Lesona 160: “O Le Aiga: O Se Folafolaga i le Lalolagi”

O Le Folafolaga i le Aiga, Vaega 3

Fiafia i le Olaga Faaleaiga

O se tasi o mafuaaga na auina mai ai i tatou e le Tama Faalelagi i le lalolagi i aiga, o le fesoasoani lea ia i tatou ia maua le fiafia. I le folafolaga i le aiga, na faaali mai ai e le Alii le auala e mafai ona tatou ausia ai le filemu ma le fiafia o ni tagata taitoatasi ma aiga. E mafai ona fesoasoani lenei lesona i tagata aoga e faaaoga aoaoga a Iesu Keriso i a latou faia faaleaiga.

Gaoioiga E Ono Mafai Ona Aoao Ai

Mafuaaga ma aafiaga

Mafaufau e tusi le fuaiupu lē uma lenei o le mafuaaga ma aafiaga i luga o le laupapa. Faatumu le avanoa muamua i se fuaitau e pei o le “Mauaina o togi lelei.” Ona valaaulia lea o tagata aoga e faatumu le avanoa lona lua i se fuaitau e faauma ai le faamatalaga, e pei o le “tatou te faia meaaoga.” E mafai ona e toe faia lenei faagasologa mo ni nai taimi e faaaoga ai fuaitau eseese.

“ e foliga mai e ausia pe a .”

Valaaulia tagata aoga e faitau le palakalafa 7 o le folafolaga i le aiga, ma vaavaai mo se auala musuia e faamaea ai le fuaitau o loo i luga o le laupapa. Fesoasoani i tagata aoga e iloa upumoni nei: E maua le fiafia i le olaga faaleaiga pe a faavae i aoaoga a le Alii o Iesu Keriso. Ina ia fesoasoani i tagata aoga e mafaufau pe faapefea e le ola ai i aoaoga a Keriso ona taitai atu ai i le fiafia i le olaga faaleaiga, fai atu ia i latou e mafaufau loloto i fesili e pei o fesili nei:

• O a ni auala e te manatu e mafai ai e le Tama Faalelagi ma Iesu Keriso ona faateleina le fiafia o lou aiga?

• Na faapefea ona saofaga au taumafaiga e ola i a Laua aoaoga i lena fiafia?

Faailoa atu i tagata aoga faapea, i le faaiuga o lenei lesona, o le a valaaulia i latou e faatino se tasi o aoaoga a le Faaola lea e mafai ona faateleina ai le fiafia o o latou aiga. Valaaulia tagata aoga e saili le fesoasoani a le Tama Faalelagi i le taimi o totoe o le lesona ia iloa po o le fea mataupu faavae e tatau ona latou taulai atu i ai. Uunaia tagata aoga e gauai atu i ni manatu po o lagona latou te maua mai i le Agaga Paia.

O aoaoga a Iesu Keriso

Faaali atu se ata o Iesu Keriso i luga o le laupapa. Fai atu i tagata aoga e toe faitau le parakalafa 7 , o le taimi lenei e faailoga ai aoaoga taitasi e mafai ona faateleina ai le fiafia faaleaiga. Valaaulia tagata aoga e tusi mea na latou maua i luga o le laupapa faataamilo i le ata o Iesu Keriso. Ona fai atu lea i tagata aoga e fai ni vaega toalaiti po o ni paga e faamaea ai le gaoioiga lenei:

1. Filifili se aoaoga a Iesu Keriso na e maua i le palakalafa 7.

2. Saili se mau po o se faamatalaga a se taitai o le Ekalesia e fesoasoani ia i tatou ia malamalama lelei ai i lena aoaoga.

3. Faamatala pe faapefea e le mulimuli i lena aoaoga ona faateleina le fiafia i aiga.

   Afai e manaomia e tagata aoga se fesoasoani, e mafai ona e valaaulia i latou e faaaoga le Taiala i Tusitusiga Paia pe saili i le polokalama o le Potutusi o le Talalelei. O nisi nei o mau e ono maua e tagata aoga e faatatau i aoaoga mai le palakalafa 7: 3 Nifae 18:15–16, 21 (tatalo); Moronae 7:45–48 (alofa); Mataupu Faavae ma Feagaiga 58:42–43 (salamo); Mataupu Faavae ma Feagaiga 64:9–11 (faamagaloga).

   Afai e maua, valaaulia tagata aoga e saili le “Fiafia i le Olaga Faaleaiga,” ChurchofJesusChrist.org, loo maua i ChurchofJesusChrist.org, e sue ai aoaoga mai taitai o le Ekalesia e uiga i mataupu faavae o loo i le palakalafa 7.

   A uma se taimi talafeagai, ona valaaulia lea o vaega e faasoa mai i le vasega mea na latou mauaina. A o faasoa mai e vaega, fai atu ia i latou e tusi i luga o le laupapa le mau faasino po o se vaega o le saunoaga a le taitai o le Ekalesia lea na fesoasoani ia i latou ia malamalama ai i aoaoga a Iesu Keriso.

   Ona mafai lea ona e faaaogaina fesili e pei o fesili nei e fesoasoani ai i tagata aoga e mafaufau loloto ma talanoaina pe faapefea e aoaoga a Iesu Keriso ona aafia ai aiga.

   • O fea o aoaoga a Keriso o loo i luga o le laupapa na i ai se aafiaga i le fiafia e te lagonaina i lou aiga?

   • O fea o nei aoaoga e te manao e taulai atili atu i ai i lou aiga? Aisea? E mafai faapefea ona e ausia lea tulaga i lou aiga?

   • O fea o na mea e te manao e taulai atu i ai i lou aiga i le lumanai? Aisea?

   • O fea o aoaoga a le Faaola e mafai ona fesoasoani i se aiga o loo tauivi i feeseeseaiga, finauga, po o sootaga le mautonu?

A o talanoaina e tagata aoga le fesili na muamua atu, e mafai ona e faasino atu i latou i mataupu faavae o le “faatuatua, tatalo, salamo, faamagaloga, faaaloalo, alofa, [ma] le agaalofa” i le parakalafa sa latou suesueina. Molimau atu i le manao o le Faaola e faamagalo atu, faamalolo, ma faaleleia tagata taitoatasi ma faiā faaleaiga. O a tatou taumafaiga ma manaoga e salamo ma faamagalo atu i isi e mafai ona valaaulia Ai Lana faatosinaga faamalolo i o tatou olaga ma sootaga.

Faateleina le fiafia

A o lei valaauliaina tagata aoga e faaaoga se tasi o aoaoga a le Faaola i o latou lava aiga, fesoasoani ia i latou e mafaufau i auala e mafai ona faaaoga ai Ana aoaoga i tulaga eseese faaleaiga. Mafaufau e tusi ni nai tulaga eseese faaleaiga i luga o le laupapa e ono fesootai i ai tagata aoga i lau vasega. O faataitaiga e mafai ona aofia ai mea nei:

1. Ua toaaga uma le aiga i le Ekalesia.

2. Aiga e na o se vaega e lolotu.

3. Matua ua tatala faaipoipoga.

4. Aiga e toatasi le matua.

Mafaufau e fai atu i tagata aoga e faasoa mai tali i fesili nei mo tulaga taitasi faaleaiga o loo i luga o le laupapa:

• O a mataupu faavae patino mai le palakalafa 7 o le folafolaga i le aiga e te fautuaina atu i se talavou i lenei tulaga?

• E mafai faapefea e se talavou i lenei tulaga faaleaiga ona faaaoga mataupu faavae na e filifilia?

Mafaufau e faaali atu le faamatalaga lenei:

Na aoao mai Elder David A. Bednar o le Korama a Aposetolo e Toasefululua:

Po o a lava ni mea leaga e ono tutupu i lou aiga, ou te molimau atu ma folafola atu o le Alii o Iesu Keriso o le puna o le faamalologa, faafouga, ma le toefuataiga o loo e manaomia. …

Faatasi ma le fesoasoaniga a le Alii, e mafai ai ona e fatua se aiga e faavavau, e tusa lava pe e te le’i sau mai le ituaiga o aiga o le Au Paia o Aso e Gata Ai lea e tuu mai nisi taimi i le faavaa i luma o le mekasini o le Liahona po o le Ensign . Faamolemole ia manatua i taimi uma: e amata ia te oe! (David A. Bednar, “A Welding Link” [worldwide devotional for young adults, Set. 10, 2017], broadcasts.ChurchofJesusChrist.org)

• O le a se mea sa tulaga ese ia te oe mai le saunoaga a Elder Bednar? Aisea?

Valaaulia tagata aoga e filifili se tasi o aoaoga a Iesu mai le folafolaga i le aiga lea latou te lagona le uunaia e faaaoga e faaleleia ai le fiafia i o latou lava aiga. Tuu atu ia i latou se taimi e mafaufau loloto ai ma tusi i a latou api faamaumau mo suesuega se fuafuaga e amata ai, faaauau ai, pe faaleleia atili ai le ola ai i lena aoaoga. Afai e lava le taimi, valaaulia nisi o tagata aoga e faasoa mai mea na latou lagonaina ua musuia e fai.

Mafaufau e faasoa atu lau molimau i le mana o Iesu Keriso e faateleina ai le fiafia i aiga o i latou o loo taumafai e ola i Ana aoaoga.

Punaoa Faaopoopo

E mafai faapefea ona ou faamalosi i lo’u aiga?

Na saunoa mai Elder Robert D. Hales (1932–2017) o le Korama a Aposetolo e Toasefululua:

Faatasi ai ma le fesoasoani a le Alii ma Ana aoaoga faavae, e mafai ai ona malamalama ma faatoilaloina aafiaga tiga mai luitau e ono fetaiai ma le aiga. Po o a lava manaoga o tagata o le aiga, e mafai ona tatou faamalolosia o tatou aiga pe a tatou mulimuli i fautuaga e tuuina mai e perofeta.

O le ki i le faamalolosia o o tatou aiga, o le oo mai lea o le Agaga o le Alii i o tatou aiga. O le sini a o tatou aiga o le i ai lea i le ala sa’o ma le vaapiapi. …

… E faamalosia le aiga a o tatou faalatalata atu i le Alii, ma e faamalosia tagata taitoatasi o le aiga a o tatou siitia ma faamalosia ma alolofa ma tausia e le tasi le isi. (Robert D. Hales, “Strengthening Families: Our Sacred Duty,” Ensign, Me 1999, 33–34)

Ae faapefea pe afai e leai so’u aiga “lelei”?

Ua tuuina mai i le Taiala i Tusitusiga Paia le faauigaga lenei o le aiga:

E pei ona faaaogaina i tusitusiga paia, o se aiga e i ai se tane ma se avā, fanau, ma o nisi taimi o isi tagata o aiga e nonofo ai i le fale e tasi po o lalo o le taitai e tasi o le aiga. E mafai foi ona avea se aiga ma se matua nofotoatasi ma se fanau, se tane ma se avā e leai ni fanau, po o se tagata nofofua e nofo na o ia. (Taiala i Tusitusiga Paia, “Aiga,” scriptures.ChurchofJesusChrist.org)

O le a le faamoemoe o i ai mo se aiga sa faigata taimi ua tuanai?

Na saunoa mai Elder Dieter F. Uchtdorf o le Korama a Aposetolo e Toasefululua:

O Iesu Keriso, le Fomai Sili ma le Faaola, e mafai i taimi uma ona i ai se amataga fou; Na Te tuuina mai pea lava le faamoemoe.

O Iesu Keriso o le malosi o aiga.

O Iesu Keriso o le malosi o le autalavou.

O Iesu Keriso o le malosi o matua. (Dieter F. Uchtdorf, “O Iesu Keriso o le Malosiaga o le Matua,” Liahona, Nov. 2023, 59)

O le a le uiga o le “faafiafiaga lelei”?

Na aoao mai Elder D. Todd Christoffferson o le Korama a Aposetolo e Toasefululua:

O faafiafiaga lelei o le uō ma le soa tumau o le galuega. O musika, o tusi faitau, tusigaata, siva, tala faatino, ma taaloga—e mafai e ia mea uma ona aumaia faafiafiaga e faamauoa ai le olaga o se tasi. … I le taimi foi lea, e tau lē manaomia ai le fai atu o le tele o mea ua pasia mo faafiafiaga i aso nei e lē migao, faalumaluma, e malolosi, e faapē ai le mafaufau, ma faamaimau taimi. E iloagofie lava, o nisi taimi e na o le galue malosi e maua ai le taimi paganoa lelei. A liliu faafiafiaga mai le mama i le eleelea o le a avea ma faaoosala o le olaga faapaiaina. (D. Todd Christofferson, “Toe Manatunatuga i se Olaga Faapaiaina,” Liahona, Nov. 2010, 17)

Gaoioiga Faaopoopo e Aoao Ai

Paaga Tutusa

Ina ia fesoasoani i tagata aoga ia malamalama lelei e tutusa alii ma tamaitai i luma o le Atua, e mafai ona e valaaulia i latou e faitau le afa lona lua o le parakalafa 7 (e amata i le “E ala i le mamanu paia”), ma vaavaai mo tiutetauave o tamā ma tina. E mafai e tagata aoga ona tusi i le laupapa mea na latou mauaina. E mafai ona latou faasoa atu nisi o mea taua ma tulaga ese na aoaoina ai i latou e o latou tina ma tamā. Ona fesoasoani lea i tagata aoga ia malamalama i le upumoni lenei: Ua tatau i tamā ma tina ona fesoasoani le tasi i le isi o ni paaga tutusa. Ina ia fesoasoani i tagata aoga e faaloloto lo latou malamalama i lenei upumoni, mafaufau e vaevae le vasega i le afa ma fai atu i afa taitasi e suesue se tasi o saunoaga nei a Peresitene M. Russell Ballard o le Korama a Aposetolo e Toasefululua:

E alofa tutusa lo tatou Tama i le Lagi i Ana fanau uma, atoatoa, ma e le gata. E leai se eseesega o Lona alofa mo Ona afafine nai lo Ona atalii. E alofa tutusa foi lo tatou Faaola, o le Alii o Iesu Keriso, i alii ma tamaitai. O Lana togiola ma Lana talalelei e mo fanau uma a le Atua. …

O le talalelei a Iesu Keriso e mafai ona faapaiaina uma ai alii ma tamaitai i le ala lava e tasi ma mataupu faavae tutusa. Mo se faataitaiga, o le salamo i le faatuatua, papatisoga, ma le meaalofa o le Agaga Paia o tulaga manaomia ia mo fanau uma a le Atua, e tusa lava po o le a le itupa. … E alofa tutusa [le Tama Faalelagi] ia i tatou uma, ma o Lana meaalofa silisili, o le meaalofa o le ola e faavavau, ua avanoa mo tagata uma. (M. Russell Ballard, “Equality through Diversity,” Ensign, Nov. 1993, 89)

E ui lava e tutusa alii ma tamaitai i luma o le Atua i o latou avanoa e faavavau, ae e eseese o latou tiute, ae tutusa lava le taua, i Lana fuafuaga e faavavau. … E mafai e le [Atua] ona faailoa ma uunaia foi o tatou eseesega a o tuuina atu le avanoa tutusa mo le tuputupu ae ma le atinaega. …

… O le tele o tulaga manaomia [mo se olaga faaleaiga faaeaina] e tutusa lava mo alii ma tamaitai. Mo se faataitaiga, o le usiusitai i tulafono a le Atua e tatau ona tutusa mo alii ma tamaitai. E tatau i alii ma tamaitai ona tatalo i le ala lava e tasi. E tutusa uma lava le avanoa e maua ai tali i a laua tatalo ma maua ai faaaliga patino mo lo laua lava atinaega faaleagaga. (M. Russell Ballard, “Equality through Diversity,” Ensign, Nov. 1993, 89–90)

Ina ia fesoasoani i tagata aoga e talanoa mea sa latou aoaoina, fai ia fesili nei:

• O le a se mea na e aoaoina e uiga i le auala e silasila ai le Atua i alii ma tamaitai?

• O le a lou manatu i le uiga o le “paaga tutusa”?

• E mafai faapefea e le malamalama i lenei upumoni ona fesoasoani ia te oe e faateleina ai le fiafia i lou aiga i le taimi nei ma le lumanai?

Malamalama i le aoaoga faavae o le aiga

E toatele tagata aoga o le a feagai ma tulaga e manaomia ai le lototele ma le faatuatua ia Iesu Keriso e puipuia ai mea na Ia faaalia mai i le folafolaga i le aiga. Mafaufau e faaali le vitio “Defenders of the Faith” (6:56), lea o loo faamatala ai le tala moni ia Marie Madeline Cardon o loo puipuia le mea sa ia iloa e moni. Ua faatusaina e le vitio lenei mea i le autalavou i ona po nei o loo puipuia le aoaoga faavae a le Alii e uiga i le aiga, e ui lava i talitonuga ma tulaga eseese o loo siomia ai i latou.

E mafai foi ona e mafaufau e faaali atu le saunoaga lenei a Sister Bonnie L. Oscarson, o lē sa avea muamua ma Peresitene Aoao o Tamaitai Talavou:

E tatau foi ona tatou puipuia ma le lototoa ia aoaoga [faavae] a le Alii na faaalia mai o loo faamatala ai le faaipoipoga, aiga, o matafaioi paia a alii ma tamaitai, ma le taua o aiga o ni nofoaga paia—e tusa lava pe o tauvalaau mai le lalolagi i o tatou taliga faapea o nei mataupu faavae ua tuai, faatapulaa, ma e le o toe aoga. O tagata uma, e tusa lava po o a o latou tulaga faaleulugalii pe fia le aofai o le fanau, e mafai ona avea ma e puipuia le fuafuaga a le Alii o loo faamatala mai i le folafolaga o le aiga. Afai o le fuafuaga lea a le Alii, e tatau foi ona avea ma a tatou fuafuaga! (Bonnie L. Oscarson, “O Tagata e Puipuia le Folafolaga o le Aiga,” Liahona, Me 2015, 15)

Ona fai atu lea i tagata aoga e faatalanoa fesili nei:

• O a upumoni ua faaalia mai e le Alii e faatatau i aiga e lei malamalama i ai le toatele i le lalolagi?

• Aisea e taua ai le puipuia o le aoaoga faavae a le Alii e uiga i le aiga e tusa lava po o a o tatou tulaga faaleaiga i le taimi nei?

• E mafai faapefea ona tatou tutu mausali i mea ua aoao mai e le Alii i se auala e atiina ae ai le filemu nai lo finauga?

• E mafai faapefea e le malamalama i le aoaoga faavae a le Alii e uiga i le aiga i le taimi nei ona saunia oe e tausia se aiga i le lumanai?