Leksiyon 129: Doktrina ug mga Pakigsaad 115–120

Doktrina ug mga Pakigsaad 119–120

Ang Balaod sa Ginoo sa Ikapulo

Sa ting-init niadtong 1838, ang mga Santos nakasinati og grabeng kalisdanan sa pinansyal samtang naningkamot silang bayran ang utang ug tukoron ang Simbahan sa amihanang Missouri. Gipangayo ni Propeta Joseph Smith ang tambag sa Ginoo ug nadawat niya ang pagpadayag nga narekord sa Doktrina ug mga Pakigsaad 119. Sa iyang tambag sa mga Santos, gipadayag sa Manluluwas ang mga kamatuoran nga may kalambigitan sa Iyang balaod sa ikapulo. Kini nga leksiyon makatabang sa mga estudyante nga madugangan ang ilang tinguha sa pagkinabuhi uyon sa balaod sa Manluluwas bahin sa ikapulo.

Mga Posibleng Kalihokan sa Pagkat-on

Usa ka pagdapit

Dapita ang mga estudyante sa pagkonsiderar sa mosunod nga senaryo o sama niini nga pinakahaom sa panginahanglan sa imong klase.

Handurawa nga gitudloan sa mga misyonaryo sa inyong dapit ang usa sa imong mga higala ug gidapit ka sa pag-apil. Sa leksiyon nianang adlawa, gipaila sa mga misyonaryo ngadto sa imong higala ang balaod sa ikapulo. Human sa leksiyon, miingon ang imong higala nga naa siyay mga gikabalak-an bahin sa pagbayad sa ikapulo.

• Unsa nga mga pananglitan sa mga kabalaka ang posibleng mabatonan sa usa ka tawo dihang tumanon ang balaod sa ikapulo?

Ikonsiderar ang pagsulat diha sa pisara sa mga tubag sa mga estudyante sa nag-unang pangutana. Dayon dapita ang mga estudyante sa paghunahuna bahin sa ilang kaugalingong pagbati sa balaod sa Ginoo sa ikapulo, apil ang kon unsa ka importante para nila sa kasamtangan ang pagkinabuhi uyon niini nga balaod. Hangyoa silang hunahunaon ang bisan unsang pangutana o kabalaka ang naa sila nga konektado tingali sa balaod sa ikapulo.

Dasiga ang mga estudyante samtang nagtuon sa pagpangita og mga pagtulun-an nga makatabang nga mas modako ang ilang tinguha sa pagtuman sa balaod sa Ginoo sa ikapulo.

Gipadayag sa Manluluwas ang Iyang balaod sa ikapulo ngadto sa mga Santos

Ang mosunod nga parapo pwedeng basahon o mubo nga ipagpasabot aron mohatag og makasaysayanong konteksto para sa Doktrina ug mga Pakigsaad 119. O, pwede nimong ipabasa sa usa ka estudyante ang pasiuna sa seksiyon 119.

Niadtong Hulyo 1838, naglisod pag-ayo sa pinansyal ang Simbahan. Pero, gisugo gihapon ang mga miyembro sa Simbahan nga mobalhin sa amihanang Missouri ug magtukod og templo sa Far West (tan-awa sa Doktrina ug mga Pakigsaad 115:8–12). Nakigkita si Propeta Joseph Smith sa ubang mga lider sa Simbahan aron ikonsiderar kon unsaon sa pagkamasulundon sa mga sugo sa Ginoo. Agai og tubag sa ilang mainampoong hanyo, gihatag sa Manluluwas ang tambag bahin sa balaod sa ikapuo.

Basaha ang Doktrina ug mga Pakigsaad 119:1–4, nga mangita kon unsay gitudlo sa Manluluwas.

• Unsay gitudlo sa Ginoo ngadto sa mga Santos bahin sa Iyang mga gidahoman sa pagkinabuhi uyon sa balaod sa ikapulo?

  Tabangi ang mga estudyante nga masabtan nga giklaro na sa atong panahon kon unsay gidahoman sa Ginoo para sa pagbayad sa ikapulo: “Ang ikapulo mao ang donasyon sa ikanapulong bahin sa kinitaan sa usa ka tawo ngadto sa Simbahan sa Dios (tan-awa sa Doktrina ug mga Pakigsaad 119:3–4; ang tubo nagpasabot nga kinitaan). Tanang miyembro nga adunay kinitaan kinahanglang mobayad og ikapulo” (Kinatibuk-ang Tamdanan nga Basahon, 34.3.1).

  Human mahatag ni nga pagpasabot, ikonsiderar ang pagsulat sa mosunod nga kamatuoran diha sa pisara: Gisugo kita sa Manluluwas sa pagbayad sa ikanapulong bahin sa atong kinitaan isip ikapulo ngadto sa Ang Simbahan ni Jesukristo sa mga Santos sa Ulahing mga Adlaw.

• Sa imong hunahuna, unsa ang pipila ka rason kon nganong pabayron kita og ikapulo sa Ginoo?

Palawman ang pagsabot

Pahinumdomi ang mga estudyante sa mga pangutana o gikabalak-an bahin sa ikapulo nga inyong gihisgotan sa sinugdanan sa leksiyon.

Hatagi og panahon ang mga estudyante sa pagtuon sa mga kapanguhaan sa handout nga “Mga Pagtulun-an bahin sa Balaod sa Manluluwas sa Ikapulo.” Pwedeng indibidwal nga tun-an sa mga estudyante kini nga mga kapanguhaan o uban sa usa ka pares. Dapita sila sa pagpangita sa mga pagtulun-an nga makatabang sa usa ka tawo nga adunay mga kabalaka bahin sa pagbayad sa ikapulo.

O imbes gamiton ang mga kapanguhaan diha sa handout, pwede ang mga estudyante mangita sa ilang kaugalingon. Pwede nilang gamiton ang mga tabang sa pagtuon o ang Librarya sa Ebanghelyo aron mangitag mga kasulatan o pamahayag gikan sa mga lider sa Simbahan bahin sa ikapulo.

Mga pagtulun-an bahin sa Balaod sa Manluluwas sa Ikapulo

Tun-i ang mosunod nga mga kapanguhaan, nga mangita kon unsay pwedeng modasig nimo o sa uban sa pagtuman sa balaod sa ikapulo.

Mga Kasulatan:

• Malaquias 3:8–10; Juan 7:17; Doktrina ug mga Pakigsaad 119:5–7

Mga pamahayag ug uban pang kapanguhaan:

Si Presidente Steven J. Lund, Kinatibuk-ang Presidente sa Young Men, mitudlo:

Kon ang kabatan-onan mobayad og hingpit nga ikapulo, sila nagporma og sumpay ngadto sa Langitnong Amahan nga magpabilin. Matag higayon nga sila mosunod niana nga sugo ug mohimo niana nga pagbayad, usa ka bag-o nga talikala sa sakripisyo ug koneksyon ang naporma. (Steven J. Lund, “Seminary, Institute, ug Ubang mga Butang nga Epektibo” [pakigpulong nga gihatag sa tinuig nga pagbansay sa pagsibya sa mga Seminary ug &mga Institute, Ene. 27, 2023], broadcasts.ChurchofJesusChrist.org)

Ang Alang sa Kalig-on sa mga Kabatan-onan: Usa ka Giya sa Paghimo og mga Pagpili nagtambag:

Pagpakita og gugma sa Dios pinaagi sa pagtuman sa Iyang mga sugo. …

… Samtang kamo magpuasa ug mobayad og mga ikapulo ug mga halad, inyong ipakita sa Dios nga ang Iyang buhat mas importante kaninyo kay sa materyal nga mga butang. (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 11–12)

Samtang nag-alagad isip sakop sa Seventy, si Elder Stanley G. Ellis nangutana:

Aduna ba kitay hugot nga pagtuo sa pagsalig sa mga saad [sa Ginoo] kalabot sa ikapulo nga sa 90 porsyento sa atong tubo uban sa tabang sa Ginoo, mas maayo pa kaysa 100 porsyento nga nagkinaugalingon? (Stanley G. Ellis, “Misalig ba kita Kaniya? Ang Kalisud Makaayo,” Liahona, Nob. 2017, 114)

Si Elder David A. Bednar sa Korum sa Napulog Duha ka Apostoles mitudlo:

Kasagaran kon kita motudlo sa balaod sa ikapulo, atong hatagan og gibug-aton ang diha-diha, madramahon, ug daling maila nga temporal nga mga panalangin nga atong madawat. Ug tuod ang mao nga mga panalangin mahitabo. Apan pipila sa lain-laing mga panalangin nga atong nadawat samtang kita nagsunod niining sugo importante apan dili dayon makita. …

Sama pananglit, ang dili dayon makita apan importante nga panalangin nga atong nadawat mao ang espirituhanong gasa sa pasalamat sa mga butang nga anaa nato nga makakontrolar sa atong tinguha sa mga butang nga dili kinahanglanon. …

Usahay kita mangayo sa Dios og kalamposan, ug hatagan kita Niya og kalig-on sa pisikal ug sa hunahuna. Kita nangayo nga mouswag, ug kita nakadawat og mas lapad nga panglantaw ug dugang nga pailub. (David A. Bednar, “Ang mga Tamboanan sa Langit,” Liahona, Nob. 2013, 18)

Si Mary Fielding Smith mao ang biyuda ni Hyrum Smith ug inahan ni Presidente Joseph F. Smith. Dihang naay miingon dili niya kayang sundon ang balaod sa ikapulo tungod sa iyang kapobre, siya miingon:

Ihikaw mo ba kanako ang usa ka panalangin? … Ako nagbayad sa akong ikapulo, dili lamang tungod kay kini usa ka balaod sa Dios, apan tungod kay ako naglaom og panalangin sa pagbuhat niini. (Mary Fielding Smith, gikutlo ni Joseph F. Smith, sa Report sa Komperensiya, Abr. 1900, 48)

Dapita ang mga estudyante sa pagpakigbahin kon unsay ilang nadiskobrehan nga makatabang tingali sa usa ka tawo nga naay mga pangutana o kabalaka bahin sa ikapulo. Ang mosunod nga mga pangutana makagiya sa panaghisgot.

• Unsay imong nakat-onan mahitungod sa Langitnong Amahan ug kang Jesukristo samtang nagtuon ka sa balaod sa ikapulo?

• Unsang tambag ang imong ihatag sa usa ka tawo nga naay mga kabalaka bahin sa pagbayad sa ikapulo?

• Sa unsang mga paagi nga imong nakita nga gipanalanginan ka sa Ginoo o ang uban tungod sa pagtuman sa Iyang balaod sa ikapulo?

Samtang hisgotan ninyo ang kataposang pangutana sa ibabaw, ikonsiderar ang pagpakigbahin og pananglitan sa imong kinabuhi. Pwede usab nimong gamiton ang usa sa mosunod nga mga bidyo: “Tithing: I Will Make a Leap of Faith” (4:47) o “The Language of the Gospel” (12:27) gikan sa time code 5:27 hangtod 7:40. Anaa ni nga mga bidyo sa ChurchofJesusChrist.org.

Hunahunaa ang imong kinabuhi

Sa pagtapos sa leksiyon, ikonsiderar ang pagdapit sa mga estudyante nga irekord ang ilang mga tubag sa usa o sa duha sa mosunod nga mga pangutana diha sa ilang mga journal sa pagtuon.

• Unsay imong nakat-onan o gibati karon nga gusto nimong hinumdoman?

• Unsang butanga ang gibati nimo nga giaghat kang himoon samtang nagtuon karon?

Ikonsiderar ang pagdapit sa pipila ka mga estudyante sa pagpakigbahin sa ilang mga hunahuna. Pamatud-i ang mga kamatuoran nga inyong gihisgotan, ug dasiga ang mga estudyante nga maningkamot sa pagkinabuhi uyon sa balaod sa ikapulo sa tibuok nilang kinabuhi.

Dugang nga mga Kapanguhaan

Unsa kaha kon mas gusto nakong ihatag ang 10 porsiyento sa akong kita sa ubang manggihatagong mga kawsa?

Si Elder Robert D. Hales (1932–2017) sa Korum sa Napulog Duha ka Apostoles misaysay sa mosunod nga istorya:

Dihang gipangutana siya sa higala ni Presidente George Albert Smith kon unsay iyang hunahuna bahin sa personal nga plano sa higala niini nga ihatag ang iyang ikapulo ngadto sa napili niyang manggihatagong mga kawsa, ang tambag ni Presidente Smith mao:

“Morag mahinatagon kaayo ka sa kabtangan sa uban. …

“… Giingnan ko nimo kon unsay imong himoon sa kwarta sa Ginoo pero wala ko nimo ingna nga ipanghatag nimo ang kaugalingon nimong kwarta. Siya ang kinamaayohang kapares sa tibuok kalibotan. Gihatag Niya nimo ang tanan, bisan ang hangin nga imong giginhawa. Niingon Siya nga kinahanglan nimong kuhaon ang ikanapulo sa imong kita ug ihatag ni sa Simbahan sumala sa gisugo sa Ginoo. Wala na nimo gihimo; gikuha nimo ang kwarta sa kinamaayohang kapares, ug gipanghatag kini.” (Robert D. Hales, “Ikapulo: Usa ka Pagsulay sa Hugot nga Pagtuo nga adunay Mahangturon nga mga Panalangin,” Liahona, Nob. 2002, 28)

Nganong importanteng mobayad og ikapulo bisan og wala ko mokita og daghang kwarta?

Giklaro ni Elder Lynn G. Robbins sa Seventy:

Walay bishop, walay misyonaryo nga magduhaduha o mawad-an sa pagtuo nga motudlo sa balaod sa ikapulo ngadto sa kabos. Ang hunahuna nga “Dili nila kayang mohatag” kinahanglang ilisan og “Dili nila kayang dili mohatag.”

Usa sa unang mga butang nga kinahanglang himoon sa bishop aron tabangan ang mga nanginahanglan mao ang paghangyo nila sa pagbayad sa ilang ikapulo. Sama sa balo [sa Sarepta], kon ang naglisod nga pamilya kinahanglang magdesisyon nga mobayad og ikapulo o mokaon, kinahanglan nilang mobayad ang ilang ikapulo. Pwede silang tabangan sa bishop sa ilang pagkaon ug ubang nag-unang panginahanglan hangtod nga makabarog na sila. …

Dihang maghukad og pagkaon, mas sayon ang pagbutang ug usa pa ka plato sa pagsugod sa pagkaon kay sa pagpangita og pagkaon alang sa wala pa makakaon samtang humana ang pagpangaon ug nahurot na ang pagkaon. Sa susama, dili ba mas sayon ang paghatag ngadto sa Ginoo sa panganay o unang mga abot kay sa molaom nga naa pay mahabilin nga “mga salin” para Niya? Isip nagpasiugda sa atong kombira, dili ba Siya ang atong pinasidunggang bisita, ang angay nga unang hukaran? (Lynn G. Robbins, “Ikapulo—usa ka Sugo Bisan pa Gani sa mga Pobre,” Liahona, Mayo 2005, 35–36)

Dugang nga mga Kalihokan sa Pagkat-on

Unsaon sa pagbayad sa imong ikapulo

Makatabang tingali ang pagpakita sa mga estudyante kon unsaon pagbayad sa ikapulo. Ikonsiderar ang pagdala og sobre sa ikapulo ug payment slip sa klase aron ipakita kon unsaon ni pagsulat. Pwede usab nimong ipakita kon unsay ibutang sa elektronik nga tithing slip sa donations.ChurchofJesusChrist.org.

Doktrina ug mga Pakigsaad 120. Ang Konseho sa Paggasto sa Ikapulo

Aron tabangan ang mga estudyante nga masabtan nga giistablisar sa Manluluwas kon unsaon pagdumala sa Iyang Simbahan ang mga pondo sa ikapulo, pwede nimo silang dapiton nga ilista ang pipila sa mga butang diin gigamit ang mga pondo sa ikapulo sa tibuok kalibotan. Kon nagkinahanglan og tabang ang mga estudyante, hisgoti ang pamahayag ni Elder Robert D. Hales sa kataposan niini nga kalihokan.

• Unsaon paghimo og desisyon kon asa gastohon ang mga pondo sa ikapulo?

Tabangi ang mga estudyante nga makasabot nga ang Unang Kapangulohan, ang Korum sa Napulog Duha ka Apostoles, ug ang Tigdumalang Bishopric mao ang Konseho sa Paggasto sa Ikapulo. Dayon ipabasa sa mga estudyante ang Doktrina ug mga Pakigsaad 120:1, nga mangita kon kinsa pay dugang sakop sa konseho. Pwede nimong dapiton ang mga estudyante nga markahan ang hugpong sa mga pulong nga “pinaagi sa akong kaugalingon nga tingog ngadto kanila” ug ipangutana ang mosunod:

• Unsay atong makat-onan sa pagkahibalo nga ang Manluluwas ang magtino kon unsaon paggasto ang mga pondo sa ikapulo?

Pwede nimong ihatag ang mosunod nga pamahayag ni Elder Robert D. Hales sa Korum sa Napulog Duha ka Apostoles. Dapita ang mga estudyante nga ipakigbahin ang bisan unsang pangutana nga naa sila.

Talagsaon nga masaksihan kini nga konseho nga mopatalinghog sa tingog sa Ginoo. Ang matag sakop makahibalo ug makasalmot sa tanang mga desisyon sa konseho. Walay desisyon nga himoon hangtud ang konseho magkahiusa. Ang tanang mga salapi sa ikapulo gastoon alang sa mga katuyoan sa Simbahan, lakip ang welfare—ang pag-alima alang sa mga kabos ug mga timawa—mga templo, mga gambalay ug paggalam sa mga balay-tigumanan, edukasyon, kurikulum—sa laktod nga pagkasulti, ang buhat sa Ginoo. …

… Sa tanan gayud, ang mga pondo sa ikapulo niini nga Simbahan gigamit alang sa Iyang mga katuyoan. (Robert D. Hales, “Ikapulo: Usa ka Pagsulay sa Hugot nga Pagtuo nga adunay Mahangturon nga mga Panalangin,” Liahona, Nob. 2002, 28)