Lesona 176: Mo Le Malosi o le Autalavou: Faia o Filifiliga

O Lo Tatou Faasinomaga Paia ma le Faamoemoega

Ua Iai so Tatou Natura Paia ma se Taunuuga

I le avea ai ma fanau o ni matua faalelagi, e mafai ona avea i tatou e pei ona i ai i latou ma mautofi i mea ua latou maua. O nei faamanuiaga o loo avanoa mo i tatou taitoatasi ona o Iesu Keriso ma Lana Togiola. O lenei lesona e mafai ona fesoasoani i tagata aoga ia lagona faapea i le avea ai ma fanau a le Atua, ua ia i latou se natura paia ma se faamoemoega.

Gaoioiga E Ono Mafai Ona Aoao Ai

O ai a’u ma o le a lo’u faamoemoega?

Amata le lesona e ala i le fesoasoani i tagata aoga e mafaufau e uiga i le faigofie ona galo o lo tatou faasinomaga paia ma le taua. E mafai ona e faia lenei mea e ala i le faasoa atu o le vitio “Our True Identity” (3:39) mai le faailo taimi 0:00 i le 1:14. Valaaulia tagata aoga e mafaufau pe faapefea ona tatou vaai ia i tatou lava o se pato auleaga. Ona mafai lea ona e fai atu i tagata aoga e fatu se vaaiga faataitai e pei o lenei, lea atonu e lagona ai e se tagata le pei o se pato auleaga pe a galo ia i latou lo latou faasinomaga paia o se atalii/afafine o le Atua.

Pe e mafai foi ona e amata i le faasoa atu o se vaaiga faataitai e pei o lea, fetuunai soo se faamatalaga e atagia ai ni atugaluga atonu o i ai i au tagata aoga.

E 15 tausaga o Amelia. E masani ona ia lagonaina le tuuatoatasi ma le lē ano i ai o se isi. Sa moomoo o ia e tele atu ni ana uo ma ese foi le latou vaaiga nai lo ia. Ua vaai Amelia i isi o faia ni mea taua ae e le manatu ua lava lona lelei e faia ai soo se mea taua. E masalosalo o ia i lona taua faaletagata.

• O le a se mea e faigata ai ona manatua lo tatou faasinomaga o ni fanau a le Atua?

Faamalamalama atu o le taimi o lenei lesona o le a aoao ai tagata aoga e uiga i lo latou faasinomaga paia o ni afafine ma atalii o le Atua. Valaaulia i latou e mafaufau e uiga i nisi o auala e aafia ai o latou olaga i le iloaina o i latou o fanau a le Atua. E mafai ona latou tusi o latou manatu i a latou api faamaumau mo suesuega. Valaaulia tamaiti aoga e faalogologo mo le Agaga Paia o aoaoina i latou e uiga i lo latou faasinomaga paia ma le faamoemoega.

Natura paia ma le faamoemoega

Mo le gaoioiga lenei, e mafai ona e vaevaeina le vasega i ni vaega toalaiti. Valaaulia tagata aoga e faaaoga le pepa e tufa atu “O Lo’u Faasinomaga Paia ma le Faamoemoega” e saunia ai se tali ia Amelia. Tofi se taitai vaega e mafai ona fesoasoani i la latou vaega e faataunuu ni matafaioi eseese. Mo se faataitaiga, e mafai e se tasi tamaitiiti aoga ona faitau, e mafai e le isi ona tusi se tali, ae o le isi e mafai ona i ai i le vasega.

E mafai e tagata aoga ona sue tusitusiga paia faaopoopo po o faamatalaga e ala i le suesueina o le “natura paia” po o le “taunuuga paia” i le Potutusi o le Talalelei.

Faitau tusitusiga paia ma faamatalaga o i le pepa e tufa atu. Sue fasifuaitau e te manatu e mafai ona fesoasoani ia Amelia, ma mafaufau pe aisea atonu e aoga ai.

O Lo’u Faasinomaga Paia ma le Faamoemoega

1. Faitau le saunoaga lenei a Elder Dieter F. Uchtdorf o le Korama a Aposetolo e Toasefululua, ma vaavaai mo manaoga o le Faaola mo oe:

Ou te talitonu e finagalo le Faaola o Iesu Keriso ia te oe ia e vaai, lagona, ma iloa o Ia o lou malosiaga. O lena malosiaga faatasi ma Lana fesoasoani, e leai ai ni tapulaa i mea e mafai ona e ausiaina. O lou gafatia e lē faatapulaaina. E finagalo o Ia e te vaai ia te oe lava ia i le ala o loo Ia silasila mai ai ia te oe. Ma e ese tele lena mea mai le ala e vaai atu ai le lalolagi ia te oe.

O le a tautino mai le Faaola, i ni faaupuga mautinoa, o oe o se afafine po o se atalii o le Atua Silisiliese. O lou Tama Faalelagi o le tagata aupito silisili ona mamalu i le atulaulau, tumu i le alofa, olioli, mama, paia, malamalama, alofa tunoa, ma le upumoni. Ma e i ai le aso e finagalo ai o Ia e te mautofi i mea uma o loo ia te Ia. (Dieter F. Uchtdorf, “O Iesu Keriso o le Malosi o le Autalavou,” Liahona, Nov. 2022, 9–10)

Faitau le Mataupu Faavae ma Feagaiga 14:7, ma vaavaai mo mea e mana’o le Tama Faalelagi e tuuina atu ia te oe.

---

2. Faitau le saunoaga lenei a Sister Michelle D. Craig, a o i ai muamua i le Au Peresitene Aoao o Tamaitai Talavou, ma vaavaai mo lana fautuaga i soo se tasi e fesiligia lo latou taua paia:

Atonu o mea aupito i taua mo i tatou, o le vaai manino lea po o ai le Atua ma pe o ai moni foi i tatou—o atalii ma afafine a ni matua faalelagi ua i ai se “natura paia ma se faasinomaga e faavavau” [Young Women theme, ChurchofJesusChrist.org]. Ole atu i le Atua e faaali atu nei upumoni ia te oe, faatasi ai ma Ona lagona e uiga ia te oe. (Michelle D. Craig, “Mata e Vaai Ai,” Liahona, Nov. 2020, 15)

Faitau le Mataupu Faavae ma Feagaiga 18:10–13, ma vaavaai pe o a lagona o le Tama Faalelagi e uiga ia te oe.

---

3. Faitau le saunoaga lenei a Peresitene Susan H. Porter, Peresitene Aoao o le Peraimeri, ma vaavaai pe aisea e manaomia ai e i tatou taitoatasi ona iloa lagona o le Tama Faalelagi e uiga ia i tatou:

A e iloa ma malamalama i le atoatoa o le alofagia o oe o se atalii/afafine a le Atua, e suia ai mea uma. E suia ai ou lagona e uiga ia te oe lava pe a e faia ni mea sese. E suia ai ou lagona pe a tutupu mea faigata. E suia ai lau vaai i poloaiga a le Atua. E suia ai lau vaaiga i isi ma lou gafatia e faia ai se eseesega. (Susan H. Porter, “O Le Alofa o le Atua: E Silisili Ona Olioli i le Agaga,” Liahona, Nov. 2021, 33)

---

4. Faitau le saunoaga lenei a Peresitene Russell M. Nelson, ma vaavaai mo mea na Ia aoao mai e uiga i faamoemoega o lo tatou Tama Faalelagi mo i tatou taitoatasi:

O le fuafuaga a le Tama Faalelagi mo Ana fanau ua faatagaina ai i tatou ia ola i le nofoaga ma le auala o loo Ia soifua ai ma ia avea atili e faapei o Ia. O Lana fuafuaga ua avanoa moni ai mo i tatou ia faamanuiaga silisili o le faavavau, e aofia ai le gafatia mo i tatou e avea ai ma ‘suli faatasi ma Keriso [Roma 8:17]. (Russell M. Nelson, “Filifiliga mo le Faavavau” [faigalotu i le lalolagi atoa mo le autalavou matutua, 15 Me, 2022], broadcasts.ChurchofJesusChrist.org)

Afai e aoga mo tagata aoga, e mafai ona e faaali atu le vaega o totoe o le vitio “Our True Identity” (3:39) mai le taimi faailo 1:15 i le 3:39. E mafai e tagata aoga ona taofi a latou talanoaga faavaega e matamata ai le vitio. Ona valaaulia lea o tagata aoga e faaopoopo i mea e mafai ona latou faasoa atu ia Amelia.

A uma ona faia e tagata aoga a latou talanoaga faavaega, valaaulia i latou e lipoti mai mea sa latou suesueina i le vasega. Ina ia uunaia le talanoaga a le vasega, e mafai ona e valaaulia tagata aoga e faasoa mai mea na latou maua e aogā e uiga i manatu faaalia o isi.

O le taua o le tagata ua avea ai au ma e mafai ona avea ai

O le tusiga o le api talaaga e mafai ona fesoasoani i tagata aoga e faalolotoina ai lo latou malamalama ma iloa atili ai i o latou lagona. E mafai foi ona fesoasoani i tagata aoga e valaaulia le Agaga Paia e aoao i latou. Valaaulia tagata a’oga e tali fesili nei i a latou api talaaga mo suesuega.

• O a ni ou mafaufauga po o lagona na i ai a o e suesue e uiga i lou faasinomaga paia ma le faamoemoega o se atalii/afafine o le Atua?

• O le a sou manatu e mafai faapefea e lenei malamalama ona aafia ai faaiuga e te faia po o le ala e te taulima ai isi?

• O a ni ou aafiaga na fesoasoani ia te oe e te lagona ai o oe o se atalii/afafine o le Atua ma se taunuuga paia?

Valaaulia tamaiti aoga naunau e faasoa mai o latou lagona ma aafiaga e uiga i le taua o lo latou natura paia ma le taunuuga.

Mafaufau e tuuina atu lau molimau e uiga i le faasinomaga paia ma le faamoemoega o fanau taitasi a le Atua.

Punaoa Faaopoopo

E mafai faapefea ona maua lo’u taunuuga e faavavau?

Na aoao mai Elder Gary E. Stevenson o le Korama a Aposetolo e Toasefululua e faapea:

Ou te valaaulia outou ia o mai ia Keriso (tagai Moronae 10:32). E leai se mea i le fuafuaga e faavavau a le Atua e mafai e aunoa ma Ia, ma faatasi ai ma Ia, e mafai ai ona ausia mea lelei uma. …

… E ala ia Iesu Keriso ma Lana togiola alofa tunoa, e mafai ai ona e maua le olioli i lenei olaga ma le olaga a sau. E mafai ona e iloa lou faasinomaga paia o le mauaina o mea uma ua ia te Ia ma ola ai i le ituaiga olaga o loo Ia soifua ai, o le “ola e faavavau, … o le meaalofa silisili o meaalofa uma a le Atua” (Mataupu Faavae ma Feagaiga 14:7). (Gary E. Stevenson, “O Lou Taunuuga Paia,” Mo le Malosi o le Autalavou, Ian. 2022, 5)

Ua faamatala e leMo Le Malosi o le Autalavou: O Se Taiala mo le Faia o Filifiliga :

O oe o se atalii/afafine la le agaga faapelepele o le Atua. O Lana fuafuaga sili o le fiafia ua mafai ai e oe ona tuputupu ae faaleagaga ma atiina ae lou gafatia paia. O le mafuaaga lea na Ia auina mai ai Iesu Keriso e avea ma ou Faaola. (Mo Le Malosi o le Autalavou: O Se Taiala mo le Faia o Filifiliga [2022],4)

O le a lo’u natura paia?

Ua ta’utino le “O Le Aiga: O Se Folafolaga i le Lalolagi”:

O tagata uma —tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga. O le itupa o le tane po o le fafine o se vaega taua lea o le mua’i olaga, olaga faitino, ma le faasinomaga e faavavau ma le faamoemoega. (“O Le Aiga: O Se Folafolaga i le Lalolagi,” ChurchofJesusChrist.org)

Na aoao mai Elder Dale G. Renlund o le Korama a Aposetolo e Toasefululua:

E i ai lo tatou natura paia.” O se vaega taua lea po o ai i tatou. O se “kenera” faaleagaga e tuufaasolo mai i o tatou matua faalelagi, ma e le manaomia ai sa tatou taumafaiga. O so tatou faasinomaga sili ona taua lea, e tusa lava po o le a se isi mea tatou te filifili e faailoa ai i tatou. O le malamalama i lenei upumoni loloto e taua mo tagata uma aemaise lava mo tagata taitoatasi o loo i ai i ni vaega o e sa faaesea, sauaina, pe na faatoilaloina. Manatua o lou faasinomaga sili ona taua e faatatau i lou natura paia o se atalii/afafine o le Atua. (Dale G. Renlund, “O Lou Natura Paia ma le Taunuuga e Faavavau,” Liahona, Me 2022, 75)

O le a se mea e mafai ona fesoasoani ia te au e iloa ai lo’u natura paia ma le taunuuga e faavavau?

Na valaaulia e Peresitene Russell M. Nelson:

Aoao po o ai moni lava oe.

Faaalu se taimi e mafaufau ai ma le agaga tatalo e uiga i nei mea moni:

• O oe o se atalii po o se afafine filifilia o le Atua.

• Ua foafoaina oe i Lona faatusa.

• Na aoaoina oe i le lalolagi o agaga e saunia ai oe mo soo se mea ma mea uma o le a e feagai ai i le taimi o lenei vaega o nei aso e gata ai. O lena aoaoga e tumau i totonu ia te oe!

(Russell M. Nelson, “Becoming True Millennials” [fagalotu i le lalolagi atoa mo talavou matutua, Jan. 10, 2016], broadcasts.ChurchofJesusChrist.org)

Gaoioiga Faaopoopo e Aoao Ai

Fesili ma atugaluga o tagata aoga

I le amataga o le vasega, atonu e aoga le valaaulia o tagata aoga e tusi i lalo ni fesili po o ni atugaluga latou te iloa po o se tasi latou te iloa e uiga i lo latou faasinomaga paia ma le faamoemoega. E mafai ona e aoina pepa ma filifili ni fesili se lua e talanoaina i le taimi o le lesona.

Lagonaina le alofa o le Atua

O nisi tagata aoga atonu e manuia mai le aoaoina pe mafai faapefea ona latou lagonaina atili le alofa o le Atua mo i latou. E mafai e tagata aoga ona faailoa mai mea ua latou aoaoina e uiga i le alofa o le Atua mai le saunoaga lenei a Elder Dale G. Renlund o le Korama a Aposetolo e Toasefululua.

O oe o se [atalii/afafine faapelepele o le Atua]. E leai se mea e mafai ona e faia—pe le faia—e mafai ona suia ai lena mea. E alofa le Atua ia te oe aua o oe o Lona [atalii/afafine] la le agaga. O nisi taimi tatou te le lagona ai Lona alofa, ae e i ai iina i taimi uma. E atoatoa le alofa o le Atua. Ae o nisi taimi e le mafai ona tatou lagonaina lena alofa. (Dale G. Renlund, “O Lou Natura Paia ma le Taunuuga e Faavavau,” Liahona, Me 2022, 70)

E mafai ona e fai atu i le vasega se fesili faapenei:

• O le a se mea e mafai ona e faia e mafai ona fesoasoani ia te oe e lagona ai le alofa o le Atua mo oe?

Ona mafai lea ona e faaali atu le vaega o lana lauga lea e sosoo vave lava ma lenei faamatalaga. A o e faia, e mafai e tagata aoga ona lisi mea e mafai ona latou faia e lagona ai le alofa o le Atua ma mea e tatau ona latou aloese mai ai. Ona mafai lea e tagata aoga ona filifili se mea se tasi mai la latou lisi latou te mananao e amata pe taofi le faia.

Vitio

O vitio nei e mafai ona fesoasoani i tagata aoga ia malamalama ai ma lagonaina le taua o lo latou faasinomaga paia ma le faamoemoega.

O le vitio “Our Divine Destiny” (3:42) e aofia ai le autalavou o loo faasoa mai pe faapefea e le iloaina o lo latou taunuuga paia ona fesoasoani i o latou olaga.

O le vitio “Running toward the Light” (17:35) e mafai ona fesoasoani i tagata aoga ia lagonaina le taua o le iloaina o lo latou faasinomaga ma le taunuuga paia. E mafai ona outou talanoaina le ala na mafai ai e Peter Johnson ona suia le ala o lona olaga e ala i le aoao e uiga ia Iesu Keriso ma e uiga i lona lava natura paia ma lona faasinomaga.

O le vitio “Our Eternal Potential” (2:53) e mafai ona fesoasoani i tagata aoga e talanoaina mea e faalavelaveina ai i tatou mai o tatou gafatia e faavavau ma mea e mafai ona tatou faia e faatumauina ai lo tatou taulai atu i le Faaola ma mea ua Ia ofoina mai ia i tatou.

O vaega nei o vitio e mafai ona faaalia ai le aafiaga o le manatuaina o lo tatou natura paia ma le faasinomaga:“Am I a Child of God?” (10:24) mai le faailo taimi 2:22 i le 5:23 ma le “The Choice Generation” (11:23) mai le faailo taimi 5:41 i le 7:13.