Lesona 139: Mataupu Faavae ma Feagaiga 129–132

Mataupu Faavae ma Feagaiga 130

Aoaoina Atu o le Talalelei a le Faaola

E mafai ona aoao atu ma le mataalia le talalelei i ni sauniga tetele po o ni faatasiga laiti, ma fefaasoai. Sa faaaoga e le Faaola metotia uma e lua i le taimi o Lana galuega, e pei ona sa faia e le Perofeta o Iosefa Samita. O le anotusi o le Mataupu Faavae ma Feagaiga 130 o loo i ai nisi o aoaoga a le Perofeta i se faapotopotoga laitiiti o le Au Paia sa nonofo i Ramus, Ilinoi. O lenei lesona ua faamoemoe e fesoasoani i tagata aoga e faataitai ai le aoao atu o elemene faafaiaoga o le aoaoga faavae a Iesu Keriso.

Gaoioiga E Ono Mafai Ona Aoao Ai

O gaoioiga nei e aoao ai ua mamanuina e fesoasoani ai i tamaiti aoga e aoao atu vaega eseese o le lesona. Afai e te le manao e tuu atu i tagata aoga e aoao atu, tagai i “Gaoioiga Faaopoopo e Aoao Ai” mo manatu faafaiaoga e mafai ona e faaaogaina.

O Iesu Keriso, le Faiaoga Sili

Ina ia amata le vasega, mafaufau e faaali atu se ata o Iesu Keriso o loo aoao atu tagata ma valaaulia tagata aoga e vaai faalemafaufau pe faape’ī le i ai iina. Mafaufau e fai atu fesili nei:

• Faamata o a ni ou mafaufauga po o ni lagona pe ana e i ai a o aoao mai Iesu?

• O le a sou manatu o le a se mea ua avea ai le Faaola ma se faiaoga aogā faapena?

Faamalamalama atu o le avea ai ma tagata o le Ekalesia a le Faaola, ua tatou maua ai le tele o avanoa e aoao atu ai Lana talalelei. E mafai foi ona e faaali atu le savali lenei mai le Au Peresitene Sili e uiga i le aoao atu:

Uso e ma tuafafine pele,

Oka se avanoa ina a matagofie e te maua e aoao atu ai le talalelei a Iesu Keriso! Pe i ai se valaauga faapitoa pe leai e aoao atu, o oe o se faiaoga. I le avea ai ma se soo o le Faiaoga Sili, o Iesu Keriso, ua e maua ai avanoa e faasoa atu ai Lona malamalama i soo se mea lava e te alu i ai—i le aiga, i le lotu, a o e auauna atu i isi, ma i au uo. O le aoao atu o le talalelei o se faatuatuaga paia. O se vaega taua o le galuega a le Alii, ma e sili ona aoga pe a tatou faia i Lana ala. (Aoao Atu i le Ala a le Faaola: Mo I Latou Uma O E Aoao Atu i le Aiga ma i le Ekalesia [2022],1)

• O a nisi o avanoa o i ai i le autalavou e aoao atu ai ma molimau atu ia Iesu Keriso ma Lana talalelei?

Faamalamalama atu i tagata aoga o le a latou maua le avanoa e saunia ai se lesona puupuu mai nisi o aoaoga i le Mataupu Faavae ma Feagaiga 130 ma ia faataitai ona aoao atu a latou lesona i isi. Afai e te fuafua e fai atu i ni nai tagata aoga e faiaoga i le vasega atoa, o se taimi lelei lea e faamautinoa atu ai ia i latou o le a e le fai atu i se tasi e le manao e faia lena mea.

A o lei amataina e tagata aoga le sauniaina o lesona, mafaufau e faasoa atu faamatalaga nei i tua atu.

I le aso 2 o Aperila, 1843, sa feiloa’i le Perofeta o Iosefa Samita ma le Au Paia i Ramese, Ilinoi, lea sa tusa e 20 maila i fafo o Navu. Sa aoao atu e Iosefa ni upu moni eseese o le talalelei, e aofia ai faamatalaga e uiga i le aigaAtua, o le taua o le mauaina o le malamalama i lenei olaga, ma le ala e mafai ai ona tatou maua faamanuiaga a le Atua. O aoaoga a le Perofeta ua faamaumauina i le Mataupu Faavae ma Feagaiga 130.

Ia saunia e aoao atu

Ina ia fesoasoani i tagata aoga ia saunia e aoao atu, tufa atu le pepa e tufa atu ua faaautu “Aoao atu o Upumoni mai le Mataupu Faavae ma Feagaiga 130.” Valaaulia tagata o le vasega e mulimuli i laasaga o sauniuniga o le lesona mo le taitaiga. Talu ai o le Mataupu Faavae ma Feagaiga 130:22–23 o se fuaitau o le atamai i aoaoga faavae, atonu e manaomia le fai atu i ni nai tagata aoga e galulue i lena autu e faamautinoa ai o le a aoaoina na fuaiupu i le taimi o le lesona.

A o sauniuni tagata aoga, fealua’i solo i totonu o le potu ma fesoasoani ia i latou pe a manaomia. E mafai ona e ofoina atu ni fautuaga o mea e mafai ona latou faaaogaina e fesoasoani ai i isi ia auai ma le mataalia. O nei mea e mafai ona aofia ai fesili o talanoaga, mea e vaaia, mea faitino, faasoa atu o aafiaga faaletagata lava ia, po o gaoioiga tau tusitusi.

Aoao atu o Upumoni mai le Mataupu Faavae ma Feagaiga 130

Sauniuniga o le lesona:

Laasaga 1: Filifili se tasi o autu suesue o loo i lalo ma suesue i punaoa ua tuuina atu. Gauai atu i mafaufauga, manatu, ma uunaiga mai le Agaga Paia e uiga i mea o loo e faitauina. E mafai foi ona e maua isi punaoa e faaloloto ai lou malamalama i lau autu filifilia.

Laasaga 2: Fai se otootoga o lesona e lima i le fitu minute mo lau autu filifilia. Mafaufau e faaaoga nisi o fesili nei e fesoasoani ia te oe e sauni:

• E mafai faapefea po o le e tatau e nei upumoni ona aafia ai la tatou sootaga ma le Tama Faalelagi ma Iesu Keriso?

• E mafai faapefea ona ou faaaogaina tusitusiga paia ma upu a perofeta e fesoasoani ai i isi ia malamalama atili i lenei autu?

• O le a se mea e mafai ona ou faia e fesoasoani ai i isi ia auai i le lesona ma ia avea ma tagata auai mataalia?

• O a ni aafiaga e mafai ona ou faasoa atu po o le a se mea e mafai ona ou molimau atu ai?

• O le a se mea e mafai ona ou faia e fesoasoani ai i isi e faaaoga lenei autu i o latou olaga?

Suesue autu ma punaoa:

Filifiliga 1: O le malamalama ma le atamai e tutu faatasi ma i tatou i le Toetutu.

Punaoa e suesue ai:

Mataupu Faavae ma Feagaiga 130:18–19; tagai foi Mataupu Faavae ma Feagaiga 88:118; 93:36

Na aoao mai Elder Neal A. Maxwell (1926–2004) o le Korama a Aposetolo e Toasefululua:

Afai tatou te mafaufau loloto i le mea tonu o le a tutu faatasi ma i tatou i le toetu, e foliga manino mai o lo tatou atamai o le a tutu faatasi ma i tatou, o lona uiga e le na o le tulaga o lo tatou atamai, ae faapea foi i lo tatou gafatia ona maua ma faaaoga ia upumoni. O a tatou taleni, uiga, ma tomai o le a tutu faatasi ma i tatou; e mautinoa foi i o tatou gafatia e aoao ai, o le tulaga o le loto pulea, ma lo tatou gafatia ona galulue. (Neal A. Maxwell, We Will Prove Them Herewith [1982], 12)

Filifiliga 2: Tatou te maua faamanuiaga mai le Atua e ala i le usiusitai i Ana tulafono.

Punaoa e suesue ai:

Mataupu Faavae ma Feagaiga 130:20–21; tagai foi Ioane 7:17; Mataupu Faavae ma Feagaiga 82:10

Na aoao mai Peresitene Russell M. Nelson:

Afai e te manao moni lava i se faamanuiaga faapitoa, o le a sili atu ona e iloa po o a tulafono e pulea ai lena faamanuiaga ona galue lea ia usiusitai i na tulafono. (Russell M. Nelson, “O le Misiona ma le Galuega a le Faaola: O Se Talanoaga ma Elder Russell M. Nelson,” Ensign, Iuni 2005, 19)

Filifiliga 3: Ua i ai i le Tama Faalelagi ma Iesu Keriso ni tino o aano ma ivi. O Le Agaga Paia o se peresona o agaga.

Punaoa e suesue ai:

Mataupu Faavae ma Feagaiga 130:22–23; tagai foi i le Mataio 3:13–17; Galuega 7:55–56

Na aoao mai Elder Jeffrey R. Holland o le Korama a Aposetolo e Toasefululua:

Tatou te talitonu o nei peresona paia e toatolu o loo maua ai se aiga-Atua e tasi e aufaatasi i le faamoemoe, i uiga, i le molimau, i le misiona. Tatou te talitonu e faatumulia i Latou i le uiga faaleatua lava e tasi o le alofa mutimutivale ma le alofa, faamasino tonu ma le alofa tunoa, onosai, faamagalo, ma le togiolaina. Ou te manatu e sao ona faapea atu tatou te talitonu e tasi i Latou i uiga taua ma le faavavau e manatu i ai, sei vagana tatou te le talitonu o i Latou o ni tagata e toatolu o loo tuufaatasia i se mea e tasi. … Matou te tautino atu o se mea ua faamaonia mai tusitusiga paia e faapea o le Tama, le Alo, ma le Agaga Paia o ni tagata eseese, o ni tagata paia se toatolu. (Jeffrey R. Holland, “The Only True God and Jesus Christ Whom He Hath Sent,” Liahona, Nov. 2007, 40–41)

Aafiaga faafaiaoga

Faailoa atu i tagata aoao e faatauaina a latou saofaga: A o faasoa mai e tagata aoga ia lesona sa latou saunia, fesoasoani ia latou iloa o a latou saofaga i le lesona e faatauaina ma talisapaia. Mo nisi faataitaiga i lenei mea, tagai i le aoaoga ua faaautuina “Fesootai atu e te faatauaina tagata aoga ae latou te lei tuuina mai ni manatu faaalia pe ao sii o latou lima” o loo maua i le Tomai o le Atinaega o Faiaoga: Alofa ia i Latou E te Aoaoina.

A uma ona e tuuina atu i tagata aoga se taimi e saunia ai se otootoga o le lesona, mafaufau e valaaulia ni nai tagata e aoao atu a latou lesona i luma o le vasega. E mafai foi ona e faatulagaina tagata aoga i ni vaega toalaiti, ma e mafai ona latou fesuisuiai le aoaoina o le tasi ma le isi. I le taimi o aoaoga a tagata aoga, uunaia tagata o le vasega e faaali atu le faaaloalo ma auai atoatoa i le faagasologa o le aoaoina. Afai e i ai ni tagata aoga e le lagolelei e aoao atu i le seminare po o le, afai foi e uma le taimi a o lei maua uma se avanoa, uunaia i latou e taumafai e aoao atu a latou lesona i le fale, i se faatulagaga faale-lotu, po o i se uo. Ina ia faai’u, mafaufau e fai atu fesili e pei o nei:

• O le a se mea na e aoaoina e uiga i le Tama Faalelagi ma Iesu Keriso e mafai ona fesoasoani ia te oe i ou tulaga o i ai nei?

• O le a se mea na e aoaoina i le asō e uiga i le aoaoina atu o le Talalelei a le Faaola?

• E mafai faapefea e le faaaogaina o avanoa e aoao atu ai le talalelei a Iesu Keriso ona manuia ai oe i le taimi nei ma i le lumanai?

O leMataupu Faavae ma Feagaiga 130:22–23 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala iloga ina ia faigofie ona latou mauaina.

Tauloto

Atonu e te manao e fesoasoani i tagata a’oga e tauloto le mau faasino ma le fasifuaitau autu o mau o le Mataupu Faavae ma Feagaiga 130:22–23 ma toe faamanatu i latou i lesona i le lumanai. O le fasifuaitau autu o mau mo lenei fuaitau “Ua i le Tama se tino o aano ma ivi …; ua faapea foi le Alo, ae o le Agaga Paia … o se peresona Agaga.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga Toe Faamanatu o le Atamai i Aoaoga Faavae.”

Punaoa Faaopoopo

O fea e mafai ona ou aoao atili ai e uiga i aoaoga i le Mataupu Faavae ma Feagaiga 130:1–17?

E faaopoopo atu i autu o loo talanoaina i lenei lesona, na aoao mai le Perofeta o Iosefa Samita e uiga i autu faaopoopo sa tusia i le Mataupu Faavae ma Feagaiga 130. O nisi o nei mea e aofia ai le natura e faavavau o a tatou fegalegaleaiga ma isi, o le malamalama atoatoa ma le muai silafia e le Atua, o le taunuuga o le lalolagi, ma le Afio Mai Faalua o Iesu Keriso. Mo nisi faamatalaga i nei autu, tagai i le inisitituti Tusi Lesona a le Tagata Aoga o le Mataupu Faavae ma Feagaiga (2018), 751–58.

Mataupu Faavae ma Feagaiga 130:18–19. Aisea e tatau ai ona faaauau pea ona ou aoaoina lo’u mafaufau ma le agaga?

Na aoao mai Peresitene Russell M. Nelson:

O le aoaoina o lau mea lena ia maua. E leai se tasi e mafai ona ia mauaina mo oe. Po o fea lava o e i ai, atiina ae se naunautaiga loloto e aoao. Mo i tatou i le avea ai ma ni tagata o le Au Paia o Aso e Gata Ai, o le mauaina o se aoaoga e le na o se avanoa, o se tiutetauave faalelotu. O le mamalu o le Atua o le atamai (tagai i le Mataupu Faavae ma Feagaiga 93:36). E moni lava, o a tatou aoaoga o le a aogā mo i tatou i le faavavau. … O le aoaoina o le eseesega lea i le va o le moomoo maimau pe ana mafai ona e fesoasoani atu i isi tagata ma le mafai ona fesoasoani atu ia i latou. (Russell M. Nelson, “Will You Choose to Increase in Learning?,” New Era, Sete. 2014, 2–3)

Mataupu Faavae ma Feagaiga 130:20–21. O le a le faamanuiaga silisili mo le usiusitai i tulafono a le Atua?

Na faamatala mai e Peresitene Dallin H. Oaks o le Au Peresitene Sili:

Na aoao mai Iosefa Samita e faapea, “ [na] faatuina e le Atua tulafono ina ia maua ai [e agaga o le a Ia auina mai i le laolagi] se avanoa e faateleina ai o ia lava.” [Aoaoga a Peresitene o le Ekalesia: Iosefa Samita (2007),210.] E atoatoa naua le alofa o le Atua, o lea ua Ia finagalo ai ma le agaalofa ia tatou usitai i Ana poloaiga aua ua Ia silafia, e na o le usiusitai lava i Ana tulafono e mafai ai ona tatou atoatoa, e faapei o Ia. (Dallin H. Oaks, “Alofa ma le Tulafono,” Liahona, Nov. 2009, 27)

Mataupu Faavae ma Feagaiga 130:22–23. O fea e mafai ona ou aoao atili ai e uiga i le aigaAtua?

Matamata le vitio “O le a le aigaAtua?” (7:03) e aoao atili ai e uiga i sui taitasi o le aigaAtua ma a Latou taumafaiga tuufaatasi e faamanuia o tatou olaga.

Gaoioiga Faaopoopo e Aoao Ai

Mataupu Faavae ma Feagaiga 130:18–19. Malamalama ma le atamai

Valaaulia tagata aoga e mafaufau faapea ua latou tuua le fale mo ni nai vaiaso. Ua faatagaina i latou e ave na o mea o le a ofi i totonu o le atopau e tasi po o se ato. Fesili atu ia i latou po o le a le mea o le a latou teuina.

Ona fai atu lea i tagata aoga e vaai faalemafaufau e faapea, o lo latou taunuuga o le lalolagi o agaga, lea o le a tatou ulufale atu i ai pe a tatou oti. Valaaulia i latou e faasoa mai po o fea o mea sa latou mafaufau muamua i ai o le a mafai ona latou aveina pe a latou feoti.

Valaaulia tagata aoga e faitau le Mataupu Faavae ma Feagaiga 130:18–19, ma vaavaai mo mea e mafai ona tatou o ma ave mai i lenei olaga pe a tatou oti. A uma ona fai atu i tagata aoga e lipoti mai mea na latou maua, fesoasoani ia i latou e faailoa mai se upumoni e pei o lenei: O le malamalama ma le atamai tatou te maua i lenei olaga o le a tutu faatasi ma i tatou i le Toetutu.

Talanoa fesili e pei o nei:

• E mafai faapefea e le iloaina o lenei upumoni ona aafia ai au faaiuga ma mea e faamuamua?

• O le a se mea ua e aoaoina mai nei fuaiupu e uiga i le auala e mafai ona e faateleina ai le malamalama ma le atamai?

Mataupu Faavae ma Feagaiga 130:20–21. Mauaina o faamanuiaga mai le Atua

Valaaulia tagata aoga e vaai faalemafaufau faapea sa latou mananao e faaleleia atili a latou tusilima. Fai atu ia i latou e faasoa mai ni mea e mafai ona latou faia e ausia ai lenei sini.

Ona tuu atu lea ia i latou e mafaufau faapea ua latou filifili e mafai ona latou faaleleia la latou tusitusi e ala i le tamoe i le tolu maila, lima aso i le vaiaso, mo le masina e tasi.

• O le a le taunuuga o le a i ai? Aisea?

Ona mafai lea e tagata aoga ona faitau le Mataupu Faavae ma Feagaiga 130:20–21, ma vaavaai mo se upumoni e mafai ona fesootai i faamanuiaga faaleagaga tatou te mananao e maua. (Atonu e te manao e faamalamalama atu e faapea, o le upu “faavae” o lona uiga “e tusa ai” ma o se tulafono e “folafola le maaveesea” ua tamau ma e le toe suia.)

• E tusa ai ma le Mataupu Faavae ma Feagaiga 130:20–21, e faapefea ona tatou maua se faamanuiaga mai le Atua?

Afai e manaomia, fesoasoani i tagata aoga latou te faailoa mai le upu moni lenei: Afai tatou te mananao e maua se faamanuiaga mai le Atua, ona tatau lea ona tatou usitai i le tulafono ua faavae ai.

Atonu e aoga mo tagata aoga le sueina o faataitaiga i tusitusiga paia e faapupula mai ai faamanuiaga e mafai ona tatou maua e ala i le mulimuli i tulafono patino a le Atua. Mo se faataitaiga, e mafai ona e fautuaina i latou e suesue le Ioane 7:17; 2 Nifae 32:3; Mataupu Faavae ma Feagaiga 10:5; 88:124.

Valaaulia tagata aoga e tusi i lalo ni faamanuiaga latou te mananao e maua. Ona valaaulia lea o i latou e tusi po o le a le tulafono po o tulafono e manaomia ona latou usitaia e mafai ona maua ai na faamanuiaga. Faailoa atu e faapea, o nisi o tulafono ma faamanuiaga e matua patino lava, a o isi e sili atu ona faalauaitele. Faamanatu i tagata aoga o nisi o faamanuiaga folafolaina e mafai ona oo mai i le olaga a sau. E mafai foi ona e faasoa atu le faamatalaga lenei mai ia Elder D. Todd Christofferson o le Korama a Aposetolo e Toasefululua:

E le tatau ona tatou mafaufau i le fuafuaga a le Atua o se masini faifaatau faalevateatea tatou te (1) filifili ai se faamanuiaga moomia, (2) tuu i totonu se aofaiga o galuega lelei, ma (3) vave ai loa ona tiliva mai le oka.

O le a faamamaluina lava e le Atua Ana feagaiga ma folafolaga ia i tatou taitoatasi. … Ae e le o faamanuiaga uma na muai folafola mai i luga o le usiusitai i le tulafono [Mataupu Faavae ma Feagaiga 130:20–21] ua fatuina, mamanuina, ma faatulagaina taimi e tusa ai ma o tatou faamoemoega. Tatou te faia le mea sili ae e tatau ona tuu atu ia te Ia le pulega o faamanuiaga, i le faaletino ma le faaleagaga. (D. Todd Christofferson, “O Lo Tatou Sootaga ma le Atua,” Liahona, Me 2022, 78)

Mataupu Faavae ma Feagaiga 130:22–23. O le natura o le aiga-Atua

Valaaulia tagata aoga e vaai faalemafaufau i le tulaga lenei:

A o e talanoa ma se uo, o le mataupu o le talitonuga i le Atua ua oso mai. Ua aoaoina lau uo e faapea o le Atua e le o se tagata ae e sili atu ona i ai po o se mana o loo i ai ma e maua i soo se mea i le taimi e tasi.

Fai atu i tagata aoga e suesue le Mataupu Faavae ma Feagaiga 130:22–23, ma vaavaai mo upumoni e uiga i le aigaAtua na faaalia e le Alii i le Perofeta o Iosefa Samita e mafai ona fesoasoani i atugaluga e pei o lea na faasoa mai i le tulaga faataitai.

E mafai foi ona e valaaulia i latou e suesue i tusiga “Atua, aiga-Atua” i le Taiala i Tusitusiga Paia po o le “aiga-Atua” i le Taiala i Tusitusiga Paia e sue ai ni mau faaopoopo e mafai ona latou faasoa atu ia latou uo.

A uma ona suesue tagata aoga, talanoaina mea na latou aoaoina e ala i le faia o fesili e pei o le:

• O a upumoni na e maua mai tusitusiga paia e mafai ona e faasoa atu? (Atonu e faailoa mai e tagata aoga upumoni e pei o nei: E toatolu ni peresona eseese i le aiga-Atua. O le Tama ma le Alo e i ai ni tino pa’ia, mamalu o aano ma ivi. O le Agaga Paia o se peresona o agaga.)

• E mafai faapefea e le iloaina ma le talitonu i nei upumoni ona aafia ai lou olaga po o lou sootaga ma le Atua?