Lesona 158: O Le Aiga: O Se Folafolaga i le Lalolagi

O Le Folafolaga i le Aiga, Vaega 1

“O Le Aiga o le Totonugalemu lea o le Fuafuaga a le Foafoa”

“O Le Aiga: O Se Folafolaga i le Lalolagi” o se faamatalaga faaperofeta na tusia e fesoasoani ia i tatou ia malamalama ai i aoaoga a le Tama Faalelagi ma Iesu Keriso e uiga i le faaipoipoga ma le aiga. O lenei lesona ua faamoemoe e fesoasoani i tagata aoga ia malamalama lelei i le matafaioi totonugalemu o aiga i le fuafuaga a le Tama Faalelagi.

Gaoioiga E Ono Mafai Ona Aoao Ai

A o lei faia le vasega, ia mautinoa o le a mafai e tagata aoga taitoatasi ona faaaoga le “O Le Aiga: O Se Folafolaga i le Lalolagi” a le o se faatulagaga faafuainumera po o se kopi lolomi. Atonu o loo i ai se kopi o loo aofia ai i api faamaumau mo suesuega a tagata aoga.

“O le aiga o le totonugalemu lea o le fuafuaga a le Foafoa mo le taunuuga e faavavau o Lana fanau”

Mafaufau e faaali upu mai le ulutala na muamua atu i luga o le laupapa i se faasologa e le’i fuafuaina. Tuu atu i tagata aoga se minute se tasi e taumafai ai e tatala i o latou mafaufau. Ona valaaulia lea o i latou e sue ma faailoga upu nei i le faaiuga o le palakalafa muamua o le “Aiga: O Se Folafolaga i le Lalolagi.”

Ona valaaulia lea o se talanoaga e faaaoga ai fesili e pei o fesili nei:

• Aisea e totonugalemu ai le aiga i le fuafuaga a le Atua mo le taunuuga e faavavau o Lana fanau?

• I le iloaina o loo feagai aiga uma ma tofotofoga ma tatou te le atoatoa uma, o le a se mea e te faasoa atu e uiga i le Tama Faalelagi, le Togiola a Iesu Keriso, ma le ata o le faaolataga lea e mafai ona fesoasoani i talavou e popole ai i o latou tulaga faaleaiga?

Mafaufau e lisi upu ma fasifuaitau nei i luga o le laupapa a o lei amataina le vasega. Valaaulia tagata aoga e faitau le lisi.

• O Le Taua o le Faaipoipoga

• Tatalaina o le Faaipoipoga

• Sauaina

• Faasinomaga o le itupa

• Faaipoipoga i le itupa tutusa

• Mauaina o fanau

• O sootaga feusuai i fafo atu o le faaipoipoga

• Faapau Pepe

• Fiafia i totonu o aiga

Manatua: A o e aoaoina atu le lesona o le aso, ia nofouta i le natura maaleale o autu o le a talanoaina. Atonu e te manao e faamanatu atu i tagata aoga e taumafai ia i ai le alofa faaKeriso, nofouta, ma le malamalama a o latou talanoaina nei autu.

• O fea o nei autu e i ai fesili po o popolega o tagata e uiga i aso nei?

• O fea e te manatu e masani ona o i ai tagata e saili ai tali e uiga i nei faafitauli?

  Mafaufau e tuu atu i tagata aoga se taimi e mafaufau loloto ai i lo latou malamalamaaga i nei mataupu ma po o a ni a latou fesili e ono i ai.

• Aisea e taua ai le iloa o mea ua aoao mai e le Atua e uiga i nei autu?

E mafai ona fesoasoani lenei lesona i tagata aoga e saili tali i nisi o a latou fesili ma popolega. Valaaulia i latou e saili faaaliga mai le Agaga Paia e taiala ai i latou a o latou suesueina le “O Le Aiga: O Se Folafolaga i le Lalolagi” i le asō ma le vaiaso atoa.

O le folafolaga i le aiga

Ina ia fesoasoani i tagata aoga ia malamalama i nisi o mafuaaga na musuia ai e le Alii le tusiaina o le folafolaga i le aiga, mafaufau e faasoa atu le faamatalaga lenei na faia ina ua faalauiloa mai le folafolaga.

Manatua: O le upu faa’ole’ole e faasino i a’oa’oga taufaasese.

Na taua e Peresitene Gordon B. Hinckley (1910–2008):

Faatasi ai ma le tele o faamatalaga sese ua talia o se mea sa’o, faatasi ai ma le tele o le taufaasese e faatatau i tulaga faatonuina ma tulaga faatauaina, faatasi ai ma le tele o taiga ma faatosinaga ina ia talia le faaleagaina lemu o le lalolagi, o lea ua matou manatu ai e lapatai atu ma muai lapatai atu. I le faateleina o lenei tulaga, o i matou o le Au Peresitene Sili ma le Aufono a Aposetolo e Toasefululua ua tuuina atu nei se folafolaga i le Ekalesia ma le lalolagi o se faalauiloaga ma se toe faamautuina o tulaga faatonuina, aoaoga faavae, ma faatinoga e faatatau i le aiga ia ua faaleoina so’o atu e perofeta, tagatavāai, ma tagata tali faaaliga a lenei ekalesia i le faagasologa o lona talafaasolopito. (Gordon B. Hinckley, “Stand Strong against the Wiles of the World,” Ensign, Nov. 1995, 100)

• O le a se mea e tu matila mai ia te oe e uiga i le mafuaaga na tuuina mai ai le folafolaga i le aiga?

Faitau parakalafa 1–3 o le folafolaga i le aiga, ma vaavaai mo mea na aoao mai e le Atua e uiga i nisi o autu o loo i luga o le laupapa.

Taulai atu i upumoni e taitai atu ai i le liua ma fausia le faatuatua ia Iesu Keriso: O le gaoioiga o loo i lalo ua fautuaina mai ai se auala se tasi mo tagata aoga e ta’u mai ai mataupu faavae o le liua latou te faailoa mai. Mo se fesoasoani i le a’oa’oina o lenei mea, tagai i le aoaoga ua faaautuina “Taulai atu i upumoni e taitai atu ai i le liua ma fausia ai le faatuatua ia Iesu Keriso” i le Tomai o le Atinaega o Faiaoga: Aoao Atu le Aoaoga Faavae. Mafaufau e faataitai le tomai “Fai fesili e fesoasoani ai i tagata aoga e faailoa ma faaupu mataupu faavae o le liuaina.”

Mafaufau e valaaulia tagata aoga e tusi upumoni latou te maua i autafa o le autu e faatatau i ai i luga o le laupapa. E mafai foi ona latou faasoa mai pe faapefea e le upumoni na latou tusia ona fesoasoani e talanoaina ai le autu e faatatau i ai.

O nisi nei o upumoni atonu na ta’ua mai e tagata aoga:

• O le aiga e totonugalemu i le fuafuaga a le Tama Faalelagi.

• O le itupa o se vaega taua lea o le faasinomaga ma le faamoemoega o tagata taitoatasi.

• O le fuafuaga a le Atua e mafai ai ona faaauau pea sootaga faaleaiga pe a mavae le oti.

E mafai ona avea lenei mea ma se avanoa lelei mo tagata aoga e faasoa mai ai ni malamalamaaga pe aumai ai ni fesili atonu o i ai.

O vaega nei e tolu o le lesona e suesue ai upumoni taitasi o loo i luga. E faalagolago i le taimi avanoa ma manaoga o au tagata aoga, filifili se tasi pe sili atu o nei upumoni e taulai atu i ai. Pe mafai foi ona e suesue i isi upumoni e sili atu ona talanoaina ai fesili ma manaoga o tagata aoga.

1. O le aiga e totonugalemu i le fuafuaga a le Tama Faalelagi mo Lana fanau.

Mafaufau e vaevae tagata aoga i ni paga. Valaaulia paga e feauauai i le faasoaina atu o mea uma latou te mafaia e uiga i le fuafuaga o le faaolataga a le Tama Faalelagi i le minute e tasi. Uunaia tagata aoga e mafaufau i vaega o le muai olaga, faaletino, ma le olaga nei o le fuafuaga.

• E faapefea ona avea le aiga ma totonugalemu o le fuafuaga a le Tama Faalelagi i le muai olaga? I le olaga nei? I o tatou olaga pe a mavae le olaga nei?

• Afai ua iloa e Satani lenei mea e uiga i le aiga, e faapefea ona e manatu e mafai ona ia tali atu i upumoni e uiga i le aiga?

Ina ia fesoasoani i tagata aoga ia malamalama atili pe aisea e totonugalemu ai le aiga i le fuafuaga a le Atua, mafaufau e valaaulia i latou e saili mo tusitusiga paia i lalo o le “Aiga” i le Taiala i Tusitusiga Paia. E le gata i lea, e mafai ona e tufatufaina atu le faamatalaga lenei mo tagata aoga e faitau taitoatasi ai. Mafaufau e uunaia tagata aoga e maka ia vaega o le saunoaga e tulaga ese mai ia i latou.

Na aoao mai Elder D. Todd Christoffferson o le Korama a Aposetolo e Toasefululua:

O le iloa ai o le mafuaaga na tatou tuua ai le afioaga o lo tatou Tama Faalelagi ma le mea e manaomia tatou te toe foi atu ai ma faaeaina faatasi ma Ia, ua matua manino ai lava e leai se mea e tusa ai ma lo tatou ola ai i le lalolagi e mafai ona sili atu ona taua nai lo le fanau mai faaleagaga ma le toefanauina faaleagaga, o mea ia e lua e tatau ona muamua maua mo le ola e faavavau. …

O se aiga e fausia i luga o le faaipoipoga o se alii ma se tamaitai e maua ai se faatulagaga sili mo le fuafuaga a le Atua ia lauusiusi—o le faatulagaga mo le fanauina o fanau, o e o mai i le mama a’ia’i ma le taumamaina mai le Atua, ma le siosiomaga mo le aoaoina ma sauniuniga o le a latou moomia mo se olaga manuia faaletino, ma se ola e faavavau i le lalolagi a sau. (D. Todd Christofferson, “Aisea e Faaipoipo ai, Aisea e Fai ai se Aiga,” Liahona, Me 2015, 51–52)

A uma ona latou maua se taimi e suesue ai i tusitusiga paia ma le faamatalaga, e mafai e tagata aoga ona talanoaina fesili nei i paga po o ni vaega toalaiti.

• O le a se mea na e aoaoina e uiga i le mafuaaga e totonugalemu ai le aiga i le fuafuaga a le Tama Faalelagi?

• Na faapefea ona e vaaia aiga o fesoasoani i tagata taitoatasi e saunia “mo se olaga faamanuiaina faaletino ma le ola e faavavau i le lalolagi a sau”?

• E mafai faapefea e nei aoaoga ona fesoasoani ia te oe e tali ai fesili ma popolega e uiga i le faaipoipoga ma le aiga?

2. O le itupa o se vaega taua lea o le faasinomaga ma le faamoemoega o tagata taitoatasi.

Mafaufau e tuu atu i tagata aoga se taimi e suesue taitoatasi ai nisi o punavai o loo i lalo. E mafai e fesili nei o le a mulimuli mai ona fai ma taiala mo latou a o latou suesue:

• Aisea e avea ai le itupa ma vaega taua o le faasinomaga ma le faamoemoega o tagata taitoatasi?

• E mafai faapefea ona tatou aoao atu upumoni e uiga i itupa ma le talitonuga maumaututu ae aloese mai le le magafagafa po o le le faaaloalo i isi?

“O Le Natura e Faavavau ma le Faamoemoega o le Itupa” (O Mea e Sauniuni ai le Vasega o le Aiga e Faavavau [2022], 29–33) (Matau vaega e tolu o lenei punaoa e amata i fesili.)

“Transgender: Understanding Yourself” i le “vaega Fesoasoani mo le Olaga” o le Potutusi o le Talalelei

“Transgender: Supporting Others” i le vaega “Fesoasoani mo le Olaga” o le Potutusi o le Talalelei

Afai e le maua e tagata aoga nei punaoa, mafaufau e fai ni kopi o le lesona 7 o le tusi lesona a le inisitituti O Mea e Sauniuni ai le Vasega o le Aiga e Faavavau mo tagata aoga e suesue ai i le vasega.

A ua lava loa le taimi e suesue ai tagata aoga, e mafai e volenitia ona faasoa mai ni malamalamaaga na latou maua.

I le avea ai o se vaega o lenei talanoaga, mafaufau e faasoa atu le saunoaga a Peresitene Russell M. Nelson i le “Punaoa Faaopoopo” ma valaaulia tagata aoga e faasoa mai le uiga ia i latou.

Mafaufau e faasoa atu auala na faamanuiaina ai lou olaga e ala i le i ai o se vaaiga e faavavau e uiga i lou faasinomaga ma le faamoemoega i lena vaaiga.

3. O le fuafuaga a le Atua e mafai ai ona faaauau pea sootaga faaleaiga pe a mavae le oti.

A o lei faitauina e tagata aoga fuaitau nei, e mafai ona e faamatala atu ia i latou se tasi e te iloa o lē sa tauivi i le maliu o se tagata o le aiga. Pe mafai foi ona e valaaulia tagata aoga e mafaufau i se tasi latou te iloa o lē na onosaia le maliu o se tagata o le aiga.

Faitau le 1 Korinito 15:22 ma le Mataupu Faavae ma Feagaiga 130:2, ma vaavaai mo le faamoemoe e mafai ona maua ia Iesu Keriso pe a maliu se tasi e pele ia te ia.

• E mafai faapefea e upumoni o le fuafuaga a le Atua i nei fuaiupu ona tuuina atu le malosi i se tasi o mafatia i se maliu faapena?

• E mafai faapefea e aoaoga o loo i le parakalafa lona tolu o le folafolaga i le aiga ona aafia ai se tagata o loo mafatia i le maliu o se tasi e pele ia te ia?

Ina ia fesoasoani i tagata aoga ia malamalama lelei i le natura e faavavau o aiga i le fuafuaga a le Atua, e mafai ona e faaali atu le vitio “Plan of Salvation—We’re Still a Family” (4:47), o loo maua i le ChurchofJesusChrist.org. Mafaufau e valaaulia tagata aoga e mafaufau pe na faapefea ona aafia lenei alii talavou i aoaoga a le Faaola e uiga i le aiga.

Faaiuga

Ina ia faaiuina le lesona, e mafai ona e valaaulia tagata aoga e toe mafaufau filemu i ai ma faamaumau a latou tali i fesili nei. E mafai e le au volenitia ona latou faasoa mea na latou tusia.

• O le a se mea ua e aoaoina i le asō ua fesoasoani ai ia te oe e lagona le latalata tele atu i le Tama Faalelagi ma Iesu Keriso?

• O a ni mea ua e aoaoina e uiga i le taua o le aiga i le fuafuaga a le Tama Faalelagi?

Punaoa Faaopoopo

O fea e mafai ona ou aoao ai i le auala e aoao atu ai upumoni e uiga i mataupu maaleale ma le talitonuga maumaututu a o aloese mai le le magafagafa po o le le faaaloalo i isi?

Tagai i vaega o loo i lalo o le “President Oaks on LGBTQ Issues” ma le “Elder Gilbert on LGBTQ Issues” i le Dallin H. Oaks ma Clark C. Gilbert, “Stand Fast with Love in Proclaiming Truth” (Ensign faigalotu a le Kolisi, 17 Me, 2022), ensign.edu.

Matamata i le Dallin H. Oaks ma Kristen M. Oaks, “Tu Atu mo le Upu Moni” (faigalotu i le lalolagi atoa mo talavou matutua, 21 Me, 2023), ChurchofJesusChrist.org, mai le faailo taimi 36:02 i le 38:34.

Ae faapefea pe afai e lagona e tagata e le aofia ai i latou i aoaoga o le folafolaga i le aiga?

Sa faasoa mai Peresitene Dallin H. Oaks o le Au Peresitene Sili:

E i ai nisi ua faafofoga mai i lenei savali ua faapea ane, “Ae a la a’u?” Ua matou iloa e toatele uso ma tuafafine lelei ma agavaa o le Au Paia o Aso e Gata Ai ua latou le maua i le taimi nei avanoa lelei ma mea taua o loo manaomia mo lo latou alualu i luma. O le nofofua, lē fanau, maliu, ma le tete’a ua le taulau ai faamoemoega ma tolopo ai le faataunuuina o faamanuiaga folafolaina. … Ae o nei lagona le fiafia e lē tumau. Ua folafola mai e le Alii e faapea i le faavavau, e leai se faamanuiaga o le a teena mai i ona atalii ma afafine o e latou te tausia poloaiga, ma faamaoni i a latou feagaiga, ma mananao i mea e sa’o. (Dallin H. Oaks, “O Le Fuafuaga Sili o le Fiafia,” Liahona, Nov. 1993, 75)

Aisea e taua ai le faaipoipoga i le fuafuaga a le Atua?

Na faasoa mai e Elder Robert D. Hales (1932–2017) o le Korama a Aposetolo e Toasefululua:

O le fuafuaga a le Tama ua tatou maua ai le auala e mautofi ai i le ola e faavavau, o le olaga ua taitaia e o tatou matua faalelagi. I le fuafuaga,“e leai se tane pe a le o i ai le fafine, [e leai foi] se fafine pe a le o i ai le tane, i le Alii” [1 Korinito 11:11]. O le aano moni o le ola e faavavau e aofia ai le faaipoipoga e faavavau o le alii ma le tamaitai, o se vaega e tatau ai o le avea e faapei o o tatou matua faalelagi. (Robert D. Hales, “O le Fuafuaga o le Faaolataga: O Se Oa Paia o le Malamalama e Taialaina i Tatou,” Liahona, Oke. 2015, 29)

Aisea ua tele ai le tetee i le aiga?

Sa aoao mai Peresitene Dallin H. Oaks o le Au Peresitene Sili:

O fouvalega aupito sili ona malolosi a Satani ua faasaga tonu lea i soo se mea e silisili ona taua i le fuafuaga a le [Atua]. O le mea lea, ua ia saili ai e tetee atu i le alualu i luma i le faaeaga e ala i le faaleagaina o faaipoipoga, faalotovaivaia le fanauina o fanau, po o le faafenumiai o itupa. Peitai, ua tatou iloa i le taufetuliga umi, o le faamoemoega paia ma le fuafuaga a lo tatou Tama Faalelagi alofa, o le a le suia lava. E ono suia tulaga faaletagata, ma e faamautinoa mai e le fuafuaga a le Atua e faapea i le taufetuliga umi, o ē faamaoni e tausia a latou feagaiga o le a mauaina le avanoa e agavaa ai mo faamanuiaga uma ua folafolaina. (Dallin H. Oaks, “O Le Alofa Paia i le Fuafuaga a le Tama,” Liahona, Me 2022, 103)

Na saunoa mai Elder Robert D. Hales (1932–2017) o le Korama a Aposetolo e Toasefululua:

O le faaipoipoga ma le aiga o loo i lalo o le osofaiga aua ua iloa e Satani o mea na e taua i le mauaina o le ola e faavavau—e pei o le taua o le Foafoaga, le Pa‘ū, ma le Togiola ma le Toetu o Iesu Keriso. I le lē faamanuiaina i le faaumatiaina o soo se tasi o na poutu o le fuafuaga, ua saili Satani e faaumatia lo tatou malamalama ma le faatinoga o faaipoipoga ma aiga. (Robert D. Hales, “O le Fuafuaga o le Faaolataga: O Se Oa Paia o le Malamalama e Taialaina i Tatou,” Liahona, Oke. 2015, 29)

O fea e mafai ona ou aoao atili ai e uiga i aoaoga a le Ekalesia e faatatau i mataupu tau i le suia o itupa?

Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.6 23, ChurchofJesusChrist.org.

E mafai faapefea e le taulai atu i la’u sootaga ma matua faalelagi ona faamanuiaina au?

Na faamatala mai e Peresitene Russell M. Nelson:

O ai oe?

O le mea muamua lava ma le sili, o oe o se atalii ma se afafine o le Atua.

Lua, i le avea ai ma se tagata o le Ekalesia, o oe o se tama o le feagaiga. Ma le tolu, o oe o se so’o o Iesu Keriso.

O le po nei, ou te augani atu ia te outou e ’aua ne’i suitulagaina nei faailoga silisili e tolu ma lē masuia i soo se mea lava, ona o le faia o lena mea o le a taofia ai lou alualu i luma pe tuu ai oe i se tulaga lē talafeagai e ono taofia ai lou alualu i luma e faavavau. …

O le mea moni, o loo i ai ni igoa valaau eseese atonu e taua tele ia te outou. Faamolemole aua ne’i malamalama sese mai ia te au. Ou te le o fai atu o isi faailoga ma igoa e iloa ai e le taua. E faigofie lava lau tala e leai se faailoga e tatau ona aveesea, suitulaga, pe faamuamua foi i lo nei faailoga tumau e tolu: “atalii/afafine o le Atua,” “tama o le feagaiga,” ma le “soo o Iesu Keriso.” (Russell M. Nelson, “Filifiliga mo le Faavavau” [faigalotu i le lalolagi atoa mo le autalavou matutua, 15 Me, 2022], broadcasts.ChurchofJesusChrist.org)

Na aoao mai Sister Joy D. Jones, sa avea muamua ma Peresitene Aoao o le Peraimeri:

O le a faamautu mai e le Agaga ia i tatou taitoatasi lo tatou taua paia. O le iloaina moni o oe o se [alo] o le Atua o le a aafia ai vaega uma o lou olaga ma taiala ai oe i auaunaga e te tuuina atu i aso taitasi. Sa faamalamalama mai e Peresitene Spencer W. Kimball (1895–1985) i upu mamalu nei:

“O le Atua o lou Tama. E alofa o Ia ia te oe. E matua le mafuatiaina le faatauaina o oe e Ia ma lou tina i le lagi. … E tulagaese oe. O se ituaiga e tasi, ua foafoa i le atamai e faavavau lea ua e maua ai le tofi i le ola e faavavau.

“Ia leai lava se fesiligiaina e lou mafaufau o lou tāua o se tagata patino. O le faamoemoega atoa lava o le fuafuaga o le talalelei o le mauaina lea o se avanoa mo outou taitoatasi ia ausia ai o outou gafatia atoa, o lona uiga o le alualu i luma e faavavau ma le avanoa i le tulaga atua.” [“Privileges and Responsibilities of Sisters,” Ensign, Nov. 1978, 105]. …

… A o siitia i tatou e le Faaola i faavae maualuga atu, e mafai ona sili atu ona manino la tatou vaai e le gata po o ai i tatou ae o le a tatou latalata atili ia te Ia nai lo le mea tatou te mafaufauina. (Joy D. Jones, “O Le Taua lē Mafuatiaina,”Liahona, Nov. 2017, 14, 15)

Gaoioiga Faaopoopo e Aoao Ai

Se isi amataga

Mafaufau e amata le vasega i le faasoa atu o le ata faataitai lenei:

A o sailiili ai i luga o upega tafailagi mo se galuega e faatino e le vasega, sa maua e Litia ni nai tusiga o loo finauina ai faapea o le aiga masani (se alii ma se tamaitai ua faaipoipo ma ni fanau) ua le o toe manaomia i faiganuu. I le taimi o le vasega i nai aso mulimuli ane, sa iloa ai e Litia ua na o ia sa taumafai e puipuia le taua o le aiga masani. O le toatele o tagata o lana vasega ua itiiti pe ua leai foi se faamuamua o faaipoipoga po o le faia o ni fanau. Ia i latou, o le faaipoipoga ma fanau ua faalavelave i mea e faataunuuina e tagata taitoatasi. O lea aafiaga na tuua ai Litia ma ni nai fesili ma lagona le mautonu.

E mafai ona e valaaulia tagata aoga e iloilo le tulaga e faaaoga ai fesili e pei o fesili nei:

• O a ituaiga fesili po o lagona atonu o loo i ai ia Litia?

• O le a se mea ua e iloa e uiga i le fuafuaga a le Tama Faalelagi e mafai ona fesoasoani ai ia Litia?

E mafai ona vaavaai tagata aoga mo upumoni e uiga i nei autu a o latou suesueina le “O Le Aiga: O Se Folafolaga i le Lalolagi” i le vaiaso atoa.

“O i latou taitasi o se afafine agaga faapelepele a ni matua faalelagi.”

Ina ia talanoaina atili lenei manatu mai le folafolaga i le aiga, e mafai ona e valaaulia tagata aoga e iloilo o latou lagona e uiga i lo latou faasinomaga o se tamaitiiti o matua faalelagi. Mafaufau e faasoa atu saunoaga a Peresitene Russell M. Nelson ma Sister Joy D. Jones mai le vaega o “Punaoa Faaopoopo”. E mafai ona e fai atu fesili e pei o nei:

• O le a se mea e tumatila ia te oe mai nei faamatalaga?

• O le a se mea ua fesoasoani ia te oe e talisapaia ai lou faasinomaga o se atalii po o se afafine o matua faalelagi?

• E mafai faapefea e le taulai atu i lo tatou tulaga i le aiga o le Atua ona fesoasoani mo se tasi o loo tauivi ma tulaga faigata faaleaiga i le lalolagi?

E mafai ona e faasino i le lesona 176, “O Lo Tatou Faasinomaga Paia ma le Faamoemoega,” o se punaoa faaopoopo.

Mauaina o le malamalama faaleagaga

Ina ia atiina ae atili soo se vaega o lenei lesona, e mafai ona e valaaulia tagata aoga e vaevae i ni vaega taitoatolu. E mafai e tagata aoga taitasi ona faitau se tasi o mataupu faavae o le mauaina o le malamalama faaleagaga (parakalafa 5–12 i le Pepa Autu o le Atamai i Aoaoga Faavae [2023]). E mafai ona vaavaai tagata aoga mo ni malamalamaaga e fesoasoani ia i latou ia malamalama lelei ai i se tasi o vaega o le lesona o le asō.