Leksiyon 146: Doktrina ug mga Pakigsaad 133–134

Sukda ang Imong Nakat-onan 9

Doktrina ug mga Pakigsaad 115–134

Ang pagkahimong mas mahisama ni Kristo nagkinahanglan og padayon ug tibuok kinabuhing pagpaningkamot. Ang talagsa nga pagsukod sa atong espirituwal nga pag-uswag makatabang nga atong makita ang pag-uswag ug mas mapaduol sa Manluluwas. Kini nga leksiyon makatabang sa mga estudyante sa pagtimbangtimbang kon sa unsang paagi nakatabang nila ang pagtuon sa Doktrina ug mga Pakigsaad aron mouswag sa espirituwal nga paagi.

Posibleng mga Kalihokan sa Pagkat-on

Hinay-hinay ug padayong pag-uswag

Ikonsiderar ang pagpakita sa mga larawan sa lainlaing hugna sa pagtukod sa Templo sa Salt Lake. Pangutan-a ang mga estudyante kon nahibalo ba sila pila ka tuig una nahuman ang pagtukod sa templo (40 ka tuig). Pwede nimong hangyoon ang mga estudyante nga ipakigbahin kon para nila sulit ba ang panahon ug paningkamot aron matapos ang templo og kon ngano.

Gigamit ubos sa pagtugot, sa Utah State Historical Society

Tabangi ang mga estudyante nga itandi ang ilang espirituwal nga pag-uswag ngadto sa pagtukod sa templo. Ang usa ka paagi sa pahimo niini mao ang pagdapit nila nga hunahunaon kon unsa kahay gibati sa mga magtutukod samtang nagtrabaho niining taas nga proyekto. Pwede nimong ipangutana ang mosunod:

• Unsa kahay imong bation human magtrabaho og mga 10 o 20 ka tuig sa templo samtang nakita kon unsa pa kadako ang angayng trabahoon?

• Kon usa ka sa mga trabahante, unsay makadasig nimo sa pagpadayon sa pagtrabaho?

• Sa imong hunahuna, sa unsang paagi nga ang mga kasinatian sa mga trabahante maggamit sa atong mga paningkamot sa pag-uswag sa espirituwal ug pagkahimong mas mahisama sa Manluluwas?

Paggahin og panahon sa pagpamalandong sa imong kinabuhi ug kon unsay imong gihimo aron maningkamot nga mas mahisama kang Jesukristo. Hunahunaa kon sa unsang paagi ka nag-uswag, bisan sa ginagmay lang, aron mas mahisama kang Jesukristo.

• Bisan taas ang proseso, unsay imong nakat-onan bahin sa kaimportante sa pagpaningkamot sa pagkahimong mas sama ni Jesukristo sa matag adlaw?

Hangyoa ang mga estudyante sa pagpakigbahin sa ilang nakat-onan ug kon unsa na ka dako ang ilang pag-uswag sa milabayng pipila ka semana. Aron matabangan ang mga estudyante sa pagpakigbahin, pwede nimo silang dapiton sa pagrebyo sa ilang bag-o lang nakat-onan gikan sa ilang pagtuon sa Doktrina ug mga Pakigsaad. Pwede nimo silang dasigon nga tan-awon ang ilang mga journal o tan-awon kon unsay bag-o lang nilang namarkahan sa ilang mga kasulatan.

Ang mosunod nga kalihokan makahatag og higayon sa mga estudyante sa pagpasabot sa ilang nakat-onan, pagtimbangtimbang ug pagpakigbahin sa ilang mga gibati, ug sa pagreport sa ilang pag-uswag sa pagpakabuhi diha sa mga baroganan sa ebanghelyo. Kon ang imong klase sa Doktrina ug mga Pakigsad 115–134 nakatutok sa laing mga kamatuoran kaysa anaa sa mosunod nga mga kalihokan, pwede nimong ipahiangay ang mga kalihokan aron maapil ang maong mga kamatuoran.

Ipasabot ang kaimportante sa bunyag para sa mga patay

Aron mahatagan og panahon ang mga estudyante sa pagpasabot sa doktrina sa bunyag sa mga patay, ikonsiderar ang pgpakita sa mosunod nga larawan sa bunyaganan sa templo ug pagpaila sa senaryo nga sama sa naa sa ubos.

Naghinamhinam kaayo si Aubrie ug ang iyang mga higala mahitungod sa pag-adto sa templo. Ang usa ka higala nga dili kaayo pamilyar sa templo nakabantay sa ilang pagkahinam ug nangutana kang Aubrie kon unsay ilang gihimo sa templo. Nangita si Aubrie og litrato sa bunyaganan sa templo sa iyang cellphone ug gipasabot ang bahin sa bunyag sa mga patay.

Hatagi og kahigayonan ang mga estudyante nga ipakigbahin kon unsay ilang isulti kon gipangutana sila sa ilang higala bahin sa bunyag para sa mga patay. Pwede nimong dapiton ang mga estudyante nga magdrama-drama nga magpares o sa gagmayng mga grupo.

Human magdrama-drama ang mga estudyante, dapita sila sa pagrebyo sa unsay ilang nakat-onan sa Doktrina ug mga Pakigsaad 124, 127, ug 128 aron mahibaloan kon naa pa silay gustong idugang sa ilang pagpasabot. Pwede nimong dapiton ang mga estudyante nga magrebyo uban sa grupo nga hunahunaon ang mosunod nga mga pangutana.

• Unsa ang pipila ka butang nga pwedeng ipakigbahin ni Aubrie sa iyang higala aron matabangan kining masabtan ang balaang ordinansa isip bahin sa plano sa Dios?

• Unsay ikatabang ni Aubrie aron masabtan sa iyang higala ang bahin sa Langitnong Amahan og kang Jesukristo?

Dihang marebyo ug mahisgotan na sa mga estudyante ang doktrina sa bunyag para sa mga patay, pwede nimo silang hatagan og laing higayon nga idrama-drama ang senaryo ug iapil kon unsay ilang nakat-onan.

Apil sa buluhaton sa templo ug family history

Kini nga kalihokan gituyo aron tabangan ang mga estudyante nga ipakigbahin kon sa unsang paagi sila miapil sa buhat sa templo ug family history. Pwede nimong tabangan una ang mga estudyante nga hinumdoman ang pipila sa dagkong mga panalangin nga nalambigit sa pagbuhat sa buluhaton sa Ginoo pinaagi sa pagpakigbahin sa mosunod nga pamahayag.

Si Presidente Henry B. Eyring sa Unang Kapangulohan mitudlo:

Nadiskobrihan sa daghang batan-on nga ang paggahin og panahon sa pagsiksik sa family history ug buhat sa templo mipalawom sa ilang pagpamatuod sa plano sa kaluwasan. Midugang kini sa impluwensya sa Espiritu diha sa ilang kinabuhi ug mipaus-os sa impluwensya sa kaaway. Nakatabang kini nga bation nila nga masuod sa ilang mga pamilya ug mas maduol sa Ginoo. Nakat-unan nila nga kining trabahoa wala lang magluwas sa mga patay na; nagluwas kini natong tanan (tan-awa ang D&P 128:18). (Henry B. Eyring, “Pagpundok sa Pamilya sa Dios,” Liahona, Mayo 2017, 22)

• Unsang mga panalangin ang imong nadiskobrehan samtang nakigbahin ka sa buhat sa templo ug sa family history?

Sa mga leksiyon sa Doktrina ug mga Pakigsaad 127–128, gidapit tingali ang mga estudyante sa pagplano nga makigbahin niini nga buhat sa pipila ka paagi. Hatagi og panahon ang mga estudyante nga mamalandong sa ilang plano ug dasiga silang ipakigbahin unsa ang ilang nahimo.

Kon kinahanglan, pwede nimong pahinumdoman ang mga estudyante sa pipila ka paagi nga makapili sila sa pagpakigbahin. Kini naglakip sa lainlaing mga kalihokan diha sa FamilySearch.org o sa Family Tree app. Ikonsiderar ang pagdapit sa mga estudyante nga ihulagway o, kon posible, ipakita sa klase unsa ang ilang nahimo o nakat-onan. Ang mga estudyante mitambong tingali sa templo aron moapil sa balaang mga ordinansa para sa namatay nang mga sakop sa pamilya. Ikonsiderar ang pagdapit nila nga ipakigbahin ang ilang gibati mahitungod niini nga kasinatian.

Pagbati og mas dakong pagsalig sa Dios atol sa mga pagsulay

Migamit tingali ka og gansangon ug hamis nga mga bato isip butang nga gigamit sa leksiyon dihang nagtudlo sa Doktrina ug mga Pakigsaad 122; kon mao, ikonsiderar ang pagpakita niini pag-usab. Kini nga mga bato magpahinumdom sa mga estudyante sa ilang nakat-onan ug tugoti ang mga estudyante nga hisgotan ang ilang mga pagbati mahitungod sa katuyoan sa mga pagsulay ug ang pagsalig sa Dios samtang nagsinati kita niini. Kon ikaw naghunahuna nga makatabang, ikosiderar ang pagpahinumdom sa mga estudyante sa pipila sa mga leksiyon bahin niini nga hilisgotan. Nakat-onan tingali sa mga estudyante ang mahitungod sa mga pagsulay diha sa Doktrina ug mga Pakigsaad 98, 101, 105, 111, 121–123, ug uban pang seksiyon. Mahinumdoman usab tingali sa mga estudyante ang importanteng mga leksiyon bahin sa pagsalig sa Dios gikan sa mga leksiyon bahin sa pagpapahawa sa mga Santos gikan sa Missouri.

Pwede nimong dapiton ang mga estudyante nga irebyo ang bisan unsang makatabang nga mga bersikulo sa kasulatan ug hisgotan ang ilang nakat-onan.

• Sa unsang paagi nakatabang ang imong mga nakat-onan nga mausab ang imong panglataw sa imong mga pagsulay?

• Unsay imong nakat-onan bahin sa Langitnong Amahan ug ni Jesukristo samtang nakasinati ka og lisod nga mga kahimtang?

Dapita ang mga estudyante nga isulat sa ilang mga journal ang ilang mga gibati bahin sa kon giunsa sila pagsuporta sa Langitnong Amahan ug ni Jesukristo sa ilang mga pagsulay. Hangyoa silang ikonsiderar sa unsang paagi ang ilang hugot nga pagtuo ni Jesukristo nakaapektohan tungod sa ilang nakat-onan ug nasinati. Pwede nimong hangyoon ang mga estudyante kinsa mibati nga komportable nga mopakigbahin sa unsay ilang mga gisulat. Hatagi sila og higayon aron sila makapamatuod sa balaang tabang nga ilang nadawat.

Dugang nga Kalihokan sa Pagkat-on

Paggamit sa hustong ngalan sa Simbahan sa Ginoo

Sa Doktrina ug mga Pakigsaad 115, nakat-onan tingali sa mga estudyante ang kaimportante sa paggamit sa hustonng ngalan sa napahiuling Simbahan sa Ginoo. Aron mahatagan ang mga estudyante og higayon sa pagpasabot sa unsay ilang nakat-onan, ikonsidear ang pagdapit sa usa ka estudyante nga isulat ang ngalan sa Simbahan diha sa pisara, ug dapita ang klase nga hisgotan mosunod nga mga pangutana:

• Unsay gitudlo ni Jesus bahin sa paggamit sa hustong ngalan sa Iyang Simbahan?

• Unsay imong mga kasinatian sa pagsunod sa pagdapit sa Ginoo?

Ikonsiderar ang paghangyo sa mga estudyante nga maghimo og senaryo diin makabansay sila sa pagtabang sa usa ka tawo nga masabtan ang kaimportante sa paggamit sa hustong ngalan sa Simbahan sa Ginoo. Dihang makahimo na og senaryo ang mga estudyante, hatagi silag panahon nga magpraktis sa pagdrama-drama sa natural nga mga paagi. Pwede nimong hangyoon ang mga estudyante nga maggrupo ug idrama-drama ang mga senaryo nga gihimo sa ubang estudyante. Kon itugot sa panahon, pwedeng magpraktis ang mga etudyante sa pagpasabot gamit ang sobra sa usa ka senaryo. Taposa ang kalihokan pinaagi sa paghatag og higayon sa mga estudyante nga tubagon ang pangutana nga parehas sa mosunod:

• Unsay imong nakat-onan gikan sa pagsunod sa pagdapit sa Manluluwas nga gamiton ang hustong ngalan sa Iyang Simbahan?