“Leksiyon 141—Doktrina ug mga Pakigsaad 132: Dinaghan nga Kaminyoon,” Manwal sa Magtutudlo sa Doktrina ug mga Pakigsaad (2025)
“Doktrina ug mga Pakigsaad 132” Manwal sa Magtutudlo sa Doktrina ug mga Pakigsaad
Leksiyon 141: Doktrina ug mga Pakigsaad 129–132
Doktrina ug mga Pakigsaad 132:1–2, 34–66
Dinaghan nga Kaminyoon
Bisan og ang kasamtangang balaod sa Ginoo kabahin sa kaminyoon tali ra sa usa ka lalaki ug sa usa ka babaye (tan-awa sa Jacob 2:27, 30), dunay mga higayon nga misugo Siya nga pipila sa Iyang mga anak mohimo og dinaghan nga kaminyoon. Ang unang mga katuigan sa gipahiuli nga Simbahan mao kadtong mga panahon sa eksepsiyon. Ang Ginoo misugo ni Propeta Joseph Smith nga himoon ang dinaghan nga kaminyoon ug itudlo ang baroganan ngadto sa uban. Kini nga leksiyon makatabang sa mga estudyante aron makasabot og dugang pa mahitungod sa sugo sa Ginoo alang sa ubang mga Santos sa paghimo og dinaghan nga kaminyoon niadtong una pang mga panahon sa Simbahan.
Mga Posibleng Kalihokan sa Pagkat-on
Lisod nga mga sugo
Si Presidente Russell M. Nelson mitudlo:
Ang Dios kanunay nga misugo sa Iyang mga anak sa pakigsaad sa pagbuhat og mga butang nga lisod. (Russell M. Nelson, “Barug isip Tinuod nga mga Milenyal,” Liahona, Okt. 2016, 49)
-
Unsa ang pipila ka pananglitan sa lisod nga mga butang nga gipabuhat sa Dios sa Iyang mga anak?
Kon gikinahanglan, paghisgot og pipila ka asoy diha sa kasulatan nga mahunahuna sa mga estudyante. Ang mga pananglitan maglakip ni Abraham nga gihangyo nga isakripisyo si Isaac (tan-awa sa Genesis 22:1–2, 10), ni Maria nga midawat sa tawag nga mahimong inahan ni Jesukristo (tan-awa sa Lucas 1:26–38), ug ni Jesukristo nga nag-antos ug nagtubos alang sa tanang katawhan (tan-awa sa Mateo 26:39). Ikonsiderar ang pagpakita og mga litrato nga naghulagway niini nga mga hitabo.
-
Sa imong hunahuna ngano kaha nga ang Dios usahay mosugo sa Iyang mga anak sa pagbuhat og mga butang nga lisod?
Isip kabahin niini nga diskusyon, mahimo nimong basahon ang Abraham 3:23–25. Mahimo usab nimong ipasalida ang bidyo nga “Is It Hard to Be the Prophet?” (1:54), naa sa ChurchofJesusChrist.org.
Sa atong dispensasyon, ang Ginoo misugo ni Propeta Joseph Smith sa paghimo og daghang lisod nga butang. Usa sa lisod nga sugo sa Dios nga gihatag ngadto ni Joseph Smith mao ang pagpasiugda sa nailhan usab nga poligamiya, sa unang mga panahon sa Simbahan.
Ipasabot nga ang dinaghan nga kaminyoon nagpasabot sa pakigminyo sa usa ka lalaki ngadto sa sobra sa usa ka babaye. Tabangi nga masabtan sa mga estudyante nga normal ra ang pakigbisog sa gibati nga kalibog o pagkaadunay mga pangutana mahitungod niini nga buhat. Ikonsiderar ang paghatag sa mga estudyante og oras sa pagsulat sa mga pangutana nga posibling anaa kanila diha sa ilang mga journal sa pagtuon.
Makaayo sa mga estudyante ang pagpangita og kaugalingon nilang mga tubag. Dapita sila sa paghatag og pagtagad sa giya nga ilang nadawat pinaagi sa Espiritu Santo samtang magtuon sila. Ang imong tahas isip magtutudlo dili ang pagtubag sa tanang mga pangutana sa mga estudyante. Okey ra ang pag-ingon nga wala kay ikatubag. Mahimo nimong ipakita nga bisan og wala ka sa tanan nga tubag, makapadayon kita sa pag-abante uban sa pagtuo kang Jesukristo.
Ang mga instruksiyon sa Ginoo mahitungod sa dinaghan nga kaminyoon
Samtang naghubad sa Biblia, nabasa ni Propeta Joseph Smith ang mahitungod sa pipila ka sulugoon sa Ginoo nga nakigminyo og sobra sa usa ka asawa. Aron mahibalo kon unsay gipangutana ni Joseph sa Dios, basaha ang Doktrina ug mga Pakigsaad 132:1. Dayon, basaha ang mga bersikulo 2 ug 34–37, mangita kon giunsa sa Ginoo sa pagtubag ang mga pangutana sa Propeta.
-
Unsa ang usa ka kamatuoran nga imong nakat-onan gikan niining mga bersikulo mahitungod kon kanus-a ang dinaghan nga kaminyoon madawat sa Ginoo?
Dapita ang mga estudyante sa pagpahayag unsay ilang nakat-onan ug tabangi sila sa pag-ila sa kamatuoran nga ang Ginoo modawat sa gibuhat nga dinaghan nga kaminyoon kon kini Iyang isugo.
Sa Basahon ni Mormon, atong nahibaloan nga pipila sa mga Nephita nagsugod sa dinaghan nga kaminyoon nga supak sa kabubut-on sa Dios. Nangatarongan sila sa ilang mga gibuhat base sa mga asoy sa kasulatan gikan sa Daang Tugon (tan-awa sa Jacob 2:23–24; tan-awa usab sa Doktrina ug mga Pakigsaad 132:38–39). Gihimaraot sa Ginoo kini nga mga buhat ug gitudloan ang mga Nephita sa Iyang sumbanan alang sa kaminyoon.
Basaha ang Jacob 2:26–27, 30, mangita sa mga gipangtudlo sa Ginoo ngadto sa mga Nephita.
-
Unsay gikadugang niini nga mga bersikulo diha sa imong panabot mahitungod sa dinaghan nga kaminyoon?
Kon gikinahanglan, tabangi ang mga estudyante sa pagsabot nga ang kaminyoon tali sa usa ka lalaki ug sa usa ka babaye mao ang kasamtangang balaod sa Ginoo sa kaminyoon. Bisan pa, dunay mga higayon nga ang Dios misugo nga himoon ang dinaghan nga kaminyoon isip ekespsyon niining kasamtangang balaod. Usa ka rason nga gihatag sa Dios ang paghimo og dinaghan nga kaminyoon mao ang “[pag]pasanay og binhi alang [Kaniya]” (Jacob 2:30).
-
Sa unsang paagi kini nga kahibalo nakatabang sa tingale anaa kanimong mga pangutana mahitungod sa gibuhat nga dinaghan nga kaminyoon sa unang kapanahonan sa Simbahan?
Ang dinaghan nga kaminyoon sa nag-unang mga Santos
Ang mga estudyante makabenipisyo gikan sa oportunidad sa paggamit sa balaanong gitudlo nga mga tinubdan aron mas masabtan ang gihimo nga dinaghan nga kaminyoon sa unang mga panahon sa Simbahan.
Ikonsiderar ang pag-apod-apod sa tamdanang basahon nga giulohan og “Mubo nga kinutlo gikan sa ‘Plural Marriage in Kirtland and Nauvoo [Dinaghan nga Kaminyoon sa Kirtland ug Nauvoo].’” Mahimo nimong hangyoon ang mga estudyante sa pagtuon niini nga mga materyal nga magtinagsa o diha sa ginagmayng grupo. Dapita sila sa pagpangita og mga impormasyon nga makatabang sa pagtubag sa tingale anaa kanila nga mga pangutana.
Kon mahuman na ang mga estudyante sa pagtuon, hatagi sila og kahigayonan nga ipakigbahin ang ilang nakat-onan pinaagi sa pagpangutana sama sa mosunod:
-
Unsay inyong nakat-onan gikan sa inyong pagtuon nga nakita ninyong makatabang?
-
Unsa kahay gibati ni Joseph Smith ug sa ubang nag-una nga mga miyembro sa Simbahan nga hangyoon nga mohimo og dinaghan nga kaminyoon?
-
Giunsa sa Dios sa pagtabang ang mga Santos niining lisod nga sugo?
Tabangi ang mga estudyante nga makasabot nga okey ra kon duna pa silay mga pangutana mahitungod niini nga hilisgotan. Lisod sundon kadto nga sugo alang sa nag-unang mga Santos ug posibling lisod kini sabton karon. Bisan pa man, ang pagtutok sa importanteng mga kamatuoran nga atong nahibaloan mahitungod sa Langitnong Amahan, ni Jesukristo, ug sa gipahiuli nga ebanghelyo makatabang nato sa pagpadayon diha sa pagtuo. Mahimo kang mohatag og usa ka personal nga pagpamatuod ug mopakigbahin og pamahayag sama sa mosunod:
Si Elder Neil L. Andersen sa Korum sa Napulog Duha ka Apostoles mitudlo:
Ang pagtuo dili gayod mangayo og tubag sa matag pangutana apan magtinguha sa kasiguroan ug kaisog sa pagpadayon, usahay sa pag-ila nga, “Wala ko masayod sa tanan, apan nasayod ako og igo aron magpadayon sa dalan sa pagkadisipulo.” (Neil L. Andersen, “Ang Pagtuo Dili pinaagi sa Sulagma, apan pinaagi sa Pagpili,” Liahona, Nob. 2015, 66)
I-summarize ang imong nakat-onan
Aron matabangan ang mga estudyante sa pagsulti kon unsa ang ilang nakat-onan, ikonsiderar ang pagtudlo og usa ka senaryo sama sa mosunod:
Hunahunaa nga nakig-istorya ka sa usa ka higala nga may kalibog kon si Joseph Smith misupak ba sa Dios dihang gihimo niya ang buhat sa dinaghan nga kaminyoon sa Simbahan. Gahini og panahon ang paglatid og pipila ka punto diha sa imong journal nga imong ikapakigbahin sa imong higala pinaagi sa kamabination ug pailob.
Human makahigayon ang mga estudyante sa pagsulat diha sa ilang journal, mahimo nimong pangutan-on kon duna ba sa mga estudyante ang komportable nga mopakigbahin sa unsay ilang gisulat. Mahimo usab kining usa ka maayong panahon aron ang mga estudyante makapahayag og bisan unsang mga tubag nga tingale ilang napalgan sa pipila sa ilang kaugalingong mga pangutana o mga kabalaka.
Ikonsiderar ang pagpamatuod ngadto sa mga estudyante nga samtang sila mopakita og hugot nga pagtuo kang Jesukristo ug modangop sa ilang Amahan sa Langit alang sa panabang, Siya motabang kanila sa ilang mga kalisod o mga pangutana nga ilang giatubang sa kaugalingon nilang kinabuhi.