Doktrina ug mga Pakigsaad 133–134

Doktrina ug mga Pakigsaad 133–134

Katibuk-ang Pagpasabot

Sa Doktrina ug mga Pakigsaad 133, gipadayag sa Ginoo ang mga hitabo una pa ang Iyang Ikaduhang Pag-anhi ug kon sa unsang paagi ang Iyang mga Santos makapangandam para sa maong mga hitabo; gipadayag usab Niya ang daghan pa kabahin sa Iyang kinayia ug mga hiyas. Sa Doktrina ug mga Pakigsaad 134, gilatid sa mga lider sa lider sa Simbahan ang gituohan sa Simbahan bahin sa gobyerno ug relihiyon.

Pagtutok kang Jesukristo samtang nagtudlo sa mga kasulatan: Paggahin og panahon sa pagtabang sa mga estudyante nga mailhan ang mga kamatuoran bahin sa Manluluwas ug sa Iyang gahom sa pagtubos. Hatagi og gibug-aton ang mga tudling nga makalig-on sa ilang hugot nga pagtuo Kaniya. Ikonsiderar ang pagsukna og mga pangutana nga magdasig sa mga estudyante sa pagpamalandong kon sa unsang paagi mapanalanginan, mapalig-on, ug maggiyahan sila ni Jesukristo. Alang sa dugang impormasyon kon unsaon ni paghimo, tan-awa ang seksiyon nga “Pagtudlo mahitungod sa mga Titulo, mga Tahas, ug mga Hiyas ni Jesukristo” sa Pagtudlo sumala sa Pamaagi sa Manluluwas. Makakita ka usab og usa ka ehemplo kon unsaon sa pagbuhat niini diha sa leksiyon karong semanaha nga nag-ulohan og “Doktrina ug mga Pakigsaad 133:41–56.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 133:1–40

Katuyoan sa leksiyon: Aron matabangan ang mga estudyante nga maandam alang sa Ikaduhang Pag-anhi ni Jesukristo.

• Pagpangandam sa estudyante: Dapita ang mga estudyante nga basahon ang Doktrina ug mga Pakigsaad 29:10-11 ug pamalandongan kon unsa sila ka andam nga mosugat sa Manluluwas sa Iyang pagbalik og usab sa yuta.

• Mga materyal: Poster board o uban pang papel para sa matag estudyante; dekolor nga mga marker o mga lapis

• Handout: “Gidapit kita ni Jesukristo nga Mangandam sa Iyang Ikaduhang Pag-anhi pinaagi sa …”

Doktrina ug mga Pakigsaad 133:41–56

Katuyoan sa leksiyon: Aron matabangan ang mga estudyante nga mas masabtan ang mga hiyas ug kinaiya ni Jesukristo.

• Pagpangandam sa estudyante: Dapita ang mga estudyante sa pagpangitag larawan nga nagpakita sa Ikaduhang Pag-anhi sa Manluluwas. Dasiga silang hisgotan sa ilang pamilya o mga higala ang mga hiyas sa Manluluwas nga makita diha sa artwork.

• Larawan nga gipakita: Ang Ikaduhang Pag-anhi ni Jesukristo

• Mga materyal: Mga papel nga bahinbahinon sa gagmayng grupo sa mga estudyante

Doktrina ug mga Pakigsaad 134

Katuyoan sa leksiyon: Aron tabangan ang mga estudyante nga masabtan ang kaimportante sa relihiyosong kagawasan ug sa pagtuman sa mga balaod sa gobyerno bisag diin sila nagpuyo.

• Pag-andam sa estudyante: Dapita ang mga estudyante nga hibaloon kon unsay palisiya sa ilang gobyerno bahin sa relihiyon. Pwedeng mangayog tabang ang estudyante sa usa ka ginikanan o kasaligang hamtong aron makat-on mahitungod niini.

• Bidyo: “Ang Basahon ni Mormon: Unsa Kaha ang Imong Kinabuhi Kon Wala Kini?” (15:01; tan-awa gikan sa time code 0:00 hangtod 3:16)

• Mga Handout: “Nagtuo Kami nga Kinahanglang Tumanon ang mga Balaod sa Gobyerno Diin Kami Nagpuyo”; “Nagtuo Kami sa Kagawasan sa Relihiyon ug sa Tanlag”

Sukda ang Imong Nakat-onan 9

Katuyoan sa leksiyon: Aron tabangan ang mga estudyante sa pagtimbangtimbang kon sa unsang paagi nakatabang ang ilang pagtuon sa Doktrina ug mga Pakigsaad nga mouswag sa espirituwal.

• Pagpangandam sa estudyante: Dapita ang mga estudyante nga pamalandongan kon unsa na ka dako ug kalawom ang ilang kahibalo ug pagpamatuod sa ebanghelyo sa milabayng usa o duha ka tuig. Pwede usab nilang pamalandongan kon unsay ilang gibati nga nakahimo og labing dako nga kalainan diha sa ilang espirituwal nga pag-uswag.

• Mga imahe nga i-ipakita: Lainlaing hugna sa pagtukod sa Templo sa Salt Lake; bunyaganan sa templo

• Sulod nga ipakita: Gansangon ug hamis nga mga bato o imahe sa gansangon ug hamis nga mga bato