Lesona 177: Mo Le Malosi o le Autalavou: Faia o Filifiliga

Puleaina o Tekinolosi

Ia Fuafua lelei a Tatou Filifiliga e Faatatau i Tekinolosi

Ua faamanuiaina i tatou e ola i se taimi o le tele o tekinolosi. O lo tatou faaaogaina o tekinolosi e mafai ona fesoasoani tatou te latalata atili atu ai ia Iesu Keriso ma fesoasoani ai i Lana galuega ia agai i luma. Ae e mafai foi ona taitai ese atu ai i tatou mai ia te Ia. O lenei lesona e mafai ona fesoasoani i tagata aoga e faaaoga ai malupuipuiga e pulea ai lo latou faaaogaina o tekinolosi.

Gaoioiga E Ono Mafai Ona Aoao Ai

Faaaogaina o tekinolosi

Mafaufau e faaali atu se ata o le papatusi auro. Faamalamalama atu na tuuina atu e le Atua papatusi auro i le Perofeta o Iosefa Samita.

Faitau Iosefa Samita—Talafaasolopito 1:46, ma vaavaai mo le lapataiga na tuuina atu e Moronae ia Iosefa Samita e uiga i papatusi auro.

Mafaufau e tusi le ulutala Faaaoga mo le lelei i le tasi itu o le laupapa ma le ulutala o le Faaaoga sese i le isi itu. Ona mafai lea ona e tusia tali a tagata aoga i fesili nei i lalo o ulutala taitasi.

• E faapefea ona taumafai Satani e maua Iosefa Samita ia faaaoga sese ia papatusi auro?

• Na faapefea ona faaaoga e Iosefa Samita papatusi auro mo le lelei?

Tuu i luga se telefoni feaveai pe faaali atu se ata o se telefoni, ma ta’u i le vasega ua tuuina atu e le Atua ia i latou le tekinolosi.

• E mafai faapefea ona tatou faaaogaina tekinolosi mo le lelei?

• O a ni auala e ono lagona ai e le tupulaga le faaosoosoina e faaaoga sese tekinolosi?

Valaaulia tagata aoga e manatunatu lemu i le fesili o le a mulimuli mai nei.

• O faapefea ona e faaaogaina tekinolosi i auala e finagalo le Alii e te faia ai?

Uunaia tagata aoga ia tatala i uunaiga i auala e mafai ona latou pulea ai lo latou faaaogaina o tekinolosi. Mafaufau e faasoa atu e pei lava ona taialaina e le Alii Iosefa Samita e faaaoga papatusi auro mo le lelei, e mafai foi ona Ia fesoasoani ia i tatou ia faia lea lava mea e tasi i tekinolosi.

Taitaiga musuia

O le gaoioiga lenei e mafai ona fesoasoani i tagata aoga e aoao mai le taitaiga musuia a le Alii e uiga i le puleaina o tekinolosi.

O se tasi o auala e mafai ona e suesue ai vaega nei o le vaevae lea o lau vasega i ni vaega se lua. Tufa atu se vaega se tasi i vaega taitasi. Valaaulia tagata aoga e suesue taitoatasi a latou vaega, tusi i a latou api talaaga mo suesuega a latou tali i fesili, ma ia saunia e aoao atu mea ua latou aoaoina.

I se isi itu, e mafai ona e valaaulia tagata aoga e suesue po o le fea lava vaega e sili ona latou fiafia i ai.

Puleaina o Tekinolosi

Vaega 1. Faaalu tatau le taimi i tekinolosi

I le Mataupu Faavae ma Feagaiga, o loo faaaoga ai e le Alii ia faaupuga “auai ma le naunautai” ma le “faapaie.”

• O le a sou manatu i le uiga o nei upu?

Faitau mau nei ma mafaufau loloto i mea ua aoao mai e le Alii e uiga i le auai ma le naunautai ma le paie: Mataupu Faavae ma Feagaiga 58:27–28; 60:13; 68:31; 75:3.

• E faapefea ona e aoteleina mea e aoao mai e le Alii?

(Faatasi ai ma ni nai upumoni, atonu e te faailoa maia se mea e pei o lenei: E finagalo le Alii ia tatou auai ma le naunautai i le faia o mea lelei ae aua le faamaumauina o tatou taimi.)

• E mafai faapefea ona tatou iloa pe o faaalu vale lo tatou taimi i tekinolosi?

Suesue le faamatalaga lenei, ma vaavaai mo malamalamaaga e uiga i le faaaogaina tatau o tekinolosi.

Na aoao mai Elder David A. Bednar o le Korama a Aposetolo e Toasefululua:

E ono tuuto atu e se [tagata] mafaufau faatamaitiiti pe taitai seseina foi le tele o le taimi e taalo ai i taaloga vitio, talanoa i le initoneti, po o nisi auala e faatagaina ai masini omiomi e pulea pe faoa mea e pei ona i ai lava. O le taimi muamua e foliga ai e le leaga tele le faaalu ai o le taimi, e faapea o ni nai minute e toomaga i ai mai le pisi ma le mamafa o fuafuaga o le aso. Ae o avanoa taua ua misia mo le atiina ae ma le faaleleia atili o tomai faafesoota’i. … E faifaimalie lava, o faafiafiaga e foliga mai e le afaina, e mafai ona avea ma se ituaiga o faapologaina faataumaoi. (David A. Bednar, “O Mea e Pei Ona I Ai Lava,” Liahona, Iuni 2010, 21)

• O a mafuaaga e faaaoga e tagata e faamaonia ai le maimauina o le taimi i tekinolosi?

• O le a se mea e fesoasoani ia te oe e aloese ai mai le faama’umauina o lou taimi i tekinolosi?

• E mafai faapefea ona e faaaofia le Alii i au taumafaiga e faaaoga ma le tatau le tekinolosi?

Vaega 2. Filifilia o ala o faasalalauga lelei

• O a filifiliga o ala o faasalalauga e te faia ma masani?

• O a ni mea ua aoaoina ai oe e ou aafiaga e mafai ona fesoasoani ia te oe e latalata atili ai i le Tama Faalelagi ma Iesu Keriso a o e faia filifiliga e uiga i ala o faasalalauga?

Faitau le Mataupu Faavae ma Feagaiga 50:23–24; Mataupu Faavae o le Faatuatua 1:13; ma le Moronae 7:12–17, ma vaavaai mo upumoni e mafai ona fesoasoani ia i tatou e faamasino ai mea e lelei ma mea leaga.

• O a ni upumoni e te maua i nei fuaiupu?

(Faatasi ai ma ni nai upumoni, e mafai ona e faailoa mai se mea faapenei: O mea e faamanino ma faatauanau e fai le lelei e mai le Atua.)

• E mafai faapefea ona aoga ia te oe le faaaogaina o lenei upumoni pe a e filifili po o a ala o faasalalauga e faaaoga?

Sa valaaulia i tatou e Elder David A. Bednar e fesili ifo ia i tatou lava le fesili lenei e uiga i ala o faasalalauga tatou te faaaogaina:

Pe o le faaaogaina o tekinolosi eseese po o auala o faasalalauga e valaaulia ai pe taofia ai le mafutaga faifai pea a le Agaga Paia i lou olaga? (David A. Bednar, “O Mea e Pei Ona I Ai Lava,” Liahona, Iuni 2010, 23)

• E mafai faapefea ona e valaaulia le Agaga Paia a o e faia filifiliga o ala o faasalalauga?

• O le a se mea e fesoasoani ia te oe e aloese ai mai ituaiga o ala o faasalalauga e mafai ona taitai ese ai oe mai le Faaola?

A uma ona suesue tagata aoga, valaaulia i latou e faasoa mai mea na latou aoaoina. E mafai ona faia lenei mea o se vasega po o le fai paga o tagata aoga ma se tasi sa suesue i se isi vaega ese. A uma ona aoao atu e tagata aoga le tasi ma le isi, mafaufau e valaaulia i latou e faataitai se tasi po o tomai uma e lua e fesoasoani ai ia i latou e faaaoga ma le saogalemu tekinolosi. Mo se fesoasoani faaopoopo, atonu e te manao e faasino atu tagata aoga i le punaoa “Puleaina o Tekinolosi,” o loo i le ChurchofJesusChrist.org.

O le fuafuaina agai i luma e mafai ona fesoasoani ia i tatou e pulea ai tekinolosi

Ina ia fesoasoani i tagata aoga e faaaoga mea ua latou aoaoina, fesoasoani ia i latou e faataitai tomai nei:

Faamatala: O le faia o se fuafuaga e uiga i le auala o le a tatou faaaogaina ai tekinolosi e mafai ona fesoasoani ia i tatou ia auai ma le naunautai i le faia o mea lelei ae aua le faama’umau i o tatou taimi. Saili le fesoasoani a le Tama Faalelagi pe a faia se fuafuaga.

Faataitaiga: Tuu atu se faataitaiga mo tagata aoga e ala i le valaaulia o i latou e mafaufau i ni auala e mafai ai ona latou faaaogaina ma le manuia tekinolosi. E mafai ona e faia lenei mea i le fesili atu:

• O a nisi o auala e mafai ona e fuafua mamao atu e pulea ai lou faaaogaina o tekinolosi?

  O nisi o tali e ono i ai o le:

  • Mafaufau pe faapefea ona finagalo le Tama Faalelagi ia te oe e faaaoga le tekinolosi.

  • Ia i ai se faamoemoega ae e te lei faaaogaina le tekinolosi (mo se faataitaiga, faafesootai se uo i lau telefoni).

  • Seti tapulaa o taimi i aso taitasi mo le faaaogaina o tekinolosi.

  • Faatulaga ni nofoaga e leai se masini, e pei o lou potumoe ma le faletaele.

  • Tuu lau telefoni i se nofoaga o le aiga i le po, ia mamao mai lou moega.

  • Faaaoga faamama e poloka ai tulaga e le talafeagai pe le saogalemu.

• Aisea e te manatu ai o le i ai o se fuafuaga e mafai ona faia ai se eseesega?

Faataitai: Valaaulia tagata aoga e saili le fesoasoani a le Tama Faalelagi e fai ai se fuafuaga mo le auala o le a latou pulea ai lo latou faaaogaina o tekinolosi.

Mafaufau e fesili i tagata aoga pe i ai nisi e fia faasoa mai o latou fuafuaga i le vasega.

O le taofi e mafai ona fesoasoani ia i tatou e pulea ai tekinolosi

Ina ia fesoasoani i tagata aoga ia malamalama i le mea e fai pe a latou fetaui ma ala o faasalalauga e le talafeagai, atonu e aoga le tomai lenei:

Faamatala: Pe a tatou fetaui ma ala o faasalalauga e le talafeagai, e mafai ona tatou taofi ma malolo mai le faaaogaina o tekinolosi.

Faataitaiga: Tuu atu se faataitaiga mo tagata aoga e ala i le faasoa mai o laasaga nei e tolu e mafai ona fesoasoani ia i latou e taofi ma malolo mai tekinolosi pe a latou fetaui ma ala o faasalalauga e le talafeagai. E mafai foi ona e faasino atu tagata aoga i le punaoa “Puleaina o Tekinolosi” mo nisi fesoasoani i lenei mea.

1. Ta’u i ai: Pe a e vaai i anotusi e le talafeagai pe e te lagona ai le leaga, tuuatoatasi, po o le le toafimalie, e mafai ona e faapea atu, “E le o lagona le sa’o o lenei mea.” O nei lagona e mafai ona avea ma uunaiga mai le Agaga Paia.

2. Fai se filifiliga e sili atu: E mafai ona e tapeina le masini po o tape le leo o faailoilo. E mafai ona e alu i fafo pe siitia atu i se isi potu, e aunoa ma se masini. E mafai ona e mafaufau ia Iesu Keriso pe manatua se tusitusiga paia e sili ona e fiafia i ai e valaaulia ai le Agaga Paia e faatasi ma oe.

3. Fesootai ma se tasi: E mafai ona e talanoa i se uo po o se tagata o le aiga e uiga i ou lagona. E mafai ona e tatalo i le Tama Faalelagi.

Faataitai: Valaaulia tagata aoga e mafaufau i ni auala e mafai ona latou malolo ai ma malolo pe a latou fetaiai ma ala o faasalalauga e le talafeagai.

Afai e mananao ai tagata aoga, e mafai ona latou faasoa mai o latou manatu i le vasega.

Faasoa atu mea ua e aoaoina

• O le a se mea na e aoaoina mai lenei lesona e te le manao e faagalo?

Faaiu i lau molimau e mafai e le Alii ona fesoasoani ia i tatou e faaaoga ma le saogalemu ma le tatau le tekinolosi.

Punaoa Faaopoopo

E mafai faapefea e le tekinolosi ona faamanuiaina a’u?

Na faamatala mai e Elder Richard G. Scott (1928–2015) o le Korama a Aposetolo e Toasefululua:

[Tatou] te nonofoi i se lalolagi ua matuai saoasaoa lava i mea faatekinolosi. … O ai na manatu i tausaga e le’i mamao atu o le a ofi i totonu o lau taga ia tusitusiga faavae uma ma savali o konafesi aoao ua autausagā? O le na o le tuu o ia mea i lau taga o le a le puipuia ai oe, ae o le suesue, mafaufau loloto, ma le faalogologo i ai i taimi paganoa i aso uma, o le a faaleleia atili ai fesootaiga e ala i le Agaga. (Richard G. Scott, “Mo Le Filemu i le Aiga,” Liahona,,” Me 2013, 30)

Tagai foi i le vitio “Texting Truth” (2:22), i ChurchofJesusChrist.org.

E mafai faapefea ona ou faaleleia lo’u faaaogaina o tekinolosi?

Na saunoa Elder David A.Bednar o le Korama a Aposetolo e Toasefululua:

O tekinolosi lava ia e le lelei pe leaga foi. Ae, o faamoemoega e ausia i le ma e ala mai le tekinolosi o ni faamaoniga faaiu o le lelei po o le leaga. (David A. Bednar, “To Sweep the Earth as with a Flood” [Brigham Young University Education Week devotional, Aug. 19, 2014], 5)

Na aoao mai Sister Linda S. Reeves, o le sa avea ma Fesoasoani Lua o le Au Peresitene Aoao a le Aualofa:

O faamama o ni meafaigaluega aoga, ae o le faamama silisili i le lalolagi, ma e na o le pau lea o le mea o le a iu ina aoga, o le faamama lea e i totonu o le tagata lava ia lea e oo mai i se molimau loloto ma tumau i le alofa o lo tatou Tama Faalelagi ma le taulaga togiola a lo tatou Faaola mo i tatou taitoatasi. (Linda S. Reeves, “Puipuiga mai Ponokalafi—o se Aiga e Taulai Atu ia Keriso,” Liahona,, Me 2014, 16)

A o e faia filifiliga e uiga i mea e matamata ai, faitau, faalogo i ai, pe auai ai, mafaufau pe o a ni ou lagona. Pe o valaaulia ai ni mafaufauga lelei? Aloese mai soo se mea e tauemu i mea paia po o mea e le mama. Aua e te auai i soo se mea e faanenefu ai lau faamasinoga po o le nofouta i le Agaga, e pei o le faasaua, ava malosi, ma fualaau faasaina. Ia maua le lototele e tape ai se vitio po o se taaloga, savali ese mai se tifaga po o se siva, sui lau musika, pe liliu ese mai soo se mea e le ogatusa ma le Agaga. (Mo Le Malosi o le Autalavou: O Se Taiala mo le Faia o Filifiliga [2022],18)

Na faamalamalama mai e Brother Randall L. Ridd, o lē sa avea muamua ma Fesoasoani Lua i le Au Peresitene Aoao o Alii Talavou:

O loo outou tuputupu ae faatasi ma se tasi o meafaigaluega silisili mo mea lelei i le talafaasolopito o tagata: le Initoneti. Faatasi ai ma lena meafaigaluega ua o mai faatasi ai ma le anoanoai o filifiliga. Peitai, ua o mai faatasi ia mau filifiliga ma se vaega tutusa o le tali atu o le tagata lava ia. Ua faafaigofieina ai lo outou mauaina o mea uma e silisili ona lelei ma mea foi e silisili ona leaga o loo ofoina mai e le lalolagi. O le Initoneti e mafai ai ona e ausia mea tetele i se taimi puupuu lava, po o le saisaitia ai o oe i le tele o mea le aoga e maimau ai lou taimi ma faaitiitia ai lou gafatia. E ala i le kiliki o se ki, e mafai ona e oo atu ai i soo mea e naunau i ai lou loto. O le ki lena—o le a le mea o loo naunau i ai lou loto? O le a se mea o e tosina i ai? O fea e taitai atu i ai ou manaoga? (Randall L. Ridd, “O Le Tupulaga Filifilia,” Liahona, Me 2014, 56)

Vaai le Safeguards for Using Technology tamaitusi mo faifeautalai, e maua i le ChurchofJesusChrist.org.

Gaoioiga Faaopoopo e Aoao Ai

E faapefea ona ou tali atu i faaosoosoga tau tekinolosi?

O manatu nei e tolu o mea e mafai ona tatou faia pe a faaosoosoina i tatou e faaaoga ala o faasalalauga po o tekinolosi i ni auala le lelei:

1. “Ta’u i le mea ua i ai. Faailoa atu le mea ua faaosoosoina oe e fai. …

2. Sui mea o loo e faia i se filifiliga sili atu. …

3. “Fesootai ma se tasi po o se mea e te alofa ma faaaloalo i ai (Mo le Malosi o le Autalavou: O Se Taiala mo le Faia o Filifiliga, 21).”

Valaaulia tagata aoga e sauni e faaaoga lenei tomai e ala i le alu faalemafaufau i le faagasologa o le faaaogaina o laasaga taitasi nei.

Musika

Mafaufau e usu le pese “Afai e Tu le Faaola i Ou autafa” (Sally DeFord, New Era, Aok. 2007 8–10) o se vasega. I se isi itu, e mafai ona e taina le musika ma valaaulia tagata aoga e mulimuli faatasi ma upu. Valaaulia tagata aoga e mafaufau i lo latou faaaogaina o tekinolosi a o latou usuina, faalogologo, pe faitau upu. E mafai e tagata aoga ona tomanatu pe faapefea ona latou taliina fesili o loo fesiligia i le pese e faatatau i lo latou faaaogaina o tekinolosi.

Anapogi faatekinolosi

Mafaufau e faaali atu se tasi po o kilipi uma nei mai le “Faamoemoe o Isaraelu” (Russell M. Nelson ma Wendy W. Nelson [faigalotu a le autalavou i le lalolagi atoa, 3 Iuni, 2018], broadcasts.ChurchofJesusChrist.org). A o matamata tagata aoga, e mafai ona latou vaavaai mo mafuaaga na valaaulia ai i latou e le Peresitene o Russell M. Nelson e malolo mai ala o faasalalauga faaagafesootai. Valaaulia tagata aoga e mafaufau loloto pe mafai faapefea ona faamanuiaina i latou e ala i le anapogi mai lea taimi i lea taimi i faasalalauga faaagafesootai ma isi ituaiga o tekinolosi.

• O le valaaulia a Peresitene Nelson e faia se anapogi faaagafesootai e fitu aso

• Tala i se alii talavou na alu ese mai faasalalauga faaagafesootai

• O a ni faamanuiaga e ono maua mai i se anapogi o ala o faasalalauga faaagafesootai?

Aoaoga faatekinolosi ma faaperofeta

Mafaufau e tuu atu i tagata aoga e faaalu se minute pe tusitusi foi i le tele o aoaoga a le perofeta o i ai nei e mafai ona latou mafaufau i ai. E mafai e tagata aoga ona filifili se tasi o na aoaoga ma lisi ni auala e fesoasoani ai le tekinolosi ia i tatou e suesue i ai. Ona mafai lea e tagata aoga ona faasoa atu a latou lisi o aoaoga a le perofeta i isi. E mafai ona e valaaulia tagata aoga e filifili se aoaoga latou te mananao e aoao atili i ai ma filifili se auala e mafai ona latou faaaogaina ai tekinolosi e fesoasoani ai ia latou taumafaiga.

Faaaogaina o tekinolosi mo le lelei

Ina ia fesoasoani i tagata aoga e mafaufau i ni auala e mafai ona latou faaaogaina ai tekinolosi mo le lelei, mafaufau e valaaulia i latou e faitau le saunoaga lenei mai ia Elder David A. Bednar o le Korama a Aposetolo e Toasefululua:

“Ou te apoapoai atu ia te outou e tafi le lalolagi i savali ua faatumulia i le amiotonu ma le upumoni—savali ia e faamoni, faagaeetia, ma tauleleia—ma e moni lava e tafi le lalolagi e pei o se lolo (tagai i le Mose 7:59–62). …

“Manatu i le aafiaga e mafai ona tatou faia a o saofaga atu le faitau selau afe ma le faitau miliona o tagata o le Ekalesia toefuataiina a le Alii i ni auala laiti i le lolovai o loo faatupulaia.” (David A. Bednar, “Faalilofia le Lalolagi i Ala o Faasalalauga Faaagafesootai,” Liahona, Aok. 2015, 53)

E mafai ona e valaaulia tagata aoga e faitau le Mataupu Faavae ma Feagaiga 64:33, ma vaavaai mo mea ua aoao mai e le Alii ma pe faapefea ona fesootai i ala o faasalalauga faaagafesootai.

Mafaufau e fai atu fesili nei:

• O a ni aoaoga masani o e vaaia i le saunoaga a Elder Bednar ma lenei tusitusiga paia?

• E mafai faapefea ona sili atu lou punouai i le faalilofia o le lalolagi i le amiotonu ma le upumoni?

• O a nisi o auala e mafai ona tatou faaaogaina ai tekinolosi mo lo tatou tuputupu ae patino ma le atinaega?