատվիրեց նրանց լինել «իմաստուն, ինչպես օձերը և անվնաս՝ ինչպես աղավնիները» (Մատթեոս 10.16): Մեր ժամանակներում Փրկիչը նմանատիպ խորհուրդ տվեց Իր աշակերտներին՝ ասելով. «Եղեք օձերի պես իմաստուն, սակայն առանց մեղքի» (Վ&Ու 111․11)։ Այս երկու պատմություններն ուսուցանում են, որ Փրկչի աշակերտները պետք է համատեղեն իմաստությունը անմեղության ու մաքրության հետ: Ջոզեֆ Սմիթի Թարգմանությունն ընդգծում է Տիրոջ իմաստուն ծառան լինելու կարևորությունը. «Ուրեմն իմաստուն ծառաներ եղեք և աղավնիների պես անվնաս» (Ջոզեֆ Սմիթի Թարգմանություն, Մատթեոս 10.14, համեմատել Մատթեոս 10.16): (Նոր Կտակարան. Ուսանողի ձեռնարկ [2018], 36–37)

Վարդապետություն և Ուխտեր 111․11: Ուրիշ ի՞նչ կարող եմ անել, որպեսզի Աստված «բոլոր բաները պատվիրի [իմ] բարիքի համար»։

Նախագահ Դիտեր Ֆ․ Ուխդորֆը, որ այն ժամանակ Առաջին Նախագահության անդամ էր, ուսուցանել է.

Նրանք, ովքեր ուշադրություն են դարձնում հոգու կանչին և փնտրում են Աստծուն, ովքեր աղոթում են, հավատում ու քայլում Փրկիչի պատրաստած ուղիով, անգամ եթե ճանապարհին երբեմն սայթաքում են, սփոփիչ վստահություն են զգում, որ «բոլոր բաները միաժամանակ կգործեն [իրենց] բարիքի համար» (Վարդապետություն և Ուխտեր 90․24)։ (Դիտեր Ֆ. Ուխդորֆ, «Տան կարոտը», Լիահոնա, նոյեմբեր 2017, 22)

Տասներկու Առաքյալների Քվորումից երեց Ջերիթ Վ. Գոնգը ասել է.

Բոլոր բաները կարող են միաժամանակ գործել մեր բարիքի համար, երբ մենք «սրբագործվում ենք Քրիստոսում … Հոր ուխտի մեջ» [Մորոնի 10․33]։ Ամեն բարի և խոստացված օրհնություն գալիս է նրանց, ովքեր հավատարիմ են մնում մինչև վերջ։ «Աստծո պատվիրանները պահողները» պետք է լինեն «օրհնված բոլոր բաներում` թե նյութական, թե հոգևոր» և «բնակվեն Աստծո հետ … անվերջ երջանկության մեջ» [Մոսիա 2․41]։ (Ջերիթ Վ. Գոնգ «Պատկանելություն ուխտին», Լիահոնա, նոյեմբեր 2019, 81)

Օժանդակ ուսումնական վարժություններ

Աստված իսկապես կարող է պատվիրել «բոլոր բաները [մեր] բարիքի համար»։

Որպեսզի օգնեք ուսանողներին ավելի խոր զգալ այն ճշմարտությունը, որ Աստված կարող է պատվիրել բոլոր բաները իրենց բարիքի համար, կարող եք ցուցադրել «Կյանքն աներևակայելիորեն անարդար է՝ մեր օգտին» (13:33)։ Նախքան տեսանյութը ցուցադրելը՝ հարցրեք ուսանողներին՝ արդյոք նրանք կարծում են, որ Հիսուս Քրիստոսը իսկապես նկատի ուներ «բոլոր բաները» Վարդապետություն և Ուխտեր 111.11 հատվածում: Երբ ուսանողները դիտեն տեսանյութը, առաջարկեք նրանց փնտրել, թե այս տեսանյութի կինը ինչպես կպատասխաներ այդ հարցին:

Life is Incredibly Unfair - In Our Favor

Վարդապետություն և Ուխտեր 111․2։ «Շատ մարդիկ այս քաղաքում, որոնց ես կհավաքեմ»

Եթե ուսանողներին օգտակար կլինի լրացուցիչ պատմական համատեքստը, կարող եք պատմել երեց Էրաստուս Սնոուի պատմությունը և այն, թե ինչպես Վարդապետություն և Ուխտեր 111 բաժնում նկարագրված հայտնությունն օգնեց նրան իրականացնել իր միսիան։

1841 թվականին՝ բաժին 111-ը ստանալուց հինգ տարի անց, Էրաստուս Սնոուն կանչվեց, որպեսզի գնա Մասաչուսեթս նահանգի Սալեմ քաղաքը՝ կատարելու հայտնությունը․ հավաքել Սալեմի ժողովրդին Տիրոջ արքայությունում: Սկզբում մարդիկ չէին ընկալում ավետարանի ուղերձը: Երեց Սնոուն ապավինում էր Տիրոջ խոստմանը, որ Ինքը ունի «շատ մարդիկ այս քաղաքում» (Վարդապետություն և Ուխտեր 111․2) և շարունակում էր քարոզել Փրկչի վերականգնված Եկեղեցու մասին: Ժամանակի ընթացքում մարդիկ հավատացին վերականգնված ավետարանին և մկրտվեցին: 1843 թվականի փետրվարին Սալեմի ճյուղն ուներ 110 անդամ։ Սալեմից նորադարձները հետագայում ճամփորդեցին դեպի Նավու և Քարքարոտ լեռներ: (Տես Էլիզաբեթ Քուեն, «Ավելի շատ գանձեր, քան մեկը», Հայտնություններ համատեքստում [2016], 229։) Սալեմի այդ նորադարձների շատ ժառանգներ այսօր էլ Եկեղեցու անդամներ են (տես Քիմ Ռ. Բերնինգհեմ, «The ‘Insignificant’ Scripture» Ensign, օգոստոս 1990, 47–48):

Երեց Էրաստուս Սնոուի պատմությունը պատմելուց հետո կարող եք քննարկել նրա փորձառությունից քաղված դասերը: Հետևյալ հարցերը կարող են օգտակար լինել․

• Ձեր կարծիքով, Տիրոջ խոստումներն ինչպե՞ս կկատարվեն իրենց ժամանակին:

• Ձեր կարծիքով, համբերությունն ու ջանասիրությունը (տես Վարդապետություն և Ուխտեր 4․6) ինչո՞ւ են կարևոր հատկանիշներ, որոնք պետք է ունենալ Փրկչի ավետարանով կիսվելիս:

Վարդապետություն և Ուխտեր 111․11: Աստված կարող է պատվիրել բոլոր բաները [մեր] բարիքի համար

Եթե օգտակար կլինի, կարող եք առաջարկել ուսանողներին հիշել սուրբ գրություններից կամ Եկեղեցու պատմությունից այլ օրինակներ, երբ Աստված պատվիրել է կամ կազմակերպել է, որ որևէ բացասական բան գործի բարիքի համար: Որոշ օրինակներ են հետևյալ պատմությունները․ Ջոզեֆ Սմիթը և Մարտին Հարրիսը կորցնում են Մորմոնի Գրքի ձեռագրի 116 էջերը (Վարդապետություն և Ուխտեր 3.1, 7–10), Հակոբի որդի Հովսեփին վաճառում են Եգիպտոս (Ծննդոց 37, 39–45), Աբիսը հավաքում է Լամոնի թագավորի ժողովրդին (Ալմա 19․28–29) և Պետրոսն ու Հովհաննեսը բանտարկվում են (Գործք Առաքելոց 5․17–20):