“Lesona 150—O Paionia i Atunuu Uma: Sauniaina o le Ala mo Isi,” Tusi Lesona a le Faiaoga Seminare o le Mataupu Faavae ma Feagaiga (2025)
‘O Paionia i Atunuu Uma,” Tusi Lesona a le Faiaoga Seminare o le Mataupu Faavae ma Feagaiga
Lesona 150: Mataupu Faavae ma Feagaiga 135–136
O Paionia i Atunuu Uma
Sauniaina o le Ala mo Isi
Mai le 1847 i le 1868, e faitau afe paionia na faaalia le faatuatua tele ia Iesu Keriso a o latou malaga i taavale solofanua po o taavale tosolima e faapotopoto faatasi ma le Au Paia i le Vanu o Sate Leki. I aso nei, o loo faaauau pea e paionia mai le salafa o le lalolagi ona faaalia le faatuatua tele a o latou faapotopoto faatasi ma le Au Paia i soo se mea latou te nonofo ai. O lenei lesona e mafai ona fesoasoani i tagata aoga e lagona ai se manao e avea ma paionia e ala i le saunia o le ala mo isi e mulimuli ai ia Iesu Keriso.
Gaoioiga E Ono Mafai Ona Aoao Ai
O Paionia
Manatua: Atonu e aoga le sailia o faataitaiga o paionia i lau siteki, uarota, po o le atunuu ma saunia e faasoa atu a latou tala o se vaega o le lesona. Afai e mafai, e mafai foi ona e valaaulia i latou e o mai i le vasega ma faailoa atu o latou aafiaga.
Mafaufau e faaali atu le gaoioiga lenei e fesoasoani ai i tagata aoga ia malamalama i le faauigaga o se paionia. Ona mafai lea e tagata aoga ona faasoa a latou matematega i le vasega po o ni vaega toalaiti. E mafai ona e fetuunaia lenei gaoioiga e faaaofia ai paionia o o latou olaga na aafia ai tagata i la outou eria.
Faafetaui tagata ma mea na latou ausia.
|
Tagata |
Mea na Ausia |
|---|---|
Tagata 1. Johnnes Gutenberg | Mea na Ausia A. Uluai peresitene o le Aualofa i Taiuani |
Tagata 2. Elisapeta Jackson | Mea na Ausia E. O le tamaitai muamua na manumalo i se Faailoga Taualoa, na tauaaoina atu mo lana sailiiliga i le leisa |
Tagata 3. Chen Lin Shu-liang | Mea na Ausia I. Fauina le masini lomitusi |
Tagata 4. Edmund Hillary ma Tenzing Norgay | Mea na Ausia O. Muamua ona a’ea le tumutumu o le Mauga o Everesi |
Tagata 5. Marie Curie | Mea na Ausia U. Malaga i taavale tosolima i le Vanu o Sate Leki |
A uma ona taumatemate tamaiti aoga, tuu atu tali sao (1-I, 2-U, 3-A, 4-O, 5-E).
-
O a mea e tutusa ai nei tagata?
Fesoasoani i tagata aoga ia malamalama o se tasi o mea e tutusa ai nei tagata o le, o i latou o ni paionia. E mafai ona faauigaina se paionia o se tagata e muamua atu ma saunia le ala mo isi e mulimuli ai. E mafai foi ona e matamata i le “O A’u o se Paionia” (1:16), o loo maua i le ChurchofJesusChrist.org.
2:3 -
Na faapefea ona saunia e mea na ausia e nei paionia se auala mo isi e mulimuli ai?
O le faataitaiga a Iesu Keriso
Na faasoa mai e Peresitene M. Russell Ballard o le Korama a Aposetolo e Toasefululua le mea lenei e uiga ia Iesu Keriso:
O lo tatou Faaola, o Iesu Keriso, o le uluai paionia lea ua saunia le ala. O le mea moni, o Ia “o le ala” o le faaolataga ina ia ausiaina ina ia mafai ai ona tatou salamo ma; e ala i le faatuatua ia te Ia, e toe foi atu ai i lo tatou Tama Faalelagi. (M. Russell Ballard, “Mulimuli ia Iesu Keriso ma Tulagaaao o le Faatuatua,” Liahona, Nov. 2022, 35)
Ina ia fesoasoani i tagata aoga e faavasega lenei faamatalaga, mafaufau e valaaulia i latou e faailoa mai mau o loo faapupula mai ai auala na avea ai Iesu Keriso ma paionia. Afai latou te manaomia se fesoasoani, e mafai ona e tuuina atu fuaitau nei po o isi o au filifiliga.
Faitau nisi o fuaiupu nei: Ioane 13:15; 14:2–6; 2 Nifae 31:5–12; ma le Mosaea 16:7. Vaavaai mo auala e mafai ona manatu ai ia Iesu Keriso o se paionia.
-
O le a se mea sa e mauaina?
-
O faapefea ona avea gaoioiga a le Faaola e saunia ai se ala mo oe o se faamanuiaga i lou olaga?
Faamatala i le vasega e tele auala e mafai ona faia ai le Faaola o se paionia lea e na o Ia e mafaia ona fai. Peitai, e i ai nisi o auala e mafai ona tatou mulimuli ai i Lana “faataitaiga … [ma] faia e pei ona [sa Ia] faia” (Ioane 13:15) e avea ma paionia mo isi. Valaaulia tagata aoga e tusi le faamatalaga lenei o se ulutala i a latou api faamaumau mo suesuega: “E pei o le Faaola, e mafai ona avea a’u ma paionia e ala i le faaali atu ma le faamaoni i isi le ala e mulimuli ai.”
Mafaufau e faaali atu fesili nei, ma valaaulia tagata aoga e tali atu i ai i lalo o le ulutala o i luga i totonu o a latou api faamaumau mo suesuega:
-
Pe e te lagona ua e tuua se faataitaiga e te manao i isi e mulimuli ai?
-
O le a se mea e te fiafia ai e uiga i le avea o oe ma se paionia? O le a se mea e te popole ai?
-
O le a sou lagona e mafai faapefea ona fesoasoani Iesu Keriso ia te oe e avea ma paionia mo isi?
I le vaega o totoe o lenei lesona, valaaulia le uunaiga a le Agaga Paia e faateleina lou manao e avea ma paionia FaaKeriso mo isi e mulimuli ai.
paionia o taavale tosolima
Valaaulia tagata aoga e faasoa mai mea latou te manatua na aoaoina e uiga i le savaliga i sisifo ma le Mataupu Faavae ma Feagaiga 136. Mafaufau e iloilo le Mataupu Faavae ma Feagaiga 136:6–7 e faapupula ai se tasi o auala na talosagaina ai Uluai Au Paia e malaga atu i sisifo e avea ma ni paionia.
Mafaufau e faaali atu se ata o se taavale toso ma aotele ia faamatalaga nei.
Ina ua mavae le tele o vaega sa malaga atu i le Aai o Sate Leki i taavale toso, sa masani ona tosoina e povi, sa uunaia e Polika Iaga le Au Paia e faaaoga taavale toso. Sa tosoina e paionia lava ia ia taavale tosolima na mafai ai ona taugofie ma vave atu le malaga. E na o le 10 o le silia ma le 350 vaega o kamupani na malaga i taavale tosolima. E ui o le toatele o vaega o taavale toso na malaga e aunoa ma ni faafitauli tetele, ae o afa o le taumalulu i le 1856 na mafua ai ona poloka vaega o taavale tosolima a Willie ma Matini i luga o le ala. E toatele na maumau o latou ola ona o le matelaina ma le vevela tele. O taumafaiga laveai na faia e tagata o le Ekalesia i Iuta na tuuina atu ai sapalai moomia ma fesoasoani ai i tagata malaga e faamaea la latou malaga, ma faasaoina ai le silia ma le 1,200 o soifua (tagai Church History Topics, “Handcart Companies,” ChurchofJesusChrist.org/study/history/topics).
Mafaufau e faasoa atu se tala po o se molimau mai se paionia o taavale tosolima e pei o nei. Valaaulia tagata aoga e vaavaai mo ni auala e mafai ona latou faaaoga ai le faataitaiga a le paionia i o latou olaga.
Na faasoa mai e Elder Quentin L. Cook o le Korama a Aposetolo e Toasefululua le molimau lenei a se paionia taavale tosolima.
Ua faagaeetia lava au e le tala ia Elisapeta Jackson o lana tane o Arona, na maliu ina ua mae’a le toe asaina o le Vaitafe o Palate ma le Vaega o Taavale Tosolima a Matini. Na ia tusia:
“O le a ou le taumafai e faamatala o’u lagona i lo’u oo i le tuua o se fafine ua oti lana tane ma se fanau e toatolu, i lalo o ni tulaga sili ona faigata. … Ou te talitonu … o ou puapuaga mo le Talalelei o le a faapaiaina ai au mo lo’u lelei.…
“Na ou [ole atu] i le Alii, … o Le na folafola mai e fai ma tane i le tina ua oti lana tane, ma se tamā i le fanau ua leai se tamā. Na ou ole atu ia te Ia ma na Ia afio mai i lo’u laveai.”
Na fai mai Elisapeta na ia tusiaina le talafaasolopito e fai ma sui o i latou na uia ia lava tulaga e tasi ma le faamoemoe o le a loto foi i ai tupulaga o le lumanai ina ia puapuagatia ma ositaulagaina mea uma mo le malo o le Atua. (Quentin L. Cook, “E ofoofogia Tamaitai o le AAG!,” Liahona, Me 2011, 18)
-
O le a le mea na molimau atu ai Elisapeta e uiga i le Alii?
-
O le a se mea na ia faamoemoe o le a aoaoina e isi mai lana faataitaiga?
Mafaufau e valaaulia tagata aoga e faailoa mai fuaitau o le atamai i aoaoga faavae po o isi tusitusiga paia o loo faapupula mai ai le ala na mafai ai e Elisapeta ona maua le malosi mai le Faaola. O nisi faataitaiga o le Mataio 11:28–30; Alema 7:11–13; po o le Mataupu Faavae ma Feagaiga 6:36.
Fesili atu pe mafai faapefea e nei mau ona fesoasoani i lo tatou manao e avea ma paionia mo isi.
Faataitaiga o paionia
Faamalamalama atu e le o toe talosagaina le Au Paia e faapotopoto i le Vanu o Sate Leki. Ua valaauliaina i latou e avea ma paionia e ala i le faapotopotoina i siteki o Siona i soo se mea lava latou te nonofo ai ma saunia le ala mo isi e mulimuli ai ia Iesu Keriso. O faataitaiga a paionia i le lalolagi atoa e mafai ona fesoasoani ia i tatou e mulimuli ia Iesu Keriso ma avea ma paionia i soo se mea lava tatou te i ai.
Mo le gaoioiga lenei, tuu atu i tagata aoga le pepa e tufa atu “O Paionia i le lalolagi atoa,” lea o loo i ai tala e fetuunai mai Talafaasolopito o le Lalolagi o loo maua i le ChurchofJesusChrist.org.
I se isi itu, e mafai ona e valaaulia tagata aoga e faitau tala o o latou tuaa FamilySearch.org pe manatunatu ia i latou na latou faailoa maia pe afai latou te faamaeaina le gaoioiga sauniuni a le tagata aoga. E mafai foi ona latou faitau e uiga i paionia i lo latou atunuu o loo maua i Talafaasolopito i le Lalolagi Atoa i le vaega o Talafaasolopito o le Ekalesia o le Gospel Library.
Faamaea le gaoioiga lenei, ma vaavaai pe mafai faapefea e faataitaiga a paionia i le lalolagi atoa ona fesoasoani ia te oe i au taumafaiga e avea ma paionia.
-
Faitau le tala i se paionia se toatasi pe sili atu.
-
Faailoa mai pe na faapefea ona avea i latou ma paionia.
-
Vaavaai mo auala na fesoasoani ai le Tama Faalelagi ma Iesu Keriso ia i latou.
-
Tusi i lau api faamaumau mo suesuega pe mafai faapefea e a latou faataitaiga faaKeriso ona musuia oe e avea ma paionia mo isi.
O Paionia i le Lalolagi atoa
Amerika Samoa
“Ua Fetalai Mai le Atua Ioe”
O Leva‘aia Levao sa ola i faafitauli ogaoga o le soifua maloloina. I le 2015 sa oso ai ni fula i ona mata. Sa faamaloloina puna ina ua uma ona tuuina atu e faifeautalai ia te ia se faamanuiaga faaperisitua. Sa amata ona latou faitauina faatasi ma ia le Tusi a Mamona.
O nisi tagata i le nuu laitiiti o le motu sa le fiafia e vaai ia Levao o mafaufau i se lotu fou. Sa latou tauemu i ana taumafaiga ma ta’ufaatauvaaina o te ia. Ae, sa tumau mausali pea o ia ma e lei umi ae papatisoina. E lei leva ae mulimuli atu lona toalua, o Tui, ma lana fanau e toatolu ia te ia i le faatuatua, ma mulimuli ane auauna atu Levao i lana paranesi o se peresitene o le Aualofa. O isi, sa faatosinaina e ala i lana faataitaiga o le tuuto, na ta’ua o ia o le fatu o le Ekalesia i Olosega.
Korea i Saute
“O Le A Ou Le Toe Maalili Moni Lava”
O Choi Dong Sull o se faifeau Peresipeteriane o le sa lagonaina o lona tiutetauave le puipuia o tagata o lana aulotu mai le O le Ekalesia a Iesu Keriso o le Au Paia o Aso e Gata Ai. Peitai, sa amata ona feiloai o ia ma faifeautalai ma maua le manino i mataupu faaleaoaoga faavae na le toafilemu ai oia. Sa ia iloa o ona talitonuga maumaututu fou o le a manaomia ai se suiga faalegaluega ma lamatia ai lona sootaga ma lona tamā, o le sa avea ma taitaifono o le Ekalesia Peresipeteriane a Korea i lena taimi.
Sa filifili Dong Sull e papatiso i le Vaitafe o Han. “Sa ou manao ia avea lo’u papatisoga o se mea na tupu e pei lava o Iesu Keriso i le mea e mafai ai,” sa ia faamalamalama mai ai. I le taeao puaoa o le aso 5 o Setema, 1981, sa malulu le vai o le Vaitafe o Han, ae ina ua sau o ia i fafo mai le vai, sa faamatala e Dong Sull se mafanafana i totonu. “O lenei ua ou auai i le Ekalesia moni a le Atua,” na ia fai mai ai. “O le a ou le toe maalili moni lava.” E lua vaiaso mulimuli ane, sa papatisoina ai foi lona toalua ma ona atalii e toalua—o le taimi la lea i se falelotu mafanafana. O le auai i le Ekalesia e lei faigofie ai le olaga mo Dong Sull ma lona aiga, ae na mafai ai ona maua ni faamanuiaga fou. “O sauaga ma mafatiaga … ina ua mavae lo’u papatisoga e le mafai ona ou faamatalaina,” o le tala lea a Dong Sull. “Ua tele mea ua matou le maua i le faagasologa [o le auai i le Ekalesia], ae ua tele atu mea ua matou maua nai lo le mea na matou moemiti i ai.”
Côte d’Ivoire
“Faitotoa o le Ola ma le Fiafia”
O Lydie Zebo Bahie o le tamaititi mulimuli o lona aiga sa nofo i le fale ina ua maliliu uma ona matua. O lenei mea na taitai atu ai i le ogaoga o le atuatuvale. O lona tei, o Faet Nadege, na faailoa atu o ia i le O Le Ekalesia a Iesu Keriso o le Au Paia o Aso e Gata Ai.
Ina ua alu o ia i le lotu mo le taimi muamua, sa lagona e Lydie le alofa tele mai tuafafine o faalapotopotoga a le Aualofa ma Tamaitai Talavou. E ui ina sa le toe faitau o ia i le taimi o lona atuatuvale, ae sa mafai ona ia toe taulai atu a o ia suesue i le Tusi a Mamona. Na papatisoina o ia i le aso 18 o Novema, 1995.
E lei leva ona uma lona papatisoga, ae ia maua se avanoa e toe faafoi atu ai le alofa sa faaali atu ia te ia e ala i le auauna atu i faalapotopotoga a le Aualofa ma Tamaitai Talavou. Sa ia auauna atu foi o se faifeautalai a le paranesi, ma valaaulia isi ia iloa le faaaumeaina ma le filemu lava lea e tasi sa ia mauaina talu ai nei. “O nei valaauga uma na faamalosia ai au ma fesoasoani ia te au e alualu ai i luma, i le faaleagaga ma faalemafaufau, “o le tala lea a Lydie.
Na avea Lydie ma se tasi o faifeautalai tamaitai muamua na auauna atu i le Misiona a Ripapelika Temokarasi o Congo Kinshasa.
A uma ona suesue e tagata aoga, tuu ia i latou le avanoa e faasoa mai mea na latou aoaoina.
Valaaulia tagata aoga e tusi mea sa latou aoaoina pe suesueina i le asō e fesoasoani e faateleina ai lo latou manao e avea ma paionia. E mafai foi ona latou tusia auala atonu latou te mananao ai e mulimuli i le faataitaiga a le Faaola ma avea o se paionia mo isi ma pe aisea.