Lēsoni 154: Ko e Ngaahi Tefito ʻo e Tuí mo e Fanongonongo Fakamafaiʻi 1 mo e 2

Ko e Ngaahi Tefito ʻo e Tui

Ko Hono Ako e Ngaahi Moʻoni Tefito ʻo e Ongoongolelei ʻa e Fakamoʻuí

ʻI he ʻaho 1 ʻo Māʻasi 1842, naʻe tali ʻe he Palōfita ko Siosefa Sāmitá ha kole mei he ʻētita nusipepa ko Sione Ueniuefí ke ʻoange ha fakamatala fekauʻaki mo e hisitōlia mo e ngaahi tui ʻa e Siasí. Naʻe kau ʻi he tali ʻa Siosefá ʻene fakahā ha ngaahi tefitoʻi moʻoni mahuʻinga ʻe 13 ʻo e ongoongoleleí ʻoku ʻiloa he taimí ni ko e Ngaahi Tefito ʻo e Tuí. ʻE lava ke tokoni e lēsoni ko ʻení ke fakaloloto e mahino ʻa e kau akó ki he tokāteline ʻa e Fakamoʻuí ʻaki hono ako e ngaahi moʻoni ʻoku ʻi he Ngaahi Tefito ʻo e Tuí.

Ngaahi ʻEkitivitī Ako ʻOku Ala Fakahokó

Ko hono fakamatalaʻi ʻetau ngaahi tuí

Fakakaukau ke kamata ʻa e kalasí ʻaki ʻa e tūkunga ko ʻení.

Fakakaukauloto ʻoku ʻi ai haʻo kaungāmeʻa ʻokú ne fie ʻilo lahi ange ki he meʻa ʻoku tui ki ai e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku fuʻu fie ʻilo ho kaungāmeʻá ka ʻoku toe pē ha ngaahi miniti siʻi ke fanongo ai kimuʻa pea toki ʻalu ki he kalasí.

• Ko e hā te ke fiemaʻu ke mahino ki ho kaungāmeʻá fekauʻaki mo Sīsū Kalaisi mo ʻEne ongoongoleleí?

  Te ke lava ʻo ʻoange ha miniti ʻe tolu ki he kau akó ke hiki ʻenau ngaahi talí ʻi heʻenau tohinoa akó. Ka ʻikai, te nau lava ʻo aleaʻi ʻa e meʻa te nau vahevahe ko ha kalasí pe fakatātaaʻi ʻa e tūkungá mo hanau hoa.

• Ko e hā ha ngaahi maʻuʻanga tokoni te ke lava ʻo vahevahe mo ho kaungāmeʻá ke tokoni ke ne ako lahi ange fekauʻaki mo e Fakamoʻuí mo ʻEne ongoongoleleí?

Kapau ʻe fiemaʻu, fakamahinoʻi ange ko e maʻuʻanga tokoni ʻe taha ko e Ngaahi Tefito ʻo e Tuí. Fakapapauʻi ʻoku lava ke maʻu ʻe he kau akó ʻa e Ngaahi Tefito ʻo e Tuí ʻi heʻenau folofolá. Te ke lava ʻo ʻoange ha ngaahi miniti siʻi ke vakaiʻi ai e tuʻunga ʻo ʻenau maheni mo e Ngaahi Tefito ʻo e Tuí. Hangē ko ʻení, te ke lava ʻo ʻeke ki he kau akó pe kuo nau ʻosi ako maʻuloto ha tefitoʻi tui ʻe taha pe fakaʻaongaʻi ha niʻihi lolotonga hono akoʻi ha lēsoni, faʻu ha lea, pe vahevahe e ongoongolelei ʻa e Fakamoʻuí mo e niʻihi kehé.

Ko e Ngaahi Tefito ʻo e Tui

Ke tokoni ke ʻilo ʻe he kau akó ʻa e founga ʻoku tau maʻu ai ʻa e Ngaahi Tefito ʻo e Tuí, fakakaukau ke vahevahe mo e kau akó ʻa e vitiō “The Articles of Faith” (4:43), ʻoku maʻu ʻi he ChurchofJesusChrist.org. Te ke lava foki ʻo fakamatalaʻi fakanounou ʻa e fakamatala puipuituʻa ko ʻení:

ʻI he 1842, naʻe tali ai ʻe Siosefa Sāmita ha tohi naʻá ne maʻu meia Sione Ueniuefi, ʻa ia naʻe nofo ʻi Sikākou, ʻIlinoisi. Ko Ueniuefí ko e ʻētita ia ʻo ha nusipepa naʻe ui ko e Chicago Democrat pea naʻá ne loto ke ʻilo lahi ange ki he ngaahi tui mo e hisitōlia ʻo e Kāingalotu naʻe nofo ʻi Nāvū, ʻIlinoisí. Naʻe vahevahe ʻe Siosefa ʻi ha ngaahi konga ʻo e tohí ha ngaahi fakaikiiki fekauʻaki mo hono fokotuʻu mo e taumuʻa ʻo e Siasi ʻo e Fakamoʻuí. Naʻe fakaʻosi ʻe he Palōfitá ʻa e tohí ʻaki ha fakamatala nounou ʻe 13 ʻo e ngaahi tefitoʻi moʻoni mo ha tokāteline ʻo e Siasí. Naʻe ui ʻa e ngaahi fakamatala ko ʻení kimui ange ko e Ngaahi Tefito ʻo e Tuí pea naʻe pulusi ia ʻi he 1851 ʻi he pulusinga ʻuluaki ʻo e Mataʻitofe Mahuʻingá.

Naʻe vahevahe ʻe ʻEletā L. Tom Perry (1922–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni fekauʻaki mo e founga ʻe lava ke tokoniʻi ai kitautolu ʻe hono ako e Ngaahi Tefito ʻo e Tuí.

ʻOku ou poupouʻi atu kiate kimoutolu ke mou fakaʻaongaʻi hoʻomou ʻiló ke ako ʻa e Ngaahi Tefito ʻo e Tuí pea mo e ngaahi tokāteline ʻoku nau akoʻí. ʻOku nau fuʻu mahuʻinga lahi pea ko e fakamatala nounou taha ia ʻo e tokāteline ʻi he Siasí. Kapau te ke fakaʻaongaʻi kinautolu ko ha fakahinohino ke tataki koe ʻi hoʻo ako ʻa e ongoongolelei ʻo Sīsū Kalaisí, te ke ʻilo ai hoʻo mateuteu ke fakahā hoʻo fakamoʻoni ki hono toe fakafoki mai ʻo e moʻoní ki he māmaní. Te ke malava ai ke malangaʻi ʻi ha ngaahi founga faingofua, hangatonu mo loloto ʻa e tui ʻa ia ʻoku mahuʻinga kiate koe hoʻo hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. (L. Tom Perry, “Ko e Ngaahi Tokāteline mo e Ngaahi Tefitoʻi Moʻoni ʻoku Maʻu ʻi he Ngaahi Tefito ʻo e Tuí,” Liahona, Nōvema 2013, 48)

• Ko e hā naʻá ke ako mei he fakamatala ko ʻení fekauʻaki mo e mahuʻinga ʻo hono ako mo ʻiloʻi e Ngaahi Tefito ʻo e Tuí?

Fakakaukau ke fai hoʻo fakamoʻoní ki ha faʻahinga tāpuaki pē kuó ke fakatokangaʻi mei hono ako ʻo e Ngaahi Tefito ʻo e Tuí pea mo hono fakaʻaongaʻi kinautolu ke talaki ʻaki e ongoongolelei ʻa e Fakamoʻuí.

Ko hono ako e ongoongolelei ʻo Sīsū Kalaisí ʻaki e Ngaahi Tefito ʻo e Tuí

Ko e fakakaukau ko ʻení ko ha founga ia ʻe taha ke tokoniʻi ai e kau akó ke nau maʻu ha aʻusia mahuʻingamālie ʻi he Ngaahi Tefito ʻo e Tuí. Fakakaukau ke tufa ʻa e laʻipepa tufa “ʻEkitivitī Ako ʻo e Ngaahi Tefito ʻo e Tuí.” ʻOange ha taimi ki he kau akó ke nau fakakakato e ngaahi ʻekitivitī ʻi he laʻipepa tufá. Poupouʻi kinautolu ke nau tokanga ki he ngaahi ueʻi pe fakakaukau fakalaumālie ʻoku nau maʻu mei he Laumālie Māʻoniʻoní ʻi heʻenau akó. Mahalo te ke fie fakapapauʻi ʻe nofotaha ha niʻihi ʻo e kau akó ʻi he ʻuluaki tefito ʻo e tui ʻe faá, ʻa ia ʻoku akoʻi ai ha ngaahi moʻoni mahuʻinga fekauʻaki mo e Tamai Hēvaní, Sīsū Kalaisi, mo ʻEna tokāteliné.

ʻAi ke ke ʻatā ke tokoni ki he kau akó, kae fakaafeʻi kinautolu ke fakaʻaongaʻi e ngaahi taukei fakaako kuo nau ako ʻi ʻapi, lotú, mo e seminelí ke fakakakato e ngaahi ʻekitivitií. Kapau ʻe ʻosiki vave ʻa e ʻekitivitií ʻe he kau akó, fakaafeʻi kinautolu ke fili ha tefito kehe ʻo e tuí pea toe fakahoko pē ia.

ʻEkitivitī Ako ʻo e Ngaahi Tefito ʻo e Tuí

Sitepu 1: Fili ha taha ʻo e Ngaahi Tefito ʻo e Tuí ʻokú ke fie ako he ʻahó ni pea tali e ongo fehuʻi ko ʻení:

• Ko e hā ha moʻoni pe ngaahi moʻoni taʻengata ʻokú ke ako mei he tefito ʻo e tui ko ʻení?

• ʻE lava fēfē ʻe he ngaahi akonaki mei he tefito ʻo e tui ko ʻení ʻo tokonia ho vā fetuʻutaki mo e Tamai Hēvaní mo Sīsū Kalaisí?

Sitepu 2: Fili ha meʻa ʻe ua pe lahi ange mei he ngaahi meʻa ko ʻení ke tokoni atu ke ke ako lahi ange ai fekauʻaki mo e tefito ʻo e tui kuó ke filí:

1. Ako Maʻulotó. Fakakaukau ki ha foʻi fakakaukau ke tokoni atu ke ke ako maʻuloto hoʻo tefito ʻo e tuí pea tuku ha taimi ke ako maʻuloto ia.

2. Kumi ha ngaahi maʻuʻanga tokoni fekauʻaki. Kumi ha ngaahi potufolofola pe fakamatala mei he kau taki ʻo e Siasí ʻoku fekauʻaki mo e tefito ʻo e tui naʻá ke filí. Te ke lava ʻo fakaʻaongaʻi ha ngaahi meʻangāue hangē ko e ngaahi futinouti ʻi hoʻo folofolá, ko e Fakahinohino ki he Ngaahi Folofolá, pe ko e tafaʻaki fekumi ʻi he Gospel Library app ke tokoniʻi koe.

3. Faʻu ha fakaʻaliʻali fakatātā. Fakaʻaongaʻi e ʻātí ke tokoni atu ke fakafetuʻutaki pe fakafofongaʻi e ngaahi akonaki mei he tefito ʻo e tui kuó ke filí. ʻE lava ke kau ʻi he ngaahi sīpingá ha tā fakatātā, ʻū tā kuo fakatahatahaʻi, ʻū lea, pe meme. (Koeʻuhí ko e natula toputapu ʻo e ʻOtuá, fakaʻehiʻehi mei hono tā fakatātaaʻi ʻo e Toluʻi ʻOtuá.)

4. Faʻu ha tūkunga. Fakakaukau ki ha ngaahi tūkunga ʻokú ke fehangahangai mo ia pe ko ha toʻu tupu kehe, pe ngaahi fehuʻi ʻi he ongoongoleleí ʻe lava ke tokoni ki ai hoʻo tefito ʻo e tuí. Hiki ʻa e tūkungá pe ngaahi fehuʻí pea fakamatalaʻi e founga pe ʻuhinga ʻe tokoni ai ʻa e ngaahi moʻoni ʻoku akoʻi ʻi he tefito ʻo e tuí.

5. Fakamoʻoni. Hiki hoʻo fakamoʻoni ki he ngaahi moʻoni ʻoku akoʻi ʻi hoʻo tefito ʻo e tuí. Fakamatalaʻi e founga kuo faitāpuekina ai ʻe he ngaahi akonaki ko ʻení hoʻo moʻuí mo ʻomi koe ke ke ofi ange ki he ʻOtuá.

Vahevahe ʻa e meʻa naʻá ke akó

Fakakaukau ki ha ngaahi founga ke tokoniʻi ai ʻa e kau akó ke nau vahevahe mo fakamatalaʻi ʻa e meʻa kuo nau akó. Te ke lava ʻo hiki ʻa e fika 1–13 ʻi ha fanga kiʻi laʻipepa iiki ʻe 13 pea faʻo kinautolu ʻi ha tatā. Fili ha laʻipepa ʻe taha ki tuʻa pea ʻeke ki he kau akó pe ʻoku ʻi ai ha taha ako naʻá ne ako ʻa e tefito ʻo e tui ko iá ʻe loto-fiemālie ke vahevahe. Ki ha kalasi ʻoku tokolahi angé, fakakaukau ke fokotuʻutuʻu e kau akó ke tauhoa pe fakakulupu iiki pea fakaafeʻi kinautolu ke nau fevahevaheʻaki.

Hili e vahevahé, ʻe lava ke fakaʻaliʻali ʻe he kau akó ʻenau laʻipepá ʻi he lokí ke mamata ki ai e niʻihi kehé.

Ngaahi Maʻuʻanga Tokoni Kehé

Ko e fē te u ako lahi ange ai fekauʻaki mo e tohi Ueniuefí pea mo e Ngaahi Tefito ʻo e Tuí?

ʻI he 1851, naʻe fakakau ʻa e Ngaahi Tefito ʻo e Tuí ʻi he pulusinga ʻuluaki ʻo e Mataʻitofe Mahuʻingá, naʻe pulusi ʻi he Misiona Pilitānia ʻa e Siasí. Naʻá na hoko ko ha tokāteline fakaʻofisiale ʻa e Siasí hili hono toe vakaiʻi ʻo e Mataʻitofe Mahuʻingá ʻi he 1878 pea fakamafaiʻi lolotonga e konifelenisi lahi ʻa e Siasí ʻi ʻOkatopa 1880. ʻE lava ke tokoni ʻa e ngaahi maʻuʻanga tokoni ko ʻení.

Ke maʻu e fakamatala kakato ʻo e tohi naʻe fai ʻe Siosefa Sāmitá, vakai, “The Wentworth Letter,” Ensign, July 2002, 26–32, pe ko e uepisaiti Joseph Smith Papers.

Ke ʻilo lahi ange fekauʻaki mo e Ngaahi Tefito ʻo e Tuí, ako ʻa e lea mo e fakamatala mei he konifelenisi ko ʻení:

• L. Tom Perry, “Ko e Ngaahi Tokāteline mo e Ngaahi Tefitoʻi Moʻoni ʻoku Maʻu ʻi he Ngaahi Tefito ʻo e Tuí” (Liahona, Nōvema 2013, 46–48)

• John W. Welch, “The Articles of Faith and the Life of Joseph Smith” (Engsign, Tīsema 2013, 69–75)

ʻE tokoniʻi fēfē au ʻe he Ngaahi Tefito ʻo e Tuí ke u vahevahe ʻa e ongoongoleleí mo e niʻihi kehé?

Naʻe akonaki ʻa Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e hā pē ha meʻa te ke fili ke fakaʻaongaʻi ke vahevahe ki ho ngaahi kaungāmeʻá mo ho ngaahi mahení fekauʻaki mo e Siasí, tohiʻi hifo ia, vakaiʻi pe ʻoku tonu, pea ʻai ke mahinongofua mo nounou.

ʻOku ʻomi ʻe he fakautuutu ʻo e tupu ʻa e Siasí mo e lahi ʻo e ngaahi fakaʻekeʻeke mei he niʻihi kehé ha ngaahi faingamālie lahi ke langa ha ngaahi hala fakakavakava, fakakaungāmeʻa, pea ʻoatu ha fakamatala totonu. Ka ʻe toe lava foki ke ne ʻomi ha fetaʻemahinoʻaki lahi ange pea aʻu he taimi ʻe niʻihi ki ha loto-tāufehiʻa, ʻo kapau te tau fakaʻatā e niʻihi kehé ke nau fakamatalaʻi hotau tuʻungá mo e meʻa ʻoku tau tui ki aí kae ʻikai ke tau fakahaaʻi tonu ia. …

ʻOku ou fakatauange ʻe feinga ʻa kinautolu ʻoku siʻi ʻenau ʻilo fekauʻaki mo e Siasí ke ako lahi ange fekauʻaki mo kitautolu. …

ʻI hoʻo hoko ko e kāingalotú, te ke lava ʻo tokoni ke hoko ʻeni ʻaki haʻo ala atu ʻo vahevahe mo e niʻihi kehé ʻa e tefitoʻi fakamatala ʻoku maʻu ʻi he Ngaahi Tefito ʻo e Tuí. (M. Russell Ballard, “Faith, Family, Facts, and Fruits,” Liahona, Nov. 2007, 27)

ʻE tāpuekina fēfē ʻeku moʻuí ʻe he ako mo moʻui ʻaki e ngaahi moʻoni mo e ngaahi tefitoʻi moʻoni ʻi he tefito ʻo e tui hono hongofulu mā tolú?

Naʻe pehē Palesiteni Kōtoni B. Hingikelī (1910–2008) fekauʻaki mo e tefito ʻo e tui hono hongofulu mā tolú:

Ko e tefito ʻo ʻetau tui fakalotu [ko ʻení] ko e taha ia ʻo e ngaahi founga ʻo hono fakahaaʻi ʻo ʻetau tui fakalotú. ʻOku totonu ke tau toutou fakakaukau ki ai. Pea ʻi he taimi kotoa pē ʻe ʻahiʻahiʻi ai kitautolu ke tau fai ha faʻahinga meʻa ʻoku kovi pe taʻefaitotonu pe angaʻulí, ʻe hū ki heʻetau fakakaukaú ha faʻahinga mālohi lahi peheni, ko ha fakamatala kānokato ʻo e tuʻunga totonu ʻo hotau ʻulungāngá. (Gordon B. Hinckley, “Fear Not to Do Good,” Liahona, Feb. 2000, 5; Ensign, Sānuali 2000, 2)

Ngaahi ʻEkitivitī Fakalahi ki he Akó

Ko e tefito ʻo e tui hono hongofulu mā tolú

Ke tokoni ke ako ʻe he kau akó ha niʻihi ʻo e ngaahi ʻulungaanga faka-Kalaisi ʻoku hiki ʻi he tefito ʻo e tui hono hongofulu mā tolú, fakakaukau ke hiki ʻa e ngaahi foʻi lea ko ʻení ʻi he palakipoé ʻo ʻikai ha fakahokohoko pau:

Faitotonu, Angatonu, Sino Maʻa, Angalelei, Anga-māʻoniʻoni, Tui, ʻAmanaki Lelei, Tuʻu Maʻu (“lava ʻo kātakiʻi ʻa e meʻa kotoa pē”).

Fehuʻi ki he kau akó pe ʻoku nau ʻiloʻi ko e tefito ʻo e tui fē ʻoku lave ki he ngaahi tuʻunga moʻui mo e ngaahi ʻulungaanga ko ʻení. Fakakaukau ke lau maʻuloto fakataha ʻa e tefito ʻo e tui hono hongofulu mā tolú. Te ke lava ʻo fakamahinoʻi ange ʻoku maʻu e “naʻinaʻi ʻa Paulá” mei he Filipai 4:8 ʻi he Fuakava Foʻoú.

Vahevahe e kau akó ki ha fanga kiʻi kulupu iiki pea vahe ki he kulupu takitaha ha taha ʻo e ngaahi fehuʻi ʻi he palakipoé ke nau ako. Poupouʻi e kulupu takitaha ke nau kumi ʻa e ʻuhinga ʻo e foʻi lea naʻe vahe angé pea kumi ha toe ngaahi potufolofola pe fakamatala ʻa e kau taki ʻo e Siasí ʻoku akoʻi lahi ange ai e foʻi leá. ʻE lava foki ke maʻu ʻe he kau akó ha sīpinga mei he moʻui ʻa e Fakamoʻuí ʻa ia naʻá Ne fakafōtunga ai ʻa e tuʻunga moʻuí pe ʻulungāngá. Fakaafeʻi ʻa e kau akó ke vahevahe ʻa e meʻa naʻa nau akó. Fakakaukau ke ʻeke ha ngaahi fehuʻi hangē ko ʻení:

• ʻE tokoniʻi fēfē koe ʻe hono moʻui ʻaki e ngaahi tuʻunga moʻui mo e ngaahi ʻulungaanga ʻi he tefito ʻo e tui ko ʻení ke ke hoko ko ha tokotaha muimui lelei ange ʻo Sīsū Kalaisi?

• ʻE tokoni fēfē hoʻo fai lelei ki he niʻihi kehé mo fekumi ki he ngaahi meʻa ʻoku māʻoniʻoni mo feʻunga mo hono vīkivikiʻí ke ke fakaʻehiʻehi ai mei he angahalá mo e ʻahiʻahí?

Hili e tali mo e vahevahe ʻe he kau akó ʻenau ngaahi fakakaukaú, vahevahe ʻa e lea ʻa Palesiteni Hingikelī ʻi he konga “Ngaahi Maʻuʻanga Tokoni Kehé.”

Ko e Fuka ʻo e Moʻoní

ʻOku faʻa ui he taimi ʻe niʻihi ha konga mahuʻinga ʻe taha ʻo e ngaahi tohi ʻa Siosefa Sāmita ʻi he tohi Ueniuefí ko e “Ko e Fuka ʻo e Moʻoní.” Fakakaukau ke fakaafeʻi e kau akó ke ako e fakamatala ko ʻení, ʻo kumi ha ngaahi foʻi lea pe kupuʻi lea ʻoku ʻuhingamālie kiate kinautolu.

Kuo ʻosi fokotuʻu ʻa e Fuka ʻo e Moʻoní; he ʻikai ha nima taʻe maʻa te ne lava ʻo taʻofi ʻa e ngāué mei heʻene laka atú; ʻe taulōfuʻu ʻa e fakatangá, kau fakataha ʻa e kau fakatangá, fakatahataha mo e ngaahi kongakaú, fakangalikovi mo e kau manukí, ka ko e moʻoni ʻa e ʻOtuá ʻe kei laka taʻe ufi atu pē, ʻi he fakaʻeiʻeiki mo e tauʻatāina, kae ʻoua kuo hū atu ki he konitinēniti kotoa pē, aʻu ki he faʻahinga kotoa pē, ʻuʻufi ʻa e fonua kotoa, pea mo ongona ʻi he telinga kotoa; kae ʻoua kuo fakahoko ʻa e ngaahi taumuʻa ʻa e ʻOtuá, pea folofola ʻa Sihova Māfimafi kuo lava ʻa e ngāué. (“The Wentworth Letter,” Ensign, July 2002, 31)

Aleaʻi e meʻa naʻe ako ʻe he kau akó mei he fakamatala ko ʻení ʻaki haʻo fai ange ha ngaahi fehuʻi hangē ko ʻení:

• Ko e hā naʻe mahuʻinga kiate koe mei he fakamatala ko ʻení?

• ʻOkú ke vakai fēfē ki hono fakahoko e ngaahi lea ʻa e Palōfita ko Siosefa Sāmitá ʻi hotau kuongá?

Ko ha founga ʻe taha ke tokoniʻi ai e kau akó ke manatuʻi e fakamatala ko ʻení ko hono ʻoange kiate kinautolu ha faingamālie ke faʻu ha fakatātā ʻokú ne fakafofongaʻi e meʻa ʻoku akoʻi ʻi he fakamatala ko ʻení. Hangē ko ʻení, ʻe lava ke fakakaukau e kau akó ki ha ngaahi founga makehe ke fakatātaaʻi ʻaki e mafola e moʻoni ʻa e ʻOtuá ʻi he funga ʻo e māmaní. ʻE lava ke vahevahe ʻe he kau akó ʻenau ngaahi fakatātaá mo e niʻihi kehé pea fakamatalaʻi e ʻuhinga ne nau fakakau ai e meʻa ne nau faí.