Leksyon 142: Doktrina ug mga Pakigsaad 129–132

Pagbansay 9 sa Doktrinal nga Kahanas

Pagsag-ulo; Pag-angkon og Espirituwal nga Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon maghatag sa mga estudyante og mga kahigayonan sa pagbansay sa pagsag-ulo sa mga pakisayran sa mga tudling sa doktrinal nga kahanas ug ang kalambigitan sa importanteng hugpong sa mga pulong sa kasulatan niini. Makatabang usab kini nila nga makakat-on ug makagamit sa balaang mga baroganan para sa pag-angkon og espirituwal nga kahibalo.

Posibleng mga Kalihokan sa Pagkat-on

Pagrebyo sa doktrinal nga kahanas: Pagsag-ulo

Ikonsiderar ang pagpakita og pitsel sa tubig nga walay sulod ug pipila ka baso nga puno sa tubig. Sudli og tubig ang mga baso. Dapita ang usa ka estudyante sa pagsulti sa bisan unsang pakisayran sa kasulatan sa doktrinal nga kahanas ug importanteng hugpong sa mga pulong sa kasulatan nga iyang nasag-ulo. Alang sa matag tudling nga masulti, mahimong ibubo sa estudyante ang usa sa mga baso ngadto sa pitsel.

• Sa imong hunahuna, nganong ang pagsag-ulo og mga kasulatan nahimong sama sa reserbang tubig alang sa panahon sa panginahanglan?

• Unsang mga sitwasyon nga kinahanglan tingali nimong gamiton ang mga nasag-ulong mga kasulatan?

Ikonsiderar ang paghangyo sa mga estudyante sa paghinumdom kadiyot dihang naay kasulatan nga mosulod sa ilang hunahuna. Tingali nahunahunaan nila ang pihong mga pulong sa usa ka bersikulo o kinatibuk-ang patulun-an. Dapita ang mga estudyante sa pagpakigbahin sa ilang mga kasinatian.

Ipasabot nga dihang mapamilyar na kita sa mga tudling sa kasulatan, ang Espiritu Santo mahimong mobutang niini sa atong hunahuna sa panahon sa panginahanglan (tan-awa sa Juan 14:26). Pahibaloa ang mga estudyante nga maggahin mog panahon karong adlawa nga mahimong mas mapamilyar sa pipila ka mga tudling sa doktrinal nga kahanas. Ang mosunod maoy usa ka paagi sa pagbuhat niini. Ang dugang mga ideya sa pagsag-ulo anaa sa apendiks ubos sa “Mga Kalihokan sa Pagrebyo sa Doktrinal nga Kahanas.”

Kalihokan sa pagsag-ulo

Pagpili kon hain sa mga tudling sa doktrinal nga kahanas ang gusto nimong rebyohon sa klase. Mas epektibo kini nga kalihokan gamit ang duha hangtod upat ka tudling.

Hatagig blangko nga papel ang matag estudyante. Dapita silang isulat sa papel ang matag tudling sa doktrinal nga kahanas ug sa importanteng hugpong sa mga pulong. Dayon dapita sila nga guntingon ang matag pulong para sa usa ka pakisayran ug importanteng hugpong sa mga pulong. Dayon pwede kining hiusahon sa mga estudyante ug ibalik sa paghan-ay. Dihang komportable nilang mahuman ang kana nga tahas, dapita silang balikon ang proseso gamit ang sunod nga tudling ug sa importanteng hugpong sa mga pulong. Kon makat-onan na nila pag-ayo ang mga tudling ug importanteng hugpong sa mga pulong, pwede nilang hiusahon ang tanang piraso gikan sa lainlaing mga tudling ug importanteng hugpong sa mga pulong ug sulayi sa paghan-ay og balik.

Ang alternatibo, pwede nimong dapiton ang mga estudyante nga gamiton ang Doktrinal nga Kahanas [Doctrinal Mastery] nga app sa pagsag-ulo.

Kon aduna kay igong panahon, pwede nimong dapiton ang pipila ka estudyante nga motindog ug ipakigbahin ang nasag-ulo nga tudling ug importanteng hugpong sa mga pulong ug ibubo ang usa ka basong tubig diha sa pitsel.

Seguroha nga dangatan lang og 10–15 minutos ang kalihokan sa pagsag-ulo aron aduna pay igong panahon para sa pagbansay sa paggamit sa doktrinal nga kahanas sa ulahing bahin sa leksiyon.

Pagkat-on ug paggamit sa mga baroganan sa pag-angkon og espirituhanong kahibalo

Kon para nimo kinahanglang rebyohon sa mga estudyante ang baroganan sa pag-angkon og espirituwal nga kahibalo, paggahin og panahon sa pagrebyo sa mga parapo 5–12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2023). Ang gisugyot nga mga kalihokan sa pagrebyo gilakip diha sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dapita ang mga estudyante sa pagpili sa bisan asa sa mosunod nga mga senaryo o uban pang senaryo nga gihimo nga haom sa panginahanglan sa imong mga estudyante. Human makapili og usa ka senaryo ang mga estudyante, hisgoti kon nganong mobati sa ingon niini nga usa ka tawo. Ang pagbuhat sa ingon makatabang sa mga estudyante nga mobati nga tinuod ang mga senaryo.

Pwede usab nimong ikonsiderar ang laing mga hilisgotan sa senaryo diha sa seksiyon nga “Dugang nga mga Kalihokan sa Pagkat-on” sa kataposan niini nga leksiyon.

Senaryo 1: Handurawa nga naa kay higala nga dili segurado bahin sa pagminyo diha sa templo. Siya naghunahuna nga ang pagminyo sa templo daghan og kinahanglan ug usa ka dako nga pasalig. Nabalaka siya mahitungod sa tanang gidahoman diha kaniya.

Senaryo 2: Usa ka higala nangutana nimo, “Importante ba gyod ang pagminyo sa templo? Kulang pa ba diay nang magpakasal sa sibil kon gihigugma gayod nila ang usag usa?”

Aron tabangan ang mga estudyante nga mahimong responsable sa ilang pagtuon, hatagi silag panahon nga mamalandong ug tubagon ang mosunod nga mga pangutana diha sa ilang mga journal sa pagtuon.

• Hain sa nga baroganan sa pag-angkon og espirituwal nga kahibalo ang para nimo dako og tabang? Ngano man?

• Asa nga tudling sa doktrinal nga kahanas ang makatabang?

Dihang igo na ang panahon sa mga estudyante sa pag-andam sa pagtubag, ikonsiderar ang pagbahin nila sa gagmayng mga grupo. Makatabang tingali ang pagtudlo og lider sa grupo nga maoy manguna sa panaghisgot. Pwedeng magdesisyon ang lider kon kinsay mouna o kon unsay pagkasunodsunod sa paghisgot sa mga baroganan sa pag-angkon og espirituwal nga kahibalo. Dapita ang mga grupo nga ipakigbahin ug hisgotan ang ilang mga tubag sa nag-unang mga pangutana. Hatagi og igong panahon ang mga grupo aron makapakigbahin ang tanang sakop.

Dayon pwede nimong dapiton ang mga grupo nga ilhon ang bisan unsang baroganan sa pag-angkon og espirituwal nga kahibalo nga wala napili ug hisgotan kon sa unsang paagi ang maong mga baroganan magamit usab ngadto sa mga senaryo.

Pakighisgot diha sa mga grupo aron masukod ang ilang katakos sa paghisgot sa mga baroganan sa pag-angkon og espirituwal nga kahibalo. Kon gikinahanglan, gamita ang mosunod nga mga pangutana sa pagtabang sa mga estudyante nga mahimong makahuloganon ang ilang panaghisgot.

Lihok uban ang hugot nga pagtuo

• Sa unsang paagi ang usa ka tawo makapangayog tabang sa Langitnong Amahan ug kang Jesukristo kon sila adunay mga pagduhaduha, mga kabalaka, o mga pangutana bahin sa kaminyoon sa templo?

• Unsa pay laing paagi nga makalihok uban ang hugot nga pagtuo kang Jesukristo ang usa ka tawo nga nabalaka bahin sa kaminyoon sa templo?

Susihon ang mga konsepto ug mga pangutana inubanan sa mahangtorong panglantaw

• Unsay imong nahibaloan bahin sa Langitnong Amahan ug sa Iyang plano sa kaluwasan nga mahimong makatabang sa senaryo?

• Sa unsang paagi ang kaminyoon sa templo makaimpluwensiya sa kinabuhi sa usa ka tawo karon ug sa kahangtoran?

Tinguhaa ang dugang nga panabot pinaagi sa balaanong gitudlo nga mga tinubdan

• Sa unsang paagi ang doktrina nga gitudlo diha sa Doktrina ug mga Pakigsaad 131:1–4 makatabang sa senaryo nga imong gipili?

• Unsa pa ang ubang mga kasulatan o pamahayag gikan sa mga propeta nga mahimong makatabang? (pananglitan, Doktrina ug mga Pakigsaad 132:19; 1 Mga Taga-Corinto 11:11; Genesis 2:24). (Pwede usab nimong pangitaon ang “Mahangtorong Kaminyoon” diha sa Librarya sa Ebanghelyo.)

• Unsang mga kapanguhaan sa impormasyon ang nakaimpluwensiya tingali sa mga pagdahom niining tawhana?

Tabangi ang mga estudyante sa pagsuta sa ilang kasinatian gamit ang mga baroganan sa pag-angkon og espirituwal nga kahibalo. Ang mosunod nga mga pangutana mahimong makatabang:

• Sa unsang paagi nakatabang ang mga baroganan sa pag-angkon og espirituwal nga kahibalo sa pagsanong sa senaryo?

• Unsang mga kalisdanan ang imonggiatubang samtang naningkamot ka sa paggamit sa mga baroganan sa pag-angkon og espirituwal nga kahibalo sa mga senaryo?

• Unsay imong nakat-onan o gibati bahin sa mahangtorong kaminyoon nga imomg gihunahuna nga importanteng hinumdoman?

Dugang nga mga Kapanguhaan

Unsa ang celestial nga kaminyoon komparar sa ubang mga butang?

Si Presidente Russell M. Nelson mitudlo:

Ang kaimportante sa pagpili mahimong ilarawan pinaagi sa simple nga konsepto nga miabot sa hunahuna usa ka adlaw sa diha nga namalit ako sa usa ka dakong tindahan. Gitawag nako kini nga “mga sumbanan sa pumapalit.” Ingon nga ang pagpamalit kabahin sa atong matag adlaw nga kinabuhi, kini nga mga sundanan tingali kasagaran.

Ang maalamon nga mga tigpamalit magtuon og maayo sa ilang mga kapilian sa dili pa sila mohimo sa pagpili. Una nilang tun-an ang kalidad ug kamalongtaron sa gitinguha nga produkto. Gusto nila ang labing maayo. Agi og kalainan, ang pipila ka mga pumapalit mangita og kahangyoan, ug ang uban mahimo nga mogasto sa hilabihan, nga sa pagkadiskobre lamang sa kaulahian—sa ilang pagkadismaya—nga ang ilang gipili wala magdugay. Ug sa makapasubo, adunay panagsa nga mga indibidwal kinsa mobaliwala sa ilang personal nga integridad ug mangawat kon unsay ilang ganahan. Ato silang tawagon nga mga shoplifter.

Ang mga sumbanan sa pumapalit mahimo nga gamiton ngadto sa hilisgotan sa kaminyoon. Ang usa ka managtiayon nga naghigugmaay mahimo nga makapili og kaminyoon sa labing taas nga kalidad o sa mas ubos nga matang nga dili mahimong molungtad. O mahimo sila nga mopili nga wala sa usa ug sa makauulaw nga paagi mangawat sa unsay gusto nila isip “mga nagpuyopuyo.”

Ang hilisgotan sa kaminyoon gilalisan sa tibuok kalibotan, diin ang nagkalain-laing mga kasabotan anaa alang sa panagtipon sa kaminyoon. Ang akong katuyoan sa pagsulti kabahin niini nga hilisgotan mao ang pagpamahayag, isip usa ka Apostol sa Ginoo, nga ang kaminyoon tali sa lalaki ug babaye sagrado—gi-orden kini sa Dios. Ako usab nga gipamatud-an ang hiyas sa kaminyoon sa templo. Mao kini ang labing taas ug labing malongtaron nga matang sa kaminyoon nga ikahatag sa atong Tiglalang ngadto sa Iyang mga anak. (Russell M. Nelson, “Celestial nga Kaminyoon,” Liahona, Nob. 2008, 92)

Dugang nga mga Kalihokan sa Pagkat-on

Lain nga paagi sa pagsugod sa leksiyon

Ikonsiderar ang pagpakita sa mosunod nga larawan ug sa pagsulat sa hugpong sa mga pulong nga “Dili ka makakuhag tubig gikan sa walay sulod nga atabay” diha sa pisara.

• Sa imong hunahuna, unsa kahay gitumong niini nga panultihon diha sa atong kinabuhi?

• Sa unsang paagi kini nga panultihon magamit sa pagsag-ulo og mga tudling sa doktrinal nga kahanas?

Lain pang mga senaryo

Ang mosunod maoy duha ka posibleng senaryo nga magamit ingon og kabahin sa pagbansay sa paggamit sa mga baroganan sa pag-angkon og espirituwal nga kahibalo.

1. “Kinahanglan ba kong mohatag og ikapulo kon kulang ang akong kita aron makapalit og ubang butang?” (Tan-awa sa Doktrina ug mga Pakigsaad 82:10; 119.)

2. “Handurawa nga samtang nag-istorya mo sa imong higala, nahisgotan ninyo ang ilang pagtuo sa Dios. Miingon siya nga gitudloan siya nga dili usa ka tawo ang Dios, apan usa kini ka presensiya o gahom nga naglungtad bisan asa sa usa ka higayon. Human kini gipakigbahin sa imong higala, nangutana siya nimo kon tinuod ba kini.” (Tan-awa sa Doktrina ug mga Pakigsaad 130:22–23.)