Lesona 129: Mataupu Faavae ma Feagaiga 115–120

Mataupu Faavae ma Feagaiga 119-120

O Le Tulafono a le Alii o le Sefuluai

I le taumafanafana o le 1838, sa feagai ai le Au Paia i avega tautupe a o latou taumafai e galulue e totogi aitalafu ma atina’e le Ekalesia i Misuri i matu. Na sailia ai e le Perofeta o Iosefa Samita le taitaiga a le Alii ma sa iu ina mauaina le faaaliga o loo faamauina i le Mataupu Faavae ma Feagaiga 119. I Lana fautuaga i le Au Paia, na faaali mai ai e le Faaola upumoni e faatatau i Lana tulafono o le sefuluai. O lenei lesona e mafai ona fesoasoani i tagata aoga e faateleina ai lo latou naunau e ola i le tulafaono a le Faaola o le sefuluai.

Gaoioiga E Ono Mafai Ona Aoao Ai

O se valaaulia

Valaaulia tagata aoga e mafaufau i le tulaga faataitai lenei po o se mea e talitutusa lelei e fetaui ma manaoga o lau vasega.

Mafaufau faapea o loo aoaoina e faifeautalai i la outou nofoaga se tasi o au uo ma ua valaaulia oe e auai. I le lesona i lena aso, e faailoa atu ai e faifeautalai i lau uo le tulafono o le sefuluai. A uma le lesona, e ta’u atu e lau uo ia te oe e i ai ona popolega e uiga i le totogiina o le sefuluai.

• O a ni faataitaiga o popolega e ono i ai i se tasi e uiga i le usiusitai i le tulafono o le sefuluai?

Mafaufau e tusi i luga o le laupapa tali a tagata aoga i le fesilii na uma atu. Ona valaaulia lea o tagata aoga e mafaufau e uiga i o latou lava lagona e uiga i le tulafono a le Alii o le sefuluai, e aofia ai le taua i le taimi nei mo i latou le ola ai i lenei tulafono. Fai iai e mafaufau e uiga i soo se fesili po o ni atugaluga e ono iai e fesootai i le tulafono o le sefuluai.

Uunaia tagata aoga a o latou suesue e vaavaai mo aoaoga e mafai ona fesoasoani ia i latou e lagona ai se naunau sili atu e usitai i le tulafono a le Alii o le sefuluai.

Na faaalia e le Faaola Lana tulafono o le sefuluai i le Au Paia

O le parakalafa lenei e mafai ona faitauina pe aoteleina e tuuina atu ai le talaaga faasolopito mo le Mataupu Faavae ma Feagaiga 119. O le isi auala, e mafai ona e fai atu i se tagata aoga e faitau le faatomuaga i le vaega 119.

E oo atu ia Iulai 1838, ua matua tele le faigata tautupe na iai le Ekalesia. Ae, sa faatonuina lava tagata o le Ekalesia e toe o atu i Misuri i matu ma fausia se malumalu i Far West (tagai Mataupu Faavae ma Feagaiga 115:8–12). Sa feiloai le Perofeta o Iosefa Samita ma isi taitai o le Ekalesia e mafaufau pe faapefea ona usiusitai i poloaiga a le Alii. I le tali atu i a latou talosaga ma le agaga tatalo, sa tuuina mai ai e le Faaola le fautuaga e uiga i le tulafono o le sefuluai.

Faitau le Mataupu Faavae ma Feagaiga 119:1–4, ma vaavaai mo le mea na aoao mai e le Faaola.

• O le a le mea na aoao atu e le Alii i le Au Paia e uiga i Ona faamoemoega mo le ola ai i le tulafono o le sefuluai?

  Fesoasoani i tagata aoga ia malamalama i faamoemoega o le Alii mo le totogiina o le sefuluai ua faamanino mai i o tatou aso: “O le sefuluai o le foai o le tasi vaesefulu o tupe maua a se tasi i le Ekalesia a le Atua (tagai i le Mataupu Faavae ma Feagaiga 119:3–4; o le tului e malamalama i ai o lona uiga o tupe maua). O tagata uma e i ai tupe maua e tatau ona totogi sefuluai” (Tusitaulima Aoao, 34.3.1).

  A uma ona tuuina mai lenei faamalamalamaga, mafaufau e tusi le upumoni lenei i luga o le laupapa: Ua poloaiina i tatou e le Faaola e totogi le tasi-vaesefulu o a tatou mea faaopoopo o se sefuluai O Le Ekalesia a Iesu Keriso o le Au Paia o Aso e Gata Ai.

• O le a sou manatu o a nisi o mafuaaga ua poloaiina ai i tatou e le Alii e totogi le sefuluai?

Faaloloto le malamalama

Faamanatu i tagata aoga ia fesili po o atugaluga e faatatau i le sefuluai na faatalanoaina i le amataga o le lesona.

Tuu atu i tagata aoga se taimi e suesue ai punaoa o loo i le pepa e tufa atu “Aoaoga e uiga i le Tulafono a le Faaola o le Sefuluai.” E mafai e tagata a’oga ona suesue taitoatasi i nei fuaiupu pe faatasi ma se paga. Valaaulia i latou e vaavaai mo aoaoga e mafai ona fesoasoani i se tasi e i ai ni atugaluga e uiga i le totogiina o le sefuluai.

Pe nai lo le faaaogaina o punaoa o loo i le tufaaga, e mafai e tagata aoga ona maua a latou lava punaoa. E mafai ona latou faaaogaina fesoasoani mo suesuega po o le Potutusi o le Talalelei e sue ai tusitusiga paia po o faamatalaga mai taitai o le Ekalesia e faatatau i le sefuluai.

Aoaoga e uiga i le Tulafono a le Faaola o le Sefuluai

Suesue i punaoa nei, ma vaavaai mo mea e mafai ona faaosofia ai oe po o isi e usitai i le tulafono o le sefuluai.

Tusitusiga Paia:

• Malaki 3:8–10; Ioane 7:17; Mataupu Faavae ma Feagaiga 119:5–7

Faamatalaga ma isi punaoa:

Na aoao mai Peresitene Steven L. Lund, le Peresitene Aoao o Alii Talavou:

A totogi atoa se sefuluai a talavou, latou te faatuina se so’otaga e tumau ma le Tama Faalelagi. O taimi uma latou te usita’ia ai lena poloaiga ma totogi lena tupe, e fatuina ai se noataga o le ositaulaga ma le sootaga. (Steven J. Lund, “Seminare, Inisitituti,ma Isi Mea e Aoga” [lauga na tuuina atu i le faasalalauga faaletausaga o aoaoga a le Inisitituti Seminare & Ian. 27, 2023], broadcasts.ChurchofJesusChrist.org)

Mo Le Malosi o le Autalavou: O Se Taiala mo le Faia o Filifiliga ua fautua mai:

Faaali le alofa mo le Atua i le tausiaina o Ana poloaiga. …

… A o e anapogi ma totogi sefuluai ma taulaga, ua e faaali atu i le Atua o Lana galuega e sili atu ona taua ia te oe nai lo mea faaletino. (Mo Le Malosi o le Autalavou: O Se Taiala mo le Faia o Filifiliga [2022], 11-12)

A o avea ai o se tasi o Fitugafulu, na fesili ai Elder Stanley G. Ellis:

Pe o i ai so tatou faatuatua e faatuatuaina ai folafolaga a le [Alii] e faatatau i le sefuluai e faapea o le 90 pasene o a tatou tupe faasili faaopoopo i ai ma le fesoasoani a le Alii, ua sili atu ai nai lo le 100 pasene pe a na o i tatou? (Stanley G. Ellis, “Pe Ua Tatou Faatuatuaina Ea o Ia? O Le Faigata E Lelei,” Liahona, Nov. 2017, 114)

Na aoao mai Elder David A. Bednar o le Korama a Aposetolo e Toasefululua:

E pei ona tatou aoao soo atu ma molimau e uiga i le tulafono o le sefuluai, tatou te faamamafa lava le vave, maoae, ma le iloa gofie o faamanuiaga faaletino tatou te maua. Ma e mautinoa lava o ia faamanuiaga o loo tutupu. Ae o nisi o ia faamanuiaga eseese tatou te maua ao tatou usiusitai i lenei poloaiga e taua ae e lemafaamatalaina. …

Mo se faataitaiga, o se faamanuiaga lemafaamatalaina ae taua tatou te mauaina o le meaalofa faaleagaga o le loto faafetai lea e mafai ai ona tatou talisapaia mea ua tatou maua e faafetaiaia ai manaoga mo mea tatou te mananao i ai. …

O nisi taimi atonu tatou te ole atu i le Atua mo le manuia, ma Ia tuu mai ai ia i tatou le malosi faaletino ma faalemafaufau. Atonu tatou te augani atu mo le manuia, ma tatou maua ai se vaaiga faateleina ma le faaopopoina o le onosai. (David A. Bednar, “O Faamalama o le Lagi,” Liahona, Nov. 2013, 17–18)

O Maria Filitia Samita o le fafine ua oti lana tane o Ailama Samita ma o le tina o le Peresitene o Iosefa F. Samita. Ina ua fai atu se tasi e faapea o ia e mativa tele e tausia le tulafono o le sefuluai, sa ia tali mai:

Pe e te taofia ea au mai le mauaina o so’u faamanuiaga? … Ou te totogiina la’u sefuluai, e le gata ona o se tulafono a le Atua, ae ona ou te faamoemoe e maua so’u faamanuiaga i lo’u usitai i ai. (Maria Filitia Samita, na siiina mai e Iosefa F. Samita, i le Lipoti a le Fono, Ape. 1900, 48)

Valaaulia tagata aoga e faasoa mai mea na latou mauaina e ono fesoasoani i se tasi o i ai ni fesili po o ni atugaluga e uiga i le sefuluai. O fesili nei e mafai ona taiala ai le talanoaga.

• O le a se mea ua e aoaoina e uiga i le Tama Faalelagi ma Iesu Keriso a o e suesueina le tulafono o le sefuluai?

• O le a se fautuaga e te tuuina atu i se tasi e i ai ni atugaluga e uiga i le totogiina o le sefuluai?

• O a ni auala ua e vaaia ai le faamanuiaina o oe po o isi e le Alii ona o le usitaia o Lana tulafono o le sefuluai?

A o outou talanoaina le fesili mulimuli o loo i luga, mafaufau e faasoa atu se faataitaiga mai lou olaga. E mafai foi ona e faaaogaina se tasi o vitio nei: “Sefuluai: O Lea a Ou Faia se Oso o le Faatuatua” (4:47) po o “O Le Gagana o le Talalelei” (12:27) mai le faailo taimi 5:27 i le 7:40. O nei vitio o loo maua i le ChurchofJesusChrist.org.

Mafaufau i lou olaga

Ina ia faaiu le lesona, mafaufau e valaaulia tagata aoga e faamau a latou tali se tasi po o fesili uma foi e lua ia latou apitalaaga o suesuega.

• O le a se mea ua e aoaoina pe lagonaina e te manao e manatua?

• O le a se mea ua uunaia oe e fai ona o mea ua e suesueina i le asō?

Fuafua e valaaulia ni nai tagata aoga e naunau e faasoa mai o latou mafaufauga. Molimau atu i upumoni sa outou talanoaina, ma uunaia tagata aoga e taumafai e ola i le tulafono o le sefuluai i o latou olaga atoa.

O Punaoa Faaopoopo

Ae faapefea pe afai ou te manao e foai atu le 10 pasene o la’u tupe maua i isi faalapotopotoga agaalofa?

O Elder Robert D. Hales (1932–2017) o le Korama a Aposetolo e Toasefululua na faasoa mai lenei tala:

Ina ua fesili atu se uo a Peresitene George Albert Smith ia te ia po o le a sona manatu i le fuafuaga patino a lana uo e fai le sefuluai ma foai atu lana sefuluai i foai agaalofa o lana lava filifiliga, o le fautuaga a Peresitene Samita:

“Ou te manatu o oe o se tamalii agaleleli tele i meatotino a se isi tagata. …

“… Ua e tau mai ia te au le mea na e faia i tupe a le Alii ae e te lei tauina mai ia te au ua e tuuina atu i soo se tasi sa oe lava pene. O Ia o le paaga sili ona lelei o loo ia oe i le lalolagi. Na te avatu ia te oe mea uma, e oo lava i le ea o e manavaina. Ua Ia fetalai mai e tatau ona e aveina le tasi vaesefulu o mea e oo mai ia te oe ma avatu i le Ekalesia e pei ona faatonuina ai e le Alii. E te lei faia lena mea; ua e aveina le tupe a lau paaga sili ona lelei, ma ua e lafoai ese.” (Robert D. Hales, “O Le Sefuluai: O Se Tofotofoga o le Faatuatua ma Faamanuiaga e Faavavau,” Liahona, Nov. 2002, 28)

Aisea e taua ai le totogi o le sefuluai e tusa lava pe ou te le maua ni tupe se tele?

Na faamaninoina e Elder Lynn G. Robbins o le Fitugafulu:

E leai se epikopo, e leai se faifeautalai e tatau ona faatuai pe leai foi se faatuatua e aoao atu ai le tulafono o le sefuluai i e matitiva. O le lagona o le “E le mafai ona latou gafatia ona” e manaomia ona suia i le “E mafai ona latou le gafatiaina ona.”

O se tasi o mea muamua e tatau ona fai e se epikopo e fesoasoani ai i e le tagolima o le fai atu lea ia i latou e totogi a latou sefuluai. E pei o le fafine ua oti lana tane [o Sarefata], afai e feagai se aiga matitva ma le faaiuga o le totogiina o a latou sefuluai po o le aai, e tatau ona totogi a latou sefuluai. E mafai e le epikopo ona fesoasoani ia i latou i a latou meaai ma isi manaoga masani seia oo ina mafai ona latou ola tutoatasi. …

Pe a laulau se taumafataga, e sili atu le faigofie o le toe setiina o se isi ipu e tasi i le amataga o le taumafataga nai lo le sueina o meaai mo se tagata tuai i le taimi e uma ai le taumafataga ma ua uma meaai. E faapena foi, pe le faigofie atu ea le avatu i le Alii o ulumatua po o uluai fua nai lo le faamoemoe ua lava “toeaiga” mo Ia? I le avea ai ma faavae o lo tatou tausamaaga, pe le tatau ea ona avea o Ia ma malo faaaloalogia, o le tagata muamua e auauna atu i ai? (Lynn G. Robbins, “O Le Sefuluai—o se Poloaiga Foi mo ē Le Tagolima,” Liahona, May 2005, 35–36)

Gaoioiga Faaopoopo e Aoao Ai

E faapefea ona totogi lau sefuluai

E ono fesoasoani le faaali atu i tagata aoga le auala e totogi ai le sefuluai. Mafaufau e aumai se teutusi o le sefuluai ma se pepa o le tupe totogi i le vasega e faaali atu ai i tagata aoga le auala e faatumu ai. E mafai foi ona e faaali atu ia i latou le auala e faatumu ai se pepa faatumu faaeletonika o le sefuluai i le donations.ChurchofJesusChrist.org.

Mataupu Faavae ma Feagaiga 120. O Le Aufono mo le Pulefaasoasoaina o Sefuluai

Ina ia fesoasoani ia malamalama tagata aoga na faavaeina e le Faaola le ala e tatau ona faatautaia ai tupe o le sefuluai i Lana Ekalesia, e mafai ona e valaaulia i latou e lisi mai nisi o mea o loo faaaoga ai tupe o le sefuluai i le lalolagi atoa. Afai e manaomia e tagata aoga se fesoasoani, tagai i le saunoaga a Elder Robert D. Hales i le faaiuga o lenei gaoioiga.

• E faapefea ona faia faaiuga e faatatau i le auala e faaalu ai tupe o le sefuluai?

Fesoasoani i tagata aoga ia malamalama o le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu e faaatoatoaina le Aufono mo le Pulefaasoasoaina o Sefuluai. Ona fai atu lea i tagata aoga e faitau le Mataupu Faavae ma Feagaiga 120:1, ma vaavaai mo sui faaopoopo o lenei aufono. E mafai ona e valaaulia tagata aoga e maka le fasifuaitau “i lo’u lava leo ia te i latou” ma fesili atu i ai:

• O le a se mea ua tatou aoao mai i le iloaina e fuafua e le Faaola pe faapefea ona faaalu tupe o le sefuluai?

E mafai ona e faaali atu le saunoaga lenei a Elder Robert D. Hales o le Korama a Aposetolo e Toasefululua. Valaaulia tagata aoga e fai mai soo se latou fesili o i ai.

E maoae le molimauina o lenei aufono a o gauai atu i le siufofoga o le Alii. E silafia e sui taitasi ma e latou te auai foi i le faatinoina o faaiuga uma a le aufono. E leai se faaiuga e faia sei vagana ua autasi i ai le aufono. O tupe uma o le sefuluai, e faaalu mo faamoemoega o le Ekalesia, e aofia ai le uelefea—o le tausiga o e matitiva ma ē lē tagolima, o malumalu, fauina ma le tausiga o falelotu, o aoga, mataupu aoaoina—a faapuupuu—o le galuega a le Alii. …

… E aunoa ma se tuusaunoaga, ua faaaogaina tupe o sefuluai a lenei Ekalesia mo Ona faamoemoe. (Robert D. Hales, “O Le Sefuluai: O Se Tofotofoga o le Faatuatua ma Faamanuiaga e Faavavau,” Liahona, Nov. 2002, 28)