“149-р хичээл—Сургаал ба Гэрээ 136: Өрнөд рүү аялсан нь: Солт Лэйкийн хөндийд очих гэрээний аялал,” Сургаал ба Гэрээний семинарын багшийн гарын авлага (2025)
“Сургаал ба Гэрээ 136: Өрнөд рүү аялсан нь,” Сургаал ба Гэрээний семинарын багшийн гарын авлага
149-р хичээл: Сургаал ба Гэрээ 135–136
Сургаал ба Гэрээ 136: Өрнөд рүү аялсан нь
Солт Лэйкийн хөндийд очих гэрээний аялал
1846 оны 2-р сард хожмын үеийн гэгээнтнүүдийн эхний бүлэг Наувугаас гарч, Өрнөдийн үл мэдэгдэх газар нутгийг зорив. Небраска муж улс дахь Винтер Квортерст ерөнхийлөгч Бригам Янг одоогийн Сургаал ба Гэрээ 136-г хүлээн авчээ. Энэ илчлэлтэд гэгээнтнүүдийг өрнөдийг зорих аялалдаа гэрээнүүдээ үнэнчээр сахих үед Аврагч адислахаа амласан. Энэ хичээл суралцагчдыг Тэнгэрлэг Эцэгийн зарлигуудыг дуулгавартай дагах гэрээгээ сахихыг хичээх үед Тэрээр тэднийг адислах болно гэдгийг ойлгоход тусална.
Боломжит суралцах үйл ажиллагаа
Урт бөгөөд хэцүү аялал
Хичээлийг эхлүүлэхдээ бүхээгтэй тэрэгний зураг болон анхдагчийн замын газрын зургийг харуул. Хэрэв эртний гэгээнтнүүдийнх шиг аялалд явах ёстой болсон бол ямар санагдахыг төсөөлөн бодоход суралцагчдыг урь. Эртний гэгээнтнүүд өрнөд рүү аялахдаа Их Эзэний зарлигийг дуулгавартай дагахын тулд юуг золиосолсон бэ гэдгийг ойлгоход нь суралцагчдад туслахын тулд дараах догол мөрийг уншиж эсвэл тоймлон хэлж болно.
60000 гаруй хожмын үеийн гэгээнтэн 1846-аас 1848 оны хооронд Наувугаас Солт Лэйкийн хөндий хүртэл бүхээгтэй болон гар тэргээр аялсан. Гэр бүлүүд зөвхөн бүхээгтэй болон гар тэрэгнүүд дотор багтах зүйлсээ л ачжээ. Бусад бүх зүйлээ орхисон байв. Тэргэн дотор зөвхөн өвдөж эсвэл шархдаагүй л бол хүмүүст суух зай байхгүй байлаа. Ихэнх гэр бүлүүд Наувугаас Солт Лэйкийн хөндий хүртэл 1200 миль (1900 км) газар алхах ёстой байв.
Жишээ болгон, өөрийн оршин суугаа газар нутгийн газрын зургийг харуулж, 1200 милийн (1900 км) зайд байгаа газрыг тэмдэглэ.
-
Та нарт энэ аяллын талаар ямар санаа зовоосон асуудал гарч болох вэ?
-
Ийм төрлийн аяллыг тэсвэрлэхэд Аврагч та нарт хэрхэн тусалж чадах вэ? Та нар аялж байсан бол Түүнд хэрхэн итгэлээр үйлдэж чадах вэ?
Бидний амьдралынхаа туршид аялсан хувь хүний аялал гэгээнтнүүдийн анхдагчийн өрнөд рүү аялсан аялалтай юугаараа адил болохыг та суралцагчдаас асууж болно. Суралцагчдын хариулт дээр нэмэх үүднээс ерөнхийлөгч М.Рассэлл Баллардын дараах мэдэгдлийг өг.
Арван хоёр төлөөлөгчийн чуулгын ерөнхийлөгч М.Рассэлл Баллард ийн заасан.
19-р зууны мормон анхдагчдын түүхэн аяныг эргэн дурсах нь зүй ёсны хэрэг бөгөөд чухал ч гэлээ, бидний хүн нэг бүр “алхам бүрдээ итгэлтэйгээ” нотлох ёстой учраас “амьдралын аялал үргэлжилсээр байгаа!” гэдгийг санавал зохино. …
Биднийг Тэнгэрлэг Эцэг рүү эргүүлэн аваачдаг аялал бол амьдралын маань хамгийн чухал аялал бөгөөд энэ нь Түүнд болон Түүний Хайрт Хүү, Есүс Христэд итгэх бидний итгэл өсөх тусам өдрөөс өдөрт, долоо хоногоос долоо хоногт, сараас сард, жилээс жилд үргэлжилсээр байна. …
Та нар Тэнгэрлэг Эцэгийн болон Их Эзэн Есүс Христийн оршихуйд эсэн мэнд эргэн очихын тулд сайн мэдээний зам дээрээ “алхам бүрдээ итгэлтэй” үлдээрэй. (М.Рассэлл Баллард, “Аялал үргэлжилсээр!” 2017 оны 10-р сарын Ерөнхий чуулган).
-
Ерөнхийлөгч Баллардын мэдэгдлээс юу нь та нарт онцгой санагдаж байна вэ?
Өнөөдөр судлах явцдаа та нар амьдралын тань аялал хэрхэн явагдаж байгааг эргэцүүлэн бодоорой. Та нар Тэнгэрлэг Эцэг, Есүс Христ хоёрт хэрхэн илүү ойртож байна вэ? Та нар энэ аяллынхаа явцад Тэдний тусламжийг хэрхэн харж байсан бэ? Та нар өөрсдийнхөө хэрхэн ахиж байгааг мөн хэрхэн тэмцэж байгаагаа залбирч байгаад тунгаан бод.
Өнөөдөр Тэнгэрлэг Эцэг, Есүс Христ хоёр тэднийг хэрхэн адисалж байгааг болон цаашид аяллынх нь туршид биечлэн адисалж чадах болно гэдгийг танин мэдэхэд нь суралцагчдад туслахын тулд тэднийг Сүнсний удирдамжийг эрэлхийлэхэд урамшуулан дэмж.
Их Эзэний үг ба таалал
Та Сургаал ба Гэрээ 136 дахь түүхэн нөхцөл байдлыг танилцуулахаар дараах догол мөрийг уншиж өгч эсвэл тоймлон хэлж болно. Та мөн суралцагчдаас Винтер Квортерсыг газрын зураг дээрээс олохыг хүсэж болно.
Айоваг хөндлөн гулд туулсан урт, хүнд хэцүү аяллын дараа гэгээнтнүүд Небраска дахь Винтер Квортерс хэмээн нэрлэсэн газартаа түр хоргодох байр хайж байв. Тэнд өвөлжих бэлтгэлгүй байсан тул гэгээнтнүүд өлсгөлөн, өвчин зовлон, үхэлд нэрвэгдэж; хүч чадал, тэсвэр тэвчээрээ сорьж байлаа. 1847 оны 1-р сард Винтер Квортерст байхдаа ерөнхийлөгч Бригам Янг одоогийн Сургаал ба Гэрээ 136-г хүлээн авчээ. Энэ илчлэлтэд Аврагч гэгээнтнүүдэд өрнөд рүү явах аялалдаа хэрхэн бэлдэж, цааш явахыг зааварласан.
Сургаал ба Гэрээ 136:1–11-ийг уншаад, Аврагч гэгээнтнүүдээс өрнөд рүү аялахдаа юу хийгээсэй гэж хүссэнийг олж мэд.
-
Эдгээр шүлгийн юу нь та нарт онцгой санагдаж байна вэ?
Суралцагчдын хариултыг анхааралтай сонс. Хэрэв тустай бол дараах асуултуудаас заримыг нь асуу. “2, 4-р шүлэг дээр Аврагч гэгээнтнүүдэд гэрээ байгуулах, сахих талаар юу заасан бэ?” “Гэгээнтнүүд бие биедээ болон тэдний араас явж байсан хүмүүст хэрхэн анхаарал тавих ёстой байсан бэ?” 11-р шүлэгт өгүүлснээр, хэрэв гэгээнтнүүд аяллын туршид гэрээнүүдээ байгуулж, сахивал Аврагч ямар ямар адислал өгөхөөр амласан бэ?
Бид Их Эзэний зарлигуудыг дагах гэрээгээ хүндэтгэвэл Тэр биднийг бүх зүйлд адислах болно хэмээх үнэнийг олж тодорхойлоход суралцагчдад тусал.
Мозая 18:8–10, Сургаал ба Гэрээ 20:77-г уншаад, баптисм болон ариун ёслол дээр байгуулсан бидний гэрээнүүдэд ижил төстэй тал байгаа эсэхийг олж мэд.
Алхам бүрдээ итгэлтэй
Хичээлийн дараагийн хэсэгт суралцагчдыг “анхдагчдын хамтлагууд” болгон зохион байгуул. Та хамтлагуудыг шүлэг, асуултуудыг хамтдаа ярилцахад нь зориулж сандал ширээг тойрог байдлаар засаж болно. Хамтлаг бүр “ахлагчаа” сонгож, ярилцлагаасаа тэдэнд утга учиртай гэж санагдсан зүйлсээ ангийнхандаа тайлагнаж болно.
Сургаал ба Гэрээ 136:19–29-ийг уншаад, гэгээнтнүүдийг өрнөд рүү аялахад Аврагчийн өгсөн зарлигуудыг тэмдэглэ. Өөрт онцгой санагдсан цөөн зарлигийг сонго.
-
Та нарын сонгосон зарлигууд яагаад анхдагчийн хамтлагуудын хувьд дагаж мөрдөх нь чухал байсан бэ?
-
Тэрхүү ижил зарлигуудыг сахих нь бидэнд хэрхэн тусалж чадах вэ?
-
Өнөө цаг үед тэдгээр зарлигийг сахиснаар Их Эзэн бидэнд ямар адислал өгч болох вэ?
Суралцагчид дараах анхдагчдын түүхүүдийг судлаад, дараах асуултуудыг хамтлагаараа эсвэл ангиараа ярилцаж болно. Хэрвээ хамтлаг болон гүйцэтгэж байгаа бол суралцагчдад шаардлагатай бүх чиглэл, асуулт байгаа эсэх, хамтлагчийн ахлагчид хэлэлцүүлгийн онцлох хэсгүүдийг тайлагнана гэдгээ мэдэж байгаа эсэх эсвэл хамтлагийн өөр гишүүнд тайлагнахыг даалгаж болно гэдгийг мэдэж байгаа эсэхийг шалга.
“Сионы гадас болгон Их Эзэний байршуулах тэр газар” (Сургаал ба Гэрээ 136:10) руу гэгээнтнүүд дуулгавартайгаар олон мянган бээр замыг туулан явсан. Анхдагчдыг Их Эзэнд дуулгавартай байх гэрээгээ сахихыг хичээх үед Их Эзэн тэднийг адисалсан зарим арга замыг ойлгоход нь суралцагчдад туслахын тулд та дараахаас аль нэгийг нь гүйцэтгэж болно. Үүнд:
-
Солт Лэйкийн хөндий рүү аялсан анхдагчдын аяны тухай дуртай нэг түүхээ сонгож хамтлаг дотроо хуваалцахад суралцагчдыг урь.
-
Saints: The Story of the Church of Jesus Christ in the Latter Days, vol. 2, No Unhallowed Hand, 1846–1893 (2020), 58–96 болон ChurchofJesusChrist.org сайт дээрх “Pioneers” эсвэл “The Trek West” зэргээс суралцагчдын хамтлагтаа уншиж өгч болох түүхийн түүвэр материалуудыг өг.
-
Анхдагчийн замд тохиолдсон нэгэн гайхамшгийн түүх болох “Watched Over by God: Elizabeth Panting’s Journey to Zion” видеог цагийн код 7:47-оос 11:16 хүртэл үзүүл.
-
Биднийг Их Эзэний зарлигуудыг дагахыг хичээх үед өгдөг Түүний адислалуудыг энэ анхдагчийн түүх хэрхэн харуулж байна вэ?
-
Өнөөгийн өсвөр насныханд Бурханы зарлигуудыг сахих гэрээ байгуулах үед энэ түүх хэрхэн тусалж болох вэ?
Анхдагчдын аяллын сургамж
Тэнгэрлэг Эцэгийн зарлигуудыг сахихад Тэрээр амьдралынх нь аялалд тэднийг хэрхэн адисалсан талаар тунгаан бодоход суралцагчдыг урь. Туршлагаасаа хуваалцахыг хүссэн суралцагч байгаа эсэхийг асуу. Мөн та өөрийн туршлагыг хуваалцах талаар бод.
Ангийн бүх гишүүнийг өнөөдөр гэр бүлийн гишүүн эсвэл найзтайгаа хуваалцаж болох, сурсан зүйлээ бичихэд урь. Суралцагчид анхдагчдын түүхүүд өнөөдөр бидэнд Их Эзэний зарлигуудыг сахих гэрээндээ үнэнч байхад хэрхэн тусалж чадахыг төдийгүй Их Эзэн бидний хичээл зүтгэлийг хэрхэн адислахыг багтааж болно. Тэднийг сурсан зүйлээ гэр бүл, найз нөхөдтэйгөө эсвэл ангиас гадуур хуваалцахад урь.