“Lesona 143—Mataupu Faavae ma Feagaiga 133:1–40: Saunia e Feiloai ma le Faaola,” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 133:1–40,” Tusi Lesona a le Faiaoga Seminare o le Mataupu Faavae ma Feagaiga
Lesona 143: Mataupu Faavae ma Feagaiga 133–134
Mataupu Faavae ma Feagaiga 133:1–40
Saunia e Feiloai ma le Faaola
Ia Novema 1831, sa mananao ai taitai o le Ekalesia ia iloa atili e uiga i le talaiga o le talalelei ma le faapotopotoina o Isaraelu. O le faaaliga i le Mataupu Faavae ma Feagaiga 133 o loo faamatala mai ai mea o le a muamua mai i le Afio Mai Faalua o le Faaola ma le ala e mafai ai e Lana Au Paia ona sauni mo na mea. E mafai ona fesoasoani lenei lesona i tagata aoga e saunia mo le Afio Mai Faalua o Iesu Keriso.
Ata na gaosi e le AI
Gaoioiga E Ono Mafai Ona Aoao Ai
Taimi e sauni ai
Fai atu i tagata aoga e tauloto mai le fasifuaitau autu mai le fuaitau o le atamai i aoaoga faavae o le Mataupu Faavae ma Feagaiga 29:10–11 mai le manatuaga (e aunoa ma le faaaogaina o a latou tusitusiga paia po o le maua o se taimi e sauni ai). E mafai ona e taua le gaoioiga o se suega puupuu e faateia ai. Ona fai atu lea i tagata aoga o le fesili lenei.
-
Mata o le a se eseesega o taunuuga pe ana e iloaina lenei suega puupuu i ni aso po o ni vaiaso na muamua atu?
E mafai ona e tuu atu i le vasega le 2 i le 3 minute e sauni ai e toe fai le suega puupuu. Ona vaai lea pe faapefea ona faaleleia lo latou tomai e tauloto ai le fasifuaitau.
Valaaulia tagata aoga e faatusatusa lenei gaoioiga i le ala o le a suia ai o tatou aafiaga pe afai tatou te taumafai e sauni mo le Afio Mai Faalua o le Faaola. Valaaulia i latou e mafaufau loloto lemu pe faamau a latou tali i fesili nei.
-
O le a sou lagona e uiga i le feiloai atu i le Faaola pe a toe afio mai o Ia?
-
O le a sou lagonna i lou saunia mo Lona toe afio mai? (O le a le mea e pito sili ona e fiafia iai? O a ni ou popolega e uiga i lena aso?)
A o suesue tagata aoga i le aso, uunaia i latou e saili uunaiga faaleagaga e uiga i le auala e saunia ai mo le toe foi mai o le Faaola.
O mea nei e mafai ona fesoasoani i tagata aoga ia malamalama atili ai i le talaaga o le Mataupu Faavae ma Feagaiga 133. E mafai e oe po o se tagata aoga volenitia ona faitau pe aotele le parakalafa.
Ia Novema 1831, e toatele taitai o le Ekalesia sa mananao ia iloa atili e uiga i le talaiga o le talalelei ma le faapotopotoina o Isaraelu. Na tuuina mai e Iesu Keriso lenei faaaliga e tali atu ai i nei manaoga faamaoni. O le taimi nei Mataupu Faavae ma Feagaiga 133, o lenei faaaliga sa muai lolomiina o se faaopoopoga i le Tusi o Poloaiga. Na maua i le lua aso talu ona uma le vaega 1, lea sa muai iloa o “le faatomuaga a le Alii.”
Faitau le Mataupu Faavae ma Feagaiga 133:1–4, 10–11, ma vaavaai i mea na faaali mai e le Faaola e uiga i Lona toe foi mai i le lalolagi.
-
O le a se mea na e mauaina?
-
O le a se mea ua e aoao mai le fuaiupu 4 e uiga i manaoga o le Faaola mo i tatou?
A o faasoa mai tagata aoga, e mafai ona e tusia le upumoni lenei i luga o le laupapa: Ua valaaulia i tatou e Iesu Keriso e saunia mo Lona Afio Mai Faalua.
-
O le a sou manatu o a nisi o auala e sili ona taua e sauni ai mo le Afio Mai Faalua o le Faaola?
Sauniuniga mo le Afio Mai Faalua
Ina ia fesoasoani i tagata aoga e faailoa mai auala e mafai ona latou sauni ai mo le Afio Mai Faalua, e mafai ona e faaopoopo i ai le ““e ala i le …” e oo i le faaiuga o le upumoni ua faailoga matamata tetele i luga o le laupapa. Valaaulia tagata aoga e suesue fuaiupu nei i ni vaega toalaiti. Ona fai atu lea ia i latou e lisi i luga o le laupapa ni auala ua valaaulia ai i tatou e le Faaola e sauni mo Lona Afio Mai Faalua.
Faitau le Mataupu Faavae ma Feagaiga 133:5–16, 36–40, 62,, ma vaavaai mo upu ma fasifuaitau o le a fesoasoani ia i tatou e sauni ai mo le toe afio mai o le Faaola.
O le gaoioiga lenei e mafai ona fesoasoani i tagata aoga e faasoa mai ai manatu pe mafai faapefea ona tatou sauni mo le Afio Mai Faalua o le Faaola. Valaaulia vaega e filifili se tasi o manatu mo sauniuniga i luga o le laupapa, pe atofa atu i vaega taitasi se autu. E mafai e tagata aoga ona saunia se folasaga e aoao atu ai isi i le ala e saunia ai mo le Afio Mai Faalua. Mafaufau e tuuina atu se pepa lautele o i ai se savali po o ni fasi pepa ma ni maka lanu e fesoasoani ai i tagata aoga e saunia a latou folasaga. Uunaia i latou e faaaoga le polokalama o le Gospel Library, o le Taiala i Tusitusiga Paia, ma isi punaoa e fesoasoani ia i latou e sauniuni ai. O folasaga taitasi e mafai ona aofia ai elemeni nei:
-
O le faamatalaga o le upumoni na filifilia pe na tofia i ai le vaega
-
O manatu patino o le auala e mafai ai e le autalavou ona faaaoga mea sa latou aoaoina ina ia saunia lelei ai e feiloai ma le Faaola
-
Tusitusiga paia fesootai, se saunoaga a se taitai o le Ekalesia, po o se fuaitau mai le Mo Le Malosi o le Autalavou: O Se Taiala mo le Faia o Filifiliga i le autu
-
O se ata tusi, pepa lautele o i ai se savali, meme, po o isi ata vaaia e mafai ona fesoasoani i se tasi ia malamalama i le ala e sauni ai mo le Afio Mai Faalua
Afai e manaomia e tagata aoga se taitaiga faaopoopo, e mafai ona e tuuina atu i vaega se vaega o le pepa e tufa atu o loo i lalo lea e ogatusa ma la latou mataupu.
Ua Valaaulia i Tatou e Iesu Keriso ia Saunia mo Lona Afio Mai Faalua e ala i le …
… o ese mai ma Papelonia (amio leaga) (tagai i le Mataupu Faavae ma Feagaiga 133:4–5, 7, 12–14).
Sa aoao mai Peresitene Dieter F. Uchtdorf, a o avea ma uso o le Au Peresitene Sili:
O le aai anamua o Papelonia ua faatafunaina. Ua leva ona leai sona matagofie. Ae o loo ola pea mea faalelalolagi ma amioleaga a Papelonia. O lo tatou tiute la o le ola ai o ni tagata talitonu i se lalolagi lē talitonu. … E ao ona tatou toafimalie i taimi o faatosinaga a uo, aua nei faafiafiaina i aga a le lalolagi po o perofeta pepelo, ia lafoai le faatauemu i le amioatua, ma tetee atu i faaosoosoga a le tiapolo, ma faatoilalo lo tatou lava paie. (Dieter F. Uchtdorf, “Aua le Matatau, Na o le Talitonu,” Liahona, Nov. 2015, 77–78)
… faapotopoto Isaraelu (tagai Mataupu Faavae ma Feagaiga 133:4, 7–9, 37–38).
Na faamanatu mai e Peresitene Russell M. Nelson ia i tatou:
Soo se taimi e te faia ai soo se mea e fesoasoani ai i soo se tasi—i soo se itu o le veli—ia laa agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani lea e faapotopoto Isaraelu. E faigofie lava. (Russell M. Nelson, i le “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], broadcasts.ChurchofJesusChrist.org)
… salamo ma le faapaiaina e ala ia Iesu Keriso (tagai i le Mataupu Faavae ma Feagaiga 133:5, 16, 34–35, 62).
Na faamalamalama mai e Sister Carol F. McConkie, sa avea ma Fesoasoani Muamua i le Au Peresitene Aoao o Tamaitai Talavou:
O le faatuatua ia Iesu Keriso ma Lana Togiola, e mafai ai ona tatou mamā, aunoa ma se ila, pe a tatou faafiti i tatou lava mai mea e le faaleatua ma salamo faamaoni. E papatisoina i tatou i le vai mo le faamagaloga o agasala. E faapaiaina o tatou agaga pe a tatou maua le Agaga Paia ma loto matala. O vaiaso taitasi, tatou te aai ma feinu ai i le sauniga o le faamanatuga. I le agaga o le salamo, ma manaoga faamaoni mo le amiotonu, tatou te osifeagaiga ai ua tatou malilie e tauave i o tatou luga le suafa o Keriso, manatua pea o Ia, ma tausi Ana poloaiga ina ia tatou maua pea Lona Agaga e faatasi ma i tatou. (Carol F. McConkie, “O Le Malumalu e Matagofie,” Liahona, Me 2017, 10)
Valaaulia vaega taitasi e fefaasoaai a latou folasaga ma le isi vaega. Ia mautinoa, i le avea ai ma se vaega o a latou folasaga, e faasoa mai e tagata aoga o latou manatu i le ala e mafai ai e talavou ona faaaoga mea sa latou aoaoina.
Faaaogaina o mea ua e aoaoina
Sa valaaulia i tatou e Peresitene Dallin H. Oaks o le Au Peresitene Sili e mafaufau i mea o le a tatou faia i le asō pe afai tatou te iloa le taimi tonu o le Afio Mai Faalua.
E faapefea pe afai o taeao le aso e afio mai ai o Ia? Afai sa tatou iloa o taeao le aso tatou te faafetaia’i ai i le Alii—e ala i lo tatou oti faafuasei, po o Lona tu faafuase’i mai foi—o le a sa tatou mea e fai i le asō? O a ni mea o le a tatou ta’uta’u atu? O a ni mea o tatou faia o le a tatou le toe faia? O a ni o tatou feeseeseaiga o le a faaleleia? O a ni faamagaloga tatou te tuuina atu? O a ni molimau o le a tatou faia?
Afai o le a tatou faia na mea i lena taimi, aisea e le fai ai nei loa? Aisea e le sailia ai le filemu a o mafai ona maua? (Dallin H. Oaks, “Sauniuniga mo le Afio Mai Faalua,” Liahona, Me 2004, 9)
Mai le valaaulia a Peresitene Oaks ma mea sa e suesueina i le asō, tusi i lau api faamaumau mo suesuega se mea ua uunaia oe e fai e saunia lelei ai e feiloai ma le Faaola. Ona tali lea o fesili nei:
-
O a ni mea faalavefau e ono taofia ai oe mai mea ua uunaia oe e le Agaga e fai?
-
O a ni faatinoga e ono fesoasoani ia te oe e taulima ai faalavelave o loo feagai ma oe? E faapefea ona e ono faalagolago i le Faaola?
-
O le a se mea ua e lagonaina i le asō e uiga i penefiti o le sauniuni nei mo le Afio Mai Faalua o le Faaola?
Afai e talafeagai, e mafai e tagata aoga ona faasoa mai mea na uunaia i latou e le Agaga e fai e saunia ai mo le toe afio mai o le Faaola. E mafai ona e faaiuina le lesona i le faamanatu atu i tagata aoga e finagalo le Tama Faalelagi ma Iesu Keriso ia tatou sauni mo le Afio Mai Faalua ma ia vaai i ai o se aso fiafia.