“148-р хичээл—Ерөнхийлөгчийн зөвлөлийг залгамжлах нь: Сүмийг удирдуулахаар Их Эзэн сонгосон,” Сургаал ба Гэрээний семинарын багшийн гарын авлага (2025)
“Ерөнхийлөгчийн зөвлөлийг залгамжлах нь,” Сургаал ба Гэрээний семинарын багшийн гарын авлага
148-р хичээл: Сургаал ба Гэрээ 135–136
Ерөнхийлөгчийн зөвлөлийг залгамжлах нь
Сүмийг удирдуулахаар Их Эзэн сонгосон
Иосеф Смитийн цаг үед амьдарч байсан Сүмийн гишүүд бошиглогч нас барахыг хэзээ ч үзээгүй байв. Иосеф, Хайрум хоёрын амь насыг бүрэлгэсэн нь зөвхөн сэтгэл санааны хувьд хүнд хэцүү үе байснаас гадна Сүмийг хэн удирдахыг эргэлзээтэй, тодорхойгүй болгожээ. Гэсэн хэдий ч Их Эзэн Өөрийн Сүмийг бошиглогчийн удирдлаган доор үргэлжлүүлэх арга замыг бэлдсэн байлаа. Энэ хичээл бошиглогч нас барсан ч Их Эзэн Өөрийн ажлыг үргэлжлүүлэн удирддаг гэдэгт итгэх итгэлийг нь нэмэгдүүлэхэд суралцагчдад тусална.
Боломжит суралцах үйл ажиллагаа
Сүмийн шинэ удирдагч
Хичээлийг эхлүүлэхдээ дараах жишээг хуваалц.
Та нарт саяхан гэр бүлийн хамт Сүмд нэгдсэн Габриэл гэдэг найз байдаг гэж төсөөл. Нэг өдөр семинараа тарсны дараа тэр та нараас Сүмийн удирдлагын талаар хэдэн зүйл асуув. Тэрээр Сүмийн ерөнхийлөгч нас барахад юу тохиолддог, шинэ бошиглогчийг хэрхэн сонгодог талаар сонирхож байна. Тэр ч байтугай бид хэрхэн зөв хүн нь бошиглогч болсон гэдэгт итгэлтэй байж чадах вэ гэдгийг мэдэхийг хүсэж байв.
-
Та нар 1-ийг хамгийн бага, 5-ыг хамгийн их гэж үзэн 1-ээс 5 хүртэлх оноогоор дүгнэвэл, Габриэлын асуултад хариулах ур чадвартаа хэр итгэлтэй байна вэ?
-
Сүмийн удирдлагын өөрчлөлт хэрхэн явагддагийг ойлгох нь яагаад чухал гэж та нар бодож байна вэ?
Өөрийн Сүмийг хэнээр удирдуулахаа сонгоход зориулан тогтоосон Их Эзэний загварын талаар биднийг илүү их судлах үед та суралцагчдыг Ариун Сүнсний тусламжийг эрэлхийлэхэд урамшуулж болох юм. Үүнийг яг одоо мэдэх нь тэдний амьдралд яагаад чухал талаар илчлэлт эрэлхийлэхэд тэднийг урь.
Иосеф Смитийн байр суурийг хэн эзлэх вэ?
Анх удаа Сүмийн удирдлага солигдоход хүргэсэн зарим нөхцөл байдлыг суралцагчдад ойлгуулах нь тустай байж болох юм. Ингэхийн тулд та дараахыг хураангуйлж эсвэл уншиж өгч болно:
Иосеф Смитийн амийг бүрэлгэсэн цаг үед Сүмийн гишүүд бошиглогч нас барахыг хэзээ ч үзээгүй байв. Иосефыг үхэхэд асар их гашуудсанаас гадна зарим нь Сүм цаашид хэрхэн урагшлахыг ч мэдэхгүй байлаа. Төлөөлөгчдийн ихэнх нь Иосеф, Хайрум хоёрын үхлийн талаар сонсох үедээ Америкийн Нэгдсэн Улсын зүүн хэсэгт номлолд үйлчилж байжээ. Энэхүү гунигт мэдээг дуулаад тэд болон бусад номлогч Науву руу буцаж эхлэв.
Сүмийн ерөнхийлөгч байхгүй болоход цөөн хэдэн хүн Сүмийн удирдлагад юу болох ёстой талаар өөр өөр шаардлага тавив.
Ангийн өмнө гурван суралцагчийг гарч ирэхэд урь. Та суралцагч бүрээр дараах гурван догол мөрөөс аль нэгийг чанга уншуулж болно. Доорх эхний цэдэг Сидней Ригдонтой холбоотой. Хоёр дахь цэдэг нь Бригам Янгийн тухай бол гурав дахь цэдэг нь Жеймс Стрэнгийн тухай юм. Эхэндээ суралцагчдад нэрсийг хэлж өгөх хэрэггүй.
Тэргүүн зөвлөлийн нэгдүгээр зөвлөх түүнд Иосефыг хэн ч залгамжлах боломжгүй гэж үзэгдэл хэлсэн гэв. Тэрээр өөрийгөө Сүмийн “хамгаалагч” байхыг санал болгожээ.
Арван хоёр төлөөлөгчийн чуулгын ерөнхийлөгч Сүмийг удирдах Аврагчийн эрх мэдлийг Иосеф Смит Арван хоёрын чуулгад олгосон гэв.
Иосефыг нас барахаас дөрвөн сарын өмнө баптисм хүртсэн нэгэн гишүүн өөрийг нь Иосефын залгамжлагчаар томилсон гэх Иосеф Смитийн гарын үсэгтэй захиаг үзүүлжээ.
-
Хэрэв та нар энэ цаг үед Сүмийн гишүүн байсан бол эдгээр үйл явдалд ямар хариу үйлдэл үзүүлэх байсан гэж бодож байна вэ?
-
Та нарт эдгээр шаардлагын талаар ямар эргэлзээ төрж болох вэ?
Их Эзэний тогтоосон загвар
Бошиглогч бол Их Эзэний сонгосон үйлчлэгч юм гэдгийг мэдэхэд туслах судар, Сүмийн удирдагчдын мэдэгдэл, бусад тэнгэрээс томилогдсон эх сурвалжуудыг эрж хайхад суралцагчдыг урь. Суралцагчдын судлах зүйлийн нэг хэсэг болгож, Иосеф Смитийн дараа гэгээнтнүүд хэнийг дагахаа хэрхэн мэдсэнийг олж мэдэхийн тулд дараах тараах материалыг ашиглахад суралцагчдыг урь.
Иосеф Смитийн дараа хэнийг дагах талаар
Бошиглогч Иосеф Смит нас барахынхаа өмнө Арван хоёр төлөөлөгчийн чуулгад ийн заажээ.
‘Ах нар аа, … Чухал үйл явдал ойрын үед тохиох болно. Дайснууд миний амийг хөнөөж болзошгүй. Тэгсэн тохиолдолд, надад байгаа түлхүүрүүд болон хүчийг та нарт шилжүүлж өгөхгүй бол, тэдгээр нь дэлхийгээс алга болно. Харин би түлхүүрүүд болон хүчийг та нарын тэргүүн дээр шилжүүлж өгсөн тохиолдолд Бурхан үүнийг зөвшөөрч байгаа бол, би алуурчдын гарт хохирогч болон унах нь хамаагүй хэрэг. Тэгвэл, миний ажил хийгдэж дууссан юм байна, цаг хугацааны бүрэн байдлын энэ эрин үед байгуулагдах ёстой Бурханы хаант улсын суурь тавигдсан юм байна гэдгийг мэдээд би баяр баясал, сэтгэл ханамжтайгаар энэ амьдралыг орхих болно.
Одооноос эхлэн энэ Сүмийг удирдах үүрэг өөрсдийгөө залгамжлах бусад хүнийг томилох хүртэл Арван хоёрын мөрөн дээр ирлээ. (Сүмийн ерөнхийлөгчдийн сургаалаас: Иосеф Смит [2007], 603–604)
Мөн Тэргүүн зөвлөл бол Арван хоёр төлөөлөгчийн чуулгын дээрх цорын ганц бүлэг боловч бошиглогчийг нас барахад Тэргүүн зөвлөл тарна гэж Иосеф Смит заасан (History, 1838–1856 [Manuscript History of the Church], volume B-1, 691, josephsmithpapers.org-г үзнэ үү).
-
Өмнө тавьсан гурван шаардлагад хариулахад та нарын сурсан ямар зүйл туслах вэ?
-
Их Эзэн бошиглогчийг нас барах үед Түүний Сүмийн удирдлагыг үргэлжлүүлэх ямар загварыг тогтоосон бэ?
Бригам Янгийг томоохон цуглаан дээр гэгээнтнүүдэд хандан үг хэлэхэд олон хүн ер бусын туршлагыг гэрчилж, Ариун Сүнсний баталгааг мэдэрчээ.
Хожим нь Тэргүүн зөвлөлд үйлчилж байсан ерөнхийлөгч Жорж К.Каннон (1827–1901) дараах зүйлийг хуваалцсан.
Бригам Янг … босоод, хүмүүст хандан ярив. … Тэрхүү үйл явдалд оролцсон хүмүүс өөрсдөдөө төрсөн сэтгэгдлээ мартаж үл чадна! Хэрэв Иосеф үхлээс босож ирээд, тэдний нүдэн дээр ярьсан бол тэр уулзалтад оролцсон олон хүнд үзүүлсэн нөлөөний дэргэд тийм ч цочирдом хэрэг болохгүй байсан биз. Энэ нь Иосефын өөрийнх нь дуу хоолой байсан. Мөн зөвхөн Иосефын дуу хоолойг сонсоод ч зогссонгүй хүмүүсийн нүдэнд Иосеф бие хүнээрээ яг л тэдний өмнө зогсож буй мэт санагджээ. Тэр өдөр тэрхүү цугларалт дээр болсноос илүү гайхамшигтай, ер бусын үйл явдлыг бид хэзээ ч сонсож байгаагүй. Их Эзэн өөрсдийг нь удирдахаар сонгогдсон түүнд эргэлзэх аргагүй болтол өөрийн хүмүүст гэрчлэл үлдээсэн. Тэд нүдээрээ харж, чихээрээ сонссон. Дараа нь Бурханы итгүүлэх хүчээр хэлсэн үгс тэдний зүрхэнд хүрч, тэд Сүнсээр дүүрч, асар их баяр хөөрт автаж байлаа. Уйтгар гуниг оршиж байсан, зарим хүний зүрх сэтгэлд эргэлзээ, тодорхой бус байдал байсан байх. Харин одоо Иосефын оронд тэдний дунд үйлдэх шаардлагатай эрх мэдлийг Их Эзэнээс олгосон хүн энд байгаа нь бүгдэд ойлгомжтой байлаа (George Q. Cannon, “Joseph Smith, the Prophet,” Juvenile Instructor, Oct. 1870, 174–75).
Бригам Янгийг гэгээнтнүүдэд хандан үг хэлэх үед тэнд байсан гишүүн Эмили Смит Хойт ийн тэмдэглэжээ.
Түүний тайлбарлаж байгаа байдал, нүүрний хөдөлгөөн, дуу хоолой миний бүхий л биеийг цочроов. Миний бие алагдсан Иосефын биеийг өөрийн нүдээр үзсэн. Түүний эрхэм магнайд хүрэхэд гарт минь үхлийн цэв хүйтэн мэдрэгдэж байсан. Би Иосеф Смитийн нас барсныг мэдэж байсан. Тэгсэн хэдий ч би байн байн түүнийг Иосеф мөн үү хэмээн гайхаж, индэр рүү өөрийн эрхгүй харж билээ. Гэвч тэр Иосеф Смит биш, харин Бригам Янг байсан. Хэрэв хэн нэгэн Бригамыг гэгээнтнүүдийн үйл хэргийг зохицуулах эрхтэй гэдэгт эргэлзэж байвал би тэдэнд ингэж хэлнэ. Бурханы сүнсийг авч, өөрсдөө мэд. Их Эзэн өөрөө хангах болно (Emily Smith Hoyt, in Lynne W. Jorgensen, “The Mantle of the Prophet Joseph Passes to Brother Brigham: A Collective Spiritual Witness,” BYU Studies, vol. 36, no. 4 [1996–1997], 164).
-
Хэрэв та нар тэнд байсан бол энэ туршлага та нарт хэрхэн нөлөөлөх байсан гэж бодож байна вэ?
-
Моронай 10:5 нь та нарын судалсан зүйлтэй ямар холбоотой байж болох вэ?
Суралцагчдыг судалсан зүйлээсээ юу олж мэдсэнээ хуваалцахад урь. Суралцагчид Сүмийн ерөнхийлөгчийг нас барахад Тэргүүн зөвлөл тарж, Арван хоёр төлөөлөгчийн чуулга Сүмийг удирддаг гэдгийг ойлгосон гэдэгт итгэлтэй бай. Тэргүүн зөвлөлд үйлчилж буй төлөөлөгчид Арван хоёрын чуулга дахь ахмадын дарааллын байрандаа буцаж ирдэг гэдгийг ойлгоход нь суралцагчдад тусал. Түүнчлэн суралцагчдыг хамгийн удаан үйлчилсэн төлөөлөгч Арван хоёр төлөөлөгчийн чуулгын ерөнхийлөгч болох ба улмаар Сүмийн дараагийн ерөнхийлөгч болно гэдгийг ойлгосон эсэхийг бататгаарай.
Суралцагчид мөн Сүмийг удирддаг хүмүүс Бурханаас дуудагддаг хэмээх гэрчийг бид Ариун Сүнсээр дамжуулан хүлээн авч чадна гэдгийг тодорхойлж болно.
-
Их Эзэн Сүмээ удирдуулахаар бошиглогчийг маань сонгосон тухай сүнслэг гэрчлэл олж авахын тулд бид юу хийж болох вэ эсвэл та нар юу хийсэн бэ?
Хичээлийг дуусгахдаа суралцагчдад хичээлийн эхэнд гарсан жишээнд хариулахад сурсан зүйлээ ашиглах боломжийг олго. Ийн үйлдэх нэг арга нь суралцагчдыг хамтрагчид болгон дүрд тоглуулах юм. Та тэднийг бошиглогч бол Их Эзэний сонгосон удирдагч гэдгийг гэрчлэх гэрчлэлээ хариултынхаа нэг хэсэг болгон багтаахад урамшуулж болно.