“Lesson 131—Doktrina at mga Tipan 121–123: ‘Kapayapaan ay Mapasaiyong Kaluluwa,’” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 121–123,” Manwal ng Titser ng Seminary para sa Doktrina at mga Tipan
Lesson 131: Doktrina at mga Tipan 121–123
Doktrina at mga Tipan 121–123
“Kapayapaan ay Mapasaiyong Kaluluwa”
Matapos ipagkanulo at dakpin dahil sa mga maling paratang, ibinilanggo si Propetang Joseph Smith at ang iba pang mga lider ng Simbahan sa isang maliit na piitan sa Liberty, Missouri. Noong taglamig ng 1838–39, ang mga Banal sa Missouri ay nakaranas ng matitinding kalagayan at labis na nagdusa. Sa gitna ng pagdurusang ito, pinanatag sila ng Panginoon sa pagbibigay ng mahabaging payo at kaalaman mula sa langit. Ang lesson na ito ay makatutulong sa mga estudyante na maunawaan kung paano tayo matutulungan ng Diyos sa ating mga pagsubok.
Mga Posibleng Aktibidad sa Pag-aaral
“O Diyos, nasaan kayo?”
Bago simulan ang klase, maaari mong idispley ang mga sumusunod na tanong para makita ng mga estudyante pagdating nila. Kapag nagsimula na ang klase, anyayahan ang mga estudyante na magbahagi ng mga makatotohanang sitwasyon na maaaring humantong sa pagtatanong ng isang tao ng mga bagay na tulad nito.
-
“O Diyos, nasaan kayo?” (Doktrina at mga Tipan 121:1)
-
“O Panginoon, hanggang kailan [kami] magdurusa sa mga kaapihang ito … ?”” (Doktrina at mga Tipan 121:3)
Pagkatapos magbahagi ng mga estudyante, anyayahan silang pagnilayan ang mga hamon na kasalukuyang kinakaharap nila o ng kanilang mga mahal sa buhay. Hikayatin ang mga estudyante na itala ang anumang naiisip o nadarama nila tungkol sa kanilang mga pagsubok, kabilang na kung mayroon silang mga tanong na tulad ng mga nakasaad sa pisara.
Habang ipinagpapatuloy ng mga estudyante ang kanilang pag-aaral, hikayatin silang anyayahan ang Espiritu Santo na tulungan silang matukoy ang mga banal na alituntunin na makapagbibigay ng personal na kapayapaan at kapanatagan sa panahon ng kanilang mga pagsubok.
Konteksto ng kasaysayan
Upang matulungan ang mga estudyante na maunawaan ang konteksto ng kasaysayan ng mga bahaging pag-aaralan nila, maaari mong ipanood ang video na “Mga Aral mula sa Liberty Jail” ni Elder Jeffrey R. Holland ng Korum ng Labindalawang Apostol, na makikita sa ChurchofJesusChrist.org, mula sa time code na 3:00 hanggang 8:49. Ang pagpapakita ng mga larawan ng Liberty Jail ay makatutulong sa mga estudyante na maunawaan kung ano ang pinagdaanan ni Joseph Smith at ng iba pang mga bilanggo.
Bilang alternatibo, maaari mong hatiin ang klase sa mga grupo na may tig-tatatlong estudyante at bigyan ang bawat estudyante sa grupo ng isa sa mga sumusunod na buod. Anyayahan silang magsalitang basahin ang kanilang mga buod at ibahagi kung ano ang maaaring naiisip o nadarama nila kung nalagay sila sa mga katulad na sitwasyon.
Buod 1: Noong Oktubre 31, 1838, ipinagkanulo ni George Hinkle, isang miyembro ng Simbahan at isang koronel sa militia ng estado ng Missouri, si Propetang Joseph Smith. Sinabi ni Hinkle kay Joseph na gusto ng mga miyembro ng militia ng Missouri, na sumalakay sa mga Banal sa Far West, Missouri, na makipagkita at makipagkasundo para sa kapayapaan. Pagdating ni Joseph at ng iba pang mga lider ng Simbahan para makipag-usap, puwersahan silang dinakip ng militia bilang mga bilanggo ng digmaan.
Buod 2: Sa sumunod na buwan, si Joseph at ang kanyang mga kasamahan ay pinagmalupitan at inilipat sa iba’t ibang piitan habang hinihintay nila ang paglilitis na batay sa mga maling paratang. Noong Disyembre 1, 1838, ibinilanggo ang mga kalalakihan sa isang maliit na piitan sa Liberty, Missouri. Sa sumunod na apat na buwan, si Joseph Smith, kanyang kapatid na si Hyrum, sina Alexander McRae, Lyman Wight, at Caleb Baldwin ay ikinulong sa ibabang piitan ng Liberty Jail sa panahon ng napakatinding taglamig. Nakasama rin nila si Sidney Rigdon nang panandalian, ngunit pinahintulutan siya ng isang hukom na makalaya noong huling bahagi ng Enero ng 1839.
Buod 3: Ang mga sukat ng silid ng piitan ay tinatayang nasa 14 na talampakan ang haba at 14 na talampakan ang lapad (4.3 metro ang haba at 4.3 metro ang lapad), at ang kisame ay nasa pagitan ng 6 at 6.5 talampakan ang taas (sa pagitan ng 1.8 at 2 metro). Ang tanging pinanggagalingan ng likas na liwanag o sariwang hangin ay ang dalawang maliit na bintanang may harang na malapit sa kisame. Mula sa labas ng mga bintanang ito, madalas na kinukutya at iniinsulto ng mga tao ang mga bilanggo. Napilitan ang mga kalalakihan na matulog sa sahig na mayroon lamang kaunti at maruming dayami na pangsapin at may napakakaunting proteksyon laban sa lamig. Ang piitan ay may isang timba para sa dumi ng tao, at ang kakarampot na pagkain na ibinibigay ay labis na nakasusuklam at nagagawa lang kainin ng mga kalalakihan dahil sa labis na pagkagutom. Kung minsan, may lason pa ang pagkain. Lubhang nangulila ang mga bilanggo sa kanilang mga kaibigan at pamilya at nakadama ng matinding kalungkutan nang marinig nila ang tungkol sa mga nagdurusang Banal na itinaboy mula sa Missouri noong panahon ng taglamig.
Maaari mong banggitin na ang Doktrina at mga Tipan 121–123 ay naglalaman ng mga piling bahagi ng isang liham para sa mga Banal mula kay Propetang Joseph. Isinulat niya ito noong malapit nang matapos ang kanyang pagkabilanggo sa Liberty Jail pagkaraan ng ilang buwang pagdurusa. Kabilang sa liham ang ilan sa mga mapanalanging kahilingan ni Joseph at ang mapagmahal na payo ng Tagapagligtas.
Mga Aral mula sa Liberty Jail
Basahin ang Doktrina at mga Tipan 121:1–6, at alamin ang mga tanong at pagsamong inihayag ni Joseph Smith sa Panginoon.
Tulungan ang mga mag-aaral na iugnay ang mga banal na kasulatan sa kanilang buhay: Ang mga sumusunod na tanong ay halimbawa ng pagtulong sa mga estudyante na maiugnay ang natututuhan nila sa kanilang sariling buhay. Para sa higit pang pagsasanay sa kung paano ito gawin, tingnan ang training na may pamagat na “Maghanda ng mga Paanyaya at Pahiwatig na Tutulong sa mga Estudyante na Makahanap ng Personal na Kaugnayan sa isang Scripture Block,” na makikita sa Mga Kasanayan para sa Pag-unlad ng Guro: Ituro ang Doktrina.
-
Aling mga tanong o pagsamo mula kay Joseph Smith ang nakakaugnay sa inyo?
-
Paano ipinakita ng mga salita ni Joseph Smith ang kanyang pananampalataya at pagpipitagan sa Diyos?
Maaari mong anyayahan ang mga estudyante na lagyan ng pamagat na “Mga Aral mula sa Liberty Jail” ang isang blangkong pahina sa kanilang journal. Habang pinag-aaralan nila ang sagot ng Diyos sa mga panalangin ni Joseph, hikayatin silang gumawa ng listahan ng mga katotohanang natuklasan nila.
Basahin ang Doktrina at mga Tipan 121:7–9, 26, 33; 123:17, at alamin ang payo mula sa Diyos na makatutulong sa isang tao sa panahon ng isang mahirap na pagsubok.
Kapag tapos nang maglista ng mga katotohanan ang mga miyembro ng klase, imungkahi na pumili sila ng dalawang pinakagusto nila mula sa mga ito at isulat ang mga ito sa magkahiwalay na papel. Sabihin sa mga estudyante na makipagpalitan ng papel sa katabi nila. Sabihin sa mga estudyante na bilugan ang isang paboritong salita o parirala sa mga papel na natanggap nila at sumulat ng maikling paglalarawan kung bakit gusto nila ito. Maaaring ulitin ang prosesong ito nang maraming beses sa iba’t ibang estudyante. Kapag naibalik na sa mga estudyante ang kanilang sariling papel, hikayatin silang magdagdag ng mga ideya na natutuhan nila mula sa iba sa mga pahina ng kanilang study journal.
Magtawag ng ilang estudyante para magsulat sa pisara ng isang katotohanan mula sa kanilang listahan. Ang sumusunod ay mga halimbawa ng mga alintuntuning maibabahagi nila: Sa walang hanggang plano ng Diyos, ang mga pagsubok sa matwid ay maikling sandali lamang; kung titiisin natin nang mabuti ang ating mga pagsubok, dadakilain tayo ng Diyos sa itaas; Bibigyan tayo ng Diyos ng kapayapaan sa gitna ng ating mga pagsubok. Maaari kang magtanong ng ilang tanong na tatalakayin tulad ng sumusunod.
-
Kung kayo ang nasa Liberty Jail, aling alituntunin ang lubos na makapapanatag sa inyo? Bakit?
-
Sa paanong mga paraan kayo pinagpala ng Diyos ng kapayapaan at kapanatagan sa panahon ng pagsubok?
-
Sa inyong palagay, ano ang pagkakaiba ng pagtitiisan ang pagsubok at pagtitiisang mabuti ang pagsubok?
-
Ano ang matututuhan natin mula sa kung paano tiniis ni Jesucristo ang Kanyang sariling mga pagsubok at paghihirap?
Upang matulungan ang mga estudyante na mas maunawaan kung paano sila matutulungan ng Diyos sa mahihirap na pagsubok, maaari mong ibahagi ang sumusunod na pahayag ni Elder Jeffrey R. Holland ng Korum ng Labindalawang Apostol.
Itinuro ni Elder Jeffrey R. Holland ng Korum ng Labindalawang Apostol:
Itinuturo sa atin ng mga aral noong taglamig ng 1838–39 na ang bawat pagsubok ay maaaring maging nakapagliligtas na karanasan kung mananatili tayong tapat sa ating Ama sa Langit sa kabila ng pagsubok na iyon. Itinuturo sa atin ng matitinding aral na ito na ang sukdulang paghihirap ng tao ay ang pagkakataon ng Diyos, at kung tayo ay magpapakumbaba at tapat, kung tayo ay mananalig at hindi sisisihin ang Diyos sa ating mga problema, ang di-makatarungan at di-makatao at nakakapanghinang mga piitan ng ating buhay ay gagawin Niya na … isang kalagayang maghahatid ng kapanatagan at paghahayag, banal na patnubay at kapayapaan. (Jeffrey R. Holland, “Lessons from Liberty Jail,” Ensign, Set. 2009, 28)
-
Paano ninyo nakita ang katotohanan ng pahayag ni Elder Holland sa inyong buhay o sa buhay ng isang taong kilala ninyo?
Bilang pagtatapos, sabihin sa mga estudyante na kumpletuhin ang sumusunod sa kanilang study journal. Maaari mong ipabahagi sa ilang boluntaryo ang isinulat nila.
Isipin ang mga hamong pinag-isipan ninyo sa simula ng lesson. Pumili ng kahit isang katotohanan lang mula sa inyong listahan ng “Mga Aral mula sa Liberty Jail” na makatutulong sa inyo o sa iba na may pagsubok sa kasalukuyan. Maikling ipaliwanag kung paano kayo maaaring pagpalain at palakasin ng Panginoon dahil sa pagkilos nang may pananampalataya sa katotohanang ito.