Lesona 141: Mataupu Faavae ma Feagaiga 129–32

Mataupu Faavae ma Feagaiga 132:1–2, 34–66

Faaipoipoga Faa’autaunonofo

E ui o le tulafono tumau a le Atua o le faaipoipoga e i le va o le alii e toatasi ma le tamaitai e toatasi (tagai Iakopo 2:27, 30), ae sa i ai taimi na Ia poloaiina ai nisi o Ana fanau e faia faaipoipoga faa’autaunonofo. O tausaga amata o le Ekalesia toefuataiina o se tasi lea o na vaitaimi o le tuusaunoaga. Na poloaiina e le Alii le Perofeta o Iosefa Samita e faia faaipoipoga faa’autaunonofo ma aoao atu le mataupu faavae i isi. O lenei lesona e mafai ona fesoasoani i tagata aoga ia malamalama atili e uiga i le poloaiga a le Alii mo nisi o le Au Paia e faia faaipoipoga faa’autaunonofo i aso popofou o le Ekalesia.

Gaoioiga e ono Mafai Ona Aoao Ai

Poloaiga faigata

Na aoao mai Peresitene Russell M. Nelson:

E masani lava ona talosaga mai le Atua i Ana fanau o le feagaiga e fai mea faigata. (Russell M. Nelson, “Tutu Atu o ni Tagata Moni o le Meleniuma,” Ensign, Oke. 2016, 27)

• O a ni faataitaiga o mea faigata ua talosagaina e le Atua Ana fanau e fai?

  Afai e manaomia, tagai i ni nai tala faatusi paia mo tamaiti aoga e mafaufau i ai. O faataitaiga e mafai ona aofia ai le talosagaina o Aperaamo e osi le taulaga ia Isaako (tagai Kenese 22:1–2, 10), taliaina e Maria le valaau e avea ma tina o Iesu Keriso (tagai Luka 1:26–38), ma o Iesu Keriso o loo puapuagatia ma togiola mo tagata uma (tagai Mataio 26:39). Mafaufau e faaali atu ata e faaalia ai nei mea na tutupu.

  

  

  

• Aisea e te manatu ai ua poloaiina ai e le Atua ia Ana fanau e fai nei mea?

O se vaega o lenei talanoaga, e mafai ona e faitau i le Aperaamo 3:23–25. E mafai foi ona e faaalia le vitio “Is It Hard to Be the Prophet?” (1:54), o loo maua i ChurchofJesusChrist.org.

I lo tatou tisipenisione, na fetalai atu ai le Alii ia Iosefa Samita e faia le tele o mea faigata. O se tasi o poloaiga faigata na tuuina mai e le Atua ia Iosefa Samita o le faatuina lea o le faiga o faaipoipoga faa’autaunonofo, ua ta’ua foi o autaunonofo, i aso popofou o le Ekalesia.

Faamalamalama atu o faaipoipoga faa’autaunonofo e faasino i le faaipoipoga a se alii e toatasi i le sili atu ma le tasi tamaitai. Fesoasoani i tamaiti aoga ia malamalama o se mea masani le tauivi ma lagona o le le mautonu po o le i ai o ni fesili e uiga i lenei faiga. Mafaufau pe tuu se taimi i tamaiti aoga e tusi ai o latou malamalamaaga i totonu o a latou api talaaga mo suesuega.

E lelei mo tamaiti aoga le sailia o a latou lava tali. Valaaulia i latou e gauai atu i le taitaiga latou te maua e ala i le Agaga Paia a o latou suesue. O lau matafaioi o se faiaoga e le o le taliina o fesili uma a tamaiti aoga. E le afaina le faapea atu e le o ia te oe ni tali. E mafai ona e faaalia e tusa lava pe leai ni tali uma, e mafai lava ona tatou agai i luma ma le faatuatua ia Iesu Keriso.

O faatonuga a le Alii e uiga i faaipoipoga faa’autaunonofo

A o faaliliuina le Tusi Paia, sa faitau Iosefa Samita e uiga i nisi o auauna a le Atua o e na faaipoipo i le sili atu ma le tasi le ava. Ina ia iloa le mea na ole atu ai Iosefa i le Atua,faitau le Mataupu Faavae ma Feagaiga 132:1. Ona faitau lea o fuaiupu 2 ma le 34–37, ma vaavaai pe na faapefea ona tali atu le Alii i le fesili a le Perofeta.

• O le a se upumoni ua e aoaoina mai nei fuaiupu e uiga i le taimi e talia ai e le Alii faaipoipoga faa’autaunonofo?

Valaaulia tamaiti aoga e faamatala mai mea ua latou aoaoina ma fesoasoani ia i latou e faailoa mai le upumoni e faapea, e na o le pau le taimi e talia ai e le Alii le faiga o faaipoipoga faa’autaunonofo o le taimi Na Te poloaiina ai.

I le Tusi a Mamona, ua tatou aoao ai o nisi o sa Nifae na amataina faaipoipoga faa’autaunonofo e ese mai le finagalo o le Atua. Sa latou tauamiotonuina a latou faatinoga e faavae i tala faatusi paia mai le Feagaiga Tuai (tagai Iakopo 2:23–24; tagai foi Mataupu Faavae ma Feagaiga 132:38–39). Sa ta’usalaina e le Alii nei faatinoga ma aoao atu ia sa Nifae Lana tagavai mo faaipoipoga.

Faitau le Iakopo 2:26–27, 30, ma vaavaai mo aoaoga a le Alii ia sa Nifae.

• O a mea na faaopoopo e nei fuaiupu i lou malamalama e uiga i faaipoipoga faa’autaunonofo?

Afai e manaomia, fesoasoani i tamaiti aoga ia malamalama o le faaipoipoga i le va o le alii e toatasi ma le tamaitai e toatasi o le tulafono tumau lea a le Atua o le faaipoipoga. Peitai, e i ai taimi na poloaiina ai e le Atua le faia o faaipoipoga faa’autaunonofo e avea o se tuusaunoaga i lenei tulafono tumau. O se tasi o mafuaaga ua tuuina mai ai e le Atua le faiga o faaipoipoga faa’autaunonofo o le “faatutu mai lea o fanau ia te [Ia]” (Iakopo 2:30).

• E mafai faapefea e lenei malamalama ona fesoasoani i au fesili e ono i ai e uiga i le faia o faaipoipoga faa’autaunonofo i aso popofou o le Ekalesia?

Faaipoipoga faa’autaunonofo i le Au Paia anamua

E mafai ona manuia tamaiti aoga mai le avanoa e faaaoga ai punaoa mamana ua filifilia e malamalama atili ai i le faiga o faaipoipoga faa’autaunonofo i aso popofou o le Ekalesia.

Mafaufau e tufa atu le pepa e tufa atu ua faaautuina “Upusii mai ‘Faaipoipoga Faa’autaunonofo i Katelani ma Navu.’” E mafai ona e fai i tamaiti aoga e suesue taitoatasi nei anomea pe faia i ni vaega toalaiti. Valaaulia i latou e vaavaai mo faamatalaga e mafai ona fesoasoani e tali ai a latou fesili o i ai.

A uma ona suesue le vasega, tuu atu ia i latou se avanoa e faasoa mai ai mea na latou aoaoina e ala i le fai atu o fesili e pei o nei:

• O le a se mea na e aoaoina mai i au suesuega na e iloa e aoga?

• Na faape’ī le talosagaina o Iosefa Samita ma isi uluai tagata o le Ekalesia e faia ia faaipoipoga faa’autaunonofo?

• Na faapefea ona fesoasoani le Atua i le Au Paia i lenei poloaiga faigata?

Fesoasoani i tamaiti aoga ia malamalama e le afaina pe afai o i ai pea ni a latou fesili e uiga i lenei mataupu. O se poloaiga faigata mo uluai Au Paia ona ola ai ma e mafai ona faigata ona malamalama i ai i le taimi nei. Peitai, o le taulai atu i upumoni taua tatou te iloa e uiga i le Tama Faalelagi, Iesu Keriso, ma le talalelei toefuataiina e mafai ona fesoasoani ia i tatou e agai ai i luma i le faatuatua. Atonu e te manao e tuuina atu se molimau patino ma faasoa atu se faamatalaga e pei o lenei:

Ua aoao mai Elder Neil L. Andersen o le Korama a Aposetolo e Toasefululua:

E le faamalosia lava e le faatuatua se tali i fesili uma ae saili e le faatuatua le faamautinoaga ma le lototele e agai atu ai i luma, ma le iloaina i nisi taimi, “Ou te le iloaina mea uma, ae ua lava lo’u iloa e agaigai atu ai pea i le ala o le avea ai ma soo.” (Neil L. Andersen, “O Le Faatuatua E Le Tupu Faafuasei, ae e ala i Filifiliga,” Ensign, po o le Liahona, Nov. 2015, 66)

Aotele mai mea sa e aoaoina

Ina ia fesoasoani i tamaiti aoga e faaleo mai mea sa latou aoaoina i le aso, mafaufau e folasia atu se ata faataitai e pei o lenei:

Vaai faalemafaufau i le faia o se talanoaga ma se uo o sē sa taumanatunatu pe sa faasagatau Iosefa Samita i le finagalo o le Atua ina ua ia faatuina le faiga o faaipoipoga faa’autaunonofo i le Ekalesia. Faaalu sina taimi e otooto ai ni manatu i lau api talaaga e mafai ona e faasoa atu i lau uo i le agalelei ma le onosai.

A uma ona maua e tamaiti aoga se avanoa e tusi ai i totonu o a latou api talaaga, e mafai ona e fesili atu pe i ai ni tamaiti aoga e lagona le toafimalie e faasoa mai mea na latou tusia. E mafai foi ona avea lenei mea o se taimi lelei mo tamaiti aoga e faailoa mai ai soo se tali atonu latou te maua i nisi o a latou lava fesili po o atugaluga.

Mafaufau e molimau atu i le vasega a o latou faatinoina le faatuatua ia Iesu Keriso ma liliu atu i lo latou Tama i le Lagi mo se fesoasoani, o le a Ia fesoasoani ia i latou i luitau po o fesili latou te feagai i o latou lava olaga.

Punaoa Faaopoopo

Mataupu Faavae ma Feagaiga 132:1, 37–39. O a palake?

O le upu palake e faatatau i se tamaitai o lē, i vaitaimi o le Feagaiga Tuai, sa faaipoipoina faaletulafono i se alii ae e maualalo teisi ifo le tulaga faaleagafesootai nai lo o se avā. O palake sa le o se vaega o le faiga o faaipoipoga autaunonofo i lo tatou tisipenisione.

O fea e mafai ona ou aoao atili ai e uiga i faaipoipoga faa’autaunonofo i le popofou o le Ekalesia?

• Autu o Tusigatala i le Talalelei, “Plural Marriage in The Church of Jesus Christ of Latter-day Saints,” ChurchofJesusChrist.org

• Autu o Tusigatala i le Talalelei,Faaipoipoga Autaunonofo i Katelani ma Navu,” ChurchofJesusChrist.org

• Foundations of the Restoration Class Preparation Material (2020), 107–12

• “E Mafai Faapefea Ona Tatou Faamatalaina Le Tele o Ava Pe a Fesili Se Tasi e uiga i ai?,” New Era, Nov. 2016, 48

• “Mormon Polygamy Q and A” (video), ChurchofJesusChrist.org

O le a se mea ua tatou iloa e uiga i faaipoipoga faa’autaunonofo ua faigata mo Iosefa Samita ona talia ma faatino?

Sa faamatalaina e Eliza R. Snow, o lē sa faamauina i le Perofeta o Iosefa Samita ma mulimuli ane, na auauna atu o se Peresitene Aoao lona lua o le Aualofa:

O le Perofeta o Iosefa Samita … sa faamatalaina le faigata faalemafaufau sa ia oo i ai i le faatoilaloina o ona lagona inoino … e faatatau i le faalauiloaga o faaipoipoga autaunonofo. Sa ia iloa le siufofoga o le Atua—sa ia iloaina le poloaiga a le Silisili Ese ia te ia, o le agai i luma. … Sa ia iloa, sa ia te ia na le gata i ona lava manatu faapito ma manatu na i ai muamua ina ia faatoilalo [talitonuga faalelotu] ma ia manumalo ai, ae o manatu foi o le lalolagi Kerisiano atoa na tau fai fepulafi atu ia te ia; ae peitai, o le Atua, o lē e sili atu i mea uma, na tuuina mai le poloaiga, ma e ao ona usitaia o Ia. (Eliza R. Snow, i le Biography and Family Record of Lorenzo Snow [1884], 69)

O a tala a isi e uiga i le aoao e talia le poloaiga a le Alii i faaipoipoga faa’autaunonofo?

Ua faamatala e Zina Diantha Huntington:

“Sa ou suesuea tusitusiga paia ma na ala i le tatalo faamaualalo i lo’u Tama Faalelagi, na ou maua ai se molimau mo a’u lava e faapea, na finagalo le Atua ina ia faatulagaina lena poloaiga [o le faaipoipoga faa’autaunonofo] i lana ekalesia. Sa ou faia se osigataulaga sili atu nai lo o le tuuina atu o lo’u ola, ona ou te le’i toe mafaufauina lava e vaavaai mai i ai o se tamaitai faamamaluina e i latou sa ou alofa faapelepele i ai. [E mafai faapefea] ona ou fetuunaia le faamaoni [ma] faataatia ese le molimau mautinoa a le agaga o le Atua mo le Mamalu o lenei lalolagi? (Zina Diantha Huntington Young, autobiographical sketch, Zina Card Brown Family Collection, Church History Library, Salt Lake City; ua faalaugatasia le sipelaga ma le faasa’oga).

Na faasoa mai e Fipe Uitilafi, le faletua o Wilford Woodruff:

“O le taimi muamua lava na aoao mai ai le mataupu o le tele o ava, sa ou faapea o le mea aupito sili lea ona leaga ua ou faalogo i ai; o lea na ou tetee ai i ai i le mea na gata ai lo’u mafai, seia oo ina ou ma’i ma matuai faanoanoa lava. Ae peitai, ina ua faatalitonuina a’u e faapea na afua mai o se faaaliga mai le Atua e ala mai ia Iosefa, ma le iloa o ia o se perofeta, sa ou tauivi ma lo’u Tama Faalelagi i le tatalo faatauanau, ina ia taitaia tonu a’u i lena taimi aupito taua o lo’u olaga. Sa oo mai le tali. Sa tuuina mai le toafilemu i lo’u mafaufau. Sa ou iloaina o le finagalo lea o le Atua. (Phebe Woodruff, in Edward W. Tullidge, The Women of Mormondom [1877], 413; faalaugatasia faailoga)

Sa saunoa Peresitene Lorenzo Snow (1814–1901):

Sa ou masani lelei ia Iosefa Samita, le Perofeta, i le sefululua po o le sefulufa tausaga, o lē na ou aoao muamua mai ai lenei aoaoga faavae, ma iloaina o ia o se tamalii faamaoni ma amiosa’o. Peitai ane, ou te le faalagolago i lana upu mo lo’u malamalama e uiga i faaipoipoga faa’autaunonofo; na tuuina mai e le Alii ia te a’u se molimau paia e faamautu ai Ana aoaoga, lea e leai se tagata e mafai ona aumaia pe toe aveesea. (Lorenzo Snow, in Eliza R. Snow, Biography and Family Record of Lorenzo Snow [1884], 405)

Gaoioiga Faaopoopo e Aoao Ai

Taliina o fesili faigofie a o lei oo i fesili faigata atu

Fesoasoani i tamaiti aoga ia malamalama o nisi o fesili e sili atu ona taua le iloa o tali i lo isi. E mafai ona e faasoa atu le saunoaga lenei mai ia Elder Lawrence E. Corbridge, o le sa avea muamua ma Fitugafulu, o lē na vaevaeina fesili i fesili faigofie ma fesili e faigata atu.

E le tutusa uma fesili ma e le tutusa uma upumoni. O uluai fesili e aupito sili ona taua. O isi mea uma o loo i lalo ifo. E itiiti lava ni nai fesili autu. O le a ou ta‘ua le fa o na fesili.

1. O i ai ea se Atua o lo tatou Tama?

2. O Iesu Keriso ea o le Alo o le Atua, le Faaola o le lalolagi?

3. O Iosefa Samita ea o se perofeta?

4. Pe O Le Ekalesia a Iesu Keriso o le Au Paia o Aso e Gata Ai o le malo lea o le Atua i le lalolagi?

O le eseesega, o fesili tulitatao e le muta. E aofia ai fesili e uiga i le talafaasolopito o le Ekalesia, tele o ava, … ma faasolosolo atu ai lava. (Lawrence E. Corbridge, “Stand Forever” [Brigham Young University devotional, Ian. 22, 2019], speeches.byu.edu

Fesoasoani i tamaiti aoga ia malamalama o fesili e uiga i ava e tele o fesili faigata atu na. Afai e amata e tamaiti aoga ona tali mo i latou lava pe o se perofeta ia Iosefa Samita, e mafai foi ona taliina a latou fesili e uiga i faaipoipoga faa’autaunonofo. O la latou tali i lenei fesili faigofie o le a mafai ai ona latou agai i luma ma le faatuatua a o latou saili pea.

Punaoa tau vitio

Mafaufau e faaaoga le vitio lenei i le taimi o le lesona e fesoasoani ai i tamaiti aoga ia iloa pe na faapefea ona taulimaina e se tasi o tamaitai talavou ana fesili sa i ai e uiga i faaipoipoga faa’autaunonofo.

“Mauaina o le Malamalamaaga Faaleagaga: Tala a Madison” (8:35)

A uma le vitio, e mafai ona e talanoaina mea na aoaoina e tamaiti aoga e ala i le fai atu o fesili e pei o nei:

• O le a le mea na fai e Madison e fesoasoani ai ia te ia ia lagona le filemu e uiga i popolega sa ia maua muamua?

• O le a se mea na e aoaoina mai lenei vitio e mafai ona fesoasoani ia te oe i au fesili o i ai e uiga i le talalelei?