“Lesona 130—Tutulieseina mai Misuri: Liliu atu i le Atua i o Tatou Puapuaga,” Tusi Lesona a le Faiaoga Seminare o le Mataupu Faavae ma Feagaiga (2025)
“Tutulieseina mai Misuri,” Tusi Lesona a le Faiaoga Seminare o le Mataupu Faavae ma Feagaiga
Lesona 130: Mataupu Faavae ma Feagaiga 115–120
Tutulieseina mai Misuri
Liliu Atu i le Atua i o Tatou Puapuaga
O le tautoulu ma le taumalulu o le 1838–39 o se taimi o faigata ogaoga mo le Au Paia i Misuri. A o faateteleina feeseeseaiga i le va o tagata o le Ekalesia ma isi tagata na nonofo i Misuri, sa faatonuina e Kovana Lilburn W. Boggs ia tutuliese le Au Paia mai le setete. I le taimi o nei faigata, e toatele na liliu atu i le Atua ma maua Lana fesoasoani. O lenei lesona e mafai ona fesoasoani i tagata a’oga e lagonaina se naunautaiga sili atu e liliu atu i le Atua pe a fesagai ma tulaga faigata.
Gaoioiga E Ono Mafai Ona Aoao Ai
O fea e te liliu i ai?
Mafaufau e faaali atu le faamatalaga lenei ma valaaulia se tagata aoga e faitau leotele.
Na aoao mai Elder Joseph B. Wirthlin (1917–2008) o le Korama a Aposetolo e Toasefululua:
O le ala tatou te taulima ai faigata e mafai ona avea ma sao tele i le fiafia ma le manuia o o tatou olaga. (Joseph B. Wirthlin, “Po o le A Lava se Mea e Tupu, Ia Fiafia Pea,” Liahona, Nov. 2008, 26)
-
O a nisi o faataitaiga e mafai ona e mafaufau i ai e faapupula ai mea o loo aoao mai i lenei faamatalaga?
Valaaulia tagata aoga e mafaufau e uiga i tulaga faigata o loo feagai ma i latou pe na oo i ai i le taimi ua tuanai. Ona valaaulia lea o i latou e mafaufau pe faapefea ona masani ona latou tali atu pe na tali atu i o latou tulaga faigata. E mafai ona e fai atu i ni nai tagata aoga naunau e faasoa mai ni tali e le patino tele.
Uunaia tagata aoga a o latou suesue e gauai atu i uunaiga a le Agaga. O uunaiga faaleagaga e mafai ona fesoasoani ia i latou e iloa ai pe faapefea ona finagalo le Atua latou te tali atu i o latou tulaga faigata.
Faigata i Misuri
Faamalamalama atu e faapea, i le 1839, pe tusa ma le 8,000 i le 10,000 le Au Paia sa nonofo i Misuri i matu. I le va o Ianuari ma Mati, o le toatele na faamalosia e tuua o latou fanua ma fale. O aotelega nei e mafai ona fesoasoani i tagata aoga ia malamalama ai i le talaaga na taitai atu ai i nei tulaga. E mafai ona e faaali atu ia aotelega, pe lolomi ma tofi ni nai tagata aoga e faasoa atu i le vasega.
Nai lo le faaaogaina o aotelega, e mafai ona e matamata i le “1838: O le Tausaga na Tutuliese ai le Au Paia mai Misuri” (5:15), o loo maua i le ChurchofJesusChrist.org.
-
E lima tausaga talu ona tutuliese le Au Paia mai le Itumalo o Siakisone, Misuri, sa latou faatuina ni nuu fou i isi eria o le setete. E toatele tagata o Misuri sa feita i le faateleina o le aofai o le Au Paia, faapea foi ma tautinoga na faia e taitai o le Ekalesia o le a puipuia e le Au Paia i latou lava mai le au faatupu faalavelave i le lumanai. I le faafaigata ai o le mataupu, sa amata ona faia e se vaega toalaiti o tagata o le Ekalesia ni taufaamata’u i fili o le Ekalesia (tagai Au Paia,, 1:313–15).
-
O feeseeseaiga faatupu vevesi i le va o le Au Paia ma tagata o Misuri na iu ina oo atu ai i finauga faaletino. Sa faamalosia le Au Paia i ni nai nofoaga laiti e sosola ese a o faatamaia o latou fale ma meatotino e le au faatupu faalavelave. I le aso 25 o Oketopa, 1838, na fasiotia ai ni alii se toatolu o le Au Paia o Aso e Gata Ai ma se tasi o tagata o le militeri a Misuri i le mea na ta’ua o le Battle of Crooked River [Taua o le Vaitafe Piopio] (tagai i le Au Paia,, 323–28, 1:330–34, 335–45).
-
Sa maua e le Kovana o Misuri o Lilburn W. Boggs ni lipoti sa matua faateleina na faapea mai e 50 i le 60 tagata Misuri na fasiotia i le taua. Sa maua foi e le kovana ni faamatalaga na tauto ai taitai muamua o le Ekalesia na feitai o e sa molimau sese e faasaga ia Iosefa Samita. I le aso 27 o Oketopa, 1838, sa tuuina atu ai e Kovana Boggs se faatonuga faapitoa, ma faailoa atu, “E tatau ona faia tagata Mamona o ni fili ma e tatau ona faaumatia pe tutuliese mai le setete” (tagai i le Au Paia,, 1:345–46).
-
Ina ua uma ona tuuina atu e Kovana Boggs lana poloaiga, sa puefaapagotaina le Perofeta o Iosefa Samita ma isi taitai o le Ekalesia e tagata o le militeri a Misuri. Sa osofaia e le au faatupu faalavelave le taulaga o Far West ma isi nuu o le Au Paia o Aso e Gata Ai (tagai Au Paia,, 1:347–58, 359–67).
-
Pe ana fai o oe o se tagata o le Ekalesia i lea taimi, e faapefea ona e faamatalaina lagona po o ni au fesili atonu na iai?
-
O a faatinoga na e ono e lagona e te manao e fai?
-
I na taimi faigata, e toatele le Au Paia na faaalia lo latou faatuatua e ala i le liliu atu i le Atua.
O le tala lenei e mafai ona fesoasoani i tagata aoga e vaai ai i se faataitaiga o le ala na filifili ai se sui e toatasi o le Ekalesia e liliu atu i le Atua i le taimi o ona puapuaga. Mafaufau e tufa atu le pepa e tufa atu ua faaautuina “O Le Tala ia Amanda Samita i Haw’ns Mill.”
E mafai ona outou suesue faatasi o se vasega lenei tala, faatasi ma ni nai tagata aoga e feauauai i le faitauina leotele o vaega eseese o le tala. E mafai foi e tagata aoga ona suesue le tala i se vaega toalaiti.
O Le Tala ia Amanda Samita i le Fale Gaosi Laupapa a Hawn
I le aso 30 o Oketopa, 1838, na osofaia ai e le au faatupu faalavelave i Misuri se nuu o le Au Paia o Aso e Gata Ai ua ta’ua o le Fale Gaosi Laupapa a Hawn. Sa tafana atu e le au faatupu faalavelave i alii ma tama o e na ulufale atu i se faleoloa fai uamea e saili se malutaga ma puipuia o latou tagata. E sefulufitu le Au Paia o Aso e Gata Ai na fasiotia i le osofaiga, ma e silia ma le sefululua na manunua.
Sa i ai faatasi ma tagata na manunu’a ia Alema Samita e ono tausaga le matua, o lona soogaoivi atoa na mou atu ina ua uma ona fanaina o ia. O le tina o Alema, o Amanda Barnes Samita, sa faanoanoa ina ua ia mauaina o ia. Sa ia faavauvau foi mo lona toalua ma lana tama tama e 10 tausaga le matua, na maliliu uma i le osofaiga.
Ma le leai o se tasi na avanoa e fesoasoani ia te ia, na faapotopoto faatasi ai e Amanda lana fanau na totoe ma tatalo mo se taitaiga. “Oi, lo’u Tama Faalelagi,” sa ia tatalo ai, “Ua e vaai atu i la’u tama mativa ua manu’a ma iloa le leai o so’u poto masani. Oi, le Tama Faalelagi, faatonu mai a’u i le mea e fai.”
Ina ua uma le tatalo a Amanda, sa ia faalogoina se leo o taitai o ia e faafefiloi lefulefu i le vai. Sa ia faaaogaina le vaifofo e fufulu ai le manu’a o Alema seia oo ina mama. O le isi mea na sosoo ai, sa lagona e Amanda le uunaiga e aumai ni aa mai se laau o le elm ma olo ia malū. Sa ia tuu le vai malū i luga o le manu’a o Alema ma taai i le ie.
“Taoto laia faapena, ma aua le minoi,” na ia tau atu i lana tama, “ma o le a faia e le Alii mo oe se isi suilapalapa.”
O le manu’a o Alema na taofia ai Amanda ma lona aiga mai le o ese atu ina ua mavae le osofaiga. A o mavae atu vaiaso, sa tuu mai e le au faatupu faalavelave se aso mulimuli mo ia ma isi Au Paia na totoe e o ese ai. Na faateleina le fefe o Amanda ina ua oo mai le aso e faagata ai. Sa lafi o ia i se fusi o sana ina ia mafai ona ia tatalo leotele e aunoa ma le lagonaina. Ona ia faalogoina lea o se leo na toe ta’ua upu nei:
-
O lē ua fa’amoemoe o ia ia te a’u,
-
Ou te le tu’ulafoa’ia o ia i le fili;
-
Po’o le a lava o lona malosi,
-
E lē lafoa’ia, e a’u o ia!
O upu nei mai le viiga “Le Faavae Malosi” (Viiga, nu. 45) na fesoasoani ia Amanda e lagona ai se lagona fou o le malosi ma le lototele.
E lei leva, na iai Amanda i fafo ina ua ia faalogo atu o feei lana fanau i totonu o lona fale. Sa faanatinati atu o ia i le fale ma iloa atu Alema o tamoe solo i le potu. “Ua ou manuia, Tina, ua ou manuia!” na ia tagi atu ai. E lei leva ae tuua e Amanda ma lana fanau le Vili Falaoamata a Hawn.
(Sii mai ma aoteleina mai le Au Paia,, 1:347–50, 353–55, 378–79)
-
O le a se mea e tulagaese ia te oe mai lenei tala?
-
O le a se mea na e aoaoina e uiga i le Tama Faalelagi ma Iesu Keriso ao e faitauina lenei tala?
A o faasoa mai e tagata aoga a latou tali i le fesili na muamua atu, mafaufau e valaaulia i latou e faasoa mai upumoni ua latou aoaoina e mafai ona fesoasoani ia i latou i o latou tofotofoga. O se tasi o upumoni e mafai ona faailoa mai e tagata aoga o le: A o tatou liliu atu i le Atua i o tatou puapuaga, e mafai ona tatou lagonaina Lana taitaiga, faamafanafanaga, ma le malosi.
Mafaufau e usu pe faalogologo i le viiga “Le Faavae Malosi” (Viiga, nu. 45) faatasi o se vasega. O upu na faamalosia ai Amanda Samita o loo maua i le fuaiupu 7.
O tusitusiga paia e fesoasoani ia i tatou e liliu atu ai i le Atua
Faaalu sina taimi e sue ai ni tusitusiga paia e mafai ona faateleina ai lou naunau e liliu atu i le Atua pe a e feagai ma faigata. E mafai ona e suesue i nisi po o fuaitau uma nei pe sue ni fuaitau eseese.
-
O le a se mea na e maua e anoa i fuaiupu sa e suesueina? Aisea?
-
O anafea na faamanuiaina ai oe e le Atua po o isi e te iloa a o e liliu atu ia te Ia i se tulaga faigata?
I le avea ai ma se vaega o la outou talanoaga o le fesili talu ai, mafaufau e faasoa atu se faataitaiga mai lou lava olaga.
Mafaufau i lou olaga
Ina ia fesoasoani i tagata aoga e toe manatunatu i lo latou aoaoina, valaaulia i latou e tali mai i se tasi o fesili nei i a latou api talaaga mo suesuega.
-
O le a se mea ua e aoaoina pe lagonaina i le asō e mafai ona faamalosia ai oe i le isi taimi e te feagai ai ma se tulaga faigata?
-
O le a se mea ua uunaia oe e fai ona o mea ua e suesueina i le asō?
Mafaufau e valaaulia ni nai tagata aoga naunau e faasoa mai mea na latou tusia. Molimau atu e uiga i upumoni sa outou talanoaina i lenei aso ma uunaia tagata aoga e faatino soo se musumusuga faaleagaga atonu na latou maua.