“Lesona 137: Fotopampianarana sy Fanekempihavanana 127–128, Tapany 1: Ny Famonjena ny maty,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fotopampianarana sy Fanekempihavanana 127–128, Tapany 1,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 137: Fotopampianarana sy Fanekempihavanana 125–128
Fotopampianarana sy Fanekempihavanana 127–128, Tapany 1
Ny Famonjena ny maty
Tamin’ny aogositra 1840 dia nampianatra voalohany ny fotopampianaran’ny batisa ho an’ny maty i Joseph Smith. Nifaly ny mpikamban’ny Fiangonana noho ny fahafahana nanome ôrdônansin’ny famonjena ho an’ireo havany nodimandry. Nanoratra taratasy ho an’ny Olomasina i Joseph Smith mba hampianarana azy ireo mikasika ny ôrdônansin’ny batisa ho an’ny maty. Ity lesona ity dia afaka manampy ireo mpianatra hahatsapa ny fitiavan’ny Ray any An-danitra azy ireo izay miseho amin’ny alalan’ireo ôrdônansin’ny tempoly.
Sahanasa fianarana azo atao
Rafi-tantara iray
Ity rafi-tantara manaraka ity dia afaka manampy ny mpianatra hisaintsaina ny zavatra tsapany momba ny fotopampianaran’ny Mpamonjy mikasika ny batisa ho an’ny maty. Azon’ny mpianatra atao ny milalao an-tsehatra ny fomba mety hamalian’izy ireo an’i Anna.
Nandritra ny fifanakalozan-kevitra iray niarahana tamin’ireo misiônera dia nianatra momba ny ilàna ny fanarahana ny ohatra nasehon’ny Mpamonjy sy ny fanaovana batisa i Anna (jereo ny Matio 3:13–17; Jaona 3:5; 2 Nefia 31:4–11). Naniry mafy ny hatao batisa izy, nefa niahiahy ny amin’ny rahavaviny efa maty koa. Nanontany ireo misiônera i Anna hoe: “Ary ahoana ny momba ny rahavaviko izay maty talohan’ny nanaovana batisa azy?”
-
Rehefa mandinika ireo singa ao amin’ny fotopampianaran’ny Mpamonjy ianao dia inona no fahatsapana anananao izay tianao hozarainao?
Ampahatsiahivo ny mpianatra fa ny olona nandritra ny taona maro, anisan’izany ireo mpikamban’ny Fiangonana tany am-boalohany, dia nametraka fanontaniana tahaka ny an’i Anna. Tamin’ny alalan’ny Mpaminany Joseph Smith no nanambaran’ny Ray any An-danitra ny fomba ahafahan’ny drafiny mamonjy izay rehetra te ho voavonjy.
Drafitry ny Ray any An-danitra
Nambaran’ny Tompo tsikelikely tamin’i Joseph Smith ny fotopampianaran’ny batisa ho an’ny maty. Tamin’ny aogositra 1840 dia nanao toriteny tamin’ny fandevenana an’i Seymour Brunson i Joseph Smith. Nandritra ilay toriteny dia nijery an’i Jane Neyman izy, izay mananotena maty zanakalahy talohan’ny nanaovana batisa an’ilay zanany. Niresaka momba ny 1 Korintiana 15:29 i Joseph, ary nampianatra fa ny drafitr’ Andriamanitra dia mamela ny olona velona iray hanao batisa isoloana tena olona iray izay efa maty. Tatỳ aoriana, dia natao batisa ho an’i Cyrus zanany lahy i Jane. Izany no batisa ho an’ny maty voalohany notanterahina nandritra ity fotoampitantanana ity (jereo ny Saints: The Story of the Church of Jesus Christ in the Latter Days, vol. 1, The Standard of Truth, 1815–1846 [2018], 421–22).
Nanambara ny Tompo taty aoriana fa ny batisa ho an’ny maty dia tokony hatao any amin’ny tempoly (jereo ny Fotopampianarana sy Fanekempihavanana 124:29–32). Tamin’ny nôvambra 1841 dia nanomboka natao batisa ho an’ny razamben’izy ireo tao amin’ny Tempolin’i Nauvoo izay mbola tsy vita ny Olomasina. Tamin’ny septambra 1842, dia nanome toromarika ny Olomasina i Joseph Smith mba hitana rakitsoratra misy ireo ôrdônansy ireo sy ireo antsipirian-javatra manan-danja hafa. Ireo toromarika ireo dia ao amin’ny Fotopampianarana sy Fanekempihavanana 127 sy 128 ankehitriny (jereo ny Saints, 1:476–77). Nanazava i Joseph Smith fa mpitana rakisoratra dia tokony ho vavolombelon’ilay ôrdônansy ary tokony hitana rakitsoratra marina izay horaketina ao amin’ny bokim-piangonana maneran-tany. Nampianatra ihany koa izy fa ny hafa dia tokony ho vavolombelon’ilay ôrdônansy (jereo ny Fotopampianarana sy Fanekempihavanana 128:2–4). Nohazavainy avy eo hoe nahoana io fandaminan-javatra io no tokony ho tena miavaka.
Alohan’ny hamakiana ny Fotopampianarana sy Fanekempihavanana 128:5, dia mety hanampy ny manazava fa ny hoe “talohan’ny fanorenana izao tontolo izao” dia milaza ny fotoana talohan’ny nahariana ny tany, fotoana izay nisian’ny filankevitra iray tany an-danitra (jereo ny Abrahama 3:22–27).
Vakio ny Fotopampianarana sy Fanekempihavanana 128:5, ary tadiavo ny zavatra nianaranao momba ny batisa ho an’ny maty ao amin’ny drafitry ny Ray any An-danitra.
-
Inona no ampianarin’io andininy io antsika momba ny Ray any An-danitra sy ny drafiny?
Ampio ireo mpianatra hamantatra ity fahamarinana ity: Nanomana lalana ho an’ny famonjena ireo izay maty tsy nahalala ny filazantsara ny Ray any An-danitra.
Soraty eny amin’ny solaitrabe ilay fahamarinana mba hanampiana ireo mpianatra hifanakalo hevitra momba izany. Afaka manampy ny mpianatra hahatakatra io fahamarinana io ny fametrahana ny sasany amin’ireto fanontaniana manaraka ireto. Azonao atao ny manatsara ny fifanakalozan-kevitra amin’ny alalan’ny fangatahana ny mpianatra hizara ny eritreriny momba ny fanehoan-kevitra ataon’ny mpiara-mianatra.
-
Inona no ampianarin’io fahamarinana io anao momba ny toetra tsara ananan’ny Ray any An-danitra na ny toetoetrany na ny tanjony?
-
Inona no mety ho fiantraikan’izany fahamarinana izany aminao sy ny fianakavianao?
Mba hanampiana ireo mpianatra hahatsapa ny maha-zava-dehibe io fahamarinana io dia zarao ny fijoroanao ho vavolombelona momba izany. Na azonao atao ny mizara ity teny nambara manaraka ity ary asao ny mpianatra hizara ny fihetsik’izy ireo manoloana izany.
Ny Loholona D. Todd Christofferson ao amin’ny Kôlejin’ny Apôstôly Roambinifolo dia nijoro ho vavolombelona momba an’i Jesoa Kristy sy ny fanavotana ny maty.
Ny andraikitsika dia miitatra lavitra sy lalina tahaka ny fitiavan’ Andriamanitra mba hahafaoka ny Zanany amin’ny fotoana sy ny toerana rehetra. Ny ezaka ataontsika eo amin’ny toeran’ny maty dia mijoro ho vavolombelona tsara fa i Jesoa Kristy no ilay Andriamanitra Mpanavotra ny olombelona rehetra. Ny fahasoavany sy ireo fampanantenany dia tody hatrany amin’ireo izay tsy mitady Azy akory aza mandritra ny fahaveloman’izy ireo. Noho Izy dia tena ho afaka tokoa ireo mpifatotra. (D. Todd Christofferson, “The Redemption of the Dead and the Testimony of Jesus,” Ensign, nôv. 2000, 11)
Voarakitra eto an-tany sy any an-danitra
Hevero ny hampiseho ny sarin’ny dobo fanaovana batisa ao amin’ny tempoly. Asao ny mpianatra mba haneho ny mpanao firaketana sy ireo vavolombelona. Dia asao ny mpianatra avy eo hitady sy hanisy marika ireo asa ampiandraiketina ireo ao amin’ny Fotopampianarana sy Fanekempihavanana 128:3. Raha efa nanao vavolombelona ny mpianatra dia afaka mizara ny zavatra niainany izy ireo.
Ny fomba iray hanampiana ny mpianatra hahita ny maha-zava-dehibe ireo fizarana ireo dia ny fiverenana amin’ilay rafi-tantara momba an’i Anna.
Rehefa avy natao batisa i Anna dia nankany amin’ny tempoly ary natao batisa ho an’ny rahavaviny izay maty. Manontany tena izy hoe ahoana no ahafantarany fa manan-kery any an-danitra ilay ôrdônansy.
Alohan’ny hamakian’ny mpianatra ireto andinin-tsoratra masina manaraka ireto dia azonao atao ny manazava fa ao amin’ny Fotopampianarana sy Fanekempihavanana 128:8 ny andian-teny hoe “izy tenany mihitsy” dia entina hilazana ireo olona izay atao batisa ho an’ny tenany ary ny teny hoe “solontenany” dia entina hilazana ireo izay atao batisa ho an’ny hafa.
Vakio ny Fotopampianarana sy Fanekempihavanana 127:5–7; 128:6–8, ka tadiavo izay hozarainao amin’i Anna mba hamaliana ny fanontaniany.
-
Inona no teny na andian-teny hozarainao amin’i Anna?
-
Nahoana araka ny eritreritrao no zava-dehibe ao amin’ny drafitry ny Ray any An-danitra ny firaketana ireo ôrdônansy?
-
Inona no mety ho fiantraikan’ny fahatakarana ireo andininy ireo amin’ny zavatra iainanao any amin’ny tempoly?
Hazavao fa ireo ôrdônansy atao any amin’ny tempoly dia mamatotra eto an-tany sy any an-danitra noho ireo fanalahidin’ny fisoronana izay naverina tamin’ny laoniny tamin’ny alalan’ny Mpaminany Joseph Smith (jereo ny Fotopampianarana sy Fanekempihavanana 128:9–11).
“Aoka hiravoravo ny fonareo ary ho faly fatratra tokoa”
Ny tanjon’ity fizarana ity dia ny hanampy ny mpianatra hahatsapa ny halehiben’ny drafitry ny famonjen’ny Ray any An-danitra. Soraty eny amin’ny solaitrabe ny hoe Ny drafitry ny Ray any An-danitra ary asao ny mpianatra hanampy teny na andian-teny izay maneho ny fahatsapany momba izany. Asao ny mpianatra vitsivitsy hizara ny antony hahatsapan’izy ireo izany.
Azon’ny mpianatra soratana eny amin’ny solaitrabe ihany koa ny sasany amin’ireo fahatsapana niainan’izy ireo rehefa nandray anjara tamin’ny batisa sy ny fandraisana ho mpikambana tao amin’ny tempoly izy ireo.
Rehefa mamaky ity andalan-tsoratra masina manaraka ity ny mpianatra ary mifanakalo hevitra momba ireo fanontaniana miaraka amin’izany, dia afaka manampy teny na andian-teny eny amin’ny solaitrabe izy ireo.
Naneho tamin’ny endrika tononkalo ny fomba fijeriny momba ny fotopampianarana be voninahitra momba ny fanavotana ho an’ny maty i Joseph Smith tao amin’ilay taratasy nosoratany. Vakio ny Fotopampianarana sy Fanekempihavanana 128:22–23, ka tadiavo ireo fihetseham-po momba ny drafitry ny Ray any An-danitra.
-
Inona avy ireo teny na andian-teny avy amin’ireo andininy ireo izay maneho ny fahatsapanao momba ny drafitry ny Ray any An-danitra ho an’ny famonjena ny zanany?
-
Oviana ianao no niaina ny iray amin’ireo fahatsapana ireo rehefa nandray anjara tamin’ny asa atao any amin’ny tempoly sy ny tantaram-pianakaviana?
-
Inona araka ny eritreritrao no dikan’ny hoe “handeha malalaka ny voafonja”? (andininy 22). Nahoana izany no mety ho antony hifaliana fatratra?
Asao ny mpianatra haneho ny fahatsapany manokana momba ny fotopampianaran’ny fanavotana ny maty. Asao izy ireo hifantoka amin’ny bitsiky ny Fanahy rehetra mety ho tonga rehefa manao izany. Afaka manoratra, manao sary, na mirakitra hafatra izy ireo. Afaka mampiasa ny sasany amin’ireo andian-teny voatanisa eny amin’ny solaitrabe ireo mpianatra mba hamaritana ny fomba nanomezan’ny drafitry ny Ray any An-danitra fanantenana ho an’ireo izay maty tsy nahalala ny filazantsara. Afaka manoratra mikasika ny fiantraikan’ny drafitry ny famonjena eo amin’ny fianakaviany ihany koa izy ireo. Mety ho tian’ny mpianatra ny mamaritra ireo traikefa manan-danja amin’ny fandraisana anjara amin’ny asa atao any amin’ny tempoly sy ny tantaram-pianakaviana.
Rehefa avy nomena fotoana ampy tsara ireo mpianatra, dia asao izay mpianatra vonona mba hizara ny hafatr’izy ireo. Azonao atao koa ny mizara ny fahatsapanao momba ny fanavotana ny maty ao amin’ny drafitry ny Ray any An-danitra.