“Lesson 137—Doktrina at mga Tipan 127–128, Bahagi 1: Ang Kaligtasan ng mga Patay,” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 127–128, Bahagi 1,” Manwal ng Titser ng Seminary para sa Doktrina at mga Tipan
Lesson 137: Doktrina at mga Tipan 125–128
Doktrina at mga Tipan 127–128, Bahagi 1
Ang Kaligtasan ng mga Patay
Noong Agosto 1840, unang itinuro ni Joseph Smith ang doktrina ng pagbibinyag para sa mga patay. Nagalak ang mga miyembro ng Simbahan sa pagkakataon na magsagawa ng mga nakapagliligtas na ordenansa para sa kanilang mga yumaong kamag-anak. Sumulat si Joseph Smith ng mga liham sa mga Banal upang ituro sa kanila ang tungkol sa ordenansa ng pagbibinyag para sa mga patay. Ang lesson na ito ay makatutulong sa mga estudyante na madama ang pagmamahal ng Ama sa Langit para sa kanila, na ipinakita sa pamamagitan ng mga ordenansa sa templo.
Mga Posibleng Aktibidad sa Pag-aaral
Isang sitwasyon
Ang sumusunod na sitwasyon ay makatutulong sa mga estudyante na pagnilayan ang nadarama nila tungkol sa doktrina ng pagbibinyag ng Tagapagligtas para sa mga patay. Maaaring isadula ng mga estudyante kung paano sila maaaring tumugon kay Anna.
Sa isang talakayan kasama ang mga missionary, nalaman ni Anna ang tungkol sa pangangailangang tularan ang halimbawa ng Tagapagligtas at magpabinyag (tingnan sa Mateo 3:13–17; Juan 3:5; 2 Nephi 31:4–11). Taos-puso niyang hinangad na magpabinyag, ngunit nag-alala rin siya tungkol sa kanyang yumaong kapatid na babae. Tinanong ni Anna ang mga missionary, “Paano naman ang kapatid kong babae na namatay bago pa siya mabinyagan?”
-
Habang pinag-iisipan ninyo ang mga elemento ng doktrina ng Tagapagligtas, ano ang mga nadarama ninyo na ibabahagi ninyo?
Ipaalala sa mga estudyante na ang mga tao sa lahat ng panahon ay nagtanong din ng mga tanong na tulad ng kay Anna, kasama na rito ang mga naunang miyembro ng Simbahan. Sa pamamagitan ni Propetang Joseph Smith, inihayag ng Ama sa Langit kung paano maliligtas ng Kanyang plano ang lahat ng gustong maligtas.
Ang plano ng Ama sa Langit
Unti-unting inihayag ng Panginoon kay Joseph Smith ang doktrina ng pagbibinyag para sa mga patay. Noong Agosto 1840, nangaral si Joseph Smith sa burol ni Seymour Brunson. Sa sermon, tumingin siya kay Jane Neyman, isang balo na ang anak ay namatay bago ito nabinyagan. Binanggit ni Joseph ang 1 Corinto 15:29 at itinuro niya na ang plano ng Diyos ay nagtulot sa isang buhay na tao na mabinyagan para sa isang taong yumao na. Kalaunan, bininyagan si Jane para sa kanyang anak na si Cyrus. Ito ang unang pagbibinyag para sa mga patay na isinagawa sa dispensasyong ito (tingnan sa Mga Banal: Ang Kuwento ng Ang Simbahan ni Jesucristo ng mga Banal sa mga Huling Araw, Tomo 1, Ang Pamantayan ng Katotohanan, 1815–1846 [2018], 480–81).
Kalaunan ay inihayag ng Panginoon na ang pagbibinyag para sa mga patay ay isasagawa sa templo (tingnan sa Doktrina at mga Tipan 124:29–32). Noong Nobyembre 1841, nagsimulang magpabinyag ang mga Banal para sa kanilang mga ninuno sa hindi pa tapos na Nauvoo Temple. Noong Setyembre 1842, tinagubilinan ni Joseph Smith ang mga Banal na mag-ingat ng talaan ng mga ordenansang iyon at ng iba pang mahahalagang detalye. Ang mga tagubiling iyon ay nasa Doktrina at mga Tipan 127 at 128 (tingnan sa Mga Banal, 1:543–44) na ngayon. Ipinaliwanag ni Joseph Smith na ang isang tagapagtala ay dapat maging saksi ng ordenansa at mag-ingat ng mga tumpak na talaan na itatala sa pangkalahatang aklat ng simbahan. Itinuro din niya na dapat maging mga saksi ng ordenansa ang iba (tingnan sa Doktrina at mga Tipan 128:2–4). Pagkatapos ay ipinaliwanag niya kung bakit kailangang napakapartikular ng pagkakaayos ng mga bagay na ito.
Bago basahin ang Doktrina at mga Tipan 128:5, maaaring makatulong na ipaliwanag na ang “bago pa sa pagkakatatag ng daigdig” ay tumutukoy sa panahong bago pa nilikha ang mundo, kung saan naganap ang kapulungan sa kalangitan (tingnan sa Abraham 3:22–27).
Basahin ang Doktrina at mga Tipan 128:5, at alamin ang natutuhan ninyo tungkol sa mga pagbibinyag para sa mga patay sa plano ng Ama sa Langit.
-
Ano ang itinuturo nito sa inyo tungkol sa Ama sa Langit at sa Kanyang plano?
Tulungan ang mga estudyante na matukoy ang katotohanang ito: Naghanda ng daan ang Ama sa Langit para sa kaligtasan ng mga namatay na walang kaalaman sa ebanghelyo.
Maaari mong isulat sa pisara ang katotohanan upang matulungan ang mga estudyante na talakayin ito. Ang pagtatanong ng ilan sa mga sumusunod ay maaaring makatulong sa mga estudyante na maunawaan ang katotohanang ito. Maaari mong pagandahin ang talakayan sa pamamagitan ng paghiling sa mga estudyante na ibahagi ang kanilang mga naiisip tungkol sa mga komento ng mga kaklase.
-
Ano ang itinuturo sa inyo ng katotohanang ito tungkol sa mga katangian, pagkatao, o layunin ng Ama sa Langit?
-
Paano makaaapekto ang katotohanang ito sa inyo at sa inyong pamilya?
Upang matulungan ang mga estudyante na madama ang kahalagahan ng katotohanang ito, maaari mong ibahagi ang iyong patotoo tungkol dito. O maaari mong ibahagi ang sumusunod na pahayag at anyayahan ang mga estudyante na ibahagi ang kanilang mga komento tungkol dito.
Pinatotohanan ni Elder D. Todd Christofferson ng Korum ng Labindalawang Apostol si Jesucristo at ang pagtubos sa mga patay.
Ang tungkulin natin ay kasinglawak at kasinglalim ng pagmamahal ng Diyos upang masakop ang lahat ng Kanyang mga anak sa bawat panahon at pook. Ang mga ginagawa natin para sa kapakanan ng mga yumao ay nagpapatotoo na si Jesucristo ang banal na Manunubos ng buong sangkatauhan. Ang Kanyang biyaya at mga pangako ay sumasaklaw maging sa mga tao na hindi Siya nahanap sa buhay na ito. Dahil sa Kanya, tunay ngang makalalaya ang mga bihag. (D. Todd Christofferson, “The Redemption of the Dead and the Testimony of Jesus,” Ensign, Nob. 2000, 11)
Nakatala sa lupa at sa langit
Maaari kang magpakita ng larawan ng bautismuhan sa templo. Anyayahan ang mga estudyante na ituro ang tagapagtala at ang mga saksi. Pagkatapos ay anyayahan ang mga estudyante na hanapin at markahan ang mga assignment na ito sa Doktrina at mga Tipan 128:3. Kung nagsilbing saksi ang mga estudyante, maaari nilang ibahagi ang kanilang mga karanasan.
Ang isang paraan upang matulungan ang mga estudyante na makahanap ng kaugnayan sa mga bahaging ito ay balikan ang sitwasyon tungkol kay Anna.
Matapos mabinyagan, dumalo si Anna sa templo at bininyagan siya para sa kanyang yumaong kapatid na babae. Napaisip siya kung paano niya malalaman na may bisa ang ordenansa sa langit.
Bago basahin ng mga estudyante ang mga sumusunod na banal na kasulatan, maaari mong ipaliwanag na sa Doktrina at mga Tipan 128:8 ang pariralang “propria persona” ay tumutukoy sa mga taong nabinyagan para sa kanilang sarili at ang pariralang ”kanilang sariling mga kinatawan” ay tumutukoy sa mga taong nabinyagan para sa iba.
Basahin ang Doktrina at mga Tipan 127:5–7; 128:6–8, at alamin kung ano ang maaaring ibahagi ninyo kay Anna para masagot ang kanyang tanong.
-
Anong mga salita o parirala ang maaari ninyong ibahagi kay Anna?
-
Sa inyong palagay, bakit mahalaga sa plano ng Ama sa Langit ang pag-iingat ng talaan ng mga ordenansa?
-
Paano nakaiimpluwensya sa iyong karanasan sa templo ang pag-unawa sa mga talatang ito?
Ipaliwanag na ang mga ordenansang isinagawa sa mga templo ay ibinuklod sa lupa at sa langit dahil sa mga susi ng priesthood na ipinanumbalik sa pamamagitan ni Propetang Joseph Smith (tingnan sa Doktrina at mga Tipan 128:9–11).
“Magsaya sa inyong mga puso, at labis na magalak”
Ang layunin ng bahaging ito ay tulungan ang mga estudyante na madama ang kadakilaan ng plano ng kaligtasan ng Ama sa Langit. Maaari mong isulat sa pisara ang plano ng Ama sa Langit at anyayahan ang mga estudyante na magdagdag ng mga salita o parirala na nagpapahayag ng kanilang damdamin tungkol dito. Hilingin sa ilang estudyante na ibahagi kung bakit ganoon ang kanilang nadarama.
Maaari ding idagdag ng mga estudyante sa pisara ang ilan sa mga nadama nila kapag nakikibahagi sila sa mga pagbibinyag at kumpirmasyon sa templo.
Habang binabasa ng mga estudyante ang sumusunod na scripture passage at tinatalakay nila ang mga kasamang tanong, maaari silang magdagdag ng mga salita o parirala sa pisara.
Sa kanyang liham, madamdaming ipinahayag ni Joseph Smith ang kanyang mga pananaw tungkol sa maluwalhating doktrina ng pagtubos para sa mga patay. Basahin ang Doktrina at mga Tipan 128:22–23, at alamin ang mga damdaming ipinahayag tungkol sa plano ng Ama sa Langit.
-
Anong mga salita o parirala mula sa mga talatang ito ang nagsasaad ng mga nadarama ninyo tungkol sa plano ng Ama sa Langit para sa kaligtasan ng Kanyang mga anak?
-
Kailan ninyo naranasan ang alinman sa mga damdaming ito habang nakikibahagi kayo sa gawain sa templo at family history?
-
Ano sa palagay ninyo ang ibig sabihin ng “ang mga bilanggo ay makalalaya”? (talata 22). Bakit maaaring maging dahilan ito upang labis na magalak?
Maaari mong anyayahan ang mga estudyante na ipahayag ang sarili nilang mga damdamin tungkol sa doktrina ng pagtubos para sa mga patay. Anyayahan sila na bigyang-pansin ang anumang pahiwatig ng Espiritu kapag ginawa nila ito. Maaari silang magsulat, magdrowing, o mag-record ng mensahe. Maaaring gamitin ng mga estudyante ang ilan sa mga pariralang nakalista sa pisara para ilarawan kung paano nagbibigay ng pag-asa ang plano ng Ama sa Langit para sa mga namatay na walang kaalaman sa ebanghelyo. Maaari din nilang isulat ang epekto ng plano ng kaligtasan sa kanilang sariling pamilya. Maaaring naisin ng mga estudyante na ilarawan ang mga makabuluhang karanasan nila sa pakikibahagi sa gawain sa templo at family history.
Pagkatapos ng sapat na oras, anyayahan ang mga handang estudyante na ibahagi ang kanilang mensahe. Maaari mo ring ibahagi ang mga nadarama mo tungkol sa pagtubos sa mga patay sa plano ng Ama sa Langit.