Lēsoni 156: Ko e Ngaahi Tefito ʻo e Tuí mo e Fanongonongo Fakamafaiʻi 1 mo e 2

Fanongonongo Fakamafaiʻi 2

Fakahā Kau ki he Lakanga Fakataulaʻeikí

ʻI he mafola ʻa e ongoongoleleí ʻi he funga ʻo e māmaní lolotonga e senituli uofulú, naʻe lotua ʻe he kau taki ʻo e Siasí ha fakahinohino fekauʻaki mo ha tuʻutuʻuni naʻá ne taʻofi ʻa e kāingalotu hakoʻi ʻAfilika ʻo e Siasí mei hono maʻu ʻo e lakanga fakataulaʻeikí. Naʻe fili ha Kāingalotu tokolahi ke ngāue ʻaki ʻenau tui kia Sīsū Kalaisí ʻi heʻenau fehangahangai mo e ngaahi fehuʻi fekauʻaki mo e tuʻutuʻuní. ʻI he ʻaho 8 ʻo Sune 1978, naʻe fanongonongo ai ʻe he Kau Palesitenisī ʻUluakí ha fakahā naʻá ne toʻo ʻa e ngaahi fakangatangata ko ʻení. ʻE lava ke tokoni ʻa e lēsoni ko ʻení ke ngāue ʻa e kau akó ʻi he tui ʻi he taimi ʻoku nau fehangahangai ai mo ha ngaahi tūkunga taʻepau pe ngaahi fehuʻi fakalaumālie.

Ngaahi ʻEkitivitī Ako ʻOku Ala Fakahokó

Ngaahi sīpinga ʻo e tuí

Fakakaukau ke kamata e lēsoní ʻaki hano fakaafeʻi e kau akó ke fakakaukau ki ha kakai ʻoku nau ʻilo naʻa nau ngāue ʻaki ha tui lahi kia Sīsū Kalaisi ʻi ha tūkunga faingataʻa. Fakamatalaʻi ange leva naʻe fehangahangai ʻa ʻEletā Helevēsio Mātini (1930–2005) ʻo e Kau Fitungofulú mo hono uaifi ko Lutá, mo ha tūkunga naʻe fiemaʻu ai ha tui lahi. ʻE lava ke ke lau pe lau ʻe ha tokotaha ako ʻa e palakalafi ko ʻení ki he kalasí.

ʻI ʻEpeleli 1972, naʻe ʻaʻahi ai ha kau faifekau mei Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki he fale nofo totongi ʻo Helevēsio mo Luta Mātini ʻo Lio ti Senelo, Palāsilá. Naʻe vave hono maʻu ʻe he fāmili Mātiní ha fakamoʻoni ki he moʻoni ʻo e pōpoaki ʻa e kau faifekaú. Naʻa nau ako foki fekauʻaki mo ha tuʻutuʻuni ʻa e Siasí naʻá ne taʻofi ʻa e kakai tangata ʻUliʻuli hakoʻi ʻAfiliká mei hono fakanofo ki he lakanga fakataulaʻeikí. Naʻe ʻi ai ha ngaahi fehuʻi ʻa Helevēsio mo Luta, ʻa ia naʻá na hakoʻi ʻAfilika, maʻá e kau faifekaú (vakai, “Elder Helvécio Martins of the Seventy,” Ensign, May 1990, 106; Mark Grover, The Autobiography of Elder Helvécio Martins [1994], 43).

• Ko e hā ha ngaahi fehuʻi naʻá ke mei fai ki he kau faifekaú kapau naʻá ke ʻi he tūkunga ko ʻení?

• Ko e hā ha niʻihi ʻo e ngaahi founga ʻe lava ke tali ʻaki ʻe ha taha ha tūkunga peheni?

Fakaafeʻi e kau akó ke fakakaukau ki ha ngaahi tūkunga taʻepau ʻoku nau fehangahangai mo ia pe kuo nau aʻusia ʻi he kuohilí. ʻE lava ke kau heni ha ngaahi fehuʻi fakalaumālie ʻoku teʻeki tali ʻoku nau lolotonga maʻu. ʻE lava ke nau tohi fekauʻaki mo honau ngaahi tūkungá pe fehuʻí ʻi heʻenau tohinoa akó. Poupouʻi e kau akó ke nau tokanga ki he ngaahi akonaki pe ngaahi ueʻi ʻa e Laumālié ʻe lava ʻo tokoni kiate kinautolu ʻi honau ngaahi tūkungá.

Ngāue ʻi he tui

Ke tokoni ke ʻilo ʻe he kau akó ʻa e founga naʻe tali ʻaki ʻe he fāmili Mātiní ʻa e tūkunga ko ʻení, fakakaukau ke fakaafeʻi ha tokotaha ako ke lau leʻolahi ʻa e ngaahi palakalafi ko ʻení ki he kalasí:

Hili e ʻilo ʻa e fāmili Mātiní fekauʻaki mo e fakangatangata ʻo e lakanga fakataulaʻeikí, naʻa nau fili ke ngāue ʻi he tui. Naʻe ʻikai fuoloa kuo nau papitaiso mo ngāue faivelenga ʻi he Siasí ʻi ha ngaahi taʻu lahi. Naʻe manatu ʻa ʻEletā Mātini kimui ange ʻo pehē, “‘Naʻa mau maʻu ʻa e moʻoní, pea naʻe ʻikai ha meʻa te ne taʻofi kimautolu mei hono moʻui ʻaki iá.”

Naʻe fakahā ʻe he Siasí ʻi he 1975 ʻe langa ha temipale ʻi Sao Paulo, Palāsila. ʻOku manatu ʻa ʻEletā Mātini ʻo pehē, “Neongo naʻe ʻikai ke mau hanganaki atu ke hū ki ai, ka naʻa mau ngāue ki hono langa ʻo e temipalé ʻo hangē pē ko e kāingalotu kehé. ‘Neongo kotoa ia, ko e fale ia ʻo e ʻEikí.’ Naʻe fakatau atu ʻe Sisitā Mātini ʻene siuelí ke tokoni ki he tānaki paʻangá, pea naʻe ngāue ʻa Brother Mātini ʻi he kōmiti pulusí” (ʻi he “Elder Helvécio Martins of the Seventy,” Ensign, May 1990,106).

• Ko e hā ha meʻa ʻoku makehe kiate koe fekauʻaki mo e tali ʻa e fāmili Mātiní?

• ʻOkú ke pehē ko e hā e ʻuhinga ne nau fili ai ke ngāue ʻi he tuí ʻi he tūkunga ko ʻení?

Kapau ʻe fiemaʻu, fakamahinoʻi ange naʻe nofotaha ʻa e fāmili Mātiní ʻi he moʻoni naʻe fakahā ange ʻe he ʻOtuá kiate kinautolu ʻo fakafou ʻi he Laumālie Māʻoniʻoní kae ʻikai tuku ʻenau tokangá ki he meʻa naʻe ʻikai ke nau ʻiló.

Fakakaukau ke fakaafeʻi e kau akó ke nau hiki ha lisi ʻo e ngaahi moʻoni ʻoku nau ʻilo fekauʻaki mo e Tamai Hēvaní, Sīsū Kalaisi, pea mo e ongoongoleleí ʻa ia ʻe lava ʻo tokoni ke nau laka ki muʻa ʻi he tui ʻi he taimi ʻoku nau fehangahangai ai mo ha ngaahi fehuʻi pe ngaahi tūkunga taʻepau. Fakaafeʻi leva kinautolu ke vahevahe e meʻa ne nau hikí mo fakamatalaʻi e founga ʻe lava ke tokoniʻi ai kinautolu ʻe he ngaahi moʻoni ko iá ke nau laka atu ki muʻa ʻi he tuí.

Fanongonongo Fakamafaiʻi 2

Ke tokoni ke mahino ki he kau akó ʻa e ngaahi tūkunga fekauʻaki mo e fakangatangata ʻo e lakanga fakataulaʻeikí pea mo e fakahā naʻá ne toʻo e fakangatangatá, fakaafeʻi kinautolu ke kumi ʻa e talateu ki he Fanongonongo Fakamafaiʻi 2 ʻi heʻenau folofolá. Kapau ʻe fiemaʻu, ʻoange ha tatau ʻo e talateú ki he kau ako ʻoku nau maʻu ha tatau motuʻa ange ʻo e folofolá.

Lau ʻa e talateu ki he Fanongonongo Fakamafaiʻi 2, ʻo kumi ha puipuituʻa ʻoku fekauʻaki mo e fanongonongo ko ʻení.

• ʻOkú ke pehē ko e hā e meʻa ʻoku mahuʻinga ke mahino fekauʻaki mo e palakalafi ko ʻení?

Fakamatalaʻi ange ʻoku fakafofongaʻi ʻe he laine ʻoku pehē, “ʻOku ʻikai ʻomi ʻe he ngaahi lekooti ʻo e Siasí ha ʻilo mahino ki he tupuʻanga ʻo e founga ko ʻení” ʻa e tuʻunga fakaʻofisiale ʻo e Siasí ʻi he fakangatangata ʻo e lakanga fakataulaʻeikí. ʻOku mahuʻinga ke ʻoua naʻa tau fakamahamahalo ki he ʻuhinga naʻe fokotuʻu ai ʻa e fakangatangatá.

Te ke lava foki ʻo fakamahinoʻi ange ʻa e konga folofola ki he 2 Nīfai 26:33 ʻi he sētesi ʻuluaki ʻo e talateú. Fakakaukau ke fakaafeʻi e kau akó ke lau ʻa e veesi ko ʻení pea vahevahe ʻa e ngaahi moʻoni ʻe mahuʻinga ke manatuʻi ʻi he taimi ʻoku nau fakakaukau ai ki he tuʻutuʻuni ko ʻení.

ʻOku ʻi he Fanongonongo Fakamafaiʻi 2 ʻa e fanongonongo fakaʻofisiale ʻo e fakahā naʻe maʻu ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻi he ʻaho 1 ʻo Sune 1978.

Fakakaukau ke fakaafeʻi e kau akó ke nau ako ia mo ha kiʻi kulupu tokosiʻi, kae ʻoua ʻe ako fakakalasi ʻa e Fanongonongo Fakamafaiʻi 2. Kapau ʻe lava, te nau lava ʻo fakaʻaongaʻi ʻa e ngaahi maʻuʻanga tokoni meihe “The Long-Promised Day” (Liahona, Sune 2018, 34–37) ke tokoni ke mahino lelei ange kiate kinautolu ha niʻihi ʻo e ngaahi fakamatala naʻe fai ʻi he Fanongonongo Fakamafaiʻi 2.

Lau ʻa e palakalafi ʻe fā ʻi lalo ʻi he kupuʻi lea “Siʻomau Ngaahi Tokoua” ʻi he Fanongonongo Fakamafaiʻi 2. Fakakaukau ke fakaʻilongaʻi ha ngaahi foʻi lea mo ha ngaahi kupuʻi lea ʻokú ke ongoʻi ʻoku mahuʻinga.

• Ko e hā e meʻa naʻe makehe kiate koe mei he meʻa naʻá ke laú?

• Ko e hā e meʻa ʻoku tokoniʻi ʻe he aʻusia ko ʻení ke mahino kiate koe fekauʻaki mo e Tamai Hēvaní mo Sīsū Kalaisí?

Mālohi ʻo e fakahaá

Naʻe fakatupu ʻe he fakahā ko ʻení ha fuʻu liliu lahi ʻi he houʻeiki tangata mo fafine ʻi he funga māmaní. ʻI he hili pē hono maʻú, naʻe ʻave ha kau faifekau ki ʻAfilika. Naʻe ʻosi langa ha ngaahi temipale ʻi he konitinēniti ko iá, pea kuo maʻu ʻe ha kakai hako ʻAfilika ʻe laukilu ʻi he funga ʻo e māmaní ha ngaahi ouau ʻo e ongoongoleleí maʻanautolu mo ʻenau ngaahi kui kuo pekiá.

Fakamatalaʻi ange naʻe kau ʻiate kinautolu naʻe ʻaonga ki ai ʻa e fakahaá ʻa Helevēsio mo Luta Mātini. Fakakaukau ke fakaafeʻi ha tokotaha ako ke lau leʻolahi e ngaahi palakalafi ko ʻení ki he kalasí:

Hili e ʻilo ʻa Helevēsio ki he fakahā ʻa ia naʻá ne foaki ʻa e lakanga fakataulaʻeikí ki he kakai tangata moʻui taau kotoa peé, naʻá ne manatu ʻo pehē:

“Naʻe ʻikai ke u lava ʻo mapukepuke e ngaahi meʻa naʻá ku ongoʻí. Naʻá ku ʻalu mo Lata ki homa loki mohé, ʻo tūʻulutui, pea lotu. Naʻá ma tangi ʻi heʻema fakamālō ki heʻetau Tamai ʻi Hēvaní koeʻuhí ko ha meʻa ne hoko naʻá ma fakaʻānaua pē ki ai. Kuo hokosia moʻoni mai ʻa e ʻahó, pea ʻi heʻema moʻui fakamatelié” (The Autobiography of Elder Helvécio Martins [1994], 69–70).

Hili pē ha taimi nounou mei he fakahā ʻo e 1978, naʻe silaʻi leva e fāmili Mātiní ʻi he temipalé. Naʻe hoko ʻa Helevēsio Mātini ko ha taki lakanga fakataulaʻeiki fakalotofonua pea faifai pē pea ui ia ke hoko ko ha mēmipa ʻo e Kōlomu hono Ua ʻo e Kau Fitungofulú (vakai, “Elder Helvécio Martins of the Seventy,” 106).

• Naʻe mei kehe fēfē nai ʻa e ngaahi meʻá ki he fāmili Mātiní kapau naʻe ʻikai ke nau fili ke ngāue ʻaki ʻa e tui kia Sīsū Kalaisí?

• Ko e hā e meʻa naʻá ke ako mei he sīpinga ʻa e fāmili Mātiní ʻe lava ʻo tokoni atu ʻi hoʻo ngaahi tūkunga taʻepaú pe ngaahi fehuʻi ʻoku ʻikai talí?

  Fakakaukau ke hiki ʻa e moʻoni ko ʻení ʻi he palakipoé ko ha konga ʻo hoʻomou fealēleaʻakí: ʻI he taimi ʻoku tau ngāue ai ʻi he tui lolotonga e ngaahi tūkunga taʻepaú, ʻoku tau teuteuʻi ai kitautolu ke maʻu e ngaahi tāpuaki ʻa e ʻEikí.

• Ko e hā ha ngaahi founga te ke lava ai ʻo ngāue ʻi he tui ʻi he taimi ʻokú ke fehangahangai ai mo ha ngaahi tūkunga taʻepau pe ngaahi fehuʻi fakalaumālie?

  ʻO ka fiemaʻu, ʻe lava ke maʻu ʻe he kau akó ha ngaahi fakakaukau ʻi he palakalafi 5–7 ʻi he konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2023).

• Kuo tāpuekina fēfē koe ʻe he ʻEikí pe ko e kakai ʻokú ke ʻiló koeʻuhí ko hoʻo ngāue ʻi he tuí?

Fakakaukau ke vahevahe ha aʻusia mei hoʻo moʻuí. Te ke lava foki ʻo huluʻi ʻa e foʻi vitiō “Struggling with the History of Race and the Priesthood” (4:04), ʻoku maʻu ʻi he ChurchofJesusChrist.org.

ʻIkai ngata aí, te ke lava ʻo fakaafeʻi e kau akó ke nau fekumi ki ha ngaahi sīpinga mei he folofolá ʻoku nau fakahaaʻi hono tāpuakiʻi ʻe he ʻEikí ʻa e kakai naʻa nau ngāue ʻi he tuí. ʻOku kau ʻi he ngaahi sīpingá ʻa e uitou ʻi Salifatí (1 Ngaahi Tuʻi 17:8–24); Fāmili ʻo Līhaí (1 Nīfai 2:2–5; 17:1–3); mo e Palōfita ko Siosefa Sāmita (Siosefa Sāmita—Hisitōlia 1:8–17).

Faʻu ha palani

Fakamanatu ki he kau akó ʻa e tūkunga pe fehuʻi mei heʻenau moʻuí ne nau fakakaukau ki ai ʻi he kamataʻanga ʻo e lēsoní. Fakaafeʻi leva kinautolu ke nau tali e ongo fehuʻi ko ʻení ʻi heʻenau tohinoa akó:

• Ko e hā ha meʻa kuó ke ako pe ongoʻi he ʻahó ni ʻe lava ʻo tokoni atu ʻi hoʻo ngaahi tūkunga taʻepaú pe ngaahi fehuʻi fakalaumālié?

• Ko e hā ha meʻa pau te ke fai ke ngāue ʻaki ai e tui kia Sīsū Kalaisí ʻi he ngaahi tūkunga ko ʻení?

Ngaahi Maʻuʻanga Tokoni Kehé

Ko e fē te u lava ʻo ako lahi ange ai fekauʻaki mo e fakangatangata ʻo e lakanga fakataulaʻeikí mo e fakahā naʻe ʻomi ʻi he Fanongonongo Fakamafaiʻi 2?

Vakai ki he ngaahi maʻuʻanga tokoni ko ʻení:

• “Fakaaʻu e Ngaahi Tāpuaki ʻo e Lakanga Fakataulaʻeikí” (Liahona, Sune 2018)

• “Lakanga Fakataulaʻeikí mo e Fakangatangata Fakatemipalé” (Ngaahi Tefito ʻi he Hisitōlia ʻo e Siasí)

• “Race and the Priesthood” (Gospel Topics Essays)

• “Ngaahi Fakahā ʻi he Faʻahitaʻu Māfana ʻo e 1978” (ʻĒsei Fakataautaha meia ʻEletā ʻĀmeti Kōpiti ʻo e Kau Fitungofulú)

Naʻe fekumi fēfē ʻa e kau taki ʻo e Siasí ki he fakahinohino ʻa e ʻEikí kimuʻa pea nau toki maʻu ʻa e fakahā ko ʻení?

Naʻe manatu ʻa Palesiteni Sipenisā W. Kimipolo (1895–1985), ko e Palesiteni ʻo e Siasí ʻi he taimi naʻe maʻu ai ʻa e fakahaá ʻo pehē:

Naʻá ku ʻiloʻi ʻoku ʻi ai ha meʻa mātuʻaki mahuʻinga ki he fānau tokolahi ʻa e ʻOtuá ʻoku hanga mei muʻa. … Naʻá ku ʻalu toko taha pē ʻi he ʻaho ki he ʻaho ki he loki ʻi ʻolunga ʻi he temipalé ʻi he loto-māluʻia mo fakamātoato ʻo u ʻohake ai hoku lotó ki he ʻEikí mo u fakahā ange te u fai hoku tūkuingatá ke fakahoko ʻa e polokalamá. Naʻá ku fiemaʻu ke u fai Hono finangaló. Naʻá ku fakahā ʻeni kiate Ia peá u pehē ange, “ʻE ʻEiki, ko hoku lotó ke u fai pē ʻa ia ʻoku totonú. … ʻOku mau fie maʻu pē ʻa e meʻa ko ia ʻokú Ke finangalo ki aí, pea ʻoku mau fie maʻu ke hoko ia ʻi Ho taimi pē ʻOʻoú kae ʻoua naʻa kimuʻa ai.” …

Naʻe fakamahinoʻi ʻe he ʻEikí kiate au ʻa e meʻa naʻe totonu ke fakahokó. (Ngaahi Akonaki ʻa e Kau Palesiteni ʻo e Siasí: Sipenisā W. Kimipolo [2006],292–93)

Naʻe fēfē nai ki he kau taki ʻo e Siasí ʻa ia naʻa nau aʻusia ʻa e fakahā ko ʻení?

Naʻe fakamoʻoni ʻa Palesiteni Kōtoni B. Hingikelī (1910–2008), ʻa ia naʻe hoko ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he taimi ko ia naʻe maʻu ai e fakahaá, ki he ongo naʻá ne maʻu ʻi he temipalé he ʻaho ko iá:

Naʻa mau kau fakataha ʻo lotu ʻi he ngaahi tūkunga toputapu tahá. Ko Palesiteni Kimipolo pē naʻá ne fai ʻa e lotú. … Ne ʻi ai ha ongo molumalu mo māʻoniʻoni ʻi he lokí. Ne u ongoʻi ne fakaava mai ha matapā mei he taloni ʻo e langí ʻi he tūʻulutui ʻa e palōfita ʻa e ʻOtuá mo hono ngaahi Tokouá ʻo fai ʻenau tāutapá. Ne ʻi ai e Laumālie ʻo e ʻOtuá. Ne hoko mai ki he palōfita ko iá ha fakapapauʻi ʻi he mālohi ʻo e Laumālie Māʻoniʻoní ʻoku tonu e meʻa naʻá ne lotuá. …

Ne mau ʻiloʻi kotoa kuo hokosia e taimi ke fai ai ha liliú pea ko e tuʻutuʻuni ia kuo ʻomi mei he langí. Ne mahino e talí. Ne ʻi ai ha faaitaha haohaoa ʻiate kimautolu ʻi he aʻusia mo e mahino ne mau maʻú. (Gordon B. Hinckley, “Priesthood Restoration,” Ensign, Oct. 1988, 69–70)

Ngaahi ʻEkitivitī Fakalahi ki he Akó

Ngaahi Vitioó

Fakakaukau ke fakaʻaongaʻi ha vitiō ʻe taha pe lahi ange mei heni lolotonga e ngaahi konga ʻo e lēsoní. ʻE lava ke tokoni ʻa e ngaahi vitiō ko ʻení ki he kau akó ke nau vakai ki ha ngaahi sīpinga ʻo e Kāingalotu faivelengá, kimuʻa pea ʻi he hili ʻa e fakahā naʻá ne toʻo ʻa e ngaahi fakangatangata ʻo e lakanga fakataulaʻeikí.

• “Long-Promised Day” (8:41). ʻOku ʻasi ʻi he foʻi vitiō ko ʻení ʻa e Kāingalotu ʻi Kana naʻa nau tatali fuoloa ke maʻu ʻa e lakanga fakataulaʻeikí.

• “Be One—A Celebration of the Revelation on the Priesthood” mei he taimi 1:06:55 ki he 1:09:14. Ko e fakamatala ʻa ha kāingalotu ʻuliʻuli ki he anga hono tāpuekina ʻe he lakanga fakataulaʻeikí ʻenau moʻuí.

• “A New Day” (2:24). Ko e vahevahe ʻe he Kāingalotu ʻuliʻuli ʻo e Siasí ʻenau ngaahi tali ki he fakahā ʻi he 1978.

Fakamatalaʻi e ʻekitivitií

Mahalo ʻe aʻusia ʻe he kau akó ha ngaahi taimi ʻi heʻenau moʻuí ʻe kole ange ai ke nau fakamatalaʻi ʻa e ʻuhinga naʻe fokotuʻu ai ha ngaahi fakangatangata ki he lakanga fakataulaʻeikí. Fakakaukau ke tuku ke nau akoako fakahoko ʻeni ʻi he kalasí. Kimuʻa pea nau akoako fakamatalá, mahalo ʻe tokoni ke fakamanatu ange ʻoku ʻikai ke tau ʻiloʻi ʻa e ngaahi ʻuhinga naʻe fokotuʻu ai ʻa e tuʻutuʻuni ko ʻení (vakai, Talateu ki he Fanongonongo Fakamafaiʻi 2).

Fakaafeʻi leva ʻa e kau akó ke tali ʻa e ongo fehuʻi ko ʻení. ʻE lava ke akoako ʻe he kau akó mo hanau hoa pe ʻi ha kiʻi kulupu tokosiʻi hono tali kinautolú.

• Kapau ʻe fehuʻi atu ʻe ha taha pe ko e hā e ʻuhinga naʻe fokotuʻu ai ʻa e ngaahi fakangatangata ki he lakanga fakataulaʻeikí mo e temipalé, ko e hā ha ngaahi moʻoni ʻokú ke ongoʻi ʻe mahuʻinga taha ke tokoni ke mahino kiate kinautolú? Ko e hā hono ʻuhingá?

Hili e akoako fakamatala ʻa e kau akó, kole ange ke nau vahevahe ʻa e ngaahi moʻoni naʻa nau tokanga taha ki aí. Kapau ʻe fiemaʻu, fakamamafaʻi ange ʻoku tau ʻiloʻi ʻoku ʻofa ʻa e ʻOtuá ki Heʻene fānaú kotoa mo fakaafeʻi ʻa e kakai kotoa pē ke haʻu kiate Ia (vakai, 2 Nīfai 26:33). ʻOku tau ʻiloʻi foki ʻoku fekumi mo maʻu ʻe he kau palōfitá ʻa e fakahinohino ʻa e ʻEikí ʻi hono tataki Hono Siasí.

Sīpinga ʻo e ngāue ʻi he tuí

Fakakaukau ke vahevahe ʻa e lea ko ʻeni meia Palesiteni Tāleni H. ʻOakesi ʻo e Kau Palesitenisī ʻUluakí. Fakaafeʻi e kau akó ke kumi e founga naʻá ne fehangahangai ai mo e ngaahi fehuʻi naʻá ne maʻu ʻi he taimi naʻe fokotuʻu ai e fakangatangata ʻo e lakanga fakataulaʻeikí.

Naʻá ku siofia e mamahi mo e puputuʻu ne maʻu ʻe ha niʻihi ne nau faingataʻaʻia ʻi he ngaahi fakangatangatá mo kinautolu ne nau … fekumi ki ha ngaahi ʻuhingá. Naʻá ku ako e ngaahi ʻuhinga naʻe ʻomi ʻi he taimi ko iá pea ne ʻikai ke u ongoʻi ha fakapapau fekauʻaki mo e moʻoni ʻo hanau taha. Naʻe kau ʻi heʻeku ako ʻi he faʻa lotú, ʻa ʻeku ʻilo, ʻoku tātātaha ke ʻomi ʻe he ʻEikí ha ngaahi ʻuhinga ki he ngaahi fekau mo e fakahinohino ʻokú Ne ʻomi ki Heʻene kau tamaioʻeikí. Naʻá ku fakapapau ai ke u līʻoa ki hotau kau taki fakapalōfitá mo lotu—ʻo hangē ko ia ne talaʻofa talu mei he kamata ʻo e ngaahi fakangatangata ko ʻení—[ʻe] hoko mai ʻa e ʻaho ʻe lava ke maʻu ai ʻe he taha kotoa pē ʻa e ngaahi tāpuaki ʻo e lakanga fakataulaʻeikí mo e temipalé. (“President Oaks Remarks at Worldwide Priesthood Celebration,” newsroom.ChurchofJesusChrist.org)

• Ko e hā e meʻa naʻá ke ako mei he tali ʻa Palesiteni ʻOakesí ʻa ia ʻe lava ʻo tokoni atu ʻi he taimi ʻoku ʻi ai ai haʻo ngaahi fehuʻi fekauʻaki mo ha tokāteline pe tuʻutuʻuni ʻa e Siasí?

• ʻOkú ke pehē ko e hā e ʻuhinga ʻoku mahuʻinga ai ke tau mateakiʻi hotau kau taki fakaepalōfitá ʻi heʻetau tatali ki ha tali ki heʻetau ngaahi fehuʻí?

Ko hono fili ʻo e tuí kae ʻikai ko e veiveiuá

Fakakaukau ke fakaʻaliʻali ʻa e “Doubt Not, but Be Believing” mei he taimi 15:26 ki he 20:28. ʻI he foʻi vitiō ko ʻení, ʻoku fakamatalaʻi ai ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá mo Sisitā Lute L. Lenilani ha ngaahi sīpinga ʻo ha ongo meʻa naʻe kehe ʻena tali ki heʻena ngaahi fehuʻi ʻi he ongoongoleleí, ko e taha ʻi he loto-veiveiua pea ko e tahá ʻi he tui. Hili hono huluʻi e vitioó, fakaafeʻi e kau akó ke vahevahe ha ngaahi akonaki pe fakakaukau naʻe makehe kiate kinautolu.