Leksiyon 128: Doktrina ug mga Pakigsaad 115–120

Doktrina ug mga Pakigsaad 115

“Kay Sa Ingon ang Akong Simbahan Pagatawgon”

Aron makalikay sa pagpanglutos sa Jackson County, Missouri, linibo ka mga Santos ang nagtigom mga 50 ka milya (80 kilometro) sa amihanan ug naghimog bag-ong mga puy-anan nga gitawag og Far West. Sa usa ka pagpadayag nga gihatag ngadto ni Propeta Joseph Smith sa Far West, gipadayag sa Ginoo nga ang Iyang Simbahan pagatawagon og Ang Simbahan ni Jesukristo sa mga Santos sa Ulahing mga Adlaw. Kini nga leksiyon makatabang sa mga estudyante nga mabati ang kaimportante sa paggamit sa eksaktong ngalan sa Simbahan sa Manluluwas.

Mga Posibleng Kalihokan sa Pagkat-on

Gitawag sa sayop nga ngalan

Ikonsiderar ang pagpakig-istorya sa pipila ka estudyante sa dili pa magsugod ang klase. Hangyoa silang tawgon ka gamit ang sayop nga ngalan atubangan sa klase sa dili pa magsugod ang leksiyon. Mahimong nindot kini nga paagi aron tabangan ang mga estudyante nga mahunahunaan ang kaimportante sa paggamit sa hustong ngalan.

• Unsay imong mga kasinatian dihang gitawag ka sa sayop nga ngalan? Unsay gibati nimo niini nga mga kasinatian?

• Unsa ang pipila ka mga ehemplo sa sayop nga ngalan ang gamiton usahay sa ubang tawo kon nagpasabot sa Simbahan?

Dapita ang mga estudyante sa paghunahuna mahitungod sa mga rason kon nganong importante ang paggamit sa hustong ngalan sa Simbahan. Pwede nimong dapiton ang pipila ka estudyante sa pagpakigbahin sa ilang mga hunahuna. Dayon dasiga sila samtang magtuon nga pangitaon ang mga kamatuoran nga makatabang nila nga mas masabtan ang kaimportante sa paggamit sa hustong ngalan sa Simbahan sa Manluluwas.

Gipahayag ni Jesukristo ang ngalan sa Iyang Simbahan

Ipasabot nga human masinati ang grabeng pagpanglutos sa mga kaaway sa Simbahan, ang Propeta Joseph Smith mibiya sa Kirtland, Ohio, niadtong Enero 1838. Siya ug ang iyang pamilya mibalhin sa Missouri, diin nagtukod ang mga Santos og bag-ong kapuy-an nga gitawag og Far West. Wala madugay human sa ilang pagbalhin, nakadawat ang Propeta og pagpadayag diin ang Ginoo naghatag og giya bahin sa pagtukod og Simbahan sa Far West.

Basaha ang Doktrina ug mga Pakigsaad 115:1–4, nga mangita kon unsay gitudlo sa Manluluwas sa mga lider sa Simbahan sa Far West.

• Unsay gitudlo ni Jesukristo bahin sa ngalan sa Iyang Simbahan?

  Kon kinahanglan, tabangi ang mga estudyante sa pag-ila nga gipahayag ni Jesukristo nga ang ngalan sa Iyang Simbahan mao Ang Simbahan ni Jesukristo sa mga Santos sa Ulahing mga Adlaw. Dapita ang mga estudyante nga markahan ang ngalan sa Simbahan ni Kristo diha sa Doktrina ug mga Pakigsaad 115:4.

• Unsay gitudlo kanimo niini nga ngalan bahin sa Simbahan?

• Sa imong hunahuna, nganong gusto ni Jesukristo nga tawgon nato ang Iyang Simbahan sa hustong ngalan niini?

Isip bahin sa inyong panaghisgot sa nag-unang mga pangutana, makatabang tingali ang pagdapit sa mga estudyante nga basahon ang 3 Nephi 27:7–8. Pwede nimong dapiton ang mga estudyante nga ikonektar o i-cross reference kini nga mga bersikulo sa Doktrina ug mga Pakigsaad 115:4.

Ang kaimportante sa paggamit sa hustong ngalan sa Simbahan

Kon posible, hatagi og panahon ang mga estudyante sa pagtuon sa pakigpulong ni Presidente Russell M. Nelson nga “Ang Sakto nga Ngalan sa Simbahan” (Liahona, Nob. 2018, 87–90). Pag-printa og kopya para sa mga estudyante nga walay digital nga akses.

Samtang magtuon ang mga estudyante, dapita silang mangita sa mga pagtulun-an nga makatabang nilang masabtan ang kaimportante sa paggamit sa hustong ngalan sa Simbahan sa Manluluwas. Pwedeng indibidwal nga tun-an sa mga estudyante ang tibuok pakigpulong, o pwede nimong tahasan ang gagmayng mga grupo nga tun-an ang pipila ka bahin niini ug ipakigbahin ang ilang nakat-onan sa klase.

Aron tabangan ang mga estudyante nga hisgotan ang ilang nakat-onan, ikonsiderar ang pagpangutana sa mosunod “Unsay imong nakat-onan bahin sa kon nganong importante sa Langitnong Amahan ug ni Jesukristo nga gamiton ang hustong ngalan sa Simbahan?” o “Unsay mipatigbabaw kanimo sa mensahe ni Presidente Nelson? Ngano man?”

Kon dili posibleng direktang tun-an sa mga estudyante ang pakigpulong, ikonsiderar ang paggamit sa mosunod nga pamahayag.

Gihisgotan ni Presidente Russell M. Nelson ang kaimportante sa paggamit sa hustong ngalan sa Simbahan sa Ginoo:

Ang ngalan sa Simbahan dili mausab. Sa dihang ang Manluluwas klaro nga namahayag unsay ngalan sa Iyang Simbahan ug gani giunhan ang Iyang pamahayag sa, “Kay sa ingon ang akong simbahan pagatawgon,” Siya seryoso. …

Minahal kong mga kaigsoonan, mosaad ko kaninyo nga kon buhaton nato ang atong pinakamaayo sa pagpahiuli sa hustong ngalan sa Simbahan sa Ginoo, Siya kansang Simbahan mao kini ang mobu-bu sa Iyang gahom ug mga panalangin diha sa mga ulo sa mga Santos sa Ulahing mga Adlaw, sa mga paagi nga wala nato makita sukad. Makabaton kita sa kahibalo ug gahom sa Dios aron matabangan kita sa pagdala sa mga panalangin sa gipahiuli nga ebanghelyo ni Jesukristo ngadto sa matag nasod, kaliwatan, pinulongan, ug katawhan ug sa pag-andam sa kalibotan alang sa Ikaduhang Pag-anhi sa Ginoo. (Russell M. Nelson, “Ang Sakto nga Ngalan sa Simbahan,” Liahona, Nob. 2018, 87, 89)

• Unsang mga panalangin ang gisaad ni Presidente Nelson dihang gamiton nato ang hustong ngalan sa Simbahan ni Jesukristo?

“Tindog ug pakita”

Basaha ang Doktrina ug mga Pakigsaad 115:5-6, nga mangita kon sa unsang paagi gitinguha sa Ginoo nga panalanginan ang katawhan sa kalibotan pinaagi sa Iyang Simbahan.

Aron matabangan ang mga estudyante nga masabtan ang mga pagdapit sa Ginoo, ikonsiderar ang paggahin og panahon sa pag-analisar sa importanteng mga pulong o hugpong sa mga pulong. Pananglitan, pwede nimong hangyoon ang mga estudyante nga idrowing o idramadrama ang hugpong sa mga pulong nga “tindog ug pakita” (bersikulo 5). Makatabang tingali sa mga estudyante nga masabtan nga ang pulong sukaranan nga gigamit sa bersikulo 5 nagpasabot sa usa ka ensign, nga maoy “usa ka bandila… diin magkahiusang magpundok ang mga katawhan alang sa usa ka katuyoan o pagkatawo” (Giya ngadto sa mga Kasulatan, “Ensign,” scriptures.ChurchofJesusChrist.org).

• Sa unsang paagi ang paggamit sa hustong ngalan sa Simbahan sa Ginoo makatabang nato sa pagpasidungog sa mga pagdapit sa Ginoo diha sa mga bersikulo 5–6?

• Sa unsang paagi ikaw o usa ka miyembro sa pamilya nahimong kahayag ngadto uban pinaagi sa paggamit sa hustong ngalan sa Simbahan sa Manluluwas?

Isip kabahin sa inyong panaghisgot sa nag-unang pangutana, ikonsiderar ang pagpakigbahin sa mosunod nga kasinatian, sa mubo nga pagpasabot ni Elder Neil L. Andersen.

Gipakigbahin ni Elder Neil L. Andersen sa Korum sa Napulog Duha ka Apostoles ang usa sa daghang mga kasinatian sa mga tawo sa tibuok kalibotan:

Adunay liboan ug liboan nga mga Santos sa Ulahing mga Adlaw kinsa maisogon nga nagpahayag sa ngalan sa Simbahan. Kon atong buhaton ang atong bahin, ang uban mosunod. Ganahan ko niini nga istorya gikan sa Tahiti.

Ang diyes anyos nga si Iriura Jean mihukom sa pagsunod sa tambag ni Presidente Nelson.

“Diha sa iyang klase sa eskwelahan naghisgot sila sa ilang kataposan sa semana … ug si Iriura misulti bahin sa … simbahan.

“Ang iyang titser, si Vaite Pifao, miingon, ‘Uy, Mormon diay ka?’

“Si Iriura maisugon nga mipahayag, ‘Dili … ako usa ka miyembro sa Ang Simbahan ni Jesukristo sa mga Santos sa Ulahing mga Adlaw!’

“Ang iyang titser mitubag, ‘Oo, … ikaw usa ka Mormon.’

“Si Iriura mi-insister, ‘Dili titser, ako usa ka miyembro sa Ang Simbahan ni Jesukristo sa mga Santos sa Ulahing mga Adlaw!’

“Si Ms. Pifao nahingangha sa pagtuo ni Iriura ug natingala ngano nga siya mi-insister sa paggamit [sa] taas nga ngalan sa iyang simbahan. [Siya mihukom sa pagkat-on og dugang mahitungod sa Simbahan.]

“[Sa kaulahian, samtang si Sister] Vaite Pifao nabunyagan [siya nagpahayag og pasalamat] nga si Iriura naminaw sa tambag ni Presidente Nelson.” (Neil L. Andersen, “Ang Ngalan sa Simbahan Dili Mausab,” Liahona, Nob. 2021, 118–19)

Pagsukna og mga pangutana nga nag-aghat og pagdiskobre: Aron tabangan kang magpraktis sa pagsukna og mga pangutana nga makatabang sa mga estudyante nga makaplagan ang mga kamatuoran, tan-awa ang pagbansay nga nag-ulohan og “Paghimo og mga pangutana nga makadasig sa pagsiksik nga dili limitado ang tubag nga makatabang sa mga tigkat-on sa pagdiskobre sa mga doktrina ug mga baroganan sa ebanghelyo sa ilang kaugalingon ug ayaw giyahi ang mga estudyante ngadto sa usa ka piho nga tubag.” sa Pagpalambo sa mga Kahanas sa Magtutudlo: Itudlo ang Doktrina.

• Unsay nagpatigbabaw kanimo niini nga kasinatian?

• Unsay imong nakat-onan o gibati karon nga makatabang nimo nga mas masabtan ang Langitnong Amahan ug si Jesukristo?

Pagpamatuod sa mga kamatuoran nga imong nahisgotan. Dasiga ang mga estudyante sa pagtuman sa sugo sa Ginoo nga gamiton ang hustong ngalan sa Simbahan dihang makig-istorya sa uban.

Dugang nga mga Kapanguhaan

Asa ko makakat-on og dugang bahin sa kasaysayan sa mga Santos sa Far West, Missouri?

Para sa dugang impormasyon, tan-awa ang Mga Hisgotanan sa Kasaysayan sa Simbahan, “Far West” (ChurchofJesusChrist.org/study/history/topics).

Unsay atong makat-onan bahin sa Simbahan gikan sa ngalan niini?

Si Presidente M. Russell Ballard sa Korum sa Napulog Duha ka Apostoles mitudlo:

Naghunahuna ko sa makadaghan nganong ang Manluluwas mihatag sa siyam ka pulong nga pangalan sa Iyang gipahiuli nga Simbahan. Kini ingon og taas, apan kon atong hunahunaon kini isip usa ka paghulagway sa kinatibuk-ang pagsabot kon unsa ang Simbahan, kini sa laktod mahimo sa katingalahang paagi nga mubo, klaro, ug diretso. Unsa pa nga paghulagway ang mas direkta ug klaro ug gani gipahayag sa ingon ka diyutay nga mga pulong?

Ang matag pulong naghatag og katin-awan. Ang pulong nga Ang nagpasabot sa pagkatalagsaon nga kahimtang sa gipahiuli nga Simbahan taliwala sa mga relihiyon sa kalibotan.

Ang mga pulong nga Simbahan ni Jesukristo nagpahayag nga kini Iyang Simbahan. …

Sa Ulahing mga Adlaw nagpasabot nga pareho ra kini nga Simbahan sa Simbahan nga gitukod ni Jesukristo atol sa Iyang mortal nga pangalagad apan gipahiuli niining ulahing mga adlaw. …

Ang Santos …dayag nga mao kadtong naningkamot sa paghimo sa ilang kinabuhi nga balaan pinaagi sa pagpakigsaad sa pagsunod kang Kristo. (M. Russell Ballard, “Ang Importansya sa Pangalan,” Liahona, Nob. 2011, 80)

Nganong importante nga gamiton nato ang ngalan ni Jesukristo dihang maghisgot bahin sa Iyang Simbahan?

Si Presidente Russell M. Nelson miingon bahin sa paggamit sa ngalan ni Jesukristo:

Kon kuhaon nato ang Iyang ngalan gikan sa Iyang Simbahan, wala nato tuyoa ang pagkuha Kaniya nga mao ang sentro nga gitutokan sa atong kinabuhi.

Ang pagdala sa ngalan sa Manluluwas diha kanato naglakip sa pagpahayag ug pagsaksi ngadto sa uban—pinaagi sa atong mga lihok ug sa atong mga pulong—nga si Jesus mao ang Kristo. …

Kon kita isip katawhan ug indibidwal gustong makagamit sa gahom sa Pag-ula ni Jesukristo—sa paglimpyo ug pag-ayo kanato, sa paglig-on ug pagpalambo nato, ug sa kataposan sa paghimaya kanato—kinahanglan nga atong klarohon ang pag-ila Kaniya isip ang tinubdan niana nga gahom. Makasugod kita pinaagi sa pagtawag sa Iyang Simbahan sa ngalan nga Iyang gihatag. (Russell M. Nelson, “Ang Sakto nga Ngalan sa Simbahan,” Liahona, Nob. 2018, 88)

Sa unsang paagi panalanginan sa Ginoo kadtong naningkamot sa paggamit sa hustong ngalan sa Iyang Simbahan?

Ang mosunod maoy mga ehemplo kon sa unsang paagi gipanalanginan ang mga indibiduwal pinaagi sa paggamit sa hustong ngalan sa Simbahan.

Gipakigbahin ni Elder Neil L. Andersen ang kasinatian ni Brother Lauri Ahola:

Gipakigbahin ni Presidente Russell M. Nelson ang kasinatian ni Elder Benjamín De Hoyos:

Dugang nga mga Kalihokan sa Pagkat-on

Unsay anaa sa usa ka ngalan?

Ang usa ka paagi sa pagsugod sa leksiyon bahin sa ngalan sa Simbahan sa Ginoo mao ang paghisgot og una bahin sa mga ngalan sa ubang organisasyon. Pwede nimong ipakita ang mosunod nga mga pangutana ug hisgotan ang mga ngalan ug mga logo sa daghang nahiangayng kompanya nga pamilyar tingali sa mga estudyante.

• Unsa ang gipasabot sa ngalan sa organisasyon?

• Kinsa ang nangulo sa organisasyon?

• Unsay buluhaton sa organisasyon?

Human mahisgoti kadiyot ang lainlaing mga organisayon, ipakita ang logo sa Simbahan ug hisgoti sa klase ang samang mga pangutana.

Pagdrama-drama [role-play]

Dapita ang mga estudyante nga handurawon nga gipangutana sila og “Mormon ka?” o “Miyembro ka sa Simbahan sa Mormon?” Hatagi silag higayon nga makapraktis sa pagtubag sa usa o duha niini nga mga pangutana uban sa ilang kapares o sa gamayng grupo.

Doktrina ug mga Pakigsaad 115:5. “Usa ka sukaranan alang sa tanan nga mga nasod”

Human mabasa ug mahisgotan ang Doktrina ug mga Pakigsaad 115:5, pwede nimong dapiton ang mga estudyante sa pagpamalandong kon kinsay makabenepisyo sa ilang mga ehemplo ingong mga miyembro sa gipahiuli nga Simbahan sa Ginoo. Dapita ang mga estudyante sa paghimo og bandila, o sukaranan, nga nagrepresentar sa mga butang nga kaya nilang himoon aron mahimong kahayag, o ehemplo, sa uban.

Doktrina ug mga Pakigsaad 116. Adam-ondi-Ahman

Ikonsiderar ang pagbasa sa Doktrina ug mga Pakigsaad 115:18 uban sa mga estudyante ug ipasabot nga human mibalhin si Joseph Smith sa Far West, Missouri, siya ug ang grupo sa mga lider sa Simbahan nakakitag o nindot nga lugar. Dayon hangyoa ang mga estudyante nga basahon ang Doktrina ug mga Pakigsaad 116 aron makakat-on kon unsay gipadayag sa Ginoo bahin sa lugar nga nailhan nga Spring Hill, Missouri.

Pwede nimong dapiton ang mga estudyante nga tan-awon ang mapa ug litrato sa Adam-ondi-Ahman diha sa ilang mga kasulatan (tan-awa ang Mga Mapa sa Kasaysayan sa Simbahan, num. 5, “Ang Missouri, Illinois, ug Iowa Area sa USA”; Mga Litrato sa Kasaysayan sa Simbahan, num. 10, “Adam-ondi-Ahman”).

Makatabang usab tingali sa mga estudyante ang pagkahibalo nga ang Adam-ondi-Ahman mao ang lokasyon sa umaabot nga katumanan sa usa ka panagna nga dugay nang gipanagna ni propeta Daniel (tan-awa ang Daniel 7:9–10, 13–14). Kana nga panagna naghulagway sa usa ka panghitabo sa ulahing mga adlaw diin ang Manluluwas ug si Adan mobisita sa yuta ug modumala sa usa ka panagtigom sa dili pa ang Ikaduhang Pag-anhi ni Jesukristo sa tibuok kalibotan (tana-awa sa Doktrina ug mga Pakigsaad 27:5–14).

Dihang mahibaloan na sa mga estudyante ang kaimportante sa lugar, ikonsiderar ang pagdapit kanila sa pagkanta sa himno nga “Adam-ondi-Ahman” (Hymns, no. 49).