Leksiyon 143: Doktrina ug mga Pakigsaad 133–134

Doktrina ug mga Pakigsaad 133:1–40

Pagpangandam sa Pagsugat sa Manluluwas

Sa Nobiyembre 1831, daghan sa mga lider sa Simbahan ganahan nga mahibalo og dugang bahin sa pagsangyaw sa ebanghelyo ug pagpundok sa Israel. Gihulagway sa pagpadayag sa Doktrina ug mga Pakigsaad 133 ang mga hitabo sa dili pa ang Ikaduhang Pag-anhi sa Manluluwas ug kon sa unsang paagi makapangandam ang mga Santos alang sa maong mag hitabo. Kini nga leksiyon makatabang sa mga estudyante nga maandam sa Ikaduhang Pag-anhi ni Jesukristo.

Ang larawan gikan sa AI

Posibleng mga Kalihokan sa Pagkat-on

Panahon sa pagpangandam

Hangyoa ang mga estudyante nga isulti ang mahinungdanong hugpong sa mga pulong gikan sa tudling sa doktrinal nga kahanas sa Doktrina ug mga Pakigsaad 29:10–11 gikan sa nahinumdoman (nga dili motan-aw sa ilang mga kasulatan o walay pagpangandam). Pwede nimong tawagon ang kalihokan nga surprisa nga pasulit. Dayon ipangutana sa mga estudyante ang mosunod.

• Unsa kahay kalainan sa resulta kon nasayod mong daan niini nga pasulit sulod sa pipila ka adlaw o semana?

Hatagi ang mga estudyante og 2 ngadto sa 3 ka minuto nga mangandam aron himoon pag-usab ang pasulit. Dayon tan-awa kon mouswag ba ang ilang katakos sa pagsulti sa hugpong sa mga pulong.

Dapita ang mga estudyante sa pagtandi niini nga kalihokan kon sa unsang paagi mausab ang atong kasinatian kon maningkamot kitang mangandam para sa Ikaduhang Pag-anhi sa Manluluwas. Dapita ang mga estudyante sa pagpamalandong o sa pagrekord sa ilang tubag sa mosunod nga mga pangutana.

• Unsay imong bation bahin sa pagsugat sa Manluluwas sa dihang Siya moanhi og balik?

• Para nimo, unsa ka kaandam para sa Iyang pagbalik? (Kabahin sa unsa ka mahinamon kaayo? Unsay imong gikabalak-an mahitungod sa maong adlaw?)

Samtang magtuon karon ang mga estudyante, dasiga silang tinguhaon ang mga espirituwal nga pag-aghat bahin sa kon unsaon pagpangandam para sa pagbalik sa Manluluwas.

Ang mosunod makatabang sa mga estudyante nga mas masabtan ang konteksto sa Doktrina ug mga Pakigsaad 133. Ikaw o ang boluntaryong estudyante pwedeng mobasa o mo-summarize sa parapo.

Sa Nobiyembre 1831, daghan sa mga lider sa Simbahan ganahan nga mahibalo og dugang bahin sa pagsangyaw sa ebanghelyo ug pagpundok sa Israel. Gihatag ni Jesukristo kini nga pagpadayag isip tubag niining kinasingkasing nga mga tinguha. Nga nailhan karon nga Doktrina ug mga Pakigsaad 133, kini nga pagpadayag orihinal nga gimantala isip dugang sa Book of Commandments (Basahon sa mga Sugo). Nadawat kini duha ka adlaw human sa seksiyon 1, nga orihinal nga nailhan isip “ang pasiuna sa Ginoo.”

Basaha ang Doktrina ug mga Pakigsaad 133:1–4, 10–11, nga mangita kon unsay gipadayag sa Manluluwas bahin sa Iyang pagbalik sa yuta.

• Unsay imong nadiskobrehan?

• Unsay imong nakat-onan gikan sa bersikulo 4 bahin sa mga gitinguha sa Manluluwas para nato?

  Samtang nagpakigbahin ang mga estudyante, pwede nimong isulat ang mosunod nga kamatuoran sa pisara: Gidapit kita ni Jesukristo nga mangandam para sa Iyang Ikaduhang Pag-anhi.

• Sa imong hunahuna, unsa ang pipila sa labing importanteng paagi nga makapangandam kita para sa Ikaduhang Pag-anhi sa Manluluwas?

Pagpangandam alang sa Ikaduhang Pag-anhi

Aron matabangan ang mga estudyante nga mailhan ang mga paagi nga makapangandam sila para sa Ikaduhang Pag-anhi, pwede nimong idugang ang “pinaagi sa …” sa kataposan sa pinabaga nga pagkasulat nga kamatuoran nga anaa sa pisara. Dapita ang mga estudyante sa pagtuon sa mosunod nga mga bersikulo uban ang mas gagmayng grupo. Dayon, hangyoa silang ilista sa pisara ang mga paagi nga gidapit kita sa Manluluwas sa pagpangandam para sa Iyang Ikaduhang Pag-anhi.

Basaha ang Doktrina ug mga Pakigsaad 133:5–16, 36–40, 62, nga mangita sa mga pulong o mga hugpong sa mga pulong nga makatabang nato sa pagpangandam para sa pagbalik sa Manluluwas.

Ang mosunod nga kalihokan makatabang sa mga estudyante sa pagpakigbahin og mga ideya kon unsaon nato pagpangandam para sa Ikaduhang Pag-anhi sa Manluluwas. Dapita ang mga grupo sa pagpili og usa sa mga ideya sa pagpangandam nga naa sa pisara, o hatagan ang kada grupo og usa ka hilisgotan. Pwedeng mangandam ang mga estudyante og usa ka presentasyon aron tudloan ang uban kon unsaon pagpangandam para sa Ikaduhang Pag-anhi. Ikonsiderar ang paghatag og poster board o daghang piraso sa papel ug dekolor nga mga marker aron tabangan ang mga estudyante sa paghimo sa ilang mga presentasyon. Dasiga silang gamiton ang Librarya sa Ebanghelyo nga app, Giya ngadto sa mga Kasulatan, ug uban pang kapanguhaan aron tabangan silang makapangandam. Ang matag presentasyon mahimong maglangkob niini nga mga elemento:

• Ang pamahayag sa kamatuoran nga gipili o gihatag sa grupo

• Piho nga mga ideya kon unsaon paggamit sa mga tin-edyer ang ilang nakat-onan aron mahimong mas andam sa pagsugat sa Ginoo

• May kalabotan nga mga kasulatan, usa ka pamahayag sa lider sa Simbahan, o tudling gikan sa Alang sa Kalig-on sa mga Kabatan-onan: Usa ka Giya sa Paghimo og mga Pagpili nga konektado sa hilisgotan

• Usa ka drowing, poster, meme, o lain pang biswal nga representasyon nga makatabang sa usa ka tawo nga masabtan kon unsaon pagpangandam para sa Ikaduhang Pag-anhi

Kon nagkinahanglan og dugang giya ang mga estudyante, pwede nimong hatagan ang mga grupo og usa ka seksiyon sa mosunod nga handout nga konektado sa ilang hilisgotan.

Gidapit kita ni Jesukristo nga Mangandam sa Iyang Ikaduhang Pag-anhi pinaagi sa …

… pagbiya sa Babelonia (pagkadaotan) (tan-awa sa Doktrina ug mga Pakigsaad 133:4–5, 7, 12–14).

Si Presidente Dieter F. Uchtdorf, kanhi sa Unang Kapangulohan, mitudlo:

Ang karaang siyudad sa Babelon nalaglag. Ang kaanindot niini dugay nang nawala. Apan ang pagkakalibutanon ug kadautan sa Babelon nagpadayon. Karon atong responsibilidad nga magpakabuhi isip mga tumutuo niining walay pagtuo nga kalibotan. … Kinahanglan kita nga magpabiling kalma ubos sa pagpamugos sa mga kahigalaan, dili madani sa popular nga uso o mini nga mga propeta, mobaliwala sa pagtamay sa dili diosnon, mobatok sa pagtintal sa dautan, ug mobuntog sa atong katapulan. (Dieter F. Uchtdorf, “Ayaw Kahadlok, Sumalig Ka Lamang,” Liahona, Nob. 2015, 77–78)

… pagtigom sa Israel (tan-awa sa Doktrina ug mga Pakigsaad 133:4, 7–9, 37–38).

Gipahinumdoman ta ni Presidente Russell M. Nelson:

Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, nagtabang kamo sa pagpundok sa Israel. Ingon lang niana ka yano. (Russell M. Nelson, sa “Paglaom sa Israel” [tibuok kalibotan nga debosyonal sa kabatan-onan, Hunyo 3, 2018], broadcasts.ChurchofJesusChrist.org)

… paghinulsol ug pagkahimong nabalaan pinaagi ni Jesurkristo (tan-awa sa Doktrina ug mga Pakigsaad 133:5, 16, 34–35, 62).

Si Sister Carol F. McConkie, kanhi Unang Magtatambag sa Kinatibuk-ang Kapangulohan sa Young Women, mipasabot:

Uban sa hugot nga pagtuo kang Jesukristo ug sa Iyang Pag-ula, malimpyo kita, walay lama, kon ilimod nato sa atong mga kaugalingon ang tanan nga dili diosnon ug sinsero nga maghinulsol. Gibunyagan kita pinaagi sa tubig alang sa kapasayloan sa mga sala. Ang atong mga kalag gibalaan sa dihang gidawat nato ang Espiritu Santo uban sa bukas nga mga kasingkasing. Kada semana, nag-ambit kita sa ordinansa sa sakramento. Diha sa espiritu sa paghinulsol uban ang sinserong mga tinguha alang sa pagkamatarong, nakigsaad kita sa pagdala diha kanato sa ngalan ni Kristo, paghinumdom Kaniya, ug paghupot sa Iyang mga sugo aron sa kanunay makabaton sa Iyang Espiritu uban kanato. (Carol F. McConkie, “Ang Katahom sa Pagkabalaan,” Liahona, Mayo 2017, 10)

Dapita ang matag grupo sa pagpakigbahin sa ilang presentasyon ngadto sa uban. Seguraduha nga, ingon og kabahin sa ilang mga presentasyon, ipakigbahin sa mga estudyante ang ilang mga ideya kon sa unsang paagi magamit sa mga tin-edyer ang ilang nakat-onan.

Paggamit sa unsa ang imong nakat-onan

Gidapit ta ni Presidente Dallin H. Oaks sa Unang Kapangulohan nga ikonsiderar kon unsa kahay atong buhaton karon kon nasayod pa kita kon kanus-a ang Ikaduhang Pag-anhi.

Unsa kaha kon moabot Siya ugma? Kon kita nahibalo nga makigkita kita sa Ginoo ugma—pinaagi sa atong kamatayon nga wala sa oras o pinaagi sa Iyang kalit nga pag-abot—unsa may atong buhaton karon? Unsa nga mga pagkumpisal ang atong himoon? Unsa nga mga naandan ang atong hunongon? Unsa nga mga problema ang atong husayon? Unsa nga pagpasaylo ang atong ihatag? Unsa nga mga pagpamatuod ang atong ipakigbahin?

Kon kita mobuhat niini nga mga butanga, nganong dili man karon? Nganong dili man mangita og kalinaw samtang maangkon pa ang kalinaw? (Dallin H. Oaks, “Pagpangandam alang sa Ikaduhang Pag-anhi,” Liahona, Mayo 2004, 9)

Gikan sa pagdapit ni Presidente Oaks ug sa imong nakat-onan karon, isulat sa imong journal sa pagtuon ang usa ka butang nga giaghat kang himoon aron mas maandam sa pagsugat sa Manluluwas. Dayon tubaga ang mosunod nga mga pangutana:

• Unsa kaha ang mga babag sa agianan kon unsay pag-aghat sa Espiritu nga imong buhaton?

• Unsang mga aksiyon ang makatabang nimo nga makaya ang mga babag nga imong giatubang? Sa unsang paagi ka mosalig sa Manluluwas?

• Unsay imong gibati karon bahin sa mga kaayohan sa pagpangandam karon para sa Ikaduhang Pag-anhi sa Manluluwas?

Kon nahiangay, pwedeng ipakigbahin sa mga estudyante kon unsay pag-aghat sa Espiritu nga himoon nila aron maandam para sa pagbalik sa Manluluwas. Pwede nimong taposon ang leksiyon pinaagi sa pagpahinumdom sa mga estudyante nga nagtinguha ang Langitnong Amahan ug si Jesukristo nga mahimo tang andam para sa Ikaduhang Pag-anhi ug sa paglantaw niini ingon og malipayong adlaw.

Dugang nga mga Kapanguhaan

Unsa pay atong mahimo aron makapangandam sa Ikaduhang Pag-anhi sa Manluluwas?

Gipahinumdoman ta ni Elder Jeffrey R. Holland sa Korum sa Napulog Duha ka Apostoles:

Sa katibuk-an—sa ato mang panahon o sa panahon sa atong mga anak o sa atong mga apo o bisag kanus-a—kita adunay responsibilidad isip Simbahan ug isip indibidwal nga [mga] miyembro niana nga Simbahan nga mahimong takos nga moanhi si Kristo nato, nga mahimong takos nga Siya moabi-abi nato, ug nga Siya modawat ug mogakos nato. Ang mga kinabuhi nga atong ipresentar Kaniya nianang sagrado nga takna kinahanglan mahimong takos alang Kaniya! …

… Sa dihang moanhi si Kristo, ang mga miyembro sa Iyang Simbahan kinahanglang makita ug molihok nga sama sa kon unsa gyoy hitsura ug linihokan sa mga Miyembro sa Simahan aron mahimo kitang angayan ngadto Kaniya. Kinahanglan natong himoon ang Iyang buluhaton ug kinahanglang magkinabuhi uyon sa Iyang mga pagtulun-an. Kinahanglang mailhan kita Niya dayon ug sayon isip tinuod Niyang mga tinun-an. (Jeffrey R. Holland, “Terror, Triumph, and a Wedding Feast” [Church Educational System fireside para sa mga batan-on, Sep. 12, 2004], 6, broadcasts.ChurchofJesusChrist.org)

Si Elder Neil L. Andersen sa Korum sa Napulog Duha ka Apostoles mipasabot:

Ako mosaad kaninyo nga samtang andamon ninyo ang inyong kaugalingon, kamo usab mahimong lahi, magsige og hunahuna sa Manluluwas, kanunay maghisgot Kaniya ug wala kaayoy pagduha-duha. Samtang kamo makaila ug mahigugma Kaniya pag-ayo, ang inyong mga pulong mas hanoy nga mogawas, sama kon kamo mamulong sa usa sa inyong mga anak o sa usa ka mahal nga higala. Kadtong maminaw kaninyo mobati nga dili makigdebati o mosalikway kaninyo ug gusto nga makat-on gikan kaninyo.

Kamo ug ako naghisgot bahin ni Jesukristo, apan kita makahimo kanunay og mas maayo pa. Kon ang kalibotan dili kaayo maghisgot mahitungod Kaniya, kinsa ang maghisgot og dugang mahitungod Kaniya? Kita! Uban sa laing mahalaron nga mga Kristiyano! …

Uban niadtong anaa sa atong palibot, mas magmatinuoron kita, mas andam nga maghisgot bahin ni Kristo. Si Presidente Nelson miingon, “Ang tinuod nga mga disipulo ni Jesukristo andam nga mobarug, motingog, ug magpalahi gikan sa mga tawo sa kalibutan.” (Neil L. Andersen, “Kita Naghisgot kang Kristo,” Liahona, Nob. 2020, 89–90)

Dugang nga mga Kalihokan sa Pagkat-on

Dili nato angayng kahadlokan ang Ikaduhang Pag-anhi

Makatabang tingali ang pagpasalig sa mga estudyante nga tungod sa gugma sa Langitnong Amahan ug ni Jesukristo alang kanatong tanan, gusto Nilang andam kita ug dili mahadlok sa mga hitabo sa dili pa ang Ikaduhang Pag-anhi.

Ikonsiderar ang pagpasalida sa bidyo nga “Men’s Hearts Shall Fail Them” gikan sa time code 0:00 hangtod 0:54. Dapita ang mga estudyante sa pagkonsiderar kon nganong lahi ang gibati ni Presidente Russell M. Nelson mahitungod sa kamatayon kaysa sa babaye uban niya diha sa eroplano. Pwede kang mangutana kon unsa ang magkalahing reaksyon sa mga tawo bahin sa Ikaduhang Pag-anhi sa Manluluwas. Pwedeng ipakigbahin sa mga estudyante kon ngano sa ilang hunahuna lainlain ang reaksiyon sa mga tawo sa pagbalik sa Manluluwas.

Pwede nimong pahinumdoman ang mga estudyante nga sa tibuok Doktrina ug mga Pakigsaad, gitudlo sa Manluluwas kon unsay atong mahimo aron maseguro nga tan-awon nato ang Iyang Ikaduhang Pag-anhi ingon og nindot nga adlaw.

Doktrina ug mga Pakigsaad 133:10–11. “Tan-awa ug sud-onga, ang Pamanhonon moabut”

Ikonsiderar ang pagrebyo sa sambingay sa Manluluwas sa napulo ka dalagang berhin (tan-awa sa Mateo 25:1–13; Doktrina ug mga Pakigsaad 45:56–57). Pwede usab nimong ipasalida ang bidyo nga “Ang Napulo ka Dalaga” (1:45). Dapita ang mga estudyante sa pagbasa sa Doktrina ug mga Pakigsaad 133:10–11, nga mangita sa gisulti sa Ginoo bahin sa kon kanus-a ang Iyang Ikaduhang Pag-anhi. Ang mga pangutana sa panaghisgot mahimong maglakip sa mosunod:

• Unsay gitudlo kanato niini nga sambingay bahin sa atong pagpangandam sa Ikaduhang Pag-anhi sa Manluluwas?

• Unsa ang pipila ka butang nga atong mahimo aron maseguro nga naay daghang lana ang atong mga lamapara?

Doktrina ug mga Pakigsaad 133:5, 7, 14–15. “Gawas kamo gikan sa Babelonia”

Kon gikinahanglan sa mga estudyante ang dugang pagsabot sa sugo sa Manluluwas nga “gawas kamo sa Babelonia” (Doktrina ug mga Pakigsaad 133:5), pwede nimong ipakigbahin nga sa panahon sa Daang Tugon, ang siyudad sa Babelonia maoy usa ka dapit nga puno sa pagkadaotan. Niining mga bersikulo, ang Babelonia maoy simbolo sa pagkakalibotanon. Ang mga pangutana sa panaghisgot mahimong maglakip sa mosunod:

• Unsa kaha ang ipasabot kon ang Ginoo mosugo kanato nga “[mo]gawas gikan sa Babelonia”?

• Unsa ang pipila ka butang nga mahimo sa mga tin-edyer aron mabulag ang ilang kaugalingon gikan sa mga impluwensiya sa kalibotan?

• Sa unsa kaha nga paagi nga kining mga butanga moandam kanato alang sa Ikaduhang Pag-anhi?