Lesson 133: Doktrina at mga Tipan 121–123

Doktrina at mga Tipan 122

“Ang Lahat ng Bagay na Ito Ay … para sa Iyong Ikabubuti”

Habang nagdurusa si Propetang Joseph Smith sa Liberty Jail, itinuro sa kanya ng Diyos na bagama’t matindi at masakit ang kanyang pagdurusa, tutulungan siya nitong maging higit na katulad ni Cristo. Ang lesson na ito ay makatutulong sa mga estudyante na maunawaan na dahil kay Jesucristo, kahit ang mahihirap na karanasan ay makatutulong sa atin na umunlad at maging higit na katulad Niya.

Mga Posibleng Aktibidad sa Pag-aaral

Napatibay sa pamamagitan ng paghihirap

Maaari mong ipakita ang mga sumusunod na larawan ng magagaspang at makikinis na bato. Bilang alternatibo, maaari kang magdala ng magagaspang na bato at makikinis na bato upang makita at mahawakan ng mga estudyante.

• Ano ang kailangan para maging makinis ang magagaspang na bato?

Maaari mong ipaliwanag na ang mga bato ay maaaring maging makinis sa pamamagitan ng pagkiskis at pagkaskas sa iba pang bato o buhangin nang napakaraming beses. Pinakikinis ng prosesong ito ang mga gilid ng mga bato at inilalabas ang mas tunay at natural na mga kulay ng mga ito.

Ibinahagi ni Propetang Joseph Smith ang sumusunod tungkol sa kanyang sarili:

“Ako ay tulad ng isang malaki, at magaspang na bato na gumulong mula sa isang mataas na bundok, at ang tanging pagpapakinis na natatanggap ko ay kapag may bagay na bumabangga sa akin, na tumatama sa akin nang malakas … ; … pinakikinis ang isang bahagi rito at doon; kaya nga ako’y naging makinis at makintab na palaso sa suksukan ng Pinakamakapangyarihan. (Joseph Smith, in History, 1838–1856 [Manuscript History of the Church], tomo D-1, 1556, josephsmithpapers.org)

• Anong mga paghihirap ang maiisip ninyo mula sa buhay ni Joseph Smith na maaaring nakatulong sa kanya na maging mas mabuting kasangkapan sa mga kamay ng Panginoon?

Habang nag-aaral kayo ngayon, isipin kung bakit hinahayaan kayo ng ating mapagmahal na Ama sa Langit na makaranas ng matitinding pagsubok. Pagnilayan kung paano kayo matutulungan ng Tagapagligtas na maging higit na katulad Niya sa pamamagitan ng mga paghihirap at pagdurusang maaari ninyong maranasan sa inyong buhay.

Maaaring para sa ating ikabubuti ang mga paghihirap

Noong taglamig ng 1838–39, si Joseph Smith at iba pang mga lider ng Simbahan ay hindi makatarungang ibinilanggo sa Liberty Jail at dumanas ng matitinding paghihirap. Bilang bahagi ng liham para sa mga nagdurusang Banal, isinama ni Joseph ang mga katotohanang inihayag sa kanya ng Diyos tungkol sa pagdurusang nararanasan niya.

Maaari mong anyayahan ang mga estudyante na basahin at talakayin sa maliliit na grupo ang natutuhan nila mula sa mga talata sa ibaba. Kung kinakailangan, maaari kang makahikayat ng mga talakayan sa grupo gamit ang mga tanong na tulad ng mga ito:

• Anong mga katotohanan ang nakikita ninyong itinuturo ng Diyos kay Joseph sa mga talatang ito?

• Bakit maaaring maging mahirap na marinig ang gayong mga katotohanan kapag dumaranas ng pagsubok?

• Bakit maaaring maging isang pagpapala na marinig ang gayong mga katotohanan sa panahon ng paghihirap?

Basahin ang Doktrina at mga Tipan 122:5–7, at alamin kung ano ang ninais ng Diyos na maunawaan ni Joseph tungkol sa mga pagsubok na kailangan niyang tiisin sa kanyang buhay.

Pagkatapos magkaroon ang mga grupo ng pagkakataong mag-usap, maaari mong anyayahan ang isang kinatawan mula sa bawat grupo na magbahagi ng isang katotohanang natutuhan nila. Kung kinakailangan, tulungan ang mga estudyante na makatukoy ng katotohanang tulad ng sumusunod: Hinahayaan tayo ng Diyos na dumanas ng mga paghihirap dahil alam Niya na mabibigyan tayo ng mga ito ng karanasan at magiging para sa ating ikabubuti.

• Ano sa palagay ninyo ang ibig sabihin ng maaaring magbigay sa atin ng “karanasan“ at maging “para sa [ating] ikabubuti“ ang mga paghihirap? (talata 7).

• Paano nauugnay ang katotohanang ito sa magagaspang at makikinis na bato mula sa simula ng lesson?

  Maaari mong isulat sa pisara ang pariralang “Kung kailangan mong magtiis …”. Pagkatapos ay ilista ang mga sagot ng mga estudyante sa mga sumusunod na tanong:

• Anong mga paghihirap ang kinakaharap ng maraming tinedyer ngayon?

• Bakit mahalaga sa mga sitwasyong ito na maunawaan ang itinuro ng Diyos kay Propetang Joseph Smith?

  Ang susunod na tanong ay maaaring maging isang natatanging pagkakataon para makapag-isip, makapagbahagi, at makarinig ang mga estudyante ng mga karanasan ng iba. Maaari kang mag-ukol ng sapat na oras upang maraming boluntaryo ang makasagot.

• Kailan kayo nakaranas o ang isang mahal ninyo sa buhay ng paghihirap na kalaunan ay naging isang pagpapala?

• Ano ang posibleng kailanganing gawin ng isang tao upang ang kanyang paghihirap ay makapagbigay sa kanya ng karanasan at maging para sa kanyang ikabubuti?

Para makakita ng halimbawa ng isang tinedyer na natutuhan na hinahayaan tayo ng Diyos na dumanas ng mga paghihirap para sa ating karanasan at ikabubuti, maaari mong ipanood ang video na “Faith Murray’s Story: Overcoming Adversity through Service” (4:52), na makikita sa ChurchofJesusChrist.org.

Faith Murray's Story: Overcoming Adversity Through Service

While she was struggling with CRMO (Chronic recurrent multifocal osteomyelitis), Faith found motivation in helping other people. We can feel love of God when we serve in ways they want us to.

Pag-alaala kay Jesucristo sa panahon ng ating mga paghihirap

Upang matulungan ang mga estudyante na mapag-isipan ang natatanging kakayahan ng Tagapagligtas na maunawaan at matulungan sila habang dumaranas sila ng paghihirap, maaari mo silang anyayahang kumpletuhin nang mag-isa ang handout na “Pag-alaala kay Jesucristo sa Panahon ng Ating mga Paghihirap.” Maaari itong maging isang magandang pagkakataon upang maanyayahan ng mga estudyante ang Espiritu Santo habang sila ay tahimik na nag-aaral, nagninilay, at nagsusulat.

Pag-alaala kay Jesucristo sa Panahon ng Ating mga Paghihirap

Basahin ang Doktrina at mga Tipan 122:8–9 at subukang isipin na kunwari ay direktang nakikipag-usap ang Diyos sa iyo tungkol sa mga sitwasyong kinahaharap mo at ng pamilya mo. Markahan ang mga pariralang itinuro Niya na mahalagang marinig mo. Maaari mong isulat ang mga naiisip at nadarama mo sa iyong study journal o sa mga banal na kasulatan.

Basahin ang Alma 7:11–12 at ang sumusunod na pahayag ni Pangulong Henry B. Eyring ng Unang Panguluhan. Isulat ang itinuturo ng mga ito tungkol sa Tagapagligtas na tumutulong sa iyo na mas maunawaan ang Doktrina at mga Tipan 122:8–9.

Kapag iniisip ninyo kung gaano kasakit ang makakaya ninyong pagtiisang mabuti, alalahanin Siya. Pinagdusahan Niya ang pinagdurusahan ninyo upang malaman Niya kung paano kayo maiaangat. Maaaring hindi Niya alisin ang inyong pasanin, pero bibigyan Niya kayo ng lakas, kapanatagan, at pag-asa. Alam Niya ang daan. Ininom Niya ang mapait na saro. Tiniis Niya ang pagdurusa ng lahat.

Kayo ay binubusog at pinapanatag ng isang mapagmahal na Tagapagligtas, na nakaaalam kung paano kayo matutulungan sa anumang mga pagsubok na inyong nararanasan. (Henry B. Eyring, “Sinubok, Napatunayan, at Pinino,” Liahona, Nob. 2020, 97)

• Paano makatutulong sa iyo sa panahon ng iyong mga pagsubok na si Jesucristo ay “nagpakababa-baba sa kanilang lahat”? (Doktrina at mga Tipan 122:8). Sa iyong palagay, bakit Niya ginawa iyon?

• Anong iba pang mga banal na kasulatan ang naging makabuluhan sa iyo nang dumanas ka ng mga paghihirap?

Bigyan ng oras ang mga estudyante na ibahagi sa isang kapartner o sa klase ang natutuhan nila. Hikayatin sila na magbahagi ng anumang banal na kasulatan na naging makabuluhan sa kanila nang makaranas sila ng mga paghihirap.

Maaari mong anyayahan ang mga estudyante na pagnilayang muli kung paano sila hinuhubog ng kanilang mga pagsubok o paghihirap. Anyayahan silang pag-isipan ang sumusunod na tanong:

• Ano ang natutuhan o nadama ninyo ngayon tungkol kay Jesucristo na makatutulong sa inyo habang nararanasan ninyo ang mga paghihirap?

Maaari mong tapusin ang lesson sa pagpapatotoo na sa pamamagitan ni Jesucristo, lahat ng ating paghihirap ay makapagbibigay sa atin ng karanasan at magiging para sa ating ikabubuti.

Karagdagang Resources

Paano tayo maaaring makinabang sa lahat ng ating pagdurusa?

Itinuro ni Elder Neil L. Andersen ng Korum ng Labindalawang Apostol:

Sugatan

Hinikayat ni Elder Andersen ang mga nagdaranas ng pisikal o espirituwal na mga sugat na lakasan ang kanilang pananampalataya kay Jesucristo at hangarin ang Kanyang nagpapagaling na kapangyarihan.

Mga kapatid, ipinapangako ko sa inyo na ang pagpapalakas ng inyong pananampalataya sa Panginoong Jesucristo ay magbibigay sa inyo ng dagdag na katatagan at pag-asa. Para sa inyo, na matwid, ang Manggagamot ng ating kaluluwa, sa Kanyang panahon at paraan, ay pagagalingin ang lahat ng inyong sugat. Walang kaapihan, walang pag-uusig, walang pagsubok, walang kalungkutan, walang pighati, walang pagdurusa, walang sugat—gaano man kalalim, gaano man kalawak, gaano man kasakit—na hindi bibigyan ng kapanatagan, kapayapaan, at walang-hanggang pag-asa Niya na ang bukas na mga bisig at sugatang mga kamay ay tatanggapin tayo sa Kanyang kinaroroonan. Sa araw na iyon, pagpapatotoo ni Apostol Juan, ang matwid na “[nanggagaling] sa malaking kapighatian”[Apocalipsis 7:14] ay tatayo na “nangadaramtan ng mapuputing damit … sa harapan ng luklukan ng Diyos.” Ang Cordero ay “lulukuban sila … at papahirin ng Dios ang bawa’t luha ng kanilang mga mata.” [tingnan sa Apocalipsis 7:13, 15, 17]. Darating ang araw na ito. Pinatototohanan ko ito sa pangalan ni Jesucristo, amen. (Neil L. Andersen, “Sugatan,” Liahona, Nob. 2018, 86)

Sinabi ni Elder Gary E. Stevenson ng Korum ng Labindalawang Apostol:

Labis na Pinagpala ng Panginoon

Itinuro ni Elder Stevenson na bagama’t mahaharap tayo sa kabiguan at pagdurusa, maaari nating malaman na tayo ay labis na pinagpala ng Panginoon.

Mga kapatid, naniniwala ako na balang-araw, gugunitain ng bawat isa sa inyo ang nakanselang mga kaganapan, ang kalungkutan, kabiguan, at kalumbayang dulot ng mahihirap na panahon na pinagdaraanan natin upang makita na dinaig ito ng mga piling pagpapala at ibayong pananampalataya at mga patotoo. Naniniwala ako na sa buhay na ito, at sa kabilang-buhay, ang inyong mga pagdurusa, … inyong Liberty Jail, ay ilalaan para sa inyong kapakinabangan. Dalangin ko, kasama ni Nephi, na matanggap natin ang mga pagdurusa sa pagdaan ng ating panahon habang napapansin natin na tayo ay labis na pinagpapala ng Panginoon.

… [Si] Jesucristo na nagdanas mismo ng pagdurusa at bilang bahagi ng Kanyang walang-hanggang Pagbabayad-sala ay nagpakababa-baba sa lahat ng bagay. Nauunawaan Niya ang ating pighati, pasakit, at kawalang-pag-asa. Siya ang ating Tagapagligtas, ating Manunubos, ating pag-asa, ating aliw, at ating Tagasagip. (Gary E. Stevenson, “Labis na Pinagpala ng Panginoon,” Liahona, Nob. 2020, 105)

Bakit ang pagdurusa ay kinakailangang bahagi ng mortalidad?

Ibinahagi ni Pangulong Henry B. Eyring ng Unang Panguluhan:

Sinubok, Napatunayan, at Pinino

Itinuro ni Pangulong Eyring na ang matapat na pagtitiis sa mga pagsubok ng buhay sa lupa ay tutulong sa atin na maging higit na katulad ng Ama sa Langit at ni Jesucristo.

Maaaring makatwiran ninyong pag-isipan kung bakit pinahihintulutan ng mapagmahal at lubos na makapangyarihang Diyos na maging napakahirap ng ating mortal na pagsubok. Ito ay dahil nalalaman Niyang kailangan nating umunlad sa espirituwal na kalinisan at lakas upang magawa nating mamuhay sa Kanyang piling bilang mga pamilya magpakailanman. Upang maging posible ito, binigyan tayo ng Ama sa Langit ng isang Tagapagligtas at ng kapangyarihang pumili para sa ating sarili sa pamamagitan ng pananampalataya na sundin ang Kanyang mga kautusan at magsisi at pagkatapos ay lumapit sa Kanya.

Nakasentro sa plano ng kaligayahan ng Ama ang ating pagiging mas katulad ng Kanyang Bugtong na Anak na si Jesucristo. Sa lahat ng bagay, ang halimbawa ng Tagapagligtas ang ating pinakamainam na gabay. Kinailangan ring patunayan ni Jesucristo ang Kanyang sarili. Nagtiis Siya para sa lahat ng anak ng Ama sa Langit at nagbayad para sa halaga ng lahat ng ating mga kasalanan. Nadama Niya ang pagdurusa ng lahat ng isinilang at isisilang sa mortalidad. (Henry B. Eyring, “Sinubok, Napatunayan, at Pinino,” Liahona, Nob. 2020, 97)

Paano nakahihikayat sa ating katapatan ang pag-alaala sa pagdurusa ng Tagapagligtas?

Itinuro ni Elder Allen D. Haynie ng Pitumpu:

Alalahanin Kung Kanino Tayo Nagtitiwala

Elder Allen D. Haynie's address at the October 2015 General Conference.

Ang mahalaga ay na Si Jesucristo, na Anak ng Diyos, ay nagdusa ng “mga pasakit at hirap at lahat ng uri ng tukso” upang “malaman niya nang ayon sa laman kung paano tutulungan ang kanyang mga tao” [Alma 7:11, 12]. Ang mahalaga ay handa Siyang magpakababa, upang pumarito sa mundong ito at magpakababa “sa lahat ng bagay” [Doktrina at mga Tipan 88:6] at magdanas ng “mas matinding pagsalungat kaysa [sa kayang harapin ng] sinumang tao” [Lectures on Faith, 59]. Ang mahalaga ay nagsumamo si Cristo sa Ama alalang-alang sa atin, sinasabing: Ama, masdan ang mga pagdurusa at ang kamatayan niya na walang ginawang kasalanan, na inyong lubos na kinalulugdan… kaya nga, Ama, iligtas ang mga kapatid kong ito na naniniwala sa aking pangalan, upang sila ay makaparito sa akin at magkaroon ng buhay na walang hanggan” [Doktrina at mga Tipan 45:4–5]. Iyan ang talagang mahalaga at siyang dapat magbigay sa ating lahat ng panibagong pag-asa at determinasyong sumubok pang muli, dahil hindi Niya tayo nalilimutan. (Allen D. Haynie, “Alalahanin Kung Kanino Tayo Nagtitiwala,” Liahona, Nob. 2015, 122–123)

Mga Karagdagang Aktibidad sa Pag-aaral

Mga alituntunin ng pagtatamo ng espirituwal na kaalaman

Upang matulungan ang mga estudyante na higit na mapag-isipan kung paano sila makababaling sa Tagapagligtas upang ang kanilang mga paghihirap ay makapagbigay sa kanila ng karanasan at maging para sa kanilang ikabubuti, maaari mo silang anyayahang basahin ang talata 5–6, 8 ng bahaging “Pagtatamo ng Espirituwal na Kaalaman” ng Doctrinal Mastery Core Document (2023). Maaari mong sabihin sa mga estudyante na maghanap ng mga ideya na makatutulong sa isang tao na nakakaranas ng paghihirap.

Natupad ang propesiya

Ang isang paraan para maituturo mo ang Doktrina at mga Tipan 122:1–4 ay sabihin sa mga estudyante na magbahagi ng mga halimbawa ng mga propesiya sa banal na kasulatan na natupad. Maaaring kabilang sa mga halimbawa ang batong natibag mula sa bundok, hindi sa pamamagitan ng mga kamay at pupunuin ang mundo (tingnan sa Daniel 2:44–45), mga digmaan at alingawngaw ng mga digmaan (tingnan sa Mateo 24:6), ang Digmaang Sibil sa Amerika (Doktrina at mga Tipan 87), at iba pa.

Pagkatapos ay maaari mong ipabasa sa mga estudyante ang Doktrina at mga Tipan 122:1–4, at hanapin ang mga propesiyang nakita nilang natupad sa ating panahon. Maaaring makatulong ang mga sumusunod na tanong:

• Paano pa rin tayo humihingi ng payo, awtoridad, o mga pagpapala mula kay Joseph Smith hanggang ngayon? (talata 2).

• Paano ninyo napansin ang katuparan ng talata 3 sa inyong buhay?

Paghihirap na nakatutulong para sa ating ikabubuti

Ibinahagi ni Elder D. Todd Christofferson ng Korum ng Labindalawang Apostol ang isang kuwento tungkol sa kung paano makatutulong sa atin ang paghihirap na maging katulad ng nais ng Panginoon na kahinatnan natin:

The Will of God

God uses love-inspired correction to guide us to a future we do not or cannot now envision but which He knows is the better way for us.