Դաս 140. Վարդապետություն և Ուխտեր 129–132

Վարդապետություն և Ուխտեր 131

Ամուսնության նոր և հավիտենական ուխտը

Տղամարդու և կնոջ ամուսնությունը Իր զավակների համար Աստծո ծրագրի կարևոր մասն է։ Մարգարե Ջոզեֆ Սմիթի միջոցով Տերը հայտնել է, որ երբ ամուսինները կնքվեն քահանայության զորությամբ և հավատարիմ մնան իրենց ուխտերին, նրանց ամուսնությունը կշարունակվի անգամ մահից հետո: Այս դասը կօգնի ուսանողներին հասկանալ հավերժական ամուսնության կարևորությունը Երկնային Հոր ծրագրում:

Հնարավոր ուսումնական վարժություններ

Ընկալեք ամուսնությունը

Գրատախտակին գրեք հետևյալ խոսքերը և առաջարկեք ուսանողներին քննարկել իրենց մտքերն այն մասին, թե ինչ են դրանք ուսուցանում: Օրինակ՝ կարող եք ուսանողներին բաժանել փոքր խմբերի և քննարկել հետևյալ հարցերը:

Տասներկու Առաքյալների Քվորումից երեց Դեյվիդ Ա. Բեդնարը հայտարարել է․

Մեր ժամանակների մեծ անելիքներից մեկն է … օգնել մարդկանց հասկանալ ամուսնության ճշմարիտ իմաստը և նպատակը։ (Դեյվիդ Ա. Բեդնար, «The Divine Pattern of Eternal Marriage,» Ensign, սեպտ. 2020, 41)

• Ինչպե՞ս կսահմանեք «ամուսնության ճշմարիտ իմաստն ու նպատակը»:

• Ամուսնության վերաբերյալ մարդիկ ի՞նչ թյուրըմբռնումներ կարող են ունենալ այսօր։

Ուսանողները կարող են կիսվել թյուրըմբռնման հետևյալ օրինակներով՝ որոշ մարդիկ կարծում են, որ ավելի լավ է միայնակ լինել կամ ամուսնությունը պարտադիր չէ, որ լինի տղամարդու և կնոջ միջև:

Ուսանողներին առաջարկեք իրենց ուսումնասիրության օրագրերում գրել հետևյալ վերնագիրը՝ Ինչո՞ւ է ամուսնությունը կարևոր Աստծո համար: Առաջարկեք նրանց գրել, թե իրենք ինչպես կպատասխանեին այդ հարցին: Կարող եք նրանց առաջարկել նաև խորհել ամուսնության վերաբերյալ իրենց անձնական զգացմունքների կամ ունեցած հարցերի շուրջ:

Խրախուսեք նրանց դասի ընթացքում պատասխաններ ավելացնել իրենց օրագրերում: Վկայեք, որ երբ նրանք խոնարհաբար ձգտեն հասկանալ, թե ինչու է ամուսնությունը կարևոր Աստծո համար, Սուրբ Հոգին կամրացնի ամուսնության մասին իրենց վկայությունը և կօգնի պատասխանել իրենց հարցերին կամ հաղթահարել մտահոգությունները:

Հավերժական ամուսնություն

Կարող եք կիսվել կամ ամփոփ ներկայացնել հետևյալ պարբերությունը, որպեսզի օգնեք ուսանողներին հասկանալ Վարդապետություն և Ուխտեր 131 բաժնում արձանագրված ուսմունքների համատեքստը.

1843 թ. մայիսին՝ գտնվելով Իլինոյս նահանգի Ռեյմուս քաղաքում, Ջոզեֆ Սմիթն ասաց Բենջամին և Մելիսա Ջոնսոններին, որ մտադիր է ամուսնացնել նրանց՝ համաձայն Տիրոջ օրենքի: Քանի որ նրանք արդեն ամուսնացած էին, Բենջամինը կատակեց, որ նա նորից կամուսնանա Մելիսայի հետ միայն այն դեպքում, եթե նա սիրահետի իրեն: Սակայն Ջոզեֆը լուրջ էր խոսում։ Մարգարեն նրանց ուսուցանեց հավերժական ամուսնության վարդապետությունը, ապա կնքեց զույգին հավերժության համար: Ուիլյամ Քլեյթոնն այդ ժամանակ ծառայում էր որպես Ջոզեֆի գրագիր և արձանագրեց նրա ուսմունքները, որոնք այժմ ներկայցված են Վարդապետություն և Ուխտեր 131 բաժնում (տես «Our Hearts Rejoiced to Hear Him Speak,» բաժինը՝ Հայտնություններ համատեքստում նյութում [2016], 279–280)։

Նախքան ուսանողներին կառաջարկեք կարդալ հետևյալ հատվածները, նրանց համար օգտակար կլինի իմանալ, որ սելեստիալ թագավորության ամենաբարձր աստիճանը հաճախ կոչվում է հավերժական կյանք կամ վեհացում: Նրանք, ովքեր վեհացած են, հավերժ կապրեն Երկնային Հոր և Հիսուս Քրիստոսի հետ և կդառնան Նրանց նման: «Ամուսնության նոր և հավիտենական ուխտը» վերաբերում է այն ուխտին, որ զույգերը կապում են տաճարում, որը թույլ է տալիս նրանց կնքվել ժամանակի և ողջ հավերժության համար:

Կարդացեք Վարդապետություն և Ուխտեր 131․1–4 հատվածները և փնտրեք, թե Մարգարեն ինչ է ուսուցանել ամուսնության մասին։

Վարդապետություն և Ուխտեր 131․1–4 հատվածները սուրբ գրությունների սերտման հատվածներ են։ Առաջարկեք ուսանողներին նշել վարդապետության սերտման հատվածները տարբերակիչ եղանակով, որպեսզի կարողանան հեշտությամբ գտնել դրանք:

• Ի՞նչ են ձեզ ուսուցանում այս հատվածներն ամուսնության կարևորության մասին Երկնային Հոր ծրագրում:

  Գրատախտակին հնարավորության դեպքում ուսանողների բառերով գրեք նմանատիպ մի ճշմարտություն. որպեսզի նմանվենք Աստծուն և նորից ապրենք Նրա հետ սելեստիալ արքայությունում, մենք պետք է մտնենք ամուսնության նոր և հավիտենական ուխտի մեջ: Ուսանողներին առաջարկեք ավելացնել այս ճշմարտությունն իրենց օրագրերի պատասխանների ցանկում:

• Ըստ ձեզ, ինչպե՞ս կարող է ամուսնությունը պատրաստել մեզ ավելի շատ նմանվել Աստծուն:

Ամուսնության կարևորությունն Աստծո ծրագրում

Ուսանողներին առաջարկեք շարունակել սովորել ամուսնության կարևորության մասին Աստծո ծրագրում: Նրանք կարող են կատարել հետևյալ վարժություններն անհատապես կամ փոքր խմբերով։ Անհրաժեշտության դեպքում մտածեք Եկեղեցու ղեկավարների ելույթներ կամ հոդվածներ տպելու մասին, որոնք ուսանողները կարող են ուսումնասիրել: Ուսանողներին առաջարկեք իրենց ուսումնասիրության օրագրերում գրել այն, ինչ սովորում են։

Այս վարժության ընթացքում կարող եք նաև ցուցադրել «Eternal Marriage, an Apostolic Perspective» (5:26) տեսանյութը, որը հասանելի է ոգեշնչում բլոգում՝ ChurchofJesusChrist.org կայքում։

Ընտրեք հետևյալ առաջարկներից մեկը կամ մի քանիսը՝ «Ինչո՞ւ է ամուսնությունը կարևոր Աստծո համար» հարցին լրացուցիչ պատասխաններ գտնելու համար: Ձեր իմացած ճշմարտություններն ավելացրեք ձեր ուսումնասիրության օրագրի պատասխանների ցանկին:

1. Ուսումնասիրեք սուրբ գրությունները: Ուսումնասիրեք Վարդապետություն և Ուխտեր 49․15–17, 132․19 հատվածները։ Ուսումնասիրության համար գտեք լրացուցիչ հատվածներ՝ փնտրելով «ամուսնություն» բառը Թեմաների ուղեցույցում կամ Սուրբ գրքերի ուղեցույցում:

2. Ուսումնասիրեք Եկեղեցու ղեկավարների ուսմունքները: Որոնեք «ամուսնություն» բառը Gospel Library հավելվածում կամ գերագույն համաժողովի ուղերձների արխիվում՝ թեմաների բաժնում:

3. Տեքստային հաղորդագրություն ուղարկեք ընտանիքի անդամին կամ վստահելի չափահաս անձին՝ հարցնելով, թե իրենք ինչպես կպատասխանեն «Ինչո՞ւ է ամուսնությունը կարևոր Աստծո համար» հարցին:

Երբ ուսանողներն ավարտեն ուսումնասիրությունը, յուրաքանչյուրին առաջարկեք գրատախտակին գրել իրենց սովորած մեկ ճշմարտություն, թե ինչու է ամուսնությունը կարևոր Աստծո համար: Նրանք կարող են ներառել նաև այն նյութը, որն օգտագործել են այդ ճշմարտությունը գտնելու համար: Դասարանին առաջարկեք աչքի անցկացնել իրենց դասընկերների գրածը և նշել ճշմարտությունները, որոնք կարող են ավելացնել իրենց ուսումնասիրության օրագրերում: Քննարկեք, թե ինչ սովորեցին ուսանողները՝ տալով հետևյալ հարցերը.

• Ի՞նչ սովորեցիք, որը նախկինում չգիտեիք:

• Ինչպե՞ս կարող են այս ուսմունքներն օգնել ձեզ, երբ աշխարհում հանդիպում եք պատկերացումների, որոնք հակասում են ամուսնության վերաբերյալ Աստծո օրենքներին:

• Ամուսնությունն Աստծո տեսանկյունից դիտարկելը ինչպե՞ս կարող է ազդել ամուսնության հանդեպ ձեր վերաբերմունքի վրա:

Բացատրեք ամուսնության վարդապետությունը

Եթե կարծում եք, որ ուսանողներին օգուտ կտա իրենց սովորածի ամփոփումը, կարող եք նրանց բաժանել զույգերի: Առաջարկեք նրանց արձագանքել հետևյալ սցենարին և հարցերին իրենց զուգընկերոջ հետ.

Պատկերացրեք, որ ձեր ընկերոջ հետ քննարկում եք ձեր ապագա նպատակները։ Երբ նշում եք, որ հույս ունեք ամուսնանալու, ձեր ընկերը հարցնում է. «Ինչո՞ւ է ամուսնությունը կարևոր»:

• Ինչպե՞ս կարձագանքեք ձեր ընկերոջը՝ օգտագործելով այն ուսմունքները, որոնք դուք այսօր ուսումնասիրել եք:

Խրախուսեք ուսանողներին պատրաստվել ստանալու հավերժական ամուսնության օրհնությունները: Վկայեք, որ երբ նրանք հավատք գործադրեն առ Հիսուս Քրիստոս, կզգան այն օրհնությունները, որոնք Նա ցանկանում է տալ իրենց:

Մտապահեք

Կարող եք օգնել ուսանողներին այս դասի ընթացքում մտապահել վարդապետության սերտման հղումը և սուրբ գրության հիմնական արտահայտությունը, ապա կրկնել դրանք հետագա դասերի ժամանակ: Սուրբ գրության հիմնական արտահայտությունն է «Ամուսնության նոր և հավիտենական ուխտը»: Մտապահելու համար նախատեսված վարժությունների վերաբերյալ գաղափարները ներկայացված են հավելվածի նյութերում՝ «Վարդապետության սերտման կրկնության վարժություններ» բաժնում:

Լրացուցիչ նյութեր

Որտեղի՞ց կարող եմ ավելին իմանալ հավերժական ամուսնության մասին։

• “About Temple Sealings,” temples.ChurchofJesusChrist.org

• «The Divine Pattern of Eternal Marriage», Դեյվիդ Ա. Բեդնար, Ensign, սեպտ. 2020, 34–41

Արդյո՞ք նոր և հավիտենական ուխտը ներառում է միայն ամուսնությունը:

Տես Սուրբ գրքերի ուղեցույց, «New and Everlasting Covenant,» scriptures.ChurchofJesusChrist.org:

Ի՞նչ օրհնություններ կարող ենք ստանալ՝ ամուսնանալով տաճարում:

Նախագահ Ռասսել Մ. Նելսոնն ուսուցանել է․

Եթե ես կարողանայի մեկ առ մեկ խոսել յուրաքանչյուր չափահաս երիտասարդի հետ, ես կխնդրեի ձեզ, որ փնտրեք մի զուգընկեր, որի հետ դուք կարող եք կնքվել տաճարում: Գուցե մտածեք, թե դա ի՞նչ փոփոխություն կառաջացնի ձեր կյանքում: Ես խոստանում եմ, որ դա ամեն ինչ կփոխի։ Երբ ամուսնանաք տաճարում և անընդհատ վերադառնաք այնտեղ՝ դուք կամրապնդվեք և կառաջնորդվեք ձեր որոշումներում:

Եթե ես կարողանայի խոսել ամուսիններից յուրաքանչյուրի հետ, որոնք դեռ չեն կնքվել տաճարում, ես կխնդրեի ձեզ, որ անհրաժեշտ քայլեր ձեռնարկեք՝ այդ պսակող և կյանքը փոխող արարողությունը ստանալու համար։ Արդյո՞ք դա կփոխի ձեր կյանքը։ Միայն այն դեպքում, եթե ցանկանում եք հավիտյան առաջադիմել և հավերժ միասին լինել։ Հավերժ միասին լինելու ցանկությունը հնարավոր չի դարձնի հավերժ միասին լինելու իրողությունը։ Ոչ մի այլ արարողություն կամ պայմանագիր դա իրականություն չի դարձնի։ (Ռասսել Մ․ Նելսոն, «Տաճարը և ձեր հոգևոր հիմքը», Լիահոնա, նոյեմբեր 2021, 95)

Ինչպե՞ս կարող են նրանք, ովքեր ներկայումս ամուսնացած չեն, ստանալ հավերժական կյանքի օրհնությունները:

Հավերժական կյանքի մասին Աստծո խոստումը ներառում է՝ հավերժական ամուսնության, երեխաներ ունենալու և հավերժական ընտանիքի մյուս բոլոր օրհնությունները: Այս խոստումը վերաբերում է նրանց, ովքեր Եկեղեցում ներկայումս ամուսնացած չեն կամ ընտանիք չունեն (տես 38.1.4): Թեպետ վեհացման օրհնությունների ստացման ստույգ ժամանակը և եղանակը հայտնի չեն, այդ օրհնությունները երաշխավորված են նրանց համար, ովքեր ձգտում են ապրել որպես Հիսուս Քրիստոսի աշակերտներ: (Ընդհանուր ձեռնարկ․ ծառայել Հիսուս Քրիստոսի Վերջին Օրերի Սրբերի Եկեղեցում, 2.1)

Վարդապետություն և Ուխտեր 132․19 Ի՞նչ է նշանակում կնքվել Խոստումի Սուրբ Հոգով։

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Խոստումի Սուրբ Հոգին Սուրբ Հոգու հաստատուն զորությունն է։ Խոստումի Սուրբ Հոգով կնքվելու համար պարտադիր է արարողություն, երդում կամ ուխտ երկրի վրա և երկնքում։ (տես Վարդապետություն և Ուխտեր 132․7:) Սուրբ Հոգուց այս «հավանության կնիքը» ստանալը՝ ավետարանի ուխտերը «ժամանակի ընթացքում» պահելիս, հավատարմության, ազնվության և հաստատակամության արդյունք է (Մովսես 7.21)։ Այնուամենայնիվ, այս կնիքը կարող է կորսվել անարդարության և օրինազանցության միջոցով: (Դեյվիդ Ա. Բեդնար, «Դուք պետք է վերստին ծնվեք», Լիահոնա, մայիս 2007, 22)

Օժանդակ ուսումնական վարժություններ

Պիտանիության ժամկետը

Հնարավորության դեպքում բերեք փաթեթավորված սննդամթերք, որի վրա առկա է պիտանիության ժամկետը:

• Ո՞րն է պիտանիության ժամկետի առկայության նպատակը:

• Ի՞նչ կարելի է անել՝ մթերքը պիտանիության ժամկետից հետո պահպանելու համար։

• Դա ի՞նչ առնչություն ունի ամուսնության հետ:

Կարդացեք կամ դիտեք հետևյալը։ Գտեք, թե ինչ արեցին նախկինում Յոթանասունից երեց Էնրիկե Ռ. Ֆալաբելլան և նրա կինը, որպեսզի չեղարկեն իրենց ամուսնության պիտանիության ժամկետը:

Երբ ես վերադարձա իմ միսիայից, հանդիպեցի մի գեղեցիկ երիտասարդ կնոջ՝ մինչև գոտկատեղը հասնող երկար, սև մազերով: Նա ուներ գեղեցիկ, մեծ մեղրածոր աչքեր և վարակիչ ժպիտ: … Նա ինձ գրավեց առաջին իսկ հայացքից։

Կինս նպատակ էր դրել ամուսնանալ տաճարում, չնայած այդ ժամանակ մոտակա տաճար հասնելու համար պահանջվում էր 4000 մղոն (6400 կմ) ճանապարհ անցնել։

Մեր քաղաքացիական ամուսնության արարողությունը և ուրախ էր, և տխուր, քանի որ մենք ամուսնացել էինք որոշակի ժամկետով: Հանձնակատարն արտասանեց՝ «Այժմ ես ձեզ հայտարարում եմ ամուսին և կին», սակայն անմիջապես նա ավելացրեց․ «մինչև մահը կբաժանի ձեզ»։

Այսպիսով, զոհաբերություն կատարելով, մենք գնեցինք միակողմանի տոմս դեպի Մեսա Արիզոնա տաճար։

Երբ տաճարում զոհասեղանի մոտ ծնկի էինք իջել, լիազորված ծառան արտասանեց այն բառերը, որոնք ես ցանկանում էի լսել, որոնք մեզ հայտարարեցին ամուսին և կին ժամանակի և ողջ հավերժության համար։ (Էնրիկե Ռ. Ֆալաբելլա, «The Home: The School of Life,» Լիահոնա, մայիս 2013, 102)

Մեր աստվածային ներուժը

Որևէ սերմ բերեք դասարան կամ ուսանողներին ցուցադրեք որևէ սերմի նկար: Ասացեք ուսանողներին, թե ինչ տեսակի սերմ է դա։

• Ինչի՞ ներուժ ունի այս սերմը:

• Ի՞նչ պետք է տեղի ունենա, որպեսզի սերմն իրագործի իր ներուժը։

Այնուհետև ցուցադրեք տաճարի դիմաց կանգնած ամուսնացած զույգի նկարը և առաջարկեք ուսանողներին քննարկել, թե ինչպես կարող է հավերժական ամուսնությունն օգնել մեզ իրագործել մեր ներուժը՝ որպես երկնային ծնողների զավակներ:

Ամուսնության վերածնունդ

Ամուսնության միջոցով հասանելի օրհնությունների մեկ այլ օրինակ կարող եք դիտել հետևյալ տեսանյութում, որտեղ Առաջին Նախագահության նախագահ Հենրի Բ. Այրինգը կիսվում է իր փորձառությամբ և վկայությամբ․ «Renaissance of Marriage» (2:36), որը հասանելի է ChurchofJesusChrist.org կայքում։

Ամուր և հավերժական ամուսնության ստեղծում

Նախկինում Յոթանասունից երեց Ֆ. Բերթոն Հովարդը կիսվել է իր ամուսնությունից մի փորձառությամբ, որը ներկայացնում է ամուսնությանը որպես սուրբ նպատակ վերաբերվելու կարևորությունը: Կարող եք ցուցադրել «Eternal Marriage» տեսանյութը 6:42-12:00։

Երբ ուսանողները դիտեն տեսանյութը, առաջարկեք նրանց կիսվել իրենց ձեռք բերած պատկերացումներով ամուսնությունը հավերժական դարձնելու հարցում ամուսինների դերի մասին: Կարող եք նաև առաջարկել նրանց քննարկել, թե ինչ կարող են անել հիմա, որպեսզի ապագայում պատրաստ լինեն ամուր ամուսնություն ունենալ: