“Lesona 140—Mataupu Faavae ma Feagaiga 131: O Le Feagaiga Fou ma Tumau e Faavavau o le Faaipoipoga,” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 131,” Tusi Lesona a le Faiaoga Seminare o le Mataupu Faavae ma Feagaiga
Lesona 140: Mataupu Faavae ma Feagaiga 129–132
Mataupu Faavae ma Feagaiga 131
O Le Feagaiga Fou ma Tumau e Faavavau o le Faaipoipoga
O le faaipoipoga i le va o le alii ma le tamaitai o se vaega taua o le fuafuaga a le Tama Faalelagi mo Lana fanau. E ala mai i le Perofeta o Iosefa Samita, na faaali mai ai e le Alii e faapea, a faamauina tane ma ava e ala i le mana o le perisitua ma faamaoni i a latou feagaiga, o le a tumau la latou faaipoipoga i talaatu o le oti. O lenei lesona e mafai ona fesoasoani i tagata aoga e malamalama ai i le taua o faaipoipoga e faavavau i le fuafuaga a le Tama Faalelagi.
Gaoioiga E Ono Mafai Ona Aoao Ai
Malamalama i le faaipoipoga
Mafaufau e tusi le faamatalaga lenei i luga o le laupapa ma valaaulia tagata aoga e talanoaina o latou manatu e uiga i mea o loo aoaoina mai ai. Mo se faataitaiga, e mafai ona e tuuina tagata aoga i ni vaega toalaiti ma talanoaina fesili o loo mulimuli mai.
Na tautino mai e Elder David A. Bednar o le Korama a Aposetolo e Toasefululua e faapea:
O se tasi o galuega e sili o o tatou taimi … o le fesoasoani i tagata ia malamalama i le uiga moni ma le faamoemoega o le faaipoipoga. (David A. Bednar, “The Divine Pattern of Eternal Marriage,” Ensign, Sete. 2020, 41)
-
E faapefea ona e faamatalaina “le uiga moni ma le faamoemoega o le faaipoipoga”?
-
O a nisi o faataitaiga o le le malamalama o tagata e uiga i le faaipoipoga i aso nei?
Atonu e faasoa mai e tagata aoga ni le malamalama sese e pei o nisi o tagata e lagona e sili atu lo latou nofofua pe faapea foi o le faaipoipoga e le manaomia ona i ai i le va o se alii ma se tamaitai.
Valaaulia tagata aoga e fatu se ulutala i a latou api talaaga mo suesuega ua faaulutalaina Aisea e taua ai le faaipoipoga i le Atua? Valaaulia i latou e tusi pe faapefea ona latou taliina lena fesili. E mafai foi ona valaaulia i latou e mafaufau loloto i o latou lagona patino po o fesili o ia i latou e uiga i le faaipoipoga.
Uunaia i latou e faaopoopo tali i a latou api talaaga mo suesuega i le aluga o le lesona. Molimau atu a o latou saili ma le lotomaualalo ia malamalama pe aisea e taua ai le faaipoipoga i le Atua, e mafai e le Agaga Paia ona faamalosia a latou molimau i le faaipoipoga ma fesoasoani e foia a latou fesili po o atugaluga.
Faaipoipoga e faavavau
Mafaufau e faasoa pe aotele le parakalafa lenei e fesoasoani ai ia malamalama tagata aoga i le talaaga mo aoaoga i le Mataupu Faavae ma Feagaiga 131:
Ia Me 1843, a o i ai i Ramusi, Ilinoi, sa ta’u atu ai e Iosefa Samita ia Peniamina ma Melisa Johnson sa ia faamoemoe e faaipoipo ia i laua e tusa ai ma le tulafono a le Alii. Ona ua uma ona la faaipoipo, sa talasua Peniamina o le a toe faaipoipo o ia ia Melisa pe afai na te faamasani ia te ia. Ae sa taua ia Iosefa. Sa aoaoina i laua e le Perofeta i le aoaoga faavae o le faaipoipoga e faavavau, ona faamauina lea o le ulugalii mo le faavavau. Sa auauna atu Viliamu Clayton o se tusiupu a Iosefa i lena taimi ma tusia ana aoaoga, lea ua maua nei i le Mataupu Faavae ma Feagaiga 131 (tagai i le “Our Hearts Rejoiced to Hear Him Speak,” i le Revelations in Context [2016], 279–280).
Ae e te lei valaauliaina tagata aoga e faitau ia fuaiupu nei, atonu e fesoasoani mo i latou le iloa o le tikeri aupito maualuga o le malo selesitila e tele ina faasino i ai o le ola e faavavau po o le faaeaga. O i latou ua faaeaina o le a ola e faavavau faatasi ma le Tama Faalelagi ma Iesu Keriso ma avea e faapei o i Laua. “O le feagaiga fou ma tumau e faavavau o le faaipoipoga” e faasino i ulugalii o le feagaiga e osia i le malumalu lea e mafai ai ona faamauina i laua mo le olaga nei ma le faavavau atoa.
Faitau le Mataupu Faavae ma Feagaiga 131:1–4, ma vaavaai mo mea na aoao atu e le Perofeta e uiga i le faaipoipoga.
O leMataupu Faavae ma Feagaiga 131:1–4 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala iloga ina ia faigofie ona latou mauaina.
-
O a ni mea o aoao mai e nei fuaiupu e uiga i le taua o le faaipoipoga i le fuafuaga a le Tama Faalelagi?
Tusi se upumoni e pei o lea i luga o le laupapa e faaaoga ai upu a tagata aoga, pe a mafai: Ina ia avea e faapei o le Atua ma toe nonofo faatasi ma Ia i le malo selesitila, e tatau ona tatou ulu atu i le feagaiga fou ma tumau e faavavau o le faaipoipoga. Valaaulia tagata aoga e faaopoopo lenei upumoni i le lisi o tali i a latou api talaaga mo suesuega.
-
O le a sou manatu e mafai faapefea e le faaipoipoga ona saunia i tatou ia avea atili e faapei o le Atua?
O le taua o le faaipoipoga i le fuafuaga a le Atua
Valaaulia tagata aoga e faaauau pea ona aoao e uiga i le taua o le faaipoipoga i le fuafuaga a le Atua. E mafai ona latou galulue taitoatasi i gaoioiga nei pe i ni vaega toalaiti. Afai e manaomia, mafaufau e lolomi lauga po o tusiga mai taitai o le Ekalesia e mafai ona suesue e tagata aoga. Valaaulia tagata aoga e faamau mea sa latou aoaoina i a latou api talaaga mo suesuega.
O se vaega o lenei gaoioiga, e mafai foi ona e faaalia le vitio “Eternal Marriage, an Apostolic Perspective” (5:26), e maua i le poloka tusitusi o le Musumusuga ChurchofJesusChrist.org.
Filifili se tasi pe sili atu o fautuaga nei e iloa ai tali faaopoopo i le fesili “Aisea e taua ai le faaipoipoga i le Atua?” Faaopoopo upumoni na e aoaoina i lau api faamaumau mo suesuega.
-
Sailiili i tusitusiga paia. Suesue Mataupu Faavae ma Feagaiga 49:15–17; 132:19. Saili fuaitau faaopoopo e suesue ai e ala i le sueina o le “faaipoipoga” i le Taiala i Autu po o le Taiala i Tusitusiga Paia.
-
Suesue i aoaoga a taitai o le Ekalesia. Saili le “faaipoipoga” i le polokalama o le Gospel Library po o i le vaega o autu o le faila o teuina o tuatusi o le konafesi aoao.
-
Auina atu se feau tusitusia i se tagata o le aiga po o se tagata matua faatuatuaina e fesili iai pe faapefea ona latou taliina le fesili “Aisea e taua ai le faaipoipoga i le Atua?”
A uma ona suesue tagata aoga, valaaulia i latou taitoatasi e tusi i luga o le laupapa se upumoni se tasi na latou aoaoina e uiga i le mafuaaga e taua ai le faaipoipoga i le Atua. E mafai foi ona latou faaaofia ai le punavai sa latou faaaogaina e maua ai lena upumoni. Valaaulia le vasega e vaavaai i mea na tusia e a latou uo i le vasega ma faailoa mai upumoni e mafai ona latou faaopoopo i a latou api talaaga mo suesuega. Mafaufau e faatalanoa mea na aoaoina e tagata aoga e ala i le faia iai o fesili e pei o nei:
-
O le a se mea na e aoaoina e te lei iloaina muamua?
-
E mafai faapefea e nei aoaoga ona fesoasoani ia te oe pe a e matauina manatu i le lalolagi e feteenai ma tulafono a le Atua e uiga i le faaipoipoga?
-
E mafai faapefea e le vaai atu i le faaipoipoga mai le vaaiga a le Atua ona aafia ai ou lagona e uiga i le faaipoipoga?
Faamalamalama le aoaoga faavae o le Faaipoipoga
Afai e te lagona o le a manuia tagata aoga mai le aoteleina o mea sa latou aoaoina, mafaufau e tuu i ni paga. Valaaulia i latou e tali i le tulaga faataitai ma fesili nei ma a latou paga:
Vaai faalemafaufau o loo e talanoaina ou sini i le lumanai faatasi ma se uo. Ina ua e ta’ua e te faamoemoe e faaipoipo, ua fesili lau uo, “Aisea e taua ai le faaipoipoga?”
-
E faapefea ona e tali atu i lau uo e faaaoga ai aoaoga sa e suesueina i le aso?
Uunaia tagata aoga e sauni e maua faamanuiaga o le faaipoipoga e faavavau. Molimau atu a o latou faatinoina le faatuatua ia Iesu Keriso, o le a latou maua faamanuiaga e finagalo o Ia e tuuina atu ia i latou.
Tauloto
Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fasifuaitau autu o mau i le taimi o lenei lesona ma toe faamanatu i latou i lesona i le lumanai. O le fasifuaitau autu o mau o le “O le feagaiga fou ma tumau e faavavau o le faaipoipoga.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga Toe Faamanatu o le Atamai i Aoaoga Faavae.”