Lesona 138: Fotopampianarana sy Fanekempihavanana 125–128

Fotopampianarana sy Fanekempihavanana 127–128, Tapany 2

“Batisa ho an’ny maty eo aminareo”

Nanoratra taratasy ho an’ny Olomasina momba ny fotopampianaran’ny batisa ho an’ny maty i Joseph Smith. Nanazava ireo faminaniana ao amin’ny Baiboly izy mba hanampiana ny Olomasina hahatakatra ny maha-zava-dehibe ny fanaovana batisa amin’ny anaran’ireo havany izay efa nodimandry. Ity lesona ity dia afaka manampy ireo mpianatra hahita fampahalalana momba ireo razambeny nodimandry sy hiomana amin’ny fanatanterahana ireo ôrdônansy ho azy ireo any amin’ny tempoly.

Sahanasa fianarana azo atao

Ny razambenao

Atombohy amin’ny alalan’ny fanampiana ireo mpianatra hieritreritra momba ny razambeny ny fotoam-pianarana. Azonao atao ny manasa ny mpianatra hanao lisitra ny maro araka izay azony eritreretina amin’ny razambeny. Azon’ny mpianatra atao ny manondro hoe iza amin’ireo razambe ireo no nandray ny ôrdônansin’ny batisa tao amin’ Ny Fiangonan’i Jesoa Kristy ho an’ny Olomasin’ny Andro Farany ary iza no tsy nandray izany.

• Manao ahoana ny fatokisanao tena amin’ny fahaizanao manao tantaram-pianakaviana sy ny asa any amin’ny tempoly ho an’ny razambenao?

Asao ny mpianatra hizara ny zavatra tadidiny mikasika ny sahan-kevitry ny Fotopampianarana sy Fanekempihavanana 127–128. Azonao atao ihany koa ny mizara ity sahan-kevitra fanampiny manaraka ity.

Niampanga an’i Joseph Smith ho nanampy tamin’ny fikasana hanafika an’i Lilburn W. Boggs, izay governora teo aloha, ny manam-pahefana tao Missouri. Niahiahy i Joseph fa raha miverina any Missouri izy dia hovonoina. Rehefa niafina tao an-tranon’i Edward Hunter i Joseph dia nanana eritreritra sy fahatsapana maro momba ny batisa ho an’ny maty (jereo ny Fotopampianarana sy Fanekempihavanana 128:1). Nanoratra taratasy ho an’ny Olomasina i Joseph Smith mba hampianarana azy ireo fotopampianarana manan-danja mikasika ny ôrdônansin’ny batisa ho an’ny maty (jereo ny Saints: The Story of the Church of Jesus Christ in the Latter Days, vol. 1, The Standard of Truth, 1815–1846 [2018], 466–77).

Batisa ho an’ny maty eo aminareo

Nampianatra ny Loholona Quentin L. Cook ao amin’ny Kôlejin’ny Apôstôly Roambinifolo fa manana andraikitra manokana hanatanteraka ôrdônansin’ny tempoly ho an’ny olona voafaritra manokana isika:

Mazava tsara ny fotopampianarana momba ny fianakaviana izay mifandray amin’ny tantaram-pianakaviana sy ny asa atao any amin’ny tempoly. Ny Tompo tao amin’ny torolalana fanambarana voalohany dia niresaka momba ny “batisa ho an’ny maty eo ami nareo” [Fotopampianarana sy Fanekempihavanana 127:5; nampiana fanamafisana]. Ny andraikitsika araka ny fotopampianarana dia miompana amin’ireo razambentsika manokana. Ny anton’izany dia satria ny rafitra selestialy any an-danitra dia mifototra amin’ny fianakaviana. (Quentin L. Cook, “Faka sy sampana,” Liahona, mey 2014, 45)

Vakio ny Fotopampianarana sy Fanekempihavanana 127:5–6, ary asio marika ny teny hoe “batisa ho an’ny maty eo aminareo” izay nohazavain’ny Loholona Cook.

• Araka ny hevitrao, dia hanao ahoana izany fihaonana amin’ireo razambenao efa nodimandry izany? Inona no mety ho fihetsik’izy ireo manoloana ny asa atao any amin’ny tempoly sy ny tantaram-pianakaviana izay nataonao?

Tena ilaina amin’ny famonjena antsika ny famonjena azy ireo

Vakio ny Fotopampianarana sy Fanekempihavanana 128:15–18, ka tadiavo ny zavatra nampianarin’ireo mpaminany momba ny fotopampianaran’ny fianakaviana mandrakizay sy ny batisa ho an’ny maty.

Azo atao ny mizara ny mpianatra ho vondrona telo mba hahitana ny zavatra nampianarin’ireto mpaminany manaraka ireto mba handalinana ny Fotopampianarana sy Fanekempihavanana 128:15–18. Manasà mpianatra iray ao amin’ny vondrona tsirairay ho mpitarika ny vondrona. Io olona io dia afaka mizara ireo andraikitra. Ny andraikitra iray dia ny famintinana ho an’ny iray kilasy ny zavatra nianaran’ilay vondrona tao amin’ny soratra masina.

• Joseph Smith—andininy 15, 18

• Ny Apôstôly Paoly—andininy 15–16

• Ny mpaminany Malakia—andininy 17

Rehefa avy mamaky ireo andininy ireo ny mpianatra dia asao ny vondrona tsirairay mba hamintina ireo andininy. Azonareo atao ihany koa ny mifanakalo hevitra momba ireo fanontaniana mety hananan’izy ireo na ireo andian-teny heveriny fa manan-danja.

• Inona no nampianarin’ny mpaminany tsirairay momba ny famonjena ny razambentsika?

  Rehefa mizara ny heviny ny mpianatra dia mety hahita fahamarinana maromaro izy ireo, anisan’izany ireto manaraka ireto:

  • Tena ilaina ho an’ny famonjena antsika ny famonjena ireo razambentsika efa maty.

  • Tsy afaka ny handroso mankany amin’ny fahalavorariana ny razambentsika izay maty tsy nahalala ny filazantsara mandra-panatanterahana ho azy ireo ny ôrdônansin’ny tempoly.

  Ampio ny mpianatra hahatakatra ny antony maha-zava-dehibe ireo fahamarinana ireo ankehitriny. Mety hanampy ny sasany amin’ireto fanontaniana manaraka ireto.

• Amin’ny fomba ahoana no hanatanterahan’i Jesoa Kristy ny famonjena ireo razambentsika izay efa nodimandry?

• Ahoana araka ny eritreritrao no ahafahan’ny fandraisana anjara amin’ny asa atao any amin’ny tempoly sy ny tantaram-pianakaviana manampy anao hanaraka ny ohatra nasehon’ny Mpamonjy?

Nijoro ho vavolombelona momba ny andraikitsika manan-danja ny Filoha Henry B. Eyring ao amin’ny Fiadidiana Voalohany:

Maro amin’ireo razambenao no tsy nandray ireo ôrdônansy ireo. Saingy nanome fomba ahafahanao manatanteraka izany Andriamanitra. Ary fantatr’ Andriamanitra fa hanana fahatsapana ho lasa manam-pitiavana ireo razambenao ianao ary hanana ny teknôlôjia ilaina mba hitadiavana azy ireo. Fantany ihany koa fa ianao dia hiaina ao anatin’ny fotoana iray hampitombo bebe kokoa noho ny hatramin’izay teo amin’ny tantara, ny fahafahana mandeha any amin’ny tempoly, izay toerana ahafahana manatanteraka ôrdônansy. Ary fantany fa afaka matoky anao Izy amin’ny fanatanterahana ity asa ity ho an’ny razambenao. …

… Tanora maro no nahita fa ny fanolorana ny fotoanany hanaovana fikarohana momba ny tantaram-pianakaviana sy ny asa atao any amin’ny tempoly dia nampitombo ny fijoroany ho vavolombelona momba ny drafitry ny famonjena. Nampitombo ny fitaoman’ny Fanahy teo amin’ny fiainan’izy ireo izany ary nampihena ny fitaoman’ny fahavalo. Nanampy azy ireo hahatsapa ho akaiky kokoa ny fianakaviany sy hanakaiky kokoa an’i Jesoa Kristy Tompo izany. Nianatra izy ireo fa ity asa ity dia tsy mamonjy ny maty fotsiny ihany; mamonjy antsika rehetra izany [jereo ny Fotopampianarana sy Fanekempihavanana 128:18]. (Henry B. Eyring, “Manangona ny fianakavian’ Andriamanitra,” Liahona, mey 2017, 21, 22)

• Inona ireo efa nataonao mba handraisana anjara amin’ny asa atao any amin’ny tempoly sy ny tantaram-pianakaviana? Inona no fitahiana nomen’ny Tompo anao noho ny ezaka nataonao?

• Nanampy anao hahatsapa ho akaiky kokoa an’i Jesoa Kristy tamin’ny fomba ahoana ny fandraisana anjara tamin’ity asa ity?

Mandray anjara amin’ny asa atao any amin’ny tempoly sy nyny tantaram-pianakaviana

Ity ampahany amin’ny lesona ity dia natao hanampiana ireo mpianatra handray anjara amin’ny asa momba ny tantaram-pianakaviana ary angamba hiomana amin’ny fanatanterahana ireo ôrdônansy any amin’ny tempoly. Misy fomba maro ahafahanao manasa ireo mpianatra handray anjara. Misy ohatra vitsivitsy ireto:

• Asehoy ity lisitry ny sahanasa manaraka ity ary anontanio ny mpianatra raha afaka mampianatra ny iray kilasy momba izany izy ireo. Avy eo dia afaka mampiseho ny fomba hanatanterahana ireo sahanasa ireo ny mpianatra.

• Zarao ho vondrona kely ny mpianatra ary asao izy ireo hiara-hanao ireo sahanasa. Ireo mpianatra manana traikefa dia afaka manampy ireo mpianatra tsy manana traikefa.

• Mamoròna toby kely fianarana ho an’ireo sahanasa sasany. Manasà mpianatra iray efa zatra manao ilay sahanasa mba hitarika ilay toby fianarana. Afaka mifandimby mankeo amin’ny toby nofidiany ny mpianatra.

Manasà mpanoro hevitra momba ny tempoly sy ny tantaram-pianakaviana avy amin’ny paroasy misy anao mba hanampy amin’izany. Raha voafetra ny fahafahana mampiasa teknôlôjia dia azonao atao ny mifantoka amin’ilay sahanasa voalohany voatanisa etsy ambany.

• Ataovy ireo sahanasa isan-karazany ao amin’ilay kiboky Ny Fianakaviako: Tantara Mampiray Antsika.

• Fantaro ny hazon’ny tetiaram-pianakavianao ao amin’ny FamilySearch.

• Ampiasao ilay endri-javatra “Ôrdônansy vonona” ao amin’ny FamilySearch mba hahitana anarana hoentina any amin’ny tempoly.

• Mamandriha fotoana handehanana any amin’ny tempoly ao amin’ny temples.ChurchofJesusChrist.org.

• Fantaro ny fomba hampidirana olona na hametahana rakitsoratra ara-tantara amin’ny hazon’ny tetiaram-pianakavianao ao amin’ny FamilySearch.

• Mampidira fahatsiarovana amin’ireo olona ao amin’ny hazon’ny tetiaram-pianakavianao ao amin’ny FamilySearch.

• Fantaro ny fizarana hoe “Sahanasa” ao amin’ny FamilySearch.org.

• Fantaro ny fizarana hoe “Tempoly sy Tantaram-pianakaviana” ao amin’ny Médiathèque de l’Evangile.

Rehefa avy nomena fotoana ampy ny mpianatra dia asao izy ireo hizara amin’ny iray kilasy ny zavatra izay nataon’izy ireo sy hitan’izy ireo. Afaka mifanakalo hevitra momba ny fomba nitomboan’ny fatokisan-tenany handray anjara amin’ny asa atao any amin’ny tempoly sy ny tantaram-pianakaviana ihany koa ny mpianatra.

Ampio ny mpianatra hahatsapa ho voahaja sy omena lanja: Raha te hianatra bebe kokoa momba ny fomba fanehoana amin’ny mpianatra fa manaja sy manome lanja azy ireo ianao dia jereo ny fiofanana mitondra ny lohateny hoe “Mandefasa hafatra any amin’ny ray na ny renin’ny mpianatra iray mikasika ny zavatra tsara tsikaritrao momba ny zanany.” Io fiofanana io dia hita ao amin’ny Fahaiza-manao ho fampivoarana ny mpampianatra: Tiavo ireo izay ampianarinao.

Vakio ny Fotopampianarana sy Fanekempihavanana 128:24, ka tadiavo ireo fanatitra azontsika omena ny Tompo.

• Amin’ny fomba ahoana araka ny eritreritrao no maha-fanatitra marina ho an’ny Tompo ny asa atao any amin’ny tempoly sy ny tantaram-pianakaviana izay ataontsika?

• Inona no fanatitra amin’ny asa atao any amin’ny tempoly sy ny tantaram-pianakaviana izay tsapanao fa azonao omena ny Tompo?

Asao ny mpianatra hanao asa araka ny fahatsapana voarainy. Amporisiho ny mpianatra handray anjara amin’ny asa atao any amin’ny tempoly sy ny tantaram-pianakaviana any an-tokantrano miaraka amin’ny fianakaviany.

Loharanom-pitaovana fanampiny

Fotopampianarana sy Fanekempihavanana 128:20. Inona no atao hoe “fitantanana ny fotoam-pahafenoana”?

Ny fotoampitantanana dia vanimpotoana iray izay anambaran’ny Tompo ny fotopampianarany sy ireo ôrdônansiny ary ny fisoronany. Ny fotoampitantanana ankehitriny dia nanomboka tamin’i Joseph Smith ary antsoina hoe fitantanana ny fotoam-pahafenoana izany. Ny Mpaminany Joseph Smith (1805–44) dia nampianatra hoe: “Ny fitantanana ny fotoam-pahafenoana dia hitondra amin’ny mazava ireo zavatra izay nambara tamin’ny fotoampitantanana rehetra taloha; ary koa ireo zavatra hafa izay tsy mbola nambara teo aloha. Haniraka an’i Elia, Mpaminany, sns., Izy ka hamerina ny zavatra rehetra ao amin’i Kristy” (Teachings of Presidents of the Church: Joseph Smith [2007], 510–11; jereo ihany koa ny Fotopampianarana sy Fanekempihavanana 128:18).

Ahoana no ahafahan’ny fanatanterahana ireo ôrdônansy ho an’ny razambentsika manampy antsika ho tonga tahaka an’i Jesoa Kristy?

Nanambara izao ny Loholona Gerrit W. Gong ao amin’ny Kôlejin’ny Apôstôly Roambinifolo:

Ny Tompo dia manome antsika fahafahana masina mba ho tonga tahaka Azy kokoa rehefa manolotra ireo ôrdônansin’ny tempoly isoloan-tena ho an’ny famonjena izay ilain’ny hafa kanefa tsy azony atao ho an’ny tenany manokana. Lasa feno sy tanteraka kokoa isika rehefa lasa “mpamonjy … ao an-tendrombohitra Ziona.” [Obadia 1:21]. (Gerrit W. Gong, “Sambatra sy mandrakizay,” Liahona, nôv. 2022, 84–85)

Nampianatra toy izao ny Filoha Henry B. Eyring ao amin’ny Fiadidiana Voalohany hoe:

Avy eo dia ho tonga ny andro, rehefa zatovo izy ireo, hahazoany fahazoan-dalana hidirana ny tempoly hanatanterahana batisa isoloana tena any amin’ny tempoly. Amin’ny alalan’izany traikefa izany dia afaka ny hitombo ny fahatsapana ananan’izy ireo fa ny ôrdônansin’ny tempoly dia manondro lalandava mankany amin’ny Mpamonjy sy ny Sorompanavotany. Rehefa tsapan’izy ireo fa manome fahafahana ho an’ny olona iray ao amin’ny tontolon’ny fanahy izy ireo mba ho voadio amin’ny fahotana, dia hitombo ny fahatsapan’izy ireo hoe manampy ny Mpamonjy amin’ny asany masina amin’ny fitahiana ny zanaky ny Raintsika any An-danitra iray. (Henry B. Eyring, “Mahita ny tempoly no mahafinaritra ahy,” Liahona, mey 2021, 30–31)

Inona avy ireo fitahiana tonga amin’ireo izay manao ny asa atao any amin’ny tempoly sy ny tantaram-pianakaviana?

Nampanantena ny Loholona David A. Bednar ao amin’ny Kôlejin’ny Apôstôly Roambinifolo hoe:

Tsy kisendrasendra ny fahatongavan’ny FamilySearch sy ireo fitaovana hafa amin’izao fotoana izao izay fotoana maha havanana an’ireo tanora eo amin’ny lafin’ny teknôlôjia ara-pahalalam-baovao sy ara-pifandraisana amin’ny endriny maro. Voaofana handefa hafatra amin’ireo finday sy amin’ireo solosaina ny rantsantananareo mba hanafainganana sy hampandrosoana ny asan’ny Tompo—fa tsy hoe hifandraisana amin’ny fomba haingana fotsiny amin’ireo namanareo. Ireo fahaiza-manao hita soritra eo anivon’ireo tanora maro amin’izao fotoana izao dia isan’ny fiomanana mba hitondra anjara biriky ao anatin’ilay asa famonjena.

Manasa ireo tanoran’ ny Fiangonana aho mba hianatra momba ny Fanahin’ i Elia sy hiaina an’ izany. Mamporisika anareo aho handalina, sy hikaroka momba ireo razambenareo ary hiomana hanatanteraka batisa amin’ny alalan’ny fisoloana tena ao amin’ny tranon’ny Tompo ho an’ireo razambenareo (jereo ny F&F 124:28–36). Ary mamporisika anareo aho hanampy ireo olona hafa hamantatra ny tantaram-pianakaviany.

Rehefa manaiky amim-pinoana izany fanasana izany ianareo dia hitodika any amin’ny ray ny fonareo. Hitoetra ao am-ponareo ny fampanantenana natao tamin’i Abrahama, sy i Isaka ary i Jakoba. Ilay tsodranon’ny patriarika voarainareo izay ahitana fanambarana momba ny rohim-pirazanana dia hampifandray anareo amin’ireo rainareo ireo ary ho lasa manan-danja bebe kokoa aminareo. Hitombo ny fitiavanareo sy ny fankasitrahanareo ireo razambenareo. Ho lalim-paka sy haharitra ny fijoroanareo ho vavolombelona momba ny Mpamonjy sy ny fiovam-ponareo hanaraka Azy. Ary mampanantena anareo aho fa ho voaro amin’ny fisarihana mahery vaika ataon’ny fahavalo ianareo. Ho voaro ianareo ao anatin’ny fahatanoranareo sy mandritra ny fiainanareo rehefa mandray anjara ao anatin’izany asa masina izany ary mitia izany. (David A. Bednar, “Hitodika ny fon’ny zanaka,” Liahona, nôv. 2011, 26–27)

Nampanantena izao ny Loholona Dale G. Renlund ao amin’ny Kôlejin’ny Apôstôly Roambinifolo:

Eo am-pandraisantsika anjara amin’ny tantaram-pianakaviana sy ny asan’ny tempoly ankehitriny, dia afaka ny handraykoa ireo fitahiana miendrika “fanasitranana” nampanantenain’ireo mpaminany sy apôstôly isika. Ireo fitahiana ireo dia mahavariana sy mampientanentana koa noho ny vokany sy ny toetoetrany manokana ary ny fiantraikany eto amin’ny fiainana an-tany. Izany lisitra lava be izany dia ahitana ireto fitahiana ireto:

• Fahatakarana bebe kokoa ny Mpamonjy sy ny sorompanavotany;

• Fitarihan’ny Fanahy Masina bebe kokoa mba hahatsapana tanjaka sy fitarihana eo amin’ny fiainantsika;

• Finoana lehibe kokoa, mba hahafahan’ny fiovam-po ho an’ny Mpamonjy ho lalina sy maharitra;

• Fahafahana sy fahazotoana bebe kokoa hianatra sy hibebaka noho ny fahatakarantsika hoe iza isika, avy aiza isika ary noho ny fahitana mazava kokoa hoe ho aiza isika;

• Fitarihana manadio sy manamasina ary mampahalala onona bebe kokoa ao am-pontsika;

• Fifaliana bebe kokoa avy amin’ny fahafahana mahatsapa bebe kokoa ny fitiavan’[ny Tompo];

• Fitahiana bebe kokoa ho an’ny fianakaviana, na manao ahoana na manao ahoana ny toe-javatra iainan’ny fianakaviantsika ankehitriny, na niainany taloha na hiainany ary na manao ahoana na manao ahoana izay mety ho tsy fahalavorarian’ny hazon’ny tetiaram-pianakaviantsika;

• Fitiavana sy fankasitrahana bebe kokoa hatrany ny razambentsika sy ny havantsika mbola velona, mba tsy hahatsapantsika ho irery intsony;

• Hery bebe kokoa hamantarana ireo izay mila fanasitranana, ka noho izany, hanompo ny hafa miaraka amin’ny fanampian’ny Tompo;

• Fiarovana bebe kokoa amin’ny fakam-panahy sy ny fisarihana mahery vaika ataon’ny fahavalo; ary

• Fanampiana bebe kokoa mba hanasitranana ireo fo mihotakotaka, na maratra, na feno tebiteby, ary hitsaboana izay maratra.

Raha toa efa nivavaka mba hahazo fitahiana toy izany ianao dia mandraisa anjara amin’ny tantaram-pianakaviana sy ny asa atao any amin’ny tempoly. Rehefa manao izany ianao dia hovalina ny vavaka ataonao. Rehefa tanterahina ho an’ireo izay efa nodimandry ny ôrdônansy dia sitrana koa ireo zanak’ Andriamanitra ety an-tany. (Dale G. Renlund, “Tantaram-pianakaviana sy asa atao any amin’ny tempoly: Famehezana sy fanasitranana,” Liahona, mey 2018, 47)

Sahanasa fianarana fanampiny

Ireo fitahian’ny tantaram-pianakaviana sy ny asa atao any amin’ny tempoly

Azonao atao ihany koa ny manasa ny mpianatra hamaky sy hanamarika ireo fitahiana nampanantenaina ao amin’ireo teny nambara ao amin’ny “Loharanom-pitaovana fanampiny.” Ifanakalozy hevitra hoe inona avy ireo fitahiana efa niainan’ny mpianatra teo amin’ny fiainany ary inona no fitahiana iriany.

Fianarana mampiasa ny FamilySearch

Fotopampianarana sy Fanekempihavanana 128:18. Rohy mampifandray

Ity sahanasa ity dia afaka manampy ny mpianatra hahatakatra ny fampianarana momba ny rohy mampifandray. Azonao atao ny mampiseho rojo vy iray rehefa mifanakalo hevitra momba ny fomba ahafahan’ny fanatanterahana ireo ôrdônansin’ny tempoly ho an’ireo olona ao amin’ny fianakaviantsika efa nodimandry mampisy rohy mampifandray eo amintsika sy izy ireo. Afaka mamorona rojo vita taratasy ihany koa ny mpianatra ary manoratra ny anaran’ireo olona ao amin’ny fianakaviany sy ny razambeny eo amin’ny rohy tsirairay. Azon’ny mpianatra atao koa ny mizara ny fomba anampian’ny fanatanterahana ireo ôrdônansin’ny tempoly azy ireo hahatsapa ho akaiky ny razambeny.