Lesona 144: Mataupu Faavae ma Feagaiga 133–134

Mataupu Faavae ma Feagaiga 133:41–56

“O Ai Lenei Ua Afio Ifo Mai le Atua?”

Pe a toe afio mai Iesu Keriso, o le a saunia le au faamaoni mo Ia (tagai Mataupu Faavae ma Feagaiga 133:56). O aoaoga a le Faaola i le Mataupu Faavae ma Feagaiga 133 e mafai ona fesoasoani ia i tatou e aoao atili ai e uiga ia te Ia ma saunia ai mo Lona Afio Mai Faalua. O lenei lesona e mafai ona fesoasoani i tagata aoga e malamalama atili atu ia Iesu Keriso ma ona uiga.

Gaoioiga E Ono Mafai Ona Aoao Ai

O le Afio Mai Faalua o le Faaola

Mafaufau e faaali atu se ata o loo faaalia ai le Afio Mai Faalua o Iesu Keriso. E mafai foi e tagata aoga ona faamatala pe, afai e mafai, faaali atu ni ata e fiafia i ai o Lona Afio Mai Faalua.

Mafaufau loloto i le saunoaga lenei a Elder Neil L. Andersen o le Korama a Aposetolo e Toasefululua, a o vaai faalemafaufau pe o le a faape’i le Afio Mai Faalua o le Faaola.

E tupu lo tatou faatuatua a o tatou naunau atu i le toe afio mai o le Faaola. O le mafaufau i Lona afio mai e faagaeetia ai lo’u agaga. O le a ofoofogia! O le lautele ma le matagofie, o le tele ma le ofoofogia, o le a sili ae i soo se mea ua vaai i ai mata faaletino pe aafia ai. (Neil L. Andersen, “Ia Oo Mai Lou Malo,” Liahona, Me 2015, 122)

• O a ni upu po o ni fasifuaitau sa tumatila mai ia te oe? O a ni upu faaopoopo e mafai ona e faaaogaina e faamatala ai le Afio Mai Faalua?

  Faamatala atu i tagata aoga ina ua uma ona valaaulia i tatou e Iesu Keriso e sauni mo Lona Afio Mai Faalua (tagai Mataupu Faavae ma Feagaiga 133:10), sa Ia faaali mai nisi mea e uiga i Lona tagata ma uiga auaumama. Sa Ia faasoa mai mea o le a faaalia i le taimi o Lona afio mai ma i le taimi o mea e tutupu e tau atu i ai.

  Ona mafai lea ona e faaali atu fesili nei taitasi i le taimi ma valaaulia tagata aoga e mafaufau loloto le leoa i a latou tali.

• A o ou mafaufau i le Afio Mai Faalua o le Faaola, pe masani ona ou taulai atili atu i mea e tutupu lea o le a tutupu po o le tagata ua toe foi mai i le lalolagi?

• O le a se eseesega e o le a iai pe afai ou te taulai atili atu ia Iesu Keriso nai lo mea e ono tutupu i Lona toe afio mai?

Valaaulia tagata aoga e saili le taitaiga mai le Agaga Paia e aoao atili ai e uiga ia Iesu Keriso ma Lona Afio Mai Faalua a o latou suesue i le aso.

Ina ia fesoasoani i tagata aoga e aoao atili e uiga i mea o le a tutupu i le Afio Mai Faalua ma le o ai o le a toe foi mai, mafaufau e valaaulia i latou e kopi le siata lenei i totonu o a latou api faamaumau mo suesuega. E mafai e tagata aoga ona galulue i paga, ma paga taitasi e faamaeaina se koluma e ese mai ai. A uma se taimi fetaui, e mafai e paga ona fefaasoaai i le tasi ma le isi mea na latou maua ma faauma le isi koluma.

Faitau le Mataupu Faavae ma Feagaiga 133:42–53, ma tusifaamau i le koluma talafeagai mea na e maua.

O le a le mea o le a tupu i le Afio Mai Faalua	O mea ua ou aoaoina e uiga ia Iesu Keriso

Afai e i ai ni fesili a tagata aoga e uiga i le fasifuaitau “mea matuia” i le fuaiupu 43, faamalamalama atu o le matuia e mafai ona faauigaina i le taufaafefe po o le ogaoga. Afai e i ai ni fesili a tagata aoga e uiga i laei o le Faaola i fuaiupu 46–48, mafaufau e faasoa atu mea na aoao mai e Peresitene Russell M. Nelson: I le Afio Mai Faalua, o le a ofuina e Iesu “ofu talaloa tautupu o le mumu e faatusa i Lona toto, lea na puna mai pu afu uma” (“O Le Lumanai o le Ekalesia: Sauniaina o le Lalolagi mo le Afio Mai Faalua o le Faaola,” Ensign, Ape. 2020, 10).

o uiga auaumama o le Faaola

A uma ona faasoa mai e tagata aoga ma a latou paga mea na latou faaaofiaina i a latou siata, mafaufau e tusi le “Iesu Keriso …” i luga o le laupapa. Fai atu le fesili lenei, ma valaaulia tagata aoga e o mai i le laupapa ma faauma le fasifuaitau i a latou tali.

Taulai atu ia Iesu Keriso a o e aoao atu tusitusiga paia: Ina ia aoao atili e uiga i le taulai atu ia Iesu Keriso, tagai i le aoaoga ua faaulutalaina “Aoao Atu e uiga i faalagiga, matafaioi ma uiga o Iesu Keriso,” o loo maua i le Tomai o le Atinaega o Faiaoga: Taulai atu ia Iesu Keriso. Mafaufau e faataitai le tomai “Fatu ni fesili sailiili e fesoasoani ai i tagata aoga e faailoa mai matafaioi, faalagiga, faatusa, uiga auaumama, ma uiga o Iesu Keriso.”

• O le a se mea na e aoaoina e uiga ia Iesu Keriso sa anoa ia te oe? Aisea e anoa ai ia te oe?

  E ono mafai e tagata aoga ona faailoa mai upumoni e pei o lea:

  • Iesu Keriso …

  • … e tonu ma mamana (tagai fuaiupu 44–45, 50–51).

  • … tauia i latou o e faatalitali ia te Ia (tagai fuaiupu 45).

  • … e malosi e lavea’i (tagai fuaiupu 47).

  • … faaalia le alofa-agalelei ma le lelei naua (tagai fuaiupu 52).

  • … malamalama i o tatou puapuaga (tagai fuaiupu 53).

  • … tauave a tatou avega, tauave i tatou, ma togiola i tatou ona o Lona alofa mo i tatou (tagai fuaiupu 53).

  E mafai ona e valaaulia tagata aoga e maka i a latou tusitusiga paia ia fasifuaitau o loo aoao mai ai nei upumoni.

• E mafai faapefea e le malamalama i nei uiga o Iesu Keriso ona manuia ai lou olaga?

• E faapefea e nei faamatalaga o Keriso ona aafia ai ou lagona e uiga i Lona Afio Mai Faalua?

Faalolotoina o le tatou malamalama i uiga o le Faaola

O le gaoioiga lenei e mafai ona fesoasoani i tagata aoga e malamalama atili ai e uiga i le Faaola. Faaali atu laasaga nei e tolu e fesoasoani ai i tagata aoga ia malamalama i le gaoioiga.

A o lei amataina e tagata aoga le gaoioiga, atonu e te manao e tuu atu ia i latou se faataitaiga e pei o lea e faamatalaina i lalo ifo o laasaga e tolu.

1. Filifili se uiga auaumama po o se uiga faaalia o Iesu Keriso mai le Mataupu Faavae ma Feagaiga 133 e te manao e aoao atili i ai. Tusi i le pito i luga o se fasi pepa avanoa.

2. I lau pepa, tusi ai se tulaga faataitai e faamatala ai se tasi e mafai ona manuia mai le malamalama i lenei uiga o Iesu Keriso.

3. Ia aofia ai se tusitusiga paia po o se faamatalaga mai se taitai o le Ekalesia e faalolotoina ai lou malamalama i uiga faaalia o i lau pepa. (Mo se fesoasoani, e mafai ona e sueina le uiga auaumama i le Taiala i Tusitusiga Paia pe saili i ai i luga o le polokalama o le Gospel Library.)

I le faaaogaina o manatu e pei o nei, mafaufau e faataitai laasaga taitasi o lenei gaoioiga ma le vasega atoa:

• Laasaga 1: Tusi le upu tonu ma le mamana i luga o le laupapa, pe li’o pe afai na tusia i le taimi o le gaoioiga talu ai.

• Laasaga 2: Faaali atu le tulaga faataitai lenei. Fesili i tagata aoga e faasoa mai pe aisea e ono lagona ai e nisi o le autalavou le pei o Sam. Fesili pe mafai faapefea e le iloaina o Iesu ua tonu ma mamana ona avatu le faamoemoe i se tasi o lagona faapena.

E taumafai Sam i le mea sili na te mafaia e fai le mea sao, ae e faigata i le tele o le amioleaga i le lalolagi. Toetoe a manatu o ia ua manumalo le leaga. Ua lelavā o ia i sauaga ma faaosoosoga o loo siomia ai o ia.

Laasaga 3: Tusi le 1 Nifae 22:15–17 i luga o le laupapa. Valaaulia tagata aoga e faitau i ai, ma vaavaai mo mea na aoao mai e Nifae e uiga i le mana ma le faamasinotonu o Iesu Keriso. A uma ona faasoa mai e tagata aoga mea na latou maua, fai atu ia i latou e talanoaina le fesili lenei:

• O le a le mea na aoao atu e Nifae e uiga ia Iesu Keriso lea e mafai ona fesoasoani i se tasi e pei o Sam?

  Valaaulia tagata aoga e filifili se uiga ese o Iesu Keriso mai le Mataupu Faavae ma Feagaiga 133 ma faamaea laasaga 1–3 o le gaoioiga i ni vaega toalaiti (pe taitoatasi pe afai latou te mananao ai).

  A uma se taimi talafeagai e faamaea ai laasaga muamua e tolu, faatonu vaega e fesuiai pepa ma se isi vaega. Ona faaali lea o laasaga 4–6 o loo i lalo.

  4. Faitau uiga o Keriso, le tulaga faataitai, ma soo semau po o faamatalaga i luga o le pepa.

  5. A uma ona talanoaina ma lau vaega, tusi i luga o le pepa pe aisea e te manatu ai o le malamalama i lenei uiga o Iesu Keriso e mafai ona fesoasoani i le tagata i le tulaga faataitai.

  6. Saili ma faaaofia ai se mau faaopoopo po o se faamatalaga mai se taitai o le Ekalesia e te lagona o le a fesoasoani i lenei tagata.

Valaaulia vaega e toe faafoi pepa i vaega sao e ona pepa ma faitau mea na faaopoopo i a latou pepa. Valaaulia se tagata e toatasi o vaega taitasi e faasoa mai i le vasega ni malamalamaaga e uiga ia Iesu Keriso na latou maua mai lenei gaoioiga.

O uiga auaumama o le Faaola i lou olaga

Mafaufau e faasoa atu se uiga o Iesu Keriso e taua ia te oe.

Valaaulia tagata aoga e mafaufau loloto ma le agaga tatalo i uiga sa latou suesueina i le asō ma ia tali fesili nei i a latou api faamaumau mo suesuega.

• E mafai faapefea e le malamalama i uiga o Keriso na e suesueina i le asō ona faamalosiau ia oe i lou olaga i le taimi nei?

• O le a se mea e te faia ia aoao atili ai e faatatau i ia uiga?

Ina ia faaiu ai, e mafai e ni nai tagata aoga naunau ona faasoa mai mea na latou tusia faatasi ai ma isi o lagona e faatatau ia Iesu Keriso.

Punaoa Faaopoopo

O fea e mafai ona ou aoao atili ai e uiga i ata o loo faaaoga i le Mataupu Faavae ma Feagaiga 133:41–45?

O le Tusi Lesona a le Tagata Aoga ole Mataupu Faavae ma Feagaiga (2018) mo le inisitituti ua tuuina mai ai ni faauigaga talafeagai o nisi o faamatalaga i le Mataupu Faavae ma Feagaiga 133:41–45 (tagai itulau819).

Mataupu Faavae ma Feagaiga 133:45. O le a le uiga o le faatali i le toe foi mai o le Faaola?

Na aoao mai Elder Jeffrey R. Holland o le Korama a Aposetolo e Toasefululua:

E tatau ona tatou mataituina ia faailoga ma faitau le uiga o vaitau, e tatau ona tatou ola i le faamaoni tatou te mafaia, ma e tatau ona tatou faasoa atu le talalelei i tagata uma ina ia maua e tagata uma ia faamanuiaga ma puipuiga. Ae e le mafai ma e le tatau ona faapipiliina i tatou ona [o le Afio Mai Faalua] ma mea e tutupu o loo siomia ai ua i ai iina i o tatou luma i se mea. E le mafai ona tatou taofia le ola ai i le olaga. Ioe, e tatau ona tatou ola sili atu ona atoatoa i le olaga, nai lo le mea sa tatou ola ai muamua. O le mea moni, o le tisipenisione lenei o le atoaga o taimi. …

O loo faamoemoe mai Atua ia lava lou faatuatua ma le naunautai ma lava le talitonuina o Ia e faaauau ai pea ona e agai i luma, faaauau ai pea ona ola, ma faaauau ai pea ona olioli. O le mea moni, o loo faamoemoe mai o Ia ia le gata ina e faafetaiaia le lumanai (e fai si faalemanaia ma le faigata o lena mea); o loo faamoemoe mai o Ia e te talia ma mamanu le lumanai—ia alofa i ai ma fiafia i ai, ma olioli i ou avanoa. (Jeffrey R. Holland, “Terror, Triumph, and a Wedding Feast” [faeasaite a le Ofisa o Aoga a le Ekalesia mo le autalavou matutua, 12 Sete., 2004], 2, broadcasts.ChurchofJesusChrist.org)

Mataupu Faavae ma Feagaiga 133:46, 48. O le a le taua o le laei mumu o le Faaola?

Na aoao mai Elder Neal A. Maxwell (1926–2004) o le Korama a Aposetolo e Toasefululua:

I le sau o le toto i puafu uma, ai lava se mumu o le laei [o le Faaola] i Ketesemane, ai lava se mumu ulaula o lena ofu talaloa!

E leitioa la, a afio mai Keriso i le mana ma le mamalu, o le a afio mai o Ia i se laei mumu faamanatu (tagai MF&F 133:48), e le gata ina faatusa i le soligavine o le toasa, ae ina ia tatou manatua ai le ala na Ia tigaina ai mo i tatou taitoatasi i Ketesemane ma i luga o Kalevaria! (Neal A. Maxwell, “Overcome … Even As I Also Overcame,” Ensign, Me 1987, 72)

Mataupu Faavae ma Feagaiga 133:54–56. O ai o le a faaali mai ma le Faaola i le Afio Mai Faalua?

O e amiotonu sa soifua muamua ia Iesu Keriso ma ua uma ona toetutu, o le a o mai faatasi ma Ia i Lona mamalu. E le gata i lea, o e amiotonu na soifua ma maliliu ina ua maea Lana auaunaga i la le tino o le a toetutu ma o mai e auai faatasi ma le Faaola. E aofia ai i lenei mea tagata amiotonu o o tatou aiga ua maliliu. O e amiotonu o loo ola pea i le lalolagi o le a “aveina ae” ia fetaiai ma le Faaola (1 Tesalonia 4:17; tagai foi i le Mataupu Faavae ma Feagaiga 109:75).

Gaoioiga Faaopoopo e Aoao Ai

O le faatomuaga ma le faaopoopoga o le Mataupu Faavae ma Feagaiga

Valaaulia tagata aoga e sue i le “Faasologa o Anotusi i le Faasologa o Taimi” i le amataga o le Mataupu Faavae ma Feagaiga. Fesoasoani ia i latou e faailoa mai mea e tulaga ese e uiga i le faatulagaina o vaega 1 ma le 133 i le Mataupu Faavae ma Feagaiga. Faamalamalama atu a o sauniuni taitai o le Ekalesia e lolomi ia faaaliga i le Mataupu Faavae ma Feagaiga, sa lauiloa muamua o le Tusi o Poloaiga, sa faaali mai e le Alii le mea ua avea nei ma se vaega 1 o le faatomuaga i le tusi. I ni nai aso mulimuli ane, sa Ia faaali mai ai le mea ua iai nei vaega 133. Sa atofaina e taitai o le Ekalesia o se faaopoopoga ma tuu i le faaiuga o le uluai tusi.

Ina ia faailoa mai nisi o mea e tutusa ai vaega 1 ma le 133, e mafai ona galulue tagata aoga i ni paga. Tuu atu i paga taitasi se tasi o mau faasino mo autu taitasi o loo i lalo. Ona mafai lea ona latou faitauina a latou mau, faasoa ma a latou paga mea sa latou aoaoina, ma talanoaina mea e tutusa ai mea na latou mauaina.

Mataupu Faavae ma Feagaiga 1:11–13 ma le 133:10, 64: Ua lapataia i tatou e sauni mo le Afio Mai Faalua.

Mataupu Faavae ma Feagaiga 1:14 ma le 133:63: O i latou o e teena le savali a le Alii o le a vavaeeseina.

Mataupu Faavae ma Feagaiga 1:18–23 ma le 133:57–59: O mea vaivai o le lalolagi o avefeau ia a le Alii e faasoa atu le talalelei. O le a Ia faia i latou ia malolosi.

O le lelei naua o le Atua

Ina ia fesoasoani i tagata aoga ia malamalama atili e uiga i le agalelei o le Atua (tagai Mataupu Faavae ma Feagaiga 133:52), mafaufau e faasoa atu le saunoaga lenei a Elder Dale G. Renlund o le Korama a Aposetolo e Toasefululua.

O le i ai pea lava o aioiga mai perofeta ina ia tomanatu ai i le agalelei o le Atua e ofoofogia. E finagalo lo tatou Tama Faalelagi ia i tatou ia manatuaina Lona agalelei ma le agalelei a Lona Alo Pele, e le mo le faamalieina o i La’ua lava, ae mo le faatosinaga a lena manatuaga ia i tatou. E ala i le mafaufau i lo La’ua agalelei, e faateleina ai la tatou vaaiga ma le malamalamaaga. E ala i le manatunatu i lo La’ua agaalofa, o le a atili ai ona tatou lotomaualalo, lototatalo, ma tumau. (Dale G. Renlund, “Mafaufau i le Agaglelei ma le Silisiliese o le Atua,” Liahona, Me 2020, 41)

Ona mafai lea ona e matamata i le “Manatunatu i le Agalelei ma le Silisiliese o le Atua” mai le faailo taimi 1:23 i le 5:43, ma vaavaai pe na faapefea ona manuia Tom mai le agalelei o le atalii o lona atalii. E mafai e tagata aoga ona talanoaina pe mafai faapefea e le manatunatu i le agalelei o Keriso ona manuia ma suia ai i latou.

Alofa-agalelei

O se uiga paia o Iesu Keriso o le alofa-agalelei (tagai fuaiupu 52). Ina ia fesoasoani i tagata aoga ia malamalama po o le a le alofa-agalelei ma le aafiaga e mafai ona i ai i isi, mafaufau e matamata i le “Alofa—o le Ute o le Talalelei” mai le faailo taimi 3:18 i le 6:01.

Ona mafai lea ona e talanoaina tali i fesili e pei o nei:

• E mafai faapefea ona avea le agalelei o Bernice ia Arlene ma se faataitaiga o le agalelei-alofa faaKeriso?

• Na faapefea ona faamanuiaina Arlene ona o le alofa-agalelei o Bernice?

• Ua faapefea ona faamanuiaina oe i le alofa-agalelei o le Faaola?