Lesona 175: Mo Le Malosi o le Autalavou: Faia o Filifiliga

Faatuina o Sini

O le Avea Atili e faapei o le Tama Faalelagi ma Iesu Keriso

E finagalo le Tama Faalelagi ia maua e Ana fanau uma le ola e faavavau (tagai Mose 1:39). E mafai ona tatou alualu i luma i a tatou taumafaiga ia avea e faapei o le Atua ma toe foi atu i Lona afioaga e ala i le setiina o sini faaletagata lava ia. O lenei lesona e mafai ona fesoasoani i tagata aoga e faatulaga lelei ai ni sini ma fatu ni fuafuaga a o latou saili ia avea atili e faapei o le Atua ma Lana fesoasoani.

Gaoioiga E Ono Mafai Ona Aoao Ai

O fea e te alu i ai? E faapefea ona e oo iina?

Faaali atu se faafanua o le lalolagi po o se faafanua o la outou eria. Fai atu i tagata aoga e faasoa mai ni nofoaga na latou asia pe mananao e asiasi i ai. Tuu atu i tagata aoga ni minute se lua e fatu ai se fuafuaga e mafai ona fesoasoani i se tasi e malaga atu ai i lena nofoaga. O le fuafuaga e mafai ona aofia ai mea e pei o le tulaga talafeagai o femalagaaiga, o se auala auiliili, ma tupe faaalu. E mafai e tagata aoga ona faasoa lo latou fuafuaga ma se paga.

• E mafai faapefea e le fatuina o se fuafuaga o femalagaaiga ona fesootai i o tatou olaga faaletino?

Na faasoa mai e Peresitene M. Russell Ballard o le Korama a Aposetolo e Toasefululua le mea lenei:

O le iloaina o le mea e te alu i ai ma le auala ua e faamoemoeina e taunuu ai iina e mafai ona aumaia ai le uiga, faamoemoega, ma le ausiaga i le olaga.

O nisi e faigata ona latou iloaina le eseesega i le va o se sini ma se fuafuaga seia oo ina latou iloaina o se sini o se taunuuga po o se mutaaga, ae o le fuafuaga o le auala lea e te atunuu ai iina. (M. Russell Ballard, “Toe Foi Atu ma Mauaina,” Liahona, Me 2017, 62)

• O a ni faamoemoega o sini ma fuafuaga?

  Valaaulia tagata aoga e manatunatu i a latou sini patino ma fuafuaga e ala i le mafaufau loloto i fesili e pei o nei:

• E faafia ona e faatulagaina ni sini mo oe lava ma faia ni fuafuaga e ausia ai?

• O a ni mea na faamanuiaina ai oe ma tauiviga?

• O fea e te faamoemoe o le a taitai atu ai oe e au sini ma fuafuaga?

I le gasologa o le lesona, uunaia tagata aoga e saili le taitaiga mai le Agaga Paia a o latou atiina ae ma galulue agai i a latou sini ma fuafuaga.

Ua tuuina mai e le Atua ia i tatou se faataitaiga

A o e faaali atu le faamatalaga lenei, mafaufau e aveese le fasifuaitau “ia aumaia le tino ola pea ma le ola e faavavau o le tane [ma le fafine]” ma le upu “faaolataga” mai le parakalafa muamua. Fai i tagata aoga e faatumu avanoa i le sini a le Atua ma le igoa o Lana fuafuaga. Ona mafai lea e tagata aoga ona faitau le Mose 1:39 po o le Alema 42:5 e faailoa mai ai upu na faaaoga e Peresitene Ballard. E mafai ona e faamalamalama atu o le faaaogaina o le upu “tagata” i le Mose 1:39 ma isi mau (mo se faataitaiga, Kenese 1:27; Mamona 9:17) o se faasinoga faalenatura i tagata faaletino po o tagata soifua, o le mea lea e faatatau i alii ma tamaitai.

Sa faaauau pea ona aoao mai Peresitene Ballard:

Ua tuuina mai e le Atua, lo tatou Tama Faalelagi, ia i tatou le faataitaiga atoatoa o le faatuina o sini ma le fuafuaina. O Lana sini o le “aumaia [o] le tino ola pea ma le ola e faavavau o le tagata,” [Mose 1:39], ma o Lana auala ia ausia ai, o le ata o le faaolataga. …

… Ou te talitonu o se tasi o ki taua i le fiafia o le aoao lea o le auala e seti ai a tatou lava sini ma faavae a tatou lava fuafuaga i totonu o le auivi o le fuafuaga e faavavau a lo tatou Tama Faalelagi. (M. Russell Ballard, “Toe Foi Atu ma Mauaina,” Liahona, Me 2017, 63)

• O le a se mea ua e aoaoina mai lenei faamatalaga e uiga i au lava sini ma fuafuaga?

  O se upumoni e tasi e mafai ona faailoa mai e tagata aoga o le, e mafai ona tatou maua le fiafia e ala i le galulue agai i sini faaletagata lava ia lea e fesoasoani ia i tatou e mulimuli i le fuafuaga a le Atua. Fesoasoani ia malamalama tagata aoga ua faia e le Atua ia mafai e ala i le Faaola ona tatou ola e faavavau, pe maua le tino ola pea. E finagalo foi o Ia ia tatou avea e faapei o Ia ma Iesu Keriso ma toe foi atu e mau faatasi ma i Laua, pe maua le ola e faavavau. O le ata o le faaolataga a le Atua ua mafai ai ona maua nei faamanuiaga.

• Aisea e te manatu ai e mafai ona tatou maua le fiafia pe a fesoasoani a tatou sini ia i tatou e mulimuli i le fuafuaga a le Atua? (tagai i le 2 Nifae 2:25; Mosaea 2:41).

  Faitau le Luka 2:52, ma vaavaai mo auala na tuputupu ae ai le Faaola a o talavou a o Ia mulimuli i le fuafuaga a Lona Tama.

• Aisea e ono taitai atu ai le mulimuli i le faataitaiga a le Faaola o le tuputupu ae i nei vaega i le faateleina o le fiafia?

O se mamanu mo le tuputupu ae

Faaali atu i tagata aoga le Atinaega Faaletagata Lava Ia: Tusitaiala mo le Autalavou. Mafaufau e valaaulia se tagata aoga e faasoa mai pe mafai faapefea ona faaaoga e fesoasoani ai e fatu ni sini ma faatulaga ni fuafuaga. Afai e manaomia, faamalamalama atu ua valaaulia i tatou e mulimuli i le faataitaiga a Iesu Keriso e ala i le fatuina o ni sini i vaega taitasi nei: faaleagaga, faaleagafesootai, faaleatamai, ma faaletino.

Ina ia saunia tagata aoga e galulue i a latou lava sini, mafaufau e iloilo le vaega “O Se Mamanu mo le Tuputupu Ae” i le Tusitaiala mo le Autalavou ([2019], 7–15) po o le saunia o le pepa e tufa atu ua faaautu “O Se Mamanu mo le Tuputupu Ae.” Tuu tagata aoga i ni vaega taitoafa, faatasi ma tagata aoga taitasi o loo suesue i se vaega eseese o le mamanu. Ona mafai lea ona latou faamatala atu i le latou vaega mea sa latou aoaoina.

E mafai foi ona e matamata i le “Vitio: Goal Setting Process” (3:42), o loo maua i le ChurchofJesusChrist.org.

O Se Mamanu mo le Tuputupu Ae

Saili ou manaoga, meaalofa, ma taleni. Taumafai e tuuina atu ni fesili faapea: O le a le mea e tatau ona ou aoaoina pe suia i lo’u olaga? O a ni taleni po o ni tomai ou te manao ia mauaina? O a ni uiga faaleagaga e tatau ona ou atiinaeina pe faaleleia? E mafai faapefea ona ou tausia feagaiga na ou osia ina ua ou papatiso? O ai e mafai ona ou auauna atu i ai? “Suesue i ai i lou mafaufau; ona … e ole mai ia te au pe ua sao” (Mataupu Faavae ma Feagaiga 9:8).

Fuafua e faaleleia ai. Taumafai e tuuina atu ni fesili faapea: Aisea e taua ai lenei mea ia te a’u? E faapefea ona fesoasoani lenei mea ia te a’u ia avea atili ai faapei o Iesu Keriso? O le a se faatinoga e mafai ona ou faia e faataunuuina ai lenei mea? E mafai ona ou vaevaeina nei faatinoga i ni laasaga laiti? O a ni fuafuaga e mafai ona ou faia nei ia foia ai luitau e ono feagai ma a’u? “O afioga a Keriso o le a taʼu mai ai ia te outou mea uma e tatau ona outou faia” (2 Nifae 32:3).

Tomanatu i mea na e aoaoina. Taumafai e tuuina atu ni fesili faapea: Na faapefea ona ou tuputupu ae? E mafai faapefea ona ou faaaogaina mea na ou aoaoina e auauna atu ai i isi? Na faapefea ona fesoasoani a’u faatinoga ia ou latalata atili ai i le Faaola? E faapefea ona faaauau pea ona ou tuputupu ae i lea vaega? “Ia mafaufau i le ala o ou vae” (Faataoto 4:26).

Galue ina ia tuputupu a’e i le faatuatua. Afai ua e poloka, taumafai e fai atu fesili pei o nei: O le a le mea na aoga? Aisea? O le a le mea e le’i aoga? E leai aisea? O le a se isi mea e mafai ona ou faataitaia? O fea e mafai ona ou maua ai nisi manatu? E mafai ona ou vaevaeina la’u sini i ni laasaga po o ni faatinoga laiti? E faapefea ona ou aoao mai ni nai toilalo laiti? “E moni Ou te fai atu, e tatau [ia te oe] ona auai ma le naunautai i se faamoemoega lelei, ma fai mea e tele i [lou] lava loto malie.” (Mataupu Faavae ma Feagaiga 58:27).

• O a fesili e te lagona e mafai ona fesoasoani ao e galue i au sini ma fuafuaga? Aisea?

• E mafai faapefea e lenei mamanu ona fesoasoani ia te oe i au taumafaiga ia avea atili e faapei o le Tama Faalelagi ma Iesu Keriso?

• E mafai faapefea e le Tama Faalelagi ma Iesu Keriso ona fesoasoani ia te oe i au taumafaiga?

Iloa, fuafua, faatino, ma tomanatu

Tuu atu se taimi mo tagata aoga e galulue ai i a latou sini faaletagata lava ia. Faaali atu faatonuga nei:

Filifili le ulutala e sili ona faamatalaina ai oe, ma faatumu se tasi pe sili atu foi o faatonuga e o faatasi ai. Saili le fesoasoani mai le Agaga Paia ma faaaoga le “O Se Mamanu mo le Tuputupu Ae” (o loo maua i le Tusitaiala a le Autalavou po o luga o le pepa e tufa atu).

• Ou te lei faia ni sini patino po o ni fuafuaga.

• a. Ia iloa le mea e manaomia ona e galue ai i se tasi pe sili atu o vaega nei: faaleagaga, faaleagafesootai, faaleatamai, faaletino.

  e. Fatu ni fuafuaga o le a fesoasoani ia te oe e ausia ai nei sini.

  i. Tusifaamaumau au sini ma fuafuaga i lau Tusitaiala mo le Autalavou po o le api talaaga mo suesuega.

• E i ai a’u sini ma fuafuaga o loo ou galue ai.

• a. Afai e talafeagai, faaaoga se taimi i le vasega e faatino ai nisi o au fuafuaga ma sini.

  e. Mafaufau i mea ua e aoaoina ma alualu i luma ua e faia a o e faatinoina au sini ma fuafuaga.

  i. Tusifaamaumau ou manatu ma fetuunai au sini po o fuafuaga pe a manaomia ai i lau Tusitaiala mo le Autalavou po o le api talaaga mo suesuega.

A uma ua lava se taimi, valaaulia ni nai tagata aoga e faasoa mai ni sini sa latou faia po o ni manuia ma ni luitau na latou oo i ai a o galulue agai atu i a latou sini.

Valaaulia tagata aoga e galue i o latou sini patino. Faamalamalama atu o le galue i sini o se faatinoga o le faatuatua. Molimau atu e silafia e Iesu Keriso o tatou malosiaga ma vaivaiga. O le a Ia fesoasoani mai ia i tatou ia manuia pe a tatou liliu atu ia te Ia.

Punaoa Faaopoopo

Aisea e taua ai le faatuina o sini?

Sa aoao mai Peresitene Dallin H. Oaks o le Au Peresitene Sili:

O le tuputupu ae faaleagaga, faaleagafesootai, faaletino ma le faaleatamai o vaega uma o le atoatoa lea e finagalo lou Tama Faalelagi e te maua ma o le a fesoasoani ina ia e maua. Manatua o le aafiaga i le olaga lenei o se aafiaga lea tatou te aoao ai ia avea ma tagata ua finagalo le Atua lo tatou Tama Faalelagi ia avea ai i tatou ma le mea ua mafai ona Ia faia e ala i le tuuina mai o Lona Alo e Toatasi, o lana Togiola ua faamautinoa ai ia i tatou le tino ola pea ma tatou maua ai le avanoa mo le ola e faavavau. (Dallin H. Oaks, “E Mafai Ona E Faia Lenei Mea,” New Era, Ape. 2020, 14)

O le a se mea e mafai ona fesoasoani ia te au e ausia ai a’u sini?

Na aoao mai Peresitene M. Russell Ballard o le Korama a Aposetolo e Toasefululua:

O tagata atamamai i le setiina o sini na tau maia ia i tatou e faapea o le faigofie atu ma le sili ona tuusao o se sini, o le faateleina foi lena o le mana o le a i ai. A mafai ona tatou faaitiitia se sini i se ata manino se tasi pe tasi foi pe lua ni upu mamana ma faafaatusa, e mafai ona avea lena sini ma se vaega o i tatou ma taiala ai toetoe lava o mea uma tatou te mafaufau i ai ma fai. Ou te talitonu e lua ni upu o i ai i lenei anotusi o loo fai ma faatusa o sini a le Atua mo i tatou ma a tatou sini sili ona taua mo i tatou lava. O upu toefoi atu ma le mauaina.

O le toe foi atu i Lona afioaga ma le mauaina o faamanuiaga e faavavau lea e sau mai le osia ma le tausia o feagaiga, o sini aupito sili ia ona taua e mafai ona tatou setiina. (M. Russell Ballard, “Toe Foi Atu ma Mauaina,” Liahona, Me 2017, 63)

Ina ia aoao atili e uiga i mataupu faavae o le faatulagaina lelei o sini, mafaufau e suesue le saunoaga atoa a Peresitene Ballard “Toe Foi Atu ma Mauaina.”

Gaoioiga Faaopoopo e Aoao Ai

O se faataitaiga faaperofeta

Mafaufau e faaali atu se ata o Iosefa Samita i le Vao Paia. Valaaulia tagata aoga e faailoa mai mataupu faavae o le faatuina o sini i le faataitaiga a Iosefa.

• O a mataupu faavae o e vaaia i faataitaiga a Iosefa Samita e mafai ona faaaoga i le faatuina o sini? (tagai Iosefa Samita—Talafaasolopito 1:8–14, 18).

• E mafai faapefea ona tatou faaaogaina nei mataupu faavae i a tatou lava taumafaiga e ausia a tatou sini?

Faataitaiga o le faatuina o sini

Ina ia fesoasoani i tagata aoga ia loloto lo latou malamalama i le mamanu mo le tuputupu ae, mafaufau e matamata i se tasi o faataitaiga nei i le “Vitio:You Can Do This Individually” (6:34), o loo i le ChurchofJesusChrist.org. Valaaulia tagata aoga e vaavaai pe na faapefea ona mulimuli le autalavou i le mamanu mo le tuputupu ae.

• Ua tauloto e Ashley le “O Le Keriso Soifua: O Le Molimau a le Au Aposetolo” (matamata mai le faailo taimi 0:00 i le 1:55).

• E tamo’e Eli i aso uma (matamata mai le faailotaimi 1:55 seia oo i le 3:28).

• Ua sailiili e McKenna le talafaasolopito o lona aiga (matamata mai le faailo taimi 3:28 i le 6:34).

Tuu le Faaola i le totonugalemu o au fuafuaga

Mafaufau e faasoa le saunoaga lea a Peresitene Russell M. Nelson:

Ao e faatuina au sini ia “tupu le poto ma le tino, ia alofagia e le Atua atoa ma tagata,” faamolemole ia faatumau le Faaola i le totonugalemu o au fuafuaga. Fesili ifo pea ia te oe lava—ma ōle atu ma le agaga tatalo i lou Tama i le Lagi—”O le a se mea e mafai ona ou faia ia avea atili ai e pei o Iesu Keriso?” A e faia lenei mea i aso taitasi, o le a tutupu vavega. (Russell M. Nelson, i se savali faavitio na faasoa mai i le Talanoaga Faafesagai ma Elder Gerrit W. Gong [faasalalauga a tamaiti ma le autalavou i le lalolagi atoa, 17 Nov., 2019], broadcasts.ChurchofJesusChrist.org)

• E mafai faapefea e le faatotonugalemuina o fuafuaga ia Iesu Keriso ona aafia ai sini tatou te faatutuina?

Valaaulia tamaiti aoga e mafaufau ma le agaga tatalo pe faapefea ona faatumauina Iesu Keriso i le totonugalemu o a latou fuafuaga e ausia a latou sini.

Sini mo taimi pupuu ma taimi uumi

Mafaufau e faasoa le saunoaga lenei a le Peresitene M. Russell Ballard o le Korama a Aposetolo e Toasefululua:

O le setiina o sini atamai e aofia ai le malamalama e faapea e na o le pau le taimi e aoga ai sini mo se taimi puupuu pe afai lea e taitai atu i le malamalamaaga manino i sini mo se taimi umi. (M. Russell Ballard, “Toe Foi Atu ma Mauaina,” Liahona, Me 2017, 63)

Tuu atu i tagata aoga se lisi o sini uumi e ono i ai i se tagata, e pei o nei. E mafai foi e tagata aoga ona fatuina a latou lava lisi o sini mo se taimi umi.

• Auauna atu i se misiona faafaifeautalai.

• Ia faaipoipo i le malumalu.

• Auai i le kolisi.

• Galue i se matata filifilia.

Valaaulia tagata aoga e fatufatu ni faataitaiga o ni sini pupuu e mafai ona fesoasoani i se tasi ia ausia nei sini mo se taimi umi. Mo se faataitaiga, afai sa i ai se sini mo se taimi umi a se tagata e auauna atu i se misiona, atonu latou te fatuina ni sini mo se taimi puupuu e sefe ai se tupe pe faitau atoa ai le Tusi a Mamona.

Polokalama o le Gospel Living

O le polokalama o le Gospel Living o loo i ai le tele o punaoa e fesoasoani ai i le autalavou e galulue i a latou sini, e aofia ai manatu, o se nofoaga e faamaumau ai, ma faalauiloaga. Mafaufau e valaaulia se tagata aoga e masani i le polokalama e faasoa mai i le vasega pe faapefea ona faaaoga e fatu ma tulituliloa ai sini faaletagata lava ia.