Leksiyon 139: Doktrina ug mga Pakigsaad 129–132

Doktrina ug mga Pakigsaad 130

Pagtudlo sa Ebanghelyo sa Manluluwas

Ang ebanghelyo mahimong epektibong itudlo sa dagkong mga panagkatigom o sa gagmay, suod nga mga panagtapok. Gigamit sa Manluluwas kining duha ka pamaagi panahon sa Iyang pagpangalagad, sama sa gihimo ni Propeta Joseph Smith. Ang teksto sa Doktrina ug mga Pakigsad 130 naglakip sa pipila sa mga pagtulun-an sa Propeta sa gamayng panagtapok sa mga Santos nga nagpuyo sa Ramus, Illinois. Kini nga leksiyon gituyo aron sa pagtabang sa mga estudyante sa pagpraktis sa pagtudlo sa mga elemento sa doktrina ni Jesukristo.

Posibleng mga Kalihokan sa Pagkat-on

Ang mosunod nga kalihokan sa pagkat-on gidisenyo aron tabangan ang mga estudyante sa pagtudlo sa lainlaing bahin sa leksiyon. Kon dili ka gustong magtudlo ang mga estudyante, tan-awa sa “Dugang nga mga Kalihokan sa Pagkat-on” para sa mga ideya sa pagtudlo nga pwede nimong gamiton.

Si Jesukristo, ang Bantugan nga Magtutudlo

Sa pagsugod sa klase, ikonsiderar ang pagpakita sa imahe ni Jesukristo nga nagtudlo sa mga tawo ug dapita ang mga estudyante sa paghanduraw kon unsa kahay bation kon tua ka didto. Ikonsiderar ang pagsukna sa mosunod nga mga pangutana:

• Unsa kahay imong hunahunaon o bation kon anaka dihang nagtudlo si Jesus?

• Sa imong hunahuna, ngano kaha nga epektibong magtutudlo ang Manluluwas?

Ipasabot nga isip mga miyembro sa Simbahan sa Manluluwas, aduna kitay daghang kahigayonan sa pagtudlo sa Iyang ebanghelyo. Pwede usab nimong ipakita ang mosunod nga mensahe gikan sa Unang Kapangulohan bahin sa pagpanudlo:

Minahal nga mga kaigsoonan,

Unsa ka mahimayaong oportunidad kamo aduna sa pagtudlo sa ebanghelyo ni Jesukristo! Bisan kon kamo aduna o walay usa ka piho nga tawag sa pagtudlo, kamo mga magtutudlo. Isip usa ka disipulo sa Halangdong Magtutudlo, si Jesukristo, kamo adunay mga oportunidad sa pagpakigbahin sa Iyang kahayag bisan asa kamo moadto—diha sa panimalay, sa simbahan, samtang kamo mangalagad ngadto sa uban, ug taliwala sa inyong mga higala. Ang pagtudlo sa ebanghelyo usa ka sagradong pagsalig. Kini usa ka importanteng bahin sa buhat sa Ginoo, ug kini labing maayo og resulta kon kita mobuhat niini sa Iyang pamaagi. (Pagtudlo sumala sa Pamaagi sa Manluluwas: Alang sa Tanan Kinsa Nagtudlo diha sa Panimalay ug diha sa Simbahan [2022], 1)

• Unsa ang pipila ka oportunidad ang anaa sa mga tin-edyer aron makatudlo ug makapamatuod kang Jesukristo ug sa Iyang ebanghelyo?

Ipasabot sa mga estudyante nga sila adunay oportunidad sa pag-andam og mubong leksiyon gikan sa pipila ka pagtulun-an sa Doktrina ug mga Pakigsaad 130 ug sa pagpraktis sa pagtudlo sa ilang leksiyon ngadto sa uban. Kon nagplano kang patudloon ang pipila ka estudyante sa tibuok klase, nindot kini nga higayon nga pasaligan sila nga dili nimo tawagon ang mga dili gusto.

Sa dili pa magsugod sa pagpangandam ang mga estudyante sa leksiyon, ikonsiderar ang pagpakigbahin sa mosunod nga dugang impormasyon.

Niadtong Abril 2, 1843, nakigkita si Propeta Joseph Smith sa mga Santos sa Ramus, Illinois, mga 32 kilometro gawas sa Nauvoo. Gitudlo ni Joseph ang lainlaing kamatuoran sa ebanghelyo, apil ang mga detalye bahin sa Dios nga Kapangulohan, ang kaimportante sa pagkuha og kahibalo niining kinabuhia, ug kon unsaon nato nga makadawat sa mga panalangin sa Dios. Narekord ang mga pagtulun-an sa Propeta diha sa Doktrina ug mga Pakigsaad 130.

Pangandam sa pagtudlo

Aron tabangan ang mga estudyante nga mangandam sa pagtudlo, iapod-apod ang handout nga nag-ulohan og “Pagtudlo sa mga Kamatuoran gikan sa Doktrina ug mga Pakigsaad 130.” Dapita ang mga sakop sa klase nga sundon ang mga tikang sa pagpangandam sa leksiyon para sa giya. Kay tudling sa doktrinal nga kahanas man ang Doktrina ug mga Pakigsaad 130:22–23, kinahanglang tingaling hangyoon ang pipila ka estudyante nga trabahoon ang maong hilisgotan aron maseguro nga matudlo ang maong mga bersikulo atol sa leksiyon.

Samtang nangandam ang mga estudyante, pagtuyok- libot sa lawak og paghatag og tabang kon gikinahanglan. Pwede tingali kang mohatag og pipila ka sugyot kon unsay ilang magamit aron tabangan ang uban nga aktibong moapil sa klase. Apil tingali niini ang mga pangutana para sa panaghisgot, mga biswal, mga butang, pagpakigbahin sa personal nga mga kasinatian, o mga pasulit.

Pagtudlo og mga Kamatuoran gikan sa Doktrina ug mga Pakigsaad 130

Pagpangandam sa leksiyon:

Lakang 1: Pagpili og usa sa mga hilisgotan sa ubos ug tun-i ang gihatag nga mga kapanguhaan. Hatagig pagtagad ang mga hunahuna, mga ideya, ug mga impresyon gikan sa Espiritu Santo mahitungod kon unsa ang imong gibasa. Pwede usab kang mangita og uban pang mga kapanguhaan aron mas mapalawman ang imong pagsabot sa imong napili nga hilisgotan.

Lakang 2: Paghimo og lima ngadto sa pito ka minutong outline sa leksiyon sa imong napili nga hilisgotan. Ikonsiderar ang paggamit sa mosunod nga mga pangutana aron makapangandam ka:

• Sa unsang paagi kini nga mga kamatuoran makaapektar o angayng makaapektar sa atong relasyon sa Langitnong Amahan ug ni Jesukristo?

• Unsaon nako paggamit ang mga kasulatan ug pulong sa mga propeta aron tabangan ang uban nga mas masabtan kini nga hilisgotan?

• Unsay akong mahimo aron sa pagtabang sa uban nga maminaw sa leksiyon ug aktibong makapakigbahin?

• Unsang mga kasinatian ang akong ipakigbahin o unsay akong ipamatuod?

• Unsay akong mahimo aron tabangan ang uban nga gamiton kini nga hilisgotanngadto sa ilang mga kinabuhi?

Hilisgotan nga tun-an ug mga kapanguhaan:

Opsiyon 1: Kahibalo ug salabotan mouban kanato panahon sa Pagkabanhaw.

Mga kapanguhaan nga tun-an:

Doktrina ug mga Pakigsaad 130:18–19; tan-awa usab sa Doktrina ug mga Pakigsaad 88:118; 93:36

Si Elder Neal A. Maxwell (1926–2004) sa Korum sa Napulog Duha ka Apostoles mitudlo:

Kon mamalandong lamang kita kon unsay atong madala sa pagkabanhaw, daw klaro nga ang atong salabotan atong madala, buot ipasabot dili lamang ang atong IQ, apan ang ato usab nga kapasidad sa pagdawat ug paggamit sa kamatuoran. Ang atong mga talento, mga hiyas, ug mga kahanas atong madala; sigurado usab nga ang atong kapasidad sa pagkat-on, ang kapasidad sa atong pagdisiplina sa kaugalingon, ug ang atong kapasidad sa pagtrabaho. (Neal A. Maxwell, We Will Prove Them Herewith [1982], 12)

Opsiyon 2: Makadawat kita og mga panalangin gikan sa Dios pinaagi sa pagtuman sa Iyang mga balaod.

Mga kapanguhaan nga tun-an:

Doktrina ug mga Pakigsaad 130:20–21; tan-awa usab sa Juan 7:17; Doktrina ug mga Pakigsaad 82:10

Si Presidente Russell M. Nelson mitudlo:

Kon ganahan gayod ka og piho nga panalangin, kinahanglan kang mahibalo kon unsang mga balaod ang nagmando sa maong mga panalangin ug dayon maningkamot sa pagtuman sa maong mga balaod. (Russell M. Nelson, “The Mission and Ministry of the Savior: A Discussion with Elder Russell M. Nelson,” Ensign, Hunyo 2005, 19)

Opsiyon 3: Ang Langitnong Amahan ug si Jesukristo adunay mga lawas nga unod ug mga bukog. Ang Espiritu Santo usa ka personahe sa espiritu.

Mga kapanguhaan nga tun-an:

Doktrina ug mga Pakigsaad 130:22–23; tan-awa sab ang Mateo 3:13–17; Mga Buhat 7:55–56

Si Elder Jeffrey R. Holland sa Korum sa Napulog Duha ka Apostoles mitudlo:

Kita nagtuo nga kining tulo ka balaanong mga tawo nga naglangkob sa usa ka Dios nga Kapangulohan nagkahiusa sa katuyoan, sa pamaagi, sa pagpamatuod, sa misyon. Kita nagtuo Kanila nga puno sa samang diosnong pagbati sa kaluoy ug gugma, kaangayan ug grasya, pailob, pagpasaylo, ug katubsanan. Sa akong hunahuna tukma kini sa pag-ingon nga kita nagtuo nga Sila usa sa mahinungdanon ug mahangtorong kinaiya nga mahunahuna gawas nga kita wala magtuo Kanila nga tulo ka mga tawo nga giusa ra diha sa usa ka lawas. … Kita mamahayag nga kini klaro bisan walay lain pa nga pruweba [self-evident] gikan sa mga kasulatan nga ang Amahan, ang Anak, ug ang Espiritu Santo managlahi nga mga tawo, tulo ka balaanong mga binuhat. (Jeffrey R. Holland, “Sa Bugtong Tinuod nga Dios ug kang Jesukristo nga Iyang Pinadala,” Liahona, Nob. 2007, 40–41)

Kasinatian sa Pagtudlo

Ipahibalo sa mga tigkat-on nga ang ilang mga tampo gihatagan og bili: Samtang ipakigbahin sa mga estudyante ang mga leksiyon nga ilang giandam, tabangi silang masayod nga ang ilang mga tampo ngadto sa leksiyon gihatagan og bili ug gipasalamatan. Alang sa dugang nga pagpraktis niini, tan-awa ang pagbansay nga nag-ulohang “Ipakita nga imong gihatagan og bili ang mga estudyante sa dili pa sila mokomentaryo o moisa sa ilang kamot aron mokomentaryo.” nga naa sa Pagpalambo sa mga Kahanas sa Magtutudlo: Higugmaa Kadtong Imong Tudloan.

Human nimo mahatagi og panahon ang mga estudyante nga andamon ang outline sa leksiyon, ikonsiderar ang pagdapit sa pipila aron motudlo sa ilang mga leksiyon atubangan sa klase. Pwede usab nimong organisahon sa ginagmayg grupo ang mga estudyante, ug pwede silang magpulipuli og tudlo sa usag usa. Panahon sa pagpresentar sa estudyante, dasiga ang mga sakop sa klase nga magpakitag pagtahod ug bug-os nga moapil sa proseso sa pagkat-on. Kon si bisan kinsa nga estudyante ang dili komportable sa pagtudlo sa seminary o kon mahurot na ang oras una pa makahigayon ang tanan, dasiga sila nga sulayan pagtudlo ang ilang leksiyon sa balay, sa simbahan nga eksina, o ngadto sa usa ka higala. Sa pagtapos, ikonsiderar ang pagpangutana sa mosunod:

• Unsay imong nakat-onan bahin sa Langitnong Amahan ug ni Jesukristo nga makatabang nimo sa imong kasamtangang kahimtang?

• Unsay imong nakat-onan karon bahin sa pagtudlo sa ebanghelyo sa Manluluwas?

• Sa unsang paagi ang pagbaton og mga oportunidad sa pagtudlo sa ebanghelyo ni Jesukristo makabenipisyo kanimo ug sa umaabot?

Ang Doktrina ug mga Pakigsaad 130:22–23 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas aron dali ra nila kining makita.

Pagsag-ulo

Pwede nimong tabangan ang mga estudyante sa pagsag-ulo sa pakisayran ug sa importanteng hugpong sa mga pulong sa kasulatan sa Doktrina ug mga Pakigsaad 130:22–23 ug irebyo kini sa umaabot nga mga leksiyon. Ang importanteng hugpong sa mga pulong sa kasulatan alang niini nga tudling mao ang “Ang Amahan adunay lawas nga unod ug mga bukog … ; ang Anak usab; apan ang Espiritu Santo … usa ka personahe sa Espiritu.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Asa ko makakat-on og dugang bahin sa mga pagtulun-an sa Doktrina ug mga Pakigsaad 130:1–17?

Agig dugang sa mga hilisgotan nga gihisgotan niini nga leksiyon, gitudlo ni Propeta Joseph Smith ang dugang mga hilisgotan nga narekord sa Doktrina ug mga Pakigsaad 130. Pipila niini naglakip sa mahangturong kahimtang sa atong mga inter-aksiyon uban sa atong mga isigkatawo, ang pagkahibalo sa tanan ug ang pagkahibalo nang daan bahin sa Dios, ang kapalaran sa yuta, ug ang Ikaduhang Pag-anhi ni Jesukristo. Para sa dugang impormasyon bahin niini nga mga hilisgotan, tan-awa ang institute nga Manwal sa Estudyante sa Doktrina ug mga Pakigsaad (2018), 751–58.

Doktrina ug mga Pakigsaad 130:18–19. Nganong kinahanglang padayon nakong edukaron ang akong hunahuna ug espiritu?

Si Presidente Russell M. Nelson mitudlo:

Makaangkon mo og edukasyon sa inyong paninguha. Walay laing makaangkon niini alang kaninyo. Bisan asa man kamo, palamboa ang dakong tinguha sa pagkat-on. Para kanato isip mga Santos sa Ulahing mga Adlaw, ang pag-angkon og edukasyon dili lang usa ka pribilehiyo, relihiyoso kini nga responsibilidad. Ang himaya sa Dios mao ang salabutan (tan-awa sa Doktrina ug mga Pakigsaad 93:36). Sa pagkatinuod, ang atong edukasyon alang sa kahangturan. … Ang edukasyon mao ang kalainan tali sa paghandom nga makatabang kamo sa ubang tawo ug sa paghimo sa pagtabang kanila. (Russell M. Nelson, “Will You Choose to Increase in Learning?,” New Era, Sept. 2014, 2–3)

Doktrina ug mga Pakigsaad 130:20–21. Unsa ang kinatan-ang panalangin sa pagtuman sa mga balaod sa Dios?

Si Presidente Dallin H. Oaks sa Unang Kapangulohan mipasabot:

Si Joseph Smith mitudlo nga ang Dios “[nag]mugna og mga balaod aron [ang mga espiritu nga Iyang ipadala ngadto sa kalibutan] makabaton og kahigayunan sa pag-uswag sama sa Iyang kaugalingon.” [Mga Pagtulun-an sa mga Presidente sa Simbahan: Joseph Smith (2007), 210.] Ang gugma sa Dios hingpit kaayo nga Siya mahigugmaong nagmando kanato sa pagtuman sa Iyang mga sugo tungod kay Siya nasayod nga pinaagi lamang sa pagsunod sa Iyang mga balaod nga kita mahimong hingpit sama Kaniya. (Dallin H. Oaks, “Gugma ug Balaod,” Liahona, Nob. 2009, 27)

Doktrina ug mga Pakigsaad 130:22–23. Asa ko makakat-on og dugang bahin sa Diosnong Kapanguluhan?

Tan-awa ang bidyo nga “What Is the Godhead?” (7:03) aron makakat-on og dugang bahin sa matag sakop sa Dios nga Kapangulohan ug sa Ilang nahiusang paningkamot nga panalanginan ang atong mga kinabuhi.

Dugang nga mga Kalihokan sa Pagkat-on

Doktrina ug mga Pakigsaad 130:18–19. Kahibalo ug salabotan

Dapita ang mga estudyante nga maghanduraw nga mohawa sila sa ilang balay sulod sa pipila ka semana. Gitugotan sila sa pagdala kon unsa ray masulod sa usa ka maleta o bag. Pangutan-a sila kon unsay ilang isulod.

Dayon hangyoa ang mga estudyante nga maghanduraw nga moadto sila sa kalibotan sa espiritu, diin kita mosulod dihang mamatay ta. Dapita sila nga ipakigbahin kon hain sa mga butang nga nahunahunaan nilang dal-on ang ila gyong madala dihang mamatay sila.

Dapita ang mga estudyante nga basahon ang Doktrina ug mga Pakigsaad 130:18–19, nga mangita kon unsa ray atong madala dihang mamatay ta. Human mohangyo sa mga estudyante nga ireport kon unsay ilang nakaplagan, tabangi silang ilhon ang kamatuoran nga sama niini: Ang kahibalo ug salabotan nga atong mabatonan niining kalibotana, maanaa kanato panahon sa Pagkabanhaw.

Hisgoti ang mga pangutana nga sama ini:

• Sa unsang paagi ang pagkahibalo niini nga kamatuoran makaapektar sa atong mga desisyon ug mga prayoridad?

• Unsay imong nakat-onan niini nga mga bersikulo kon unsaon nimo pagpatubo ang imong kahibalo ug salabotan?

Doktrina ug mga Pakigsaad 130:20–21. Pagdawat sa mga panalangin gikan sa Dios

Dapita ang mga estudyante sa paghanduraw nga gusto nilang panindoton ang ilang agi. Hangyoa sila sa pagpakigbahin sa pipila ka butang nga ilang himoon aron makab-ot ni nga tumong.

Dayon ipahanduraw nila nga nakadesisyon sila nga mapanindot nila ang ilang agi pinaagi sa pagdagan og tulo ka milya, lima ka adlaw kada semana, sulod sa usa ka bulan.

• Unsa may mahimong resulta? Ngano man?

Dayon pwedeng basahon sa mga estudyante ang Doktrina ug mga Pakigsaad 130:20–21, nga mangita sa kamatuoran nga may kalambigitan sa espirituwal nga mga panalangin nga gusto natong madawat. (Mahimo nimong ipasabot nga ang “gipasikad” nagpasabot og “gibasihan” ug nga ang balaod nga “dili mausab nga sugo” permanente ug dili mailisan.)

• Sumala sa Doktrina ug mga Pakigsaad 130:20–21, sa unsang paagi kita makadawat og panalangin gikan sa Dios?

Kon kinahanglan, tabangi ang mga estudyante nga mailhan ang mosunod nga kamatuoran: Kon gusto tang makadawat og panalangin gikan sa Dios, dayon kinahanglan natong sundon ang balaod diin kini gibase.

Makatabang tingali sa mga estudyante nga mangita og mga ehemplo sa mga kasulatan nga nagpakita sa mga panalangin nga atong madawat pinaagi sa pagsunod sa mga piho nga balaod sa Dios. Pananglitan, pwede nimong isugyot nga tun-an nila ang Juan 7:17; 2 Nephi 32:3; Doktrina ug mga Pakigsaad 10:5; 88:124.

Dapita ang mga estudyante sa pagsulat sa mga panalangin nga gusto nilang makab-ot. Dayon dapita sila sa pagsulat kon unsa nga balaod o mga balaod ang kinahanglan nilang tumanon aron madawat ang maong mga panalangin. Ipasabot nga ang ubang mga balaod ug mga panalangin piho kaayo, samtang ang uban mas alang sa kadaghanan. Pahinumdomi ang mga estudyante nga ang pipila sa gisaad nga mga panalangin mahimong madawat sa sunod nga kinabuhi. Pwede usab nimong ipakigbahin ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

Kita kinahanglan nga dili maghunahuna sa plano sa Dios nga sama sa usa ka cosmic vending machine diin kita (1) mopili sa gitinguha nga panalangin, (2) mosuksok sa gikinahanglan nga gidaghanon sa maayong mga buhat, ug (3) ang gi-order moabot dayon.

Ang Dios motuman gayod sa Iyang mga pakigsaad ug mga saad sa matag usa kanato. … Apan dili ang tanang panalangin nga pinasikad base sa kamasulundon sa balaod [Doktrina ug mga Pakigsaad 130:20–21] giporma, gidesinyo, ug may tagal sumala sa atong mga gilaoman. Kita maningkamot sa atong labing maayo apan kinahanglan nga itugyan ngadto Kaniya ang pagdumala sa mga panalangin, temporal man o espirituwal. (D. Todd Christofferson, “Ang Atong Relasyon sa Dios,” Liahona, Mayo 2022, 78-79)

Doktrina ug mga Pakigsaad 130:22–23. Ang kinaiyahan sa Dios nga Kapangulohan

Dapita ang mga estudyante sa paghanduraw sa mosunod nga sitwasyon:

Samtang ikaw nakig-istorya sa usa ka higala, nahisgotan ninyo ang bahin sa pagtuo sa Dios. Gitudloan ang imong higala nga ang Dios dili usa ka tawo apan usa ka presensiya o gahom nga anaa ug makita bisan asa sa samang higayon.

Hangyoa ang mga estudyante nga tun-an ang Doktrina ug mga Pakigsaad 130:22–23, nga mangita og mga kamatuoran bahin sa Dios nga Kapangulohan nga gipadayag sa Ginoo kang Propeta Joseph Smith nga makatabang sa mga kabalaka nga sama sa gipakigbahin diha senaryo.

Pwede usab nimo silang dapiton sa pagpangita sa mga entry nga “Dios, Diosnong Kapangulohan” diha sa Giya ngadto sa Kasulatan o “Topical Guide” diha sa Topical Guide aron makakita og dugang mga kasulatan nga ipakigbahin nila sa ilang higala.

Pagkahuman og tuon sa mga estudyante, hisgoti kon unsay ilang nakat-onan pinaagi sa pagpangutana sama sa:

• Unsa nga mga kamatuoran ang imong nakaplagan gikan sa mga kasulatan nga pwede nimong ipakigbahin? (Mailhan tingali sa mga estudyante ang mga kamatuoran nga sama sa mosunod: Adunay tulo ka bulag nga mga personahe diha sa Diosnong Kapangulohan. Ang Amahan ug ang Anak naay mahikap, nabalaang mga lawas nga unod ug bukog. Ang Espiritu Santo usa ka personahe sa espiritu.)

• Sa unsang paagi ang pagkahibalo ug pagtuo niini nga mga kamatuoran makaapektar sa imong kinabuhi o sa imong relasyon sa Dios?