Lesona 146: Mataupu Faavae ma Feagaiga 133-134

Iloilo Lou Aoaoina 9

Mataupu Faavae ma Feagaiga 115–134

O le avea atili e faapei o Keriso e manaomia ai taumafaiga faifai pea ma o se faagasologa i le olaga atoa. O le iloiloina faavaitaimi o lo tatou tuputupu ae faaleagaga e mafai ona fesoasoani tatou te iloa ai le alualu i luma o loo tatou faia ma faalatalata atili atu ai i le Faaola. O lenei lesona e mafai ona fesoasoani i tagata aoga e iloilo ai pe na faapefea e le suesueina o le Mataupu Faavae ma Feagaiga ona fesoasoani i lo latou tuputupu a’e faaleagaga.

Gaoioiga E Ono Mafai Ona Aoao Ai

Alualu i luma lemu ma tumau

Mafaufau e faaali atu i tagata aoga ata o tulaga eseese o le fausiaina o le Malumalu o Sate Leki. Fesili i tagata aoga pe latou te iloa pe o le a le umi na faamaea ai lenei malumalu (40 tausaga). E mafai ona e fai atu i tagata aoga e faasoa mai pe afai latou te lagona o le taimi ma le taumafaiga na alu e faamaea ai le malumalu sa aoga ma pe aisea foi.

Faaaogaina i le faatagaga, Utah State Historical Society

Fesoasoani i tagata aoga e faatusatusa lo latou tuputupu ae faaleagaga i le fauga o le malumalu. O se tasi o auala e faia ai lenei mea o le valaaulia lea o i latou e mafaufau pe na faape’i mai mo le au faufale a o latou galulue i lenei galuega faatino umi. E mafai ona e fai atu fesili nei:

• Mata o a ni ou lagona ina ua uma ona e faigaluega mo le 10 po o le 20 tausaga i le malumalu a o vaaia pea galuega o loo manaomia pea ona fai?

• Afai o oe o se tasi o le aufaigaluega, o le a se mea semanu e faaosofia ai oe e faaauau pea ona galue?

• O le a sou manatu e mafai faapefea ona faaaoga le aafiaga o tagata faigaluega i a tatou taumafaiga e tuputupu ae faaleagaga ma avea atili ai e faapei o le Faaola?

Faaalu sina taimi e mafaufau loloto ai i lou olaga ma mea ua e faia e taumafai ai ia avea atili e faapei o Iesu Keriso. Mafaufau pe o faapefea ona e alualu i luma, e oo lava i ni auala laiti, ina ia avea atili ai e faapei o Keriso.

• E ui e umi le faagasologa, o le a se mea o loo e aoaoina e uiga i le taua o le taumafai ia avea atili e faapei o Iesu Keriso i aso taitasi?

Fai atu i tagata aoga e faasoa mai mea na latou aoaoina ma o latou lagona i le latou agaigai i luma i nai vaiaso ua tuanai. Ina ia fesoasoani i tagata aoga e faasoa mai, e mafai ona e valaaulia i latou e toe iloilo mea na latou aoaoina talu ai nei mai a latou suesuega o le Mataupu Faavae ma Feagaiga. E mafai ona e uunaia i latou e vaavaai i a latou api talaaga pe vaai po o a mea na latou faailogaina i a latou tusitusiga paia talu ai nei.

O gaoioiga nei e mafai ona maua ai e tagata aoga le avanoa e faamalamalama ai mea o loo latou aoaoina, iloilo ma faasoa atu o latou lagona, ma lipoti mai lo latou alualu i luma i le ola ai i mataupu faavae o le talalelei. Afai o le suesuega a lau vasega o le Mataupu Faavae ma Feagaiga 115–134 e taulai atu i upumoni eseese nai lo upumoni o loo i lalo, e mafai ona e fetuunaia gaoioiga e faaaofia ai na upumoni.

Faamatala le taua o papatisoga mo e ua maliliu

Ina ia tuu atu i tagata aoga se avanoa e faamatala ai le aoaoga faavae o papatisoga mo e ua maliliu, mafaufau e faaali atu le ata lenei o se faatanoa o le vai papatisoga i le malumalu ma faailoa atu se tulaga faataitai e pei o lea o loo i lalo.

Ua fiafia Aubrie ma ana uo i le o atu i le malumalu. O se uo e le masani i malumalu na ia matauina lo latou fiafia ma mulimuli ane fesili atu ia Aubrie po o a mea latou te faia i malumalu. Ua sue e Aubrie se ata o se faatanoa o le vai papatisoga o le malumalu i luga o lana telefoni ma amata ona faamatala e uiga i papatisoga mo e ua maliliu.

Tuu atu i tagata aoga se avanoa e faasoa mai ai mea o le a latou fai atu ai pe afai e talosagaina i latou e faamalamalama atu papatisoga mo e ua maliliu i se uo. E mafai ona e valaaulia tagata aoga e faatino i ni paga po o ni vaega toalaiti.

A uma ona maua e tagata aoga se avanoa e faatino ai tala, valaaulia i latou e iloilo mea sa latou aoaoina i le Mataupu Faavae ma Feagaiga 124, 127, ma le 128 e vaai ai pe i ai se mea o le a latou faaopoopoina i la latou faamalamalamaga. E mafai ona e fai atu i tagata aoga e toe iloilo faatasi i vaega ia fesili nei i le mafaufau.

• O a nisi o mea e mafai ona faasoa atu e Aubrie e fesoasoani ai i lana uo ia malamalama i lenei sauniga paia o se vaega o le fuafuaga a le Atua?

• O le a se mea e mafai e Aubrie ona fesoasoani i lana uo ia malamalama ai e uiga i le Tama Faalelagi po o Iesu Keriso?

A uma loa ona iloilo ma talanoaina e tagata aoga le aoaoga faavae o papatisoga mo e ua maliliu, e mafai ona e tuu atu ia i latou se isi avanoa e faatino ai le tulaga faataitai ma faaaofia ai mea sa latou aoaoina.

Auai i galuega o le malumalu ma talafaasolopito o aiga

O lenei gaoioiga ua fuafuaina e fesoasoani i tagata aoga e faasoa mai pe na faapefea ona latou auai i le galuega o le malumalu ma talafaasolopito o aiga. E mafai ona e fesoasoani muamua i tagata aoga ia manatua nisi o faamanuiaga sili e fesootai ma le faia o le galuega a le Alii e ala i le faasoa atu o le faamatalaga lenei.

Sa aoao mai Peresitene Henry B. Eyring o le Au Peresitene Sili:

Ua toatele talavou ua iloaina o le foai atu o o latou taimi e faia ai sailiga o talafaasolopito o aiga ma galuega faalemalumalu ua faalolotoina ai la latou molimau o le fuafuaga o le faaolataga. Ua faateleina ai le uunaiga a le Agaga i o latou olaga ma faaitiitia ai faatosinaga a le fili. Ua fesoasoani ai ia i latou e lagona le latalatala atili i o latou aiga ma latalata atili ai i le Alii o Iesu Keriso. Ua latou aoaoina o lenei galuega e le na o tagata ua maliliu e faaolaina ai; e faaolaina ai foi i tatou uma (tagai MF&F 128:18). (Henry B. Eyring, “Faapotopotoina o le Aiga o le Atua,” Liahona, Me 2017, 22)

• O a faamanuiaga ua e mauaina a o e auai i le galuega o le malumalu ma talafaasolopito o aiga?

I lesona i le Mataupu Faavae ma Feagaiga 127–128, atonu na valaaulia tagata aoga e faia se fuafuaga e auai i lenei galuega i nisi o auala. Tuu atu i tagata aoga se taimi e manatunatu ai i a latou fuafuaga ma fautuaina i latou e faasoa mai mea sa latou faia.

Afai e manaomia, e mafai ona e faamanatu i tagata aoga nisi o auala e mafai ona latou filifili e auai ai. E mafai ona aofia ai gaoioiga eseese i luga o le FamilySearch.org po o le polokalama o Gafa o le Aiga. Mafaufau e valaaulia tagata aoga e faamatala mai pe, afai e mafai, e faaali atu i le vasega mea sa latou faia pe aoaoina. Atonu na auai tagata aoga i le malumalu e auai i sauniga paia mo tagata o aiga ua maliliu. Mafaufau e valaaulia i latou e faasoa mai o latou lagona e uiga i lenei mea.

Lagona le faateleina o le talitonu i le Atua i taimi o tofotofoga

Atonu na e faaaogaina ni maa talatala ma lamolemole e fai ma se lesona faatino pe a aoao atu le Mataupu Faavae ma Feagaiga 122; afai o lea, mafaufau e toe faaali atu. O nei maa e mafai ona faamanatu atu ai i tagata aoga mea sa latou aoaoina ma faataga ai tagata aoga e talanoaina o latou lagona e uiga i le faamoemoe o tofotofoga ma le talitonu i le Atua a o tatou oo i ai. Afai e te manatu o le a aoga, mafaufau e faamanatu i tagata aoga nisi o lesona e uiga i lenei autu. Atonu na aoao tagata aoga e uiga i tofotofoga i le Mataupu Faavae ma Feagaiga 98, 101, 105, 111, 121–123, ma isi vaega. Atonu foi e manatua e tagata aoga ni lesona taua e uiga i le faalagolago i le Atua mai le lesona e uiga i le tutulieseina o le Au Paia mai Misuri.

E mafai ona e valaaulia tagata aoga e toe iloilo soo se fuaiupu aoga o mau ma talanoaina mea sa latou aoaoina.

• Na faapefea ona fesoasoani mea na e aoaoina e te lagona ai se lagona ese e uiga i ou tofotofoga?

• O le a se mea ua e aoaoina e uiga i le Tama Faalelagi ma Iesu Keriso a o e iai i taimi faigata?

Valaaulia tagata aoga e tusi i a latou api talaaga o latou lagona e uiga i le ala na lagolagoina ai i latou e le Tama Faalelagi ma Iesu Keriso i o latou tofotofoga. Fai atu ia i latou e mafaufau pe na faapefea ona aafia lo latou faatuatua ia Iesu Keriso ona o mea sa latou aoaoina ma oo i ai. E mafai ona e fesili atu i tagata aoga o lagona le toamalie e faasoa mai mea na latou tusia. Tuu atu avanoa mo i latou e tuuina atu ai le molimau e uiga i le fesoasoani faalelagi ua latou mauaina.

Gaoioiga Faaopoopo e Aoao Mai Ai

Faaaogaina o le igoa sa’o o le Ekalesia a le Alii

I le Mataupu Faavae ma Feagaiga 115, atonu na suesue ai e tagata aoga le taua o le faaaogaina o le igoa sa’o o le Ekalesia toefuataiina a le Alii. Ina ia tuu atu i tagata aoga se avanoa e faamalamalama mai ai mea sa latou aoaoina, mafaufau e valaaulia se tagata aoga e tusi le igoa o le Ekalesia i luga o le laupapa, ma valaaulia le vasega e talanoaina fesili nei:

• O le a le mea na aoao mai e Iesu Keriso e uiga i le faaaogaina o le igoa sao o Lana Ekalesia?

• O a ni aafiaga na e oo i ai i le mulimuli i le valaaulia a le Alii?

Mafaufau e fai i tagata aoga e fatu se tulaga faataitai e mafai ona latou faataitai ai ona fesoasoani i se tasi ia malamalama i le taua o le faaaogaina o le igoa sa’o o le Ekalesia a le Alii. O le taimi lava e maua ai e tagata aoga se tulaga faataitai, tuu atu ia i latou se taimi e faataitai ai le faatinoina o tala faatino i ni auala masani. E mafai ona e fai atu i tagata aoga e galulue i ni vaega toalaiti ma faatino ni tulaga faataitai na saunia e isi tagata aoga. Afai e lava le taimi, e mafai e tagata aoga ona faataitai le faamalamalamaina e faaaoga ai le sili atu ma le tasi le tulaga faataitai. Faauma le gaoioiga ma se avanoa mo tagata aoga e tali ai se fesili e pei o lenei:

• O le a se mea ua e aoaoina mai le mulimuli i le valaaulia a le Faaola e faaaoga le igoa sa’o o Lana Ekalesia?