“Lesona 128—Mataupu Faavae ma Feagaiga 115: ‘O le a faapea ona taua o lau Ekalesia,’” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 115,” Tusi Lesona a le Faiaoga Seminare o le Mataupu Faavae ma Feagaiga
Lesona 128: Mataupu Faavae ma Feagaiga 115–120
Mataupu Faavae ma Feagaiga 115
“O Le A Faapea Ona Ta’ua o La’u Ekalesia”
Ina ia sosola ese mai sauaga i le Itumalo o Siakisone, Misuri, e faitau afe le Au Paia na potopoto pe tusa ma le 50 maila (80 km) i matu ma faatuina se nofoaga fou e ta’ua o Far West. I se faaaliga na tuuina atu i le Perofeta o Iosefa Samita i le Far West, na faailoa atu ai e le Alii e faapea o Lana Ekalesia e tatau ona faaigoaina O Le Ekalesia a Iesu Keriso o le Au Paia o Aso e Gata Ai. O lenei lesona e mafai ona fesoasoani i tagata aoga ia lagonaina le taua o le faaaogaina o le igoa sa’o o le Ekalesia a le Faaola.
Gaoioiga E Ono Mafai Ona Aoao Ai
Valaauina i le igoa sese
Mafaufau e talanoa ma ni nai tagata aoga a o lei amataina le vasega. Fai atu ia i latou e valaau atu ia te oe i le igoa sese i luma o isi sui o le vasega ae e te lei amata aoaoina atu le lesona. E mafai ona avea lenei mea o se auala malie e fesoasoani ai i tagata aoga e mafaufau e uiga i le taua o le faaaogaina o igoa sa’o.
-
O a ni aafiaga na e oo i ai i le valaauina i le igoa sese? O a ni ou lagona i ia ituaiga aafiaga?
-
O a nisi o faataitaiga o igoa sese e faaaoga e tagata i nisi taimi pe a faasino i le Ekalesia?
Valaaulia tagata aoga e mafaufau i ni mafuaaga e taua ai lo tatou faaaogaina o le igoa sa’o o le Ekalesia. E mafai ona e valaaulia ni nai tagata aoga e faasoa mai o latou manatu. Ona faalaeiau lea ia latou a o latou suesue e vaavaai mo upumoni e mafai ona fesoasoani ia i latou e malamalama atili ai i le taua o le faaaoga o le igoa sao o le Ekalesia a le Faaola.
Ua faailoa mai e Iesu Keriso le igoa o Lana Ekalesia
Faamalamalama atu ina ua mavae ona faateleina o sauaga mai fili o le Ekalesia, sa tuua e le Perofeta o Iosefa Samita Katelani, Ohaio, ia Ianuari 1838. Sa latou toe foi atu ma lona aiga i Misuri, i le mea na faatuina ai e le Au Paia se nofoaga fou e ta’ua o Far West. E lei leva ona toe siitia, ae maua e le Perofeta se faaaliga lea na tuuina mai ai e le Alii le taitaiga e uiga i le fausiaina o le Ekalesia i Far West.
Faitau le Mataupu Faavae ma Feagaiga 115:1–4, vaavaai i mea na aoao atu e le Faaola i taitai o le Ekalesia i Far West.
-
O le a le mea na aoao mai e Iesu Keriso e uiga i le igoa o Lana Ekalesia?
Afai e manaomia, fesoasoani i tagata aoga e faailoa mai faapea na tautino mai e Iesu Keriso o le igoa o Lana Ekalesia O Le Ekalesia a Iesu Keriso o le Au Paia o Aso e Gata Ai. Valaaulia tagata aoga e maka le igoa o le Ekalesia a Keriso i le Mataupu Faavae ma Feagaiga 115:4.
-
O le a ua aoao atu e lenei igoa ia oe e uiga i le Ekalesia?
-
Aisea e te manatu ai e finagalo Iesu Keriso ia tatou faasino atu i Lana Ekalesia i lona igoa sa’o?
I le avea ai ma se vaega o la outou talanoaga o fesili na muamua atu, atonu e fesoasoani le valaaulia o tagata aoga e faitau le 3 Nifae 27:7–8. Atonu e te manao e valaaulia tagata aoga e fesootai pe fefaasinoa’i fuaiupu nei ma le Mataupu Faavae ma Feagaiga 115:4.
O le taua o le faaaogaina o le Igoa sa’o o le Ekalesia
Afai e mafai, tuu atu i tagata aoga se taimi e suesue ai i le saunoaga a Peresitene Russell M. Nelson “O Le Igoa Sa’o o le Ekalesia” (Liahona, Nov. 2018, 87–90). Lolomi kopi mo tagata aoga e le o maua ni masini faatekinolosi.
A o suesue tagata aoga, valaaulia i latou e vaavaai mo aoaoga e fesoasoani ia latou e malamalama ai i le taua o le faaaogaina o le igoa sa’o o le Ekalesia a le Faaola. E mafai e tagata aoga ona suesue taitoatasi i le lauga atoa, pe e mafai foi ona e tofia ni vaega toalaiti e suesue ni vaega ona faasoa mai lea o mea sa latou aoaoina i le vasega atoa.
Ina ia fesoasoani i tamaiti aoga e talanoaina mea na latou maua, mafaufau e fai atu fesili e pei o le “O le a se mea na e aoaoina e uiga i le mafuaaga e taua ai le faaaogaina o le igoa sa’o o le Ekalesia i le Tama Faalelagi ma Iesu Keriso?” po o le “O le a se mea e sili ona tulaga ese ia te oe mai le savali a Peresitene Nelson? Aisea?”
Afai e le mafai e tagata aoga ona suesue sa’o mai le lauga, mafaufau e faaaoga le faamatalaga lenei.
Na faatalanoaina e Peresitene Russell M. Nelson le taua o le faaaogaina o igoa sa’o o le Ekalesia a le Alii:
O le igoa o le Ekalesia e lē fetuuna’ia. Ina ua ta’ua ma le manino e le Faaola le igoa e tatau ona faaigoa ai Lana Ekalesia, lea na muamua lava i Lana ta’utinoga, “E faapea lava ona ta’ua o la’u ekalesia,” e mamafa ia te Ia. …
O’u uso e ma tuafafine, ou te folafola atu afai o le a tatou faia le mea sili tatou te mafaia e toefuatai ai le igoa sa’o o le Ekalesia a le Alii, o le a liligi mai e Ia o le e ana le Ekalesia Lona mana i lalo ma faamanuiaga i luga o ulu o le Au Paia o Aso e Gata Ai, i auala tatou te lei vaaia lava. O le a tatou maua le poto ma le mana o le Atua e fesoasoani ai ia i tatou e avatu faamanuiaga o le talalelei toefuataiina a Iesu Keriso i malo uma, ituaiga, gagana, ma nuu ma ia saunia le lalolagi mo le Afio Mai Faalua o le Alii. (Russell M. Nelson, “O Le Igoa Sa’o o le Ekalesia,” Liahona, Nov. 2018, 87, 89)
-
O a faamanuiaga na folafola mai e Peresitene Nelson ia i tatou a o tatou faaaogaina le suafa sa’o o le Ekalesia a Iesu Keriso?
“Tutulai ma Susulu Atu”
Faitau Mataupu Faavae ma Feagaiga 115:5–6, ma vaavaai pe faapefea ona finagalo le Alii e faamanuia tagata i le lalolagi atoa e ala i Lana Ekalesia.
Ina ia fesoasoani i tagata aoga ia malamalama i valaaulia a le Alii, mafaufau e faaalu se taimi e iloilo ai upu taua po o fasifuaitau. Mo se faataitaiga, e mafai ona e fai i le vasega e tusi pe faatino mai le fasifuaitau “tutulai ia ma susulu atu” (fuaiupu 5). E ono fesoasoani mo tagata aoga le malamalama o le upu tulaga faatonuina o loo faaaoga i le fuaiupu 5 e faasino i se i si tagavai, faasino i “se fu’a … faataamilo lea e faapotopoto ai tagata i se lotogatasi i le faamoemoega po o le faasinomaga” (Taiala i Tusitusiga Paia, “Ensign,” scriptures.ChurchofJesusChrist.org).
-
E mafai faapefea e le faaaogaina o le igoa sa’o o le Ekalesia a le Alii ona fesoasoani tatou te faamamaluina ai valaaulia a le Alii i fuaiupu 5–6?
-
Na faapefea ona mafai e oe po o se tagata o le aiga ona avea o se malamalama i isi e ala i le faaaogaina o le igoa sa’o o le Ekalesia a le Faaola?
I le avea ai ma se vaega o la outou talanoaga o le fesili talu ai, mafaufau e faasoa atu lenei aafiaga, na aoteleina e Elder Neil L. Andersen.
Na faasoa mai e Elder Neil L. Andersen o le Korama a Aposetolo e Toasefululua se tasi o le tele o aafiaga o loo maua e tagata i le salafa o le lalolagi:
E afe ma afe le Au Paia o Aso e Gata Ai o ē folafola atu ma le lototoa le igoa o le Ekalesia. A tatou faia la tatou vaega, o le a mulimuli mai ai foi ma isi. Ou te fiafia i le tala lenei mai Tahiti.
Na tonu ia Iriura Jean ua sefulu-tausaga e mulimuli i le fautuaga a Peresitene Nelson.
“I lana vasega i le a’oga, sa latou talanoaina ai la latou faaiuga o le vaiaso … ma sa talanoa Iriura e uiga … i le lotu.
“Sa fai atu lona faiaoga o Vaite Pifao, ‘Oi, o oe la o se Mamona?’
“Na ta’u atu ma le lototoa e Iriura, ‘Leai … o a’u o se tagata O Le Ekalesia a Iesu Keriso o le Au Paia o Aso e Gata Ai!’
“Sa tali atu lona faiaoga “Ioe, … o oe o se Mamona.’
“Na fai atu pea lava Iriura, ‘Leai faiaoga, o a’u o se tagata O Le Ekalesia a Iesu Keriso o le Au Paia o Aso e Gata Ai!’
“Ms. “Sa maofa Pifao i le talitonuga maumaututu o Iriura ma sa taumafaufau pe aisea sa ia faaaoga ai pea lava [le] igoa umi o lana lotu. [Sa tonu ia te ia e aoao atili e uiga i le Ekalesia.]
“[Mulimuli ane, ina ua] papatiso [Sister] Vaite Pifao [sa ia faaalia le lotofaafetai] ona sa manaomia e Iriura le fautuaga a Peresitene Nelson.” (Neil L. Andersen, “O le Igoa o le Ekalesia e le Mafai ona Fetuunaia,” Liahona, Nov. 2021, 118-19)
Fai fesili e valaaulia ai le mauaina: Ina ia fesoasoani ia te oe e faataitai le faia o fesili e fesoasoani ai i tagata aoga ia iloa upumoni, tagai i le aoaoga ua faaautuina “Fatu ni fesili suesue e le tamauina se faaiuga lea e fesoasoani i tagata aoao ia iloa aoaoga faavae ma mataupu faavae o le talalelei mo i latou lava ma aua nei taitaiina atu tagata aoga i se tali patino” i le Tomai o le Atinaega o Faiaoga: Aoao Atu le Aoaoga Faavae.
-
O le a se mea na tumatila ia te oe mai lenei aafiaga?
-
O le a se mea ua e aoaoina pe lagonaina i le aso e fesoasoani e te malamalama atili ai i le Tama Faalelagi ma Iesu Keriso?
Molimau atu e uiga i upumoni sa outou talanoaina. Uunaia ia tagata aoga e mulimuli i le poloaiga a le Alii e faaaoga le igoa sa’o o le Ekalesia i a latou fegalegaleaiga ma isi.