153-р хичээл: Сургаал ба Гэрээ 137–138

Сургаал ба Гэрээ 138, 2-р хэсэг

“Их Эзэний тогтоосон цагт урагш гарч ирэхээр бэлтгэгдсэн”

Ариун сүм

Ерөнхийлөгч Жозэф Ф.Смит сүнсний дэлхийг харсан үзэгдлээрээ Тэнгэрлэг Эцэгийн ёс суртахуунаар өв тэгш хийгээд агуу олон сүнсийг харсан. Тэрээр Их Эзэний ажлыг үнэнчээр гүйцэтгэсэн эртний бошиглогчдыг харсан юм. Мөн тэр ариун сүмүүдийг барьж, нас барагсдын төлөө ёслолуудыг гүйцэтгэхээр хожмын өдрүүдэд төрөх Их Эзэний хадгалан авч үлдсэн бусад хүнийг олж харжээ. Ийм ёслолуудыг ариун сүм, гэр бүлийн түүхийн ажлаар дамжуулан гүйцэтгэх боломжтой. Энэ хичээл нь ариун сүм, гэр бүлийн түүхийн ажилд оролцох сэдлийг төрүүлэхэд суралцагчдад тусална.

Боломжит суралцах үйл ажиллагаа

Миний чухал ажил

Дараах заавар нь Тэнгэрлэг Эцэгийн тэднээр хийлгүүлэх чухал ажлын талаар бодоход суралцагчдад тусална. Эргэцүүлэн бодож, бичих цаг гаргаж өгсний дараа хүссэн суралцагчид хариултаа хуваалцаж болно.

• Амьдралдаа хийж байсан хамгийн чухал зүйлсийн зарим нь …

• Амьдралдаа хийж болох хамгийн чухал зүйлсийн зарим нь …

• Тэнгэрлэг Эцэг … тулд намайг дэлхий рүү энэ цаг үед илгээсэн

Тэнгэрлэг Эцэг, Есүс Христ хоёрын хийж гүйцэтгээсэй гэж хүсэж буй зарим чухал зүйлийг мэдэхийн тулд хувийн гэрчлэл авахыг эрэлхийлэхэд суралцагчдыг урь. Суралцагчид мөн энэ талаар илүү ихийг олж мэдэхийн тулд патриархын адислалаа гэртээ судалж болно.

Цаг хугацааны бүрэн байдалд урагш гарч ирэхийн тулд сонгомол сүнснүүд хадгалагдсан

Ерөнхийлөгч Жозэф Ф.Смитийн сүнсний дэлхийг харсан үзэгдлээс Тэнгэрлэг Эцэгийн төлөвлөгөөний талаар санаж буй зүйлээ хуваалцахад суралцагчдыг урь (Сургаал ба Гэрээ 138:11–60-ыг үзнэ үү).

Сургаал ба Гэрээ 138:38–49, 53-т ерөнхийлөгч Жозэф Ф.Смит ёс суртахуунаар өв тэгш хийгээд олон агуу сүнсийг харсан гэдгийг ойлгоход нь суралцагчдад тусал. Та энэ үзэгдлээр ерөнхийлөгч Смитийн харсан зарим хүнийг нэрлэхэд суралцагчдыг урьж болно.

Сургаал ба Гэрээ 138:53–56-г уншаад, Тэнгэрлэг Эцэг тэдгээр ёс суртахууны хувьд өв тэгш сүнсээр ямар ажлыг гүйцэтгүүлэхээр бэлтгэснийг олж мэд.

• Эдгээр шүлгийн ямар ямар хэллэг танд хамаатай байж болох вэ?

• Та Тэнгэрлэг Эцэгийн танд зориулан бэлтгэсэн ажлын талаар юу сурч мэдэж байна вэ?

• Та эдгээр шүлгийг хэрхэн нэгтгэн үнэний мэдэгдэл болгож болох вэ?

  Суралцагчдыг эдгээр шүлгийг нэгтгэн дүгнэж байх үеэр тэдэнд дараахтай адил үнэнийг тодорхойлоход тусал. Тэнгэрлэг Эцэг хүүхдүүдийнхээ авралын төлөө Их Эзэний усан үзмийн талбайд хөдөлмөрлөх сонгомол сүнснүүдийг хадгалсан.

• Бид Тэнгэрлэг Эцэгт хүүхдүүдээ аврахад нь туслахын тулд Их Эзэний усан үзмийн талбайд ямар ямар арга замаар хөдөлмөрлөж болох вэ?

Хэрэв суралцагчид арга замуудыг хэлэхгүй бол та тэднийг анхаарлыг 54-р шүлэг рүү хандуулж болно. Бид нас барагсдад зориулсан ариун сүмийн ёслолуудад оролцох замаар Их Эзэний усан үзмийн талбайд хөдөлмөрлөж болно гэдгийг олж харахад тэдэнд тусал. Хөшигний нөгөө талд байгаа хүмүүст зориулан ариун сүмийн ёслолуудыг гүйцэтгэх нь Израилыг цуглуулахад туслах нэг арга зам гэдгийг та суралцагчдад сануулж болох юм.

Сургаал ба Гэрээ 138:53–56 тэдэнд хамаатай гэдгийг олж мэдэхэд дараах мэдэгдэл суралцагчдад тусална. Суралцагчид судрын шүлгүүд болон мэдэгдлийн хооронд холбоос үүсгэх замаар Gospel Library дээр холбоос үүсгэх дадлага хийж болно.

Ерөнхийлөгч Рассэлл М.Нэлсон ийн гэрчилсэн.

Ерөнхийлөгч Рассэлл М.Нэлсон

Энэ гараг дэлхий дээр амьдарч байсан бүх хүн дотроос гагцхүү бид энэхүү эцсийн бөгөөд агуу цугларалтын үйл явдалд оролцож байгаа нь юутай их сэтгэл хөдлөм гээч!

Тэнгэрлэг Эцэг маань Өөрийн ёс суртахуунаар өв тэгш олон сүнсээ буюу хамгийн шилдэг багаа энэхүү сүүлчийн үед зориулан бэлтгэсэн. Тэдгээр нэр төртэй суутан, шилдэг тоглогч, баатрууд бол та нар! (Рассэлл М.Нэлсон, Вэнди В.Нэлсон, “Израилын найдвар” [өсвөр үеийнхэнд зориулсан дэлхий даяарх онцгой цугларалт, 2018 оны 6-р сарын 3], ChurchofJesusChrist.org)

Дараах асуултууд нь гэр бүлийн түүх, ариун сүмийн ажилд оролцох талаарх өөрсдийн одоогийн бодол санаагаа үнэлэхэд суралцагчдад тусална. Тэдэнд эргэцүүлэн бодох хангалттай цаг өгсний дараа хүсвэл суралцагчид төрсөн бодол, мэдрэмжээ хуваалцаж болно.

• Их Эзэн гэр бүлийн түүх, ариун сүмийн ажлаар дамжуулан Израилыг цуглуулахаар таныг бэлтгэсэн гэдгийг мэдэх танд ямар санагдаж байна вэ?

• Танд гэр бүлийн түүх, ариун сүмийн ажилд оролцох хүсэл байна уу? Та яагаад ийм мэдрэмжтэй байна вэ?

“Сургаал ба Гэрээ 127–128, 2-р хэсэг” хичээлийн үеэр ариун сүм, гэр бүлийн түүхийн ажилд оролцоход суралцагчдыг уриалсан. Хийсэн зүйлсээ мөн Их Эзэн хэрхэн тэднийг адисалсан талаар хуваалцахад суралцагчдыг урьж болно.

Ариун сүм, гэр бүлийн түүхийн ажлаар дамжуулан Израилыг цуглуулахад туслахаар хадгалагдсан

Суралцах үйл явцдаа хариуцлагатай хандахад нь суралцагчдад туслах нэг арга замыг доор өгөв.

Ариун сүм, гэр бүлийн түүхийн ажилд оролцох сэдлийг хүмүүст төрүүлэхийн тулд хуваалцаж болох захиасыг зохиоход тэднийг урь. Энэ нь товхимол, сошиал медиа нийтлэл, видео мессеж эсвэл өөр төрлийн урилга байж болно. Ямар захиас зохиохоо сонгох боломжийг суралцагчдад олгоорой.

“Ариун сүм, гэр бүлийн түүхийн ажлаар дамжуулан Израилыг цуглуулахад туслахаар хадгалагдсан” гэсэн гарчигтай тараах материал дээрх материал нь захиастаа юуг багтаах санааг суралцагчдад өгнө. Захиасыг зохиохынхоо өмнө уг материалыг судлахад суралцагчдыг урь. Суралцагчид өөрийн сонголтоор бие даан эсвэл жижиг бүлгээр суралцаж болно.

Ариун сүм, гэр бүлийн түүхийн ажлаар дамжуулан Израилыг цуглуулахад туслахаар хадгалагдсан

1. Сургаал ба Гэрээ 138:57–59-ийг уншаад, сүнсний дэлхий дэх тэдгээр сүнсийг хэрхэн аврахыг олж мэд.

2. Тэргүүн Зөвлөлийн Ерөнхийлөгч Хэнри Б.Айрингийн дараах үгсийг унш. Аврагч ариун сүм, гэр бүлийн түүхийн ажилд оролцдог хүмүүсийн талаар юу гэж боддогийг олж мэд.

Ерөнхийлөгч Хэнри Б.Айринг

Аврагчтай уулзахдаа Түүний талаар бод. Та Түүнтэй ярилцана. Тэр таны болон Тэнгэрлэг Эцэгийн бүх сүнсэн хүүхдийн гэм нүглийн төлөөсийг төлсөн. Тэр бол Иохава бөгөөд Елиаг илгээсэн билээ. Түүнд төгс хайраар лацдан холбож, адислах санваарын хүчийг өгсөн. Түүнчлэн Тэр танд итгэн, энэ амьдралдаа сайн мэдээг сонсож, өөрт тань өгөгдсөн үнэлж баршгүй боломж байгаагүй өвөг дээдэстээ уг боломжийг олгох аз завшааныг тосон авах боломжийг өгсөн. Өвөг дээдсийнхээ нэрийг олж мэдэхийн тулд хийсэн ажил, итгэл үнэмшлээрээ төлөөсөө төлдөг мөн тэднийг болон Түүнийг хайрладаг учраас Бурханы бүх бэлгийн хамгийн агуу нь болох мөнх амьдралыг гэр бүлдээ өгдөг хүмүүст Тэрээр хэрхэн талархдаг талаар бодож үзээрэй. Тэр тэдэнд хязгааргүй золиослолыг өгсөн. Тэрээр өвөг дээдэстээ Түүний өгсөн мөнх амьдралыг сонгох боломжийг олгохын тулд бүхий төлөөсийг төлсөн тэр хүмүүсийг хайрлаж, талархах болно. (Henry B. Eyring, “Hearts Bound Together,” Liahona, May 2005, 78–79)

3. Гэр бүлийн түүх, ариун сүмийн ажилд оролцох нь Есүс Христийн үлгэр жишээг дагахад хэрхэн танд тусална гэж та бодож байна вэ?

4. Хуваалцахыг хүсэж байгаа хувийн туршлага, судар эсвэл Сүмийн удирдагчдын мэдэгдэл танд байна уу?

Ерөнхийлөгч Айрингийн мэдэгдлийн видеог үзэх нь суралцагчдад тустай бол та ChurchofJesusChrist.org дээрх “Hearts Bound Together” видеог цагийн код 10:21-ээс 11:29 хүртэл үзүүлж болно.

Хэрэв гэр бүлийн түүх, ариун сүмийн ажилд оролцсоноор авах амлагдсан адислалын талаар мэдэх нь суралцагчдад үүнд оролцох хүслийг төрүүлнэ өгнө гэж бодож байвал та дараах видеонуудын аль нэгийг эсвэл хоёуланг нь үзүүлж болно. Үүнд: “The Promised Blessings of Temple and Family History Work” (3:26) ба “The Promised Blessings of Temple and Family History Work 2” (4:04).

Та мөн гэр бүлийн түүхийн ажилд туслахын тулд Их Эзэн ариун сүмд болон технологид нэвтрэхэд бидэнд хэрхэн илүү их боломж олгож буй талаар ярилцаж болох юм. “Нэмэлт эх сурвалж” дээр энэ талаар заадаг мэдэгдлүүд бий.

• “Hearts Bound Together”

• “The Promised Blessings of Temple and Family History Work”

• “The Promised Blessings of Temple and Family History Work 2”

Ариун сүм, гэр бүлийн түүхийн ажилд оролцох хүсэл

Ариун сүм, гэр бүлийн түүхийн ажилд оролцох хүслийг хүмүүст төрүүлэхийн тулд суралцагчдад захиас зохиож, хуваалцах цаг гаргаж өг. Захиасаа гэртээ хуваалцахад суралцагчдыг уриал.

Дараах асуултууд нь ариун сүм, гэр бүлийн түүхийн ажилд оролцох өөрсдийн хүслийн талаар эргэцүүлэн бодоход суралцагчдад тусална. Суралцагчид тэмдэглэлдээ асуултуудад хариулах нь заалгахын тулд Ариун Сүнсийг урих нэг арга зам юм. Хүсвэл хариултаа ангийнхантай хуваалцахад суралцагчдыг урь.

• Сургаал ба Гэрээ 138-ыг судалж байхдаа олж мэдэн, мэдэрсэн зүйлс тань хэрхэн ариун сүм, гэр бүлийн түүхийн ажилд оролцох хүсэлд тань нөлөөлсөн бэ?

• Ариун сүм, гэр бүлийн түүхийн ажилд оролцох нь яагаад таны хийх хамгийн чухал ажлуудын нэг байж болох вэ?

Нэмэлт эх сурвалж

Гэр бүлийн түүх, ариун сүмийн ажлыг гүйцэтгэхэд туслах юуг их Эзэн бидэнд өгсөн бэ?

Арван хоёр төлөөлөгчийн чуулгын ахлагч Квинтин Л.Күк ийн заасан.

Ахлагч Квинтин Л.Күк

Ариун сүмийн тоо олширч, технологийн дэвшил гарсан нь өвөг дээдсийнхээ төлөө гэр бүлийн түүхийн ажлыг хийх хариуцлагаа биелүүлснээр энэ үеийг бүх түүхэн дэх хамгийн адислагдсан цаг үе болгож байна. Өсвөр үеийнхэн маань индексжүүлэх болон өвөг дээдсээ олох, мөн цаашлаад ариун сүмд баптисм болон гишүүнээр батлах ёслолуудыг хийх ер бусын итгэлтэй байгаад би их баярлаж байна. Та нар бол жинхэнэ утгаараа бошиглолд гарсан Сион уулан дээрх аврагчид юм. (Квинтин Л.Күк, “Өөрийгөө ариун сүмд байгаагаар хар,” 2016 оны 4-р сарын Ерөнхий чуулган, 83–87)

Арван хоёр төлөөлөгчийн чуулгын ахлагч Нийл Л.Андэрсэн ийн заасан.

Ахлагч Нийл Л.Андэрсэн

Их Эзэн та нарын үеийнхнийг өөр ямар ч үеийнхнээс илүү, ариун сүмд орох боломжоор хангасан билээ.

Та нар ариун сүмд цагаан хувцас өмсөн, баптисм хүртэхээр хүлээж үзсэн үү? Танд ямар санагдсан бэ? Ариун сүмд ариун зүйлүүдийн талаар хүчирхэг мэдрэмж төрдөг. Аврагчийн амар амгалан дэлхийн хуйларч буй хар салхийг ялан дийлдэг.

Та нарын ариун сүмд мэдэрдэг тэрхүү мэдрэмж нь та нарын амьдралдаа мэдрэхийг хүсдэг загвар юм.

Та нараас өмнө амьдарч байсан өвөө, эмээгээ болон холын хамаатнуудаа олж мэд. Тэдний нэрийг ариун сүмд авч ор. (Нийл Л.Андэрсэн, “Сүнслэг шуурганууд,” 2014 оны 4-р сарын Ерөнхий чуулган, 32–36)

Бидний өвөг дээдэс ариун сүм, гэр бүлийн түүхийн ажлын талаар ямар бодолтой байсан бол?

Ерөнхийлөгч Бригам Янг (1801–1877) ийн заасан.

Ерөнхийлөгч Бригам Янг

Нас барагсдын дундаас эцгүүд маань ярьдаг байсан бол юу гэж хэлэх байсан гэж та бодож байна вэ? Тэд: “Бид эндхийн шоронгийн байшинд хэдэн мянган жилийн туршид энэ эрин үеийг ирэхийг хүлээж байлаа” гэж хэлэхгүй гэж үү? … Тэд чихэнд маань юу гэж шивнэх байсан бол? Учир нь бид оролцож буй ажлынхаа ач холбогдлыг ухаарч чадсан бол хэрэв тэд хүч чадалтайсан бол тэнгэрийн аянгын дуугаар бидний чихэнд ярих байсан. Тэнгэр дэх бүх тэнгэр элч энэхүү хэдхэн хүн рүү хараад, хүмүүний гэр бүлийн авралын төлөө тэднийг зоригжуулж байна. (Teachings of Presidents of the Church: Brigham Young [1997], 309)

Нэмэлт суралцах үйл ажиллагаа

Ерөнхийлөгч Баллард “Leadership Session at RootsTech 2017: Elder M. Russell Ballard” видеоны цагийн код 0:00-ээс 5:58 хүртэл Их Эзэн хэрхэн ариун сүм, гэр бүлийн түүхийн ажилд оролцдог хүмүүст тусалдгийг харуулсан өвөг дээдсийнхээ туршлагаас хуваалцжээ.

Видео

Ерөнхийлөгч Хэнри Б. Айринг өөрийн хэлсэн “Hearts Bound Together” гэх үгэндээ ерөнхийлөгч Смитийн харсан үзэгдэл, бидний өвөг дээдэст сайн мэдээг номлох номлогчдын талаар ярьсан. Хэрэв та хичээлийн үеэр тус видеоны хэсгээс үзүүлэх бол цагийн код 7:11-ээс 11:29 хүртэлх хэсгийг оруулна уу.

Сургаал ба Гэрээ 138:53–56. Түлхүүр үг хэллэгийг ойлгохын тулд холбогдох эшлэлүүдийг ашиглах

Энэ санаа нь судруудыг ойлгохын тулд зүүлт тайлбар, холбогдох эшлэлүүдийг ашиглан дадлага хийхэд суралцагчдад тусална. Та самбарт Сургаал ба Гэрээ 138:53–56 дээрх дараах үг хэллэгийг дагалдах холбогдох эшлэлийнх нь хамт бичиж болно. Тухайн холбогдох эшлэл дээр заасан сургаал нь судрын үг хэллэгийн утга санааг хэрхэн баяжуулж байгааг хуваалцахад суралцагчдыг урь. Суралцагчид эдгээр судрыг холбогдох эшлэл болгон нэмж эсвэл судартайгаа холбож болно. Та мөн эдгээр шүлгийн аль нэг нь зүүлт тайлбарт багтсан эсэхийг харахад суралцагчдыг урьж болох юм. Тэд мөн зүүлт тайлбар дээр жагсаасан бусад шүлгийг харж болно.

• “Цаг хугацааны бүрэн байдал” (Сургаал ба Гэрээ 138:53)—Ефес 1:10; Сургаал ба Гэрээ 128:18

• “Хожмын үеийн агуу их ажлын суурийг тавих” (Сургаал ба Гэрээ 138:53)—Сургаал ба Гэрээ 64:33

• “Эхлэлд сонгогдсон, ёс суртахуунаар өв тэгш хийгээд агуу хүмүүс” (Сургаал ба гэрээ 138:55)—Абрахам 3:22–23

• “Их Эзэний тогтоосон цагт урагш гарч ирэхээр бэлтгэгдсэн” (Сургаал ба Гэрээ 138:56)—Үйлс 17:26

Сургаал ба Гэрээ 138:56. “Их Эзэний тогтоосон цагт урагш гарч ирэхээр бэлтгэгдсэн”

Та Аврагчийг “Их Эзэний тогтоосон цагт урагш гарч ирэхэд [суралцагчдыг] бэлтгэсэн” (Сургаал ба Гэрээ 138:56) арга замуудыг олж мэдэх замаар Түүн дээр төвлөрөхөд тэдэнд тусалж болно. Та “тэд төрөхөөсөө өмнө” хэрхэн сургагдаж, бэлтгэгдсэн талаар ярилцаж болох юм. Та мөн өвөг дээдсээ олж, тэдний төлөө ариун сүмийн ёслолуудыг хийж гүйцэтгэх тэнгэрлэг үүрэг даалгавраа биелүүлэхэд туслах юуг Их Эзэн бидэнд өгснийг жагсаан бичихэд суралцагчдыг урьж болно. Та суралцагчдын жагсаалтад туслахын тулд “Нэмэлт эх сурвалж” дээрх ахлагч Квинтин Л.Күк, Нийл Л.Андэрсэн хоёрын мэдэгдлүүдийг ашиглаж болно. Ариун сүм, гэр бүлийн түүхийн ажилд оролцох нь хэрхэн Тэнгэрлэг Эцэг, Есүс Христ хоёртой харилцах харилцаанд нь нөлөөлж болох талаар ярилцаарай.

Ариун сүм, гэр бүлийн түүхийн ажлаар дамжуулан Израилыг цуглуулахад туслахаар хадгалагдсан