Lesona 178: Mo Le Malosi o le Autalavou: Faia o Filifiliga

Faamanuiaga Faapeteriaka

“Tusitusiga Paia Patino ia te Oe”

E tele auala e tuuina mai ai e lo tatou Tama i le Lagi alofa le taitaiga ma le faasinoga i Ana fanau. O se tasi auala na Ia faia ai lenei mea e ala mai faamanuiaga faapeteriaka. O lenei lesona e mafai ona fesoasoani i tagata aoga ia lagonaina le finagalo o le Alii e taiala i latou e ala i o latou faamanuiaga faapeteriaka.

Gaoioiga E Ono Mafai Ona Aoao Ai

Faasinoga i o tatou olaga

Mafaufau e faaali atu le ata lenei pe tusi se ata talitutusa i luga o le laupapa.

• O a nisi o vaega o lou olaga atonu e te lagona ai le pei o le tagata o loo i lenei ata? Aisea?

• O le a se mea e mafai ona fesoasoani ia i tatou e iloa ai le mea e fai pe a tatou le mautinoa le taitaiga e tatau ona tatou faia i le olaga?

Faamalamalama atu o loo aoao mai e tusitusiga paia upumoni taua e uiga i le Atua e mafai ona fesoasoani ia i tatou pe a tatou manaomia le taitaiga.

Faitau le Mataupu Faavae ma Feagaiga 6:14; 42:61; ma le 112:10, ma vaavaai mo upumoni e mafai ona fesoasoani ia i tatou pe a tatou feagai ma tulaga le mautinoa.

Valaaulia tagata aoga e faasoa ni upu moni sa latou mauaina. I le faaaogaina o a latou lava upu, e mafai ona latou faasoa atu upumoni e pei o:

O le tele o taimi tatou te ole atu ai ile Atua, o le a Ia aoaoina i tatou e ala i Lona Agaga (Mataupu Faavae ma Feagaiga 6:14).

Afai tatou te ole atu, o le a faamanuiaina i tatou e le Atua i faaaliga e faaopoopo i luga o faaaliga (Mataupu Faavae ma Feagaiga 42:61).

O le a taitai i tatou e le Atua i le lima ma tuuina mai ia i tatou tali i a tatou tatalo (Mataupu Faavae ma Feagaiga 112:10).

E mafai foi ona e fai i tagata aoga e faasoa mai isi tusitusiga paia latou te iloa e faaalia ai le naunau o le Atua e tuuina mai ia i tatou le taitaiga ma le faasinoga.

• E mafai faapefea e le manatuaina o nei upumoni ona aafia ai ou lagona po o uiga faaalia i le Atua?

• O a nisi o auala ua tuuina mai ai e le Atua ia i tatou le taitaiga mo o tatou olaga?

Faamanuiaga faapeteriaka

Afai e manaomia, ta’u atu o faamanuiaga faapeteriaka o se tasi lea o auala e mafai ona tatou maua ai le taitaiga mai le Atua. Ina ia fesoasoani i tagata aoga e iloilo lo latou malamalama i le taimi nei e uiga i faamanuiaga faapeteriaka, mafaufau e faaali atu le anotusi lenei ma tuu atu i tagata aoga se taimi e tali le leoa ai i faamatalaga po o a latou api talaaga mo suesuega.

O le faaaogaina o se fuafaatatau mai le tasi (e le moni) i le lima (matua moni), mafaufau loloto pe faapefea ona moni faamatalaga taitasi nei mo oe:

1. Ua ou malamalama i le uiga o se faamanuiaga faapeteriaka.

2. Ou te iloa le auala e mafai ai e se faamanuiaga faapeteriaka ona aafia ai lo’u olaga.

3. Ou te talitonu e mafai e le Atua ona tuuina mai ia te au le taitaiga mo lou olaga e ala i lou faamanuiaga faapeteriaka.

Tuu atu i tagata aoga se taimi e tusi ai i lalo ni a latou fesili e uiga i faamanuiaga faapeteriaka i luga o le laupapa. Atonu e iai ni latou fesili e pei o nei::

• O le a le faamanuiaga faapeteriaka?

• E mafai faapefea e se faamanuiaga faapeteriaka ona aafia ai lo’u sootaga ma le Tama Faalelagi ma Iesu Keriso?

• E mafai faapefea ona ou sauni mo lo’u faamanuiaga faapeteriaka?

• O afea e tatau ai ona maua lo’u faamanuiaga faapeteriaka?

Filifili ia le itiiti ifo ma le tasi se fesili e uiga i faamanuiaga faapeteriaka e te fia taliina. Tusi au fesili i le pito i luga o se itulau o le api talaaga po o se itulau o faamatalaga i luga o lau masini feaveai. Saili le taitaiga a le Tama Faalelagi e ala i le Agaga Paia e fesoasoani ia te oe e saili tali i au fesili.

Taliina o fesili e uiga i faamanuiaga faapeteriaka

Tuu atu i tagata aoga se taimi e sue ai tali i a latou fesili e uiga i faamanuiaga faapeteriaka. Mafaufau i manaoga ma tomai o au tagata aoga i le fuafuaina pe o le a faapefea ona latou vaavaai mo ni tali. Atonu e aoga mo nisi le vaavaai mo tali i ni vaega toalaiti.

Filifili mai filifiliga nei e sue ai tali i au fesili e uiga i faamanuiaga faapeteriaka:

1. Saili punaoa o loo maua i le polokalama o le Potutusi o le Talalelei. Mo se faataitaiga, e mafai ona e suesue i le “Faamanuiaga Faapeteriaka” i Autu o le Talalelei pe saili mo “faamanuiaga faapeteriaka” i lauga o konafesi aoao.

2. Suesue se tasi o saunoaga nei mai le konafesi aoao ia Aperila 2023: “O Le Taimi e Maua ai Lou Faamanuiaga Faapeteriaka” saunia e Elder Kazuhiko Yamashita (Liahona, 2023 Me, 88–90) po o le “O Lou Faamanuiaga Faapeteriaka—Taitaiga Musuia mai le Tama Faalelagi” saunia e Elder Randall K. Bennett (Liahona, Me 2023, 42–43).

3. Suesue faamatalaga o i le pepa e tufa atu ua faaautu “Taliina o Fesili e uiga i Faamanuiaga Faapeteriaka.”

Taliina o Fesili e uiga i Faamanuiaga Faapeteriaka

Na faasoa mai e Peresitene Russell M. Nelson:

E taua [se faamanuiaga faapeteriaka]. O se tusitusiga paia patino ia te oe. O loo faailoa mai ai lou gafa faapitoa. E faamanatu atu ai ia te oe lau sootaga i le tuanai. Ma o le a fesoasoani e te iloa ai lou gafatia i le lumanai. O le mea moni, e mafai ona e ole atu i le Alii mo le faataunuuina o na faamanuiaga e ala i lou faamaoni. (Russell M. Nelson, “Thanks for the Covenant” [Brigham Young University devotional, Nov. 22, 1988], 5)

Na molimau mai Elder Kazuhiko Yamashita o le Fitugafulu:

Ou te faitauina soo ma le agaga tatalo lo’u faamanuiaga faapeteriaka; e aumaia ai lava ia te au e lē aunoa se faamalosiauga. Ua ou iloa le mea ua faamoemoeina mai e le Alii ia te au, ma ua fesoasoani ia te au e salamo ma lotomaualalo. Pe a ou faitau ma mafaufau loloto i ai, ou te naunau e ola agavaa mo le mauaina o ona faamanuiaga folafolaina.” …

… Ou te molimau atu o loo soifua le Tama Faalelagi ma Lona Alo Pele e Toatasi, o le Alii o Iesu Keriso. E alolofa i La’ua ia i tatou. O faamanuiaga faapeteriaka o meaalofa paia mai ia i La’ua. A e mauaina lou faamanuiaga, o le a e iloa ai ma lagonaina lo La’ua alolofa ia te oe ma lo La’ua taulai atu ia te oe lava ia. (Kazuhiko Yamashita, “O Le Taimi e Maua ai Lou Faamanuiaga Faapeteriaka,” Liahona, Me 2023, 90)

Na faasoa mai Sister Bonnie H. Cordon, o lē sa avea ma Peresitene Aoao o Tamaitai Talavou:

I se konafesi a le MMA, sa ou feiloai ai i ni tamaitai talavou se toalua o e sa tauivi. Na taufai ta’ua e tamaitai talavou le liliu atu i lona faamanuiaga faapeteriaka e toe maua ai le alofa ma le taitaiga a le Alii mo ia lava. Saili lou faamanuiaga faapeteriaka, tafi ese le pefu pe afai e tatau ai, ae suesue soo i ai. Afai e le’i iai, ia fai—i se taimi vave. Aua nei faatuai ona saili po o a mea o finagalo le Alii e ta’u atu nei ia te oe e uiga po o ai oe. (Bonnie H. Cordon, “Sau ia Keriso ae Aua le Sau Nao Oe,” Liahona, Nov. 2021, 10)

© 2023 Puletaofia e le Intellectual Reserve, Inc. Ua taofia aia tatau uma.

A uma ua maua se avanoa o tagata aoga e suesue ai, mafaufau e valaaulia i latou e faasoa mea sa latou aoaoina i le fai atu o fesili e pei o lenei:

• O le a se mea na e aoaoina mai i au suesuega na e iloa e sili lona aoga?

• O a nisi o tali na e maua i au fesili?

• O le a sou manatu e mafai faapefea e se faamanuiaga faapeteriaka ona aafia ai lou sootaga ma le Tama Faalelagi ma Iesu Keriso?

Mafaufau e faasoa atu pe na faapefea ona faamanuiaina pe taitaia oe e le Atua e ala i lou faamanuiaga faapeteriaka. E mafai foi ona e fautuaina tagata aoga o e ua maua o latou faamanuiaga faapeteriaka e faasoa mai o latou aafiaga. Ia mautinoa ua malamalama tagata aoga e le tatau ona latou faasoa maia auiliiliga o o latou faamanuiaga. Peitai, e talafeagai le faasoa atu o o latou aafiaga i le mauaina o se faamanuiaga faapeteriaka ma le ala ua faamanuiaina ai o latou olaga.

E mafai foi ona e faaali atu se tasi o vitio nei, o loo maua ChurchofJesusChrist.org, e faaali atu ai faataitaiga o le auala na maua ai e tagata taitoatasi le taitaiga mai le Atua e ala i o latou faamanuiaga faapeteriaka.

• “Enemy Territory”(mai le faailo taimi 0:00 i le 2:25) — O se tala mai le soifuaga o Peresitene Boyd K. Packer o le Korama a Aposetolo e Toasefululua (1924–2015).

• “Without Fear” (3:30) — Sa faamatalaina e se alii talavou mai Italia le ala na fesoasoani ai lona faamanuiaga faapeteriaka ia te ia e faia le faaiuga e auauna atu i se misiona.

Mafaufau i mea na e aoaoina

Ina ia fesoasoani i tagata aoga e toe manatunatu i mea sa latou aoaoina ma lagonaina, mafaufau e valaaulia i latou e fai mea nei:

Mafaufau loloto i uunaiga po o musumusuga na e lagonaina i le aso mai le Agaga Paia. I lau api talaaga mo suesuega, tusi ai ni nai fuaiupu e uiga i le taitaiga ma le taitaiga ua tuuina mai e le Tama Faalelagi ia te oe i le aso ma pe faapefea ona e faatinoina na uunaiga.

Uunaia tagata aoga e faatino ia uunaiga ua latou lagonaina i le aso. Molimau atu i le taitaiga ma le faasinoga mai le Tama Faalelagi o loo avanoa mo i tatou e ala i faamanuiaga faapeteriaka.

Punaoa Faaopoopo

O le a le faamanuiaga faapeteriaka?

Na aoao mai Sister Rebecca L. Craven, sa i le Au Peresitene Aoao o Tamaitai Talavou:

O le faamanuiaga faapeteriaka o se faamanuiaga musuia mai le Tama Faalelagi na tuuina mai e se peteriaka faauuina, e masani lava mai totonu o lau siteki. O se savali patino faafaaaliga mo na o oe lava. O lou faamanuiaga o le a tuuina atu ia te oe fautuaga, lapataiga, timaiga, ma folafolaga e fesoasoani e taiala ai lou olaga. (Rebecca L. Craven, “Your Book of Possibilities,” Mo Le Malosi o le Autalavou,, Aok. 2022, 26)

E mafai faapefea e le Tama Faalelagi ona faamanuiaina au e ala i se faamanuiaga faapeteriaka?

Ia Aperila 2020, sa valaaulia ai se tamaitai talavou e igoa ia Laudy Ruth Kaouk e lauga i le konafesi aoao. Sa ia molimau mai:

Ua ou aoao e liliu atu i lo’u faamanuiaga faapeteriaka i soo se taimi lava ou te lagona ai le faanoanoa po o le tuuatoatasi. E fesoasoani lo’u faamanuiaga ia te a’u ia iloa lo’u gafatia ma le fuafuaga patino ua i ai i le Atua mo a’u. Na te faamafanafanaina a’u ma fesoasoani ia te a’u ia vaai i tala atu o la’u vaaiga faalelalolagi. Na te faamanatu mai ia te a’u a’u meaalofa ma faamanuiaga o le a ou maua pe afai ou te ola agavaa. Ua ia fesoasoani foi ia te a’u ia manatua ma lagonaina le filemu faapea o le a tuuina mai e le Atua tali ma tatala faitotoa mo a’u i le taimi sa’o pe a ou matua manaomia ai.

E fesoasoani faamanuiaga faapeteriaka e saunia i tatou e toe foi atu e mau faatasi ma lo tatou Tama Faalelagi. Ou te iloa o faamanuiaga faapeteriaka e aumai mai le Atua ma e mafai ona fesoasoani ia i tatou e liliu o tatou vaivaiga i malosiaga. E le o ni feau nei mai ni faamatala miti; o nei faamanuiaga ua ta’u maia ia i tatou mea e manaomia ona tatou faalogo i ai. E pei lava o se Liahona mo i tatou taitoatasi. A tatou faamuamua le Atua ma faatuatua ia te Ia, o le a Ia taitaia i tatou i o tatou lava vao fitā. (Laudy Ruth Kaouk, “How the Priesthood Blesses Youth,” Liahona, Me 2020, 56–57)

E faapefea ona ou maua se faamanuiaga faapeteriaka?

O ta’iala nei o loo faamatalaina i le Tusitaulima Aoao: Auauna Atu i le Ekalesia a Iesu Keriso o le Au Paia o Aso e Gata Ai:

E faatalanoa e le epikopo po o se fesoasoani e tofia ia tagata e mananao e maua se faamanuiaga faapeteriaka. Afai ua agavaa se tagata o le ekalesia, e saunia e lē na faia le faatalanoaga se Pepa Faataga mo Faamanuiaga Faapeteriaka. …

A mae’a ona maua se pepa faataga, e faafesootai e le tagata le peteriaka e faatulaga se aso ma se taimi e maua ai se faamanuiaga faapeteriaka. I le aso ua tuupoina, e tatau i le tagata ona alu i le peteriaka ma se uiga faaalia o le lototatalo ma i laei o le Aso Sa. E mafai ona anapopogi tagata o le au paia, ae e le manaomia ai se anapogi. (Tusitaulima Aoao, 18.17; 18.17.1, ChurchofJesusChrist.org).

Gaoioiga Faaopoopo e Aoao Ai

Talosagaina se kopi o lou Faamanuiaga Faapeteriaka

Mafaufau e aoao tagata aoga pe faapefea ona maua o latou faamanuiaga faapeteriaka, po o faamanuiaga o tagata o le aiga ua maliliu, ChurchofJesusChrist.org. E mafai ona e faasoa atu le uepisaite lenei ia i latou, pe tuuina atu ia i latou o se numera lilo QR, ma tuu atu ia i latou e saini e alu i totonu i lo latou igoa faaaoga ma le uputatala o le account a le Ekalesia.

https://pb.churchofjesuschrist.org/pbrequest/home/personal

E mafai foi ona e faaali atu faatonuga nei e taiala ai i latou.

1. Alu i le ChurchofJesusChrist.org.

2. Kiliki luga o Lo’u Account ma le Uarota.

3. Saini e alu i totonu faaaoga ai lau account o le Ekalesia.

4. Filifili le Faamanuiaga Faapeteriaka mai lelisi autu.

5. Kiliki i le aikona lanumoana O O’u Faamanuiaga.

6. Kiliki i ld Talosaga se faamanuiaga patinopo o le Talosaga se faamanuiaga faaleaigama faatumu le fomu tuuina atu. (Pe a talosagaina se faamanuiaga faaleaiga, ia saunia e tuuina atu igoa ma aso fanau sa’o lelei.)

E mafai e tagata aoga ona faaalu ni nai minute ma talosagaina se kopi o o latou faamanuiaga faapeteriaka po o se kopi o se tagata o le aiga ua maliu. E mafai ona e talanoaina ma tagata aoga pe mafai faapefea e le faitauina o se faamanuiaga faapeteriaka o se tagata o le aiga ua maliu ona fesoasoani ia i latou e faalatalata atili atu ai i o latou tuaa.

Tautinoga o le gafa

Atonu e taumanatunatu nisi o tagata aoga pe aisea e taua ai le mauaina o se tautinoga o le gafa i se faamanuiaga faapeteriaka. Ina ia fesoasoani ia latou malamalama pe aisea e taua ai lo latou gafa, e mafai ona e faaali atu le faamatalaga lenei:

A e mauaina se tautinoga o lou gafa, o le a e iloa ai o oe lava o se tasi o le aiga o Isaraelu ma o le fanau a Aperaamo [tagai i le Aperaamo 2:10]. Ina ia malamalama i le taua o lenei mea, ia taulai i folafolaga na faia e le Alii i le aiga o Isaraelu e ala atu ia Aperaamo.

O na folafolaga e aofia ai:

• “O le a toatele Lana fanau (tagai i le Kenese 17:5–6; Aperaamo 2:9; 3:14).

• “O Lana fanau, po o suli, o le a maua le talalelei ma tauavea le perisitua (tagai i le Aperaamo 2:9).

• “E ala atu i auaunaga a lana fanau ‘[o le a] manuia ai aiga uma o le lalolagi, i faamanuiaga lava o le Talalelei, o faamanuiaga ia o le faaolataga, o le ola faavavau lava’ (Aperaamo 2:11)” [Gospel Topics, “Feagaiga Faa-Aperaamo,” Potutusi o le Talalelei].

(Kazuhiko Yamashita, “O Le Taimi e Maua ai Lou Faamanuiaga Faapeteriaka,” Liahona, Me 2023, 89)

E mafai foi e tagata aoga ona faitau le “You are part of the house of Israel” (Inspiration, ChurchofJesusChrist.org) po o le “Tautinoga o le Gafa” (i le Gospel Topics, “Faamanuiaga Faapeteriaka,” Potutusi o le Talalelei) e aoao atili ai e uiga i le gafa.

Ona mafai lea ona e fai i tagata aoga e faamatala mai pe aisea latou te manatu ai o se tautinoga o le gafa o se vaega taua o se faamanuiaga faapeteriaka.

Faataitaiga o le talafaasolopito o le Ekalesia

Ina ia fesoasoani i tagata aoga ia iloa pe na faapefea ona aafia olaga o tagata taitoatasi i le talafaasolopito o le ekalesia i faamanuiaga faapeteriaka, mafaufau e faasoa atu se tasi pe sili atu foi o tala nei. E mafai ona e faia ni numera QR mo tala taitasi ma faaali atu i luga o le laupapa. Ona mafai lea e tagata aoga ona filifili e suesue se tala se tasi pe sili atu.

• O le faatuatua o Fipe Carter Uitilafi i lona faamanuiaga faapeteriaka na fesoasoani ia te ia e agai ai i luma e ui lava na te lei mauaina ni mea sa ia manao ai (tagai i le Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018], 262–64).

• O le faatuatua ma le filiga o Connie Taylor na mafai ai e ia ona vaai i le faataunuuga o folafolaga i lona faamanuiaga faapeteriaka (tagai i le Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 3, Boldly, Nobly, and Independent, 1893–1955, 350–53, 536–37).

• O le faamanuiaga faapeteriaka a Elder Neal A. Maxwell na fesoasoani ia te ia e tu malosi ai ma faamaoni i tulaga matautia sa feagai ma ia a o tau ai i le Taua Lona Lua a le Lalolagi (tagai i le Au Paia, 3:465–68).

• Na suia le olaga oRuben Gapizma sa taliina ana tatalo ona o lona faamanuiaga faapeteriaka (tagai i le Global Histories, Filipaina, “Growing While Serving the Lord,” Potutusi o le Talalelei).

• Na vaaiEva Hernández i le faataunuuina o se folafolaga i lona faamanuiaga faapeteriaka (tagai i le Global Histories, Sepania, “A Blessing Fulfilled,” Potutusi o le Talalelei).