“Lesona 161—Faataitaiga o le Atamai i Aoaoga Faavae 10: Faaaoga Mataupu Faavae o le Mauaina o le Malamalama Faaleagaga,” Tusi Lesona a le Faiaoga Seminare o le Mataupu Faavae ma Feagaiga (2025)
“Faataitaiga o le Atamai i Aoaoga Faavae 10,” Tusi Lesona a le Faiaoga Seminare o le Mataupu Faavae ma Feagaiga
Lesona 161: “O Le Aiga: O Se Folafolaga i le Lalolagi”
Faataitaiga o le Atamai i Aoaoga Faavae 10
Faaaoga Mataupu Faavae o le Mauaina o le Malamalama Faaleagaga
O le atamai i aoaoga faavae e mafai ona fesoasoani i tagata aoga e fausia le faavae mo o latou olaga i luga o Iesu Keriso ma Lana talalelei. O lenei lesona o le a tuuina atu ai i tagata aoga le avanoa e faasoa atu ai fuaitau o le atamai i aoaoga faavae e anoa i o latou olaga ma fesoasoani ia i latou e aoao ma faaaoga mataupu faavae paia mo le mauaina o le malamalama faaleagaga.
Gaoioiga E Ono Mafai Ona Aoao Ai
Iloiloga o le atamai i aoaoga faavae: Faasoa
Ina ia fesoasoani i tagata aoga e toe faamanatu faapuupuu mea ua latou aoaoina i lenei tausaga ma saunia i latou e faasoa atu fuaitau o le atamai i aoaoga faavae ua aafia ai o latou olaga, mafaufau e tusi le fuaitau e le uma O se tasi o mea ou te fiafia i ai … i luga o le laupapa.
E mafai ona e faaumaina le fuaitau i ni nai auala eseese, e pei o tagata i le talafaasolopito o le Ekalesia, tala na tatou aoaoina i lenei tausaga, po o mea na ou aoaoina mai se tamaitiiti o le vasega. Mo auala taitasi e te faamaeaina ai le fuaitau, faataga tagata aoga e faasoa puupuu atu i se paga a latou tali ma le mafuaaga na latou filifilia ai.
Ma le mea mulimuli, faatumu le fuaitau i fuaitau o le atamai i aoaoga faavae. Tuu atu i tagata aoga se taimi e toe faamanatu ai le lisi o fuaitau o le atamai i aoaoga faavae i le Pepa Autu o le Atamai i Aoaoga Faavae (2023). Valaaulia i latou e faasoa atu i se paga le fuaitau na latou filifilia ma lona uiga ia i latou. Ia mautinoa e lava se taimi mo le gaoioiga faataitai o le faaaogaina lenei.
Aoao ma faaaoga mataupu faavae o le mauaina o le malamalama faaleagaga
A o lei faailoaina atu le tala lenei, atonu e aoga le faatagaina o tagata aoga e toe faamanatu faapuupuu ia mataupu faavae o loo i parakalafa 5–12 i le vaega “Mauaina o le Malamalama Faaleagaga” o le Pepa Autu o le Atamai i Aoaoga Faavae. (O gaoioiga toe faamanatu fautuaina o loo aofia ai le “Gaoioiga o le Iloiloga o le Atamai i Aoaoga Faavae” i le faaopoopoga o lenei tusi lesona.)
Manatua: O le autu fautuaina i lenei lesona e mafai ona matua ma’ale’ale ma patino i le toatele o tagata aoga. A o talanoaina e le vasega le tala lenei, faamanatu atu ia i latou le alofa o le Atua mo Ana fanau uma ma Lona finagalo ia tatou taulimaina tagata uma i le faaaloalo ma le alofa.
Tagai i le vaega o le “Isi Vaaiga faataitai” i le “Gaoioiga Faaopoopo e Aoao Ai” pe afai e te lagona e sili atu mo tagata aoga ona faataitai le faaaogaina o mataupu faavae o le mauaina o le malamalama faaleagaga i se isi tulaga.
Na faamatala e Elder Jeffrey R. Holland o le Korama a Aposetolo e Toasefululua se alii talavou sa feagai ma se luitau faigata tele. A o e faitau e uiga i le tulaga o lenei alii talavou, mafaufau loloto pe aisea e taua ai mo ia le faaaogaina o mataupu faavae o le mauaina o le malamalama faaleagaga.
Ou te talanoa atu e uiga i se alii talavou na ulu atu ma le agavaa i le misiona, ae ona o ana lava filifiliga sa toe vave faafoi ai i le fale ona o le tosina atu i le itupa e tasi ma nisi o faafitauli na oo i ai i lena lava tulaga. Sa agavaa pea o ia, ae sa matua lamatiaina lona faatuatua, sa faateleina le mamafa o ana avega faalelagona, ma sa atili matuitui ai le tiga faaleagaga. Sa fesuisuiai ona lagona i le tiga, le mautonu, ita, ma le faaesea. (Jeffrey R. Holland, “Behold Thy Mother,” Liahona, Nov. 2015, 49)
E mafai ona e fesoasoani e saunia tagata aoga e vaai i le taua o lenei lesona e ala i le faatagaina o i latou e faagaoioia o latou malamalamaaga ma lagona e fesootai ma tulaga faapenei. E mafai ona e uunaia tagata aoga e tusi o latou manatu i a latou api faamaumau mo suesuega e ala i le faaali atu o uunaiga e pei o mea nei:
-
O a ni fesili po o ni atugaluga e uiga i le fuafuaga a le Tama Faalelagi po o le Ekalesia e te manatu e ono i ai i lenei alii talavou?
-
E mafai faapefea ona aafia lana sootaga ma le Tama Faalelagi i nei fesili po o popolega?
-
Aisea e taua ai mo tagata o loo i ai i tulaga tutusa le malamalama ma faaaoga mataupu faavae o le mauaina o le malamalama faaleagaga? Aisea e taua ai mo a latou uo ma aiga le faaaogaina foi o na mataupu faavae?
Ia manatua e le mafai e lenei lesona ona taliina fesili uma e ono i ai i tagata aoga. E le’i faaalia mai e le Atua tali uma. O lenei lesona ua fuafuaina e fesoasoani ai i tagata aoga ia avea ma soo faamaoni o Iesu Keriso e ala i le faaaogaina o mataupu faavae o le mauaina o le malamalama faaleagaga a o latou feagai ma fesili ma popolega i o latou olaga.
Valaaulia tagata aoga e faasoa atu i le vasega mea ua latou aoaoina e uiga i mataupu faavae o le mauaina o le malamalama faaleagaga latou te lagona o le a sili ona fesoasoani i lenei alii talavou, ana uo, po o lona aiga. Ia faaalu se taimi tele mo lenei talanoaga.
E faalagolago i le taimi avanoa pe a uma le talanoaga, e mafai ona e filifili mai anomea o totoe o le lesona e fesoasoani ai i tamaiti aoga ia malamalama lelei i nei mataupu faavae.
O le a le mea na faia e le alii talavou?
Mafaufau e fai atu i tagata o le vasega e sue se paga ma tuu atu i paga taitasi se kopi o le vaega o totoe o le tala na faamatalaina e Elder Holland. Valaaulia i latou e vase lalo o faamaoniga o le auala na faaaoga ai e lenei alii talavou ma isi ia mataupu faavae o le mauaina o le malamalama faaleagaga.
Ona mafaufau lea e faaali atu fesili o loo i lalo mo paga e talanoaina.
Sa faaaluina e lona peresitene misiona, lona peresitene o le siteki, lona epikopo le anoanoai o itula e sailiili ai ma tagi ma faamanuiaina o ia. … Na tuuina atu e [lona tina] i lana tama lana molimau i le mana o le Atua, e uiga i Lana Ekalesia, aemaise lava Lona alofa mo lenei tamaitiiti. I lea lava taimi e tasi, sa ia molimau atu foi e uiga i lona lava alofa le fetuutuunaia, le masuia, ma lē faaitiitia mo ia. …
O tulaga faalefeusuaiga o lenei [alii talavou] sa lei suia i se vavega—ma e leai se tasi e manatu o le a suia vave. Ae o sina mea itiiti i lea taimi ma lea taimi na suia ai lona loto.
Sa amata ona toefoi mai le lotu. Sa ia filifili e taumafa i le faamanatuga ma le naunautai ma le agavaa. Sa ia toe maua foi se pepa faataga o le malumalu ma taliaina se valaauga e auauna atu o se faiaoga seminare i le vaveao, lea sa matua faamanuiaina ai o ia. Ma o lenei, i le mavae ai o le lima tausaga, ma i lana lava talosaga faatasi ai ma le fesoasoaniga iloga a le Ekalesia, ua ia toe ulufale atu ai i le misiona e faamaea lana auaunaga i le Alii. Sa ou tagi i le lototele, amiotonu ma le naunautai o lenei alii talavou. (Jeffrey R. Holland, “Behold Thy Mother,” Liahona, Nov. 2015, 49)
-
E faapefea e filifiliga na faia e le alii talavou ona faaalia ai lona faatuatua ia Iesu Keriso? O le a sou manatu na faapefea e aga filifiliga ona aafia ai lona sootaga ma le Tama Faalelagi?
-
Aisea e te manatu ai e taua le filifili o lona tina e molimau atu ia te ia i le alofa o le Atua mo ia?
-
O le a se faamaoniga ua e vaaia na ia liliu atu i punavai na tofia mai le Atua? E te manatu na faapefea e ana punavai na filifilia ona uunaia ai lona faatuatua ia Iesu Keriso?
-
A faapea e lē mafai e lenei alii talavou ona maua ni tali i nisi o ana fesili po o popolega. O le a se mea e te iloa e uiga i le Tama Faalelagi ma Lana fuafuaga e mafai ona fesoasoani mo ia e manatua?
Faatumu le avanoa
Mo lenei gaoioiga, mafaufau e tusi i luga o le laupapa ia faamatalaga e tolu e le’i uma o loo i lalo.
Filifili se tasi o faamatalaga nei mai le Pepa Autu o le Atamai i Aoaoga Faavae ma taumafai e faauma mai le manatuaina. Ona siaki lea o lau tali e faaaoga ai parakalafa 5–12 o le vaega “Mauaina o le Malamalama Faaleagaga”.
-
“I taimi atonu tatou te le vave maua ai tali i a tatou fesili …”
-
“Tatou te sailia le fesoasoani a le Agaga Paia ina ia …”
-
“O le aoao ia iloa ma aloese mai punavai e le faatuatuaina e mafai …”
Mafaufau pe aisea e taua ai mataupu faavae o loo i le faamatalaga na e filifilia mo le alii talavou ma ana uo ma aiga ina ia malamalama ai.
Valaaulia tagata aoga e feoai solo i le potu ma faasoa atu ni malamalamaaga i le tasi ma le isi. Atonu e te uunaia i latou e saili pea ni paaga fou seia oo ina latou faasoa atu o latou manatu ia le itiiti ifo ma le toatasi se tagata na filifilia le filifiliga 1, o se tasi na filifilia le filifiliga 2, ma se tasi na filifilia le filifiliga 3.
Punaoa paia filifilia
Mafaufau e faaali atu fesili nei. Ona tuu atu lea i tagata aoga se taimi ia lava e saili ai mo mau ma faamatalaga a o lei valaaulia i latou e tali leotele.
Afai e manaomia, e mafai ona e tuuina atu i tagata aoga ia punaoa fautuaina i le vaega o “Punaoa Faaopoopo”.
-
O fea o fuaitau o le atamai i aoaoga faavae mai le Mataupu Faavae ma Feagaiga (po o isi tusi o tusitusiga paia) e te manatu e mafai ona fesoasoani i lenei alii talavou?
-
O a faamatalaga mai taitai o le Ekalesia o le a fesoasoani mo ia po o e pele ia te ia e suesue ai?