Lesona 147: Mataupu Faavae ma Feagaiga 135–136

Mataupu Faavae ma Feagaiga 135

O Le Faamaturoina o Iosefa Samita le Perofeta

I le mavae ai o tausaga o le taitaiga o le Au Paia, sa faafalepuipuiina ai Iosefa Samita le Perofeta ma lona uso o Ailama i le Falepuipui o Karefasi. I le aso 27 Iuni, 1844, sa osofaia ai e se au faatupu faalavelave ma sa faamaturoina uma ai tamalii e toalua. O lenei lesona ua faamoemoe e fesoasoani i tagata aoga e faamalosia a latou molimau o Iosefa Samita o le Perofeta a le Atua o le Toefuataiga.

Gaoioiga E Ono Mafai Ona Aoao Ai

“O le Perofeta ma le Tagavāai a le Alii”

Mafaufau e faaali atu se ata o Iosefa Samita ma valaaulia tagata aoga e mafaufau faapea o le a latou talanoa ma se tasi e lei iloaina se mea e uiga ia te ia. Fai atu ia i latou e fai se lisi o mea latou te manatu o mea e fa pe lima e sili ona taua na faia e le Alii mo i tatou e ala mai le Perofeta o Iosefa Samita. Atonu o le a fesoasoani fesili nei:

• O le a faapefea ona ese lou olaga e aunoa ma faamanuiaga na tuuina mai e le Alii ia i tatou e ala mai i le Perofeta o Iosefa Samita?

• Na faapefea ona faatosinaina lou malamalama ma le sootaga ma le Tama Faalelagi ma Iesu Keriso e ala ia Iosefa Samita ma lana galuega faaperofeta?

Faamalamalama atu o le lesona lenei, o le a aoao ai tagata aoga e uiga i le faamaturoina o Iosefa Samita ma le mea na faia e le Alii e ala mai ia te ia. A o latou suesue, valaaulia i latou e saili ia malamalama atili pe na faapefea ona faamanuiaina i latou e le Alii e ala i le Perofeta.

O le auala i le Falepuipui o Karefasi

Ina ia fesoasoani i tagata aoga ia saunia e suesue le Mataupu Faavae ma Feagaiga 135, mafaufau e aotele nei parakalafa i au lava upu.

Sa ola Iosefa Samita ma le Au Paia ma le filemu i Ilinoi mo le tusa ma le tolu tausaga. I le 1842, na amata ai ona latou toe feagai ma tetee. Sa tuufaatasi taumafaiga a tagata faatuiese i totonu o le Ekalesia ma le tetee mai fafo e faasaga i le Perofeta ma le Au Paia. Na amata ona popole ma ita nisi o tagatanuu o Ilinoi i le aafiaga faaupufai o le Au Paia. O isi na faatupulaia le lotoleaga i le tuputupu ae o le tamaoaiga o Navu. O sauaga e faasaga i le Au Paia na afua mai i le le malamalama e uiga i faiga masani, e pei o faaipoipoga autaunonofo, lea sa faateteleina e nisi o tagata liliuese o le Ekalesia. E oo atu i le taumafanafana o le 1844, ua matua faateteleina le feita i le Ekalesia.

I le aso 7 o Iuni, 1844, na lolomi ai e William Law, o lē sa avea ma fesoasoani lua i le Au Peresitene Sili, ma isi tagata liliuese, le lomiga muamua o se nusipepa sa ta’ua o le Nauvoo Expositor. e faaoso ai le ita o tagata lautele i le Perofeta ma le Ekalesia. O Iosefa Samita ma le toatele o le aufono o le aai o Navu sa manatu o le nusipepa o se faalavelave i tagata lautele ma sa faatonuina ai ia faatamaia le fale lomitusi o le Nauvoo Expositor . O lenei faatulagaga sa ogatusa ma le tulafono i aso o Iosefa Samita.

O nisi o tagatanuu o nofoaga lata ane na tetee i le Au Paia ma le faatafunaga o le falelomitusi. Na fautuaina e Kovana Thomas Ford o Ilinoi ia Iosefa Samita ma isi taitai o le Ekalesia e malaga atu i le taulaga o Karefasi ma foia faaletulafono le tulaga. Sa polomisi i lo latou puipuiga atoa ma se faamasinoga sa’o ma tonu pe afai latou te o mai lava i latou. E ui lava i nei folafolaga, sa talitonu le Perofeta o le a fasiotia o ia pe afai e alu o ia (tagai i le Mataupu Faavae ma Feagaiga 135:4). Peitai, i le aso 24 Iuni, 1844, na tuua ai e Iosefa ma Ailama Samita ma nai isi ia Navu mo Karefasi e taumafai e tausia le saogalemu o le Au Paia mai sauaga a le au faatupu faalavelave.

Ina ua uma ona faaalu e Iosefa ma Ailama ni nai aso i le falepuipui, sa osofaia ai e le au faatupu faalavelave.

O le faamaturoina

A o lei faitauina e tagata aoga le fuaitau o mau lenei, mafaufau e fai atu ia i latou e faasoa mai soo se mea atonu ua uma ona latou iloa e uiga i le faamaturoina o Iosefa ma Ailama Samita.

O leMataupu Faavae ma Feagaiga 135, sa uluai lolomiina ae le’i atoa le tolu masina talu ona mavae le faamaturoga, o loo faamatala ai le mea na tupu. Faitau le Mataupu Faavae ma Feagaiga 135:1–2, ma vaavaai mo faamatalaga e uiga i le faamaturoga ma o ai na molimauina. (Afai e te manao i nisi faamatalaga, faitau le Mataupu Faavae ma Feagaiga 135:4–7.)

• O le a se mea na e mauaina?

• Mata o a ni ou mafaufauga po o ni lagona pe ana faapea o oe o se molimau i lenei mea matautia na tupu?

Ina ia fesoasoani i tagata aoga e vaai faalemafaufau i le mea na tupu, mafaufau e faaali le vitio “Iosefa Samita—Perofeta o le Toefuataiga” ( mai le faailo taimi 0:00 i le 3:06) po o le “Iosefa Samita: O Le Perofeta o le Toefuataiga” (mai le faailo taimi 55:50 i le 59:51).

Afai e manaomia, faamalamalama atu o Elder Ioane Teila (1808–87) o se tasi o molimau vaaitino i le faamaturoga. Na iu lava ina toe malosi o ia mai ona manuaga na maua i lena aso ma faaauau ai ona auauna atu o le Peresitene lona tolu O le Ekalesia a Iesu Keriso o le Au Paia o Aso e Gata Ai.

Faitau le Mataupu Faavae ma Feagaiga 135:3, ma vaavaai mo nisi o auala na faamanuia ai tatou e le Alii e ala i le Perofeta o Iosefa Samita.

O leMataupu Faavae ma Feagaiga 135:3 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala iloga ina ia faigofie ona latou mauaina.

• O a mea moni e sili ona aoga ia te oe? Aisea?

Valaaulia tagata aoga e lisi ni upumoni anoa mai le fuaiupu e 3 i le laupapa ma faasoa mai o latou manatu e uiga i ai.

Atonu latou te faaaogaina ni upu eseese, ae o le upumoni e tasi atonu o le a faailoa mai e tagata aoga o le o Iosefa Samita e tele atu mea na ia faia, vagana ai lava Iesu Keriso, mo le faaolataga o le lalolagi nai lo se isi lava tagata. Mafaufau e tusi upumoni faapea i luga o le laupapa. Atonu e taua le faamanino atu o le faaolataga e na o Iesu Keriso lava e mafai ai, o le Faaola o tagata uma. Peitai, sa galue Iesu Keriso e ala i le Perofeta o Iosefa Samita e tuuina atu faamanuiaga o Lana Togiola i fanau a le Tama Faalelagi i lenei tisipenisione.

Mafaufau e valaaulia tagata aoga e faaalu ni nai minute ma mafaufau loloto i le taua o lenei upumoni i o latou lava olaga.

E ui ina sa faamutaina le olaga faaletino o Iosefa Samita i le aso 27 Iuni, 1844, o lana galuega, molimau, ma faatosinaga na fesoasoani i le faitau miliona o fanau a le Tama Faalelagi e o mai ia Iesu Keriso ma maua faamanuiaga o le faaolataga.

“O lana misiona ma ana galuega”

Ina ia fesoasoani i tagata aoga ia iloa lelei le ala na faaaoga ai e le Tama Faalelagi ma Iesu Keriso ia Iosefa Samita e fesoasoani ai ia tatou latalata atili atu ia i Laua, mafaufau e valaaulia tagata aoga e fai laasaga nei e tolu. O nisi o faataitaiga o loo aofia i mataitusi italia.

Valaaulia tagata aoao e faasoa mai: Ina ia aoao atili e uiga i le valaaulia o isi e faasoa mai, tagai i le aoaoga ua faaulutalaina “Tuu atu soo le molimau ma valaaulia tagata aoao e faasoa mai o latou lagona, aafiaga ma molimau,” o loo maua i le Tomai o le Atinaega o Faiaoga: Aoao Atu e ala i le Agaga. Mafaufau e faataitai le Tomai “Fatu ni uunaiga e fesoasoani i tagata aoga e faaleo mai o latou lagona, aafiaga, ma molimau.”

1. Tusi le “O le galuega a le Alii e ala ia Iosefa Samita” i le ogatotonu o se itulau i lau api faamaumau mo suesuega.

2. Faataamilo i lenei fasifuaitau, tusi pe tusi se ata o mea e 4-5 na aoao mai pe na faia e le Tama Faalelagi ma Iesu Keriso e ala ia Iosefa Samita. Afai e mafai, ia aofia ai se mau faasino mo auala taitasi. Faataitaiga “O le Uluai Faaaliga” (Iosefa Samita—Talafaasolopito 1:17–19).

3. Ia aofia ai ou mafaufauga ma lagona pe faapefea e mea taitasi na e lisiina ona fesoasoani ia te oe e latalata atili atu ai i le Tama Faalelagi ma Iesu Keriso. Faataitaiga: E ala ia Iosefa Samita ua ou malamalama atili ai e uiga i le Tama Faalelagi ma Iesu Keriso. Ou te iloa o le a tali mai le Tama Faalelagi i au tatalo ma o le Tama Faalelagi ma Iesu Keriso o ni tagata mavaevae se toalua.

Afai e manaomia e tagata aoga se fesoasoani e mafaufau ai i nisi faataitaiga o mea e tusi pe tusitusi, e mafai ona latou iloiloina autu ma fuaiupu nei: perisitua (Mataupu Faavae ma Feagaiga 13:1); o le Tusi a Mamona (Mataupu Faavae ma Feagaiga 17:5–6; 135:3); galuega faafaifeautalai (Mataupu Faavae ma Feagaiga 4; 110:11); mana o faamauga (Mataupu Faavae ma Feagaiga 110:13–16).

A o mafaufau loloto tagata aoga ma tusitusi, e mafai ona e taina le “Viia Le na Fetaia’i ma Ieova” (Viiga, nu. 15). Faamalamalama atu o lenei viiga na tusia e Viliamu W. Phelps ina ua mavae le maliu o le Perofeta o se saafiafiga ia te ia.

Valaaulia le toatele o tagata aoga i le mea e mafai ai e faasoa mai o latou manatu i le auala na faamanuiaina ai i latou e le Alii e ala i le Perofeta o Iosefa Samita ma mafaufau e fai se lisi i luga o le laupapa. A o faasoa mai e tagata aoga o latou manatu ma lagona i se mataupu, mafaufau e fai atu fesili e pei o le “Pe na mafaufau se isi tagata e uiga i lena lava faamanuiaga e tasi? E te manao e faaopoopo soo se manatu i la matou talanoaga?” po o le “E faapefea ona ese o outou olaga e aunoa ma lenei faamanuiaga?” Valaaulia tagata aoga e faasoa mai e uiga i faamanuiaga e tele. Mafaufau e faasoa atu foi ou manatu ma lagona.

Ia faaiu ai, e te ono faasoa le saunoaga lenei mai ia Peresitene M. Russell Ballard, Sui Peresitene o le Korama a Aposetolo e Toasefululua. O Peresitene Ballard o le atalii o le atalii o Ailama Samita.

E ao ina tatou manatua e le aunoa le tau na totogiina e Iosefa ma Ailama Samita, faatasi ai ma le anoanoai o isi tamalii ma tamaitai ma tamaiti faatuatua, e faavae ai le Ekalesia ina ia mafai ai e oe ma au ona sapi i le tele o faamanuiaga ma nei upumoni faaalia uma ua tatou maua i ona po nei. E le tatau lava ona faagaloina lo latou faatuatua! (M. Russell Ballard, “Tatou Te Le O Atu Pea ea i Lenei Faamoemoega Sili?,” Liahona, Me 2020, 11)

• Afai e manao se tasi ia malamalama atili pe na faapefea ona faamanuiaina i latou e le Alii e ala i le Perofeta o Iosefa Samita, o le a se mea o le a e fautuaina atu latou te faia?

Tauloto

Atonu e te manao e fesoasoani i tagata a’oga e tauloto le mau faasino ma le fasifuaitau autu o mau o le Mataupu Faavae ma Feagaiga 135:3 ma toe faamanatu i latou i lesona i le lumanai. O le fasifuaitau autu o mau i lenei palakalafa o le “O Iosefa Samita na aumaia le Tusi a Mamona, lea na ia faaliliuina e ala i le meaalofa ma le mana o le Atua.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga Toe Faamanatu o le Atamai i Aoaoga Faavae.”

Punaoa Faaopoopo

O fea e mafai ona ou aoao atili ai e uiga i le faamaturoina o Iosefa ma Ailama Samita?

Mataupu 43–44 o le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 o loo i ai tala auiliili o mea na tutupu e tau atu i le fasiotiga o Iosefa ma Ailama Samita ([2018], 521–52).

Fai se maimoaga faatekinolosi i le Falepuipui o Karefasi.

E faapefea ona ou tali atu ia i latou o e le malamalama i o tatou lagona e uiga ia Iosefa Samita?

Na aoao mai Peresitene Gordon B. Hinckley (1910–2008):

Matou te le tapuai i le Perofeta. Matou te tapuai i le Atua lo tatou Tama Faavavau ma le Alii toetu o Iesu Keriso. Ae peitai, matou te talisapaia le Perofeta; matou te talai atu o ia; matou te faaaloalo ia te ia; matou te ava ia te ia o se mea faigaluega i aao o le Silisili Ese i le toefuataiina i le lalolagi o upumoni anamua o le talalelei paia, faatasi ai ma le perisitua lea e mafai ai ona faaaoga le pule a le Atua i le faagaoioiga o mataupu o Lana Ekalesia ma mo le faamanuiaina o Ona tagata. (Gordon B. Hinckley, “Iosefa Samita le Itiiti—Perofeta a le Atua, Auauna Malosi,” Ensign, Tes. 2005, 4)

E mafai faapefea ona ou atina’e ma faamalosia la’u molimau i le Perofeta o Iosefa Samita?

Na saunoa Elder Neil A. Andersen o le Korama a Aposetolo e Toasefululua:

E mafai ona eseese tulaga e oo mai ai ia i tatou taitoatasi se molimau i le Perofeta o Iosefa Samita. Atonu e oo mai a o e tootuli e tatalo, ole atu i le Atua ina ia faamaonia mai o ia o se perofeta moni. E ono oo mai a o e faitau i le tala a le Perofeta i le Uluai Faaaliga. E mafai ona totoina se molimau i lou agaga a o e faitauina pea lava pea le Tusi a Mamona. E mafai ona oo mai a o e tuuina atu lau lava molimau e uiga i le Perofeta pe a o e tu i le malumalu ma iloaina ua toefuatai mai i le lalolagi le mana o faamauga e ala mai ia Iosefa Samita. O le faatuatua ma le loto faamaoni, o le a faamalosia ai lau molimau i le Perofeta o Iosefa Samita. (Neil L. Andersen, “Iosefa Samita,” Liahona, Nov. 2014, 30)

Gaoioiga Faaopoopo e Aoao Mai Ai

Mataupu Faavae ma Feagaiga 135:4–6. O Le Tusi a Mamona ma le Mataupu Faavae ma Feagaiga

A o faailoa mai e tagata aoga upumoni mai le Mataupu Faavae ma Feagaiga 135:3, atonu o le a latou iloaina o Iosefa Samita na aumaia le Tusi a Mamona, Mataupu Faavae ma Feagaiga, ma isi tusitusiga paia mo lo tatou manuia. Ina ia fesoasoani i tagata aoga ia malamalama atili i le taua o nei tusitusiga paia, valaaulia se tagata aoga e faitau le Mataupu Faavae ma Feagaiga 135:4–5, ma vaavaai po o le a le fuaitau mai le Tusi a Mamona na faitau i ai Ailama Samita a o lei maliu o ia. Fesili i tagata aoga po o a mea na latou mauaina ma valaaulia i latou e faasoa mai pe na faapefea ona aumaia e lenei fuaitau le mafanafana ia Iosefa ma Ailama Samita.

Valaaulia tagata aoga e faitau le Mataupu Faavae ma Feagaiga 135:6, ma vaavaai mo se mafuaaga na aumaia ai le Tusi a Mamona ma le Mataupu Faavae ma Feagaiga. Fesoasoani i tagata aoga e iloa se mea moni pei o loo mulimuli mai: O le Tusi a Mamona ma le Mataupu Faavae ma Feagaiga na aumaia mo le faaolataga o le lalolagi. Mafaufau e fai atu fesili talanoaina e pei o nei:

• O a ni auala e fesoasoani ai nei tusi e aumaia le faaolataga o le lalolagi?

• E tusa ai ma le fuaiupu e 6, o le a le mea e avea ai le Tusi a Mamona ma le Mataupu Faavae ma Feagaiga o nisi o tusi e sili ona taua e te ono onaina?

Fai atu i tagata aoga e mafaufau loloto i le taua o le Tusi a Mamona ma le Mataupu Faavae ma Feagaiga ma pe na faapefea ona faamanuiaina o latou olaga e tusi taitasi. E mafai ona e valaaulia i latou e faasoa mai se fuaitau o mau e sili ona fiafia i ai mai soo se tusi o nei tusi. E mafai foi ona e faaali atu le vitio “Testimony of the Book of Mormon” (4:39) mai ia Elder Jeffrey R. Holland, o le Korama a Aposetolo e Toasefululua.