“Lesson 132—Doktrina at mga Tipan 121:34–46: ‘Mga Kapangyarihan ng Langit,’” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 121:34–46,” Manwal ng Titser ng Seminary para sa Doktrina at mga Tipan
Lesson 132: Doktrina at mga Tipan 121–123
Doktrina at mga Tipan 121:34–46
“Mga Kapangyarihan ng Langit”
Sa gitna ng mahihirap na kalagayan sa Liberty Jail, itinuro ng Panginoon kay Propetang Joseph Smith kung paano matamo ang mga kapangyarihan ng langit sa pamamagitan ng mga alituntunin ng kabutihan. Ang lesson na ito ay makatutulong sa mga estudyante na mas lubos na matamo ang mga kapangyarihan ng langit sa kanilang buhay sa pamamagitan ng pagiging higit na katulad ni Cristo.
Mga Posibleng Aktibidad sa Pag-aaral
Ang ating mga hangaring maglingkod sa iba
Maaari mong simulan ang lesson sa pamamagitan ng pagtulong sa mga estudyante na matanto na ang ating personal na kaugnayan sa Diyos ay magbibigay sa atin ng kakayahang maglingkod sa iba sa ating paligid. Maaari kang gumamit ng maikling sitwasyon na tulad ng sumusunod para makabuo ng isang talakayan.
Si Molly ay tinawag kamakailan upang maglingkod sa presidency ng kanyang klase. Nais niyang tulungan ang mga dalagita sa kanyang klase ngunit hindi siya sigurado kung paano gawin ito.
-
Ano ang maipapayo ninyo kay Molly kung hihingi siya ng payo sa inyo?
Matapos hingin ang payo ng young women president, ipinadala ng president ang sumusunod na pahayag kay Molly at pinayuhan siyang pagnilayan kung paano ito magagamit sa pagtulong sa mga taong iniatas sa kanya na paglingkuran.
Hindi ninyo maiaangat ang ibang tao kung hindi kayo nakatayo sa mas mataas na lugar kaysa sa kanya. (Harold B. Lee, “Stand Ye in Holy Places,” Ensign, Hulyo 1973, 123)
-
Sa inyong palagay, paano naaangkop ang pahayag na ito sa hangarin ni Molly na tulungan ang mga dalagita sa kanyang klase?
Anyayahan ang mga estudyante na pagnilayan kung may isang tao sila na gustong tulungan na mas mapalapit sa Ama sa Langit at kay Jesucristo. Maaari nilang maisip ang kanilang mga kaibigan, kapamilya, ang mga pinaglilingkuran nila, o ang mga pinamumunuan nila sa kanilang mga korum at klase. Maaari pa nga nilang isulat ang ilang pangalan na naiisip nila sa kanilang study journal.
Hikayatin ang mga estudyante sa buong lesson na pagtuunan ng pansin ang mga ideya at damdamin na maaaring magmula sa Espiritu Santo tungkol sa kung paano sila magiging pinakamabuting impluwensya sa mga nais nilang tulungan.
Liberty Jail
Kung itinuro mo ang lesson na may pamagat na “Doktrina at mga Tipan 121–123,” maaari mong ipakita ang sumusunod na larawan at anyayahan ang mga estudyante na ibahagi ang naaalala nila tungkol sa konteksto ng mga bahaging ito.
Habang nakabilanggo si Joseph Smith sa Liberty Jail, itinuro sa kanya ng Panginoon ang kahalagahan ng ating personal na kaugnayan sa kapangyarihan ng langit.
Basahin ang Doktrina at mga Tipan 121:34–36, at alamin ang mga katotohanan tungkol sa ating kaugnayan sa mga kapangyarihan ng langit sa ating buhay.
Ang Doktrina at mga Tipan 121:34–36 ay isang doctrinal mastery passage. Maaari mong anyayahan ang mga estudyante na markahan ang mga doctrinal mastery passage sa natatanging paraan upang madali nilang mahanap ang mga ito.
-
Ano ang nalaman ninyo?
Tulungan ang mga estudyante na matukoy na ang mga kapangyarihan ng langit ay hindi mapamamahalaan ni mahahawakan tanging alinsunod lamang sa mga alituntunin ng kabutihan. Maaari mong hikayatin ang mga estudyante na markahan ang pariralang ito sa kanilang mga banal na kasulatan.
Maaari mong isulat ang “Ang mga Kapangyarihan ng Langit” sa itaas na bahagi ng pisara at gumawa ng dalawang column sa ilalim nito, ang isa ay may label na “Mas matatamo” at ang isa ay “Hahadlangan ang pagtamo.”
Anyayahan ang mga estudyante na basahin ang sumusunod na pahayag at simulang ilista ang mga kilos at pag-uugali na naaangkop sa bawat column.
Pangulong Russell M. Nelson
Alam natin kung paano matatamo ang kapangyarihan ng langit. Alam din natin kung ano ang hahadlang sa ating pag-unlad—kung ano ang dapat nating itigil para lalo pa nating matamo ang kapangyarihan ng langit. (Russell M. Nelson, “Maaari Tayong Gumawa nang Mas Mahusay at Maging Mas Mahusay,” Liahona, Mayo 2019, 68)
Maaaring pag-aralan ng mga estudyante ang mga sumusunod na talata sa maliliit na grupo. Maaaring makatulong sa mga estudyante ang paghahanap ng mga kahulugan ng mga salitang hindi nila nauunawan. Kapag tapos nang mag-aral ang mga grupo, anyayahan ang mga kinatawan ng bawat grupo na idagdag ang nalaman nila sa mga angkop na column sa pisara.
Basahin ang Doktrina at mga Tipan 121:35–45, at alamin ang mga kilos o pag-uugali na maaaring magpalakas o magpahina sa ating pagtamo sa mga kapangyarihan ng langit.
-
Paano maaaring makita ang ilan sa mga kilos at pag-uugaling ito sa buhay ng isang tinedyer ngayon?
Maaari mong tulungan ang mga estudyante na makita na nagdusa si Joseph Smith at ang mga Banal dahil ginamit ng mga lider ng pamahalaan at mandurumog sa Missouri ang “di makatwirang pamamahala” (talata 39) upang “gumamit ng lakas” (talata 37) sa kanila. Sa kabilang banda, hinahangad ni Jesucristo na tularan natin ang Kanyang halimbawa ng pag-impluwensya sa buhay ng iba sa pamamagitan ng mga alituntunin ng kabutihan tulad ng “kahinahunan” at “pag-ibig” (tingnan sa talata 41).
-
Bakit mahalaga ang mga kilos at pag-uugaling ito na nag-uugnay sa atin sa mga kapangyarihan ng langit kapag binigyan tayo ng responsibilidad na maglingkod sa iba?
-
Paano makatutulong sa atin ang pagsasabuhay ng mga kilos at pag-uugaling ito para maging higit na katulad ni Cristo at maimpluwensyahan ang iba sa paraang ginawa Niya?
Bigyan ng oras ang mga estudyante na tuklasin kung paano ipinakita ni Jesucristo ang mga alituntunin ng kabutihan sa Kanyang ministeryo. Maaaring pumili ang mga estudyante ng isang halimbawa mula sa buhay ni Cristo na pamilyar sa kanila at ipaliwanag kung anong alituntunin o mga alituntuning mula sa bahagi 121 ang nakita nilang ipinapakita Niya.
Upang matulungan ang mga estudyante, maaari kang magpamahagi ng mga larawan ng mga pangyayari mula sa buhay ni Jesus o manood ng Bible Video mula sa ChurchofJesusChrist.org, tulad ng “Go and Sin No More” (3:18).
Maaari mong anyayahan ang mga estudyante na magbahagi ng mga halimbawa ng mga taong kilala nila na nagpapakita ng isa sa mga kilos o pag-uugali sa talata 35–45 na tumutulong na maiugnay sila sa kapangyarihan ng Diyos.
Mga ipinangakong pagpapala
Basahin ang Doktrina at mga Tipan 121:45–46, at alamin ang mga pagpapalang ibinibigay ng Tagapagligtas sa mga taong nagsisikap na makaugnay sa mga kapangyarihan ng langit sa pamamagitan ng pagkakaroon ng mga katangiang tulad ng kay Cristo na napag-aralan ninyo ngayon.
-
Aling mga parirala o salita ang makabuluhan sa inyo?
-
Paano kayo matutulungan ng mga pagpapalang ito na maging higit na katulad ni Cristo habang pinaglilingkuran ninyo ang mga nasa paligid ninyo?
Anyayahan ang mga estudyante na pagnilayan ang natutuhan at nadama nila sa lesson na ito. Hikayatin sila na humingi ng patnubay mula sa Espiritu Santo habang kinukumpleto nila ang sumusunod na prompt o pahiwatig sa kanilang study journal gamit ang mga salita o parirala mula sa Doktrina at mga Tipan 121:35–45.
Hahangarin kong mas matamo ang mga kapangyarihan ng langit sa pamamagitan ng:
-
Pagsisikap na madaig ang .
-
Pagsisikap na magkaroon ng .
Isaulo
Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at balikan ang mga ito sa mga lesson sa hinaharap. Ang mahalagang parirala ng banal na kasulatan ay “Ang mga karapatan ng pagkasaserdote … ay hindi mapamamahalaan ni mahahawakan tanging alinsunod lamang sa mga alituntunin ng kabutihan.” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”