“146-р хичээл—Суралцахуйгаа үнэлэх нь 9: Сургаал ба Гэрээ 115–134,” Сургаал ба Гэрээний семинарын багшийн гарын авлага (2025)
“Суралцахуйгаа үнэлэх нь 9,” Сургаал ба Гэрээний семинарын багшийн гарын авлага
146-р хичээл: Сургаал ба Гэрээ 133–134
Суралцахуйгаа үнэлэх нь 9
Христтэй адил болоход байнгын хичээл зүтгэл шаардлагатай ба энэ нь насан туршийн үйл явц юм. Сүнслэг өсөлтөө үе үе үнэлж байх нь гаргаж буй ахиц дэвшлээ харж, Аврагч руу илүү ойртоход бидэнд тусална. Энэ хичээл суралцагчдад Сургаал ба Гэрээг судлах нь тэдэнд сүнслэгээр өсөхөд хэрхэн тусалсныг үнэлэхэд тусална.
Боломжит суралцах үйл ажиллагаа
Аажуу бөгөөд тогтвортой ахиц дэвшил
Солт Лэйк ариун сүмийн барилгын өөр өөр үе шатын зургийг суралцагчдад үзүүл. Энэ ариун сүмийг барьж дуусгахад хэр хугацаа зарцуулсныг мэддэг эсэхийг суралцагчдаас асуу (40 жил). Та ариун сүмийг барьж дуусгахад зарцуулсан хугацаа, хичээл зүтгэл үнэ цэнтэй байсан эсэх мөн яагаад гэж бодож байгаагаа хуваалцахыг суралцагчдаас хүсэж болох юм.
Юта мужийн Түүхийн нийгэмлэгийн зөвшөөрлийг авч ашиглав
Өөрсдийн сүнслэг өсөлтийг ариун сүмийг барих үйл явцтай харьцуулахад нь суралцагчдад тусал. Ийн үйлдэх нэг арга зам бол ийм урт хугацааны төсөл дээр ажиллахад барилгачдад ямар байсан талаар бодоход тэднийг урих явдал юм. Та дараах асуултуудыг тавьж болно.
-
Ариун сүм дээр 10, 20 жил ажилласны дараа хийх шаардлагатай тэр бүх ажлыг хараад, та нарт ямар санагдах байсан бэ?
-
Хэрэв та нар ажилчдын нэг байсан бол та нарыг үргэлжлүүлэн ажиллахад юу түлхэц болох байсан бэ?
-
Та нарын бодлоор ажилчдын туршлагыг өөрсдийн сүнслэг байдлын хувьд өсөж, Аврагчтай илүү адил болох хичээл зүтгэлд хэрхэн хэрэгжүүлж болох вэ?
Өөрийн амьдралыг мөн Есүс Христтэй илүү адил болохын тулд юу хийснээ цаг гарган, тунгаан бод. Христтэй илүү адил болохын тулд бага багаар ч хамаагүй хэрхэн ахиж дэвшиж байгаагаа бод.
-
Үйл явц нь хэдийгээр урт боловч өдөр бүр Есүс Христтэй илүү адил болохыг хичээхийн үнэ цэнийн талаар та нар юу сурч байна вэ?
Сурч мэдсэн зүйлээ болон сүүлийн хэдэн долоо хоногт хэрхэн ахиц дэвшил гаргасан гэж бодож байгаагаа хуваалцахыг суралцагчдаас хүс. Суралцагчдад хуваалцахад нь туслахын тулд та тэднийг Сургаал ба Гэрээг судлахдаа саяхан сурч мэдсэн зүйлээ давтахад урьж болно. Та тэднийг тэмдэглэлээ гүйлгэж уншихад эсвэл саяхан судар дээрээ юуг тэмдэглэснээ харахад урамшуулж болно.
Дараах үйл ажиллагаанууд нь сурч байгаа зүйлээ тайлбарлах, бодол мэдрэмжээ үнэлэх, хуваалцах, амьд сайн мэдээний зарчмуудад тэдний гаргаж буй ахиц дэвшлийг тайлагнах боломжийг суралцагчдад олгоно. Хэрэв танай анги Сургаал ба Гэрээ 115–134-ийг судлахдаа дараах үйл ажиллагаанууд дээр байгаагаас өөр үнэнүүд дээр төвлөрч байсан бол та тэдгээр үнэнийг оруулахын тулд үйл ажиллагааг тохируулан өөрчилж болно.
Нас барагсдын төлөөх баптисмын ач холбогдлыг тайлбарлах
Нас барагсдын төлөөх баптисмын сургаалыг тайлбарлах боломжийг суралцагчдад олгохын тулд дараах ариун сүмийн баптисмын усан сангийн зургийг үзүүлж, доорхтой адил нэг жишээг сонирхуул.
Обри болон түүний найзууд ариун сүм рүү явах гэж байгаадаа баяртай байлаа. Ариун сүмийн талаар сайн мэддэггүй нэг найз нь тэдний баярлаж байгааг анзаарч, дараа нь Обригоос ариун сүм дээр юу хийдгийг нь асуув. Обри гар утаснаасаа ариун сүмийн баптисмын усан сангийн зургийг олж харуулаад, нас барагсдын төлөөх баптисмын тухай тайлбарлаж эхэллээ.
Хэрэв тэднээс найздаа нас барагсдын төлөөх баптисмыг тайлбарлахыг хүсвэл юу гэж хэлэх талаараа хуваалцах боломжийг суралцагчдад олго. Та суралцагчдыг хоёр хоёроороо эсвэл жижиг бүлгүүд дотроо дүрд тоглоход урьж болно.
Суралцагчдад дүрд тоглох боломж олдсоны дараа тэднийг тайлбартаа нэмж оруулах зүйл байгаа эсэхийг харахаар Сургаал ба Гэрээ 124, 127, 128-аас сурсан зүйлээ эргэн давтахад урь. Та суралцагчдаас дараах асуултуудыг бодоод, бүлгээрээ хамтдаа давтахыг хүсэж болох юм.
-
Обри Бурханы төлөвлөгөөний нэг хэсэг болох энэхүү ариун нандин ёслолыг ойлгоход нь найздаа туслахын тулд ямар зүйлийг хуваалцаж болох вэ?
-
Найздаа Тэнгэрлэг Эцэг эсвэл Есүс Христийн талаар ойлгуулахад нь Обрид юу тус болж чадах вэ?
Суралцагчдыг нас барагсдын төлөөх баптисмын сургаалыг давтаж, ярилцсаны дараа та тэдэнд сурсан зүйлээ багтаан жишээгээр дүрд тоглох дахин нэг боломж олгож болох юм.
Ариун сүм, гэр бүлийн түүхийн ажилд оролцох
Энэ үйл ажиллагаа нь ариун сүм, гэр бүлийн түүхийн ажилд хэрхэн оролцож байсан талаараа хуваалцахад суралцагчдад туслах зорилготой. Та эхлээд дараах мэдэгдлийг хуваалцан, Их Эзэний ажлыг хийхтэй холбоотой зарим агуу адислалыг санахад нь суралцагчдад тусалж болно.
Тэргүүн зөвлөлийн ерөнхийлөгч Хэнри Б.Айринг ийн заасан.
Олон өсвөр үеийнхэн цаг заваа гэр бүлийн түүхийн судалгаанд болон ариун сүмийн ажилд зарцуулах нь авралын төлөвлөгөөний талаарх тэдний гэрчлэлийг гүнзгийрүүлдэг гэдгийг олж мэдсэн. Энэ нь тэдний амьдралд Сүнсний нөлөөг нэмэгдүүлж, дайсны нөлөөг сулруулсан. Мөн гэр бүлдээ болон Их Эзэн Есүс Христэд илүү их ойртоход нь тусалсан байна. Тэд бас энэ ажил зөвхөн нас барагсдыг биш харин бид бүгдийг авардаг гэдгийг мэдсэн (С ба Г 128:18-ыг үзнэ үү). (Хэнри Б.Айринг, “Бурханы гэр бүлийг цуглуулах нь,” 2017 оны 4-р сарын Ерөнхий чуулган, 22)
-
Та нар ариун сүм, гэр бүлийн түүхийн ажилд оролцож байхдаа ямар ямар адислалыг олж мэдсэн бэ?
Сургаал ба Гэрээ 127–128-ын хичээлүүд дээр суралцагчдыг энэ ажилд ямар нэгэн байдлаар оролцох төлөвлөгөө гаргахад урьсан байж магадгүй. Төлөвлөгөөгөө эргэцүүлэн бодох цагийг суралцагчдад гаргаж өгч, хийсэн зүйлээ хуваалцахад тэднийг урамшуулан дэмж.
Шаардлагатай бол та суралцагчдад оролцохоор сонгож болох зарим арга замыг сануулж болно. Үүнд FamilySearch.org эсвэл the Family Tree аппликэйшн дээрх өөр өөр үйл ажиллагаанууд багтаж болно. Суралцагчдыг хийсэн эсвэл сурсан зүйлээ ангийнхандаа дүрслэх, боломжтой бол харуулахад урих талаар бодож үз. Суралцагчид гэр бүлийнхээ нас барсан гишүүдэд зориулсан ариун нандин ёслолуудад оролцохоор ариун сүмд очсон байж болох юм. Тэднийг энэ туршлагынхаа талаар санаа бодлоо хуваалцахад урь.
Сорилтуудын үед Бурханд нэмэлт итгэлийг мэдэр
Та Сургаал ба Гэрээ 122-ыг заах үедээ үзүүлэнт хичээл дээр барзгар болон гөлгөр чулуу ашигласан бол тэдгээрийг дахин үзүүл. Тэдгээр чулуу нь суралцагчдад сурсан зүйлийг нь сануулж, сорилтуудын зорилго болоод сорилтуудыг мэдрэх үедээ Бурханд итгэх талаарх санаа бодлоо ярилцах боломжийг олгоно. Хэрэв та тустай гэж үзвэл, энэ сэдвийн талаарх зарим хичээлийг суралцагчдад сануул. Суралцагчид сорилтуудын талаар Сургаал ба Гэрээ 98, 101, 105, 111, 121–123-аас мөн бусад хэсгээс сурч мэдсэн байж магадгүй. Суралцагчид мөн Миссуригээс гэгээнтнүүдийг хөөсөн тухай гардаг хичээлээс Бурханд итгэх тухай үнэ цэнтэй сургамжийг санаж болно.
Та суралцагчдыг судрын тустай зарим шүлгүүдийг давтан харж, сурсан зүйлээ ярилцахад урьж болно.
-
Таны сурч мэдсэн зүйл сорилтуудынхаа талаар өөрөөр бодоход хэрхэн тусалсан бэ?
-
Та хэцүү цаг үеийг туулах үедээ Тэнгэрлэг Эцэг, Есүс Христ хоёрын талаар юу сурч мэдсэн бэ?
Тэнгэрлэг Эцэг, Есүс Христ хоёр сорилт бэрхшээлд нь хэрхэн тусалсан тухай өөрийн мэдрэмжийг тэмдэглэл дээрээ бичихэд суралцагчдыг урь. Сурсан, туулсан зүйлийнхээ улмаас Есүс Христэд итгэх итгэл нь хэрхэн нөлөөлөгдсөн талаар бодохыг тэднээс хүс. Мөн та бичсэн зүйлсээ хуваалцах хүсэлтэй хүн байгаа эсэхийг суралцагчдаас асууж болно. Тэдэнд хүлээн авсан бурханлаг тусламжийнхаа талаар гэрчлэх боломж олго.