“143-р хичээл—Сургаал ба Гэрээ 133:1–40: Аврагчтай уулзахад бэлтгэх,” Сургаал ба Гэрээний семинарын багшийн гарын авлага (2025)
“Сургаал ба Гэрээ 133:1–40,” Сургаал ба Гэрээний семинарын багшийн гарын авлага
143-р хичээл: Сургаал ба Гэрээ 133–134
Сургаал ба Гэрээ 133:1–40
Аврагчтай уулзахад бэлтгэх
1831 оны 11-р сард Сүмийн удирдагчид сайн мэдээний номлол болон Израилын цугларалтын талаар илүү ихийг мэдэхийг хүсжээ. Сургаал ба Гэрээ 133 дахь илчлэлтэд Аврагчийн Хоёр дахь ирэлтийн өмнө тохиох үйл явдлуудыг болон Түүний гэгээнтнүүд тэдгээр үйл явдалд хэрхэн бэлтгэж чадахыг тайлбарласан байдаг. Энэ хичээл суралцагчдад Есүс Христийн Хоёр дахь ирэлтэд бэлтгэхэд тусалж чадна.
Хиймэл оюун ухаанаар зурсан зураг
Боломжит суралцах үйл ажиллагаа
Бэлтгэх цаг
Сургаал ба Гэрээ 29:10–11 дэх төгс эзэмших сургаалын хэсгээс түлхүүр үг хэллэгийг цээжээрээ (судрууд хэрэглэхгүй эсвэл бэлдэхгүй) хэлэхийг суралцагчдаас хүс. Та энэ үйл ажиллагааг гэнэтийн сорилго гэж нэрлэж болно. Дараа нь суралцагчдаас ингэж асуу.
-
Хэрэв та нар энэ сорилгын талаар хэдэн өдөр эсвэл бүр долоо хоногийн өмнө мэдсэн бол үр дүн нь хэр өөр байх байсан бэ?
Та суралцагчдад сорилгыг дахин гүйцэтгэхэд бэлтгэх 2-оос 3 минутын хугацаа өгч болно. Дараа нь тэдний хэллэг хэлэх чадвар хэрхэн сайжирч байгааг хар.
Энэ үйл ажиллагааг хэрэв бид Аврагчийн Хоёр дахь ирэлтэд бэлтгэхээр хичээвэл бидний туршлага хэрхэн өөрчлөгдөж болохтой харьцуулахад суралцагчдыг урь. Тэднийг дараах асуултуудад өгсөн хариултаа тунгаан бодоход эсвэл бичиж авахад урь.
-
Аврагчийг эргэн ирэх үед Түүнтэй уулзах талаар та нарт ямар бодол төрж байна вэ?
-
Та нар өөрсдийгөө Түүний эргэн ирэхэд хэр бэлтгэгдсэн гэж бодож байна вэ? (Та нар юунд хамгийн их сэтгэл хөдөлж байна вэ? Тэрхүү өдрийн талаар та нар юунд санаа зовж байна вэ?)
Өнөөдөр суралцагчдыг судалж байх явцдаа, Аврагчийг эргэн ирэхэд хэрхэн бэлтгэх тухай сүнслэг өдөөлтүүдийг эрэлхийлэхэд тэднийг урамшуулан дэмж.
Дараах нь суралцагчдад Сургаал ба Гэрээ 133-ын агуулгыг илүү сайн ойлгоход тусалж чадна. Та эсвэл сайн дурын суралцагч догол мөрийг уншиж өгч эсвэл хураангуйлж болно.
1831 оны 11-р сард Сүмийн олон удирдагч сайн мэдээний номлол болон Израилын цугларалтын талаар илүү ихийг мэдэхийг хүсжээ. Эдгээр чин сэтгэлийн хүслийн хариуд Есүс Христ дараах илчлэлтийг өгөв. Одоогийн Сургаал ба Гэрээ 133 буюу энэ илчлэлт нь анх Зарлигуудын номд хавсралт болон хэвлэгджээ. Үүнийг “Их Эзэний оршил” гэж нэрлэдэг байсан 1-р хэсгээс хоёр хоногийн дараа хүлээн авсан.
Сургаал ба Гэрээ 133:1–4, 10–11-ийг уншаад, Аврагч дэлхий дээр Өөрийн эргэн ирэх үйл явдлын талаар юу илчилснийг олж мэд.
-
Та нар юу олж мэдсэн бэ?
-
Та нар 4-р шүлгээс бидний төлөөх Аврагчийн хүслийн талаар юу сурч мэдсэн бэ?
Суралцагчдыг олж мэдсэн зүйлсээ хуваалцах үед та Есүс Христ биднийг Өөрийнх нь Хоёр дахь ирэлтэд бэлтгэхэд урьдаг гэсэн үнэнийг самбарт бичиж болно.
-
Аврагчийн Хоёр дахь ирэлтэд бэлтгэх хамгийн чухал зарим арга замыг та нар юу гэж бодож байна вэ?
Хоёр дахь ирэлтэд бэлтгэх
Хоёр дахь ирэлтэд бэлтгэж чадах арга замуудыг олж тодорхойлоход нь суралцагчдад туслахын тулд та самбар дээрх тод бичсэн зүйлийн төгсгөлд дараах байдлаар гэж нэмж болно. Суралцагчдыг дараах шүлгүүдийг жижиг бүлгээр судлахад урь. Дараа нь тэднээс Аврагч биднийг Өөрийнхөө Хоёр дахь ирэлтэд бэлтгэхээр урьсан арга замуудыг самбарт жагсаан бичихийг хүс.
Сургаал ба Гэрээ 133:5–16, 36–40, 62-ыг уншаад, Аврагчийн эргэн ирэх үйл явдалд бэлтгэхэд бидэнд туслах үг, хэллэгийг олж мэд.
Дараах үйл ажиллагаа нь Аврагчийн Хоёр дахь ирэлтэд бид хэрхэн бэлтгэж чадах тухай санааг хуваалцахад суралцагчдад тусална. Бүлгүүдийг самбар дээрх бэлтгэх санаануудаас сонгоход урь эсвэл бүлэг бүрд нэг сэдэв оноож өг. Суралцагчид Хоёр дахь ирэлтэд хэрхэн бэлэн байх талаар бусдад заахын тулд толилуулга бэлдэж болно. Толилуулгаа бүтээхэд нь туслахын тулд суралцагчдад зузаан цаасан самбар эсвэл хэд хэдэн цаас, өнгийн маркер өг. Бэлтгэхэд нь туслахын тулд тэднийг Gospel Library аппликэйшн, Судруудын удирдамж болон бусад эх сурвалжийг ашиглахад урамшуул. Толилуулга бүр дараах хэсгүүдийг агуулж болно. Үүнд:
-
Бүлгийн сонгосон эсвэл хуваарилж авсан үнэний мэдэгдэл
-
Өсвөр насныхан Аврагчтай уулзахад илүү сайн бэлтгэхийн тулд сурсан зүйлээ хэрхэн хэрэгжүүлэх талаарх тодорхой санаанууд
-
Сэдэвтэй холбоотой холбогдох судрууд, Сүмийн удирдагчдын мэдэгдэл эсвэл Өсвөр үеийнхний бат бөх байдлын төлөө: Сонголт хийхэд туслах хөтөч товхимол дахь хэсэг
-
Хоёр дахь ирэлтэд хэрхэн бэлдэх талаар ойлгоход нь хэн нэгэнд туслах зураг, зурагт хуудас, мийм эсвэл бусад зурагт үзүүлэн
Хэрэв суралцагчдад нэмэлт хөтөч хэрэгтэй бол та сэдэвт нь тохирох дараах тараах материалын хэсгийг бүлгүүдэд өгч болно.
Их Эзэн биднийг Өөрийнх нь Хоёр дахь ирэлтэд дараах байдлаар бэлтгэхэд урьсан …
… Вавилоныг орхин явах (ёс бус байдал) (Сургаал ба Гэрээ 133:4–5, 7, 12–14-ийг үзнэ үү).
Тэргүүн зөвлөлийн ерөнхийлөгч асан Дийтр Ф.Угдорф ийн заажээ.
Эртний Вавилон балгас болсон. Бахдам үзэсгэлэн нь хэдийн үгүй болсон. Гэвч Вавилоны ёс бус явдал, дэлхийн шунал байсаар байна. Итгэлгүй дэлхийн дунд итгэгчид болж амьдрах нь эдүгээ бидэнд оногдсон байна. … Бид үеийнхнийхээ дарамт шахалтыг тайван тэвчиж, нийтийг байлдан дагуулагч зүйлс эсвэл хуурамч бошиглогчдын үгсэд үл автан, бурханлаг бус хүмүүсийн тохуурхлыг үл ойшоож, хилэнцэт нэгний уруу таталтыг тэвчин, залхуурлаа даван гарах хэрэгтэй болно. (Дийтр Ф.Угдорф, “Бүү ай, зөвхөн итгэ,” 2015 оны 10-р сарын Ерөнхий чуулган, 63)
… Израилыг цуглуулах (Сургаал ба Гэрээ 133:4, 7–9, 37–38-ыг үзнэ үү).
Ерөнхийлөгч Рассэлл М.Нэлсон бидэнд ийн сануулжээ.
Ямар ч үед, хөшигний аль ч талд байх хэн нэгэнд туслах ямар нэгэн ажлыг хийхэд буюу Бурхантай гэрээ байгуулах, баптисмын болон ариун сүмийн нэн чухал ёслолуудаа хүлээн авах алхам хийхдээ та нар Израилыг цуглуулахад тусалж байгаа хэрэг юм. Энэ бол ийм л энгийн зүйл. (Рассэлл М.Нэлсон, “Израилын найдвар” [Өсвөр үеийнхэнд зориулсан дэлхий даяарх онцгой цугларалт, 2018 оны 6-р сарын 3] broadcasts.ChurchofJesusChrist.org).
… наманчилж, Есүс Христээр ариусгагдах (Сургаал ба Гэрээ 133:5–16, 34, 35–62-ыг үзнэ үү).
Залуу эмэгтэйчүүдийн ерөнхий ерөнхийлөгчийн зөвлөлийн зөвлөх асан Кэрол Ф.Макконки эгч ийн тайлбарласан.
Есүс Христэд болон Түүний Цагаатгалд итгэн, бурханлаг бусаас өөрсдөө татгалзаж, чин сэтгэлээсээ наманчлах үед цэвэр ариун, толбогүй болох боломжтой. Бид нүглээсээ ангижрахын тулд усанд умбуулах баптисм хүртдэг. Биднийг зүрх сэтгэлээ нээж, Ариун Сүнсийг хүлээн авах үед бодгаль маань ариусдаг юм. Долоо хоног бүр бид ариун ёслолоос хүртдэг. Бид Түүний Сүнсийг өөрсөдтэйгөө үргэлж хамт байлгаж болохын тулд зөв шударга байх чин хүсэлтэй байж, наманчлалын сүнсээр өөрсдөдөө Христийн нэрийг авч, Түүнийг дурсан санаж, зарлигуудыг нь дагахад бэлэн хэмээн гэрээ байгуулдаг. (Кэрол Ф.Макконки, “Ариун байдлын гоо үзэсгэлэн,” 2017 оны 4-р сарын Ерөнхий чуулган, 127–128)
Бүлэг тус бүрийг толилуулгаа бусадтайгаа хуваалцахад урь. Суралцагчид толилуулгынхаа нэг хэсэг болгон, өсвөр насныхныг сурсан зүйлээ хэрхэн хэрэгжүүлэх талаар санаа бодлоо хуваалцаж байгаа эсэхийг шалгаарай.
Сурсан зүйлсээ ашиглах
Тэргүүн зөвлөлийн ерөнхийлөгч Даллин Х.Өүкс хэрэв бид Хоёр дахь ирэлт хэзээ болох хугацааг яг мэдэж байсан бол өнөөдөр юу хийх байсан талаараа бодож үзэхэд урьсан.
Хэрэв Түүний ирэх өдөр маргааш байсан бол яах байсан бэ? Хэрэв бид маргааш зуурдаар нас барж эсвэл Их Эзэн гэнэт ирж, бид Түүнтэй уулзах боллоо гэхэд бид өнөөдөр юу хийх байсан бэ? Бид ямар нүглээ наманчлах байсан бэ? Бид ямар зан үйлээ болих байсан бэ? Бид ямар асуудлаа шийдэх байсан бэ? Бид ямар уучлал үзүүлэх байсан бэ? Бид ямар гэрчлэл хуваалцах байсан бэ?
Хэрэв бид тэр үед эдгээрийг хийх юм бол яагаад одоо хийж болохгүй гэж? Амар амгаланг олох боломжтой байхад яагаад үүнийг эрэлхийлж болохгүй гэж? (Dallin H. Oaks, “Preparation for the Second Coming,” Liahona, May 2004, 9)
Ерөнхийлөгч Өүксийн урилгыг болон өнөөдрийн судалсан зүйлээс Аврагчтай уулзахад илүү сайн бэлтгэхийн тулд хийхээр өдөөгдөж буй зүйлээ судлах тэмдэглэлдээ бич. Дараа нь дараах асуултуудад хариул.
-
Сүнсний та нарыг хийж гүйцэтгэхэд өдөөсөн зүйлд ямар саад бэрхшээл тулгарч болох вэ?
-
Та нарт тулгарсан саад бэрхшээлийг шийдэхэд ямар үйлдэл тус болох вэ? Та Аврагчид хэрхэн найдаж болох вэ?
-
Аврагчийн Хоёр дахь ирэлтэд одооноос бэлтгэхийн ач холбогдлын талаар та нарт ямар бодол төрсөн бэ?
Тохиромжтой бол суралцагчид Аврагчийн эргэн ирэхэд бэлтгэхэд Сүнс тэднийг юуг хийхэд өдөөсөн талаар хуваалцаж болно. Та Тэнгэрлэг Эцэг, Есүс Христ хоёр биднийг Хоёр дахь ирэлтэд бэлтгэж, үүнийг баяр хөөртэй өдөр гэж хараасай гэж хүсдэгийг суралцагчдад сануулснаар хичээлийг өндөрлүүлж болно.