Lesona 145: Mataupu Faavae ma Feagaiga 133–134

Mataupu Faavae ma Feagaiga 134

O se Folafolaga Lautele e Faatatau i Malo

I le tali atu i sauaga ma tuuaiga e uiga i talitonuga o le Ekalesia, sa tusia ai e taitai o le Ekalesia se pepa o faamatalaga e faamanino ai le tulaga o le Ekalesia e uiga i le malo ma tapuaiga. O lenei lesona ua faamoemoe e fesoasoani i tagata aoga ia malamalama i le taua o le saolotoga faaletapuaiga ma le usitaia o tulafono a le malo i nofoaga o loo latou nonofo ai.

Gaoioiga E Ono Mafai Ona Aoao Ai

O se aafiaga o Peresitene Nelson ma se tupu

Ina ia amata le vasega, mafaufau e aotele le parakalafa lenei ma faitau le saunoaga a Peresitene Russell M. Nelson o loo i lalo. Pe matamata le vitio “O Le Tusi a Mamona: Faamata e Faape’i Lou Olaga e aunoa ma Lea [Tusi]?” mai le faailo taimi 0:00 i le 3:16. O loo maua lenei vitiō i le ChurchofJesusChrist.org.

O Le Tusi a Mamona: Faamata e Faape’i Lou Olaga e aunoa ma Ia?

Ua faamalamalama mai e Peresitene Nelson le taua o le Tusi a Mamona, ua molimau mai o loo aoao mai e uiga ia Keriso, ma uunaia i tatou ina ia suesue i ai ma le agaga tatalo i aso uma.

I le 1986, sa avea ai Peresitene Russell M. Nelson ma se failauga faapitoa i se iunivesite i Accra, Kana. Ina ua uma le saunoaga a Peresitene Nelson, sa alu atu se tupu faaleaganuu ia te ia ma fesili atu e uiga ia Iesu Keriso. Na faasoa iai e Peresitene Nelson ni malamalamaaga mai le 3 Nifae lea na matuai faagaeetia ai le tupu.

I le mavae ai ona lagonaina o le mana o fetalaiga a le Faaola i le 3 Nifae, sa folafola mai ai e le tupu, “Afai ou te liliu mai ma auai i le Ekalesia, o le a ou aumaia lo’u ituaiga atoa faatasi ma a’u.” (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Lea [Tusi]?,” Liahona, Nov. 2017, 61)

A o lei faasoaina atu le tali lenei mai ia Peresitene Nelson, taofi e fesili i tagata aoga pe faapefea ona latou tali atu pe afai sa latou auauna atu o se faifeautalai i le nuu o lenei tupu ma faalogo o ia fai mai lenei tala.

Sa tali atu Peresitene Nelson, “Oi, Le Tupu e, … e le faia faapena” (“O Le Tusi a Mamona: Faamata e Faape’i Lou Olaga e aunoa ma Lea [Tusi]?,” Liahona, Nov. 2017, 61).

• O le a se mea ua e iloa e uiga i le fuafuaga a le Tama Faalelagi e mafai ona fesoasoani e faamalamalama ai le tali a Peresitene Nelson?

• E ui atonu na i ai ni faamoemoega lelei o le tupu, aisea e taua ai le liua o tagata i le talalelei a le Faaola o se filifiliga a le tagata lava ia?

Afai e fia iloa e tagata aoga po o le a le isi mea na ta’u atu e Peresitene Nelson i le tupu, faasoa mea na ia aoao mai: “O le liua o se mataupu faaletagata lava ia. … E maua e tagata taitoatasi se molimau ma tautinoga o le talalelei a Iesu Keriso” (“O Le Tusi a Mamona: Faamata e Faapei Lou Olaga e Aunoa ma Lea [Tusi]?,” 61).

Valaaulia tagata aoga e saili le taitaiga a le Tama Faalelagi i le taimi o le lesona i le asō e uiga i le mafuaaga e taua ai mo i latou le i ai o le saolotoga e filifili ai e mulimuli ia Iesu Keriso e tusa ai ma o latou lava manaoga. Ia valaaulia foi i latou e mafaufau i le taua o le usiusitai i tulafono o le laueleele ma faaaloalo ia i latou e ese o latou talitonuga nai lo i latou. Atonu e te manao e tuu atu i tagata aoga se taimi e tusi ai o latou manatu e uiga i se tasi pe sili atu o nei manatu a o lei toe faaauauina.

O le taua o le malo ma tapuaiga

I le vaitau o le 1830, sa feagai ai tagata o le Ekalesia ma sauaga, o se vaega o le vaaiga sese faapea o le a latou le amanaiaina tulafono a le malo i le igoa o tapuaiga. Ina ia fesoasoani e faamanino le tautinoga a le Au Paia e mulimuli i tulafono o le laueleele faatasi ai ma le faaaogaina o le saolotoga o tapuaiga, sa tusia ai e taitai o le Ekalesia se folafolaga o le talitonuga ua ta’ua nei o le Mataupu Faavae ma Feagaiga 134.

Ina ia fesoasoani i tagata aoga ia malamalama i le anotusi o lenei vaega, mafaufau e vaevae tagata aoga i ni paga. E mafai ona tofia paga taitasi e taulai atu i se tasi o upumoni nei e lua:

1. Tatou te talitonu i le usitaia o tulafono a le malo i mea o loo tatou nonofo ai (tagai Mataupu Faavae ma Feagaiga 134:1, 3, 5–6).

2. Tatou te talitonu i le saolotoga o tapuaiga ma le loto fuatiaifo (tagai i le Mataupu Faavae ma Feagaiga 134:2, 4–5, 7).

E mafai e paga taitasi ona faitau ia fuaiupu e o faatasi ma a latou upumoni, ma vaavaai mo upu ma fasifuaitau e lagolago ai pe faamanino ai lena upumoni. Ona mafai lea e paga ona aoao atu e le tasi le isi i mea sa latou aoaoina.

A uma ona fefaasoaai tamaiti aoga ma a latou paga, valaaulia ni nai volenitia e tali fesili nei:

• O le a se mea na faagaeetia ai oe mai mea sa e faitauina?

• O a ni fesili e ono i ai i se tasi pe a uma ona faitau nei fuaiupu?

Ina ia fesoasoani i tagata aoga e sue tali i a latou fesili ma malamalama atili i upumoni o i lenei lesona, mafaufau e fai mea nei:

Vaevae tagata aoga i ni vaega toalaiti. E mafai e vaega taitasi ona suesue ma talanoaina le pepa tufa atu muamua. Ona mafai lea ona toe faatulaga tagata aoga i ni vaega fou e suesue ma talanoaina le pepa tufa atu lona lua.

I se isi itu, e mafai e le afa o vaega ona suesue le isi pepa tufa e tasi ae suesue e le isi afa le isi pepa e tufa atu. Ona mafai lea e vaega ona faasoa mai mea na latou aoaoina i se vaega na suesueina se pepa ese na tufa atu.

Matou te Talitonu i le Usitaia o Tulafono a le Malo i Le Mea o Loo Matou Nonofo Ai

Faitau le tulaga faataitai lenei.

O loo auauna atu Dalia i se misiona i se nofoaga o le a le faatagaina ai e le malo ona faasoa atu le talalelei i fafo atu o se falesa. Ua ia lagona le le fiafia ona ua ia iloa o loo i ai tagata i le aai o e o le a taliaina le talalelei a Iesu Keriso pe afai e mafai ona ia talanoa faaaliali e uiga i ai. O loo ia mafaufau e talanoa ma le faautauta atu i tagata i auala e aoao ai i latou e uiga i le Faaola.

• E faapefea ona e tali atu i lenei tulaga?

Faitau anomea nei, ma mafaufau pe faapefea ona latou fesoasoani ia Dalia ia malamalama i mea e finagalo le Tama Faalelagi na te faia.

• Mataupu Faavae ma Feagaiga 58:21–22

• Mataupu Faavae o le Faatuatua 1:12

• 1 Timoteo 2:1–3

Ina ia vaai pe na faapefea ona tali atu le Faaola i feteenaiga e ono tulai mai i le va o le malo ma le tapuaiga, faitau le Mataio 22:15–22 ma le saunoaga lenei a Peresitene Dallin H. Oaks o le Au Peresitene Sili:

E ui ina faaaloalogia e le au talitonu uma tulafono o le lagi, o le toatele foi e faapea mai o tulafono faalemalo e faauuina foi e le Atua. Sa faatonuina e le Alii o Iesu Keriso, ‘O mea a Kaisara ia outou avatu ia Kaisara, a o mea a le Atua avatu ia i le Atua’ (Mataio 22:21). O lea la na aoao mai, e tatau ia i tatou, i le mea e mafai ai, ona usitai i faatulagaga uma e lua o le tulafono. A oo ina i ai feteenaiga e aliae mai, e tatau ona tatou saili se auala ina ia usitaia ai tulafono uma e lua. A oo ina le mafai moni ona faaleleia, e ao ina tatou auai faatasi ma isi e tutusa o tatou mafaufau e taumafai e suia le tulafono faalemalo ina ia faatino ai le tulafono mai le lagi. I mea uma lava, e tatau ona tatou matuai faaeteete ae tatou te lei faia se tonu---i tulaga e sili ona le masani ai---e lafoai le tasi ae fai le isi. (Dallin H. Oaks, “The Boundary between Church and State” [lauga na fofogaina i le Second Annual Sacramento Court/Clergy Conference, Oke. 20, 2015], newsroom.ChurchofJesusChrist.org)

Tali fesili nei.

• O le a se mea na e aoaoina e mafai ona fesoasoani ia Dalia ia malamalama ai e tatau ona ia faamamaluina tulafono i le mea o loo ia auauna atu ai?

• Aisea e te manatu ai o le usitaia o le tulafono i le mea o loo e nofo ai o se mataupu faavae o le talalelei a Iesu Keriso?

Matou te Talitonu i le Saolotoga o Tapuaiga ma le Loto fuatiaifo

Tali fesili nei.

• O anafea na e talanoaina ai tapuaiga po o talitonuga faaleagaga ma se tasi e ese ona talitonuga nai lo oe?

• Na faapefea ona latou tali atu i ou talitonuga? Na faapefea ona e tali atu i o latou talitonuga?

Mafaufau i le tulaga faataitai lenei.

O Liam o se sui o le au soka a lana aoga. O se tasi o sui o lana ‘au, o Zain, e i ai sana lava sauniga faalelotu patino na te faia a o lei faia taaloga taitasi. O Zain ua na o le pau lea o le tagata o lana tapuaiga i le au. Ua matauina e isi tagata o le au le mea e faia e Zain ma ua amata ona amuamu ia te ia ona o lea tulaga. Ua iloa e Liam o le tapuaiga a Zain o nisi taimi e le lelei ai le vaaiga a tagata i lo latou nuu.

Suesue i anomea nei, mafaufau pe faapefea ona faatatau i le tulaga o Liam ma ou fegalegaleaiga ma i latou e ese o latou talitonuga nai lo oe.

• Alema 30:7–9

• Mataupu Faavae o le Faatuatua 1:11

Sa aoao mai le Perofeta o Iosefa Samita (1805–44):

Afai ua faaalia na ou naunau ou te oti mo se “Mamona,” Ou te toa e folafola atu i luma o le Lagi ua tutusa lava ma lo’u sauni ou te oti i le puipuia o aia tatau a se Peresipetiriane, o se Papatiso, po o se tagata lelei o soo se ituaiga lotu; mo le mataupu faavae lava e tasi lea e solia ai aia tatau a le Au Paia o Aso e Gata Ai lea foi e solia ai aia tatau … a soo se isi lava ekalesia o e atonu e le ta’uta’ua pe e vaivai tele foi e puipuia i latou lava.

O le alofa o le saolotoga lea e musuia lo’u—agaga o saolotoga faaletagata ma le faalelotu o tagata uma lava. (Aoaoga a Peresitene o le Ekalesia: Iosefa Samita [2007], 345)

• O le a se mea e mafai ona e faasoa atu ia Liam e ono fesoasoani ia te ia e tali atu ai i le tulaga o loo i ai o ia?

• O le a se mea na e aoaoina e uiga i le ala e finagalo ai le Tama Faalelagi ma Iesu Keriso e te taulima ai i latou o e ese talitonuga nai lo oe?

A uma ona maua e vaega le avanoa e aoao ai mai pepa e tufa atu e lua, mafaufau e tuu atu ia i latou le avanoa e talanoaina ai mea sa latou aoaoina pe fai ni fesili e uiga i mea sa latou suesueina.

Afai e lagona e ono fesoasoani le talanoa atili i mea na aoaoina e tagata aoga e uiga i upumoni e lua, mafaufau e faaaoga fesili nei.

• E mafai faapefea e se tagata ona tu atu mo ona talitonuga a o faaaloalo foi i talitonuga eseese o isi?

• E faapefea e le usitai i tulafono ona fateleina lo tatou tomai e mulimuli i le fuafuaga a le Tama Faalelagi mo le faaolataga?

• O le a sou lagona i auala talafeagai e uunaia ai le saolotoga faaletapuaiga i totonu o tulafono i le mea o loo e nofo ai?

  E mafai ona e faaumaina le lesona e ala i le valaaulia o tagata aoga e tali le fesili i a latou api faamaumau mo suesuega. E mafai e nai tagata aoga ona faasoa mai mea na latou tusiaina.

• O le a sou lagona i le mea e finagalo le Tama Faalelagi e te faia i mea ua e aoaoina i lenei aso?

Punaoa Faaopoopo

O le a se mea e mafai ona tatou faia e puipuia ai le saolotoga tau tapuaiga ?

Na aoao mai Elder Robert D. Hales (1932–2017) o le Korama o le Aposetolo e Toasefululua:

Faasaoina o le Faitalia, Puipuia o le Saolotoga o Tapuaiga

Robert D. Hales explains why religious freedom is necessary for us to exercise agency and fulfill Heavenly Father’s plan.

Tatou te nafa ma le puipuiga [o le saolotoga faaletapuaiga] mo i tatou lava ma a tatou fanau. O le a se mea e mafai ona e faia ma ou faia?

Muamua, e mafai ona tatou iloa. Ia nofouta i faafitauli i lou nuu ia e ono i ai se aafiaga o le saolotoga o tapuaiga.

Lua, i lou lava tulaga, ia aufaatasi ma isi o e tutusa lo tatou naunau i le saolotoga faaletapuaiga. Galulue soosootauau e puipuia le saolotoga faaletapuaiga.

Tolu, ia e ola i lou olaga ia avea o se faataitaiga o mea ua e talitonu i ai—i upu ma galuega. O le ala tatou te ola ai i la tatou tapuaiga, e sili atu ona taua nai lo mea e mafai ona tatou tautatala atu ai e uiga i la tatou tapuaiga. (Robert D. Hales, “Faasaoina o le Faitalia, Puipuia o le Saolotoga Faaletapuaiga,” Liahona, Me 2015, 113)

Sa toe faasoa mai e Peresitene Dallin H. Oaks o le Au Peresitene Sili le mea lenei:

O Le Alofa Paia i le Fuafuaga a le Tama

Ua aoao mai Peresitene Oaks o le ata o le faaolataga ua faavaeina i luga o le alofa o le Tama Faalelagi mo i tatou.

Matou te faamamaluina faapotopotoga taitoatasi. E toatele ua silafiaina taumafaiga maoae a lenei Ekalesia e faalauiloa atu le saolotoga faaletapuaiga. O nei taumafaiga e lagolago ai le fuafuaga a lo tatou Tama Faalelagi. Tatou te saili atu e fesoasoani i Ana fanau uma —e le na o o tatou lava tagata o le ekalesia—ia olioli i le saolotoga taua e filifili ai. (Dallin H. Oaks, “O Le Alofa Paia i le Fuafuaga a le Tama,” Liahona, Me 2022, 102)

Gaoioiga Faaopoopo e Aoao Ai

Saolotoga o tapuaiga

Ina ia fesoasoani i tagata aoga ia malamalama atili i le taua o le faatumauina o le saolotoga faaletapuaiga, e mafai ona e faaali atu le vitio lenei.

What Is Religious Freedom?

Religious freedom allows societies to function with greater health, harmony, prosperity, and stability. Protecting religious freedom includes being civil, tolerant, and respectful of others’ beliefs.

E mafai ona e fesoasoani i tagata aoga e talanoa i le vitio e ala i le fai atu o se fesili e pei o lenei.

• Aisea e taua ai le saolotoga faaletapuaiga i le sosaiete? Aisea e te manatu ai e taua i le fuafuaga a le Atua?

• O anafea na e vaaia ai se tasi o galue i le amiolelei, faapalepale, ma le faaaloalo pe a feagai ma talitonuga eseese?

• Aisea e te manatu ai e taua le malamalama o le autalavou i lenei mea?

O se isi filifiliga mo le amataga o le lesona

Mafaufau e vaevae tagata aoga i ni vaega laiti. Valaaulia vaega toalaiti taitasi e mafaufau faapea o loo latou siitia ma isi se motu e lei nofoia lea o le a latou amataina ai lo latou lava malo. E mafai e tagata aoga ona filifili se igoa mo lo latou atunuu faapea foi ma ni nai tulafono latou te manatu e taua ona faavaeina. E mafai ona e fesili i tagata aoga pe aisea e taua ai le faavaeina o tulafono e uiga i le saolotoga faaletapuaiga.

E mafai e tagata aoga ona faitau le Mataupu Faavae ma Feagaiga 134:1–2, ma vaavaai pe aisea na faatuina ai e le Atua malo ma pe aisea e taua ai malo.

• O le a le sootaga o i ai i le va o tulafono a le malo ma le tomai o tagata e tapuai faamaoni ai i le Atua?

• O a tulafono po o aia tatau e te faafetai ai i lou lava atunuu?

• O le a sou manatu i le tulaga o le a i ai tagata pe a aunoa ma se malo po o ni tulafono?

E mafai e tagata aoga ona faitau le Mataupu Faavae ma Feagaiga 134:6, ma vaavaai mo upu sa faaaoga e faamatala ai pe faape’i le sosaiete e aunoa ma tulafono po o le malo.

• E mafai faapefea ona aafia le sootaga a tagata ma le Atua i le leai o ni tulafono ma malo?