Lesona 148: Mataupu Faavae ma Feagaiga 135–136

Faasologa i le Au Peresitene

Filifilia e le Alii e Taitaia le Ekalesia

O tagata o le Ekalesia i taimi o Iosefa Samita e lei oo lava i le maliu o se perofeta. E le gata o le faamaturoina o Iosefa ma Ailama o se taimi faigata i lagona ae o se tasi o le fenumiai ma le le mautonu po o ai o le a taitaia le Ekalesia. Peitai, sa saunia e le Alii se ala mo Lana Ekalesia e faaauau ai i lalo o le taitaiga faaperofeta. O lenei lesona ua faamoemoe e fesoasoani i tagata aoga ia faateleina lo latou talitonuga e faapea, o loo faaauau pea ona taitai e le Alii Lana galuega e tusa lava pe maliu se perofeta.

Gaoioiga E Ono Mafai Ona Aoao Ai

O se taitai fou o le Ekalesia

Ina ia amata le vasega mafaufau e faasoa atu le tulaga faataitai lenei.

Vaai faalemafaufau e i ai sau uo e igoa ia Kaperielu sa auai lata mai nei i le Ekalesia faatasi ma lona aiga. Ina ua tuua le seminare i se tasi aso, na ia fesili atu ia te oe ni fesili e uiga i le taitaiga o le Ekalesia. O loo mafaufau o ia po o le a le mea e tupu pe a maliu le Peresitene o le Ekalesia ma pe faapefea ona filifilia se perofeta fou. Ua ia mafaufau foi pe mafai faapefea ona tatou mautinoa o le tagata sa’o o le perofeta lea.

• I se fua o le 1 i le 5, 1 o le maualalo ma le 5 e maualuga, o le a sou lagona mautinoa e uiga i lou tomai e tali atu ai i le fesili a Kaperielu?

• Aisea e te manatu ai e taua le malamalama i le ala e galue ai suiga faataitai i le Ekalesia?

Atonu e te manao e uunaia iatagata aoga e saili le fesoasoani a le Agaga Paia i lo latou aoaoina a o tatou suesue atili e uiga i le ala ua faavaeina e le Alii mo le filifilia o i latou o e taitaia Lana Ekalesia. Valaaulia i latou e saili faaaliga pe aisea e taua ai ona latou iloa i le taimi lenei o o latou olaga.

O ai o le a sui i le tulaga o Iosefa Samita?

E mafai ona fesoasoani mo tagata aoga le malamalama i nisi o talaaga e tau atu i le suiga muamua o le taitaiga i le Ekalesia. Ina ia faia lenei mea, e mafai ona e aoteleina pe faitau i mea nei:

I le taimi o le faamaturoina o Iosefa Samita, e lei oo lava tagata o le Ekalesia i le maliu o se perofeta. E faaopoopo atu i le faavauvau tele i le maliu o Iosefa, o nisi sa le mautinoa pe o le a faapefea ona agai i luma le Ekalesia. O le toatele o Aposetolo sa i le itu i sasae o le Iunaite Setete sa auauna atu i ni misiona ina ua latou faalogo e uiga i le maliliu o Iosefa ma Ailama. Ina ua latou iloaina le tala faanoanoa, sa amata ona latou toe malaga atu ma isi faifeautalai i Navu.

I le leai ai o se Peresitene o le Ekalesia, e i ai ni nai tagata na tuuina mai ni faamatalaga eseese e uiga i le mea e tatau ona tupu i le taitaiga o le Ekalesia.

Mafaufau e valaaulia ni tagata aoga se toatolu e o mai i luma o le vasega. E mafai ona e fai atu i tagata aoga taitasi e faitau leotele se tasi o parakalafa nei e tolu. Mo lou silafia, o le tala muamua o loo i lalo e faasino ia Sini Rikitone. O le tala lona lua o Polika Iaga. O le tala lona tolu o Iakopo Strang. Aua nei faaalia atu igoa i tagata aoga.

Fai mai le Fesoasoani Muamua i le Au Peresitene Sili, sa ta’u atu ia te ia i se faaaliga e leai se tasi e mafai ona suia Iosefa. Sa ia fautua atu e tatau ona avea o ia ma “leoleo” o le Ekalesia.

Na saunoa mai le Peresitene o le Korama a Aposetolo e Toasefululua e faapea, sa faaee atu e Iosefa Samita le pule a le Faaola e taitai ai le Ekalesia i luga o le Korama o le Toasefululua.

O se tagata o le ekalesia sa papatisoina i le fa masina a o lei maliu Iosefa na ia tuuina atu se tusi ua iai le saini a Iosefa Samita lea na atofaina ai o ia o le sui o Iosefa.

• Faamata e te manatu e faapefea ona e tali atu i nei mea na tutupu pe ana faapea sa avea oe ma tagata o le Ekalesia i lea vaitaimi?

• O a ni ou popolega e ono i ai e uiga i nisi o faamatalaga?

O se mamanu na faavaeina e le Alii

Mafaufau e valaaulia tagata aoga e vaavaai mo tusitusiga paia, faamatalaga mai taitai o le Ekalesia, ma isi punaoa mamana ua filifilia mo auala e mafai ona tatou iloa ai o le perofeta o le auauna filifilia a le Alii. I le avea ai ma se vaega o a latou suesuega, valaaulia tagata aoga e faaaoga le pepa tufa atu e aoao ai pe na faapefea ona iloa e le Au Paia ina ua mavae Iosefa Samita po o ai e mulimuli mai ai:

O Ai e Mulimuli i ai pe a uma Iosefa Samita

A o lei maliu o ia, sa aoao atu e le Perofeta o Iosefa Samita nei mea i le Korama a Aposetolo e Toasefululua:

Uso e, … [o] nisi o vaaiga taua ua lata ona faataunuuina. Atonu o le a faasiotia a’u e o’u fili. Ma afai latou te faia, ae lei tuuina atu ia te outou ki ma mana o loo ia te a’u, o le a leiloloa i latou mai le lalolagi. Ae tau lava ina ia mafai ona ou manumalo i le tuuina atu i luga o o outou ulu, ona tuu atu lea o a’u i lima fasioti tagata pe afai ua finagalo i ai le Atua, ma e mafai ona ou alu ma le fiafia ma le lotomalie, i lo’u iloa ua maea la’u galuega, ma faataatiaina le faavae lea o le a faafaileleina atu ai le malo o le Atua i lenei tisipenisione o le atoaga o taimi.

I luga o tauau o le Toasefululua e tatau ona i ai le tiutetauave o le taitaiga o lenei ekalesia mai le taimi nei i luma seia oo ina outou tofia isi e sui ia te outou. (Aoaoga a Peresitene o le Ekalesia: Iosefa Samita [2007], 533–34)

Na aoao mai foi Iosefa Samita o le Au Peresitene Sili ua na o le pau lea o le vaega i luga o le Korama a Aposetolo e Toasefululua, ae a maliu le perofeta, e soloia le Au Peresitene Sili (tagai i le Talafaasolopito, 1838–1856 [Pepa o le Talafaasolopito o le Ekalesia], volume B-1, 691, josephsmithpapers.org).

• Mai mea ua e aoaoina, o le a se mea o le a fesoasoani ia te oe e tali atu ai i faamatalaga e tolu na faia muamua?

• O le a le mamanu na faaaveina e le Alii mo le faaauauina o le taitaiga o Lana Ekalesia pe a maliu le perofeta?

Ina ua lauga atu Polika Iaga i le Au Paia i se fonotaga tele, e toatele na iloaina se aafiaga faavavega ma lagonaina se faamautinoaga o le Agaga Paia.

Na faasoa mai e Peresitene George Q. Cannon (1827–1901), o lē sa tautua mulimuli ane i le Au Peresitene Sili:

Ua tulai Polika Iaga … ma saunoa atu i tagata. … O ai na i ai i lena aso e le mafai ona faagaloina le lagona na oo ifo i o latou luga! Pe ana faapea na toetu Iosefa mai le oti ma toe saunoa mai ia i latou, atonu o le a le sili atu le tulaga faateia nai lo le tulaga na oo i ai le toatele na i ai i lena faatasiga. O le leo lava o Iosefa lava ia; ma na le gata o le leo lava o Iosefa na faalogoina; ae na foliga mai i le vaai a tagata faapei o le tagata lava lea o Iosefa lea na tu mai i o latou luma. Matou te lei faalogo lava i se isi mea na tupu e sili atu lona matagofie ma le faavavega nai lo le mea na tupu i lena aso i luma o lena faapotopotoga. Sa tuuina mai e le Alii i Lona nuu se molimau na leai ai se avanoa e masalosalo ai po o ai le tagata na Ia filifilia e taitaiina i latou. Sa latou vaaia ma faalogoina i o latou lava mata ma taliga, ona oo mai lea o upu na fofogaina, lea na oo mai faatasi ma le mana faatalitonuina o le Atua, i o latou loto, ma na faatumulia i latou i le Agaga ma le olioli tele. Sa i ai le pogisa, ma, atonu foi i nisi o loto, sa i ai le masalosalo ma le le mautonu; ae o lenei sa manino mai i tagata uma o le tamalii lenei o le na faaeeina mai i ai e le Alii le pule na tatau ai, e galue ai i lo latou lotolotoi e suitulaga ia Iosefa” (“Iosefa Samita, le Perofeta,” Juvenile Instructor, Oke. 1870, 174–75).

O Emily Smith Hoyt, o se tagata o le ekalesia na auai ina ua lauga atu Polika Iaga i le Au Paia, na faamaumauina lenei mea:

O manatu faaalia, o foliga vaaia, le faalogo atu i le leo na faate’ia ai lo’u agaga atoa. Na vaaia lava e o’u mata le tino maliufasia o Iosefa. Na lagonaina foi e o’u lima le malulu aisa o le oti i luga o lona muaulu sa mamalu. Na ou iloa ua maliu Iosefa. Ae sa faate’ia soo a’u ma vaai atu i le tulaga e aunoa ma se mafaufau i ai e vaai pe le o Iosefa lena. Ae e leai, o Polika Iaga lava ma afai e i ai se tasi e na te teena le aiā ma le tatau ia Polika ona faatautaia mataupu mo le Au Paia, e pau le mea ou te fia fai atu ia i latou o lenei. Ia maua le agaga o le Atua ma ia iloa mo outou lava. O le a saunia e le Alii mo ana lava” (Emily Smith Hoyt, in Lynne Watkins Jorgensen and BYU Studies Staff, “The Mantle of the Prophet Joseph Passes to Brother Brigham: A Collective Spiritual Witness,” BYU Studies,,vol. 36, no. 4 [1996–97], 164).

• Afai sa e i ai iina, mata na faapefea ona aafia oe i lenei mea na tupu?

• E mafai faapea ona fesootai le Moronae 10:5 i mea sa e suesueina?

Valaaulia tagata aoga e faasoa mai mea na latou aoaoina mai i a latou suesuega. Ia mautinoa ua malamalama tagata aoga a maliu le Peresitene o le Ekalesia, e soloia le Au Peresitene Sili ae taitai e le Korama a Aposetolo e Toasefululua le Ekalesia. Fesoasoani i tagata aoga ia malamalama o Aposetolo o loo galulue i le Au Peresitene Sili e toe foi atu i lo latou tulaga sinia i le Korama o le Toasefululua. Ia mautinoa ua malamalama foi tagata aoga o le Aposetolo na auauna atu aupito umi o le Peresitene lea o le Korama a Aposetolo e Toasefululua ma, o lea, e avea ai ma Peresitene o le Ekalesia e sosoo ai.

E mafai foi e tagata aoga ona faailoa faapea e ala i le Agaga Paia, e mafai ai ona tatou maua se molimau, o i latou e taitai i le Ekalesia ua valaauina e le Atua.

• O le a se mea tatou te ono faia, po o le a se mea ua e faia, ina ia maua ai se molimau faaleagaga na filifilia lo tatou perofeta e le Alii e taitaia Lana Ekalesia?

Ina ia faaiu ai, mafaufau e tuu atu i tagata aoga e faaaoga mea ua latou aoaoina e tali atu ai i le tulaga faataitai mai le amataga o le lesona. O se tasi auala e faia ai lenei mea o le tuu atu lea i tagata aoga e faatino faatasi ma paga. I le avea ai ma se vaega o la latou tali, e mafai ona e fautuaina tagata aoga e faaaofia ai a latou lava molimau faapea o le perofeta o le taitai filifilia a le Alii.

Punaoa Faaopoopo

Na faapefea ona oo mai le molimau faaleagaga i le Au Paia ina ua filifilia Polika Iaga ma le Toasefululua e le Alii e taitaia Lana Ekalesia?

O isi Au Paia, e pei o Peniamina F. Johnson, William C. Staines, ma Uilifoti Uitilafi, na faamaumauina le faalogo i le siufofoga o Iosefa Samita po o le vaai ia Iosefa ao saunoa Polika Iaga (tagai Benjamin F. Johnson, My Life’s Review [1947], 104; History, 1838–1856 [Manuscript History of the Church], volume F-1, 300, josephsmithpapers.org).

Mo nisi faamatalaga e uiga i le tali a tagata o le Ekalesia ma taitai i le fesili e uiga i le ala e tatau ona faagasolo ai le taitaiga o le Ekalesia, tagai mataupu 45 o le Au Paia, voluma 1 ([2018], 537–68).

O fea e mafai ona ou aoao atili ai e uiga i le faasologa i le Au Peresitene Sili?

Ina ua mavae le maliu o Peresitene Thomas S. Monson, sa faasoa mai Elder D. Todd Christofferson o le Korama a Aposetolo e Toasefululua:

O se Savali mai le Au Peresitene Sili

O se faasalalauga faapitoa i le lalolagi atoa e faalauiloa ai le Au Peresitene Sili fou i le aso 16 Ianuari, 2018.

Sa aoao mai Peresitene Ezra Taft Benson (1899–1994):

Ua silafia e le Atua mea uma, o le iuga mai le amataga, ma e leai se tagata e faafuasei ona avea ma peresitene o le ekalesia a Iesu Keriso, pe tumau ai iina ona o se mea e tupufua, pe maliu e ala i se tulaga e le’i mafaufauina. (Ezra Taft Benson, “Jesus Christ–Gifts and Expectations,” New Era, Me 1975, 16–17)

O le Autu lenei o le Talafaasolopito o le Ekalesia o loo aumaia ai faamatalaga faaopoopo i mea na tutupu ina ua mavae le maliu o le Perofeta o Iosefa Samita e faatatau i le taitaiga o le Ekalesia: “Faasologa o le Taitaiga i le Ekalesia,” ChurchofJesusChrist.org/study/history/topics.

E mafai faapefea ona ou maua se molimau faaleagaga o le Peresitene fou o le Ekalesia ua valaauina e le Atua?

Sa faasoa mai e Elder Neil L. Andersen o le Korama a Aposetolo e Toasefululua le mea na faia e lona faletua, o Kathy, e maua ai se molimau o le valaauga o Peresitene Russell M. Nelson e mai le Atua:

O Le Perofeta a le Atua

Ua aoao mai Elder Andersen o loo i ai le saogalemu ma le filemu i le mulimuli i le perofeta, o lana matafaioi sili ona taua o le faasino mai lea o le ala i le Faaola.

Ua tatou maua le avanoa o ni Au Paia o Aso e Gata Ai e maua ai se molimau patino o le valaauga o Peresitene Nelson e mai le Atua. E ui ua leva ona iloa e lo’u toalua, o Kathy, ia Peresitene Nelson mo le latalata i le tolu sefulu tausaga ma e leai sona fesiligiaina o lona tiute paia, ae i lona vaetofiaina, sa amata ai ona ia faitauina uma ana lauga o konafesi aoao i le 34 tausaga talu ai, ma tatalo mo se faamautinoaga loloto o lana matafaioi faaperofeta. Ou te folafola atu ia te outou o lenei molimau sili atu o le a oo mai pe a e saili i ai ma le lotomaualalo ma le agavaa. (Neil L. Andersen, “O Le Perofeta a le Atua,” Liahona, Me 2018, 25–26)

Gaoioiga Faaopoopo e Aoao Ai

Tali a Polika Iaga i le maliu o Iosefa Samita

Ina ia faapupula atili atu le upumoni e faapea, o le Korama a Aposetolo e Toasefululua e taitaia le Ekalesia ina ua mavae le maliu o le perofeta, mafaufau e faasoa atu le mea na tupu ia Polika Iaga i le faitauina o le tusi e faasilasila atu ai le maliu o Iosefa Samita. Sa tusi faamaumauina e Polika mea nei:

Ina ua matou maua lena tusi, sa ma i ai faatasi iina ma Orson Pratt ma faitauina ai le tusi. Sa ou lagonaina i lena taimi se faalogoga ou te lei lagonaina lava i lo’u olaga. … Na ou lagonaina le matuā popole tele ma [‘ou] manatu ai ua tai ta’e lou ulu. … Ua aveesea ea le Perisitua mai le fogaeleele? Ua leai ia Iosefa ma Ailama. [Ona] oo mai lea faapei o le pati o lima. Sa oo mai ia te au e pei o le Faaaliga—o ki o le malo ua i ai iinei. (Brigham Young, i le Historian’s Office General Church Minutes, Feb. 12, 1849, 2, Church History Library, Salt Lake City; sipelaga, faailoga, ma le kalama ua faalaugatasia)

• O le a le mea na avatua ia Polika Iaga le mafanafana ina ua ia iloa mulimuli ane ua maliu Iosefa Samita?

Toefaatulagaina o le Au Peresitene Sili

Ina ia fesoasoani i tagata aoga ia malamalama i le mea na tupu i le Au Peresitene Sili ina ua mavae le maliu o Iosefa Samita, atonu e te manao e faamalamalama atu e lei toe faatulagaina i taimi uma le Au Peresitene Sili i le mavae ai o le maliu o se Peresitene o le Ekalesia.

E mafai ona e fesili atu i tagata aoga pe latou te iloa pe o le a le umi ina ua uma le maliu o Iosefa Samita a o lei toefaatulagaina le Au Peresitene Sili.

E faalagolago i lo latou malamalama, e mafai ona e faasoa atu nisi po o mea uma nei:

Ina ua mavae le maliu o le Perofeta o Iosefa Samita, ona taitai ai lea e le Korama a Aposetolo e Toasefululua le Ekalesia mo le tolu ma le afa tausaga, ona faatoa toe faatulagaina ai lea o le Au Peresitene Sili. Sa taitai e le Korama o le Toasefululua le Ekalesia mo le silia teisi ma le tolu tausaga ina ua maliu Peresitene Polika Iaga, ae mo le toeitiiti lua tausaga ina ua maliu Peresitene Ioane Teila. Peitai, ina ua maliu Peresitene Uilifoti Uitilafi ia Setema 2, 1898, na musuia e le Alii ia Lorenzo Snow ma isi uso o le Toasefululua e toefaatulaga le Au Peresitene Sili i le na’o le 11 aso mulimuli ane, ia Setema 13, (tagai George Q. Cannon, “Remarks,” Deseret Weekly, Oke. 8, 1898, 514). Talu mai lena taimi, ua taitaia ai e le Korama a Aposetolo e Toasefululua le Ekalesia, e masani lava mo na o ni nai aso ao lei vaetofia se Peresitene fou o le Ekalesia ma toefaatulagaina le Au Peresitene Sili.

O ai o le a avea ma perofeta e sosoo ai i aso nei?

Ina ia tuu atu i tagata aoga se avanoa e aotele ai mea sa latou aoaoina, mafaufau e saunia ni ata o le Au Peresitene Sili o i ai nei ma le Korama a Aposetolo e Toasefululua i tagata aoga e toa15. O nei tagata aoga e mafai ona tutu i luma o le potu ma faatulaga i latou lava o le Au Peresitene Sili ma le Korama a Aposetolo e Toasefululua. Fai atu i tagata aoga e faataitai mai le mea o le a tupu i le Au Peresitene Sili ma le Korama a Aposetolo e Toasefululua, e tusa ai ma le mamanu a le Alii, pe afai e maliu le Peresitene o le Ekalesia.