“Leksiyon 144—Doktrina ug mga Pakigsaad 133:41–56: ‘Kinsa Kini nga Manaog Gikan sa Dios sa Langit?,’” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 133:41–56,” Manwalsa Doktrina ug mga Pakigsaad alang sa Magtutudlo sa Seminary
Leksiyon 144: Doktrina ug mga Pakigsaad 133–134
Doktrina ug mga Pakigsaad 133:41–56
“Kinsa Kini nga Manaog Gikan sa Dios sa Langit?”
Dihang mobalik si Jesukristo, andam ang mga matinud-anon sa Iyang pag-abot (tan-awa sa Doktrina ug mga Pakigsaad 133:56). Ang pagtulun-an sa Manluluwas diha sa Doktrina ug mga Pakigsaad 133 makatabang natong makakat-on pa og dugang bahin Kaniya ug sa pagpangandam para sa Iyang Ikaduhang Pag-anhi. Kini nga leksiyon makatabang sa mga estudyante nga mas masabtan ang mga hiyas ug karakter ni Jesukristo.
Posibleng mga Kalihokan sa Pagkat-on
Ang Ikaduhang Pag-anhi sa Manluluwas
Ikonsisderar ang pagpakita og usa ka larawan nga nagpakita sa Ikaduhang Pag-anhi ni Jesukristo. Pwede usab ihulagway o, kon posible, ipakita sa mga estudyante ang paborito nilang larawan sa Iyang Ikaduhang Pag-anhi.
Pamalandongi ang mosunod nga pamahayag ni Elder Neil L. Andersen sa Korum sa Napulog Duha ka Apostoles samtang naghanduraw kon unsa unya ang pagkasusama sa Ikaduhang Pag-anhi sa Manluluwas.
Motubo ang atong pagtuo samtang kita magpaabut sa mahimayaong adlaw sa pagbalik sa Manluluwas dinhi sa yuta. Ang paghunahuna sa Iyang pag-anhi nagpahinam kanako. Kini kulbahinam gayod! Ang gidak-on ug kahalangdon, ang gilapdon ug katalagsaon, mas molabaw pa sa makita sa mortal nga mga mata o masinati. (Neil L. Andersen, “Paanhia ang Imong Gingharian,” Liahona, Mayo 2015, 122)
-
Unsang mga pulonga o hugpong sa mga pulong ang mipatigbabaw kanimo? Unsang dugang mga pulong ang gamiton tingali nimo sa paghulagway sa Ikaduhang Pag-anhi?
Ipasabot sa mga estudyante nga human kita dapita ni Jesukristo nga mangandam para sa Iyang Ikaduhang Pag-anhi (tan-awa sa Doktrina ug mga Pakigsaad 133:10), Siya mipadayag og dugang pa bahin sa Iyang karakter ug mga hiyas. Nagpakigbahin Siya og mga butang nga magpakita sa panahon sa iyang pagbalik ug sa mga hitabo nga padulong niini.
Dayon pwede nimong usausahon og pakita ang mosunod nga mga pangutana ug dapita ang mga estudyante nga pamalandongan sa hilom ang ilang mga tubag.
-
Samtang naghunahuna ko bahin sa Ikaduhang Pag-anhi sa Manluluwas, mas nakatutok ba ko sa mga hitabo nga mahitabo o sa kon si kinsa ang mobalik sa yuta?
-
Unsay kalainan kon mas magtutok ko kang Jesukristo kay sa mga hitabo panahon sa Iyang pagbalik?
Dapita ang mga estudyante nga mangayo og tabang gikan sa Espiritu Santo aron makakat-on og dugang bahin kang Jesukristo ug sa Iyang Ikaduhang Pag-anhi samtang magtuon sila karon.
Aron matabangan ang mga estudyante nga makakat-on og dugang bahin sa kon unsay mahitabo sa Ikadugang Pag-anhi ug kon kinsay mobalik, ikonsiderar ang pagdapit nila nga kopyahon ang mosunod nga tsart diha sa ilang mga journal sa pagtuon. Pwedeng magparespares ang mga estudyante, nga lainlaing kolum ang himoon sa matag partner. Human sa igong panahon, pwedeng ipakigbahin sa magpares sa usag usa kon unsay ilang nakaplagan ug kompletohon ang laing kolum.
Basaha ang Doktrina ug mga Pakigsaad 133:42–53, ug irekord sa nahiangayng kolum ang imong nakaplagan.
|
Unsay mahitabo sa Ikaduhang Pag-anhi |
Unsay akong nakat-onan bahin kang Jesukristo |
|---|---|
Kon adunay pangutana ang mga estudyante bahin sa hugpong sa mga pulong nga “makalilisang nga mga butang” sa bersikulo 43, ipasabot nga ang makalilisang pwedeng magpasabot og makahahadlok o grabe. Kon adunay mga pangutana ang mga estudyante bahin sa sinina sa Manluluwas sa mga bersikulo 46–48, ikonsiderar ang pagpakigbahin sa gitudlo ni Presidente Russell M. Nelson: Sa Ikaduhang Pag-anhi, si Jesus magsul-ob og “harianong kupo nga pula nga nagsimbolo sa Iyang dugo, nga miagas gikan sa matag lungag sa panit” (“Ang Umaabut sa Simbahan: Pag-andam sa Kalibutan alang sa Ikaduhang Pag-anhi sa Manluluwas,” Ensign, Abr. 2020, 10).
Ang mga kinaiya sa Manluluwas
Human mopakigbahin ang mga estudyante ngadto sa ilang mga pares kon unsay ilang giapil sa ilang mga tsart, ikonsiderar ang pagsulat og “Si Jesukristo …” diha sa pisara. Ipangutana ang mosunod nga pangutana, ug dapita ang mga estudyante sa pagduol sa pisara ug tiwason ang hugpong sa mga pulong gamit ang ilang mga tubag.
Pagtutok kang Jesukristo samtang imong itudlo ang mga kasulatan: Aron makakat-on pa og dugang bahin sa pagtutok kang Jesukristo, tan-awa ang pagbansay nga nag-ulohang “Pagtudlo bahin sa mga titulo, mga tahas, ug mga hiyas ni Jesukristo,” nga anaa sa Pagpalambo sa mga Kahanas sa Magtutudlo: Magpunting kang Jesukristo. Ikonsiderar ang pagbansay sa kahanas nga “Paghimo og makapasiksik nga mga pangutana aron matabangan ang mga estudyante sa pagtino sa mga tahas, mga titulo, mga simbolo, mga hiyas, ug mga kinaiya ni Jesukristo.”
-
Unsa man ang imong nakat-onan bahin kang Jesukristo nga makahuloganon para nimo? Nganong makahuloganon man ni para nimo?
Mailhan tingali sa mga estudyante ang mga kamatuoran nga sama sa mosunod:
-
Si Jesukristo …
-
… patas ug gamhanan (tan-awa sa bersikulo 44–45, 50–51).
-
… moganti niadtong maghulat Kaniya (tan-awa sa bersikulo 45).
-
… gamhanan sa pagluwas (tan-awa sa bersikulo 47).
-
… nagpakitang mahigugmaon nga kaluoy ug pagkamaayo (tan-awa sa bersikulo 52).
-
… makasabot sa atong mga kasakit (tan-awa sa bersikulo 53).
-
… mopas-an sa atong mga luwan, mosapnay nato, ug motubos nato kay gimahal ta Niya (tan-awa sa bersikulo 53).
Pwede nimong dapiton ang mga estudyante nga markahan sa ilang mga kasulatan ang mga hugpong sa mga pulong nga nagtudlo niini nga mga kamatuoran.
-
-
Sa unsang paagi nga ang pagsabot niini nga mga hiyas ug mga kinaiya ni Jesukristo makaayo sa imong kinabuhi?
-
Sa unsang paagi kini nga mga paghulagway kang Kristo makaapektar sa imong pagbati bahin sa Iyang Ikaduhang Pag-anhi?
Mapalawman ang imong pagsabot sa mga kinaiya sa Manluluwas
Ang mosunod nga kalihokan makatabang sa mga estudyante nga mas makasabot og dugang bahin sa Manluluwas. Ipakita ang mosunod nga tulo ka lakang aron matabangan ang mga estudyante nga masabtan ang kalihokan.
Sa dili pa sugdan sa mga estudyante ang kalihokan, pwede nimo silang hatagan og ehemplo nga parehas sa gihulagway sa tulo ka lakang.
-
Pagpili og usa ka hiyas o kinaiya ni Jesukristo gikan sa Doktrina ug mga Pakigsaad 133 nga gusto nimong makat-onan. Isulat kini sa ibabaw sa usa ka blangko nga papel.
-
Sa imong papel, pagsulat og senaryo nga naghulagway sa usa ka tawo nga makabenepisyo sa pagsabot niini nga kinaiya ni Jesukristo.
-
Pag-apil og usa ka kasulatan o pamahayag sa usa ka lider sa Simbahan nga makapalawom sa imong pagsabot sa kinaiya nga anaa sa imong papel. (Para sa tabang, pwede nimong tan-awon ang hiyas diha sa Giya ngadto sa mga Kasulatan o sa pangitaa ni diha sa Librarya sa Ebanghelyo nga app.)
Sa paggamit sa mga ideya nga sama sa mosunod, ikonsiderar ang pagpakita sa kada lakang niini nga kalihokan atubangan sa klase:
-
Lakang 1: Isulat ang mga pulong nga patas ug gamhanan diha sa pisara, o lingini kini kon gisulat na ni panahon sa nag-unang kalihokan.
-
Lakang 2: Ipakita ang mosunod nga senaryo. Hangyoa ang mga estudyante sa pagpakigbahin kon nganong pipila sa batan-on ang tingali mobati sa gibati ni Sam. Pangutana kon sa unsang paagi ang pagkahibalo nga patas ug gamhanan si Jesus makahatag og paglaom sa usa ka tawo nga ingon niana ang gibati.
Naningkamot pag-ayo si Sam nga himoon ang husto, pero lisod kaayo kining himoon tungod sa pagkadaotan sa kalibotan. Gibati niya nga morag modaog ang daotan. Gikapoy na siya sa pagpanglutos ug tentasyon nga nagpalibot kaniya.
Lakang 3: Isulat ang 1 Nephi 22:15–17 diha sa pisara. Dapita ang mga estudyante sa pagbasa niini, nga mangita kon unsay gitudlo ni Nephi bahin sa gahom ug hustisya ni Jesukristo. Human mopakigbahin ang mga estudyante sa ilang nakaplagan, hangyoa silang hisgotan ang mosunod nga pangutana:
-
Unsay gitudlo ni Nephi bahin kang Jesukristo nga makatabang sa usa ka tawo nga parehas og gibati ni Sam?
Dapita ang mga estudyante nga mopili og laing kinaiya ni Jesukristo gikan sa Doktrina ug mga Pakigsaad 133 ug sa pagkompleto sa mga lakang 1–3 sa kalihokan uban ang gagmayng mga grupo (o indibiduwal kon maoy gusto nila).
Human ang igong panahon para kompletohon ang unang tulo ka lakang, sultihi ang mga grupo nga makigbaylo og papel sa laing grupo. Dayon ipakita ang mga lakang 4–6 nga anaa sa ubos.
-
Basaha ang kinaiya ni Kristo, ang senaryo, ug bisan unsang mga kasulatan o pamahayag nga naa sa papel.
-
Human kini mahisgoti uban sa imong grupo, isulat sa papel kon sa unsang paagi ang pagsabot niini nga kinaiya ni Jesukristo makatabang sa tawo nga anaa sa senaryo.
-
Pangitaa ug pag-apil og dugang kasulatan o pamahayag sa usa ka lider sa Simbahan nga para nimo makatabang niini nga indibidwal.
-
Dapita ang mga grupo nga ibalik ang mga papel sa orihinal nga mga grupo ug basaha kon unsay gidugang sa papel. Dapita ang usa ka sakop sa grupo nga ipakigbahin sa klase ang mga panabot bahin kang Jesukristo nga nakuha nila niini nga kalihokan.
Ang mga hiyas sa Manluluwas diha sa imong kinabuhi
Ikonsiderar ang pagpakigbahin sa kinaiya ni Jesukristo nga makahuloganon para nimo.
Dapita ang mga estudyante nga mainampoong pamalandongan ang mga kinaiya nga ilang gitun-an karon ug sa pagtubag sa mosunod nga mga pangutana diha sa ilang mga journal sa pagtuon.
-
Sa unsang paagi ang pagsabot sa mga kinaiya ni Kristo nga imong gitun-an nakapalig-on sa imong kinabuhi karon?
-
Unsay imong mahimo aron makakat-on pa og dugang bahin sa maong mga kinaiya?
Sa pagtapos, pwedeng ipakigbahin sa pipila ka estudyante kon unsa ang ilang gisulat uban sa uban pa nilang gibati bahin kang Jesukristo.