Դաս 141. Վարդապետություն և Ուխտեր 129-132

Վարդապետություն և Ուխտեր 132.1-2, 34-66

Բազմակի ամուսնություն

Թեև ամուսնության Աստծո գործող օրենքը մեկ տղամարդու և մեկ կնոջ միջև է (տես Հակոբ 2.27, 30), եղել են դեպքեր, երբ Նա Իր զավակներից մի քանիսին պատվիրել է բազմակի ամուսնություններ կիրառել: Վերականգնված Եկեղեցու վաղ տարիները եղել են այդ բացառության ժամանակահատվածները։ Տերը մարգարե Ջոզեֆ Սմիթին պատվիրեց կիրառել բազմակնություն և այդ սկզբունքն ուսուցանել ուրիշներին։ Այս դասը կօգնի ուսանողներին ավելի շատ հասկանալ որոշ Սրբերին տրված Տիրոջ պատվիրանի մասին ՝ Եկեղեցու վաղ օրերում բազմակի ամուսնություն կիրառելու վերաբերյալ:

Հնարավոր ուսումնական վարժություններ

Դժվար պատվիրաններ

Նախագահ Ռասսել Մ. Նելսոնն ուսուցանել է․

Աստված միշտ խնդրել է Իր ուխտի զավակներին դժվարին գործեր կատարել: (Ռասսել Մ․ Նելսոն, «Կանգնեք որպես իսկական հազարամյակցիներ», Ensign, հոկտեմբեր 2016, 27)

• Որո՞նք են մի քանի «դժվարին գործերի» օրինակները, որոնք Աստված խնդրել է Իր զավակներին կատարել։

  Եթե անհրաժեշտ է, հղում կատարեք մի քանի սուրբգրային պատմությունների, որոնց մասին ուսանողները կարող են մտածել: Օրինակները կարող են ներառել Աբրահամին, ում պատվիրվեց զոհաբերել Իսահակին (տես Ծննդոց 22․1–2, 10), Մարիամին, ով ընդունեց Հիսուս Քրիստոսի մայրը լինելու կոչը (տես Ղուկաս 1․26–38), և Հիսուս Քրիստոսին, ով տառապեց ու քավություն կատարեց ողջ մարդկության համար (տես Մատթեոս 26․39)։ Կարող եք ցուցադրելու այն նկարները, որոնք պատկերում են այս իրադարձությունները:

  

  

  

• Ձեր կարծիքով, ինչո՞ւ է Աստված երբեմն պատվիրում Իր զավակներին դժվարին գործեր կատարել:

Որպես այդ քննարկման մաս, դուք կարող եք կարդալ Աբրահամ 3.23–25: Կարող եք նաև ցուցադրել «Is It Hard to Be the Prophet?» տեսանյութը (1։54), հասանելի է ChurchofJesusChrist.org։

Մեր տնտեսության ժամանակ Տերը մարգարե Ջոզեֆ Սմիթին պատվիրեց անել շատ դժվարին բաներ: Եկեղեցու վաղ օրերում Ջոզեֆ Սմիթին տրված Աստծո դժվարին պատվիրաններից մեկը բազմակի ամուսնությունների կիրառության հաստատումն էր, որը նաև հայտնի է որպես բազմակնություն:

Բացատրեք, որ բազմակնությունը վերաբերում է մեկ տղամարդու և մեկից ավելի կնոջ ամուսնությանը: Օգնեք ուսանողներին հասկանալ, որ եթե նրանք շփոթված են կամ հարցեր ունեն այդ կիրառության վերաբերյալ, ապա դա նորմալ է: Ուսանողներին ժամանակ տվեք գրանցելու իրենց ունեցած հարցերը սուրբ գրությունների ուսումնասիրության օրագրերում:

Լավ է, որ ուսանողները փնտրեն պատասխանները: Հրավիրեք նրանց ուսումնասիրելիս ուշադրություն դարձնել այն առաջնորդությանը, որը նրանք ստանում են Սուրբ Հոգու միջոցով: Ուսուցչի ձեր դերը ուսանողների բոլոր հարցերին պատասխանելը չէ: Մի խուսափեք ասել, որ չգիտեք պատասխանը։ Դուք կարող եք ցույց տալ, որ նույնիսկ չունենալով բոլոր պատասխանները, մենք կարող ենք առաջ շարժվել Հիսուս Քրիստոսի հանդեպ հավատքով:

Տիրոջ հրահանգները բազմակի ամուսնության վերաբերյալ

Աստվածաշունչը թարգմանելիս Մարգարե Ջոզեֆ Սմիթը կարդաց Աստծո որոշ ծառաների մասին, որոնք ամուսնացել են մեկից ավելի կանանց հետ: Որպեսզի իմանաք, թե Ջոզեֆն ինչ հարցրեց Աստծուն, կարդացեք Վարդապետություն և Ուխտեր 132․1 հատվածը։ Այնուհետև կարդացեք 2 և 34–37 հատվածները՝ փնտրելով, թե ինչպես Տերը պատասխանեց Մարգարեի հարցին:

• Ո՞րն է այն ճշմարտությունը, որը դուք սովորում եք այս հատվածներից այն մասին, երբ բազմակի ամուսնությունն ընդունելի է Տիրոջ համար:

Հրավիրեք ուսանողներին արտահայտել այն, թե նրանք ինչ են սովորում և օգնեք նրանց բացահայտել այն ճշմարտությունը, որ Տերն ընդունում է բազմակի ամուսնությունների կիրառությունը միայն այն ժամանակ, երբ Նա պատվիրում է այն:

Մորմոնի Գրքում մենք սովորում ենք, որ որոշ նեփիացիներ սկսեցին կիրառել բազմակի ամուսնություններ՝ հակառակ Աստծո կամքին: Նրանք արդարացնում էին իրենց գործողությունները՝ հիմնվելով Հին Կտակարանի սուրբ գրությունների պատմությունների վրա (տես Հակոբ 2.23–24, տես նաև Վարդապետություն և Ուխտեր 132.38–39): Տերը դատապարտեց այս գործողությունները և նեփիացիներին ուսուցանեց ամուսնության իր չափանիշը:

Կարդացեք Հակոբ 2.26–27, 30 հատվածները՝ փնտրելով նեփիացիներին տրված Տիրոջ ուսմունքները:

• Այս հատվածներն ի՞նչ ավելացրին բազմակի ամուսնության մասին ձեր հասկացողությանը:

Անհրաժեշտության դեպքում օգնեք ուսանողներին հասկանալ, որ մեկ տղամարդու և մեկ կնոջ միջև ամուսնությունը Աստծո մշտապես գործող օրենքն է ամուսնության վերաբերյալ։ Այնուամենայնիվ, Աստված երբեմն սահմանում էր բազմակի ամուսնության կիրառությունը՝ որպես բացառություն այս գործող օրենքից: Աստծո կողմից բազմակի ամուսնությունը կիրառելու պատճառներից մեկն այն է, որ «սերուդ աճեցնենք [Նրա] համար» (Հակոբ 2.30):

• Ինչպե՞ս կարող է այս գիտելիքը պատասխանել Եկեղեցու վաղ օրերում բազմակի ամուսնությունների կիրառության վերաբերյալ ձեր հարցերին։

Բազմակի ամուսնությունները վաղ Սրբերի շրջանում

Ուսանողները կարող են օգտվել աստվածայնորեն նշանակված աղբյուրներից՝ Եկեղեցու վաղ օրերում բազմակի ամուսնության կիրառությունն ավելի լավ հասկանալու համար:

Կարող եք բաժանել «Հատվածներ «Բազմակի ամուսնությունները Կիրթլենդում և Նավուում» վերնագրով աշխատաթերթը։ Կարող եք խնդրել ուսանողներին ուսումնասիրել այս նյութերն անհատապես կամ փոքր խմբերով: Հրավիրեք նրանց փնտրել տեղեկություն, որը կարող է օգնել պատասխանել իրենց հարցերին:

Ուսումնասիրությունն ավարտելուց հետո ուսանողներին հնարավորություն տվեք կիսվել իրենց սովորածով՝ տալով նմանատիպ հարցեր։

• Ի՞նչ սովորեցիք ձեր ուսումնասիրությունից, ինչը ձեր կարծիքով օգտակար էր։

• Ջոզեֆ Սմիթը և Եկեղեցու մյուս վաղ անդամները ի՞նչ զգացին, երբ նրանց պատվիրվեց զբաղվել բազմակի ամուսնությամբ:

• Ինչպե՞ս Աստված օգնեց Սրբերին այս դժվարին պատվիրանը տալով:

Օգնեք ուսանողներին հասկանալ, որ նորմալ է, եթե նրանք դեռ հարցեր ունեն այս թեմայի վերաբերյալ: Վաղ Սրբերի համար դա մի դժվարին պատվիրան էր, և հիմա դժվար է դա հասկանալ: Սակայն, կենտրոնանալով կարևոր ճշմարտությունների վրա, որոնք մենք գիտենք Երկնային Հոր, Հիսուս Քրիստոսի և վերականգնված ավետարանի մասին, մենք կկարողանանք առաջ գնալ հավատքով: Դուք կարող եք անձնական վկայություն բերել և կիսվել հետևյալ հայտարարությամբ.

Տասներկու Առաքյալների Քվորումից երեց Նիլ Լ․ Անդերսենն ուսուցանել է.

Հավատքը երբեք բոլոր հարցերին պատասխան չի պահանջում, այլ հաստատում ու քաջություն է փնտրում՝ առաջ շարժվելու, երբեմն ընդունելով. «Ես չգիտեմ ամեն բան, սակայն գիտեմ բավականաչափ, որպեսզի առաջ գնամ աշակերտության ճանապարհով»: (Նիլ Լ Անդերսեն, «Հավատքը պատահականության արդյունք չէ, այլ՝ ընտրության», Լիահոնա, նոյեմբեր 2015, 66)

Ամփոփեք այն, ինչ սովորել եք

Որպեսզի օգնեք ուսանողներին բանավոր արտահայտել այն, ինչ սովորել են այսօր, կարող եք ներկայացնել հետևյալ սցենարը.

Պատկերացրեք, որ զրուցում եք մի ընկերոջ հետ, ով մտածում է, որ Ջոզեֆ Սմիթը դեմ է գնացել Աստծո կամքին, երբ նա հաստատեց բազմակի ամուսնության կիրառությունը Եկեղեցում: Ժամանակ տրամադրեք և օրագրում գրի առեք որոշ կետեր, որոնցով կարող եք կիսվել ձեր ընկերոջ հետ բարությամբ և համբերությամբ:

Այն բանից հետո, երբ ուսանողները հնարավորություն ունենան գրել իրենց օրագրում, կարող եք հարցնել, թե արդյոք նրանցից որևէ մեկը ցանկանում է կիսվել իր գրածով: Դա կարող է նաև լավ ժամանակ լինել ուսանողների համար՝ արտահայտելու որոշ հարցերի կամ մտահոգությունների վերաբերյալ իրենց գտած պատասխանները:

Կարող եք ուսանողներին վկայել այն մասին, որ երբ նրանք հավատք դրսևորեն առ Հիսուս Քրիստոս և օգնության համար դիմեն իրենց Երկնային Հորը, Նա կպատասխանի նրանց մարտահրավերներին կամ հարցերին, որոնց նրանք բախվում են իրենց կյանքում:

Օժանդակ նյութեր

Վարդապետություն և Ուխտեր 132․1, 37–39։ Ովքե՞ր են հարճերը։

Հարճ բառը վերաբերում է Հին Կտակարանի այն կանանց, ովքեր օրինական ամուսնացած էին տղամարդու հետ, սակայն ունեին կնոջից ցածր սոցիալական կարգավիճակ։ Մեր տնտեսության մեջ հարճերը բազմամուսնության մաս չեն հանդիսանում:

Որտեղի՞ց կարող եմ ավելին սովորել Եկեղեցու վաղ օրերում բազմակի ամուսնությունների մասին:

• Ավետարանական թեմաների ակնարկներ, «Բազմակի ամուսնությունը Հիսուս Քրիստոսի Վերջին Օրերի Սրբերի Եկեղեցում», ChurchofJesusChrist.org

• Ավետարանական թեմաների ակնարկներ, «Բազմակի ամուսնությունը Կիրթլենդում և Նավուում», ChurchofJesusChrist.org

• Վերականգնման հիմունքները․ դասին նախապատրաստվելու ձեռնարկ (2020), 107– 12

• «How Can We Explain Polygamy When Someone Asks about It?», New Era, նոյ. 2016, 48

• «Mormon Polygamy Q and A» (տեսանյութ), ChurchofJesusChrist.org

Ի՞նչ գիտենք այն մասին, որ բազմակի ամուսնությունը Ջոզեֆ Սմիթի համար դժվար է եղել ընդունել և կիրառել:

Էլիզա Ռ․ Սնոուն, ով կնքված էր Մարգարե Ջոզեֆ Սմիթի հետ, իսկ ավելի ուշ ծառայեց Սփոփող Միության երկրորդ խորհրդական, պատմել է․

Մարգարե Ջոզեֆը … նկարագրել է այն հոգեվարքը, որ նա ապրում էր իր զգացմունքների հակակրանքը հաղթահարելու համար՝ բազմակնությունը ներկայացնելու վերաբերյալ։ Նա ճանաչում էր Աստծո ձայնը, գիտեր, որ իրեն տրված Ամենակարողի պատվիրանը առաջ գնալն էր։ … Նա գիտեր, որ ոչ միայն ստիպված էր պայքարել և հաղթահարել իր անձնական նախապաշարմունքները [համոզմունքները], այլ նաև պայքարել ողջ քրիստոնյա աշխարհի դեմ, ով նայում էր իրեն, բայց Աստված, ով ամենից բարձր էր, պատվիրան էր տվել և նա պիտի հնազանդվեր։ (Eliza R. Snow, in Biography and Family Record of Lorenzo Snow [1884], 69)

Ի՞նչ են ասել ուրիշներն այն մասին, թե ինչպես են սովորել ընդունելու բազմակի ամուսնության վերաբերյալ Տիրոջ պատվիրանը։

Զինա Դիանթա Հանթինգթոնը բացատրել է․

Ես ուսումնասիրեցի սուրբ գրությունը և խոնարհ աղոթելով իմ Երկնային Հորը, ես անձամբ վկայություն ստացա, որ Աստված պահանջել էր, որ այդ [բազմակի ամուսնության] կարգը հաստատվի իր եկեղեցում: Ես կյանքս տալուց ավելի մեծ զոհաբերություն արեցի, որովհետև երբեք չէի ակնկալում, որ նորից ինձ պատվավոր կնոջ նման կնայեն նրանք, ում ես շատ էի սիրում: [Ինչպե՞ս] կարող էի խիղճս մի կողմ դնել [և] հրաժարվել Աստծո հոգու հաստատուն վկայությունից՝ այս աշխարհի փառքի համար: (Զինա Դիանթա Հանթինգթոն Յանգ, ինքնակենսագրական շարադրանք, Զինա Քարդ Բրաունի ընտանեկան հավաքածու, Եկեղեցու պատմության գրադարան, Սոլթ Լեյք Սիթի, ուղղագրությունը և կետադրությունը ստանդարտացված)

Ֆեբե Վուդրուֆը՝ նախագահ Վիլֆորդ Վուդրոֆի կինը, կիսվել է հետևյալով․

Երբ առաջին անգամ ուսուցանվեց բազմակնության սկզբունքը, ես մտածեցի, որ դա ամենավատ բանն է, որ ես երբևէ լսել եմ: Հետևաբար, ես ամեն գնով դեմ էի դրան, մինչև որ հիվանդացա և դժբախտ դարձա։ Բայց շուտով, երբ համոզվեցի, որ այն սկզբում եղել է Աստծո հայտնություն Ջոզեֆի միջոցով, և իմանալով, որ նա մարգարե է, ես ջերմեռանդ աղոթքով դիմեցի իմ Երկնային Հորը, որ ճիշտ առաջնորդվեմ իմ կյանքի կարևորագույն պահին: Պատասխանը տրվեց։ Միտքս լցվեց խաղաղությամբ։ Ես իմացա, որ դա Աստծո կամքն էր։ (Phebe Woodruff, in Edward W. Tullidge, The Women of Mormondom [1877], 413, կետադրությունը ստանդարտացվել է)

Նախագահ Լորենզո Սնոուn (1814–1901) ասել է․

Ես տասներկու կամ տասնչորս տարի անձամբ ծանոթ էի Մարգարե Ջոզեֆ Սմիթի հետ, ումից առաջին անգամ իմացա այս վարդապետության մասին և ճանաչում էի նրան որպես ճշմարտախոս և հարգանքի տեր մարդու։ Սակայն բազմակնության մասին իմ գիտելիքները կախված չեն նրա խոսքերից. Տերն ինձ տվել է աստվածային վկայություն, որը հաստատում է Իր ուսմունքը, որը ոչ ոք չի կարող տալ կամ վերցնել: (Lorenzo Snow, in Eliza R. Snow, Biography and Family Record of Lorenzo Snow [1884], 405)

Օժանդակ ուսումնական վարժություններ

Մենք պատասխանում ենք առաջնային, ոչ թե երկրորդական հարցերին

Օգնեք ուսանողներին հասկանալ, որ որոշ հարցերի պատասխաններն իմանալն ավելի կարևոր է, քան մյուսները: Կարող եք կիսվել Յոթանասունի նախկին անդամ երեց Լորենս Ե. Քորբրիջի հետևյալ հայտարարությամբ, ով հարցերը բաժանում է առաջնային և երկրորդականի:

Ոչ բոլոր հարցերն են հավասար, և ոչ բոլոր ճշմարտություններն են հավասար։ Առաջնային հարցերը ամենակարևորն են։ Մնացած ամեն ինչ ստորադաս է։ Կա ընդամենը մի քան առաջնային հարց։ Ես կնշեմ դրանցից չորսը։

1. Կա՞ արդյոք Աստված, ով մեր Հայրն է։

2. Արդյո՞ք Հիսուս Քրիստոսը Աստծո Որդին է, աշխարհի Փրկիչը։

3. Արդյո՞ք Ջոզեֆ Սմիթը մարգարե է։

4. Արդյո՞ք Հիսուս Քրիստոսի Վերջին Օրերի Սրբերի Եկեղեցին Աստծո թագավորությունն է երկրի վրա։

Ի հակադրություն այս ամենի, երկրորդական հարցերն անվերջ են։ Դրանք ներառում են հարցեր Եկեղեցու պատմության, բազմակնության և այլ թեմաների մասին: (Lawrence E. Corbridge, “Stand Forever” [Brigham Young University devotional, Jan. 22, 2019], speeches.byu.edu)

Օգնեք ուսանողներին հասկանալ, որ բազմակնության վերաբերյալ հարցերը երկրորդական հարցեր են: Եթե ուսանողները սկզբում հարց տան իրենց, թե արդյոք Ջոզեֆ Սմիթը մարգարե է, նրանք կարող են նաև ստանալ բազմակնության վերաբերյալ իրենց հարցերի պատասխանները: Այս առաջնային հարցին իրենց պատասխանը թույլ կտա նրանց հավատքով առաջ շարժվել, երբ նրանք շարունակեն իրենց որոնումները։

Տեսանյութ

Դուք կարող եք օգտագործել հետևյալ տեսանյութը դասի ժամանակ՝ օգնելու ուսանողներին տեսնել, թե ինչպես է մի երիտասարդ կին առնչվում բազմակնության վերաբերյալ իր հարցերին:

«Ձեռք բերել հոգևոր գիտելիքներ. Մեդիսոնի պատմությունը» (8:35)

Տեսանյութը դիտելուց հետո դուք կարող եք քննարկել, թե ինչ սովորեցին ուսանողները՝ տալով հետևյալ հարցերը.

• Ի՞նչ արեց Մեդիսոնը, որպեսզի օգնի նրան փարատել այն անհանգստությունը, որն ի սկզբանե ուներ:

• Ի՞նչ սովորեցիք այս տեսանյութից, որը կարող է օգնել ձեզ պատասխանել ավետարանի վերաբերյալ հարցերին: