Lesona 159: “O Le Aiga: O Se Folafolaga i le Lalolagi”

O Le Folafolaga i le Aiga, Vaega 2

“O Fanau o le Tofi lea mai le Alii.”

Na folafola mai e perofeta a le Alii le taua o fanau i le fuafuaga a le Tama Faalelagi. E mafai e avā ma tane ona auai i le fuafuaga a le Atua e ala i le aumaia o fanau i le lalolagi ma tausia i latou i le alofa ma le amiotonu. O lenei lesona e mafai ona fesoasoani i tagata aoga e malamalama ai i le taua o le iai ma le tausiaina o fanau i le fuafuaga a le Tama Faalelagi.

Gaoioiga E Ono Mafai Ona Aoao Ai

Taitaiga paia mai le folafolaga i le aiga

Mafaufau e amata le vasega i le faasoaina atu o le tulaga lenei po o se mea faapena e sili ona fetaui ma manaoga o au tagata aoga. E mafai ona e faatulagaina i latou i ni paga e talanoaina ai le fesili pe a uma le vaaiga.

O loo talanoaina e Kristen ma ana uo e toalua lo latou lumanai ma mea la te mananao i ai mai le olaga. A o liliu atu le autu i aiga, fai mai Kristen e fiafia o ia e faaipoipo ma maua se fanau pe a matua. Fai mai se tasi o ana uo, “Ou te fia faaipoipo, ae e leai se auala o le a ou taumafai ai e tausia fanau i lenei lalolagi faapea.” Fai mai le isi uo, “Ou te le afaina pe a maua se pepe i se aso, ae ou te manatu ou te le fia faaipoipo.” Ina ua uma ona faalogologo i manatu o ana uo, sa mafaufau Kristen pe aisea e foliga mai ai e matua ese lava ona lagona e uiga i le mauaina o fanau.

• Aisea atonu e lagona ai e uo a Kristen lagona faapela?

  Fai atu i ni paga o tagata aoga e faasoa mai nisi o a latou tali. E mafai foi ona e valaaulia i latou e faasoa mai ni atugaluga faaopoopo po o ni fesili o i ai e uiga i fanau ma le tulaga faamatua. Tufatufa atu kopi “O Le Aiga: O Se Folafolaga i le Lalolagi” i tagata aoga e faaaoga. Valaaulia paga taitasi e suesue parakalafa 4–6, ma vaavaai mo upu po o fasifuaitau o loo folafola mai ai le aoaoga faavae a le Alii e faatatau i fanau ma le tulaga faamatua. Uunaia tagata aoga e faailoga upu po o fasifuaitau anoa a o latou suesue. Afai e manaomia, faasino atu o le fuaitau “faateleina ma faatumuina le lalolagi” e faatatau i le mauaina o fanau ma le fuaitau “o mana paia o le foafoaina o fanau” e faatatau i sootaga faalefeusuaiga. Mafaufau e fai atu fesili e pei o nei.

• O a upumoni e uiga i fanau ma le tulaga faamatua na e mauaina?

• Aisea e te manatu ai e finagalo le Alii i tane ma avā ia faia ni fanau pe afai latou te mafaia?

• O a nisi o mafuaaga atonu e le mananao ai se ulugalii faaipoipo e fai se fanau?

Ae e te lei agai i luma, e mafai ona e valaaulia tagata aoga e faamaumau nisi o o latou lava manatu ma lagona e uiga i le aoaoga faavae a le Alii e faatatau i fanau ma le tulaga faamatua. Faamalosiau i tagata aoga e saili le uunaiga a le Agaga Paia e fesoasoani ia i latou ia malamalama i le taua o le i ai ma le tausia o fanau o se vaega o le fuafuaga a le Tama Faalelagi.

Saili isi punavai paia mo le malamalama

Mafaufau e faaali atu faamatalaga nei e tolu o le upumoni mai le folafolaga i le aiga. Faamalamalama atu o le a faaaoga e tagata aoga nei faamatalaga e faataitai ai le sailia o punavai ua tofia mai le Atua mo se malamalamaaga faaopoopo. E mafai ona e faatulagaina tagata aoga i ni vaega e toatolu, ma suesue e tagata aoga taitasi se upumoni ese. Atonu e mafai e tagata aoga ona filifili a latou faamatalaga i se auala fatufatuai; mo se faataitaiga, o le tagata aoga aupito laitiiti po o le tagata aoga aupito umi i vaega taitasi e mafai ona i ai le filifiliga muamua po o le fea e suesue.

• “O le poloaiga a le Atua i Lana fanau ia fanafanau ma uluuluola i le lalolagi, ua faamalosia ma faatumauina.”

• “O mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le avā e tatau ona faaaogaina ai.”

• “Ua i ai i matua se tiute paia e tausia a latou fanau i le alofa ma le amiotonu.”

  Uunaia tagata aoga e faaaoga punaoa e pei o le Taiala i Tusitusiga Paia po o le polokalama o le Potutusi o le Talalelei e sue ai faamatalaga faaopoopo e uiga i a latou faamatalaga o le upumoni. Afai latou te manaomia le taitaiga, fautua atu ni faaupuga sailiili e pei o le “faateleina ma faatumuina,” “mana o le foafoaina o fanau,” po o “matua amiotonu.” Valaaulia i latou e vaavaai mo faamatalaga a taitai o le Ekalesia, fuaitau o mau, po o tusiga o mekasini a le Ekalesia e faalolotoina ai lo latou malamalama.

  A uma ona sauni tagata aoga, faamalosiau i latou e faasoa atu i le latou vaega mea na latou aoaoina. Mafaufau e fai atu nisi o fesili nei.

• O le a se mea na e aoaoina e uiga i nei faamatalaga o le upumoni e te lagona e taua?

• Aisea e manaomia ai le faatuatua ia Iesu Keriso e ola ai i nei upumoni i le lalolagi i aso nei?

• O a ni faataitaiga ua e vaaia o le auala e mafai ai e le ola ai i nei upumoni ona taitai atu ai i le alofa tele, ae o le le amanaiaina o nei upumoni e mafai ona taitai atu ai i le tiga po o le faanoanoa?

• O le a se mea e te faia i le taimi nei e saunia ai ia ola i nei upumoni ma le faamaoni i le lumanai?

Aoaoga faavae e faavavau e uiga i tamaiti

Mafaufau e molimau atu i le taua o fanau i le fuafuaga e faavavau a le Atua ma faasoa atu le faamatalaga lenei.

Na faamalamalama mai e Peresitene Dallin H. Oaks o le Au Peresitene Sili le taua o fanau i le fuafuaga a le Atua.

O Le Alofa Paia i le Fuafuaga a le Tama

O le aoaoga faavae … e faavavau ua maua ai foi se malamalama tulagaese e uiga i fanau. E ala i lenei malamalama tatou te vaai ai i le fanauina ma le faafaileleina o fanau o se vaega o le fuafuaga paia. O se tiute fiafia ma le paia o i latou ua tuuina i ai le mana e auai ai i lea mea. O le mea lea, ua poloaiina ai i tatou e aoao atu ma puipuia mataupu faavae ma faiga masani ia e maua ai tulaga silisili mo le atinaega ma le fiafia o fanau i lalo o le fuafuaga a le Atua. (Dallin H. Oaks, “O Le Alofa Paia i le Fuafuaga a le Tama,” Liahona, Me 2022, 102)

• Na faapefea ona e vaai i fanau o faamanuiaina lou aiga po o isi e te iloa?

• E mafai faapefea e le aumaia o fanau i le lalolagi ma tausia i latou i le alofa ona fesoasoani ia te oe e avea atili ai e faapei o o tatou matua faalelagi?

Mafaufau e faaali atu uunaiga nei ma valaaulia tagata aoga e iloilo filemu lo latou malamalama e uiga i mea na latou aoaoina i le asō.

Iloilo lou malamalamaaga i faamatalaga nei e ala i le tali atu i lau api faamaumauga mo suesuega ma le ioe malosi, ioe, ioe teisi, pe le mautinoa. Tusi faapuupuu pe aisea na e filifilia ai tali taitasi.

• Ou te malamalama i le mafuaaga ua tumau ai ma faamalosia le poloaiga a le Atua ia fanafanau ma uluuluola ma ia tumu ai le lalolagi.

• Ua ou malamalama i le mafuaaga ua mafua ai ona faaaogaina i le na o le va o se tamaitai ma se alii ua faaipoipo faaletulafono ia mana paia o le foafoaina o fanau.

• Ua ou malamalama i le mafuaaga e tatau ai i matua ona tausia a latou fanau i le alofa ma le amiotonu.

Afai e i ai ni fesili faaopoopo a tagata aoga po o ni atugaluga e uiga i aoaoga faavae a le Alii e faatatau i fanau po o le tulafono o le legavia, uunaia i latou e tulitatao i matua po o taitai o le Ekalesia.

Ina ia faaiu, valaaulia ni nai tagata aoga e aotele mea na latou aoaoina e uiga i le taua o le i ai ma le tausia o fanau o se vaega o le fuafuaga a le Tama Faalelagi.

Punaoa Faaopoopo

Aisea e taua ai le iai o fanau i le fuafuaga o le fiafia a le Tama Faalelagi?

Na aoao mai Peresitene M. Russell Ballard o le Korama a Aposetolo e Toasefululua:

O le faamoemoega o le olaga faitino ia avea atili ai faapei o le Atua e ala i le mauaina o ni tino faaletino, faaaoga le faitalia, ma le amataina o ni matafaioi lea sa i ai muamua i na o matua faalelagi—matafaioi o le tane, avā, ma matua. …

E finagalo le Tama Faalelagi ia tatou … usiusitai i Lana poloaiga muamua ia “fanafanau, ma uluola”—e le gata ina ia faataunuu ai Lana fuafuaga ae ia maua foi le olioli lea na mamanu ai Lana fuafuaga e tuuina mai i Ona atalii ma afafine. …

… O se faamoemoega taua se tasi o le olaga faitino o le mafai lea ona tatou toe fausia lena aafiaga faaleaiga e i tatou lava, i le taimi la lenei o ni matua nai lo le na o ni fanau. (M. Russell Ballard, “O Avanoa ma Tiutetauave a Faiaoga o le OAE i le Seneturi 21” [o se faasauga ma se Pulega Aoao, Fep. 26, 2016], broadcasts.ChurchofJesusChrist.org)

Aisea e na o le va lava o se alii ma se tamaitai ua faaipoipo e talafeagai ai feusuaiga vavalalata?

Na faamatala e Elder Dale G. Renlund o le Korama a Aposetolo e Toasefululua ma Sister Ruth Lybbert Renlund e faapea:

E faamoemoe le Tama Faalelagi o le faia o sootaga feusuai i le faaipoipoga, e faaaoga e foafoa ai fanau, ma faailoa atu ai le alofa ma faamalolosia sootaga faalelagona, faaleagaga, ma faaletino i le va o le tane ma le avā. I le faaipoipoga, o le sootaga vavalalata taufeusuaiga e tatau ona tuufaatasia ai le avā ma le tane i le faatuatuaina, tuuto, ma le amanaia e le tasi o le isi. …

O le aoaoga faavae o aiga e faavavau i le, O le Ekalesia a Iesu Keriso o le Au Paia o Aso e Gata Ai e tulaga ese i tu ma aga faa-Kerisiano. E lei foafoaina i tatou ia na o le viia, tapuai, ma auauna atu i nisi o Atua e lei malamalama i ai. Na foafoaina i tatou e ni matua faalelagi alolofa ina ia ola ae ina ia avea faapei o i laua. Sa foafoaina ni agaga tane ma fafine e faaatoatoa e le tasi le isi. O le mafuaaga lena e le vaia ai le ituaiga i le faavavau—aua o loo maua ai le faavae mo le meaalofa tupito e mafai ona tuuina mai e le Tama Faalelagi, o Lona ituaiga olaga.

Ina ia tatou iloaina lenei faamanuiaga, na poloai mai ai le Tama Faalelagi e faapea, o le sootaga vavalalata taufeusuaiga e tatau ona faapolopolo mo le faaipoipoga i le va o se alii ma se tamaitai. … E le mafai ona tatou ausia le ituaiga olaga o loo olioli ai lo tatou Tama Faalelagi e nao i tatou lava, pe e aunoa foi ma se tautinoga atoatoa i le faamaoni i totonu o se faaipoipoga i le tane po o le avā e tusa ma le fuafuaga a le Atua. …

… O sootaga taufeusuaiga o “se tasi lea o faailoaga silisili o lo tatou natura paia” [David A. Bednar, “Matou te Talitonu i le Mama,” Liahona, Iulai 2013, 42]. O lo tatou faailoaga talafeagai o tulaga feusuai ua mafai ai ona toe faaali mai le fuafuaga a le Atua i le lalolagi ma i le faavavau, e agavaa ai i tatou ina ia avea e faapei o lo tatou Tama Faalelagi. Ua folafola mai e le Atua le ola e faavavau mo e faamaoni o loo aofia ai le faaipoipoga e faavavau, fanau, ma isi faamanuiaga uma o se aiga e faavavau. (Dale G. ma Ruth Lybbert Renlund, “O Faamoemoega Paia o le Sootaga Vavalalata Taufeusuaiga,” Liahona, Aok. 2020, 15–17)

O le a se mea ua aoao mai e perofeta e uiga i le paia o le ola e faatatau i le faapau pepe?

Ua saunia e taitai o le Ekalesia ia faatonuga nei:

Na poloai mai le Alii, “Aua e te … fasioti tagata, pe e te faia soo se mea faapena” (Mataupu Faavae ma Feagaiga 59:6). E tetee le Ekalesia i le filifiliga o le faapa’ū pepe mo le faamalieina faaletagata lava ia pe faaagafesootai. E lē tatau i tagata o le Ekalesia ona gauai atu, faatino, pe fuafuaina, totogi, ioe i ai, pe fautuaina le faapa’ū o se pepe. E na o le pau se tuusaunoaga pe afai:

• O le ma’itaga na mafua mai i le fai’aiga faamalosi po o le toe ui i fanau.

• Ua tonu i se fomai atamai faapea e lamatia ai le ola po o le soifua maloloina o le tina.

• Ua tonu i se fomai atamai faapea ua i ai ni faaletonu matuia i le pepe e le’i fanau ma o le a lē ola pe a fanau mai.

E oo lava foi i nei tuusaunoaga e le otometi ai ona faamaonia le faapa’ū o se pepe. O le faapau pepe o se mataupu e sili ona ogaoga. E na o le pau le taimi e tatau ona iloiloina ai pe a uma ona maua e tagata e fitoitonu i ai le faamauga e ala i le tatalo. E mafai e tagata o le ekalesia ona fefautuaai ma o latou epikopo o se vaega o lenei faagasologa. (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.6.1, ChurchofJesusChrist.org)

O fea e mafai ona ou aoao atili ai e uiga i le folafolaga i le aiga?

O ni nai lauga nei e mafai ona e filifili e suesue i ai:

• Dallin H. Oaks, “Matua ma Fanau,” Liahona, Nov. 2018, 61–67

• David A. Bednar, “Matou te Talitonu i le Nofo Mama,” Liahona, Me 2013, 41–44

• Neil L. Andersen, “Tamaiti,” Liahona, Nov. 2011, 28–31

Gaoioiga Faaopoopo e Aoao Ai

Tausia o fanau i le amiotonu ma faatino o latou manaoga

Afai e mafai ona faamanuiaina tagata aoga mai le aoao atili e uiga i le poloaiga a le Alii mo matua e tausia a latou fanau i le alofa ma le amiotonu, mafaufau i le manatu lenei.

A uma ona suesue le palakalafa 6 o le folafolaga i le aiga, faamalamalama atu faapea i le amataga o lenei tisipenisione na aoaiina ai e le Faaola le Perofeta o Iosefa Samita ma isi taitai o le Ekalesia ona o le le tuuina atu o le tausiga tatau i o latou aiga. Valaaulia tagata aooga e faitau le Mataupu Faavae ma Feagaiga 93:40–50, ma vaavaai po o a mea na aoao mai e le Alii. Valaaulia tagata aoga e faasoa mai mea sa latou mauaina. Faailoa atu e ui lava o le tiutetauave e tausia fanau i le amiotonu e taoto i luga o matua, ae e mafai e fanau ona fesoasoani i o latou matua e faataunuu poloaiga a le Alii. Mafaufau e fai atu fesili e pei o nei:

• E mafai faapefea ona e lagolagoina ou matua i lo latou tiutetauave paia e tausia lou aiga “i le malamalama ma le upumoni”? (Mataupu Faavae ma Feagaiga 93:40).

• O a nisi auala e mafai ona “filiga atili ai ma popole le auatalavou i le aiga”? (Mataupu Faavae ma Feagaiga 93:50).

A uma ona tali mai tagata aoga i fesili na muamua atu, mafaufau e faatulaga i latou i ni vaega toalaiti e mafaufau i ni auala faaopoopo e mafai ona latou fesoasoani ai i o latou matua. O nisi nei o tiutetauave o matua o loo aofia ai i le folafolaga i le aiga. Mafaufau e tofi vaega taitasi i se tasi o autu e talanoaina:

• Sauniaina o manaoga faaletino ma faaleagaga o a latou fanau.

• Aoaoina o a latou fanau ia alolofa ma auauna atu le tasi i le isi.

• Aoaoina o a latou fanau e tausi i poloaiga a le Atua.

• Aoaoina o a latou fanau ia avea ma tagatanuu usiusitai i tulafono.

A uma ona tuuina atu i tagata aoga se taimi e suesue ai, valaaulia i latou e faasoa mai nisi o o latou manatu. Mafaufau e lisi a latou manatu i luga o le laupapa. Faaiu i le fai atu o se fesili e pei o nei:

• E mafai faapefea e le lagolagoina o ou matua i tiutetauave o le Alii mo i latou ona saunia oe mo le tulaga faamatua amiotonu i le lumanai?

Tali Atu i luma o le Atua

Ina ia fesoasoani i tagata aoga ia malamalama i matafaioi paia ua i ai i matua ma tagata o le aiga i luma o le Atua, mafaufau e fesili atu ia i latou pe na i ai se taimi na latou tausia ai i latou a o toesea o latou matua. E mafai foi ona e fesili atu pe na i ai se taimi na latou vaavaaia ai tamaiti mai se isi aiga. Valaaulia tagata aoga e lisi i luga o le laupapa uiga po o aga e ono vaavaai i ai matua pe a filifilia se tausia tamaitiiti mo a latou fanau.

• Aisea e te manatu ai e manao se matua i se tausitama e faatuatuaina ma faamoemoeina?

• Aisea atonu e maualuga ai faamoemoega o le Atua mo i latou o e auauna atu o ni leoleo faalelalolagi i Ana fanau faaleagaga?

Valaaulia tagata aoga e faitau le palakalafa 8 o le folafolaga mo le aiga ma faasoa mai soo se lagona po o ni malamalamaaga latou te maua mai ai. Molimau atu e popole tele le Atua i Ana fanau uma ma manao ia tumau a tatou sootaga faaleaiga e oo i le faavavau.

E alolofa le Tama Faalelagi ma Iesu Keriso i tamaiti uma

Ina ia fesoasoani i tagata aoga ia lagona le alofa o le Tama Faalelagi ma Iesu Keriso mo tamaiti, mafaufau e faaali atu le vitio o le Tusi a Mamona “Jesus Christ Prays and Angels Minister to the Children” (5:52). Valaaulia tagata aoga e faamaumau ni malamalamaaga ma ni uunaiga a o matamata ma ia sauni e faasoa atu. Afai e le o maua le vitio, mafaufau e faitau le tala lenei faatasi ma tagata aoga i le 3 Nifae 17:11–25.

Ua Tatalo Iesu Keriso ma ua Auauna Atu Agelu i Tamaiti | 3 Nifae 17:11–25