Fitsipiky ny fampianarana tahaka ny an’i Kristy: Tiavo ireo izay ampianarinao

Mitadiava fomba tsara hanehoana ny fitiavanao.

Fahaiza-manao

Mandefasa hafatra any amin’ny ray na renin’ny mpianatra iray mikasika ny zavatra tsara tsikaritrao momba ny zanany.

Mamaritra

Fomba iray mahery vaika hanehoana ny fitiavanao ny mpianatra ny fandefasana hafatra milaza zavatra tsara any amin’ny ray na reny na mpiantoka iray mikasika ny zavatra manokana tsikaritrao momba izany mpianatra izany. Hahomby kokoa ilay hafatra raha toa ianao ka:

1. Mivavaka mba hahazo fitarihana momba ny hoe iza no mpianatra tokony hifantohanao ary inona no tokony hozarainao amin’ilay ray na reny na mpiantoka.

2. Manaova fampahafantarana fohy ny tenanao mba hanombohana ilay hafatra.

3. Manehoa fankasitrahana avy amin’ny fo noho ny fahafahanao manana ilay ankizy ao an-dakilasy.

4. Lazao amin’ny fomba mazava sy tsotra ny zavatra tsara sy voafaritra tsara iray izay tsikaritrao.

Rehefa mampita fanamarihana tsara amin-kitsim-po sy ombam-bavaka amin’ny ray aman-dreny ianao dia hahatsapa ny fitiavanao amin’ny fomba mahery vaika ny mpianatra.

Lamina hakan-tahaka

Tia ny mpianany Rahalahy Camargo ary te hampita marina izany fitiavana izany amin’ny fomba tokony hanaovana izany. Mivavaka izy mba hahafantarany hoe ny momba an’iza no tokony hizarany hafatra tsara amin’ny ray na reny iray ary mahatsapa izy fa taomim-panahy hanoratra ho an’ny ray aman-drenin’i Jackson. Tsikariny fa tsy nila nangataka an’i Jackson hitondra ny soratra masiny izany mihitsy izy ary vonona ny hanampy foana i Jackson. Mandefa mailaka milaza izao manaraka izao Rahalahy Camargo:

• Ry Rahalahy sy Ranabavy Duvall,

• Rahalahy Camargo no anarako, ary mpampianatra seminera an’i Jackson aho. Feno fankasitrahana aho manana azy ato amin’ny kilasiko. Te hampahafantatra anareo fotsiny aho fa mitondra ny soratra masiny foana i Jackson ary vonona ny hanampy amin’ny zavatra rehetra ilaiko. Misaotra anareo amin’ny zavatra rehetra ataonareo mba hanampiana sy hanohanana azy.

• Am-pitiavana,

• Rahalahy Camargo

Manazatra tena

Manoràta hafatra milaza zavatra tsara amin’ny ray na reny iray ho an’ireto toe-javatra misy ireto:

1. Toa somary mihafahafa i Susan ao an-dakilasy, dia te haneho ny fitiavanao azy ianao. Rehefa mivavaka momba izany ianao dia tsikaritrao fa manolotena hanampy ankizy iray izay sahirana mitady soratra masina izy.

2. Eritrereto ny iray amin’ireo mpianatrao izay mampatanjaka tsy tapaka ny kilasinao. Mieritrereta ombam-bavaka ary lazao amin’ilay mpianatra ny zavatra iray tsikaritrao momba azy.

Mifanakalo hevitra na misaintsaina

• Inona no mety ho akon’izany eo amin’ny mpianatra tsirairay sy ny fifandraisan’izy ireo amin’ny Mpamonjy rehefa mandeha ny fotoana? Ahoana no ahafahan’izany manova ny fandraisan’ny mpianatra anjara na ny fahatsapany ho manan-toerana ao an-dakilasy?

• Mieritrereta fotoana iray izay nanamafisan’ny fanehoan’ny olona iray fitiavana na fankasitrahana ny fifandraisanao tamin’ny Mpamonjy.

Mampiditra fahalalana

• Atombohy amin’ny fisafidianana mpianatra iray na roa isan’andro izay tsapanao fa handrisihan’ny Fanahy anao mba hampiasana io fahaiza-manao io. Tohizo izany mandra-pahatonga izany ho toy ny zavatra mandeha ho azy ary raha mbola mitarika anao koa ny Fanahy.

Te hianatra misimisy kokoa ve ianao?

• Jean B. Bingham, “Mampianatra fahamarinana amin’ny alalan’ny fitenim-pitiavana” (Fampitana ny fivoriam-piofanana fanao isan-taona an’ny Seminera sy Institiota fianarana ny filazantsara, 19 jan. 2021), broadcasts.ChurchofJesusChrist.org

Fahaiza-manao

Mijoroa ho vavolombelona ny amin’ny fitiavan’ Andriamanitra rehefa sarotra aminao ny mahatsapa na maneho fitiavana an’ireo izay ampianarinao.

Mamaritra

Indraindray ireo mpampianatra dia mety hahita fa sarotra ny mahatsapa na maneho fitiavana an’ireo izay ampianariny. Amin’ireny fotoana ireny dia tokony hiezaka ny hijoro ho vavolombelona momba ny fitiavan’ny Ray any An-danitra sy i Jesoa Kristy ireo mpianatra ireo mpampianatra. Mba hanaovana izany dia mikatsaka ny fanampian’ny Tompo ireo mpampianatra amin’ny alalan’ny fanolorana vavaka na ny fanaovana vavaka ao am-pon’izy ireo, ny fijerena ilay mpianatra eo amin’ny masony, ary ny filazana amin-kitsimpo fa tian’ny Ray any An-danitra sy ny Mpamonjy ilay mpianatra. Ny fampitana io fitiavan’ Andriamanitra io dia hamela ireo mpampianatra hahatsapa ny sasany amin’ny zavatra tsapan’ny Ray any An-danitra sy i Jesoa Kristy ho an’ilay mpianatra, izay hanampy ireo mpampianatra hanomboka hahatsapa fitiavana manokana mitovy amin’izany ho an’ilay mpianatra.

Lamina hakan-tahaka

• Sahirana tamin’ny fitondrantena manelingelina nasehon’i Tommy tao an-dakilasy Rahavavy Clawson ary miahiahy izy ny amin’ny fiantraikan’izany eo amin’ny zavatra tsapany manokana momba azy. Manolotra vavaka izy mba hikatsahana ny fanampian’ny Tompo alohan’ny hanombohan’ny fotoam-pianarana. Rehefa tonga i Tommy dia mandray ny tanany miarahaba azy Rahavavy Clawson, dia mijery azy ary miteny hoe: “Tommy a! Manantena aho fa hainao ny halehiben’ny fitiavan’ny Ray any An-danitra anao.”

• Niatrika olana vitsivitsy nandrera-tsaina tao amin’ny fianakaviany Rahalahy Stone ary nahatsapa ho reraka. Rehefa manomboka ny fotoam-pianarana izy dia milaza izao ombam-bavaka ao am-pony hoe: “Ry ranabavy sy rahalahy, fantatro fa tena tia anareo rehetra ny Ray any An-danitra sy i Jesoa Kristy.” Eo am-pilazany izany dia mahatsapa fitiavana misimisy kokoa ho an’ireo mpianany Rahalahy Stone ary somary nihamaivana ny rarin-tsainy rehefa niroso tamin’ny lesona izy.

Tsindrio eto raha hijery horonan-tsary maneho io lamina hakan-tahaka io.

Manazatra tena

• Eritrereto ny mpianatrao ary fantaro hoe iza no mpianatra iray na roa amin’ireo izay mety ho sarotra aminao ny maneho ny fitiavanao azy. Soraty ny zavatra mety holazainao amin’ilay mpianatra mba hampitana ny fitiavana masin’ny Ray any An-danitra sy i Jesoa Kristy. Raha vantany vao nosoratanao ny zavatra mety holazainao dia manaova fanazaran-tena amin’ny alalan’ny fitenenana mafy ireo teny.

Mifanakalo hevitra na misaintsaina

• Inona no nianaranao rehefa nanao fanazaran-tena tamin’ny fitadiavana fomba hampitana ny fitiavan’ Andriamanitra tamin’ireo mpianatrao ianao?

• Inona no mety ho fiantraikan’ny fanehoana ny fitiavan’ Andriamanitra eo amin’ny mpanolotra sy ny mpandray izany?

Mampiditra fahalalana

• Jereo ny rejisitry ny kilasinao ary fantaro farafahakeliny ny mpianatra iray izay azonao hanehoana ny fitiavan’ny Ray any An-danitra sy i Jesoa Kristy amin’ity herinandro ity. Tohizo ny fanaovana izany tsy tapaka mandra-pahavitanao izany ho an’ny mpianatrao rehetra. Avy eo dia tohizo hatrany ny fanaovana izany!

Te hianatra misimisy kokoa ve ianao?

• (Susan H. Porter, “Ny fitiavan’ Andriamanitra: Ilay mampiravoravo indrindra ny fanahy,” Liahona, nôv. 2021, 33–35

• Dieter F. Uchtdorf, “Ny fitiavan’ Andriamanitra,” Liahona, nôv. 2009, 21–24