“Lēsoni 155—Fanongonongo Fakamafaiʻi 1: ʻNaʻe Fakahā Mai ʻe he ʻEikí Kiate Au ʻi he Mata Meʻa-Hā-Mai mo e Fakahā,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Fanongonongo Fakamafaiʻi 1,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 155: Ko e Ngaahi Tefito ʻo e Tuí mo e Fanongonongo Fakamafaiʻi 1 mo e 2
Fanongonongo Fakamafaiʻi 1
“Naʻe Fakahā Mai ʻe he ʻEikí Kiate Au ʻi he Mata Meʻa-Hā-Mai mo e Fakahā”
ʻI ha taʻu nai ʻe 50, naʻe fakahoko e mali tokolahí ʻe ha kāingalotu ʻe niʻihi ʻo e Siasí ko e tali ki ha fekau mei he ʻEikí. ʻI he 1890, naʻe fekauʻi ʻe he ʻEikí ʻa Palesiteni Uilifooti Utalafi (1807–98) ke fanongonongo ʻa e ngataʻanga ʻo e mali tokolahi ʻi he Siasí. ʻE lava ke tokoni ʻa e lēsoni ko ʻení ke mahino ki he kau akó ʻoku tataki ʻe he ʻEikí ʻa Hono Siasí ʻo fakafou ʻi he hokohoko atu ʻo e ngaahi fakahaá ki Heʻene kau palōfitá.
Ngaahi ʻEkitivitī Ako ʻOku Ala Fakahokó
ʻOku nofotaha ʻa e lēsoni ko ʻení ʻi he fekau ʻa e ʻEikí ki he Kāingalotú ke taʻofi hono fakahoko ʻo e mali tokolahí. Kimuʻa pea akoʻi e lēsoni ko ʻení, mahalo ʻe tokoni ke toe vakaiʻi e ngaahi maʻuʻanga tokoni mei he lēsoni “Tokāteline mo e Ngaahi Fuakava 132:1–2, 34–66” ke tokoni ki he kau ako ʻoku kei ʻi ai haʻanau ngaahi fehuʻi fekauʻaki mo e mali tokolahí.
ʻOku fakahā ʻe he ʻOtuá Hono finangaló ki Heʻene fānaú
Poupouʻi hono vakavakaiʻí mo e siviʻí. Ki ha ako lahi ange ki he founga ke fakahoko ai ʻení, vakai ki he ako “Fokotuʻu ha ngaahi feituʻu mo ha ngaahi faingamālie maʻá e kau akó ke akoʻi kinautolu ʻe he Laumālie Māʻoniʻoní,” ʻoku maʻu ʻi he Fakatupulaki ʻa e Ngaahi Taukei ʻa e Faiakó: Faiako ʻaki e Laumālié. Fakakaukau ke akoako hono faʻu ha ngaahi vakaiʻi fakaekita maʻá e kau akó fekauʻaki mo ha tokāteline, moʻoni, pe tefitoʻi moʻoni.
Fakakaukau ke kamata e lēsoní ʻaki hano fakaafeʻi ha tokotaha ako ke ne lau pe lau maʻuloto e Ngaahi Tefito ʻo e Tuí 1:9. Tokoni leva ki he kau akó ke vakaiʻi ʻenau tui fekauʻaki mo hono fakahā ʻe he ʻOtuá Hono finangaló ki Heʻene fānaú ʻo fakafou ʻi he kau palōfitá. Te ke lava ʻo fakaʻaliʻali ʻa e meʻa ko ʻení pea ʻoange ha taimi ki he kau akó ke fakakaukau fakalongolongo ai ki heʻenau ngaahi talí.
ʻI he ngaahi fakamatala ʻi laló, fili ʻa e konga (ʻiloʻi; tui; meimei tui; ʻikai ʻiloʻi pe) ʻa ia ʻokú ne fakamatalaʻi lelei taha e founga te ke fakafonu ai e konga ʻoku ʻataá: “ʻOku ou ʻoku moʻoni ʻeni.”
-
Kuo fakahā ʻe he ʻOtuá Hono finangaló ki Heʻene fānaú ʻo fakafou ʻi Heʻene kau palōfitá.
-
ʻOku lolotonga fakahā ʻe he ʻOtuá Hono finangaló ki Heʻene fānaú ʻo fakafou ʻi Heʻene kau palōfitá.
-
ʻE kei fakahā pē ʻe he ʻOtuá Hono finangaló ki Heʻene fānaú ʻo fakafou ʻi Heʻene kau palōfitá.
Fakaafeʻi e kau akó ke fakakaukau ki he ʻuhinga ne nau tali ai ʻi he founga ne nau tali aí. Te ke lava ʻo fakaafeʻi ha niʻihi ke vahevahe.
Fakamatalaʻi ange ʻe nofotaha e lēsoni ʻo e ʻaho ní ʻi ha sīpinga mei he hisitōlia ʻo e Siasí ʻokú ne fakatātaaʻi hono tataki ʻe he ʻEikí Hono Siasí ʻo fakafou ʻi ha fakahā hokohoko ki Heʻene kau palōfitá. Poupouʻi kinautolu ke tokanga ki he ngaahi ueʻi mei he Laumālié ʻe lava ʻo tokoni ke nau fakatokangaʻi ʻa e tāpuaki ʻo hono maʻu hokohoko ha fakahā mei he ʻEikí.
Fanongonongo Fakamafaiʻi 1
Tokoni ke mahino ki he kau akó ʻoku fekauʻaki ʻa e Fanongonongo Fakamafaiʻi 1 mo e fekau ʻa e ʻEikí ki he Kāingalotú ke taʻofi hono fakahoko ʻo e mali tokolahí. Fakaafeʻi e kau akó ke kumi e palakalafi talateu ʻi he kamataʻanga ʻo e Fanongonongo Fakamafaiʻi 1 ʻi heʻenau folofolá. Kapau ʻe fiemaʻu, ʻoange ha tatau ʻo e talateú ki he kau ako ʻoku nau maʻu ha ngaahi tatau motuʻa angé.
Lau ʻa e talateu ki he Fanongonongo Fakamafaiʻi 1, ʻo kumi e meʻa ʻokú ne akoʻi fekauʻaki mo hono fakahoko ʻe he Kāingalotú ʻa e mali tokolahí.
-
Ko e hā e meʻa naʻe faingataʻa ai ki he Kāingalotú ke hokohoko atu ʻenau fakahoko e mali tokolahí?
Ke tokoni ke mahino lahi ange ki he kau akó ʻa e ngaahi faingataʻa ko ʻení, fakakaukau ke lau pe fakamatalaʻi fakanounou ʻa e ngaahi palakalafi ko ʻení. Te ke lava foki ʻo fakaafeʻi ha tokotaha ako ke ne lau kinautolu ki he kalasí.
Hili e nofo ʻa e Kāingalotú ʻi ʻIutā ʻi he konga loto ʻo e 1800 tupú, naʻe fakahoko tauʻatāina ʻe ha kāingalotu tokolahi ʻo e Siasí ʻa e mali tokolahí. Naʻe faifai pea fakapaasi ʻe he kau taki fakapuleʻangá ha ngaahi lao naʻe taʻefakalao ai ʻa e mali tokolahí ʻi he ʻIunaiteti Siteití. Naʻe iku ʻa e ngaahi laó ni ki hono puke mo tuku pōpula ʻo ha kau tangata tokolahi ʻo e Siasí. Naʻe toi ha niʻihi ke fakaʻehiʻehi mei hono puke pōpula kinautolú (vakai, Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, voliume 2, ʻIkai ha Nima Taʻe-Maʻa, 1846–1893 [2020], 165, 477–78, 607–609).
ʻI he ngaahi tūkunga faingataʻa ko ʻení, naʻe lotua ʻe Palesiteni Uilifooti Utalafi mo ne maʻu ha fakahinohino mei he ʻEikí. Ná ne ongoʻi ne ueʻi fakalaumālie ia ke fakahinohino e kau taki ʻo e Siasí ke taʻofi hono akoʻi e tefitoʻi moʻoni ʻo e mali tokolahí. ʻI Sepitema ʻo e 1890, naʻe tukuange ai ʻe Palesiteni Utalafi ha tuʻutuʻuni (ʻoku ʻiloa he ʻahó ni ko e Fanongonongo Fakamafaiʻi 1). ʻI he tuʻutuʻuní, naʻe lave ai ʻa Palesiteni Utalafi ki ha ngaahi lipooti loi naʻe kei poupouʻi pē ʻe he kau taki ʻo e Siasí ʻa e mali tokolahi foʻoú (vakai, Kau Māʻoniʻoní, 2:684–85, 699–704).
ʻOku ʻiloa ʻa e tuʻutuʻuni ko ʻení he taimí ni ko e Fanongonongo Fakamafaiʻi 1 ʻi he Tokāteline mo e Ngaahi Fuakavá.
ʻOange ha faingamālie ki he kau akó ke ako ha niʻihi ʻo e faleʻi mo e ngaahi fakahinohino ʻa Palesiteni Utalafí ki he Kāingalotú. Kapau ʻe fiemaʻu, fakaʻaliʻali ki he kau akó ʻa e feituʻu te nau lava ʻo maʻu ai ʻi he folofolá ʻa e ngaahi palakalafi te nau akó.
Ako ʻa e ngaahi naunau ko ʻení, ʻo kumi ha niʻihi ʻo e faleʻi ʻa Palesiteni Utalafi ki he Kāingalotú:
-
Palakalafi 4–5 ʻo e Fanongonongo Fakamafaiʻi 1 (kamata ʻi he “Ko e meʻa ʻi he faʻu ʻe he …”)
-
Palakalafi 1–2 ʻo e ngaahi konga naʻe hoko atu ʻi he Fanongonongo Fakamafaiʻi 1
Kapau ʻoku toe lahi e taimí, mahalo ʻe tokoni ke fakaafeʻi e kau akó ke ako ha ngaahi palakalafi lahi ange mei he ngaahi konga tohí. Te ke lava ʻo vahe ki ha fanga kiʻi kulupu iiki ʻo e kau akó ke nau ako ha ngaahi palakalafi pau, ʻo kumi e meʻa naʻe ako ʻe Palesiteni Utalafi mei he ʻEikí. Hili iá, ʻe lava ke fakamatalaʻi fakanounou ʻe he kau akó e ngaahi meʻa ne nau maʻú mo e kalasí.
-
Ko e hā e meʻa ʻoku fakamahinoʻi atu ʻe he ngaahi palakalafi ko ʻení fekauʻaki mo e founga ʻoku tataki ai ʻe he Fakamoʻuí Hono Siasí?
ʻOange ki ha kau ako ha faingamālie ke tali ʻa e fehuʻi kimuʻá. Mahalo te nau ʻilo ha ngaahi moʻoni tatau mo ʻení: He ʻikai ke teitei fakangofua ʻe he ʻEikí ha Palesiteni ʻo e Siasí ke ne takihalaʻi e Siasí. ʻOku tataki ʻe he ʻEikí Hono Siasí ʻo fakafou ʻi he hokohoko atu ʻo e fakahaá ki Heʻene kau palōfitá.
-
ʻE tāpuekina pe liliu fēfē hoʻo moʻuí ʻi hono ʻiloʻi e ngaahi moʻoni ko ʻení?
-
Ko e hā ha meʻa ʻe lava ke akoʻi atu ʻe he ngaahi moʻoni ko ʻení fekauʻaki mo e Fakamoʻuí mo Hono finangalo maʻatautolú?
Hokohoko atu ʻo e fakahaá ʻi he ʻaho ní
Naʻe vahevahe ʻe Palesiteni Lāsolo M. Nalesoni ʻa e fakamoʻoni ko ʻení:
ʻOku ou ʻilo fakapapau ʻoku tataki ʻe he ʻEikí ʻa e ngaahi meʻa ʻo Hono Siasí. Naʻá Ne folofola, “Te u fakahā [kiate kimoutolu] ʻoku ou mafai ke [fakahoko] ʻa ʻeku ngāue pē ʻaʻakú” [2 Nīfai 27:21].
Kuó u mātā mo hoku ongo tokoní ʻi he loʻimataʻia, ʻi Heʻene tokonia homau ngaahi tūkunga mātuʻaki faingataʻaʻiá hili ia ʻemau fakahoko homau lelei tahá pea ʻikai toe lava ʻo fakahoko ha meʻá. ʻOku fakaofo moʻoni kiate kimautolu. (Russell M. Nelson, “Pōpoaki Fakafeʻiloakí,” Liahona, Mē 2021, 6)
Hili hono vahevahe e ngaahi fakamatala kimuʻá, fakakaukau ke fakaafeʻi e kau akó ke nau aleaʻi ʻa e fehuʻi ko ʻení mo ha hoa pe ʻi ha kulupu tokosiʻi. ʻE lava ke haʻu e kau mēmipa ʻo e kulupu takitaha ki he palakipoé ʻo hiki ha niʻihi ʻo ʻenau ngaahi talí.
-
Ko e hā ha fakamoʻoni kuó ke mamata ai ʻoku hokohoko atu hono tataki ʻe he ʻEikí Hono Siasí ʻo fakafou ʻi he fakahā ki Heʻene kau palōfita ʻi hotau kuongá?
ʻE lava ke kau ʻi he ngaahi sīpinga ʻe ala lave ki ai ʻa e kau akó ʻa e ngaahi pōpoaki ʻoku vahevahe ʻe he kau palōfitá mo e kau ʻaposetoló ʻi he konifelenisi lahí, mo hono talaki mo taukapoʻi e ngaahi moʻoni mahuʻingá ʻo fakafou ʻi he “Ko e Fāmilí: Ko ha Fanongonongo ki Māmani,” “Ko e Kalaisi Moʻuí: Ko e Fakamoʻoni ʻa e Kau ʻAposetoló,” mo e “Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko ha Fanongonongo ki Māmani ʻo e Taʻu Uangeaú.”
-
Kuo tāpuekina fēfē hoʻo moʻuí ʻe he fakahā hokohoko kuo ʻomi ʻe he ʻEikí ʻo fakafou ʻi Heʻene kau palōfitá?
Fakahaaʻi ʻa e mahinó
Ke tokoni ke fakahaaʻi ʻe he kau akó ʻenau mahino fekauʻaki mo e meʻa kuo nau ako he ʻaho ní, fakakaukau ke vahevahe ʻa e tūkunga ko ʻení:
ʻOku hohaʻasi ʻa Sōfia ʻe ha niʻihi ʻo e ngaahi liliu kuó ne mamata ai ʻi he Siasí. ʻOkú ne fifili pe ko e hā e ʻuhinga ʻoku kehe ai ha niʻihi ʻo e ngaahi meʻa ʻoku kole mai ʻe he palōfitá ke tau fai he taimi ní mei heʻene kei siʻí.
-
Ko e hā ha ngaahi meʻa kuó ke ako he ʻahó ni ʻe ala tokoni ke vahevahe mo Sōfia?
ʻE lava ke tali ʻa e kau akó ko ha konga ʻo ha fealēleaʻaki fakakalasi, pe ko hoʻo fakaafeʻi kinautolu ke fakatātaaʻi ʻa e tūkunga ko ʻení mo hanau hoa.
Fakamoʻoni ki he ngaahi moʻoni kuo mou aleaʻi ʻi he ʻaho ní. Poupouʻi e kau akó ke nau ʻiloʻi ʻe lava ke hoko e hokohoko atu ʻo e fakahinohino ʻa e ʻEikí ʻoku fakafou mai ʻi Heʻene kau palōfitá ko ha tāpuaki ʻi heʻenau moʻuí.